Thursday, June 21, 2018

ಗೊಂಚಲು - ಎರಡ್ನೂರಾ ಅರ್ವತ್ತೆರಡು.....

ಹಾದಿ - ಹಾಳೆ.....  

ನೀ ಗೆದ್ದ ಗೆಲುವುಗಳ ಸಂಭ್ರಮಿಸಲು ಜಗವೆಲ್ಲ ಜೊತೆ ಬರಲಿ...
ಎಡವಿದೆಯಾ - ಪೆಟ್ಟು ಬಿತ್ತಾ - ತಿರುಗಿ ನೋಡು - ಸೋತ ಸೋಲಿಗೆ ಮಂಡಿಯೂರದಂತೆ ಆ ಕ್ಷಣ ಸಾವರಿಸಿಕೊಂಡು ನಿಲ್ಲಲು ಸಣ್ಣ ಊರುಗೋಲು ನನ್ನ ಹೆಗಲು - ನೋವ ನಿಟ್ಟುಸಿರು ಜಗದ ಮಾತಿನ ಸರಕಾಗದಂತೆ ನನ್ನುಡಿಯಲ್ಲೇ ಅಡಗಲಿ...
ಬಡ ಗುಡಿಸಲ ಒಡೆಯನಲಿ ಕೊಡಲಿರುವ ಒಳ ಕೋಣೆಯ ನಗನಾಣ್ಯ ಅದಷ್ಟೇ: ನಡೆನುಡಿಯ ಪುಟ್ಟದೊಂದು ಭರವಸೆಯ ಶಕ್ತಿ ಮಂತ್ರ - "ಜೊತೆಗೆ ನಾನಿದೀನ್ಕಣೋ..."

ಗೆಲುವಿನ ನಶೆಗೆ ಅರ್ಥವಾಗುವುದಿಲ್ಲ; ಎಂಥಾ ಗಳಿಕೆ ಗೊತ್ತಾ ಅದೂ - ಖಾಲಿ ಖಾಲಿ ಜೋಳಿಗೆಯಲಿ ಊರಾಚೆ ಬಯಲಲಿ ಕಬೋಜಿಯಾಗಿ ನಿಂತಾಗ 'ನಾನಿದೀನ್ಕಣೋ' ಅಂದು ತೋಳ್ದೆರೆವ ಒಂದು ಜೀವ...

ಅಲ್ವಾ -
ಆಗೊಂದು ಜಗಳ - ಅಲ್ಲಿಷ್ಟು ವಿಚಾರ ಭಿನ್ನತೆ - ನಡೆವ ಹಾದಿಯ ನಡುವೆ ಸಾವಿರ ಬೇಲಿಯ ಕವಲು...
ಆದರೇನಾತು, ಈ ಎದೆ ಉಮ್ಮಳಿಸಿ ಕೊರಳು ಹಿಂಡುವಾಗ ಕಣ್ಣ ಕಕ್ಷೆಯಲಿ ಫಕ್ಕನೆ ಹೊರಳುವುದು ಆ ಅದೇ ಮುಖ...
ಎಲ್ಲ ವಿಪರೀತಗಳ ಆಚೆಯೂ, ನೋವೂ ಅಂತ ಈ ಕಂಗಳು ತೋಯುವಾಗಲೆಲ್ಲ "ನಾನಿಲ್ಲೇ ಇದೀನಿ ಕಣೋ" ಅಂದು ಬಾಗಿಲಿಗೆ ಬಂದು ನಿಲ್ಲುವ ಆ ಶುದ್ಧ ಶಾಂತ ಹೆಗಲು...
#ಆತ್ಮೀಯ_ನೇಹವೆಂದರೆ_ಅದೇ_ಅದಷ್ಟೇ_ಮತ್ತೇನಲ್ಲ...
#ನನ್ನೆಲ್ಲ_ನಗೆಯ_ಮೂಲ...
⇱ ⇲ ⇜ ⇝ ⇱ ⇲

ಗುಟುಕು ಉಸಿರಿಗಾಗಿ ಹೃದಯ ಪಟಪಟಿಸುವಾಗ ಗಬಕ್ಕನೆ ತಬ್ಬುವ ಶುದ್ಧ ಮಂತ್ರ ಅವಳು; ರಕುತದಿಂದ ಜೀವ ತುಂಬಿದವಳು - ಸೋಲಿಗೂ, ನೋವಿಗೂ ನಗೆಯ ನಡಿಗೆ ಕಲಿಸಬಲ್ಲವಳು - ಮನೋ ಕುಂಡಲಿಯ ಸಂಜೀವಿನಿಯೇ ಇರಬಹುದು ಅವಳು...
#ಅಮ್ಮಾ...
⇱ ⇲ ⇜ ⇝ ⇱ ⇲

ಜಗತ್ತು ಇನ್ನಷ್ಟು ಮತ್ತಷ್ಟು ಮಗದಷ್ಟು ಚಿಕ್ಕದಾಗಲಿ - ಪ್ರೀತಿಯ ಕೈಕೊಳದಲ್ಲಿ...
ಸಾವಿರ ಕವಲಿನ ಪ್ರೀತಿ - ಸಾವಿನ ಸಲಿಗೆಯ ಪ್ರೀತಿ...
#ಪ್ರೀತಿ_ಪರಿಭ್ರಮಣ #ಪ್ರೀತಿ_ಜಾಗತೀಕರಣ... 
⇱ ⇲ ⇜ ⇝ ⇱ ⇲

ಹೂವಿಗೆ ಹೂವಿತ್ತು ನಗೆಯ ಬಿತ್ತುವ ಪ್ರೀತಿ...
ಹಣ್ಣ ತಿರುಳಿನ ಸಿಹಿಗಿಂತ ಸವಿಯಾದ ರುಚಿ ಈ ಪ್ರೀತಿ...
ನಾಲಿಗೆಯಿಲ್ಲದ ಎದೆಯ ಜೋಳಿಗೆಯಿಂದೆತ್ತಿ ಕೊಡು ಕೊಳ್ಳುವ ಪುಟ್ಟ ಪುಟ್ಟ ಖುಷಿಗಳಲ್ಲೇ ಪ್ರೀತಿಯ ಅಪಮೌಲ್ಯವಾಗದ ನೈಜ ಅಸ್ತಿತ್ವ...
ಪ್ರೀತಿ ಪ್ರೀತಿಯನ್ನೇ ಬಿತ್ತಿ ಬೆಳೆಯಲಿ - ಪೀಳಿಗೆಯಿಂದ ಪೀಳಿಗೆಗೆ ಪ್ರೀತಿಯೊಂದೇ ದಾಟಲಿ...
⇱ ⇲ ⇜ ⇝ ⇱ ⇲

ನಟ್ಟ ನಡು ರಾತ್ರಿ ಮಿಂಚುಹುಳವೊಂದು ಕನ್ನಡಿಗೆ ಮುತ್ತಿಟ್ಟಿತು - ಬೆಳಕು ಸಾವಿರ ಹೋಳು...
#ದೈವ_ಸಂಭಾಷಣೆ...
⇱ ⇲ ⇜ ⇝ ⇱ ⇲

ಕನಸ ಗುಡಿಯ ನೆತ್ತಿ ಕಾಯ್ವ ಗುಟುಕು ಒಲುಮೆಯಂತೆ, ಕತ್ತಲೋಟದ ಹಳಿಯ ಹಾಯ್ವ ಮಿಣುಕು ಬೆಳಕಿನಂತೆ - "ಯಾರೋ ಬರೆದ ಏನೋ ಸಾಲಲಿ ನೀನೂ ಸಿಗಬಹುದು, ನನಗೆ ನಾನೇ ಸಿಗಬಹುದು..."
#ಓದಿನೊಕ್ಕಲು...
⇱ ⇲ ⇜ ⇝ ⇱ ⇲

ಎಂಥ ಅಪ್ಪನಾಗಬಾರದು ಎಂಬುದಕ್ಕೆ ಸಾಕ್ಷಿ ಕೊಟ್ಟ - ಆದ್ರೆ ಇಂಥಾ ಅಪ್ಪ ಆಗ್ಬೇಕು ಅಂಬೋ ಕನಸ ಬಿತ್ತಿದ - ಜವಾಬ್ದಾರಿಗಳ ಸವಾಲಿಗೆ ಹೆಗಲು ಕೊಡಲಾಗದ, ಆತ್ಮದ ಪ್ರಶ್ನೆಗೆ ಜವಾಬು ನೀಡಲಾಗದ ಅಸ್ತಿತ್ವ ಮೈಗಷ್ಟೇ ಅಪ್ಪನಾಗುವುದು ಮತ್ತು ಆ ಅಂಥಾ ಅಪ್ಪನ ಪಾತ್ರಕ್ಕೆ ಸ್ವಯಂ ಘನತೆ ಇಲ್ಲ ಎಂಬ ಪ್ರಜ್ಞೆ ತುಂಬಿದ ಈ ಬದುಕು ಅದೆಷ್ಟು ಅಮ್ಮ ಅಮ್ಮ...
#ಅಪ್ಪಂದಿರ_ದಿನವಂತೆ...
                 ತೇದಿ: 17-06-2018
⇱ ⇲ ⇜ ⇝ ⇱ ⇲

ಗೆಳೆಯ ಅಪ್ಪಾನು ಆಗಿದ್ದಾನೇ ಎಷ್ಟೋ ಸಲ💞 -
ಅಪ್ಪಂದಿರ ದಿನದ ಶುಭಾಶಯ ಕಣೋ ಮಂಗೂ... ಗೆಳತಿ ಶುಭಕೋರಿದಳು...
#ಧನ್ಯತೆ...
                ತೇದಿ: 17-06-2018

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

Wednesday, June 6, 2018

ಗೊಂಚಲು - ಎರಡ್ನೂರಾ ಅರವತ್ತೊಂದು.....

