ಗೊಂಚಲು - ನಾಕ್ನೂರಾ ಎಪ್ಪತ್ತು ಮತ್ತೂ ಒಂಭತ್ತು.....

ದಿನಕ್ಕೊಂದು ಮುತ್ತಿನ ಕಥೆ.....
ಭಾವಕಾವ್ಯ ಕೌಮುದೀ -
ಸೋಲು ಒಳ್ಳೆಯದೇ - ಸೋತದ್ದು ಪ್ರೀತಿಗೇ ಆದಲ್ಲಿ... 
ನಿಂಗೆ ಸೋತೇ ಅನ್ನುವಾಗ ಜಗವ ಗೆದ್ದ ಬೀಗು ಉಸಿರಲ್ಲಿ... 
___ ದಿನಕ್ಕೊಂದು ಮುತ್ತಿನ ಕಥೆ...
💞💞💞

ಮುಸುಕು ಮಂಜು, ಬಿರು ಮಳೆ, ಹೋರು ಗಾಳಿ, ಎತ್ತರದ ಏರಿನೆದುರು ಸಳಸಳನೆ ಸುರಿದ ಬೆವರು, ಅಷ್ಟೆಲ್ಲಾ ರುದ್ರ ರಮಣೀಯತೆಯ ಯಥಾವತ್ತು ಬರೆದ ಚಿತ್ರವೂ ಉಸಿರ ಬಳ್ಳಿಗೆ ಚುಚ್ಚಿದ ಮುರಿದ ಭಾವದ ಮುಳ್ಳಿನ ಗಾಯದ ಆಳ ಹೇಳುವುದಿಲ್ಲ... 
ಧಾರೆ ಧಾರೆ ಸುರಿವ ಕಣ್ಣ ಹನಿಯೂ ಹೆಪ್ಪು ಮೌನದಿ ಗುಮಿಗೂಡಿದ ಗಾಢ ನೋವಿನ ಒಂದಂಶದ ಭಾರ ತೂಗುವುದಿಲ್ಲ... 
ಹತ್ತಾರು ನಶೆಗಳಲಿ, ನೂರು ನಖರೆಗಳಲಿ ಕಳೆದುಹೋದರೂ ಕಳೆದುಕೊಂಡ ನಿನ್ನ(ನ್ನೆ) ನಗೆಯ ಪ್ರೀತಿ ಸಾರ ಸಿಗುವುದಿಲ್ಲ...
___ ಕೂಗಿ ಕೂಗಿ ಕರೆದಂತೆ ಭಾಸವಾಗಿ ಸುಸ್ತಾಗಿಯೂ ಗಂಟಲಲ್ಲೇ ಉಳಿದ ನಿನ್ನ ಹೆಸರು... 
💞💞💞

ಎಂಥ ಗಾಢವೋ ನದಿಯ/ನದಿಯಂಥವಳ ವಿರಹದ ಎದೆಗುದಿ - ಒಡೆದೂ ಮುರಿದೂ ದುಡು ದುಡು ಧುಮ್ಮಿಕ್ಕಿ ಹರಿಯುತಾಳೆ ಸೇರಲು ಅವನ/ಸಾಗರನ ಎದೆಗುಡಿ... 
___ ಪ್ರೀತಿ ಪಾರಾಯಣ... 

ಕಂಗಳಾಳ(ಡಿ)ದ ಮಾತು... 
ಬೆನ್ಬಯಲು ಬರೆದ ಕವಿತೆ... 
ನಡು ಮ(ಮಿ)ಡತೆ ತೀಡಿದ ತಲ್ಲಣ... 
ಯೆದೆಯಮೇಲೂರಿದ ಬೆಳದಿಂಗಳ ಕಾಲ್ಗಳ ಗೆಜ್ಜೆ ಘಲಿರು... 
ಆಹಾ...!! 
ಹೆಣ್ಹರೆಯದ ಚೆಲುವು ರಸಿಕನೂರ ಚೆಂಡಾಡುವ ಪರಿಯೇ...!!!
____ ಮೋಹಾ ಮಾರುತ...

ಸಾಯಬೇಡಾ ಅಂತಂದು ಮಧುರವಾಗಿ ಕೊಲ್ಲುವ ಕಲೆಯ ಕಲಿಸಿದ್ಯಾರು ಚೆಲುವಿ(ವೆ)ಗೆ... 
____ ಬಿನ್ನಾಣದ ಕಾವ್ಯ...

ಯೆದೆಯ ನೂರು ಗಾಯಕೂ ಪ್ರೀತಿ ಒಂದೇ ಮದ್ದಂತೆ... 
ಮತ್ತು
ಈ ಪ್ರೀತಿ ಒಂಥರಾ ದೇವ ಪೂಜೆಗಿಟ್ಟ ನೈವೇದ್ಯದಂತೆ - ಇಟ್ಟದ್ದೇನೋ ಅವರೆದುರಿಗೆ, ರುಚಿ ದಕ್ಕುವುದು ಮಾತ್ರ ನನ್ನದೇ/ನನ್ನೆದೆ ನಾಲಿಗೆಗೆ...
____ ಎದೆಗಣ್ಣ ಬೆಳಕು... 
💞💞💞

ಒಡೆದ ತುಟಿಗಳಿಗೆ ಮದ್ದನು
ಒಡೆದ ತುಟಿಗಳೇ ಕೊಡಬೇಕು... 
ಬಂದು ಹೋಗು ಮತ್ತೊಮ್ಮೆ
ಅಡ್ಡ ಮಳೆ, ಉದ್ದುದ್ದ ಛಳಿಯ ಇರುಳ(ಲಿ) ಮೈಗೆ ಬೆಂಕಿ ಬೀಳಲಿ... 
___ ಮಧುರ ಪಾಪದ ಮಾಧುರ್ಯ... 
💞💞💞
ನಾನು - ನೀರಿಗಿಳಿವ ಧೈರ್ಯ ಇಲ್ಲಾ ಅಂದವಳೆದುರು  ನಡು ಹಿಡಿದು ಈಜು ಕಲಿಸುವ ಖುಷಿಯ ಕನಸು ಕಾಣ್ತೇನೆ... ಜಲಕ್ರೀಡೆಯ ಆಸೆಯೇ ಇಲ್ಲವೆಂದರೆ ನೀನು  ಸೇರುವ ಹಾಗೂ ಮರೆಯುವ ನಡು ದಾರಿ ಸಿಗದ ವಿರಹದ ಮಡುವಲಿ ಒಂಟಿ ತೇಲುವ ಕೊರಡಾಗುತ್ತೇನೆ... ___ ಪ್ರಣಯ ಶರಧಿಯ ತೀರಗಳಲಿ ನಿನ್ನ ಮೋಹಕ ಮೋಹಕೆ ನಗು(ಡು)ವನೊತ್ತೆಯಿಟ್ಟವನು... ಆ ಚೆಲುವು ಅದರ ಹಸಿವು ನನ್ನ ಬದುಕಿಸಿರೋ ಅಮೃತವೂ ಅದೇ ನಾ ಸಾವನು ಒಪ್ಪುವ ಪ್ರಾರ್ಥನೆಯೂ ಅಲ್ಲೇನೇ...  ____ ಅವಳಾ ಬೆತ್ತಲೆ ಮೈ ಬಯಲು... 💞💞💞
ಕೇಳೇ - ನಿನ್ನ ಹೆಸರಲೀ ನಾ ಬರೆದಿಟ್ಟ ನನ್ನ ಉಸಿರಿದೆ... ನನ್ನ ಇರುಳ ತೋಳಲೀ ನೀ ಮರಮರಳಿ ಅರಳಿ  ಬೆವರಾಗಿ ಘಮಿಸುವುದು ಗೆದ್ದು ಗೆದ್ದು ಸಂಭ್ರಮಿಸುವುದು ನನ್ನ ಜೀವ ಜಾತ್ರೆಯ ಮಹಾ ಮೋಹಕ ಸೋಲು...  ಇಲ್ಲೇ ನಿನ್ನ ಮನೆಯ ದಣಪೆಯಾಚೆ ನಿಂತಿದ್ದೇನೆ - ಹಸಿ ಹಸಿವು;  ಕರೆದುಕೋ ಬಿಸಿ ಕನಸಿಗಾದರೂ - ಇಷ್ಟಾದರೂ ತೃಷೆ ತಣಿದರಷ್ಟೇ ಉಳಿವು... ____ ಹೇ!! ಕಾಡು ಹೂವಿನಂಥ ಹುಡುಗೀ... 💞💞💞
ಕೇಳೇ ಕಾವ್ಯ ಕಂಪನವೇ - ನನ್ನೆಲ್ಲಾ ಖುಷಿ ಖುಷಿಯ ಘಳಿಗೆಗಳಲೂ ನಿನ್ನದೊಂದು ಆಪ್ತ ಒಡನಾಟದ ನೆನಪು ನನ್ನ ಸಲಹುತ್ತದೆ ಇನ್ನಷ್ಟು ಮತ್ತಷ್ಟು ಮಗದಷ್ಟು ಮೊಗೆದಷ್ಟೂ ಸವಿಯಾಗಿ... ___ ನೆನಪು ಬಾಧಿಸುತ್ತದೆ - ಬಾಗಿಸುತ್ತದೆ - ಮಾಗಿಸುತ್ತದೆ - ಬಾಳಿಸುತ್ತದೆ ಬರಗೆಟ್ಟ ಭವವ... (ಮು)ಮಂದಸ್ಮಿತ ಮಾಯೆಯೇ - ಎವೆ ಬಾಡದೇ ಕನವರಿಸಿ ಕಾಯುತ್ತ ಕೂತ ನಗ್ನ ಕಂಗಳ ತೀರಕೆ ಬೆಚ್ಚಗೆ ಬುಳ್ಳಗೆ ಕನಸಾಗಿಯಾದರೂ ಬಾ... ಇರುಳ ಮೈದುಂಬಿ ಬರಲಿ ಸುರತ ಸಗ್ಗದ ಸೊಗವು - ಬಿಸಿ ಹರೆಯದ ಹಸಿ ಸುಖಾಘಾತಕೆ... ನಿನ್ನುಸಿರ ಹೋರೆನ್ನ ಮೀಸೆ ಬೇರುಗಳ ಸುಡುವಲ್ಲಿ, ನಿನ್ನ ತೋಳಿನಬ್ಬರಕೆ ನಾ ಜಗವ ಮರೆವಲ್ಲಿ, ಯಾವ ಸೋಲಿಗೂ, ಗೆಲುವಿಗೂ ಹೆಸರಿಲ್ಲ, ಕಸರಿಲ್ಲ... ___ ನೀನೆಂದರೇ ಈ ಉಸಿರ ತೀಡುವ ಮೋಹಾಲಾಪದ ಓಂಕಾರ ಝೇಂಕಾರ... ಮೊಗದ ಮಚ್ಚೆಯಲಿ ಲಜ್ಜೆ ಸರಸಿಜವನರಳಿಸಿ ನಗುವವಳೇ - ಯೆದೆಯು ಯೆದೆಯ ಮೀಟಿ ಬೆರೆ(ವೆ)ತು ಬರೆವ ನೂರು ನವಿರು ಹಾಡುಗಳ ಚೆಂದ ಭಾವಾನುವಾದ - ನಿನ್ನ ಮೋಹದ ನೆನಪಲರಳುವ ನನ್ನ ತುಂಡು ತುಂಟ ನಗು... ,,,,, ಕನಸು ಕಲ್ಪನೆಗಳ ಬೇಗುದಿಯಲಿ ಕಂಡು ಉಕ್ಕಿದ್ದು "ನಿನ್ನೊಡನಾಡುವುದು" ತುಂಬಾನೇ ಬಾಕಿ ಇತ್ತು - ನಿನ್ನ ನಾಚಿಕೆಯ ಎದೆ ಸುಳಿಗೆ ಉಸಿರು ಸಿಕ್ಕಿ ಎಲ್ಲಾ ಮರೆತುಹೋಯಿತು... ____ ಯಮುನೆಯಲಿ ಈಸುಬಿದ್ದ ಗೋಪಿಯರ ಹರೆಯ ಮತ್ತು ಹುಣ್ಣಿಮೆಯ ಗಾಳಿ ಬೃಂದಾವನದ ಬಿದಿರ ತೀಡಿ ಹಾಡುವ ಕೃಷ್ಣ ಕಾವ್ಯ ಸಂಕಲನ... 💞💞💞
ನೆನಪಿನ ಮತ್ತಾಗಿ ಮುದ್ದುಕ್ಕಿಸುವವನೇ - 'ಎಂಥ ಮುದ್ದು ನೋಡವನು' ನಾಕು ಹೆಜ್ಜೆ ಬಯಲಿಗೆ ಹೋಗಿ ಚಂದಮನ ಕಂಡು ಬಾ ಅಂದ್ಲು... ನೀನಿಲ್ಲದೂರಲ್ಲಿ ಅವನೇ ನನ್ನ ಸಂಕಟ ಹಾಗೂ ಸಾಂತ್ವನ ಅಂದೆ...  ___ ವಿರಹದುರಿಗೆ ಮದ್ದು ಮತ್ತು ಆಜ್ಯ ಎರಡೂ ಹೊಯ್ಯುವ ಬೆಳುದಿಂಗಳು... 💞💞💞
ಯೆದೆಯ ಕೌಮಾರ್ಯಕೆ ನಗೆಯ ಸಂಜೀವಿನಿಯನುಣಿಸಿದವಳೇ - ನಿನ್ನಿಂದ ಪಡೆದುದನು ನಿನಗೊಪ್ಪಿಸುವಾಗ, ಒಪ್ಪವಾಗಿ ನಿನಗೊಪ್ಪಿಸಿ ನಿನ್ನ ಮೆಚ್ಚುಗೆಯ ನೋಟದಲಿ ಮಿಂದು ಬೀಗುವಾಗ ನಾನು ನೀನೇ ಆದಂತೆ ಭಾವ ಭಾಸ - ಪ್ರೀತಿಯಾದರೂ, ಜೀವವೇ ಆದರೂ...  ___ ನೀನೆಂಬ ಸುನೀತ ಸಂಗಾತ... ಹಿಂದಿನಿಂದ ಏನೋ ಜಗ್ಗಿದಂಗೆ ಮುಂದೆ ಮುಂದೆ ಯಾರೋ ಕರೆದಂಗೆ ನೆನಪೂ ಕನಸೂ  ಕಾಡುವಾಗ ಹಾಡುವಾಗ... ಅದಾವ ನಡು ಬಿಂದುವಲಿ  ಮಧುರ ಪಾಪದ ಸಿಂಧುವಲಿ ನಿನ್ನ ಕೂಡಿಯಾಡುವುದು ಕೊಂಡಾಟದಲಿ ಮೀಯುವುದು...  ___ ಬಾ ಸೇರಿಕೋ - ಕಾರುಣ್ಯದಲಿ ತಾಳಿಕೋ...
*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರಾ ಎಪ್ಪತ್ತು ಮತ್ತೆಂಟು.....

ನಡು ರಾತ್ರಿಯ ಎಚ್ಚರಗಳನು ತಬ್ಬುವ ಸತ್ಯಗಳು.....

ನನ್ನ ನಟನೆಗೆ ನಾನೇ ಬೇಸತ್ತು ವೇಷ ಕಳಚಿಟ್ಟು ಹೊರಟ ಹಾಗೆ ಕನಸಾಯಿತು... 
ಸಾವಿನ ಕನಸಾಗುವುದು ಶುಭವೆಂದರು... 
ನಾಟಕ ಮುಂದುವರೆದಿದೆ... 
____ ಯಮನ ಬಂಟರಿಗೂ ನೀರು ಮಜ್ಜಿಗೆ ಉಪಚಾರ... 
&&&

ಗುಡಿಯ ದೇವರ ನೋಡಬೇಕೆಂದರೆ ದುಡ್ಡು ಮಾಡು - ಸರ್ವಾಲಂಕಾರಭೂಷಿತ ಮೂರ್ತಿ ಕಾಣುವುದು... 
ಯೆದೆಯಲಿನ ದೇವರ ಕಾಣುವುದಾದರೆ ಪ್ರೀತಿ ಮಾಡು - ಜೀವ ವಿಗ್ರಹದೊಳಗೆ ನಿಷ್ಪತ್ತಿಯಾದ ಜೀವಂತ ಶಕ್ತಿ ತಾಕುವುದು... 
___ ನನ್ನ ಆಧ್ಯಾತ್ಮ... 

