Friday, July 20, 2018

ಗೊಂಚಲು - ಎರಡ್ನೂರಾ ಅರ್ವತ್ತೇಳು.....

ಆಷಾಢದ ಪ್ರಣಯ ಮುಖ.....  
(ಅತಿ ಪೋಲಿ ಹರೆಯದ ಮಧುರ ಪಾಪದ ಹಸಿವು...)

ಎನ್ನೆದೆಯ ರೋಮದಿ ನೆಲೆ ನಿಂತ ನಿನ್ನೆದೆಯ ತಿಳಿ ಬೆವರ ಘಮ ಅಡ್ಡ ಹೊತ್ತಲ್ಲಿ ಸುತ್ತಿ ಸುಳಿದು ನೆತ್ತಿ ಸೇರಿ ಹೊಕ್ಕುಳ ಇಳಿ ಎಸರಿನ ಉರಿಯ ಕೆದರುತ್ತದೆ...
ಆಷಾಢದ ಖಾಲಿ ತೆಕ್ಕೆ ತುಂಬುವುದೆಂತು......

ರತಿರಾಗದ ಮಂದ್ರ, ತಾರಕ ಮಿಡಿತಗಳಲಿ ಎನ್ನ ಮೀನಖಂಡವ ಮತ್ತೇರಿ ತೀಡುವ ನಿನ್ನ ಗೆಜ್ಜೆ ಗೀರಿನ ಗಾಯಗಳೆಲ್ಲ ಮೊದಲ ಬಾರಿ ಮಾಯುತಿವೆ...
ಈ ಆಷಾಢ ಮುಗಿಯಲು ಇನ್ನೆಷ್ಟು ಯುಗ ಕಳೆಯಬೇಕು...?

ಮಜ್ಜನದ ಮನೆಯ ನಿಲುಗನ್ನಡಿಯ ಬಳ್ಳಿಗೆ ನೀ ಹಚ್ಚಿಟ್ಟ ಪುಟೀ ಕಪ್ಪು ಟಿಕ್ಲಿಯೊಂದು ನಿನ್ನದೇ ಹೊಕ್ಕುಳ ಇಳಿಜಾರಿನ ಕವಣೆ ಕವಲಿನ ಎಡದಿಬ್ಬದ ಹುಟ್ಟು ಮಚ್ಚೆಯ ನೆನಪಿಸುವಾಗ.....
ಉಫ್ - ಒಂಟಿ ಸ್ನಾನದ ಆಷಾಢಕ್ಕೆ ಗಂಡು ತೊಡೆಗಳ ಹಿಡಿಶಾಪ...

ಮನೆಯ ಅಷ್ಟ ಮೂಲೆಗಳಿಗೂ ಎಷ್ಟೆಷ್ಟೋ ರೋಮಾಂಚವ ಉಣಿಸಿದ ಪ್ರೇಮೋತ್ಕರ್ಷ ಉರಗಬಂಧಗಳಲಿ ಬಿಸಿ ಉಸಿರ ಸುಳಿ ಗಾಳಿಗೆ ಬೀಗಿ ಬಿಗಿಯಾಗಿ ಮುಳ್ಳೆದ್ದ ಮೈಯ ಬಯಲ ಸೀಮೆಗಳ ಸೀಳಿ ಬಿತ್ತಿದ ಮುತ್ತಿನ ಬೀಜಗಳೆಲ್ಲ ಈ ಕುದಿವ ಏಕಾಂತದಲಿ ಮತ್ತೆ ಮತ್ತೆ ಮಿಲನದ ಕಾವು ಕೇಳುತ್ತಿವೆ...
ಈ ಆಷಾಢಕ್ಕೆ ನೀರಾಗಿ ನಿನ್ನೆದೆಗೊಂಚಲ ತಿಳಿಕಂದು ಶಿಖರಾಗ್ರವು ಎನ್ನಧರದ ಎಂಜಲು ಮೀಯುವುದು ಯಾವಾಗ...?

Tuesday, July 3, 2018

ಗೊಂಚಲು - ಎರಡ್ನೂರಾ ಅರ್ವತ್ತಾರು.....

ಬೆಳಗೂ - ಬೈಗೂ - ಅವಳೂ.....  