ಹರಿದ ಚಿತ್ರಗಳು..... 

ಬದುಕೂ ಏನೂ ಹೇಳಿಲ್ಲ - ಕೇಳಿಲ್ಲ
ಸಾವೂ ಏನೂ ಕೇಳಿಲ್ಲ - ಹೇಳಿಲ್ಲ
ಅಲ್ಲಿಗಲ್ಲಿಗೆ ಚುಕ್ತಾ....
#ಕಥೆ...
⇱⇲⇚⇛⇱⇲

ತುಂಬಾ ತುಂಬಾ ಪುಟ್ಟ ಪರಿಧಿಯ ಬದುಕು - ತುಂಬಾ ತುಂಬಾ ಉದ್ದ ಹಾದಿ ಅನ್ನಿಸುವುದು ದುರಂತ...

ಭೋರ್ಗರೆವ ಅಲೆಗಳ ಮಾತೇ ಮಾತು - ಅಗಾಧ ಅನಾದಿ ಮೌನದ ದಂಡೆ - ಅಭೇದ್ಯ ಸಾಮರಸ್ಯ...!!! ಹೇಗೆ...??

ತಿಳಿನೀರ ಕೊಳದಲ್ಲಿ ಕಾಲಿಟ್ಟು ಕೂತವನ ಎದೆಯಲ್ಲಿ ಸಮುದ್ರ ಸಂವೇದ - ನಿರಂತರ ಸಂಘರ್ಷ... ವಿಕ್ಷಿಪ್ತ...

ಚಂದ್ರ ತಾರೆ ಆಕಾಶ ಅವಕಾಶಗಳ ಪ್ರೀತಿಸುವವನ ಎದೆಯಲ್ಲಿ ಬಯಲಾಗುವ ಭಯ ವಿಪರೀತ - ವಿಪರ್ಯಾಸ...

ಸಾವು ಮುಟ್ಟದ ಮುಹೂರ್ತವಿಲ್ಲ - ಹುಟ್ಟಿಗೆ ಜಾತಕದ ನಂಟು ಬೆಸೆದರೆ ಶಾಂತಿಯಂತೆ... ಸೋಜಿಗ...

ಬದುಕಿನೊಂದಿಗೆ ಸ್ನೇಹ ಅಂದರೆ ಸಾವಿನೊಂದಿಗೆ ಯುದ್ಧವಲ್ಲ - ಸಹಯಾನ... ವಿಚಿತ್ರ ಸತ್ಯ...

ಬದುಕ ಉಳಿಸಿಕೊಳ್ಳುವ ಹುತಾತ್ಮ ಬಡಿವಾರದಲ್ಲಿ ನನ್ನೊಳಗಣ ಬೆರಗು ಕಳೆದೋದ ತಿರುವ್ಯಾವುದು ತಿಳಿಯಲೇ ಇಲ್ಲ - ಹೀನಾಯ ಸೋಲು...
                             ___ ಹರಿದ ಚಿತ್ರಗಳು...
⇱⇲⇚⇛⇱⇲

ಪ್ರತೀ ಹುಟ್ಟಿಗೂ ಬದುಕೋ ಸ್ವಾತಂತ್ರ್ಯ ಇದೆ - ಸಾವು ಜೀವವ ಬದುಕೋಕೆ ಬಿಟ್ರೆ...
ಪ್ರತೀ ಬದುಕಿಗೂ ತನ್ನಿಷ್ಟದಂತೆ ನಡೆಯುವ ಸ್ವಾತಂತ್ರ್ಯ ಇದೆ - ನಮ್ಮದೇ ನಿಸ್ತಂತು ಭಾವಾಲಾಪಗಳ ಮೀರಿ ಮಾನಾಪಮಾನಗಳ ನೋವನ್ನು ಹೀರುವ ಅಂತಃಶಕ್ತಿ ಗಟ್ಟಿ ಇದ್ದರೆ...
ಇಷ್ಟಾಗಿಯೂ -
ಒಂದಕ್ಕೊಂದು ಒಂದಾನೊಂದು ರೀತಿಯಲ್ಲಿ ಅವಲಂಬಿತವೇ ಆದ ಪ್ರಕೃತಿ ಪಾತ್ರಗಳ ನಡುವೆ ಸ್ವಾತಂತ್ರ್ಯ, ಸ್ವಾವಲಂಬನೆ ಎಂಬುದೆಲ್ಲ ಒಂದು ಚಂದದ ಸುಳ್ಳು ಅಲ್ಲಲ್ಲ ಅರ್ಧ ಸತ್ಯದ ಬಾಹ್ಯ ವ್ಯಾಪಾರ ಅನ್ನಿಸುತ್ತೆ...
ಕೊಟ್ಟದ್ದನ್ನು ಕೊಟ್ಟವನೇ ದಾಖಲಿಸಿದರೆ ಅಹಂಕಾರ - ಇನ್ಯಾರೋ ಹೇಳಿದರೆ ದಾನವೋ, ತ್ಯಾಗವೋ ಏನೋ ಒಂದು - ಯಾರೂ ಹಾಡದೆ ಹೋದರೆ ಇನ್ನೇನೋ ಮಹತ್ತು - ಪಡೆದೆ ಎಂದರೆ ಹೋರಾಟ - ಒಟ್ನಲ್ಲಿ ಇದ್ದದ್ದನ್ನೇ ಕೊಡುವ, ಪಡೆವ, ಹಿಡಿದಿಡುವ ಬೊಬ್ಬೆಗಳಲ್ಲಿ ಪ್ರೀತಿ ಕೂಡ ಪರಾವಲಂಬಿಯೇ ಅನ್ನಿಸುತ್ತೆ...
#ನಾನೆಂಬೋ_ಬರೀ_ಸುಳ್ಳು...
⇱⇲⇚⇛⇱⇲

ಮುದಿ ಹಗಲಿನೊಂದಿಗೆ ಮರಿ ಇರುಳು ಮಾತಿಗಿಳಿವ ಹೊತ್ತು...
ಪ್ರತಿ ನಿಶ್ವಾಸವೂ ಕೊಟ್ಟ ಕೊನೆಯದೇ ಅಂದುಕೊಂಡು ಕಾಯುತ್ತೇನೆ ನಿನ್ನ ಆಗಮನಕ್ಕೆ - ದೇಹದ ಬೆಂಕಿಯಲಿ ಮನವು ಬೇಯದಂತೆ, ಮನದ ಬೇಗುದಿಗೆ ದೇಹ ಸುಡದಂತೆ ಎನ್ನಿಂದ ಎನ್ನ ಕಾಯ್ದುಕೊಡು ಹಂಸೆ - ಬದುಕ ಹೆಸರುಳಿಯಲಿ...
#ಪ್ರಾರ್ಥನೆ...
⇱⇲⇚⇛⇱⇲

'ಮರಕಿಂತ' 'ಮರ' ಎತ್ತರವ ಕಾಣಬೇಕೆಂದರೆ ಮಣ್ಣಾಳಕೆ ಬೇರಿಳಿಸಿ, ಮಳೆ ಗಾಳಿ ಬಿಸಿಲಿಗೆ ಎದೆಯೊಡ್ಡಿ ಆಗಸಕೆ ಬೆಳೆಯಬೇಕು - ಅದು ಪ್ರಜ್ಞೆಯ ಮಾತು; ಆದರೆ ಮನಸು ಕೊಡಲಿ ಕಣೋ -  ಅದಕೆ ನಿನ್ನ ಸುತ್ತ ಏನೂ ಬೆಳೆಯಬಾರದಷ್ಟೇ...
ಬಳ್ಳಿಯೂ ತಬ್ಬುತ್ತೆ, ಗೆದ್ದಲೂ ತಬ್ಬುತ್ತೆ ಮರವ, 'ನಗೆಯ ಹೂವರಳಿಸಿ ಆಳಬೇಕು' - ಅದು ಪ್ರಜ್ಞೆಯ ಆಳ; ಆದರೆ ಮನಸು ಬಂದಳಕ ಕಣ್ರೀ - ಚಿಗುರಿನ ಜೀವರಸವೆಲ್ಲ ನಂಗ್ ನಂಗೇ ಎಂದುಕೊಂಡು ಕುಡಿಯಲು ಹವಣಿಸುತ್ತೆ...
#ಭಾವೋದ್ವೇಗೀ_ಸಂಬಂಧ...
ಹಸಿಯಿಲ್ಲದ ನೆಲ - ಹಸಿರಿಲ್ಲದ ಬಯಲು - ಹಪಹಪಿಯ ನಾನಾವಿಧ ಕ್ರೂರ ಹಸಿವಿನ ಬಿರುಕುಗಳು...
#ಎನ್ನೆದೆಯಂಗಳ...
ಕೊಳಲ ಕಾವ್ಯ, ಪಾಂಚಜನ್ಯದ ದ್ರವ್ಯ ಎರಡನೂ ಪ್ರೀತಿಸಲು ಕೃಷ್ಣನೇ ಆಗಬೇಕು; ಮನವ ಕೃಷ್ಣನೇ ಆಳಬೇಕು...
#ಉಪಸಂಹಾರ...
 ***ಅರ್ಥ ಅರಿಯದ ಸಾಲುಗಳು...
⇱⇲⇚⇛⇱⇲

