Tuesday, February 11, 2020

ಗೊಂಚಲು - ಮುನ್ನೂರಿಪ್ಪತ್ನಾಕು.....

ಪ್ರೀತಿ ಪಲುಕು.....

ನಿನ್ನೆದೆಗೆ ಕಿವಿ ಹಚ್ಚಿ
ತನ್ಮಯದಿ ಕಣ್ಮುಚ್ಚಿ
ಉಸಿರ ಲಯದಲೆಯ ಸೋಂಕಿಗೆ ತುಟಿಕಚ್ಚಿ
ಮಳೆಗೆ ಮಣ್ಣ ಕಣಕಣವೂ ಅರಳೋ ಸೃಷ್ಟಿಶೀಲ ಚೆಲುವನರಿತೆ‌‌‌‌...
#ಪ್ರೀತಿ_ಸಮಾರಾಧನೆ...

ನಿನ್ನ ಹಿತವಾಗಿ ಕಾಡುತ್ತಾ
ನಿನಗಾಗಿ ಅನವರತ ಕಾಯುತ್ತಾ
ನಿನ್ನೊಡನಾಡಿ ನೆನಪುಗಳ ಆಡುತ್ತಾ
ನಿನ್ನಂತೆ ಮರಮರಳಿ ಅರಳುತ್ತೇನೆ...
ನಿನ್ನೆದೆ ಪ್ರೀತಿಯನೇ ಹಾಡುತ್ತೇನೆ...
#ಉಪಾಸನೆ...

ಎದೆ ಅಂಗಿಗೆ ನಿನ್ನ ವಾಸನೆ ಅಂಟಿದಾರಭ್ಯ
ಹಗಲ ಕಣ್ಣಿನ ನಗೆಯ ಹಸಿರು
ಇರುಳ ತೋಳಲ್ಲಿ ಉರಿವ ಉಸಿರು
ಗರ್ಭ ಗೂಡಲ್ಲಿ ಜೀವಾಂಶದ ಅಲರು
ಅದೆಲ್ಲ ದಾಹಕ್ಕೂ ನಿನ್ನದೇ ಹೆಸರು...
#ಪ್ರೀತಿ_ಸಂರಚನೆ...

No comments:

Post a Comment