ಹೂವಿನ ಸಂತೆಯಲಿ ನವಿಲುಗರಿ ಮಾರುವ ಹೂ ಹಕ್ಕಿ ಭಾವ ಬಳಗದ ಹಾಡು - ಬೆಳಗು...
➤⧬➤

ಬೆಳಗೆಂದರೆ:
ತೋಳ ಬಲೆಯೊಳಗೇ ಕೊಸರಿ ಸುಖದ ತಿರುವುಗಳ ಆಲಸ್ಯದ ನೆಟಿಗೆ ಮುರಿದು - ಹಸಿ ಉಸಿರ ಪಿಸುನುಡಿಯಲೇ ಪ್ರೀತಿ ಹೇಳಿ - ಕಳೆದ ಕತ್ತಲ ಸೊಕ್ಕಿಗೆ ದಿಕ್ಕು ತಪ್ಪಿದ ಹೆರಳ ಸಿಗ್ಗು ಬಿಡಿಸದೆಲೆ ಮುಡಿ ಕಟ್ಟಿ - ಎನ್ನ ತೆಕ್ಕೆಯ ಪ್ರೀತಿ ಹಕ್ಕಿನ ಕಾಡಬೆಳದಿಂಗಳ ಗೊಂಬೆ ತಾ ಏನೋ ನೆನೆಯುತ್ತ, ಇರುಳ ಯುದ್ಧದ ಕಳ್ಳ ಗಾಯಗಳ ಎಣಿಸಿ ಸುಳ್ಳೇ ನಾಚುತ್ತ ವಸನ ಹುಡುಕುವ ಹೊತ್ತು...😍
#ಒರಟು_ತೋಳಲ್ಲಿ_ಶರದಿಂದು_ಮೆರೆದರೆ_ಮುಂಬೆಳಗಿಗೆ_ಕೂಸಿನ_ಕನಸು...💞
➤⧬➤

ಕತ್ತಲ ರಂಗಿನ ಬೀದಿ ದೀಪದ ಅಡಿಗೆ ಲಾವಂಚದ ಹನಿ ಮಿಂದ ಬೆಳದಿಂಗಳ ಕುಡಿಯೊಂದು ಬಳುಕಿ ಸುಳಿಸುಳಿದು ಕುಡಿಮೀಸೆ ಹೈದನ ಹಸಿ ಉಸಿರ ಹಳಿ ತಪ್ಪಿಸಿ ಕೆಣಕುತಿದೆ...
ಇರುಳ ಬಾಗಿಲಲಿ ಉಕ್ಕೋ ರಕುತದ ಪೋಲಿ ಕನಸುಗಳು ಯೌವನ ಪೂಜೆಗೆ ಕರೆಯುತಿವೆ...
#ಅವಳ_ವಾಯುವಿಹಾರ...
➤⧬➤

ಸಾಗರನ ಮಡಿಲಿಗೆ ಬಿದ್ದೆ - ಅಲೆಗಳು ಎದೆಗೆ ಗುದ್ದುವ ಪರಿಗೆ ಪ್ರೇಮೋನ್ಮಾದದುರಿಯಲಿನ ನಿನ್ನ ತುಟಿಗಳ ಧಾಳಿಯ ಅಟಾಟೋಪದ ನೆನಪಾಯಿತು...
ರುಚಿ ಇಲ್ಲದ ಕಣ್ಣ ಹನಿಯೊಂದು ಉಪ್ಪಾಯಿತು...
#ಸಾಗರ_ಸನ್ನಿಧಿ
➤⧬➤

ಬಲು ಬೆರಕಿ ಹರೆಯದ ಮೂರು ಸಂಜೆಯ ಹಿತ್ತಲ ಹಾದಿಯ ಕಳ್ಳ ಭೇಟಿಯಲಿ - ಉಸಿರಿಗೆ ಉಸಿರು ಸೋಕಿ ಹಾಗೆ ಹೊತ್ತಿಕೊಂಡದ್ದು ಸಣ್ಣ ಬೆಂಕಿ ತೋಳ ತಬ್ಬುಗೆಯಲ್ಲಿ...
ಅಮಾಯಕ ತುಟಿಗಳು ರುಚಿಯ ಕಾವಿನ ಜಿದ್ದಿನಲಿ ಕಚ್ಚಾಡುವಾಗ ಬೆನ್ನು ಹುರಿಯ ಬೇರಿನಿಂದೆದ್ದು ಕೈಗಂಟಿದ ಪ್ರಣಯ ಕೌಶಲ ಲೋಬಾನದ ಕಿಡಿಗೆ ಉಟ್ಟ ವಸನಗಳ ಒಟ್ಟು ಆಹುತಿ...
ಬಿರಿದ ಅವಳೆದೆ ಗೊಂಚಲ ಹೂಗಳ ಒಂದೊಂದೇ ಬೊಗಸೆ ತುಂಬಿಕೊಂಡು ಹಸಿವು ಏರುತಲೇ ಇರುವ ಎನ್ನ ಹಸಿ ತುಟಿಗೆ ಪರಿಚಯಿಸಿದೆ - ಆಸೆಯ ಹಳಿಯೇರಿದ ಅವಳ ಚಿಗುರು ಬೆರಳುಗಳು ನನ್ನ ನೆತ್ತಿಗೆ ಪ್ರೀತಿ ತುಂಬುತ್ತಾ ಭುಜದ ಬಿರುಸಿನಲ್ಲಿ ದಿಕ್ಕು ತಪ್ಪಿದವು...
ಬೆತ್ತಲೆ ಬೀದಿಯ ಕತ್ತಲ ಮೂಲೆಗಳಲೂ ಸುತ್ತಿ ಸುಳಿವ ತುದಿ ನಾಲಿಗೆಯ ಕಡು ದಾಹದ ತುಂಟ ಅಟಾಟೋಪಕ್ಕೆ ನಾಭಿ ತಗ್ಗಿನ ಸೀಳು ಹಾದಿಗಳಲಿ ಮತ್ತೆ ಮತ್ತೆ ಮತ್ತಿನ ಒರತೆ...
ಇನ್ನೀಗ - ಉಸಿರುಸಿರ ಬಿಸಿ ಹಬೆಯ ಉರುವಣಿಗೆಯಲ್ಲಿ ಈ ಜೀವಗಳ ರಸಗ್ರಂಥಿಗಳೆಲ್ಲ ಕಾದು ಕರಗಿ ರತಿರಸರಾಗದಲ್ಲಿ ಲಯವಾಗಲೀ ಇರುಳು...
#ಬಿರುಬೇಸಿಗೆಯಲೊಂದು_ಅಡ್ಡಮಳೆ_ಪೋಲಿಪಲ್ಲಂಗ...
➤⧬➤