ಸಾವ ಬಯಸುವುದಲ್ಲ -
ಇರಬಹುದು,
ಮಸಣ ವೈರಾಗ್ಯ ಅಂದ್ರೆ ಮಸಣ ಕಾಯುವವನ ಮೇಲೆ ಪ್ರೀತಿಯಾಗುವುದೂ... 
ಗೊತ್ತಲ್ಲ,
"ಫಕೀರನ ದೇವರು ಸಂಸಾರಿ..." 
___ ನನ್ನ ಆಧ್ಯಾತ್ಮ... 

ಧುಮುಗುಡುವ ಜಲಪಾತ, ಭೋರ್ಗರೆವ ಕಡಲ ಒಡಲು, ತುಂಬಾ ಮಾತಾಗುವ ಕರಡಿ ಅಪ್ಪಿನ ಕಾಡು ಮೌನ, ಉಸಿರ ಹೋರಿನ ಕಾಮನ ಹಬ್ಬ - ಇದೇ ಇಂಥವೇ ನನ್ನೀ ಯೆದೆಯ ಕೂಡುವ, ಭಾವಕೋಶವ ಕಾಡುವ ಹೆಜ್ಜೆಗೊಂದು ನಗೆಯ ಕಾವ್ಯ...
ಹರಿವು ಯೆದೆಯಲರಳಿಸುವ ಮಳೆಬಿಲ್ಲು - ನನ್ನ ಆಧ್ಯಾತ್ಮ... 
&&&

ಬ್ರಹ್ಮ ಮಾಡಿದ ಹಾದಿಯಲ್ಲೇ ಯಮನೂ ನಡೆದು ಬರುತ್ತಾನೆ... 
ಅಲ್ಲಿಗೆ, 
ಎಲ್ಲಾ ರಸ್ತೆಗಳೂ ಅಲ್ಲಿಗೇ ತಲುಪುತ್ತವೆ... 
ಆದರೆ, 
"ನಗೆ/ಪ್ರೀತಿ ಹೊನಲ ಹಂಚುವ ದಾರಿಯಲಿ ಪ್ರೀತಿ/ನಗೆ ಹೂಗಳು ಅರಳಿ ಬಣ್ಣಗಳ ಸೊಬಗು ಚೆಲ್ಲಿರುತ್ತದೆ..."
ನಾವಲ್ಲಿ 
ಕಪ್ಪು ಕನ್ನಡಕದಲಿ ಕಣ್ಣ ಹುಗಿದಿದ್ದರೂ ತುಟಿಯಂಚಿಗೆ ಕರಗಿದೆದೆಯ ಬೆಳಕು ಮೆತ್ತಿಕೊಳ್ಳುತ್ತದೆ...
___ ಯೆನ್ನೆದೆಗೂಡಿನ ಬಾಗಿಲಲಿ ಒಲುಮೆ ಮಂದಹಾಸವ ಚೆಲ್ಲುವ ಎಲ್ಲವರಿಗೂ ನನ್ನಿ ನನ್ನಿ... 💞
&&&

ಕೇಳಿಲ್ಲಿ -
ಕವಿತೆ ಕುಟ್ಟಿದಷ್ಟು ಸಲೀಸಲ್ಲ ಬದುಕು ಕಟ್ಟಿಕೊಂಬುದು - ಕಣ್ಣಳಿಳಿದರೆ ಮಾತೇ ಆಡದೇ ಮನಸಿಗೆ ಗೊತ್ತಾಗುತ್ತದೆ ಹಸಿವ ಹುಗಿದಿಡಲು ಕತ್ತಲೇ ಲೇಸೆಂಬುದು...
ಹನಿಗಡಲ ಇಂಗಿಸಿಕೊಂಡು, ಎದೆಗೆ ಬಿದ್ದ ಬೆಳಕ ಬೀಜವ ಜೋಪಾನ ಮಾಡಲು ಕತ್ತಲನರಸುವಂತೆ ಕಾಣುವ, ಬೀದಿ ದೀಪಗಳಂಥಾ ಆ ಅನಾಥ ಕಂಗಳು ಬಲು ಕಾಡುತ್ತವೆ...
ಕಟ್ಟಡಗಳ ಕಾಡಿನ ಎದೆ ಸೀಳಿ ಉಪ್ಪು ಖಾರ ಸವರಿದಂತೆನಿಸುವ ದಟ್ಟ ಜನಜಂಗುಳಿಯ ಬೀದಿ...
ಅದೇ ಬೀದಿಯ ಪಕ್ಕೆಗಳಲೇ ಅವರ ಬಾಲ್ಯ ತರಚಬೇಕು, ಯೌವನದ ರುಚಿಗಳ ಪರಿಚಯಿಸಿಕೋಬೇಕು, ಪ್ರೀತಿ ಅರಳಬೇಕು, ಮೋಹ ಕೆರಳಬೇಕು, ಸಂಸಾರದ ಕಣ್ಣ ಹನಿಗಳ ಕೊ‌ಸರಾಡದೆ ಕುಡಿಯಬೇಕು...
ಉಫ್ -
ದಾಕ್ಷಿಣ್ಯಗಳ ನೀಗುವ "ಇರುಳ ಕಾರುಣ್ಯ" ಎಷ್ಟು ಹಿರಿದು ಗೊತ್ತಾ ವತ್ಸಾ...!!
___ ಕತ್ತಲ ಉಡಿಯಲಿ ಕುದಿವ ಕಥೆಗಳು... 
&&&

ಕೇಳಿಲ್ಲಿ -
ಬದುಕಿದ್ದೇನೆ - ಬದುಕಿಯೇ ಇದ್ದೇನೆ... 
ಬಸವನಿಗೆ ಬಿಟ್ಟ ಗೂಳಿಯ ಥರ - ಯಾರೂ ಬಂಧಿಸುವವರಿಲ್ಲದ ಸ್ವಾತಂತ್ರ್ಯ ಮತ್ತು 'ಇಲ್ಲೊಂಚೂರು ನಿಲ್ಲೋ' ಅನ್ನುವವರಿಲ್ಲದ ನಿರ್ವಾತದ ಜೊತೆಗೆ... 
___ ನನ್ನದೇ ಸ್ವಭಾವ ವೈಕಲ್ಯ - ಬಲು ಸಸ್ತಾ ಬದುಕು... 

ವತ್ಸಾ -
ಬಿತ್ತಲಾರದವನು ಬೆಳೆಯ ಬಯಸಬಾರದು - ಪ್ರೀತಿಯಾದರೂ, ನಗುವನಾದರೂ... 
ಬಯಲಿನಾಸೆಯ ನೀನು ಬಿಸಿಲು, ಮಳೆಯ ಹಳಿಯಬಾರದು... 
___ ನಿನ್ನದೋ ಸ್ವಭಾವ ವೈಕಲ್ಯ - ಬಲು ಸಸ್ತಾ ಬದುಕು... 
&&&

ಕತ್ತಲೆ ಕಾನಿನ ಕಾಲು ದಾರಿಯ ಕವಲಿನಲಿ ಕಂಗಾಲಾಗಿ ನಿಂತವನಿಗೆ ಅಲ್ಲೆಲ್ಲೋ ಎಡಗುವ ಹರಿದು ಬಿದ್ದಿರೋ ಹರಕು ಚಪ್ಪಲಿಯೂ ಒಂದು ಗಟ್ಟಿ ನಿಟ್ಟುಸಿರಿನ ಭರವಸೆಯೇ - ಕಳೆದೋದದ್ದು ನಾನೊಬ್ಬನೇ ಅಲ್ಲ ಇಲ್ಲಿ ಅಥವಾ ಈ ಹಾದಿಯಲೂ ಅಲ್ಲೆಲ್ಲಾದರೂ ಜೊತೆಗ್ಯಾರೋ ಸಿಕ್ಕಾರು ಎಂಬ ಆಶಾಭಾವ... 
___ ಮಸಣ ಕಾಯುವವನಿಗೆ ಬೆವರ ವಾಸನೆಯೇ ಜೀವಶಕ್ತಿಯೇನೋ...
&&&

ಇಲ್ಕೇಳೇ -
ಪ್ರತಿಕೃತಿಗಳ ಮೂಲಕ ಜೀವಿಸುವ ಪ್ರಕೃತಿ ತನ್ನ ಉಳಿವಿಗೆ ಹೂಡುವ ಕೂಟದಲಿ ನಾನು ನೀನು ಒಪ್ಪವಾಗಿ ಒಪ್ಪಿ ನೇರ ಭಾಗಿಯಾದರೆ ಅದು ಶುದ್ಧ ಕಾಮ, ನಾವದನ್ನು ಸುತ್ತಿ ಬಳಸಿ ತಲುಪುವುದಕ್ಕೆ ಇಟ್ಟುಕೊಂಡ ಹೆಸರು ಪ್ರೇಮ ಅಂತನ್ನಿಸುತ್ತೆ ನೋಡು ನಂಗೆ...
............. ಪಾವಿತ್ರ್ಯದ ತಕ್ಕಡಿಯಲಿ ಆ ತೀರವ ಸುಖವಾಗಿ ತಲುಪುವುದು ಕ್ಷುದ್ರವಂತೆ, ಮಧುರ ಪಾಪಕ್ಕೆ ಪುಣ್ಯ ಲೇಪದ ಸೋಗಿಗೆ ಬಂಧನದ ಬೇಲಿ ಬೇಕಂತೆ... 
___ ನೀರು ಜೀವ ದ್ರವ್ಯ - ಶಂಖದಿಂದ ಬಂದ್ರೆ ತೀರ್ಥ... 

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರಾ ಎಪ್ಪತ್ತಾ ಏಳು.....

------ ತುಂಬಾ ಸುಖವೂ ಸುಸ್ತಾಗಿಸುತ್ತೆ.....

ವತ್ಸಾ -
ಒಂದು ಒಡನಾಟದಲ್ಲಿ ಯಾವುದೋ ಒಂದು ಬದಿಯಿಂದ ಮಾತು ಮೊದಲಾಗುವುದು ನಿಂತು ಬರೀ ಪ್ರತಿಕ್ರಿಯೆಗಳಷ್ಟೇ ವಿಕ್ರಯವಾಗೋದು ಶುರುವಾದರೆ ಅಲ್ಲಿಗೆ ಅಲ್ಲಿ ನೇಹ ನೇಪಥ್ಯಕೆ ಸೇರುತಿರುವ, ಮತ್ತದು ಆಪ್ತತೆಯ ವಿನಿಮಯ ಮಡಿದು ನಡುವೆ ನಿರ್ವಾತವೊಂದು ಹುಟ್ಟಿಕೊಳ್ಳುವ ದಾರಿಯ ಆರಂಭದಂತೆನಿಸುತ್ತೆ...
ಕಾರಣ, 
ನೂರು ಸಬೂಬುಗಳ ನೀಡಿದರೂ / ನೀವಿಕೊಂಡರೂ ನಿರ್ಲಕ್ಷ್ಯವೆಂಬೋದು ಮಂಜುಗತ್ತಿಯಾಗಿ  ನೇರ ಯೆದೆಯನೇ ಇರಿಯುತ್ತದೆ... 
___ ಇನ್ನು ಸುಮ್ಮನಿದ್ದುಬಿಡಲಾ ಅನ್ನಿಸಿದ ನಂತರ ಸುಮ್ಮನಾದರೂ ಒಂದು ಮಾತು ಹುಟ್ಟುವುದು ಕಸಿವಿಸಿಯ ಕಂದರದಿಂದಲೇ......... 
&&&

ಪ್ರೀತಿ ಸಿಹಿ ಅಂದರು... 
ಅಖಂಡ ಪ್ರೇಮದ ನೂರು ನದಿಗಳ ನೀರು ಕುಡಿದೂ ಸಾಗರನ ಯೆದೆ ಹಸಿವು ಇಂಗಿದಂತಿಲ್ಲ - ಉಪ್ಪು ಸಿಹಿಯಾಗಲಿಲ್ಲ... 
ಅಲ್ಲಾ, ಈ
ಪ್ರೀತಿಯ ರುಚಿ ಸಿಹಿಯಾ...? ಉಪ್ಪುಪ್ಪಾ...?? 
ಹಂಗೇ,
ಈ ಪ್ರೀತಿ ಅಂಬೋದು ಚೂರೂ ಸಿಗ್ದಿದ್ರೆ ಸಪ್ಪೆ ಸಪ್ಪೆ - ಅತಿಯಾದ್ರೆ ಉರಿ ದಾಹ... 
____ ಬದುಕಿನ ಪ್ರೀತಿ ಪಾರಾಯಣ... 
&&&

ಏನಿಲ್ಲಾಽಽಽ -
ಪೂರಾ ಪೂರಾ ಅಪರಿಚಿತತೆಯೇ ಒಳ್ಳೆಯದಿತ್ತಾ ಅಂತ... 
ಒಂದೊಮ್ಮೆ ಯೆದೆಬಾಗಿಲ ತೋರಣದಂತಿದ್ದು, ತೀರಾ ತೀರಾ ಆಪ್ತ ಆಲಿಂಗನದ ಆನಂದ ಧಾಮಕೆ ಬಂದು, ಇನ್ನೀಗ ಕಣ್ಣ ಕಕ್ಷೆಯಲೇ ಇದ್ದೂ ಯೆದೆಯ ಭಾವಾನುಭಾವಗೊಳದಲ್ಲಿ ಮಿಂದು ಹೋದ ಕುರುಹೊಂದೂ ಇಲ್ಲವೇನೋ ಎಂಬಂತೆ ಕಿಟಕಿಯಾಚೆಯ ಬಯಲಲ್ಲಿ ಮುಖ ತಿರುವಿ ನಿಂತು, ಗಂಟಲಿಗಿಳಿದ ಬಿಸಿ ತುಪ್ಪದಂತೆ ಕಣ್ಣ ಮಳೆಯಾಗಿ ಕಾಡುವುದಕಿಂತ; ಎಲ್ಲೋ ತಿರುವಲ್ಲಿ ಹಾಗೇ ಎದುರಾಗಿ ಕಣ್ಣ ಸಂಧಿಸಿ ಸಣ್ಣದೊಂದು ಪುಳಕವಾಗಿ ತುಸು ಕಾಲ ಕಾಡಿ ಮರೆಯಾಗೋ ಚಂದ ಅಪರಿಚಿತತೆಯೇ ಒಳ್ಳೆಯದಿತ್ತಾ ಅಂತ........ 
___ ನೆನಪು - ಜ್ವರ ಇಳಿದ ಮೇಲೂ ನಾಲಿಗೆಯಲುಳಿದ ಕಹಿ ಉಗುಳಿನಂಗೆ... 
&&&

ಮಲಗುವುದಷ್ಟೇ ಆದರೆ ಮೈಯ್ಯಲಿಷ್ಟು ಆಸೆಯ ಬಿಸಿ ಗುಮಿಗೂಡಿದರೆ ಸಾಕು... 
ಮುದ್ದಿಸುವುದಾದರೋ ಎದೆಯ ಸುಳಿಗಳಲಿ ಇಷ್ಟೇ ಇಷ್ಟಾದರೂ ಪ್ರೀತಿಯ ತೇವವೂ ಬೇಕು... 
___ ನಡು ರಾತ್ರಿಯ ಎಚ್ಚರಗಳನು ತಬ್ಬುವ ಸತ್ಯಗಳು... 
&&&