ಗೊತ್ತು -
ಬೊಗಸೆಯಲಿ ತುಂಬಿದ ಮಳೆ ಮುಷ್ಟಿಯಲಿ ಬರೀ ತೇವ - ಒಳಗೆಳೆದಷ್ಟೇ ಹೊರಬಿಟ್ಟರಷ್ಟೇ ಉಸಿರ ಅಸ್ತಿತ್ವ - ಪ್ರೀತಿ ಅಂದ್ರೆ ಸ್ವಾಧೀನತೆಯಲ್ಲ ಸಹಯಾನದ ಸ್ವಾತಂತ್ರ್ಯ...
ಆದರೆ ನಾನಾದರೋ -
ಎನ್ನೆದೆಯ ಗರ್ಭದಲಿ ನಿನ್ನ ಕೂಡಿಹಾಕದೇ, ಬಯಲ ಬಾನು ಸಲಹಿದಂತೆ ಸಲಹಿಕೊಳ್ಳಲಾಗದ ನನ್ನ ಸೋಲಿಗೆ 'ಎನ್ನ ತೊರೆಯದಿರೋ' ಎಂದು ನಿನ್ನ ಕೈಹಿಡಿದು ಒರಲುತ್ತೇನೆ...
ಮತ್ತು -
ಹರಿವಿಲ್ಲದೇ ನೀ ನಿಲ್ಲಲಾರೆ ಎಂಬುದ ಸಹಿಸದ ಎನ್ನ ಬಡ ಮನದ ಸುಕ್ಕಿನ ಹಳಹಳಿಗೆ 'ನಾ ನಿನ್ನ ತೊರೆಯಲಾರೆ' ಅಂತಂದು ಬಿಕ್ಕಳಿಸಿ ನಿನ್ನ ಕೈಹಿಡಿಯುತ್ತೇನೆ...
ಸಾಗರವ ಕುಂಭದಲಿ ಬಂಧಿಸಲು ಹವಣಿಸುವ ಹುಚ್ಚು ನಾನು - ನನ್ನದೇ  ಮನದ ಎಡಬಿಡಂಗಿ ಅಪಸವ್ಯಗಳಿಗೆ ನಿನ್ನ ಹೆಸರಿಡುತ್ತೇನೆ...
#ನೇಹಾನುಭಾವಬಂಧ...
⇱⇲⇚⇛⇱⇲

ಸಾವನ್ನು ಬರೆದೇ ಬರೆದೆ - ಬದುಕು ಹಗುರಾಯಿತು...
ನಿನ್ನನ್ನು ತುಂಬಿಕೊಂಡೆ - ಸಾವೂ ಕನಸಾಯಿತು...
#ನಾನು...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

ಗೊಂಚಲು - ಎರಡ್ನೂರಾ ಅರವತ್ತು.....

ನಾನೆಂಬೋ ಪಾತ್ರ..... 

ಅಲೆ ತೊಳೆದ ಅಂಗಳದಿ ಎದೆ ಗೀಚಿದ ರಂಗೋಲಿಯ ಹೆಸರು ನನ್ನದೇ - ಎನಗೆ ಎನ್ನದೇ ಧ್ಯಾನ - ಸಾವಿರ ಸಾವಿನ ಮಾತಾಡೋ ಮೌನ...
ನಾಟಕ ಮುಗಿದ ಮೇಲೂ ವೇಷ ಕಳಚಲಾಗದ ಪಾತ್ರ ನಾನಿಂದು - ನನಗೆ ನಾನೇ ನಂಬಿಸಿಕೊಂಡಾಗಿದೆ ಆವಾಹಿಸಿಕೊಂಡ ಪಾತ್ರದ ನಗೆಯನ್ನೇ ನಾನೆಂದು - ಒಂದೊಮ್ಮೆ ಬಣ್ಣ ತೊಳೆದು ಬಯಲಾದರೆ ಬಿಂಬವೂ ಬೆಚ್ಚೀತು ಕಂಡು ಒಳಿಗಿನಳುವನ್ನು...
ಸೂತಕವಿಲ್ಲದ ಮುಖವಾಡ ತೊಟ್ಟ ಸೂತ್ರವಿಲ್ಲದ ಪಾತ್ರ - ಕನ್ನಡಿ...
ಆಡಬೇಕಿದ್ದ ಸಾವಿರ ಮಾತುಗಳು ಗಂಟಲಲ್ಲೇ ತೆವಳುತ್ತಿರುತ್ತವೆ - ಆಡಿಬಿಟ್ಟ ಆಡಬಾರದಿದ್ದ ಒಂದೇ ಒಂದು ಮಾತು ಎದೆಎದೆಯ ಸಾಸಿರ ಹೋಳಾಗಿ ಸೀಳಿರುತ್ತದೆ...
ಆಡಿದ್ದು ಆಡಿದಂತೆಯೇ ನಾಟುವುದಿಲ್ಲ - ಶಬ್ದಕ್ಕೆ ನಾನಾರ್ಥದ ಭಾವ ಭಾಷ್ಯಗಳ ಬಡಿವಾರ...
ನನ್ನ ಕನಸೂ ನನ್ನದಲ್ಲ ಅಂಬೋ ಸಾವಿನ ನೆಳಲು - ಪ್ರೀತಿಯ ಸಂತೆಯಲ್ಲೂ ವಿಲೇವಾರಿಯಾಗದ ವಾಸ್ತವದ ಚಿತ್ರ - ಖಾಲಿ ಖಾಲಿ ಜೋಳಿಗೆಯ ಕಬೋಜಿ ಪಾತ್ರ ನಾನು...
ಗಾಳಿಯ ಸಖ್ಯದಿ ಮೋಡ ಮಣಿ ಮಣಿ ಹೋಳಾಗಿ ಮಳೆಯಾಯಿತು - ಹರಿವು...
ಕೊಳಲ ನಾದಕೆ ನವಿಲಾದ ಯಮುನೆಯೂ ಸಾಗರ ಸೇರಿ ಪಾಂಚಜನ್ಯವ ಹಡೆಯುತ್ತಾಳೆ - ಅರಿವು...
#ಪಾಪಿ_ಪುಣ್ಯಾತ್ಮ_ಪಾತ್ರಗಳು...
#ನಾನು...
↬↭↩↹↪↭↫

ಈ ಜನುಮದ ಕನಸುಗಳ ಹಡೆಯುವ ಹಕ್ಕನ್ನು ಮರು ಜನ್ಮಕೆ ಎತ್ತಿಡಬೇಕಿದೆ...
ಅಥವಾ
ಶವ ಪೆಟ್ಟಿಗೆಯೊಂದನ್ನು ಕೊಳ್ಳಬೇಕಿದೆ - ಹುಟ್ಟುತ್ತಲೇ ಸತ್ತ ಖುಷಿಯ ಖಯಾಲಿಗಳನೆಲ್ಲ ಜನ್ಮಾಂತರಕೆ ಕಾಯ್ದಿರಿಸಲು........
#ಆಶಾವಾದ...
↬↭↩↹↪↭↫

ಮಲಗು ಮೌನವೇ ಮಲಗು - ಕನಸ ಕಣ್ಣಿನ ಕುರುವಾಗದೇ, ನಗೆಯ ಅಂಗಾಲ ಸೀಳುವ ಅಂಬಿನಲುಗಾಗದೇ - ಮಲಗು ಮೌನವೇ ಮಲಗು - ಒಲವ ಕುಡಿಗೆ ಮಾತು ಪದ ಕಟ್ಟಬೇಕಿದೆ - ಎದೆ ಗುಡಿಯ ದೇವತೆಗೆ ಪ್ರೀತಿ ಮಂತ್ರ ಹೇಳಬೇಕಿದೆ...
#ಅಪಧಮನಿಯ_ಹಾದಿಯಲೇ_ಹೆಪ್ಪಾದ_ಕಣ್ಣಹನಿಯ_ಕವಿತೆ...
↬↭↩↹↪↭↫

ಸದ್ದು ಮಾಡಬೇಡ - ಮೆಲ್ಲನೆ ಬಂದು ಕದ್ದು ಹೋಗು ಉಸಿರ - ಬೆಕ್ಕಿನ ಹೆಜ್ಜೆಯೇ ಚಂದ ನಿನಗೆ; ಸುದ್ದಿ ಮಾಡಬೇಡ - ಬಿಮ್ಮನೆ ಬಂದು ಉಂಡು ಹೋಗು ಉಸಿರ - ಕಳ್ಳ ಹಾದಿಯೇ ಘನತೆ ನಿನಗೆ...
#ಸಾವು...
↬↭↩↹↪↭↫

ಮಾತು ತಾ ಹೇಳಲಾಗದೇ, ಮೌನವದು ಅನುವಾದಿಸಲರಿಯದೇ, ಅಕ್ಷರವೂ ಹಡೆಯಲಾರದೇ ಸೋಲುವ ಎದೆ ಕಮರಿಯಲೇ ಕಟ್ಟಿಕೊಂಡ ಕಣ್ಣ ಹನಿಯೊಂದನು ಮುಸ್ಸಂಜೆಯ ತುಂಡು ಕರಿ ಮೋಡವೊಂದು ಸರಾಗವಾಗಿ ನೆಲಕೆ ದಾಟಿಸಿದ್ದು ಮಳೆಯ ಗೆಲುವು...
#ಸುರಿದು_ಬರಿದಾದಷ್ಟೂ_ಹದುಳ...
#ಮಳೆ...
↬↭↩↹↪↭↫

ಭಾವ ಹಾಗೂ ಭಾವ ಪ್ರೇರಿತ ಕ್ರಿಯೆ ಪ್ರಕ್ರಿಯೆಗಳನ್ನು ಎಷ್ಟು ಚಿಕ್ಕ ಚಿಕ್ಕ ಹೋಳುಗಳಾಗಿ ಒಡೆದು ನೋಡುತ್ತೇನೋ ಅಷ್ಟೂ ವಾಸ್ತವದ ಸ್ಪಷ್ಟ ಪಾತಳಿ ಬಿಚ್ಚಿಕೊಳ್ಳುತ್ತೆ ಎನ್ನೊಳಗೆ...
ನನ್ನೆಲ್ಲ ಭ್ರಮೆಯ ಪ್ರಭಾವಳಿಯ ಕಾಲು ಸೋಲುವ ಬಿಂದು ಅದೇ ಎಂದುಕೊಂಡಿದ್ದೇನೆ - ಭಾವ ಬಿಂಬಗಳನೆಲ್ಲ ಒಡೆಯುತ್ತ ಕೂರುತ್ತೇನೆ...
#ಒಳಗಣ_ಜಿದ್ದಾಜಿದ್ದಿ...
#ನಾನು...
↬↭↩↹↪↭↫