ಕುಡಿ ಮೀಸೆ ಮರೆಯ ಹಸಿ ಶುಂಠಿ ಹಠವನು ಉಸಿರಿಂದ ಅಳಿಸಹೋದೆ...
ತುಂಟ ತುಟಿಯ ಒದ್ದೆ ಘಮಕೆ ಹೊಕ್ಕುಳ ಹೂ ಅರಳಿತು - ಪ್ರಕೃತಿ ಪ್ರೇಮದ ಮಾತಿಗೆ ಕಳ್ಳ ಮನಸಿದು ಜಾಣ ಮೌನಕೆ ಜಾರಿತು...
ಗಂಡು ಹಠ ಕರಗಿದರೂ/ಕೆರಳಿದರೂ ಬಿರಿದ ಹೆಣ್ಣೆದೆ, ಸಿಡಿದ ನಡು ನಾಡಿಯಲಿ ಸಕಾಲ ವಸಂತೋತ್ಸವ...
ಮುನಿದ ಮೂರು ದಿನವೂ, ಸುಡು ಧಗೆಯ ನಡು ಹಗಲಲೂ ಮುಡಿಗೆ ಮುಟಿಗೆ ಮಲ್ಲಿಗೆ ತಂದು ಸುರಿದವನೇ - ಭುವಿ ಕಾದಾಗ ಗಗನ ಮೋಡಗಟ್ಟಿದರೆ ಬಿದ್ದ ಹನಿ ಹನಿಯೂ ಹಸಿರ ಚಿಗುರ ಮುತ್ತಾಗುವುದಂತೆ ಕಣೋ...
ಸುಳ್ಳೇ ಕಾಯಿಸಬೇಡ - ಇನ್ನೂ ಕಾಯಿಸಿ ಕಾಡಬೇಡ - ಎಂದಿನ ಮಳ್ಳ(ಲ್ಲ) ನಗೆ ನಕ್ಕುಬಿಡು - ಚಿಗುರೊಡೆವ ರೋಮಾಂಚಕೆ ಸೋತು ಸವಿ ಮುಳ್ಳೆದ್ದ ಹಸಿ ಮೈಯ್ಯ ಹೆಣ್ಣ ಒಡಲ ಮಣ್ಣಿಗೆ ಬೀಜ ಮಳೆಯಾಗು ಬಾ...
ಪ್ರಕೃತಿ ಸಾಂಗತ್ಯದ ಸಲ್ಲಾಪಕೆ ಕಾಲದ ಹಂಗು ಗುಂಗಿಲ್ಲ - ಒಲಿದ ಆಸೆ ಕನಸು ಹೊರಳಬೇಕಷ್ಟೇ - ನೇಗಿಲ ಮೊನೆಯಾಗಿ ಮೈ ಸೀಳಿ ಬೆವರಾಗು ಬಾ...
#ಮತ್ತೆ_ಮತ್ತೆ_ಅಡ್ಡ_ಮಳೆ...
#ಕಪ್ಪು_ಹುಡುಗಿಯ_ಕೊರಳ_ಕಂಪು...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

ಗೊಂಚಲು - ಎರಡ್ನೂರಾ ಅರ್ವತ್ತೈದು.....

ಹರಿದ ಸಾಲುಗಳು..... 

#ಚಿತಾಭಸ್ಮ:
ನಿಮ್ಮ ನಿಮ್ಮ ನಾಳೆಗಳ ಕನಸುಗಳ ಪಟ್ಟಿ ಮಾಡಿ ಅಂದಿದ್ದರು ಕನ್ನಡ ಅಕ್ಕೋರು - ಹತ್ತು ಬಾರಿ ನಿನ್ನದೇ ಹೆಸರು ಬರೆದಿದ್ದೆ; ನೀನು ನಾಳೆಯಾಗಿಯೇ ಉಳಿದು ಹೋದೆ...

ಬರುವವರ್ಯಾರೂ ಇಲ್ಲ - ಕಾಯುತ್ತಾ ಕೂರುವುದು, ಬಂದವರೂ ಯಾರೂ ಇಲ್ಲ -  ಕಳಿಸೋ ಹಳಹಳಿ; ನಿಜವೆಂದರೆ ಇಲ್ಲಿ  ಖಾಲಿಯೊಂದೇ ಆಖೈರು ವರ್ತಮಾನ...

ಬರುವ ಕನಸುಗಳೆಲ್ಲ ಮಸಣಕೇ ಒಯ್ದರೆ ಬದುಕ ಹೊರುವುದು ಹೇಗೆ...?
ಉತ್ತರವೆಂಬಂತೆ ಹೂವು ಕುಶಾಲು ನಗೆ ಬೀರಿತು...