ನೀನು ನಿನಗಾಗಿ ನನ್ನಿಂದ ದೂರ ದೂರ ಸರಿಯುತಿರುವ ಸತ್ಯದ ಅರಿವಿದ್ದೂ, 
ನಾನು ನನಗಾಗಿ ನಿನ್ನ ಹುಡುಕಿ ಹುಡುಕಿ ಸೇರುವ ಹುಕಿಯಲಿದ್ದೇನೆ/ದುಡುಕಿನಲಿದ್ದೇನೆ... 
ಒಲವಿಂದ ಗಳಿಸಿಕೊಳ್ಳುವ, ಉಳಿಸಿಕೊಳ್ಳುವ ಒಲವಿಲ್ಲದವನು, ಬಲದಿಂದ ಬೆಸೆದುಕೊಳ್ಳುವ, ಬಳಸಿಕೊಳ್ಳುವ, ಬಾಲಿಶ (ಕೊಂ)ಮೊಂಡಾಟಕೆ ಬಿದ್ದಿದ್ದೇನೆ... 
ಪ್ರೀತಿಯ ಹಾಡಲರಿಯದಿದ್ದೊಡೇನು, ಪ್ರೀತಿಯ ಕಾಡಲು ಮರೆಯಲಾರೆನು... 
____ "ನಾನು... "
&&&

ಶ್ರೀ -
ಉಳ್ಕಿ ಏನೂ ಬೇಡ ಕಣೋ, 
ನಿನ್ನೊಳಗಿರೋ "ನಂಗೆ ಸಿಕ್ಕಿಲ್ಲ ಮತ್ತು ನಾನು ಕೊಟ್ಟೆ"  ಅನ್ನೋ ಎರಡು ಹಡಾಹುಡಿ ಭಾವಗಳ ಮೇಲೆ ಒಂಚೂರು ಹಿಡಿತ ಸಾಧಿಸಿದರೂ ಸಾಕು ಎಷ್ಟೋ ಬಂಧ ಸಂಬಂಧಗಳು ಹಂಗೋಹಿಂಗೋ ದಡಸೇರಿ ಪ್ರೀತಿಯ ಉಸಿರ ಉಳಸ್ಕೊಂಬಿಡ್ತಾವೆ ನೋಡು... 
___ ಹಂಚಿ ಹಿಗ್ಗುವ ಹರಿವಿನ ಹಾಡು... 
&&&

------ ತುಂಬಾ ಸುಖವೂ ಸುಸ್ತಾಗಿಸುತ್ತೆ... 
ಸುಖ ಅಭ್ಯಾಸವಾದಷ್ಟೂ ಅತೃಪ್ತಿಯ ತೂಕವೂ ಬೆಳೆಯುತ್ತೆ ನೋಡು... 
ಹೇಯ್ -
ತುಂಬಾ ನಗಬೇಡ - ಅನುಮಾನವಾಗುತ್ತೆ... 
ಅಳು ಹುಟ್ಟುತ್ತೆ, ನಗುವನ್ನು ಬೆಳೀಬೇಕಾಗತ್ತೆ ನೋಡು... 
____ ತುಂಬಾ ಸಲ ಕಣ್ಣಂಚಿನ ಒದ್ದೆಯೂ ತುಂಬಾ ಮುಚ್ಚಿಡುತ್ತೆ... 
&&&

ಏನ್ಗೊತ್ತಾ -
ಈ ನೋವು ಖಾಲಿತನಗಳಿಗೆ ನಾನೆಷ್ಟು ಒಗ್ಗಿ ಹೋಗಿದೀನಿ ಅಂದ್ರೆ ನಂಗೇ ಫಕ್ಕನೆ ಸಿಕ್ಕ ನಗುವೊಂದಕ್ಕೆ ಸ್ಪಂದಿಸಿ ಸಂಭ್ರಮಿಸೋದೂ ಅಪರಾಧ ಅಥವಾ ಕ್ರೌರ್ಯ ಅನ್ನಿಸ್ಬಿಡತ್ತೆ ಒಮ್ಮೊಮ್ಮೆ... 
___ ಜಡ್ಡುಗಟ್ಟಿದ ಯೆದೆ, ತೇವವಾರಿದ ಕಣ್ಣು... 
&&&

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರಾ ಎಪ್ಪತ್ತು ಮೇಲಾರು.....

ಶುಭ + ಬೆಳಕು = ಶುಭದಿನ - ಪ್ರೀತಿ ಸಂಧಿ... 🤝🫂

ಮುಗಿದುಹೋದ ನಿನ್ನೆಗೆ ಮರಳಲಾರದ ಪಾಪದವನ ಅನುತಾಪದ ಯೆದೆಗೆ ಮರಳಿ ಮರಳಿ ಪ್ರೇಮ ತುಂಬೋ ಕಾರುಣ್ಯ ಸಿಂಧು ಬೆಳಗು... 
ಮುಗಿದ ಸಮಯವ ಮರೆತು, ಮುಂದಿರುವ ಬಾಳ್ಮೆಯ ನೆನೆದು, ಮುಷ್ಟಿ ಬಿಗಿದು ಕಳಕೊಂಡ ನಗುವನು ಬೊಗಸೆಯೊಡ್ಡಿ ಪಡೆಯಲೊಂದು ಸಣ್ಣ ಅವಕಾಶದ ಬಾಗಿಲು ಬೆಳಗು... 
ಬೆಳಗಾಗಿದೆ - ತೆರೆದಿದೆ ಶುಭದ ಕಕ್ಷೆ... 🤝🫂

ಬೆಳಗಾಯಿತು...
ಕಣ್ಣ ಗೋಳದ ತುಂಬಾ ಬೆಳಕೇ ಬೆಳಕು...
ಜಗ ಬೆಳಗೋ ಬೆಳಕು ತಾನೇ ತಾನಾಗಿ ತಲುಪಲಾರದ ಎನ್ನ ಯೆದೆಯ ಕುಹರದಲೊಂದು ಪ್ರೀತಿ ಪಣತಿಯ ನಾನೇ ಹಚ್ಚಿಡಬೇಕು...
ನನ್ನ ಬದುಕ ಬೊಗಸೆಗೆ ನಂಗಾಗಿ ಶುಭವ ನಾನೇ ತುಂಬಿಕೊಳ್ಳಬೇಕು - ನಿಂಗಾಗಿ ಶುಭವ ಪ್ರಾರ್ಥಿಸುತ್ತಾ... 
ಶುಭಾಶಯ - ಶುಭದಿನ... 🤝🫂

ಬೆಳಕಿನ ಪಂಜು ಉರಿದುರಿದೆಚ್ಚರ ಜಗದ ಬಯಲ ಮಂದಿರ... 
ಪ್ರೀತಿ ಚಿಮಣಿಯ ಹಚ್ಚಿಟ್ಟರೆ ಬೆಳಕು ಮಂದಿ ಯೆದೆಯ ಕುಹರ... 
ನೆಟ್ಟ ಪ್ರೀತಿ ಕೊರಡು ಬೆಳಕಾಗಿ ಚಿಗುರಿ ಹಬ್ಬುವುದು ಎದೆಯ ಮಂಟಪಕೆ ನೂರು ಕವಲಿನ ನಗೆಯ ಬಳ್ಳಿ... 
ಕೊಟ್ಟು ಕೊಟ್ಟು ತುಂಬಿಕೊಂಬುವ ಹಬ್ಬ - ಪ್ರೀತಿ ಪ್ರೀತಿ ಬೆಳಗು... 🤝🫂

ಬೆಳಗಾಯಿತು...
ಅವನು ಮೂಟೆ ಮೂಟೆ ಬೆಳಕನು ಸುರಿದೇ ಸುರಿವ - ನಮ್ಮ ಜೀವ ಪಾತ್ರೆಯ ಅಳತೆಯ ಹಂಗಿಲ್ಲದೇ... 
ನಾವಿಲ್ಲಿ ಹಿಡಿ ನಗುವನಾದರೂ ಹಂಚಿಕೊಳ್ಳುವಾ - ನಮ್ಮ ನಮ್ಮ ಯೆದೆಗೂಡು ಒಂದರೆ ಚಣ ಹಿಗ್ಗಿನಲಿ ಅರಳುವಷ್ಟಾದರೂ... 
ಅಂತರ್ವಾಹೀ ಪ್ರೀತಿ ಬೆಳಗಿ ಹಬ್ಬಿ ತಬ್ಬಿ ಕಾಲವೂ ಕಾಯುವ ಚಂದನೆ ಪರಿ ಬೆಳಗು... 
ಶುಭದಿನ ನೇಹೀ...🤝🫂

ಬೆಳಕಿನೊಡಗೂಡಿ ಬರುವ ನೆನಪುಗಳು, 
ನೆನಪಿಗಂಟಿ ಬರುವ ಬೆಳಕು,
ಕನಸಿನ ವಸ್ತುವನು ವಾಸ್ತವದ ಮೊರದಲಿಟ್ಟು ಕೇರಿ ಕೇರಿ ನೋಡಿ ಪಯಣವನು ಗಟ್ಟಿಯಾಗಿಸುವ ಅನುಭವದ ಗರಡಿಮನೆ...
ಬೆಳಗು ಬದುಕ ಪ್ರೀತಿಯ ಬೇರಿನ ನಿಚ್ಚಳ ಕನ್ನಡಿ... 
ಶುಭದಿನ... 🤝🫂

ಯೆದೆಯ ಸಂಚಿಯಿಂದ ತೆಗೆದ ಕಟ್ಕಟೀ ಬೆಳಕಂಥ ಅಡಿಕೆ ಮತ್ತೆ ತುಸು ಪ್ರೀತಿ ಸುಣ್ಣವ ನಗೆಯ ವೀಳ್ಯದೆಲೆಗೆ ಬೆರೆಸಿ ಹಂಚಿ ತಿಂದರೆ ಬದುಕು ಬಲು ರುಚಿಯ ಕವಳ...
ಇನ್ನಷ್ಟು ಸಿಹಿ ಸಿಹಿಯಾದ ನಾಲ್ಗೆ ರುಚಿಯ ಹುಕಿಯಿದ್ದರೆ ಪ್ರೀತಿಯ ಹಲವಾರು ಕವಲುಗಳಾದ ಅಕ್ಕರೆಯ ಸಕ್ಕರೆ, ತಬ್ಬುಗೆಯ ಕರ್ಪೂರದ ತಂಪು, ಏಲಕ್ಕಿ ಕಾಳಿನ ರಸಿಕತೆ, ಭಾವದ ಬಡೆಸಪ್ಪಿನ ಕಂಪು ಇಂಥವಿನ್ನಷ್ಟು ರಸಗಳನು ಬೆರೆಸಿ ಜಗಿಯಬಹುದು...
ಬೆಳಕಾಗುವುದೆಂದರೂ, ಬೆಳಗಾಗುವುದೆಂದರೂ ಪ್ರೀತಿಯನು ಪ್ರೀತಿಯಿಂದ ಹಂಚಿ ಸವಿಯುವುದೇ ಅಲ್ಲವಾ...
ಶುಭದಿನ... 🤝🫂

ರುದಯ ರುದಯಗಳ ಪ್ರೀತಿಯ ಬಣ್ಣಗಳ ವೈಭವವ ತೋರುವ 
ಮತ್ತು 
ಬಣ್ಣಾಚಾರದ ಪ್ರೀತಿಯ ಮುಖಗಳ ಬಣ್ಣ ಇಳಿಸುವ 
ಎದೆಯ ಬೆಳಕನು ಎಲ್ಲರುಡಿಗೂ ತುಂಬಿಕೊಡಲಿ ಈ ಬೆಳಗು...
ಪ್ರೀತಿಯ ಬಣ್ಣವೇ ಬೆಳಕು... 
ಶುಭದಿನ ಪ್ರೀತಿಯೇ... 🫂🤝

ನೂರು ನೂರಾರು ನಗೆ ಮುಗುಳ ಚಂದ ಸಂಕಲನವೀ ಬೆಳಗು... 
ಪ್ರೀತಿ ಬೆಳಕಾಗಲಿ ನಿನ್ನ ನನ್ನ ಯೆದೆಯಂಗಳದ ಹೊರಗೂ ಒಳಗೂ... 
ಬೆಳುದಿಂಗಳನುಂಡು ನೆಲವ ತಬ್ಬಿದ ಪಾರಿಜಾತದ ಬೇರಿಗೂ, ಕಾದ ನೆತ್ತಿಗಿಷ್ಟು ನೆರಳನೂ ಊಡದ ಜಾಲಿಯ ಮುಳ್ಳಿಗೂ ಅದೇ ಪ್ರೀತಿ ರಸವ ಬಡಿಸುವ ಬೆಳಗು... 
ಪ್ರೀತಿ ನಗೆಯ ಲಾವಣ್ಯ ಬೆಳಗು...
ಶುಭದಿನ... 🤝🫂

ಮೈಯ್ಯೆಲ್ಲಾ ಕಣ್ಣಾದ ಬೆಳಕಿನ ಒಡಲ ದಿಟ್ಟಿ ಪ್ರೀತಿ... 
ಮಡಿಲಲಿ ದಾರಿದೀಪಗಳ ಅಕ್ಷಯ ಪಾತ್ರೆಯಿರುವ ಪ್ರೀತಿಯ ಮೂಲ ಬಣ್ಣ ಬೆಳಕು... 
ಪ್ರೀತಿ ಬೆಳಕಿನ ದೃಶ್ಯ ಕಾವ್ಯದಾರಂಭ ಬೆಳಗು... 
ಶುಭದಿನ... 🤝🫂

ಇರುಳ ತುಂಬಾ ಸೊಕ್ಕಿ ಉರಿದು ಉಕ್ಕಿ ಯೆದೆಯ ಮೇಲೊರಗಿದ ನನ್ನೊಡನಾಡಿ ಬೆಳಕು ಬಿಂಕದಲಿ ಸಾಕಿನ್ನೆಂದು ಈ ತೋಳಿಂದ ಕೊಸರಿ ವಸನವನರಸುವಾಗ ಕೊರಳ ತಿರುವುಗಳ ಅಲಂಕರಿಸಿದ ನನ್ನ ಹಸಿವಿನ ಗುರುತುಗಳ ಸೋಕಿದ ಛಳಿ ಗಾಳಿ ಕಂಪನಕೆ ಅಮಲುಗಣ್ಣಲಿ ಮೋದದಿ ನಕ್ಕಾಗ - ಬೆಳಗಾಯಿತು... 
ಶುಭದಿನ... 🍬

ನೇಹೀ -
ಪ್ರತಿ ಬೆಳಗನೂ ಪ್ರೀತಿ ರೆಕ್ಕೆಯ ಬಿಚ್ಚಿ ಕನಸಿನ ಗಗನವ ಅಳೆದು ಸಂಭ್ರಮಿಸಲು ಇನ್ಯಾವ ಕಾರಣ ಬೇಕು ಹೇಳು... 
ಈವರೆಗಿನ ಎಲ್ಲಾ ಬೆಳಗಿಗೂ ನಾನೂ ನೀನೂ ಕಣ್ತೆರೆದೇ ಸಾಕ್ಷಿಯಾದ ದಿವ್ಯ ಆಮೋದಕಿಂತ... 
ಉಸಿರ ಜೀವೋತ್ಸವಕಿಂತ ದೊಡ್ಡ ಮಹೋತ್ಸವ ಯಾವುದಿದೆ...!! 
ಶುಭದಿನ... 🤝🫂

ಶುಭವೆಂದರೆ ಮತ್ತೇನಲ್ಲ - ಬೆಳಕಿನ ಕೂಸು ಯೆದೆಯ ತೊಟ್ಟಿಲಲಿ ದೇವನಗೆ ಬೀರುವುದು... 
ಭಾವಕೋಶ ಮತ್ತು ಬುದ್ಧಿಕೋಶ ಜೊತೆ ಸೇರಿ ಪ್ರೀತಿಕೋಶವ ಕಾಯುವುದು... 
ಶುಭದಿನ... 🤝🫂

ಪ್ರೀತಿ ಬೆಳಕಿನ ಕೂಸಿರಬಹುದು... 
ಬೆಳಕಿನ ಆಳ ವಿಸ್ತಾರಗಳ ಅನುಭಾವ ದಕ್ಕಲು ಪ್ರೀತಿ ಬೆಳಕಿನ ಭಾಷೆಯೂ ಇರಬಹುದು... 
ಬೆಳಕು ಎದೆಗೂಡ ಇಣುಕಿದರೆ ಪ್ರೀತಿ ಶುಭದ ಹೊಸಿಲಕ್ಕಿ ತುಳಿದು ಹೊಲಿಯಾಗಿ ಯೆದೆಮನೆಯ ಸೇರಬಹುದು... 
ಎನ್ನ ಯೆದೆಬೆಳಕು ನಿನ್ನಂಗಳದ ಪ್ರೀತಿ ಹೂವಾಗಿ ಅರಳಲಿ ಮತ್ತು ಅದಲೂ ಬದಲು... 
ಶುಭದಿನ ನೇಹೀ... 🤝🫂

ಶುಭವನಲ್ಲದಿದ್ದರೂ 
ಶುಭದ ಸಂದೇಶವನಾದರೂ ತಂದು ಸುರಿ ಹಗಲೇ...
ನಗುವನಲ್ಲದಿದ್ದರೂ
ನಗೆಯ ಕನಸನಾದರೂ ಎದೆಗಾತುಕೊಂಡು ದಾಟಿಬಿಡುತ್ತೇನೆ (ದೀ)ದಿನ ಕಾಲವ... 
ಶುಭದಿನ... 🤝🫂

ನಿನ್ನ ಕಣ್ಣಲ್ಲರಳುವ ಎನ್ನ ನೆನಪಿನ ತಾವರೆ ನಿನ್ನ ದಿನದಾರಂಭಕೆ ನಗೆಯ ಘಮ ಸುರಿದರೆ - ಬೆಳಗು ಪ್ರೀತಿಯ ಬಾಯಲ್ಲಿ ಶುಭದ ಶಕುನವ ಹೇಳಿಸಿ ಮೈಮನಕೆ ಬೆಳಕಿನ ಕಿಡಿ ತಾಗಿಸಿ ತಟ್ಟಿ ಎಬ್ಬಿಸಿದಂತೆ ಲೆಕ್ಕ... 
ನನ್ನ ಶುಭದಿನ - ನಿನಗೂ ಶುಭವೇ ಹಾರೈಕೆ... 🤝🫂

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರಾ ಎಪ್ಪತ್ತೈದು.....