ನಿನ್ನೆ ಮೊನ್ನೆಯ ಜಾಡಿನಲ್ಲಿ, ಹಮ್ಮು ಬಿಮ್ಮಿನ ಕಂಬಿಯಲ್ಲಿ ಬಂಧಿಸಲ್ಪಟ್ಟ ಜಾಮೀನು ಸಿಗದ ಭಾವಗಳಿಗೆ ಸುಖಾ ಸುಮ್ಮನೆ ಕಾದು ಕಾದು ಸುಸ್ತಾಗಿ - ಸಂಜೆ ಕಣ್ಣು ಸಿಡಿದು ಸೊರಗಿ - ಎದೆಯ ನೆಲ ಒಣಗಿ ಬಿರಿದು - ಹಸ್ತ ಮೈಥುನದುತ್ತುಂಗದ ಅತೃಪ್ತ ಸುಖದ ಸುಸ್ತಿನೊಂದಿಗೆ ಕನಸು ಸುಟ್ಟ ಕಮಟಿನ ಕಳಮಳದಿ ಮುಗಿಯಲಾಗಿ ಇರುಳು...... ಮತ್ತದೇ ಬೆಳಗು - ಖಾಲಿ ಖಾಲಿ ಒಳಗು....
ಹರಿವು ನಿಂತೇ ಹೋದಲ್ಲಿ......... ಉಳಿದದ್ದು ಉಸಿರೊಂದೆ......
ಸಾವೇ - ನಿನ್ನೊಂದಿಗಿನ ಎಲ್ಲ ಜಗಳವೂ ಇಂದಿಗೆ ಮುಗಿದುಹೋಯಿತು...... ಬದುಕ ಪ್ರೀತಿಗಿಂದು ಸೂತಕ...
#ನಾನು...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

Friday, May 18, 2018

ಗೊಂಚಲು - ಎರಡ್ನೂರೈವತ್ತೊಂಭತ್ತು.....

ನಾನೆಂಬೋ ಹುಡುಕಾಟ..... 

ಪ್ರೀತಿ ಅಂದ್ರೆ ಈ ಬದುಕಿನ ಜೀವ ಭಾವದ "ಜೀವಂತ" ಕಣ್ಣ ಹನಿ... 💞
⇍↺⇎↻⇏

ಏನ್ಗೊತ್ತಾ -
ಮಾತು, ಕೃತಿಗಳ ಹಿಂದಿನ ಪ್ರೀತಿ, ಕಾಳಜಿ ಮನವ ತಾಕದೇ ಹೋದಾಗ ಅಥವಾ ಪ್ರೀತಿ, ಕರುಣೆ, ಕಾಳಜಿಗಳೆಲ್ಲ ಕೃತಿಯಾಗಿ ಒಗ್ಗದೇ ಬರೀ ಒಣ ಒಣ ಮಾತಿನ ಅಲಂಕಾರವಾದಾಗ ಭಾವ ಬಾಂಧವ್ಯಗಳಲ್ಲೆಲ್ಲ ಉಳಿವುದು ಪೂರಾ ಪೂರಾ ವ್ಯಾವಹಾರಿಕ ವ್ಯಾಯಾಮ ಅಷ್ಟೇ........
ಅಷ್ಟಾಗಿಯೂ, ಅಂತಲ್ಲೂ ತುಸುವಾದರೂ ಮಿದು ಭಾವದ ಭ್ರಾಂತು ಉಸಿರಾಡಬೇಕೇ - ಸಬೂಬುಗಳ ಮರಳ ಮಹಲನು ನಂಬಿ ಬಂಧಕ್ಕೆ ಪ್ರೀತಿಯ ಹೂಡಬೇಕು ಅಷ್ಟೇ...
#ಭ್ರಮೆಗಳಲ್ಲಿ_ಸುಖವಿದ್ದರೆ_ಭ್ರಮೆ_ಒಳ್ಳೆಯದೇ...?!
⇍↺⇎↻⇏

ಹೃದಯಹೀನನ ಮನೆಗೂ ನೇಹದ ತೋರಣವಿದೆ...
ಈ ಹೃದಯವೆಂಬೋ ಮಾಂಸದ ಮುದ್ದೆಗೆ ಸುಸ್ತಾದಷ್ಟು ಸುಲಭಕ್ಕೆ ಹೃದಯದ ಭಾವ ಕೋಶಕ್ಕೆ ಸುಸ್ತಾಗುವುದಿಲ್ಲವಾ...!!??
ಜಗದ ಭಾವುಕತೆ (?) ಜಡವ ಸೋಕುವುದಿಲ್ಲವೇನೋ...
#ನಾನು...
⇍↺⇎↻⇏

ಮರುಳನ ಬರಿಗಾಲ ಹಾದಿಯಲೂ ಕಂಡದ್ದು ಉಂಡದ್ದೆಲ್ಲ ನಗುವೇ......
#ಮರುಳನ_ಮಾಡೆನ್ನ_ಬದುಕೇ...💞
#ಎನ್ನ_ಕಾಲ್ದಾರಿಯಲಿ_ಎನ್ನದೇ_ಗುರುತಿರಲಿ...👣
⇍↺⇎↻⇏

ನಗೆ ನದಿಯ ಪಾತ್ರದ ನಟ್ಟ ನಡು ಹಾದಿಯಲಿ ಒಂದೆರಡು ನೋವ ಸುಳಿ - ಕೊಟ್ಟದ್ದು ಪಡೆದದ್ದು ನಮ್ಮ ನಮ್ಮೊಳಗೇ...
ಆ ಚಕ್ರ ಸುಳಿಯ ಬಿಳಲ ಬಳಸಿ ಹಾಯಲಾರೆವೇ ಪ್ರೀತಿ ಹಾಯಿಯ ಬಿಗಿಗೊಳಿಸಿ - ತೇಲುತಿರುವಂತೆ ಬಂಧ ಗಂಧ ನಮ್ಮ ಮಡಿಲೊಳಗೇ...
ದೂರ ದೂರ ಸರಿದು ಚಿಟಿಕೆ ನೋವಿನ ಅಂಡು ಚಿವುಟುತ್ತ ಕೊರಗಬೇಕೇಕೆ - ಅಸ್ತಿತ್ವವಿಲ್ಲವೇ ಬಳಿ ಆತು ಕೂತು ಹಂಚಿಕೊಂಡ ನೆಂಚಿಕೊಂಡ ಬೊಗಸೆ ನಗೆಯ ಕರಗಕೆ...
ಬಾ ನನ್ನ ಜೊತೆಗೆ ಕೊರಳೊಡ್ಡಿ ಕಟ್ಟಿಕೊಂಡ ಎಲ್ಲ ಎಲ್ಲೆಯ ಮರೆತು - ಕಣ್ಣ ಹನಿಯ ಹಾದಿಯಲ್ಲೇ ಮೂಡಲೆರಡು ಪುಟ್ಟ ಪುಟ್ಟ ನಗೆಯ ಹೆಜ್ಜೆ ಗುರುತು...
#ನಗೆಯ_ಸಂಕಲಿಸಿ_ಸಂಭ್ರಮಿಸೋಣ...
#ಭಾವ_ಭಾವೈಕ್ಯ_ಬಂಧ...
⇍↺⇎↻⇏

ಚಿಟಿಕೆ ಪ್ರೀತೀನ ಚಿನ್ನವೆಂದು ಹಂಚಿದೆ - ಬೊಗಸೆ ತುಂಬಾ ನಗುವೇ ನಗು...😊
#ಅಕ್ಷಯ_ತೃತೀಯ...💞
⇍↺⇎↻⇏

ಓದಿದ್ದು, ಓದಬೇಕಾದದ್ದು, ಓದಲಾಗದೇ ಇದ್ದದ್ದು ಎಲ್ಲ ಸೇರಿದೀ ಬದುಕು - ಪುಸ್ತಕ...
ಅನುಭವ - ಗುರು...
ಪರಿಣಾಮವೇ ಪಾಠ...
'ನಾನೆಂಬೋ' ನಾನಾದರೋ ಬರೀ ಉಡಾಳ ವಿದ್ಯಾರ್ಥಿ...
#ಪುಸ್ತಕ_ದಿನ...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

ಗೊಂಚಲು - ಎರಡ್ನೂರೈವತ್ತೆಂಟು.....

ಹುಚ್ಚು ಬಯಲಾಟ..... 