ಇರಲಿ ಕಾಯುವಾ,
ಮತ್ತೆ ಬೆಳಕಾಗಬಹುದು - ಇರುಳು ಮುಚ್ಚಿದ ಕಣ್ಣ ತೆರೆದರೆ...
ಮರೆತ ಹೆಸರಿನ ರೂಪ, ಗಂಧ ಮರೆಯದ ಹಾಗೆ...
↢↩↪↣

ಈ ಬೆಳದಿಂಗಳು ಎಷ್ಟು ಚಂದ ಅಲ್ವಾ...!!!!
ಅಯ್ಯೋ ಏನ್ ಚಂದಾನೊ, ಆ ಚಂದ್ರನ ಮೈತುಂಬ ಕೆಟ್ಟ ಕಲೆ...
ಚಂದ್ರ - ಸ್ನೇಹ; ಬೆಳಕು - ಪ್ರೀತಿಯ ಭಾವಾನುಬಂಧ ವಾಚಕ...
ಗಂಡಾ? ಹೆಣ್ಣಾ? ಸಂಬಂಧ? ಜಗದ ದೃಷ್ಟಿ ಪ್ರಶ್ನಾರ್ಥಕ...
ಹಹಾ -
"ಮುಂಬಾಗಿಲ ತೆರೆದಿಟ್ಟರೂ ಗೋಡೆಯ ಕಿಂಡಿಗೆ ಕಣ್ಣು ಕೀಲಿಸಿ ಮನೆಯ ಮೂಲೆಯ ಕತ್ತಲನು ಹುಡುಕಾಡೋ ಅಸ್ವಸ್ಥ ಮನಸುಗಳ ದೊಂಬಿ ಸುಸ್ತಿನೆಡೆಗೆ ಮಹಾ ಕರುಣೆಯ ನಗು ನನ್ನದು..."
#ಬಲು_ಮೋಜಿನ_ದೊಂಬರಾಟ_ಇದು...
↢↩↪↣

..........ಈ ಬದುಕಿಗಿಂತ ವಿಲಾಸೀ ರೋಗಿ ಮತ್ತು ಆ ಸಾವಿಗಿಂತ ಪಕ್ಕಾ ವೈದ್ಯ ಸಿಕ್ಕಾರಾ ಶ್ರೀ ನಿಂಗೆ......!!???
#ಒಳಗಿನ_ಪ್ರಶ್ನೆ...
↢↩↪↣

ವಿಚಿತ್ರ ವ್ಯಾಖ್ಯಾನಗಳಲ್ಲಿ, ಅತೃಪ್ತ ಆಚರಣೆಗಳಲ್ಲಿ, ಬೀಗ ಮುದ್ರೆಯ ಗುಡಿಗಳಲ್ಲಿ ಮನುಷ್ಯನ ಅಹಂಕಾರ ಮತ್ತು ದೇವರ ಸೋಲಿನ ನಿತ್ಯ ಮೆರವಣಿಗೆ ನಡೆಯುತ್ತದೆ...
#ಅಪ್ರಿಯ_ಸತ್ಯ...
↢↩↪↣

ಕಸರುಳಿಯದಂತೆ ನಿನ್ನ ಹಾದಿಯನ್ನು ಮತ್ತು ನಿನ್ನ ಗೆಲುವನ್ನು ನೀ ನಂಬಿದ ಕ್ಷಣ ನೀ ಯುದ್ಧ ಗೆದ್ದಂತೆಯೇ ಲೆಕ್ಕ - ಮುಂದಿನದೆಲ್ಲ ಗೆಲುವಿನ ಸಂಭ್ರಮಾಚರಣೆ ಅಷ್ಟೇ...
#ಬದುಕು_ಉತ್ಸವವಾಗಲಿ_ಆತ್ಮಾನುರಾಗದುರಿಯಲಿ.‌‌..
↢↩↪↣

ನಗೆಯ ನಾಟ್ಯಕಿಂತ ಮಿಗಿಲು ಧ್ಯಾನವುಂಟೆ...💞
ಜೀವಿಸುವುದೆಂದರೆ ಇಷ್ಟೇ - ಎದೆ ಭಾವ ಬಿರಿದು ನಗೆಯ ಮೀಯುವುದು... 😍

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

ಗೊಂಚಲು - ಎರಡ್ನೂರಾ ಅರ್ವತ್ನಾಕು.....

ಪ್ರೇಮ - ಹೊಕ್ಕುಳ ಬೆಂಕಿ..... 