 ಬೆಳಗೆಂಬೋ ಬೆಳಕಿನ ಕರುಣಾಲಯ... 🪔

ದೀಪದಿಂದ ದೀಪ ಉರಿಸಿ ಕುಹರಗಳನೂ ಬೆಳಗುವಂಗೆ, 
ಎದೆಯಿಂದ ಎದೆಗೆ ಪ್ರೀತಿಯಿಂದ ಪ್ರೀತಿ ಹರಿಸಿ ನಗೆಯ ಘಂಟೆ ಮೊಳಗಿಸಿದಲ್ಲಿ ಮುಳ್ಳು ಕಂಟಿಯಲಿ ಹೂವರಳುವಂತೆ ನಾನೂ ನೀನೂ ನಡೆವ ಹಾದಿ ಬದಿ ಬೆಳಕ ಮಿಂದು ಹಸನಾಗುವುದು... 
ಒಲವು ಹಾಯುವ ಯೆದೆಯ ತೀರದಲೆಲ್ಲ ಬೆಳಕಿನ ಹಬ್ಬವಾಗುವುದು... 
ಶುಭದಿನವು - ಶುಭಾಶಯವು... 🪔🤝🫂🍬

ಬೆಳಗೆಂದರೆ ಬೆಳಕಿನ ದಿವ್ಯ ಸಾಂಗತ್ಯ... 
ಬೆಳಗೂ ಎಂದರೆ ಒಂದು ಪ್ರೇಮಮಯೀ ಸಾತತ್ಯ... 
ಬೆಳಗಿನಂಥಾ ಒಲವು ಬೆಳಕಾಗಿ ಬೆಳಗಲಿ ನನ್ನೊಳಗೂ, ನಿನ್ನೊಳಗೂ...
ಬೆಳಗಿನ ಶುಭಾಶಯವು... 🤝🫂

ಕಣ್ಮುಚ್ಚಿ ನಿನ್ನ ಪ್ರೀತಿಯ ನೆನೆದು ನಾ ಶುಭವ ಕೋರಿದರೆ ಬೆಳಗು ಜಗದ ಒಲವಾಗಿ ಹರಿದು ನಗೆಯ ಹರಸಿ ಕಣ್ತೆರೆಸಿತು - ಯದೆಯ ಜೋಪಡಿಯೀಗ ಬೆಳಕೇ ಆಯಿತು; ನಿನ್ನದೂ, ನನ್ನದೂ... 
ಶುಭದಿನ... 🤝🫂

ನೇಹನಾಲೆಯೇ -
ರಣ ಇರುಳ ಬದಿ ಸರಿಸಿ ಬಂಗಾರ ಬಣ್ಣದಿ ಬೆಳಗುತ್ತ ಬರುವ ಬೆಳಗು ಬಗಲ ಚೀಲದ ತುಂಬಾ ಶುಭದ ಬೆಳಕನೇ ತುಂಬಿ ತಂದು ನಿನ್ನ ಮಡಿಲಿಗೆ ಸುರಿಯಲಿ - ನಿನ್ನೆದೆಯ ಪ್ರೀತಿ ಕಣಜದಲಿ ನಗೆ ಹೊನಲು ತುಂಬಿ ತುಂಬಿ ಮರಿಯಲಿ... 
ಶುಭದಿನವು ನಿನಗೆ... 🤝🫂

ಕಣ್ಣ ಗುಡ್ಡೆಯ ಬೆಳಕಿನೆಚ್ಚರ
ಯೆದೆಗೂಡಿನ ಎಚ್ಚರದ ಬೆಳಕು
ಕೂಡಿಯಾಡಲಿ
ಬೆಳಗು ಬೆಳಗಲಿ... 
ಪ್ರೀತಿ ಪಡಿನುಡಿಯೆ 
ನಗೆಯ/ಯೇ ಸುಪ್ರಭಾತ...🤝🫂

ನೇಹವೇ-
ಕತ್ತಲೆಕಾನ ದಾಟಿ ಬಂದ ಬೆಳಗಿನ ಬೆಡಗಿನ ಪ್ರಭಾವಳಿಯೆದುರು ಬೊಗಸೆಯೊಡ್ಡಿ ನಿಂತು ಶುಭವ ಹರಸೆಂದು ಬೇಡಿದೆ...
ಈಗ,
ಪ್ರಾರ್ಥನೆಯ ಮರುಘಳಿಗೆ ಯೆದೆಯ ಭಿತ್ತಿಯಲಿ ಇರುಳ ಕನಸು ನನಸಾದಂಗೆ ನಿನ್ನ ಚಿತ್ರ ಪಡಿಮೂಡಿದೆ... 
ಜೀವಾಭಾವದ ನಾಡಿ ನುಡಿಗಳಲಿ ನಗೆಯ ರಾಗ ತರಂಗಗಳೆದ್ದಿವೆ... 
ಬೆಳಗುವ ನೀನು ಮತ್ತು ನಗು ಶುಭವಲ್ಲದೇ ಇನ್ನೇನು... 
ಶುಭೋದಯ... 🤝🫂

ಆ ಬೆಳಕಿನಕ್ಷಯ ಪಾತ್ರೆಯಿಂದ ಒಂದಗುಳು ಬೆಳಕನು ಕಡ ತಂದಾದರೂ ಇಲ್ಲಿನೀ ಬೆಳಕಿನ ಹಸಿವನಿಷ್ಟು ನೀಗಿಕೊಳ್ಳಬೇಕು ನಾನು - ಎನ್ನ ಒಳಮನೆಯ ಕತ್ತಲು ಕಳೆಯಬೇಕು... 
ಮುಡಿಗೆ ಬಿದ್ದ ಬೆಳಕು ಉಡಿಯ ತುಂಬಬೇಕು - ಬೆಳಕಿನಿಂದ ಬೆಳಕ ಬೆಳೆಯಬೇಕು... 
ಯೆದೆಯ ಕಾವಿನಲ್ಲಿ ಪ್ರೀತಿ ಹೂ ಅರಳಬೇಕು...
ಶುಭದಿನ... 🪔🤝🫂

ಬೆಳಕಿನ ಹಾದಿಗೂ, ಅದರ ನೂರು ಕವಲಿಗೂ, ಬೆಳಕಿನುರಿ ಸುಡದಂತೆ ಬೆಳಕೇ ಬೆಳೆಸಿದ ಹಸುರಿನ ನೆರಳಿಗೂ ಒಲವೊಂದೇ ಉಸಿರು, ಒಲವೆಂದೇ ಹೆಸರು... 
ಆ ಹಾದಿಯಲಿ ನಡೆವ ನನ್ನೆದೆ ಪಾತ್ರೆಯ ಪ್ರೀತಿ ಎಷ್ಟೋ ನನ್ನ ಪಾತ್ರವೂ ಅಷ್ಟೇ... 
ಶುಭದಿನ... 🤝🫂

ಬೆಳಕಿನ ಬೇರು
ಪ್ರೀತಿಯ ನೀರು
ನಗೆ ಮುಗುಳ ಸೂರು... 
ಚೂರೇ ಚೂರು
ಗಳಿಸಿದರೂ ಸಾಕು ಈ ಮೂರೂ
ಸೊಗದಿ ಆಳೋಕೆ ಮೂರು ಊರು...
ನಿದಿರೆ ಕಳೆದು ಬೆಳಗಾಯಿತು 
ಯೆದೆಯಿಂದಲೆದೆಗೆ ಕಕ್ಕುಲಾತಿಯ ಹಂಚುವ ಹೊತ್ತಾಯಿತು... 
ಶುಭದಿನ... 🤝🫂

ಚಿತ್ರದಲಿರುವ ಅವಳೂ, ಚಿತ್ತ ಸ್ವಾಸ್ಥ್ಯವಿಲ್ಲದ ನಾನೂ ಪರಸ್ಪರ ಅಭಿವಂದಿಸಿ 'ಬೆಳ್ಗಾತು, ದೇವ್ರ್ ದೊಡ್ಡಂವ, ಬೇವರ್ಸಿ ಬದ್ಕಿಂಗೂ ಒಂದ್ ಬೆಳಕ್ನ್ ತುತ್ತು ಇಟ್ಟಿರ್ತ ನೋಡು' ಅಂತಂದ್ಕಂಡು ದೊಡ್ಡಕ್ಕೆ ನೆಗಿಯಾಡಿ ಅಂದಿನಂದಿನ ಹೊಸ ನಾಟ್ಕಕ್ಕೆ ವೇಷ ಕಟ್ಟುವ ಗಡಿಬಿಡಿಗೆ ಬೀಳ್ತೇವೆ... 
ಬದ್ಕಿ ಸಾಯಿ ಮಗ್ನೇ ಅಂದಂಗೆ ನಗ್ತಿರೋ ಅವ್ಳು - ಸತ್ತು ಬದಕ್ಯಂಡೆ ನೀನು ಅಂದು ನಿಡುಸುಯ್ಯೋ ನಾನು; ಈ ಇಂಥಾ ಮರುಳರ ನೆತ್ತಿ ನೇವರ್ಸಿ ಸಾಂತ್ವನಿಸೋ ಬೆಳಗು... 
ಶುಭದಿನ... 🫂

ಬೆಳಕ ಬಾಗಿಲಲಿ ಪ್ರೀತಿ ಹಸೆ ಬರೆದು ನಿನ್ನ ಹೆಸರಿನ ಅಂಕಿತವ ಹಾಕಿದೆ... 
ಶುಭದ ಗಣಗಳೆಲ್ಲ ನಗೆಯ ಬಾಗಿನ ಹಿಡಿದು ಎನ್ನೆದೆ ಬಾಗಿಲಲಿ ಸಾಲುಗಟ್ಟಿವೆ ಈಗ... 
ನಗೆ ಮುಗುಳ ಬಗೆ ಬೆಳಗು... 🤝🫂

ನನ್ನಲಿರುವ ಹನುಮ ಶಕ್ತಿಯ ಮರೆತು ಅಳುತ ಕೂತ ಮಂಗನಂಥಾ ನನಗೆ, 
ಕರಡಿ ಪ್ರೀತಿಯ ಕೊಟ್ಟು ಕಿವಿ ಹಿಂಡಿ ಅನುದಿನವೂ ಹೊಸತು ನಭದ ಕನಸನು ತುಂಬುವ ಜಾಂಬವಂತ ಬೆಳಗು...
ಅರಿವಿನ ಪರಿವಿಲ್ಲದ ಈ ಪಡಪೋಶಿ ಜೀವವ ಪ್ರೀತಿ ಪರಿಪಾಕದಲಿ ಪೊರೆವ ಜಾಂಬವ ನೇಹಗಳೇ - ಶುಭದ ಪ್ರಾರ್ಥನೆಯು ನಿಮಗೆ... 
ಶುಭದಿನ... 🤝🫂

ಹಗಲಾಗುವುದೇನೂ ಸುಲಭವಿಲ್ಲ... 
ಆಕಳಿಸುವವನ ಕಣ್ಣ ತಿವಿದು, ಇರುಳು ಕಲಿಸಿದ ಆಲಸ್ಯವ ಮುರಿದು ನಿತ್ಯಕರ್ಮಕೆನ್ನ ಅಣಿಗೊಳಿಸಬೇಕು... 
ನಿಶೆಯ ಸುಖದ ನಶೆಯನೂ ಮೀರಿದ ಗೆಲುವಿನ ಸುಖದ ಕನಸಿನ ಬೆಳಕನೆನ್ನೆದೆಗೆ ತುಂಬಬೇಕು... 
ಪ್ರತಿ ಬೆಳಗೂ ತುಂಬು ಪ್ರೀತಿಯ ಶುಭದ(ದ್ದೇ) ಕಣಿ ಹೇಳಬೇಕು... 
ನಗೆ ಪಲ್ಲವಿಯ ನಾಂದಿ ಪದ್ಯವೀ ಬೆಳಗು... 🤝🫂

ಬೆಳಕಿನೊಡ್ಡೋಲಗದಲಿ ಕೂರಲು ಜಾಗವಿಲ್ಲದ ಕತ್ತಲು ಬೆಳಕಿನ ಬೆನ್ನಲ್ಲಿ ನೆರಳಾಗಿ ನೆಲೆಯಾಗಿ ಉಸಿರ ಕಾಯ್ದುಕೊಂಡಿತು... 
ಪ್ರೀತಿ ಹಂಚುವ ಎದೆ ಜೋಳಿಗೆಗೆ ನಗೆ ಸಂಪದ ಸುರಿವ ಬೆಳಕು... 
ಶುಭದ ಸಾನಿಧ್ಯ ಬೆಳಗು... 🤝🫂

ಇರುಳನು ಕಾಡಿದ ದುಃಸ್ವಪ್ನಗಳೆಲ್ಲ ಬೆಳಕಿನ ಪ್ರೀತಿಯ ಹೊಡ್ತಕ್ಕೆ ಹೆದರಿ ಮತ್ತೆ ಉಸಿರೆತ್ತದಂತಾಗಲಿ... 
ಒಂದೊಂದೇ ದಳ ಬಿರಿದು ಹೂವರಳುವಂತೇ ಮೈದೋರುವ ಬೆಳಗಿನ ಬೆಡಗಿನ ಪರಿಯಲೇ ನಗುವು ಗಂಟೊಡೆದು ಯೆದೆತುಂಬಿ ನಳನಳಿಸಲಿ... 
ಶುಭದಲರು ಈ ಮುಂಜಾವು... 🤝🫂

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರಾ ಎಪ್ಪತ್ತು ಮತ್ನಾಕು.....

ಕಣ್ಣಗೋಳದಲಿ ರಾಗವಾಗುವ ಹಸಿರು ಬಂಗಾರ ಬೆಳಗು..... 

