ಗೊಂಚಲು - ನೂರಾ ಐವತ್ಮೂರು.....

ಒಂದು ಚಿತ್ರ - ಎರಡು ಭಾವಗಳು.....
(ಮಸಣ ಕಂಡು ಹುಟ್ಟಿಕೊಂಡ ಹುಚ್ಚು ಸಾಲ್ಗಳು...)

ನೆನಪ ಬಿಂಬವಾದವರೇ -
ಕನಸುಗಳು ಹುಟ್ಟದ ಒಣ ಎದೆಯ ಗೂಡಲಿ ಎಷ್ಟಂತ ತಳ್ಳಲಿ ಕಾಲವ...
ಒಂಚೂರು ತಾವು ಕೊಡಿ ಪ್ಲೀಸ್ ನಿಮ್ಮ ಎಡ ಬಲದಲ್ಲಿ...
ಸುಳ್ಳು ನಗೆಯ, ಕರುಳ ಬೆಸೆಯದ ಮಾತಿಗಿಂತ ನಿಮ್ಮ ಮುಗಿಯದ ಮೌನವೇ ನಿರಾಳವೆನಿಸುತಿದೆ... 
ಬಸವಳಿದಿದೆ ಮನಸೂ - ಪಾಚಿಕೊಳ್ಳುವಾಸೆ ಒಂದಿಷ್ಟು ನೆಮ್ಮದಿಯಾಗಿ...

$$$

ಮಸಣಕಿಂತ ಎತ್ತರದ ''ನೆಮ್ಮದಿ ಕೇಂದ್ರ'' 
ಮನಸಿಗಿಂತ ಬಲವಾದ "ಶಕ್ತಿ ಪೀಠ"
ದೇಹಕಿಂತ ಪವಿತ್ರ "ಯಜ್ಞ ಭೂಮಿ"
ಒಲವಿಗಿಂತ ಶ್ರೇಷ್ಠ "ಆರಾಧನೆ"
ಕಾಮಕಿಂತ ದೊಡ್ಡ "ಉತ್ಸವ"
ಬದುಕಿಗಿಂತ ಹೆಚ್ಚಿನದಾದ "ತೀರ್ಥ ಯಾತ್ರೆ"
ಮಂದಹಾಸಕಿಂತ ಉತ್ತಮ "ಗಳಿಕೆ" ಬೇರೆ ಇನ್ನೊಂದಿದೆಯಾ...!!!
ಕನಸು - ತಾಯಿ
ಅನುಭವ - ಗುರುವು
ಸೋಲು, ಗೆಲುವುಗಳೆಂಬೋ ಅತಿಥಿಗಳು
ಬದುಕು ಮಹಾಯಜ್ಞ...