ಕಿರು ಬೆರಳ ಮರಿ ಮಚ್ಛೆಗೂ ಒಲವ ಉಣಿಸಿದವಳೂ - ಕುಡಿ ಮೀಸೆ ಅಡಿಯ ಅರೆಬರೆ ನಗೆ ಬಿಗಿಯಲೇ ಕನಸ ಕದ್ದವನೂ...
ಮೊದಲಾಗಿ -
ಇರುಳ ಜೋಳಿಗೆಗೆ ಕುದಿ ಎದೆಯ ಮಾಯಕದ ಪುಳಕಗಳ ತುಂಬಿಕೊಳ್ಳುತ್ತಾ, ಸಾಗರನೇರಿಯ ಗುಂಟ ಹೆಜ್ಜೆ ಲಜ್ಜೆ ಜೋಡಿಸುವಾಗ ಭಾವ ಸ್ವಾಮ್ಯದ ಮೃದುಲ ಸ್ಪರ್ಷದಿ ಅಧರಾಧರ ಜೇನ್ ಧಾರೆ ಸೇರೆ, ಮಧುರ ಪಾಪದ ಮುನ್ನುಡಿಯ ಘಮಕೆ ಬೆನ್ನ ಹಾಳಿಯ ಮೂಲದಲ್ಲಿ ಅನಂಗ ತಾನ ಮಿಡಿಯಲಾಗಿ.......
ಬೆಳದಿಂಗಳನೆ ಹಾಸಿ ಹೊದ್ದು, ತೋಳ ಉಂಗುರ ಕಾಲಿನಿಕ್ಕಳದಲಿ ಗಾಳಿಯ ಉಸಿರುಗಟ್ಟಿಸಿ, ಸುಖದುತ್ಥಾನದ ಉನ್ಮತ್ತ ಕೇಳಿಗೆ ಶರಣಾದ ನಶೆಯ ಹಾಯಿಯಲ್ಲಿ ಕಣ್ಣು ತೇಲುವಾಗ - ಮೃಗ ಹೊರಳಿಗೆ ಚಿತ್ರ ಚಿತ್ತಾರವಾದ ಮರಳ ಮಲ್ಲಿಗೆ ಇನ್ನಷ್ಟು ಉಪ್ಪಾಯ್ತೆಂದು ನಕ್ಷತ್ರ ಮೀನೊಂದು ತುಂಟ ನಗೆ ನಕ್ಕಿತು - ಮೈಮರೆತ ಯೌವನದ ಸುಖೋತ್ಕನನ ಉತ್ಸಾಹ ಕಂಡು ಅಸೂಯೆಯ ಕಣ್ಬಿಡುವ ತಾರೆಗಳ ದೃಷ್ಟಿ ಆ ಜೋಡಿಗೆ ತಾಕೀತೆಂದು ತುಂಡು ಮೋಡಗಳು ಮಾತಾಡಿಕೊಂಡವು - "ಅವಳ ಕೊರಳ ಕೆಳ ಏರಿಯ ಮೆತ್ತೆಯಲ್ಲೂ, ಅವನ ಬಂಡೆ ಎದೆಯ ಬಿರು ಬಿರುಸಿನಲ್ಲೂ, ಈರ್ವರ  'ಊರು'ಗಂಬದ ಇಳಿಜಾರಿನಲ್ಲೂ ಸ್ವರ್ಗ ಸೀಮೆಗೆ ನೇರ ಜಾರು ದಾರಿಯಿದೆಯಂತೆ" ಅಂತೆಲ್ಲ ಜಡೆ ಹೆಣೆದ ಬೆತ್ತಲ ಬಿಸಿಯಲ್ಲಿ ಮಿಂದು ಹೋದ ಪೋಲಿ ಅಲೆಗಳು ದಡದಿಂದ ದಡಕೆ ರಸಿಕ ಕಥೆ ಹಂಚಿದವು...
ಇರುಳ ರಂಗಸ್ಥಳ - ಚಂದ್ರ ತಾರೆ ದೀಪ ವಿನ್ಯಾಸ - ಹುಣ್ಣಿಮೆಗೆ ಹುಚ್ಚೆದ್ದ ಅಲೆಗಳ ರುದ್ರ ಸಂಗೀತ - ಕಳ್ಳ ಬೆರಕಿ ಹರೆಯದೂರಲ್ಲಿ ಸುರತ ಸೋನೆ ಬೆವರಿನುತ್ಸವ...
***ಜಲಚರಗಳ ರೋಮಾಂಚದ ಪೋಲಿ ಹೇಳಿಕೆಗಳನಿಲ್ಲಿ ದಾಖಲಿಸಿಲ್ಲ... ;)
#ಮುಂಬೆಳಗಿನ_ಕನಸು_ನಿಜವಾಗುವುದಂತೆ...!!!
↶↷⇛⇚↶↷