ಇರುಳಲ್ಲಿ ಎದೆ ಕೊರೆದು ಕಣ್ಣಿಂದ ಇಳಿದು ಕೆನ್ನೆ ತೊಳೆದ ಭಾವಗಳನು ತೋಳಿಗೊರೆಸಿಕೊಂಡು ಬದಿ ಸರಿಸಿ, ಒಡೆದ ಯೆದೆ ಕಮರಿಯಲೇ ಹೊಸ ಭರವಸೆಯ ಹಸಿರಂಗಿಯ ಗಿಡ ನೆಟ್ಟು, ನೆಟಿಗೆ ಮುರಿದು ಮುಗುಳ್ನಗುವ ಜೀವ(ಯಾ)ಜಾತ್ರೆ ಬೆಳಗು...
ನಗುತಲಿರು ಬೆಳಕೇ...
ಶುಭದಿನ... 🤝🫂

ಯಾವ ಮೊಗ್ಗೂ ನೋಯದಂತೆ ಬೆಳಕು ಪ್ರೀತಿ ಹರಿಸುವುದು...
ಇಳಿದು ಬಂದ ಬೆಳಕನೂ ಹೂವು ಅರಳಿ ಅಲಂಕರಿಸುವುದು...
ಬಾಗಿದಷ್ಟೂ ತುಂಬಿ ಬರುವುದು, ತುಂಬಿದಷ್ಟೂ ಮಾಗಿ ಬಾಗುವುದು - ಬೆಳಕು, ಪ್ರೀತಿ...
ತುಂಬು ಪ್ರೀತಿಯ ಶುಭ ಬೆಳಗು... 🤝🫂

ಶುಭಕಾಗಿ ತುಡಿಯುವುದು
ಶುಭವನೇ ನುಡಿಯುವುದು 
ಶುಭವನಲ್ಲದೇ ಬೇರೇನನೂ ಬಯಸದಿರುವುದು -
ಬೆಳಕಾಗುವುದು...
ಬೆಳಗೆಂದರೆ -
ಶುಭದ ಸೆಲೆಯೊಂದನು ಯೆದೆಯಿಂದ ಯೆದೆಗೆ ಹರಿಸಲೆಳಸುವುದು / ಪ್ರೀತಿಯ ಕಣ್ಣರಳುವುದು...
ಶುಭದಿನವು... 🤝🫂

ಎಲ್ಲಾ ಅರಿವಿದ್ದೂ ಏನೂ ಗೊತ್ತಿಲ್ಲದಂತೆ
ಸಂತೆಯ ನಡುವೆ ಮೌನದ ಮಡಿಲು ತುಂಬುವ ಹಠದಿಂದ
ತಣ್ಣಗೆ ಮುಗುಳ್ನಗುತ ಕುಂತ ಬುದ್ಧನ ವಿಗ್ರಹದಂತೆ
ಸುಮ್ಮನಿರಬೇಕು; ಸುಮ್ಮನಿದ್ದೇ
ಎಲ್ಲ ಅರುಹಬೇಕು - ಪ್ರೀತಿ ಹರವಬೇಕು
ಬೆಳಕಿನಂತೆ - ಬೆಳಗಿನಂತೆ...
ಶುಭದಿನ... 🤝🫂

ನಿನ್ನ ಚೆಲುವಿನ ತಿರುವುಗಳಲಿ ನಗೆಯು ಮೈಮುರಿದೇಳುವಾಗ, 
ನಿದ್ದೆ ಮರೆತ, ಎವೆ ಬಡಿಯದ ಕಂಗಳಿಂದ ಈ ಯೆದೆಗೆ ಬೆಳಕ ಕಾವ್ಯ ದರ್ಶನ...
ನನ್ನ ಬೆಳಗಾಗುವುದೆಂದರೆ ಅದೇ - ನಿನ್ನ ತಲುಪಲು ನಿನ್ನ ನಗೆ ಪ್ರೀತಿಯ ಕುಡಿದೇ ಹೊಸದಾಗಿ ಅಣಿಯಾಗುವುದು...
ಬೆಳಗಾಯಿತು... 🫂🫂

ಬೆಳಕಿನಿಂದ ಪ್ರೀತಿ ಪಡೆದು
ಪ್ರೀತಿಯನು ಬೆಳಕಿನಂಗೆ ಹಂಚಿ ನಲಿದು
ಬೆಳಕಿನ ಜೊತೆ ನಡೆವುದು
ಪ್ರೀತಿಯೇ ಆಗಿ ನಲಿವುದು...
ಶುಭವೆಂದರೆ ಪ್ರೀತಿ ಬೆಳಕಲ್ಲಿ ಶುಭವ ಬಿತ್ತಿ ಬೆಳೆವುದು...
ಬೆಳಗಾಗಿದೆ - ಶುಭವಾಗತೈತೆ... 🤝🫂

ಪರಿಚಯಿಸಿಕೊಳ್ಳುವ, ಹೆಸರಿಡುವ, ಹೆಸರಾಗುವ ಹಂಗಿಲ್ಲ ಗುಂಗಿಲ್ಲ - ಸುಮ್ಮನೆ ಸುರಿಸುರಿದು ಪ್ರೀತಿಯಾಗಿ ಹರಿಯುವುದು ಬೆಳಕು...
ಖಾತೆ ಕಿರ್ದಿ ಪುಸ್ತಕವಿಲ್ಲದ ಪ್ರೀತಿ ಭಂಡಾರ ಬೆಳಗು - ಬೆಳಕದು ಯೆದೆತೆರೆದು ತುಂಬಿಕೊಂಡಷ್ಟೂ ಸ್ವಂತ ನನಗೂ ನಿನಗೂ...
ಶುಭದಿನ... 🤝🫂

ಶುಭ್ರ ಶುಭವ ಸಂಚಯಿಸುವ ಇರಾದೆಯಿದ್ದಲ್ಲಿ ಅಕಾರಣ ಪ್ರೀತಿಯ ಬಿತ್ತಿ ಕಾಯಬೇಕು...
ಯೆದೆನೆಲವನುತ್ತಿ ಬೆಳಕಲಿ ನೆನೆದ ಅಂತಃಕರಣವ ಅಗೆಮಾಡಿ ನೆಮ್ಮದಿಯಲಿ ನಗಬಲ್ಲ ದಿನವೆಲ್ಲಾ ಶುಭದಿನವೇ...
ಶುಭದಿನ - ಶುಭವಾಗಲಿ ನನಗೂ, ನಿನಗೂ...🤝🫂

ಮತ್ತೆ ಕನಸಿನ ಕಾಲಿಗೆ ಬೆಳಕಿನ ಕೋಲಿನ ಪ್ರೀತಿಯ ಉರಿ ತಾಕಿತು - ಮತ್ತೊಂದು ಬೆಳಗಾಯಿತು... 
ಮತ್ತೆ ಭರವಸೆಯ ಗಟ್ಟಿ ಉಸಿರೆಳೆದುಕೊಂಡ ಬಡ ಬದುಕು ಒಂದು ಹೆಜ್ಜೆ ಮುನ್ಸಾಗಲಣಿಯಾಯಿತು - ರುದಯವು ಮತ್ತೊಮ್ಮೆ ಶುಭ ನುಡಿಯಿತು... 
ಶುಭದಿನ... 🤝🫂

ತನ್ನ ಪ್ರೇಮವ ತಾನೆ ಅಲಂಕರಿಸಿ ಆ ಚಲುವ ಸಿಂಗಾರವ ತಾನೇ ನೋಡಿ ನಲಿದು ದೃಷ್ಟಿ ನಿವಾಳಿಸಿ ಮುದ್ದೀಯುವಂತೆ ಇರುಳೆಲ್ಲ ಮಳೆಯಲಿ ಮಿಂದು ಬಂದ ವಸುಧೆಯನು ಹಗಲ ಬೆಳಕ ತೋಳು ಬಳಸಿತು - ಮಳೆ ಮಿಂದ ಹಸಿ ಮೈಯ್ಯ ಭುವಿ ತಾ ಬೆಳಗ ಬೆಳಕ ಪ್ರೀತಿಯ ಕುಡಿದು ಹಸಿರಾಗಿ ಉಸಿರಾಡಿತು / ಉಸಿರೂಡಿತು... 
ಶುಭದಿನ... 🤝🫂

ಬೆಳಕಾಗಿ ಹರಿಯುವುದಾದರೂ, 
ಬೆಳಕಿನೆಡೆಗೆ ಸರಿಯುವುದಾದರೂ, 
ಒಳಗು ಉರಿದುರಿದು ಕರಗಬೇಕು - ಪ್ರೀತಿಯಲಿ, ಪ್ರೀತಿಯಿಂದ... 
ಉರಿದು ಕಾಯುವ ಅಕ್ಷಯ ಪಾತ್ರೆ, ಪಾತ್ರ ಹಗಲು... 
ಶುಭದಿನ... 🤝🫂

ಎಲ್ಲ ಎಲ್ಲಾ ಭಾವಾನುಭಾವಗಳ ಉಪಾಸನೆ, ಧ್ಯಾನ, ಪ್ರಾರ್ಥನೆಗಳಲೂ ಶುಭವನಷ್ಟನೇ ಹಂಬಲಿಸಿ ಹಂಬಲಿಸಿ ಬೆಳಗಿಗೆ ಕಣ್ತೆರೆದರೆ ಕಣ್ಬೆಳಕು ತಾಕಿದುದೆಲ್ಲಾ ಶುಭವೇ ಆಗಿ ನಕ್ಕಂತಾಗಿ ಯೆದೆ ಬಳ್ಳದ ತುಂಬಾ ಶುಭದ ಸಂಕ್ರಮಣ ಭಾವ ಪ್ರಸಾದ...
ಕಾಕೆಯ ಕೂಗಿನಲ್ಲೂ ಪ್ರೀತಿಯ ಕರೆಯ ಬೆಳಕು... 
ಶುಭದಿನ... 🤝🫂

ಬೆಳಗಾಗುವುದು ಜಗದ ನಿಯಮ... 
ಆದರೋ,
ಯೆದೆಗಣ್ಣ ತೆರೆದು ಬೆಳಕಿನೊಲವ ತುಂಬಿಕೊಂಬುದು ಎನ್ನದೇ ಕರ್ಮ... 
ನಾ ಬಯಸಿದ ಮಾತ್ರಕೆ ನನ್ನದಲ್ಲ, ನಾ ತುಂಬಿಕೊಂಡಷ್ಟೂ ನನ್ನದು - ಬೆಳಕಾಗಲೀ, ಪ್ರೀತಿಯಾಗಲೀ...
ತುಂಬಿ ಬರವ ಸೌಂದರ್ಯವ ಕಾಣಲಿಕ್ಕೂ ಕೆಲವನೆಲ್ಲ ಸುಮ್ಮನೆ ಹಂಚಿ ಹಂಚಿ ಖಾಲಿಯಾಗಬೇಕು - ಬೆಳಕಾದರೂ, ಪ್ರೀತಿಯಾದರೂ... 
ಹಂಚುವ ಚಂದದಲಿ ನಗುವ ಚೆಂದವಾಗಲಿ ದಿನ...
ಶುಭದಿನ... 🤝🫂

ಹೊಂಬಣ್ಣದಲಿ ಮಿಂದ ಬಳುಕು ಮೈಯ್ಯ ಕಡುಗಪ್ಪು ಥಾರು ರಸ್ತೆ...
ನಿನ್ನೂರಿಗಿನ್ನೂ ಇಂತಿಷ್ಟು ದೂರ ಎಂದು ತೋರುವ ಹರಿದ ಅಕ್ಷರಗಳ  ಮೈಲುಗಂಬ...
ಯಮವೇಗವೂ ನಿಧಾನವೇ ಅನ್ನಿಸುವ ನಿನ್ನ ಕೂಡುವ ಎನ್ನ ಆತುರ...
ಮೋಹದ ಬಣ್ಣವೂ, ಘಮವೂ ಮಿಲನದ ನಗು ಹಾಗೂ ಬೆವರೇ ಇರಬಹುದೂ ಅಂತನ್ನಿಸುವಂತೆ ನಿನ್ನ ಕನಸುವ ಉಸಿರ ಆವೇಗದಾಲಾಪ...
ಉಫ್ -
ಬೆಳಗೆಂಬ ಬಣ್ಣಾ ಬೆಡಗಿನ
ಭಾವ ಭ್ರಮರಿ... 
ಶುಭದಿನ... 🫂🤝

ಬೆಳಗೆಂದರೆ ಪ್ರಿಯ ಕನಸಿನ ಶುಭ ಮುಹೂರ್ತ... 
ಪ್ರೀತಿ ಮಾಯದ ಹೂಬೆಳಗು...
ಶುಭದಿನ... 🤝🫂

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರಾ ಎಪ್ಪತ್ತು ಮತ್ಮೂರು.....

ಕಾದರೆ ಬೆಳಕಿಗೇ ಕಾಯಬೇಕು..... 

ಬೆಳಕಿಗಿಂತ ಚಂದ ಕವಿ, ಚಿತ್ರಕಾರ, ಅಷ್ಟೇ ಏನು ಸಕಲ ಕಲಾ ವಲ್ಲಭ ಬೇರೆ ಯಾರಿಹರು ಜಗದಿ...!
ಎದೆಗಣ್ಣು ಬೆಳಕ ಮಿಂದರೆ ಚಿತ್ತದಲಿ ನೂರು ನಗೆಯ ಚಿತ್ತಾರ...
ಪ್ರೀತಿ ಕುಂಜ ಬೆಳಗು...
ಶುಭದಿನ... 🤝🫂

ಬೆಳಕಿನ ಪ್ರೀತಿಗೆ ಬೆಳಕೇ ಹೋಲಿಕೆ...
ಪಡೆದ ಪ್ರೀತಿಗೆ ಪ್ರೀತಿಯೇ ಕಾಣಿಕೆ... 
ಎದೆಯ ಪ್ರೀತಿ ಜಗದ ಬೆಳಕು...
ಬಿಡಿ ಹೂವು ದಾರವನಪ್ಪಿ ಮಾಲೆಯಾಗುವ ಭಾವ ಬೆಳಗು...
ಶುಭದಿನ... 🤝🫂

ಅಪ್ಪನ ಹೆಗಲೇರಿ ಜಗವ ಕಂಡು ಕೇಕೆ ಹಾಕುವ ಕೂಸುಮರಿಯಂತೆ,
ಅಂಬೆಗಾಲಲಿ ಕತ್ತಲ ಎದೆಯನು ಹಿತವಾಗಿ ತುಳಿಯುತ್ತ ಗಲಗಲ ನಕ್ಕಿತು ಬೆಳಕು...
ಬೆಳಗಾಯಿತು...🤝🫂

ಬೆಳಕೆಂದರೆ ಪ್ರೀತಿ... 
ಮಳೆಯೆಂದರೆ ಪ್ರೀತಿ...
ಬೆಳಕು ಮಳೆಯ ಕುಡಿದು ಅರಳುವ ಹಸಿರೆಂದರೆ ಪ್ರೀತಿ ಪ್ರೀತಿ...
ಈ ಉಸಿರಿಗೆ ನೀರು, ನಿಡಿ ಆ ಬೆಳಕು, ಮಳೆಯ ಬಸಿರ ನಿರಾಮಯ ಪ್ರೀತಿ...
ಮಳೆ ಬೆಳಗು... 🤝🫂

ಬೆಳಕಿನ ಮುದ್ದಿಗೆ ಗಿಡಗಂಟಿ ಮೈನೆರೆದು, ಪ್ರೀತಿಸುಮವರಳಿ ಬಾನದೀಪದ ಕಣ್ಣಲ್ಲಿ ನೂರು ನೂರಾರು ಬಣ್ಣ ಬಣ್ಣಗಳ ನಗೆ ಮೇಳ...
ಅಲ್ಲಿಂದ ಸುರಿವ ಬೆಳಕಿನ ಪ್ರೀತಿಗೆ ಇಲ್ಲಿ ಅರಳುವ ಪ್ರೀತಿಯ ಬೆಳಕೇ ಉಡುಗೊರೆ...
ಶುಭದಿನ... 🤝🫂