ತೀರಾ ತೀರಾ ಆಪ್ತ ಅಂತಾಗಿ ಸೊಂಪಾಗಿ ಅಂಟಿಕೊಂಡ ತಂಪು ತಂಪು ನಗೆಯ ಜೀವ ಭಾವಗಳು ಸರಕ್ಕನೆ ಕೃತಕ ಆಗಂತುಕತೆಯ ಆವಾಹಿಸಿಕೊಂಡು ಮುಖ ತಿರುವಿ ನಿಲ್ಲುವಾಗಲೆಲ್ಲ ನನ್ನ ನಗೆಯೇ ನಂಗೆ ಅಪರಿಚಿತ ಅನ್ನಿಸಿ ಎಲ್ಲೋ ಕಳೆದುಕೊಂಡದ್ದನ್ನು ಇನ್ನೆಲ್ಲೋ ಹುಡುಕುವ ಹುಚ್ಚಾಟದ ನಶೆಗೆ ಹೊರಳುತ್ತೇನೆ - ಗುರುತಿಲ್ಲದ ಗುರುತುಳಿಯದ ಬೀದಿಯ ಪಥಿಕನಾಗಲು ಹಾತೊರೆಯುತ್ತೇನೆ...
ಅಷ್ಟರಲ್ಲಾಗಲೇ - ಅರೆ - ಅಗೋ ಅಲ್ಲಿ - ಆಹಾ...
ಮೈ ತುಂಬಿಕೊಂಡು ಚಲಿಸುವ ಸಂತೆ ಮಾಳದ ಕಿರು ಹಾದಿಯ ಇಕ್ಕಟ್ಟಿನ ಸಂದಿಯ ಅಂಚಿನಲ್ಲಿ ಸಣ್ಣಗೆ ಬಿಚ್ಚಿಕೊಂಡ ಶುದ್ಧ ಅಪರಿಚಿತ ಅಬೋಧ ಮುಗುಳ್ನಗುವೊಂದು ಕಾಲಿಗೆ ನೇಹದ ಕೊಳ ಹಾಕಿ ನಿಲ್ಲಿಸಿಬಿಡುತ್ತೆ... 
ಅಯ್ಯೋ - ಆ ಅಯಾಚಿತ ಅಪರಿಚಿತ ಸ್ನಿಗ್ಧ ನಗೆಯ ಸ್ವಾಧವೇ - ಜನ್ಮಗಳ ಪ್ರೀತಿ ಹಸಿವೆಲ್ಲ ಮತ್ತೆ ಜಾಗೃತ...
ಚಪ್ಪರಿಸಿ ಮೆಲ್ಲುವಂತ ಹೊಸ ರುಚಿಗೆ ಮೈಮರೆಯುತ್ತೇನೆ...
#ಮತ್ತೊಂದು_ಪರಿಚಯ...
#ಹೊರಳಿ_ಮರಳಿ_ಅದದೇ_ಪುರಾತನ_ಭ್ರಾಂತಿಯ_ಸಿಂಗಾರದ_ಹಾದಿ...
↯↯↯↲↳↯↯↯

ಆ ದಾರಿಯ ತುಂಬಾ ಮುಳ್ಳೆಂದು ಹಳಹಳಿಸುತ್ತಿದ್ದರು - ಎನ್ನ ಹಾದಿಯ ಚಂದವ ಹಾಡಿದೆ - 'ನನ್ನ ಹಾದಿಯೇ ಸರಿ' ಅಂತಂದೆನೆಂಬ ಆರೋಪ ಬಂತು...
ಕೃಷ್ಣಾ,
ಜಗದ ಸಭ್ಯತೆಯ ಶಿಷ್ಟಾಚಾರಗಳ ಮುಸುಕಿನಿಂದ ಎನ್ನ ರಕ್ಷಿಸುವ ಹೊಣೆ ನಿನ್ನದು...
#ನಾನು...
↯↯↯↲↳↯↯↯

ಏನ್ಗೊತ್ತಾ -
ಬದುಕು, ಭಾವ, ಬಂಧಗಳೆಲ್ಲ ತಮ್ಮ ತಮ್ಮ ಪಾಳಿಯಲ್ಲಿ ಎನ್ನೆದೆಯ ಹೆಡೆಮುರಿಕಟ್ಟಿ ಬಡಿದು ಬೀಳಿಸಿ ನಕ್ಕಾಗಲೆಲ್ಲ ಶರಣಾಗದೇ ಸೆಟೆದೆದ್ದು ನಿಲ್ಲುವ ಇರಾದೆ ತುಂಬಿದ್ದು ನನ್ನೊಳಗಿನ 'ನಾನು' ಎಂಬ ಸೊಕ್ಕಿನ ಇಷಾರೆಯೇ...
ಕೆಲವನ್ನು ಕೊಂದದ್ದು, ಹಲವನ್ನು ಬೆಸೆದದ್ದು, ಒಟ್ಟಾರೆ ನನ್ನನ್ನು ಉಳಿಸಿದ್ದು - 'ನಾನು...'
ಇರಲಿ ಬಿಡಿ ಎದುರ ಹಳಿಯದೇ ನನ್ನೊಳಗೆ ನನ್ನ ಘನತೆ ಕಾಯುವಷ್ಟು 'ನಾನು...'
↯↯↯↲↳↯↯↯

ಸ್ಮಶಾನ ಕಾಯಲು ಕೂತವನು ಸಾವಿಗಂಜಬಹುದೇ............ ಸತ್ತದ್ದನ್ನು ಕೊಳೆಯುವ ಮೊದಲು ಹೂತುಬಿಡಬೇಕು....... ಅಷ್ಟೇ....... ತುಂಬಾ ಎದೆ ಹಿಂಡಿದರೆ ಎರಡು ಹನಿ ಅಶ್ರು ತರ್ಪಣ...... ಭಾವಪೂರ್ಣ ಶ್ರದ್ಧಾಂಜಲಿ - ಪದೇ ಪದೇ ಕೊಲ್ಲಲ್ಪಡುವ ಐನಾತಿ ಭಾವಗಳಿಗೆ...... ಅದಕ್ಕೆ ಅದಷ್ಟೇ.........
ಪ್ರೀತಿಯಾದರೂ ದೌರ್ಬಲ್ಯವಾಗಿ ನಿಂತನೀರಾದರೆ ಬದುಕು ರಸ ಹೀನವೇ - ಉಸಿರ ಕದಡದ ನಶೆ ಯಾವುದಿದೆ ಹೇಳಿ...
ಥತ್....
ಎಲ್ಲವೂ ಗೊತ್ತಿದ್ದೇನು ಬಂತು ಮಣ್ಣು - ಎದೆಯ ಹುಣ್ಣಿಗೆ ಮದ್ದು ಮಾಡದೇ ಅಲ್ಲೇ ಕೆರೆಕೆರೆದು ಮುದ್ದು ಮಾಡುತ್ತೇನೆ - ಎಷ್ಟೆಂದರೂ ಮಂಗನ ಸಂತತಿ ಅಲ್ಲವಾ...
#ನಾನು...
↯↯↯↲↳↯↯↯

ಹುಡಕ್ತಾ ಇದೀನಿ -
ಅಷ್ಟೆಲ್ಲ ಹತ್ತಿರ ತಂದು ನಿಲ್ಲಿಸಿದ್ದ "ಹುಷಾರು ಕಣೋ" ಎಂಬ ಒಂದೇ ಒಂದು ಕಾಳಜಿಯ ಮಾತು; ಅದೇ ಆ ಶುದ್ಧ ಅಕ್ಕರೆಯ ಮಾತೂ ಉಸಿರುಗಟ್ಟುವಂತಾದ ಹಳಸಲು ತಿರುವ್ಯಾವುದು...??
ಹುಡುಕುತ್ತಲೇ ಇದ್ದೇನೆ....
ಬಿಡಿ - ನಂಬಿಕೆಯ ಅರ್ಥ ಸತ್ಯ ಅಂತ ಅಲ್ಲ...
#ಸಂಬಂಧ

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

Saturday, April 21, 2018

ಗೊಂಚಲು - ಎರಡ್ನೂರೈವತ್ತೇಳು.....

ಸಾವು : ಬದುಕಿನ ಹಾದಿ.....  

ಕೋಗಿಲೆ ಮರಿಯ ಅಳುವನೂ ಇಂಚರ ಅಂದವರು ಕಾಗೆಯ ಲಾಲಿಯ ಹೊಗಳಿದ ದಾಖಲೆ ಇಲ್ಲ...
#ಪ್ರೀತಿಗೂ_ದನಿಯ_ಇಂಪಿನ_ಮೋಹ...
#ನೋವನೂ_ನಗೆಯ_ಹರಿವಾಣದಲೇ_ತೆರೆದಿಡಬೇಕು...
↯↯↯↺↻↯↯↯

ಒಳಗೆ ನಗು ಸತ್ತ ಘಳಿಗೆ ಮೊಗದಿ ಸಾವಿನ ಕಳೆಯ ಕಾಡಿಗೆ... 
#ಮೊಗವು_ಮನದ_ಕನ್ನಡಿ...
↯↯↯↺↻↯↯↯

ಹೇಗಿದೀಯಾ ಅಂದ್ರೆ........... ಬದ್ಕಿದ್ದೀನಿ...................  ಅಷ್ಟೇ.......... ಮತ್ತೇನಿಲ್ಲ..... ಉಸಿರ ಭಾರಕ್ಕೆ ಎದೆ ತುಸು ಬೀಗಿ ಬಿಗಿದಂತಿದೆ..... ಅಷ್ಟೇ ಅಷ್ಟೇ....🙂
↯↯↯↺↻↯↯↯

...........ನಿದ್ದೆಗಾದರೂ 'ಬದುಕಿನ' ಕನಸು ಬರಬಾರದೇ - ಕನಸಿಗಾದರೂ ಮುಟಿಗೆ ನಗೆ ಮುಗುಳ ಸುರಿಯಬಾರದೇ............
#ಹಸಿವೆಂದರೆ_ಅನ್ನವೊಂದೇ_ಅಲ್ಲ...
#ಅನ್ನವೆಂದರೆ_ಹೊಟ್ಟೆಯ_ಹಿಟ್ಟೊಂದೇ_ಅಲ್ಲ...
↯↯↯↺↻↯↯↯

ಸಾವಿಗೆ ಕಾಯುವ ಕಾಯಕ - ಬರದೇ ಬರಿದೇ ಕಾಡುವ ಪ್ರೇರಕ.....
ಭಯವೇನಿಲ್ಲ ಬದುಕ ನಡೆಯೆಡೆಗೆ - ಸುಸ್ತಾಗಿದೆ ಅದರ ಬೇಗೆಗೆ....... ಅಷ್ಟೇ......
#ಅವಳು
#ನನ್ನ_ಮಾತನ್ನೂ_ಆಡುತ್ತಾಳೆ...
↯↯↯↺↻↯↯↯