ಮೋಡದ ಜೋಳಿಗೆ ತುಂಬಾ ನೆನಪ ಹನಿಗಳೇ - ಮೈಯೊಡ್ಡಿದರೆ ಮಳೆಗೆ ಮೈಯ್ಯೊಂದಿಗೆ ಮನಸೂ ಒದ್ದೆ ಮುದ್ದೆ - ಮಳೆ ಮನಸ ತೊಳಸುವಾಗ ತುಳುಕೋ ಕಣ್ಣ ಹನಿಯ ಮಾತು ಬಿಡಿ - ಅದು ಖುಷಿಯ ದ್ಯಾಸಕ್ಕೂ ನೋವ ವ್ಯಾಸಕ್ಕೂ ಎದೆಯ ಏಕೈಕ ಅಂತಿಮ ಮಿಡಿತ...
ಅದಿರ್ಲಿ - ವಿಷ್ಯಾ ಏನೂಂದ್ರೆ - ಇಂದು ಸಂಜೆ ಮಳೆಯೊಂದಿಗೆ ತುಸು ಹೆಚ್ಚೇ ಮಾತುಕತೆಯಾಯ್ತು - ಎಲ್ಲ ನೆನಪಾಯ್ತು - ಕಳಕೊಂಡದ್ದರ ತಂಟೆ ಬೇಡ, ಪಡೆದದ್ದರ ಹೀಗಿಷ್ಟು ಮೆಲ್ಲುವ ಆಸೆಯಾಯ್ತು....
ಹಸಿರು ಸೊಕ್ಕಿ ಮೆರೆವ ಕಾಡ ನಡುವೆಯ ಬೀಡಿನ, ಹರೆಯ ಉಕ್ಕಿ ಹರಿವ ಉಡಾಳ ಪೋರನ ಎದೆಗೆ ಆಷಾಢದ ಮಳೆಯಂತೆ ಹೊಕ್ಕ ಕನಸು ನೀನು...
ನೆಲ ಬಿರಿದು ಹೊರಬಂದ ಕಳಲೆ ಮರಿ ನೋಡ ನೋಡುತ್ತಲೇ ಬೆರಳೆಣಿಕೆ ದಿನಗಳಲಿ ಬಿದಿರ ಮೆಳೆಯಾಗಿ ಮೋಡದ ಚವರಿಯಂತೆ ಬೆಳೆವುದು ನೀ ಎನ್ನ ಎದೆಯಲ್ಲಿ ಬೆಳೆದ ವೇಗಕ್ಕೆ ಸಣ್ಣ ಹೋಲಿಕೆ...
ರಚ್ಚೆ ಹಿಡಿದ ಮಳೆಗೆ ಬಿಚ್ಚು ಎದೆಯೊಡ್ಡುವ ನನ್ನ ಹುಚ್ಚು ಮಿತಿ ಮೀರಿದ್ದು ನಿನ್ನ ಮೋಹದ ಸುಳಿಯ ಸಿಹಿ ಫಲವೇ...
ಇಂದು ಆ ಊರ ತೊರೆದ ದಶಕೋತ್ಸವದ ನಂತರವೂ ನಿನ್ನುಸಿರ ಆ ಬಿಸಿ ನನ್ನ ಹಸಿ ಹಸಿಯಾಗಿ ಸೋಕುವುದು ಮಳೆಯ ಬಳ್ಳಿಯ ತಂಪಲ್ಲೇ...
ನೆನೆದು ಮರಗಟ್ಟಿದ ಮೈಗೆ ಅಬ್ಬಿ ಒಲೆಯ ಜಂಬೆ ಕುಂಟೆಯ ಉರಿಗೆ ಕಾದ ಸುಡು ಸುಡು ಹಂಡೆ ನೀರ ಸುರಿದುಕೊಂಡರೆ ಬಿಸಿ ನೀರು ಹರಿದ ಒರಟು ಬೆತ್ತಲೆಯ ಗಂಡು ಬೀದಿಯಲಿ ಮತ್ತೆ ಅದೊಂದು ಸುಖದ ಸೆಳಕು: ಆ ಕಳ್ಳ ರಾತ್ರಿಯಲಿ ಬುಸುಗುಡುವ ಉಸಿರ ಸದ್ದನೂ ನಾಭಿ ನಾಳಿಯಲಿ ಹುಗಿದು ಮೊಟ್ಟ ಮೊದಲ ಬಾರಿಗೆ ಸೆರಗ ಪಹರೆಯ ಮುರಿದು ಕುಪ್ಪಸ ಖಿಲ್ಲೆಯಲಿ ಜೋಪಾನ ಮಾಡಿದ ನಿನ್ನ ಹರೆಯದೂರಿನ ಸೌಂದರ್ಯ ನಿಧಿ ಜೋಡಿ ಬೆಣ್ಣೆ ಮುದ್ದೆಯ ರುಚಿಯ ಮತ್ತೆ ಮತ್ತೆ ಲೂಟಿ ಮಾಡಿದ ರೋಮಾಂಚದ ಮೆಲುಕು - ಆಹ್...
ಮತ್ತೆ, ಆಗ್ಲೇ ಹೇಳಿದ್ನಲ್ಲಾ - ಈ ಸಂಜೆ ಈ ಊರಲ್ಲಿ ಗುಡುಗು ಗಾಳಿ ಮಿಂಚಿನ ತಂಟೆಯ ನಡುವೆ ಮಳೆಯ ಹುಯಿಲೆದ್ದಿದೆ...
ನಾನೋ ಮನೆಯ ತಾರಸಿಯೇರಿ ಬರಿ ಎದೆಗೆ ಭರಪೂರ ನಿನ್ನ ತುಂಬಿಕೊಂಡೆ - ಇನ್ನು ಈ ಇರುಳು ನಿನ್ನ ಹೆಸರಿಗೆ...
#ಮಳೆಗೆ_ಹರೆಯ_ಸೋತ_ಕಥೆಗಳು...
↶↷⇛⇚↶↷