ಚಂದಿರನಿಗೆ ಕಡ ಕೊಡುವಾಗ ಬೆಳ್ಳಂಬೆಳಗಿನಲಿ ಅರಳಿದ ತಂಪು ಬೆಳಕಿನ ಕುಡಿಗಳನಷ್ಟೇ ಆಯ್ದು ಎತ್ತಿಟ್ಟುಕೊಂಡು ಕೊಡುವನೇನೋ ರವಿರಾಯ...
ಅದಕೇ ಚಂದಮ ಸೋಸಿ ಸುರಿವ ಬೆಳುದಿಂಗಳು ಅಷ್ಟು ತಣ್ಣಗೆ ತಬ್ಬುತ್ತದೇನೋ...
ಹುಣ್ಣಿಮೆ ಬೆಳ್ದಿಂಗಳಂಥಾ ಚಂದ ಸೊಬಗಿನ ಶೀತಲ ಬೆಳಗು...
ಶುಭದಿನ... 🤝🫂

ನಿನ್ನಾ ಕಣ್ಣ ಚುಂಬಿಸಿದ ಬೆಳಕಿನೊಂದು ಕಿರಣವು ಮೈಮುರಿದೆದ್ದ ನಿನ್ನ ನಗೆಯಿಂದ ನೂರು ಕವಲಾಗಿ ಹರಡಿ, ಆ ಹಾದಿಯಲಿ ಎನ್ನ ಶುಭದ ತೇರು ದಿನದ ಯಾನಕೆ ಹೊರಟಾಯಿತು...
ಯೆದೆಯಿಂದ ಯೆದೆಗೆ ನಾಟಿದ ನಗೆ ಶರಕೆ ಬೆಳಕೆಂದು ಹೆಸರಾಯಿತು...
ಬೆಳಗಾಯಿತು... 🤝🫂

ಎದೆಯ ನಗುವನಾಳಲಿ ಪ್ರೀತಿ ಸ್ವಾತಂತ್ರ್ಯದ ಬೆಳಕು...
ನಗುವ ಪ್ರೀತಿ ಸ್ವಾತಂತ್ರ್ಯವೇ ಜಗದ ಯೆದೆಯ ಬೆಳಕು...
ಶುಭಾಶಯ - ಶುಭದಿನ...🪔

'ಇನ್ನೆಂತಾ ಕಾದಿತ್ತೋ, ನಮ್ ಪುಣ್ಯ, ಇಷ್ಟ್ರಲ್ಲೇ ಹೋತು' - ಹಿಂಗಂದು, ಅಶುಭ ಎದೆ ಇರಿದಾಗಲೂ ಶುಭದ ಹಿರಿಮೆಯನೇ ಹಾಡಿ ಮುಂದಿನ ಯುದ್ಧಕೆ ನಮ್ಮ ನಾವು ಅಣಿಮಾಡಿಕೊಂಡುಬಿಡುತ್ತೀವಲ್ಲ; ತುಂಡಿರದ ಬೆಳಕಿನ ಭರವಸೆ ಅಂದರೆ ಅದೇ...
ಕಾದರೆ ಬೆಳಕಿಗೇ ಕಾಯಬೇಕು - ಕತ್ತಲ ಯುದ್ಧವ ಬೆಳಕಾಗಿ ಕಾದಬೇಕು...
ಶುಭದಿನ... 🤝🫂

ಇರುಳ ತೆಕ್ಕೆಯ ಸುಖಾಲಸ್ಯವ ಬಿಡಿಸಿ ಬೆಳಕು ಮೈಮುರಿಯುವಾಗ ಕಣ್ಣ ಗೋಳದ ತುಂಬಾ ನಿನ್ನ ನಗೆ ಬಿಂಬ ಅರಳುತ್ತದೆ...
ಮತ್ತು 
ಎನ್ನೆದೆಯ ಬೆಳಗುವ ಎಣೆಯಿಲ್ಲದ ಭಾವ ಬಣ್ಣ ಬೆಡಗಿನ ಈ ಬೆಳಗಿಗೆ ನಿನ್ನ ಹೆಸರು...
ಶುಭದಿನ... 🤝🫂

ಜಗದ ಇರುಳನು ತೊಳೆವ ಬೆಳಗು ಎನ್ನೆದೆಯ ಕತ್ತಲನೂ ಬಳಿವ ಬೆಳಕಾಗಲೆಂಬ ಕಿರು ಪ್ರಾರ್ಥನೆ...
ಶುಭವನರಸುವ ನಾನು ನೀ ಸುರಿದಂತೇ ಶುಭವ ಸ್ವೀಕರಿಸಲು ಅನುವಾಗುವಂತೆ ಹರಸು ಬೆಳಗೇ...
ಶುಭದಿನ... 🤝🫂

ಶುಭ ನುಡಿಯಲು ಬೆಳಕು ಮತ್ತೊಂದು ಹಗಲಾಗಿ ಬಂತು...
ಮುಗಿಯದಿರಲಿ ನಮ್ಮ ನಿಮ್ಮ ಯೆದೆಯ ಶುಭದ ಪ್ರೀತಿ ಕಂತು...
ಶುಭದಿನ... 🤝🫂

ಎಂದಿನಂತದ್ದೇ ಇನ್ನೊಂದು ಹಗಲಿಗೆ ಇನ್ನೊಂಚೂರು ಪ್ರೀತಿ ಬಣ್ಣವ ಬಳಿದು, ಹಬ್ಬಾ ಎಂದು ಕೂಗಿ, ಊರೆಲ್ಲಾ ಕೂಡಿ ಆಡಿ ಹಾಡಿ ನಗುವ ಹಂಚಿಕೊಳುವ / ನೆಂಚಿಕೊಳುವ ಸರಬರ ಸಡಗರ ಸಂಭ್ರಮದ ಬೆಳಗು...
ಅಂಗಳದಲಾಡುವ ಬೆಳಕನು ಎದೆಗೆ ಕರೆಯುವ ಹಂಬಲಕೆ ಹಬ್ಬಗಳ ಹೆಸರು...
ಶುಭದಿನ - ಶುಭಾಶಯ... 🫂🍫

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರಾ ಎಪ್ಪತ್ತು ಮತ್ತೂ ಎರಡು.....

ಪ್ರೇಮ ಶರಧಿ / ಶರಣ ಬೆಳಗು..... 

ಇರುಳ ಕನಸಲ್ಲಿ ಬೆವರೂಡಿ ಕಾಡಿದ ವಿಗ್ರಹವೇ 
ಹಗಲ ಕನ್ನಡಿಯಲಿ ನಗುವಾಗಿ ನಾಚುವ ಕನಸಾದರೆ;
ಹಾಗೆ ಪ್ರೇಮವೂ ಪ್ರಣಯವೂ ಒಂದಾಗಿ ಫಲಿಸಿ ಅರಳುವ, ಆ ಶುಭ ಸಂಧಿಕಾಲದ ಮುನ್ನುಡಿಯಾಗಲಿ ಈ ಕನಸಿನ ಬೆಳಗು...
ಮತ್ತೂ
ಬೆನ್ನುಡಿಯಲಿ ಶುಭದ ಸಂಸಾರದ ಕನಸಿದೆ...
ಶುಭದಿನ... 🤝🫂

ಕೋಗಿಲೆ ಕೊರಳ ಹಾಡಿನ ಇಂಪು 
ಕಿವಿ ತುಂಬುವಾಗಲೆಲ್ಲ
ಕಾಗೆ ಒಡಲ ಗೂಡಿನ ಪ್ರೀತಿ ತಂಪು/ಕಂಪು
ಯೆದೆಗಿಳಿದರೆ
ರುದಯದ ಗುಡಿಯಲಿ ಬೆಳಕು ಮೈದುಂಬಿ 
ಬಾಳ ಬಂಡಿ ನೆಮ್ಮದಿಯಲಿ ತೇಗೀತು...
ಬೆಳಗಾಗುವ ಹೊತ್ತಿಗೆ... 🤝🫂

ಅವಳ/ನ ಒಡಲ ಕಾಳಜಿಯ ಬೆಳಕು,
ಬೆಳಕಿನ ಕಿಡಿಗಳ ಕಾಳಜಿಯ ಒಡಲು,
ಎರಡೂ
ಬದುಕು ಸುಡದಂತೆ ಕಾಯುವ 
ಭೂಮಿ ತೂಕದ ಪ್ರೀತಿ ಪ್ರೀತಿ ಮಡಿಲು...
ಶುಭವು(ವೇ) ಸುರಿಯಲಿ ನೆತ್ತಿಗೆ - ಬೆಳಕಿಳಿವ ಹೊತ್ತಿಗೆ...
ಶುಭದಿನ - ಶುಭದ ರೂಪವೇ... 🤝🫂

ಬೆಳಕಿನ ಭಾವ, ಭಾಷೆ, ಭಾಷ್ಯ ಎಲ್ಲಕೂ ಪ್ರೀತೀ ಎನ್ನಬಹುದು, ಎಲ್ಲವೂ ಪ್ರೀತಿಯೇ ಅಹುದು...
ನಿಜ ಪ್ರೀತಿಯ ಅರ್ಥ, ಆಶೆ, ಪರಮಾರ್ಥ ಎಲ್ಲವನೂ ಬೆಳಕೂ ಅನ್ನಬಹುದು, ಎಲ್ಲವೂ ಬೆಳಕೇ ಹವುದು...
ಮತ್ತೊಂದು ಬೆಳಗು - ಮತ್ತೆ ಮತ್ತೆ ಪ್ರೀತಿಯ ಹಾದಿ/ಸನ್ನಿಧಿ... 
ಶುಭದಿನ... 🤝🫂

ಹಿತ್ತಲ ಹೂ ತುಟಿಗೆ ಬಯಲ ದುಂಬಿ ತುಟಿ ಒತ್ತುವಾಗ ಲಾಸ್ಯದಿ ಮೈದೋರುವ ತುಂಟ ಕವಿತೆಯೀ ಬೆಳಗು...
ಬೆಳಗೆಂದರೆ, ಬೆಳಕೆಂದರೆ ಮನಸು ಮೈದುಂಬಿ ಅರಳುವುದು...
ಶುಭದಿನ... 🤝🫂

ಬೆಳಗಪ್ಪಾಗ -
ಸಾವಧಾನದಲಿ ಯೆದೆಯ ಗೂಡಿನ ಬಾಗಿಲಿಂದ ಇಣುಕಿ, ಕಣ್ಣ ಗೋಳದಿ ಮಿನುಗಿ, ಬಯಲ ತುಂಬಿಕೊಳುವ ಪ್ರೀತಿ ನಗೆಯ ಲಾಸ್ಯದಂದದಂತೇ ಬೆಳಕು ಬಿಚ್ಚಿಕೊಳ್ಳುತ್ತದೆ ಧರೆಯ ವಕ್ಷೋಜಗಳ ಮರೆಯಿಂದ...
ಕಾರುಣ್ಯಸಿಂಧು ಬೆಳಗು...
ಶುಭದಿನ...  🤝🫂

ಇಂಥ ಪರಿ ಮೋಡ, ಛಳಿ ಗಾಳಿ ಇದ್ರೂ ಇನ್ನೊಂಚೂರು ಮಲಗ್ವಾ, ಇನ್ನೊಂದೈದ್ ನಿಮ್ಶಾ ಬಿಟ್ ಎದ್ಕಂಬಾ ಅಂತ ಅಲಾರಾಂನ ನೆತ್ತಿಮೇಲೊಂದು ಕುಟ್ಟಿ ಹೊದ್ದು ಮಲಗ್ದೇನೇ, ವಂದಿನಾನೂ ಬಿಡದ್ದೇ, ಸರೀ ಹೊತ್ಗೆ, ಕುಂಡೆಗೆ ಬೆಂಕಿ ಬಿದ್ದಂಗೆ ಯೆದ್ದು ಕುಂತು ಬೆಳಕಿನ ಕಿಡಿಗೆ ತಿದಿ ಒತ್ತತಾನಲ್ಲ, ಮೆಚ್ಲೇಬೇಕು ಈ ಸೂರಿಮಾಮನ ಕೆಲಸದ ಪ್ರೀತಿಯ ಪರಾಕ್ರಮಾನ...
ಅವ್ನಂಗೆ ಕೆಲ್ಸಾ ಕಲೀಲಾಗ್ದೇ ಹೋದ್ರೂ ಅವ್ನ ಕೆಲ್ಸದ್ ಬಗ್ಗೆ ಎರ್ಡ್ ಒಳ್ಳೆ ಮಾತಾಡ್ಲಾದ್ರೂ ಕಲಿಯವು ನಾನು...
ಶುಭದಿನ... 🌦️🫂

ಬೆಳಕನು ಮಾತಾಡಿಸು ಬದುಕನು ಪರಿಚಯಿಸುತ್ತದೆ...
ಪ್ರೀತಿಯ ಆವಾಹಿಸು ಬೆಳಕು ಮಾತಿಗೆ ಕೂರುತ್ತದೆ...
ಬೆಳಗು - ಪ್ರೀತಿ ಮತ್ತು ಬದುಕಿನ ಸಂಗೀತ ಸಂಯೋಜನೆ...
ಶುಭದಿನ... 🤝🫂

ಕಣ್ಣ ತುಂಬಾ ಕತ್ತಲ ಕಳ್ಳು ಕುಡಿದು, ಮೈತುಂಬಾ ಮುಸುಕು ಹೊದ್ದು ಮಲಗಿದ್ದವರ ಸಣ್ಣ ಕರುಳಲ್ಲಿ ಕಚಗುಳಿಯಾಡಿಸಿ ಎಬ್ಬಿಸಿ, ಬೆಳಕ ಮೀಯಿಸಿ, ಒಪ್ಪವಾಗಿ ನಿತ್ಯ ನೈಮಿತ್ಯಕೆ ಅಣಿಗೊಳಿಸುವ ಅನುಭಾವ ಬೆಳಗು...
ಬೆಳಗೆಂದರೊಂಥರಾ ದೊಡ್ಡಮ್ಮ/ಚಿಕ್ಕಮ್ಮನಂಥ ಪ್ರೀತಿ ಮಡಿಲು...
ಶುಭ ಸುಪ್ರಭಾತ... 🤝🫂

ಯೆದೆಯ ಕಣ್ಣ ತೆರೆದು ಬೆಳಕಿನ ಕಣ್ಣಿಗೆ ಬಿದ್ದರೆ ಒಳಮನೆಯ ತುಂಬಾ ಪ್ರೀತಿ ಪ್ರೀತಿ ಬೆಳಕೇ ಬೆಳಕು...
ಉರಿದಲ್ಲದೆ ಬೆಳಕೆಲ್ಲಿಯದು...
ಶುಭದಿನ... 🤝🫂

ನೇಹೀ -
ಇನ್ನೊಂದಿಲ್ಲ ಬೆಳಕಿನಂಥ ಚಂದ ಬಣ್ಣದ ಸಾರ...
ಬೆಳಕು ಬಣ್ಣಗಳ ಸಾವ್ಕಾರ / ಮಾಯ್ಕಾರ...
ಬೆಳಕೆಂದರೇ ನೂರು ಬಣ್ಣಗಳ ಅಲಂಕಾರ...
ಬೆಳಗು ಬೆಳಕು ಬೆಳಗಿ ಬಣ್ಣಗೂಡಲಿ ನನ್ನ ನಿನ್ನ ರುದಯ ಬಿಡಾರ...
ನವಿಲ್ಗರಿಯ ಕಣ್ಣಂತ ನವಿರು ಬೆಳಗು...
ಶುಭದಿನ... 😍

ಯಾವ ಬಣ್ಣನೆ ಸಾಟಿ ಕಣ್ಣಲ್ಲೂ, ಕನಸಿಗೂ, ಪ್ರೀತಿ, ಭರವಸೆಯ ಮೊಗೆ ಮೊಗೆದು ಕೊಡುವ ಬೆಳಗಿನ / ಬೆಳಕಿನ ಬಣ್ಣದ ಸೊಬಗಿಗೆ...
ಎಂಥ ಚಂದ ಬೆರಗಿದು - ಬೆಳಕಿನೆದುರು ಭಾಷೆ ಸೋಲುವುದು...
ಪ್ರೇಮ ಶರಧಿ / ಶರಣ ಬೆಳಗು... 🤝🫂

ಕತ್ತಲನ್ನೂ ಪ್ರೀತಿಸಿಯೂ ಬೆಳಕಿಗಾಗಿ ಕಾಯುತ್ತೇವೆ...
ಕತ್ತಲಿಗೆ ಅರಳುವ ಪಾರಿಜಾತವೂ ಹಸಿರ ಬೇರಿಗೆ ಪ್ರೀತಿಯ ಕಸುವೂಡಲು ಬೆಳಕನ್ನೇ ಆಶ್ರಯಿಸುತ್ತದೆ...
ಅಲ್ಲಿಗೆ,
ಬೆಳಕನ್ನು ಪ್ರೀತಿಸುವುದು ಎಂಬುದೇನಿಲ್ಲ; ಬೆಳಕೇ ಪ್ರೀತಿ ಅಥವಾ ಪ್ರೀತಿಯೇ ಬೆಳಕು...
ಹೊಸ ಬೆಳಗು - ಬೆಳಕು ಪ್ರೀತಿಯಿಂದ ತೊಳೆದಿಟ್ಟ ಫಳ ಫಳ ಯೆದೆಯ ಹಳೆಯದಾಗದ ಪ್ರೀತಿ ಪ್ರೀತಿ...
ಶುಭದಿನ... 🤝🫂

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರಾ ಎಪ್ಪತ್ತು ಮತ್ತೊಂದು.....