ಹೆಣವೊಂದು ದೊಡ್ಡ ನಗೆಯೊಂದಿಗೆ ನಿರಂತರ ಜೀವಿಸುವಿಕೆಯ ಭಾಷಣ ಮಾಡುತ್ತದೆ...
#ನಾನು...
↯↯↯↺↻↯↯↯

ದವಾಖಾನೆಯ ಕೋಣೆ ತುಂಬಿದ ಹಳದಿ ಹಳದಿ ಮಂಕು ಮಂಕು ಬೆಳಕು ಒಂದೇ ಹೊತ್ತಿಗೆ ನೋವಿಗೂ ನಗುವಿಗೂ ತನ್ನ ಉತ್ತರ ನಿರಾಮಯ ನಿರ್ಮಮ ಮೌನವಷ್ಟೇ ಎಂಬಂತೆ ತಣ್ಣಗೆ ಮಿನುಗುತ್ತೆ...
#ನಿರ್ಲಿಪ್ತಿ... 
↯↯↯↺↻↯↯↯

ಖುಷಿಯಾಗಿದೀನಿ........ ಖುಷಿಯಾಗಿರ್ತೀನಿ........ ಖುಷಿಯಾಗೇ ಹೋಗ್ತೀನಿ....... ಅಷ್ಟೇ.....ಎನ್ನೆದೆಯ ಗೂಡಿಗೆ ಕನ್ನ ಕೊರೆದರೆ ನಿಮಗೂ ಖುಷಿಯೇ ಸಿಗಲಿ.......☺
#ಸಾವೆಂಬೋ_ಬದುಕಿನ_ಚಡಪಡಿಕೆಯ_ಮುಖ್ಯ_ಹಾದಿ 


*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

Saturday, April 14, 2018

ಗೊಂಚಲು - ಎರಡ್ನೂರೈವತ್ತಾರು.....

ಬಡಬಡಿಕೆ.....
(ಕೂಡಿಸಿಟ್ಟ ಬಿಡಿಸಾಲು...)


↝↝↝ ಆಗೀಗ ಕಳೆದು ಹೋಗಬೇಕು ಹಂಗಂಗೇ - ಮರೆಯದಂಗೆ ಹುಡುಕಿ ಬರುವ ಮನಸುಗಳ ಹುಡುಕಿಕೊಳ್ಳಲಾದರೂ ಹಾಂಗೆ...
#ಮನದ ದಂಗೆ...


↝↝↝ ಪ್ರತೀ ಬೀದಿಯ ಮುಸ್ಸಂಜೆ ಮಬ್ಬು ಮೂಲೆಯಲಿ ಅಪ್ರಾಪ್ತ ಇಲ್ಲವೇ ಅತೃಪ್ತ ಕಾಮವೊಂದು ತನ್ನ ಹೆಣವ ತಾನೇ ಕಂಡು ಅಳುತ್ತಿರುತ್ತದೆ - ಪ್ರೇಮದ ಹೆಸರಿನಲ್ಲಿ...
#ಮಳೆಯಲ್ಲಿ_ನೆನೆವಾಗಲೆಲ್ಲ_ಮಂಗ_ಮನೆಯ_ಕನಸು_ಕಂಡಂತೆ...


↝↝↝ ನಮ್ಮ ನೆರೆಳು ನಮಗೆ ನೆರಳಾಗುವುದಿಲ್ಲ...


↝↝↝ ಎದೆಯ ಬಗ್ಗಡದ ನೀರೊಂದಿಗೆ ಕಣ್ಣ ಪಾಪೆಯಲಿ ಕಾದಿಟ್ಟ ನಗೆಯ ಕಣಗಳು ಕೂಡ ಒಂದೆ ಬಣ್ಣದ ನೀರಾಗಿ ಕೆನ್ನೆ ತೋಯಿಸುವಾಗ ಮುಚ್ಚಿಟ್ಟದ್ದೇನು ಬಿಚ್ಚಿಟ್ಟದ್ದೇನು - ಏನ ಭಂಗಿಸಿ ಏನ ಹಂಗಿಸಿದೆ...


↝↝↝ ಅರ್ಧ ಸತ್ಯ, ನಿತ್ಯ ಅತೃಪ್ತಿಗಳೇ ಇಲ್ಲಿಯವೆಲ್ಲವೂ ಮತ್ತು ಈ ನಿತ್ಯ ಸತ್ಯಗಳೇ ಬದುಕಿನ ವೈವಿಧ್ಯತೆಯ ಹಾಗೂ ಸೌಂದರ್ಯದ ನಿಜ ಮೂಲ ಅನ್ನಿಸುತ್ತೆ...!!


↝↝↝ ಬೆಂಕಿಗಿಟ್ಟ ಹೆಣದ ನೆತ್ತಿ ಸಿಡಿದ ಸದ್ದು ಹುಟ್ಟಿಸಿದ ನೀರವದಲ್ಲಿ ಹುಟ್ಟಿನ ಗುಟ್ಟು ಒಡೆದಂತೆನಿಸಿ ಸಾವಿನ ಸನ್ನಿಧಿಯಲ್ಲಿ ಬದುಕಿನ ಭವ್ಯತೆ ಕಂಡದ್ದು ನನ್ನ ಹುಚ್ಚಿರಬಹುದಾ...!!!


↝↝↝ ಚಂದ್ರನೂರ ಸೂಜಿಗಲ್ಲು ವಕ್ಷ ಶೃಂಗ - ಸುಖಾಗ್ನಿ ಮಡು ಯೋನಿ ಸುಳಿ - ವಿಜೃಂಭಿತ ವೀರ್ಯದ ಉರಿ ಕಮಟು - ಅತೃಪ್ತ ಕನಸಲ್ಲೂ ಒಂದು ತೃಪ್ತ ಸ್ಖಲನ...
#ಬದುಕ_ಮೈಮಾಟ...  

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

Wednesday, April 4, 2018

ಗೊಂಚಲು - ಎರಡ್ನೂರೈವತ್ತೈದು.....

ಸಾಲು ಸಾಲು ಅಪಶಬ್ದ..... 

ನಾನಾ ವಿಧದ ವಿಸರ್ಜನೆಗಳ ಸುಖ ಹಾಗೂ ಸುಖದ ಪರಿಣಾಮಗಳಿಗೆ ಎಷ್ಟೆಲ್ಲಾ ಚಂದದ ಶುದ್ಧ ರಂಗಿನ ಹೆಸರುಗಳು: ಹುಟ್ಟು - ಭಾವ - ಬದುಕು - ಸಾವು ಮತ್ತು ಇತ್ಯಾದಿ ಇತ್ಯಾದಿ ಉಪಾಂಗಗಳು...
#ಆತ್ಯಂತಿಕ_ಸುಖಗಳೆಲ್ಲ_ವಿಸರ್ಜನೆಗಳಲ್ಲೇ_(!?)...
↫↴⇱⇲↵↬

ಕೇಳಿಸ್ತಾ -
....... ಉದ್ದೇಶಗಳಿಲ್ಲದ ಜೀವಿತ ಉದ್ದವಾದಷ್ಟೂ ಉಪ್ಪುಪ್ಪು......
ಎಲ್ಲರನ್ನೂ ಪ್ರೀತಿಸ್ತೇನೆ ಹಾಗಾಗಿ ಯಾರನ್ನೂ ಪ್ರೀತಿಸಲಾರೆ ಅಥವಾ ಯಾರ ಪ್ರೀತಿಯೂ ಆಗಲಾರೆ.......
ಇಲ್ಲಿ ಪ್ರೀತಿಯೆಂದರೆ ಬೇಲಿಯೊಳಗಿನ ಹೂವು - ಹಾಗಾಗಿ ಪ್ರೀತಿ ಬಯಲ ಗಂಧವೆಂದವನು ಕ್ಷುದ್ರ ಜೀವಿ......
ಆದರೂ ........ ಹರಿಯುತ್ತಿರಬೇಕು....... ಇಲ್ಲಾಂದ್ರೆ............... ಹೊರಟುಬಿಡಬೇಕು..... ಅಷ್ಟೇ......
#ಒಂಚೂರು_ಹುಚ್ಚು_ಬಡಬಡಿಕೆ...
#ನಾನು...
         ____ವಿವರ ಗೊತ್ತಿಲ್ಲದ ಸಾಲುಗಳು...
↫↴⇱⇲↵↬

ತುಡಿತ ಮಿಡಿತದ ಕುಸುರಿಯ ನವಿರು ಹೊರೆಯಾಗಿ ಭಾವದ ನೆರೆ ಏರಿದಷ್ಟೇ ವೇಗವಾಗಿ ಇಳಿಯುವ ಪರಿಯೆಂತು..!!??
ಅಥವಾ ಏರಿದ ವೇಗವೇ ಇಳಿವಿಗೂ ಕಾರಣವಾ...!!??
ಬಿದ್ದ ಮಳೆ ನೆಲದಲಿ ಇಂಗಿ ಝರಿಯಾಗಿ ಹರಿಯದೇ ನೆರೆಯಾದಂತೆ...
ಅಂಥ ನೆರೆ ಇಳಿದ ಮೇಲಣ ಪ್ರಕ್ಷುಬ್ಧ ಮೌನಕೂ ಎದೆ ಕೊಡುವ ರೈತಾಪಿ ವ್ಯವಧಾನವ ಎಲ್ಲಿಂದಲೋ ಹೆಕ್ಕಿ ತಂದು, ಮೌನದ ಗೋಡೆ ಬಿರುಕಿನ ಗೂಡಲ್ಲಿ ನಗೆಯ ಮೊಟ್ಟೆಯಿಡಲು ಹವಣಿಸುವ ವಿಕ್ಷಿಪ್ತ ಮಾತು ನಾನು...
ನಿನ್ನೊಳಗಿನ ನಿನ್ನ ಮೌನ ಗುಡಿಯ ಹಾಡು - ನನ್ನೊಡನೆಯ ನಿನ್ನ ಮೌನ ಒಡೆದ ಗೂಡು...
↫↴⇱⇲↵↬