ಆಳಿದ ಪ್ರೇಮದ ರೂಹನುಳಿಸುವ - ಸುಖದ ಪರುಷಮಣಿ ಶೋಧದಲ್ಲಿ - ಆಗಸವೆ ಪ್ರಣಯ ಪಲ್ಲಂಗವಾಗಿ - ದೇಹವ ಕಡೆಯುವ ಬಿಡುಬೀಸು ಏರು ಹಾದಿಯಲ್ಲಿ - ಬಿಸಿಯೇರಿ ಬಿರುಸಾಗಿ - ಏರಿಳಿದು ಮತ್ತೇರಿ ಹೊಂಕರಿಸಿ - ಸುಖದೋಕುಳಿಯ ಸುರೆ ಕುಡಿಸಿ - ಮೆರೆದ 'ಗಂಡುಸಿರು' - ಸ್ವರ್ಗ ಸೀಮೆಯ ಗೆದ್ದ ಮಿಲನೋತ್ಸವದುತ್ತುಂಗದಲ್ಲಿ - ಸೊಕ್ಕೆಲ್ಲ ಸುಲಿಗೆ ಆದಂತೆ ಗಂಟಲಲ್ಲೇ ಗಂಟಾಗಿ ಸಿಕ್ಕಿ - ತಟಕ್ಕನೆ ತಟಸ್ಥ ಶವವಾಗುವುದಂತೆ....
ಆಹ್!!! ಅವಳ ತೃಪ್ತ ತೋಳಲ್ಲಿ ಸುಖಾಯಾಸದಿ ಸಾವು...
#ಮರುಜನ್ಮಕೆ_ಗಂಡು_ಜೇನ್ನೊಣವಾಗಬೇಕು...
↶↷⇛⇚↶↷

ಬಾನ್ಬೆಳಕ ನೆರಳಿನಂಥವಳೇ -
ಬಾನ ನೀಲಿ ಹಾದಿಯಲಿ ತಾರೆ ಸೆರಗ ಬಳಸಿ ಬಿಳಿ ಮೋಡದ ಚೂರು ಬೆಳದಿಂಗಳ ಮೀಯುತಿದೆ...
ಎದೆಯಿಂದ ಕಳಚಿ ಬಿದ್ದ ಬಿಸಿ ಉಸಿರ ನೆನಪ ಕೆಂಪು ಕೆಂಪು ಗರಿಯೊಂದು ತಂಗಾಳಿಯಲೊಮ್ಮೆ ಜೀಕಿ ನಾಭಿ ಕೊಳಕೆ ಜಿಗಿದು ಪ್ರಣಯ ಬೀಜಾಕ್ಷರಗಳ ಗೀಚುತಿದೆ...
ಡಾಂಬರುಗುಳಿಗೆಯ ಸುತ್ತಿ ಕಾದಿಟ್ಟ ಅಮ್ಮನ ಧಾರೆ ಸೀರೆಯಂಥ ಹಳತಾಗದ ಕನಸೊಂದನು ನೆನಹುಗಳ ಪೆಟಾರಿಯಿಂದ ತೆಗೆದು ಮೆಲ್ಲಗೊಮ್ಮೆ ಮೈದಡವಿ ಮತ್ತೆ ಮಲಗಿಸಿದೆ...
ಹೇ ಕಪ್ಪು ಹುಡುಗೀ -
ನಿನ್ನ ಹೆರಳ ಘಮದ ನೆನಹಿನಾ ಸಾಲಕ್ಕೆ ಇದೋ ಈ ಇರುಳ ತೋಳನು ಹಂಗಂಗೇ ಬರೆದುಕೊಟ್ಟೆ...
#ಹುಣ್ಣಿಮೆ_ಹೊಕ್ಕುಳ_ಬೆಂಕಿ....

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

ಗೊಂಚಲು - ಎರಡ್ನೂರಾ ಅರ್ವತ್ಮೂರು.....

ಏನೋ ಐಲು..... 

ಪಾವಿತ್ರ್ಯತೆಯ ಸೋಂಕು ತಗಲಿದ ಮನುಷ್ಯ ಕಾಮದ ಸಹಜತೆಯನ್ನು ಕೊಂದ - ಅಷ್ಟಲ್ಲದೇ ಪ್ರೇಮ, ಆಧ್ಯಾತ್ಮದಂತ ಒಳಮನೆಯ ಆಪ್ತ ಒಡನಾಡಿಯಾಗಬೇಕಿದ್ದ ಭಾವಗಳಿಗೆ ಶ್ರೇಷ್ಠತೆಯ ಅಹಂಕಾರವನ್ನು ಬಿತ್ತಿದ...
#ಬಯಲೆಂದರೆ_ಯಾಕಷ್ಟು_ಭಯವೋ_ಭಡವನಿಗೆ..!?
↹↺↹↻↹

ಅತಿ ವಾಚಾಳಿ ನಾನು - ಆಳದ ಹಪ್ಪು ಮೌನಕ್ಕೆ ಅನಾಥ ಮಾತೇ ಸಾಂಗತ್ಯ...
ಸ್ವಚ್ಛಂದ ಮಾತಿನೊಲು ಮಿಕ್ಕುಳಿದ ಮೌನ ನಗು ನನ್ನಿರವು...
ಅಲ್ಲಾss -
ಎತ್ತರದ ಚೆಲುವೆಂದರೆ ಏರುವುದಾ, ಏರಿದೆತ್ತರದ ಆಳವ ಅಳೆಯುವುದಾ ಅಥವಾ ಮೌನದಾಳಕ್ಕಿಳಿದು ಎತ್ತರದ ಮಾತಾಗುವುದಾ...!!!
#ಸಾವಲೂ_ಸಿಕ್ಕದ_ಹುಟ್ಟಿನ_ಗುಟ್ಟನು_ಬಗೆಯಲು_ಗಾಳಿ_ಗದ್ದಲ_ಕಲ್ಲು_ಮೌನ...
↹↺↹↻↹