ಪ್ರೀತಿಯ ರೀತಿಯೇ ಬೆಳಗು..... 

ಯಾವ ವಾಗ್ದಾನ, ವಾಗ್ದಾಳಿ ಇಲ್ಲ, ನೂರು ಹೇಳಿಕೆ, ಕೇಳಿಕೆಗಳಿಲ್ಲ - ಸುಮ್ಮನೇ 'ಪ್ರೀತಿ ಕೊಡುವುದು' ಕೊಟ್ಟು ಕೊಟ್ಟು ತುಂಬಿ ತೊನೆಯುವುದು ನಿಯತಿಯ ತೀರಾ ಸರಳ, ಸಹಜ ನೀತಿ - ಹೂ ಚಿಟ್ಟೆ ಚಿತ್ತಾರ ಬೆಳಕು...
'ಪ್ರೀತಿ ಪಡೆವ' ಆಶೆಯ ಆನು, ನೀನು - ಕೊನೆತನಕ ಹುಡುಕಿ ಹುಡುಕಿ, ಖಾಲಿಯುಳಿದೇ ಸಾಯುತ್ತೇವೆ ಸಿಗದೇನೇ ಪ್ರೀತಿ ದುಕಾನು...
ಭಾಷೆ, ಭಾಷ್ಯಗಳಲಿಲ್ಲ ಪ್ರೀತಿ ಬೆಳಕು - ಅರಿವ ಸುರಿಯಲಿ ಬೆಳಗು...
ಶುಭದಿನ... 🤝🫂

ಆಲಸ್ಯದ ಸುಖ, ಸುಖದ ಆಲಸ್ಯ ಯಾವುದು ಮೇಲೆಂಬುದನು ತೂಗಲಾಗದ ರಜೆಯ ಮುಂಜಾವು ಮತ್ತು ರಜೆಯೇ ಸುಖ ಅಂತ ಷರಾ ಬರೆದು ಮುಸುಕೆಳೆದುಕೊಳ್ಳುವ ನಾನು... 
ಹೊಟ್ಟೇಲಿ ಲವಲವ ಶುರುವಾಗಿ ಬೆಳಕಿಗೆ ಹಾಯ್ ಅನ್ನುವ ಹೊತ್ತಿಗೆ ಹೊತ್ತು ನೆತ್ತಿಗೇರಿ ನಡು ಮಧ್ಯಾಹ್ನ ಬಾಗಿಲಲ್ಲಿರುತ್ತೆ... 🤪
ಶುಭದಿನ... 🙈

ಪ್ರೇಮ ಬೆಳಕನ್ನು ಮಿಂದಲ್ಲಿ ಬನಕೆಲ್ಲ ವಸಂತೋತ್ಸವ - ಬಯಲ ಮೂಲೆಯ ಒಂಟಿ ಹೂವಿಗೂ ಹರೆಯ...
ಆ ಸಂಭ್ರಮಕೆ ಕುಣಿವ ಗಾಳಿಯ ಮೈನವಿರಿಂದ ಊರ ಉಸಿರಲೆಲ್ಲ ಪ್ರೇಮದ ಘಮ...
ಪ್ರೇಮಿಯ ಕುರುಡನ್ನು ಪ್ರೇಮಕಂಟಿಸದೇ ನೋಡುವಲ್ಲಿ ಪ್ರೇಮ ಬೆಳಕು...
ಶುಭದಿನ... 🤝🫂

ಮಳೆಯ ಮಿಂದ ಹೊಳೆಯಲಿ ತುಂಬಿ ಹರಿವ ಬೆಳಕು...
ಬಯಲೇನು ಬೇಲಿ ಗೂಟದಲೂ ಹಸಿರ ಹೊನ್ನ ಬಸಿರು...
ಮಳೆಕಾಡಿನ ಊರು ನನ್ನದು, ಹಸಿ ಮಣ್ಣ ಘಮ ಮೆತ್ತಿದ ಉಸಿರು...
ಬಾನು ಭುವಿ ಪ್ರೇಮ ಪಾಕ - ಅರಳಿದ ಹಸಿ ಹಸಿರ ಬೃಂದಾವನ - ಬೆಳಕಿನುತ್ಸವ...
ಬೆಳಗಾಯಿತು... 🫂🤝

ಹೂವೆದೆಯ ಪಾಡನು ಕೊರಳೆತ್ತಿ ಹಾಡುವ ಹಕ್ಕಿಗೊರಳಿನ ಇಂಚರ...
ಚಿಟ್ಟೆ ಪಾದಕಂಟಿದ ಹೂವ ಘಮಲಿಂದ ಬಯಲಿನೊಡಲ ತುಂಬಿ ಬೆವರುವ ಯೌವನ...
ಯೆದೆ ಕದವ ತೆರೆದು ಮೌನವನಾಲಿಸೆ ಮಧುರ ಸಂಭಾಷಣೆಯ ಪ್ರೀತಿ ಸಂಯೋಜನೆ ಈ ಬೆಳಗು...
ಧ್ಯಾನವೆಂದರೂ ಇಷ್ಟೇ, ಬೆವರುವ ಯೆದೆಯ ಹಾಡು ಕೇಳುವುದು - ಎನ್ನದು, ನಿನ್ನದೂ...
ಶುಭದಿನ... 🫂🤝

ಬೆಳಕಿನ ಸ್ಪರ್ಷಕೆ ಅರಳಿದ ಹೂವಿನ ಮೈ ಗಂಧವನ್ನು ಗಾಳಿಯೂ, ಪರಾಗವನ್ನು ಚಿಟ್ಟೆ ಪಾದವೂ ಊರಿಗೆಲ್ಲಾ ಹಂಚಿ ಸಂಭ್ರಮಿಸುವುದ ಕಾಂಬಾಗ, ಮಗುವಿನೆದೆಯ ಶುದ್ಧ ಬೆರಗಿನಂಥಾ ಪ್ರೇಮಕ್ಕೆ ನಿಷ್ಠೆಯ, ಪಾವಿತ್ರ್ಯದ ಪರಿಭಾಷೆಯ ವ್ಯಾಖ್ಯಾನ ಮಾಡಲು ನನ್ನಲ್ಲಿ ಸಣ್ಣಗಾದರೂ ಮುಜುಗರವಾಗಬೇಕೇನೋ...
ಶುಭದಿನ... 🫂🤝

ಬೆಳಕು ಚೂರು ಮುಖ ತಿರುವಿದರೂ ಕತ್ತಲು ಕದ ಹಾಕಿಕೊಳ್ಳುತ್ತದೆ...
ಎಲ್ಲ ಒಡೆದು ತೋರುವ ಬೆಳಕೂ ತನ್ನ ಬೆನ್ನ ಮೇಲೆ ಕತ್ತಲು ಬರೆದಿಟ್ಟ ಗುಟ್ಟನು ಅರಿಯಲಾಗದೇ ಅದನು ತನ್ನದೇ ನೆರಳು ಅಂತ ಕರೆದು ಸುಮ್ಮನಾಗುತ್ತದೆ...
ನಾನು ಇರುಳ ಎದೆಯ ಮೇಲೆ ಬರೆದ ನಮ್ಮ ಜೋಡಿ ಹೆಸರನು ಓದಲು ಬೆಳಗಿಗಾಗಿ ಕಾಯುತ್ತೇನೆ...
ಪ್ರೀತಿಯಿಂದ ಕಾದಿಡುವ ಕೆಲವು ಗಪ್‌ಚುಪ್ (ಮಾತು)ಘಳಿಗೆಗಳಿಗೂ ಪ್ರೀತಿ ಎಂದೇ ಹೆಸರು...
ಶುಭದಿನ... 🫂🤝

ಕೋಳಿ ಕೂಗಿ ಬೆಳಗಾಗುವುದಿಲ್ಲ...
ಆದರೆ,
ಅರುಣೋದಯದ ಮೊದಲ ಕಿರಣಕ್ಕೆ ಸರಿಯಾಗಿ ಎದ್ದು ಕೂರುವ ಕೋಳಿ ಯೆದೆಯಲ್ಲಿ ಬೆಳಕಿನ ಅಲಾರಾಂ ಇರಬಹುದು ನೋಡು...
ಇರುವೆಗಳ ಕೇಳಿ ಋತುಮಾನ ಬದಲಾಗುವುದಿಲ್ಲ...
ಆದರೂ,
ಸದಾ ಗಡಿಬಿಡಿಯಲೇ ಓಡಾಡೋ ಇರುವೆಗಳ ಕೊರಳಲ್ಲಿ ಋತುಗಳ ದಿನದರ್ಷಿಕೆ ಇರಲಿಕ್ಕೆ ಸಾಕು...
ಕಾಣುವ ಮನಸಿದ್ದರೆ ಇಂಥದು ಪ್ರತಿ ಹೆಜ್ಜೆಗೂ ನೂರಾರಿದೆ ನೋಡು...
ಅದಕೇ,
ನನ್ನ ದೊಡ್ಡಸ್ತಿಕೆ ಕಳೆಯಲು ಸುತ್ತಣ ಸೃಷ್ಟಿಯ ಬೆಳಕಿಗಿಷ್ಟು ಬೆರಗಿನ ಕಣ್ಬಿಟ್ಟು ಕೂರಬೇಕು...
ಅರಿವು - ಬೆಳಗು... 🤝🫂

ಪ್ರೀತಿಯಲ್ಲಿ ಸೋಲೇ ಇರಲಿ;
ಆದರೆ,
ಪ್ರೀತಿ ಸೋಲದಿರಲಿ...
'ನಾನು' ಎಂಬ ಧಾಡಸಿ ಭಾವ ನನಗೆ ನನ್ನ ಕಾಯ್ದುಕೊಡುವಷ್ಟಿರಲಿ; 
ಆದರದು
ನಿನ್ನ ಕಳೆದುಕೊಳ್ಳುವಷ್ಟು ಅಹಂಭಾವವಾಗಿ ಬೆಳೆಯದಿರಲಿ...
ನೋಡಲ್ಲಿ,
ಗಗನದ ತಾರೆಯ ಬೆಳಕು ಭುವಿಯ ಹುಳವ ತಾಕಿ ಉಸಿರು ಹರಿದಲ್ಲೆಲ್ಲ ಪ್ರೀತಿ ಸಂಚಾ(ಸಾ)ರ...
ಪ್ರೀತಿ ಪ್ರೀತಿ ಬೆಳಗು - ಪ್ರೀತಿಯ ರೀತಿಯೇ ಬೆಳಗು...
ಶುಭದಿನ... 🫂🤝

ನೇಹವೇ -
ನನ್ನೆದೆಯಲಿ ನಾ ಹಡೆದು ನಿನ್ನುಡಿಯಲಿಟ್ಟ ಶುಭ ನುಡಿಯೊಂದ ನೀ ಮೆಚ್ಚಿ ಧರಿಸಿ ನಿನ್ನ ತುಟಿಯಂಚಲಿ ಸಣ್ಣ ನಗೆ ಮುಗುಳು ಅರಳಿದರೆ ಶುಭವು ಪಡಿನುಡಿದು ನನ್ನಾ ದಿನವೆಲ್ಲಾ ಶುಭವೇ ಶುಭ...
ನಿನ್ನ ತಾಗಿ ಮರುನುಡಿದು ನನ್ನ ತೂಗುವ ಶುಭದ ಸಂಗೀತ - ಶುಭದಿನ... 🤝🫂

ನಮ್ಮ ಬಾಳ ಯಜ್ಞದ ಕೊಟ್ಟ ಕೊನೆಯ ಹವಿಸ್ಸಾಗಿ ನಮ್ಮದೇ ಉಸಿರನು ಪಡೆವ ಕಾಲ...
ಅದೇ ಕಾಲವು ಅದಕೂ ಮೊದಲು ಉದ್ದಕೂ ರಾತ್ರಿಯೆದುರು ಹಗಲು, ಬೆಳಗಿನಾಚೆ ಇರಳನು ವಿಚಿತ್ರ ಸಚಿತ್ರ ಭರವಸೆಯಾಗಿ ನಮ್ಮೆದುರು ಸಮಾಽಽ ಹಂಚುತ್ತದೆ...
ಹಳೆಯದನು ತೊಳೆದು ಹೊಸದನಾಗಿಸಿ ಕೊಡುವ ಪ್ರತಿ ದಿನವೂ ಕಾಲ ನಮಗೆಂದೇ ಎತ್ತಿಕೊಟ್ಟ ಪ್ರೀತಿಯ ಹೊಸ ದಿನವೇ ಅನಿಸುತ್ತದೆ...
ಇಂತಿಪ್ಪಲ್ಲಿ -
ಮುಗಿದುಹೋಗುವುದು ಕೂಡಾ ಒಂಥರಾ ನೆಮ್ಮದಿಯೆನಿಸಿ...
ಶುಭದಿನ... 🤝🫂

ಬೆಳಕಿನ ಕಿಡಿಯೊಂದಿಗೆ ಶುಭದ ಹುಡಿಯೊಂದು ನಿನ್ನ ಒಳಮನೆಯ ಸೇರಲಿ...
ನಿತ್ಯಾಲಾಪಕೆ ಲಾಸ್ಯದಲಿ ಮೈಮುರಿವ ನಿನ್ನ ಕಂಣ್ಣಂಚಲಿ ನಗುವೊಂದು ಅರಳಲಿ...
ಪ್ರೀತಿ ದುಂಬಿಗೆ ನಗೆಯ ಔತಣ ಸಿಕ್ಕರೆ ದಿನವೆಲ್ಲ ಹಾಡು ಹಬ್ಬ...
ಶುಭದಿನ... 🤝🫂

ನೂರು ಮಾತಿಗೆ ಬರಾಬರಿ ಒಂದು ಸ್ಪರ್ಶ ಅಂತಾರೆ ಅಥವಾ ಮಿಗಿಲೇ ಇರಬಹುದು...
ಹಾಗಿದ್ದರೆ,
ನಿತ್ಯ ನಿರಂತರ ಅನಂತವ ತಬ್ಬುವ, ಹಬ್ಬುವ ಬೆಳಕಿನೊಡಲಿನ ಪ್ರೀತಿಯ ತೂಕವೆಷ್ಟಿರಬಹುದು...!!
ಬೆಳಕು ಹಬ್ಬಿ ಪ್ರೀತಿಯಾ...? ಪ್ರೀತಿ ತಬ್ಬಿ ಬೆಳಕಾ...? ಚರ್ಚೆಯೇ ಬೇಡ ಬಿಡು - ಒಂದರೊಳಗೊಂದು ತಳಕಂಬಳಕ...
ತಬ್ಬಿದರೆ ಬೆಳಕನೇ ತಬ್ಬು - ಹಬ್ಬಿದರೆ ಪ್ರೀತಿಯಾಗಿ ಹಬ್ಬು...
ತನ್ನೊಂದು ಕಿರುಬೆರಳ ಸ್ಪರ್ಶದಲಿ ಜಡವನೆಲ್ಲ ತೊಳೆದು, ಜಗವನೆಲ್ಲ ಅರಳಿಸುವ ಹಂಚಿ ಖಾಲಿಯಾಗದ ರಾಶಿ ರಾಶಿ ಪ್ರೀತಿ ಪ್ರೀತಿ ಬಣ್ಣಾ ಬಣ್ಣ ಬೆಳಗು...
ಶುಭದಿನ... 🤝🫂

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರೆಪ್ಪತ್ತು.....