ಹೊರಗೆಲ್ಲ ಭ್ರಾಂತು - ಒಳಗೆಲ್ಲ ಬಣ ಬಣ...
ಆದರೂ ಹುಚ್ಚನ ನಗುವಲ್ಲಿ ಹುಳುಕಿಲ್ಲ ಕಾಣಾ...
............ಬದುಕು ದಕ್ಕದವನಿಗೆ ಸಾವೇ ಸಂಭ್ರಮ............. ನಗೆಯ ಸಾಕಿಕೊಂಡವನಿಗೆ ಸಾವೂ ಸಂಭ್ರಮ.........
#ನಾನು...
#ಉಳಿದಂತೆ_ಎಲ್ಲ_ಕುಶಲ_ಸಾಂಪ್ರತ...
          __ವಿವರ ಗೊತ್ತಿಲ್ಲದ ಸಾಲುಗಳು...
↫↴⇱⇲↵↬

'ಕೋಟೆ' 'ಕೋಟೆ'ಗಳ ನಡುವೆ ಸೇತುವೆಯೇ ಯುದ್ಧದ ಸಾರಥಿ... ಗೋಡೆ ಒಡೆಯಲನುವಾದವನು ಶಾಂತಿ ವಿರೋಧಿ...
#ಮಾತಾಡೋನೇ_ಮಹಾ_ಪಾಪಿ...
#ಸಂಬಂಧಗಳು_ಮತ್ತು_ಬಣ್ಣದ_ಪರದೆಗಳು...
↫↴⇱⇲↵↬

ನಾ ಪೊರೆಯದೇ, ಅವ ತೊರೆದನೆಂದು ನೋಯುವೊಲು.........
#ನನ್ನ_ನಾ_ಕಾಣ_ಬಯಸದ_ಕಣ್ಣು...
#ನಾನು...
↫↴⇱⇲↵↬

ಒಡೆದ ಕೈಯ್ಯ ಕೊಳಲು - ನಂಜೇರಿದ ಉಸಿರು - ಎದೆ ನೆಲದ ತುಂಬಾ ಮುಳ್ಳು ಜಾಲಿಯ ಬೀಜ ಬಿರಿದು ಕುಂತಿದೆ...
ಹಸಿ ಹಸಿರು ನೆರಳು ತುಳಿಯದ ಕಲ್ಲು ಹಾದಿಯ ಬಿಸಿಲು ಜೀರ್ಣವಾಗದೇ ಕರುಳು ಸೋತಿದೆ...
ಕಣ್ಣಂಗಳವ ತುಳಿತುಳಿದು ಎಬ್ಬಿಸದಿರಿ ದುಃಸ್ವಪ್ನಗಳೇ ನಿದ್ದೆ ಬೇಕಿದೆ - ಬೆಳಕೂ ತಲುಪದಂತ ನಿದ್ದೆ ಬೇಕಿದೆ...
#ಹಾಂ_ಪ್ರೀತಿಯ_ಹೊತ್ತು_ಸಾಗಲಾಗದ_ಸೋಲಿಗಿಷ್ಟು_ವಿಶ್ರಾಂತಿ_ಬೇಕಿದೆ...
↫↴⇱⇲↵↬

ಎಲ್ಲ ಸರಿ ಇದೆ ಅನ್ನೋ ಭ್ರಮೆಯ ನಂಬುವುದರಲ್ಲಿ ಎಲ್ಲಾ ಸುಖವೂ ಇದೆ......
#ಗೆಲುವು... 
↫↴⇱⇲↵↬

ಸುಳ್ಳು ನುಡಿಯಲ್ಲ - ಸತ್ಯವನ್ನ ಆಚೆ ಬಿಡಲ್ಲ - ನಾಲಿಗೆಯ ಪಾರುಪತ್ಯದಲಿ ಶಬ್ದಗಳಿಗೆ ಬಣ್ಣ ಬಳಿದು ಜಾಣ ಕುರುಡರ ಸಂತೆಯಲಿ ಸಭ್ಯತೆಯ ಮೆರೆಯುವುದು - ಕದ್ದು ತಿನ್ನೋ ಆಸೆಗೆ ಬಚ್ಚಿಟ್ಟು ಕಾಯೋದು - ಅಷ್ಟಾಗಿಯೂ ನೀಗದ ಬಯಕೆಗಳ ಅತೃಪ್ತ ಚಡಪಡಿಕೆ - ಪೊಳ್ಳು ನಗೆಯಲ್ಲಿ ಕಳ್ಳ ಹಾದಿಯ ಸವಿಯೋ ಭಂಡ ಬದುಕು - ತಿರುಕನೂರಿನ ಮುರುಕು ಗದ್ದುಗೆ........
#ನಾನು_ನನ್ನದು...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

ಗೊಂಚಲು - ಎರಡ್ನೂರೈವತ್ನಾಕು.....

ಉಗಾದಿ.....

ಮೋಡದ ಮೆಲು ಮುದ್ದಿಗೆ ಭುವಿ ಹೆಣ್ಣಾದ ಸುದ್ದಿ - ಮಣ್ಣ ಘಮದಲ್ಲಿ...
ಭಂಡ ಗಾಳಿಯ ಬೈಯ್ಯಬೇಕಿದೆ - ನಿನ್ನ ತುಂಬಿಕೊಳ್ಳೋ ನನ್ನ ಕಣ್ಣಲ್ಲಿ ಧೂಳಕಣ...
ನಿನ್ನ ಉಂಗುರ ಬೆರಳ ಬಿಸುಪಿನ ತುಂಟ ಕರೆಯ ಹಾಗಿದೆ - ಹೆಗಲ ಮೇಲೆ ಮೊದಲ ಮಳೆ ಹನಿ...
ಇಂತೀಗ -
ಇರುಳಿಗೂ ಮೂರು ಘಳಿಗೆ ಮುಂಚೆಯೇ ಹರೆಯದ ಹಸಿ ಉಸಿರು ನಾಭಿ ತಿರುವಿನಲಿ ಹಾದಿ ತಪ್ಪಿದೆ...
ನೀನಿಲ್ಲಿ ಈ ಹೊತ್ತು ಕರೆಯದೇ ಬರಬಾರದೇ; ಕಳ್ಳ ನಗೆಯ ಹೊತ್ತು - ಈ ಮಳೆಯ ಹಾಗೆ, ಆ ನೆನಪ ಹಾಗೆ...
#ಮಳೆಯ_ಹಾದಿಯಲಿ_ಒದ್ದೊದ್ದೆ_ನಿನ್ನ_ಹೆಜ್ಜೆ_ಗುರುತು...
⤼⤸⤻⥀⤺⤹⤽

ಒಂದೇ ಶಬ್ದದಲ್ಲಿ ಹೇಳಿ ಮುಗಿಸಲು ಭಾವಗಳೇನು ಬುದ್ಧಿಯ ಕಸರತ್ತೇ...?!
#ನಾನು...
⤼⤸⤻⥀⤺⤹⤽

ಕಣ್ಣು ಸಿಡಿಯುವ ಬೆಳಕು - ಕೊರಳ ಬಿಗಿಯುವ ಕತ್ತಲು...
ಕನಸ ಸಾಂಗತ್ಯವಿಲ್ಲದ ಹಾದಿಗೆ ನಗೆಯ ನೆನಪೂ ಕೂಡಾ ಕರುಳ ಮುಳ್ಳು...
ಮಳೆಯ ಬಯಸಿ ರೆಕ್ಕೆ ಕಟ್ಟಿಕೊಂಡ ಗೆದ್ದಲಿಗೆ ದೀಪದ ಬುಡವೇ ಮಸಣ...
ತುಂಡು ಬಾಲದ ನೃತ್ಯಕ್ಕೆ ಮರುಳಾದ ಬೆಕ್ಕಿಗೆ ಹಲ್ಲಿ ಸದಾ ಹುಳಿ ದ್ರಾಕ್ಷಿ...
ನಡು ಕಾಡಲ್ಲಿ ಚಿತ್ತ ಸೋತು ಹಾದಿ ತಪ್ಪಿದರೆ 'ದಾಟು ಬಳ್ಳಿ'ಯ ಮೇಲೆ ನೆಪದ ಆರೋಪ...
#ನನ್ನ_ಹಾದಿ...
         ***ಒಟ್ಟಿಗೇ ಕೂತ ಬೇರೇ ಬೇರೆ ಸಾಲುಗಳು; ಅರ್ಥ ಮಾತ್ರ ಕೇಳ ಬೇಡಿ...
⤼⤸⤻⥀⤺⤹⤽

ಅಮ್ಮ ಗುಮ್ಮನ ಕರೆಯುತ್ತಾಳೆ - ಕಂದ ಮಡಿಲ ಬಳಸಲೆಂಬಾಸೆಗೆ...
#ಹೆಣ್ಣು...
⤼⤸⤻⥀⤺⤹⤽

ನಿನ್ನನ್ನು ನೀನು ನೀನಾಗಿ ಜೀವಿಸು - ಹೆಜ್ಜೆಯ ಅಪರಿಚಿತತೆಯನ್ನೂ ನಗುವಾಗಿ ಆವಾಹಿಸು...
ದಿನವೆಲ್ಲ ನಿನ್ನದೇ - ಪ್ರತಿ ದಿನವೂ ನಿನ್ನದೇ...
#ಒಳ_ಮನೆಯ_ಬೆಳಕು...
⤼⤸⤻⥀⤺⤹⤽

ನಾನು ಸಣ್ಣವನಿದ್ದಾಗ ತುಂಬಾ ಚಿಕ್ಕೋನಿದ್ದೆ ಮತ್ತು ದೊಡ್ಡವನಾದಮೇಲೆ ಇನ್ನೂ ಚಿಕ್ಕವನಾದೆ...
#ಕಥೆ...
⤼⤸⤻⥀⤺⤹⤽