ಕನಸು ಕೈಕೊಡವಿ ಹೋದ ಹಾದಿಯಲಿ ಕಲ್ಲೆದೆಯಲೂ ಕಣ್ಣ ಹನಿ ಕೊಳವಾಗುವುದು...
ಏಸು ಗಿರಿಗಳನೇರಿ ಯಾವ ಎತ್ತರವ ತುಳಿದರೂ ಒಂಟಿ ಓಟಕೆ ನೆಳಲು ನೆನಹಿನೊಡಲೇ...
ನಾಳೆಗಳಿಲ್ಲದ ನಡಿಗೆಗೆ ನಿನ್ನೆಗಳಷ್ಟೇ ಸ್ವಂತ...
ಕಂತು ಕಂತಾಗಿ ಬರುವ ಅಂತಕನ ಸಂದೇಶಕೆ ಮುದುಡಿ ಕುಂತು ಕಾಯುವ ಹೆಳವ ಮನಸಿಗೆ - ನೀರಲ್ಲೇ ಇದ್ದು ನೀರ ಒದ್ದು ಕೊನೆಗೆ ನೀರಲ್ಲೆ ಕರಗಿ ತನ್ನದೇ ಹೊಸ ಚಿಗುರಿಗೆ ಅನ್ನವಾಗೋ ಕಮಲ ಪತ್ರದೆಡೆಗೆ ದಿವ್ಯ ಬೆರಗು...
ಏನ ಹೇಳಲಿ,
#ಪ್ರಕೃತಿ_ಸಂಸ್ಕಾರದಲಿ_ನಾನೊಂದು_ತೃಣವು...
↹↺↹↻↹

ಬೆಳದಿಂಗಳ ಕುಡಿದರೂ ಆರದ ಕರುಳ ಉರಿ...
ಧಾರೆ ಧಾರೆ ಮುಸ್ಸಂಜೆ ಮಳೆಯ ಮಿಂದರೂ ಚಿಗುರೊಡೆಯದ ಕನಸು...
ಇರುಳ ಮುಷ್ಟಿಯಲಿ ಉಮ್ಮಳಿಸೋ ನಗೆಗೆ ಮೆತ್ತಿಕೊಂಡ ನೆನಪುಗಳ ಹುಳಿ ಹುಳಿ ವಾಸನೆ...
ಸಣಕಲು ಬೆಳಕಿನ ಹಾಳು ಸುರಿವ ಸಂತೆ ಈ ಎದೆಯ ಹಾದಿ...
"ಒಂಟಿ ಒಂಟಿ ನಡಿಗೆಯಲ್ಲಿ ನನ್ನೊಂದಿಗೆ ನನ್ನದೇ ಯುದ್ಧ..."
ಸೋತದ್ದು ಗೆದ್ದದ್ದು ಉಳಿಸಿದ್ದು ಉಳಿದದ್ದು -
ಹಸ್ತ ಮೈಥುನದ ಸ್ಖಲನದಲ್ಲಿ ಸುಖಕ್ಕಂಟಿಕೊಂಡ ವಿಚಿತ್ರ ವಿಷಾದ...
#ನಾನು...
↹↺↹↻↹

ಇನ್ನೆಷ್ಟು ಕಾಯಬೇಕೋ ಜವ ಬರುವ ಹಾದಿಯ...
ಕೇಳುವೆವಾದರೆ -
ಉಳಿಯ ಬೆವರಲ್ಲಿ ಕಗ್ಗಲ್ಲ ನೆತ್ತರು ಬೆರೆತು ಜನ್ಮ ತಳೆದ ರಂಗಮಂಟಪದ ಕಂಬದ ಕಣ್ಣಲ್ಲೂ ಇದ್ದೀತು ನೂರು ಸಾವಿರ ಕರುಣ ಕಥೆಗಳು...
ನಿನ್ನೆಗಳ ಆಳದಿಂದೆದ್ದುಬರುವ ಗಾಢ ಮೌನದ ಅಸಂಖ್ಯ ಪ್ರತಿಧ್ವನಿ ಎದೆ ಮಂಚದ ಅಜ್ಞಾತ ಮೂಲೆಗಳನೂ ಚುಚ್ಚಿ ಚುಚ್ಚಿ ಮೆರೆಯುವಾಗ -
ನಾನೆಂಬೋ ನಾನಿಲ್ಲಿ ಅಳಿದುಳಿದ ರುಗ್ಣ ಪಳೆಯುಳಿಕೆ ಅಷ್ಟೇ..........
#ಸತ್ತಮೇಲೆಲ್ಲ_ಸ್ವರ್ಗದ_ಮಾತೇ...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)