ಒಡಕು ಯೆದೆಯವನ ಹರಕು ಪ್ರಾರ್ಥನೆ.....

ಚಂದಿರನ ಕೂಡಲು ಓಡುವ ಬೆಳಕಿಗೆ ನೀ ನಿನ್ನ ನಗೆಯ ರಂಗು ಬಳಿದಾಗ - ಆ ಸೊಬಗಿಗೆ ಸಂಜೆಯಾಯಿತೂ ಅನ್ನುವುದು ಮರುಳ ಜಗ...
____ ಪ್ರೀತಿ ಯೆದೆತೆರೆದು ಮೈಮರೆಯುವ ಹೊತ್ತು/ಗತ್ತು...

ಯೆದೆ ಹಿಗ್ಗಿ ಹೊಮ್ಮುವ ನಗುವಿಗಿಂತಾ ಕರುಳಿಂಗೆ ಇಂಪಾದ ಹಾಡು, ಕಣ್ಣಿಂಗೆ ತಂ(ಸೊಂ)ಪಾದ ಚಿತ್ರ ಬೇರೇನಿದೆಯೋ ವತ್ಸಾ...
___ ಪ್ರೀತಿಯ ನೆಲೆ, ನೆರಳು... 

ಮಳೆಯ ಮಿಂದ ಹಸಿರ ಹಾದಿ - ಹುಚ್ಚು ನಗೆಯ ಪುಣ್ಯ ಪಯಣ... 🚂
____ ಸಂಜೆಗಳು ಹೀಗೆ ನಗೆಯ ಮೆಲ್ಲಬೇಕು... 
&&&

ಹೇಳು ಶ್ರೀ -
ಜಗದ ಮೈಮನದ ಕೊಳೆಯನೆಲ್ಲ ತೊಳೆದು ತಂಪಾಗಿಸುವಂಥಾ ಅನಂತ ವಿಸ್ತಾರದ ಬೆಳದಿಂಗಳಿದ್ದರೂ ನೋಡುವ ಹುಳು(ಕು) ಕಣ್ಣಿಗೆ ಕಲೆಯಷ್ಟೇ ಕಂಡರೆ ಅದು ಚಂದ್ರಮನ ತೂಕವಾ...!?
____ ಬರ್ಕತ್ತಾಗದ ಪ್ರೀತಿ...
&&&

ನನ್ನ(ನ್ನೆ)ದೇ ಸಾಲುಗಳ ನನಗೆ ಕೇಳಿಸೀ ಅಳಿಸಿಬಿಟ್ಟಳು - ನೋವನೇ ಹಾಡಿಯೂ ನೋವೆದೆಗೆ ನಗೆಯ ಹೆಗಲಾದಳೂ...
ಈ ಕಣ್ಣಲೀ ಕದಲುವಾ ಕಾವ್ಯಕೇ ಉಸಿರಿತ್ತಳೂ - ನೆನಪಿನಾ ಅಂಗಳದಾ ಪಾತಿಯಾ ಹಸಿರಾದಳೂ...
ನನ್ನದೀ ಬದುಕನೂ ತನ್ನದಾಗಿಸೀ ಬದುಕಿಸಿಬಿಟ್ಟಳು - ಭಾವದಾ ಬಯಲಿನಾ ಬೆಳಕಾದಳೂ...
ಹೆಸರೇ ಇಲ್ಲದಾ/ಹೆಸರಿಗೆ ಕಾಡದಾ ಕಾಡ ಕನಸಾದಳೂ - ಕಡಲಿನಾ ದಂಡೆಯಾ ಕಡು ಮೌನದಂತವಳೂ...
ಸೋತ ಹುಡುಗನಾ ನೀಲಿ ಕನಸಿಗೇ ಮಳೆಯಾ ಪರಿಚಯಿಸಿದಳೂ - ಪ್ರೀತಿಯಲೀ ಮೈದುಂಬಿ ಕೋಡಿ ಹರಿದು ಹೊಳೆಯಾದಳೂ...
___ ಎನ್ನ ಕಪ್ಪು ಹುಡುಗೀ - ಶಬ್ದ ಸೋಲುವ ಒಲುಮೆ, ಯೆನ್ನೆದೆಯ ಕಾರ ಹುಣ್ಣಿಮೆ...
&&&

ಕೇಳೇ -
ಬಿಮ್ಮಗೆ ಸೋನೆ ಸುರಿವ ಮಳೆ
ಬರಿ ಮೈಯಲಿ ಸುಳಿವ ಛಳಿ ಗಾಳಿ 
ತೊಯ್ದ ಎದೆಗಂಟಿದ ಕರಿ ಪತ್ತಲದ ಒದ್ದೆ ಒದ್ದೆ ಕತ್ತಲು...
ಈ ನಿಶೆಯ ಬಾಗಿಲ ತಂಬೆಲರ ಬಾಗಿನಕೆ ನಿನ್ನ ಹರೆಯದ ಬೆತ್ತಲು ನನ್ನ ತೋಳಿನಾಳ್ಕೆಯ ಸಹಚಾರಿಯಾದರೆ; ಇರುಳು ಆರುವ ಮುನ್ನ ಕಾಲನೋಲಗಕೆ ಹಿಡಿ ಹಿಡಿ ಪ್ರೀತಿ ಕಪ್ಪ ಕಾಣಿಕೆ - ಬೆನ್ನ ಹಾಳೆಯ ಮೇಲೆ ಬೆರಳು ಗೀಚಿದ ಗೀರುಗಳಲಿ ಉಪ್ಪು ಬೆವರ ಉರಿ ಉರಿ ಉರವಣಿಗೆ... 
ಹಸಿ ತುಟಿಗಳ ಘಮವಂಟಿದ ಬಿಸಿ ಉಸಿರಿನ ಮೊದಲ ಕಂತಿನ ಪ್ರೀತಿಗೂ, ಹೊರಳಿ ಹೊರಳಿ ಅರಳುವಾಟದಿ ಸಜ್ಜೆಮನೆಯ ಗಾಳಿಗೇ ಅಂಟಿದಂತಿರುವ ಅದಲು ಬದಲಾದ ಮೈಗಂಪಿನ ಕೊನೆಯ (?) ಕಂತಿನ ಪ್ರೀತಿಗೂ ನಡುವೆ ಕೋಳಿ ನಿದ್ದೆಯ ಅಂತರ... 
___ ಛಳಿಯ ಛವಿಯಿಳಿಸುವ ಸಾಲು ಸಾಲು ಕಂತುಕೇಳಿಯ ಕಂಪು (ಚಂಪೂ) ಕಾವ್ಯ... 
&&&

ಅವಳ ಕೈತುಂಬಾ ಹೊಸ ಬಳೆಗಳ‌ ಖಣ ಖಣ - ಹೌದು, ಹಬ್ಬವಂತೆ...
ನನ್ನ ಬೆನ್ಬಯಲ ತುಂಬಾ ಹೊಸ ಗೀರುಗಳ ನರಕ ಸುಖದ ಕಳ್ಳ ಕನಸು - ಹಬ್ಬವೇ ಹೌದು...
___ ರಸಿಕನೆದೆಯ ಪುಳಕದ ಪಟಾಕಿ ಸದ್ದು ಊರ ಕಿವಿಗಳಿಗೆ ಕೇಳದಿರಲಿ...

ಕಾಡುವ ನಿನ್ನ ಕೂಡದೇ
ಕೊರೆಯುವ ಈ ಇರುಳ ದಾಟುವುದು ಹೇಗೆ...
___ ಮಳೆ(ಯಲ್ಲೂ)ಯಾಗಿ ಬೆವರುವ ಬಯಕೆ...

ಯಾವುದೂ ಮೊದಲಿನಂತಿಲ್ಲ ಎನ್ನುತ್ತಾ ಎಲ್ಲಾ ಮಧುರ ಪಾಪಗಳ ಮತ್ತೆ ಮೊದಲಾಗಿ ಶುರು ಮಾಡಲು ಹವಣಿಸುವ 'ನಡು ವಯಸ್ಸ'ನು ಹಾಯುತಿರುವ ಪರಮ ಪೋಲಿ ಪ್ರಾಣಿ ನಾನು...
___ ಹರೆಯದ ಸಂಜೆಗಳ ಬೆನ್ನಮೇಲಿನ ಪಾಪದ ಮಧುರ ಗೀರುಗಳಿಗೆಲ್ಲ ಎದೆಗೆ ಛಳಿ ಗಾಳಿಯ ಬೀಸುವ ಕಾಲನೇ ಹೊಣೆ...
&&&

ಕಪ್ಪು ಹುಡುಗೀ -
ನಾ ನನ್ನ ನೋವುಗಳಲಿ ಕಳೆದೋಗಿ ಕೊರಡಾದ ಇಳಿಗತ್ತಲ ಹಾಡಿಯಲಿ ಇನ್ನೇನೂ ಆಗದ, ಬೇರೇನನೂ ಬೇಡದ ಒಂದು ಹೊಚ್ಚಹೊಸಾ ಅಪ್ಪಟ ಮೋಹವಾಗಿ ನೀ ನನ್ನ  ತಾಕಿ ಬಲವಾಗಿ ತಬ್ಬಬೇಕು; ಆ ಬೆಚ್ಚಾನೆ ಬಿರುಸಿಗೆ ನನ್ನೊಳಗೆಲ್ಲ ಬರಿದಾಗಿ, ಬಯಲಾಗಿ ಮತ್ತಲ್ಲಿಗೆಲ್ಲ ಮುಗಿದೇ ಹೋದಂತಿರಬೇಕು... 
ಭಾವದ ಉರಿ ಉಸಿರಲಿ ಮೈಕಡೆದು ಹರಿದ ಹಸಿ ಬೆವರಲೀ ಮನಸ ಮೀಯಿಸಿ ಮಡಿ ಮಾಡಿ ನನ್ನೆಲ್ಲಾ ಹೊಸ ಹುಡುಕಾಟವನ್ನು ನೀನೇ ಜೀವಂತ ಇಡಬೇಕು ಮತ್ತು ಏನೆಂದು ಅರಿವಿರದ ಏನನ್ನೋ ಹುಡುಕಿ ಹೊರಟ ನನ್ನ ಹಾದಿಯಲೆಲ್ಲ ನೀನೇ ಹೊಸದಾಗಿ ಸಿಗಬೇಕು...
____ ಒಡಕು ಯೆದೆಯವನ ಹರಕು ಪ್ರಾರ್ಥನೆ...

ವತ್ಸಾ - 
ಹೂವಂತೆ ಆರೈದು ಯೆದೆಗೂಡಲಿ ಕಾದುಕೊಳ್ತೇನೆ ನಿನ್ನ ಅಂದ್ಲು...
ನವಿಲ್ಗರಿಯ ಮಗ್ಗುಲಲಿ ಒಣ ಹೂವನಿಟ್ಟರೆ ಹೂವಿಗೂ ಗರಿ ಮೂಡಿ ಮರಿ ಹಾಕೀತು ಅನ್ನೋದು ಮುಗ್ಧತೆಯಾ ಇಲ್ಲಾ ಭ್ರಮೆಯಾ ಅಂದೆ...
ಮುನಿಸಿಕೊಂಡು ಹೆಗಲು ಕಚ್ಚಿ ಕಣ್ಮುಚ್ಚಿದವಳಿನ್ನೂ ಮಾತಿಗೆ ಕೂತಿಲ್ಲ - ಎದೆರೋಮಗಳ ಬುಡದಲ್ಲಿ ಇಂಗಿ ಮರೆಯಾಗಲು ಆ ಅವಳ ಕಣ್ಣಹನಿಗಳು ಜಾಗ ಹುಡುಕುತ್ತಿವೆ...
___ ಜಗವೆಲ್ಲಾ ಸೂರ್ಯನ ಹಂಬಲಿಸುವಾಗ ಚಂದರನ ಕಲೆಯನೂ ಪ್ರೀತಿಸಿ ಇರುಳಿಗೆ ಅರಳೋ ಪಾರಿಜಾತದ ಕರುಳ ಕಡು ಘಮದ ಪ್ರಾರ್ಥನೆ ಏನಿದ್ದೀತು...!!
&&&

ಅವಳ ಶಾಪವೋ, ವರವೋ ಅವಳೇ ಮತ್ತೆ ಸಿಕ್ಕಂತೆ ಮತ್ತೆ ಮತ್ತೆ ಕನಸಾಗುತ್ತದೆ...
ಚಿರ ವಿರಹಿಯೆದೆಯಲಿನ ಅನುಗಾಲದ ಸ್ವಪ್ನ ಸ್ಖಲನ ಅವಳು...
___ ಮೋಹಾಮಾಯೆಯ ಸುಖ ಸಖ್ಯ...
&&&

ನಿನ್ನೆಗಳ ಮರೆತುಬಿಡು
ಇವತ್ತೊಂದಿನ ಕ್ಷಮಿಸಿಬಿಡು 
ನಾಳೆಯಿಂದ ನಾನು ದೇವರಂತವನು/ಳು...
ನಂಬಿದರೆ ಹಿಂಗಂದು ದೇವರನೂ ನಂಬಿಸಿಬಿಡ್ತೀವಿ - ನಶೆ ಮತ್ತು ಪ್ರೇಮದ ತಲೆಮೇಲೆ ಆಣೆ ಇಟ್ಟು/ಆಣಿ ಹೊಡೆದು...
ಮತ್ತೆ ನಿನ್ನೆಯಂತೆಯೇ...
___ ಕಥೆಯಲ್ಲದ ಕಥೆ ಹೇಳುವ ಪಾತ್ರ...
&&&

ವತ್ಸಾ -
ಅನುರಾಗವೇ ಆಗಲೀ, ಮೋಹವೇ ಆಗಲೀ ರುಚಿ ಇರುವುದು ಅನ್ಯೋನ್ಯರಲಿ ಮನಸಾರೆ, ಮೈಯ್ಯಾರೆ, ಒಡನಾಡಿ, ಒಳನಾಡಿ ಒದಗಿಬರುವುದರಲ್ಲಿಯೇ ಅಲ್ಲವಾ...!!
ಎಂಥದ್ದೇ ಒಡನಾಟದಲ್ಲೇ ಆದರೂ ಅದಾಗೇ ಅದು ಒದಗಿ ಬರುವುದು ನೋವೊಂದೇ ಅನ್ಸುತ್ತೆ ನೋಡು - ನಗುವಾಗಲೀ, ನಲಿವಾಗಲೀ, ಸುಖವೇ ಆಗಲೀ ಒಮ್ಮತದಲಿ ಒದಗಿ ಬರಬೇಕೆಂದರೆ ಪರಸ್ಪರ ಒಂದಿಷ್ಟಾದರೂ ಜೀವಾಭಾವದ ಮುಂಕೇಳಿ ಬೇಕೇ ಬೇಕನ್ನಿಸತ್ತಲ್ವಾ...!!
___ ಮಾತು, ಮಾನ, ಮುತ್ತು, ಮೌನ, ಪ್ರಣಯ, ಪ್ರೇಮ, ನೇಹ, ಪ್ರೀತಿ, ಇತ್ಯಾದಿ ಇತ್ಯಾದಿ...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)