ಬೆಂಕಿಯೂರಿನ ಮೌನಕ್ಕೆ ಮಾತಿನ ಹುಳಿ ಬೆಣ್ಣೆ ಮಾರಲು ಹೊಂಟವನಿಗೂ ಹಗಲಿನುರಿಗೆ ನೆತ್ತಿಯ ಅಡವಿಡುವುದೇನೂ ಕಷ್ಟವಲ್ಲ - ಈ ಇರುಳಿನದೇ ಸಮಸ್ಯೆ; ಶವದ ಮನೆಯಂತೆ ತಣ್ಣಗೆ ಕೊರೆವ ಬೆಳದಿಂಗಳ ಸಂಭಾಳಿಸುವುದು ಸುಲಭವಲ್ಲ...
#ತರಹೇವಾರಿ_ಹಸಿವಿನ_ಹಾದಿ...
#ದಿಕ್ಕೆಟ್ಟ_ಬದುಕ_ವ್ಯಾಪಾರಿ...
⤼⤸⤻⥀⤺⤹⤽

ಎಂಥಾ ಜಡಿಮಳೆಯೂ ಎದೆಯುರಿಗೆ ತಂಪೀಯಲಾರದು ಒಮ್ಮೊಮ್ಮೆ - ನೀರು ಸೋಕಿದರೆ ಗಾಯ ಮತ್ತೆ ಹಸಿಯಾಗಿ ಕೀವು - ಅಸಹನೀಯ.......
ಸಾಯದೇ ಸ್ವರ್ಗ ಸಿಗದಂತೆ(!?)........
#ಕರುಳ_ಹಾದಿಯ_ಬಿಕ್ಕಳಿಕೆ...
⤼⤸⤻⥀⤺⤹⤽

ಹೌದು - ಗೆದ್ದ ತೋಳು ನನ್ನದೇ...
ಗೊತ್ತಾ - ಗೆಲ್ಲುವ ಬಲ ತುಂಬಿದ ಒಲುಮೆ ನಿನ್ನದು...
ನೇಗಿಲ ಮೊನೆಗೊ ನೆಲದ ಎದೆಗೂ ಬೀಜ, ಬೆವರು ಪೈರಾಗುವ ನಂಟು...
ತೇಲುವ ದೋಣಿ ತಾ ಸೇರುವ ದಡದ ದಿಕ್ಕು ಅಂಬಿಗನ ಉಸಿರಲ್ಲವೇ...
ನನ್ನ ಹಾದಿಗೆ ನಿನ್ನ ಹೆಸರಿಟ್ಟಲ್ಲಿ ಗೆಲುವು ಒಲುಮೆಯದಲ್ಲವೇ...
'ನೀನು' 'ನಾನು' ಮರೆತು ಬೆರೆತ ಬದುಕು - ಬಯಲಿಗೆ ಬಿದ್ದ ಬೆಳಕು...
#ಉಗಾದಿ...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

Tuesday, April 3, 2018

ಗೊಂಚಲು - ಎರಡ್ನೂರೈವತ್ಮೂರು.....

ಒಂದಿಷ್ಟು ಪಿರಿ ಪಿರಿ..... 

ಹುಟ್ಟು ಕರುಣಿಸಿದ ಕನಸಿನ ಕಿರು ಹಾದಿಯ ಎದೆಯ ಗೂಡನ್ನೇ ಮುರಿದು ಮುಕ್ಕಿದ ಸಾವಿನ ನೆರಳ ಮೋಸವನ್ನೇ ನಗೆಯ ಹಸಿವಿಗೆ ಆಹುತಿ ಕೊಟ್ಟು ಬದುಕ ಕಟ್ಟಿಕೊಂಡು ಎದ್ದು ನಿಂತವರೂ; ತನ್ನಂಥದ್ದೇ ಹುಟ್ಟು ಸಾವಿನ ಭಾವ ದೌರ್ಬಲ್ಯಗಳ ಸಾಟಿ ಮನುಷ್ಯರ ಸ್ವೀಯ ಕೇಂದ್ರಿತ ಕಣ್ಣಾ ಮುಚ್ಚಾಲೆಯನ್ನೋ - ಸ್ವಂತ ಸ್ವಂತ ಅಂದು, ಸ್ವಂತ ಸ್ವಂತ ಅನ್ನಿಸಿ ಸ್ವಂತವಾಗಲಾರದವರ ಬಣ್ಣ ಬಣ್ಣದ ಹೆಸರಿನ ನಿರ್ಲಕ್ಷ್ಯವನ್ನೋ ಸೋಟೆ ತಿವಿದು ಗೆಲ್ಲಲಾರದೇ ನರಳುವುದು ಮನಸಿನ ಯಾವ ಮಾಯೆಯೋ ಕಾಣೆ...
ಈ ಮನಸೆಂಬೋ ಮರ್ಕಟದ ಪ್ರೀತಿ ಪಡೆವ ಹಪಹಪಿಗೆ ತಮ್ಮ ನಿನ್ನೆ ನಾಳೆಗಳ ಒಳಮನೆಯ ರಾಗಗಳ ಕಲೆಸಿಕೊಂಡು ಕರುಬದ ಘಾಟಿ ಮನಸನೊಂದಾದರೂ ನಾ ಕಾಣೆ...
ಸೂರ್ಯನೆದುರು ಎದೆ ಸೆಟೆಸಿ ಬೆವರಾಗಬಲ್ಲವನೂ ಚಂದಿರನ ಸನ್ನಿಧಿಗೆ ಕಣ್ಣ ಹೊಳೆ ಹರಿಸುವುದು ಯಾವ ಭಾವ ವಿಪ್ಲವವೋ ನಾನಿನಿತು ಕಾಣೆ...
#ನಾನು...
↺↻↸↺↻

ಮೌನವ ಕಡೆದರೆ ಮೌನವೇ ಹುಟ್ಟಿ ನನ್ನದೇ ಮನೆಗೆ ನಾನು ನೆಂಟನಾದಂತೆ ಭಾಸ - ವಿನಾಕಾರಣ ಪ್ರೀತಿ ತೋರಿ ಜೊತೆ ನಡೆದ ಪರಮಾಪ್ತ ಹೆಗಲೊಂದು ಅಕಾರಣ ತಲೆ ಕೊಡವಿ ಮೌನ ಸಾಕ್ಷಿಯಾಗಿ ಅಪರಿಚಿತ ನಗೆ ಬೀರಿದಾಗ...
ಹಗಲಿಗಾದರೆ ನೆರಳ ಸಾಂಗತ್ಯವಾದರೂ ಇದೆ - ಇರುಳಿಗ್ಯಾರ ಕೂಗಲಿ...?
#ನಾನು...
#ಖಾಲಿ_ಮಡಿಲು...
↺↻↸↺↻

ಸಾಯುವವರೆಗೆ ಸಾವನ್ನು ಜೀವಿಸುವುದಕ್ಕೆ ಬದುಕು ಎನ್ನಬಹುದೇನೋ...
#ಕನಸಿಲ್ಲದ_ಹಾದಿ●●●
↺↻↸↺↻

ಹಗ್ಗ ಹರಿಯೋವರೆಗೂ ಇರೋ ಎಳೆದಾಡೋ ಸೊಕ್ಕು ಅಥವಾ ಉಮೇದು ಒಮ್ಮೆ ಹಗ್ಗ ಹರೀತಾ ಇದ್ದಂಗೇ ಭಯವಾಗಿಯೋ, ತಳಮಳದ ಸುಸ್ತಾಗಿಯೋ ಮಾರ್ಪಡತ್ತೆ - ಇದ್ದ, ಇಲ್ಲದ ಅಂಟನ್ನೆಲ್ಲ ಮೆತ್ತಿ ಮತ್ತೆ ಕೂಡಿಸೋ ಹೆಣಗಾಟಕ್ಕೆ ಬೀಳ್ತೀವಿ - ಆದ್ರೆ ಎಲ್ಲ ಸರಿ ಹೋಗೋಕೆ ಕಾಲ ಅಂಬೋದು ನಮ್ಮ ಮಾತು ಕೇಳೋ ಕೂಲಿಯಲ್ಲವಲ್ಲ...
ಅಂತೂ ಇಂತೂ ಕೂಡಿಸಿಯೇ ಬಿಟ್ಟರೂ ಆಳದಲ್ಲಿ ಉಳಿದುಕೊಳ್ಳೋ ಕಸರೇ ಮುಂದೆಂದೋ ಹೊಸ ಬೆಂಕಿಗೆ ಹಳೆ ತುಪ್ಪವಾದೀತು...
#ಬಂಧ_ಸಂಬಂಧ...
↺↻↸↺↻

ಕರುಳ ಬೇನೆಯ ಬೇಗುದಿಯ ಕೂಗಿಗೆ ಹೆಗಲಾಗಲಾರದ ಕಿವುಡ ನಾನು - ಹೂವರಳೋ ಸದ್ದಿನ ಕವಿತೆ ಬರೆದೆ...
#ಸಾವಿನ_ಓಂಕಾರ...
↺↻↸↺↻

....... ಬಂದ ಹಾದಿಯಲಿ ಎನ್ನ ಗುರುತುಗಳುಳಿದಿಲ್ಲ - ಹೊರಟ ಹಾದಿಯ ಗುರುತು ಎನಗಿನಿತೂ ಇಲ್ಲ............ ನೀರ ಗುಳ್ಳೆಯ ಮೇಲೆ ನಿದ್ದೆ ಮರುಳಿನ ನಡಿಗೆ - ಈ ಘಳಿಗೆ....... ಸಾವಿಗೂ ನಿದ್ದೆ ಸಾಕ್ಷಿಯಾದರೆಷ್ಟು ಚೆನ್ನ....... ಅಲ್ಲಾಗ ಕಪ್ಪು ಕನಸೊಂದು ಮುತ್ತಾಗುತಿದ್ದರೆ ಅದಿನ್ನೂ ಚಂದ.......

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)