ಗೊಂಚಲು - ನಾಕ್ನೂರಾ ಐವತ್ತು ಮತ್ತೆರಡು.....

ಜೀವೋತ್ಸವ ರಾಗ.....

ಬೆಳಕಿನ ಹಾಡಿಯಲಿ ಹೂಗಳರಳಿದಂತೆ
ನಗೆಯ ಜಾಡಿನಲಿ ನೇಹಗಳ ಆಹ್ಲಾದ ಹರಿಯುತ್ತದೆ...
ನಕ್ಕುಬಿಡು - ಸುತ್ತ ನಗು ನೆರೆಯಲಿ...
ಶುಭದಿನ... 🤝

ಕಳೆದಿರುಳ ಅದೇ ಸವಿಗುಂಜನ ಹೊಸತೇ ಕವಿಭಾವವಾಗಿ ಅರಳಿ ನಿಲ್ಲುವಲ್ಲಿಗೆ ಬೆಳಗು ಪ್ರೀತಿ ಪ್ರೀತಿ ಪ್ರೀತಿ ಅಷ್ಟೇ...
ಶುಭದಿನ... 🪻🍬🤝

ಮುಗಿಯದ ನಿದ್ದೆ ಮಂಪರು, 
ಬೆಳಕಿನ ಕೋಲ್ಗಳ ಉರಿ ಗಡಿಬಿಡಿ,
ಮೈಮನದ ಆಲಸ್ಯದ ಗೊಣಗಾಟ,
ನನ್ನಿಂದಲೇ ಬೈಸಿಕೊಂಡು ನನ್ನ ಕಾಯುವ ಬೆಳಗು...
ಶುಭದಿನ... 🤗

ಬೆಳಗಾಯಿತು - ಸಣ್ಣ ನಗೆಯೊಂದಿಗೆ ಎದೆಯ ನೇಹಗಳ ನೆನೆದೆ - ಬೆಳಕು ಬೆಳೆದಂತೆಲ್ಲಾ ನಗೆಯೂ ಬೆಳೆಯಬಹುದೀಗ...
ಬೆಳಕೆಂದರೆ ಪ್ರೀತಿ ಸಂವರ್ಧನೆ - ನಗುವೆಂದರೆ ಪ್ರೀತಿ ಸಂಭಾಷಣೆ...
ಶುಭದಿನ... 🤝🍫

ತಾನುರಿಯದೇ ಬೆಳಕಿಲ್ಲ...
ಬೆಳಕನುಣಿಸುವುದಾದರೂ, ಬೆಳಕಾಗಿ ಉಳಿವುದಾದರೂ ಉರಿದೇ ತೀರಬೇಕು - ನಿನ್ನೊಳಗೆ/ನಿನ್ನೊಳಗಿನ ಪ್ರೀತಿ, ನಗು...
ಮಿರಿ ಮಿರಿ ನಗು ಬೆಳಗು...
ಶುಭದಿನ... 🫂

ಮತ್ತದೇ ದಿವ್ಯ ಹಗಲು ಇರುಳ ದಾಂಟಿ ಬಂದು ಕೊರಳ ತಬ್ಬುವುದು...
ಅದೇ ಚಂದ ನಗೆಯ ಹರಡಬೇಕು ನಾನು ಎದೆಗಂಟಿದ ಅಳುವ ಕಳೆದು...
ಬೆಳಕಿನ ಬೆನ್ನ ಮೇಲೆ ನಗೆಮುಗುಳ ಕೂಸುಮರಿ...
ಶುಭದಿನ... 🤗

ಬೆಳಕಿನ ಕಡಲಿಗೆ ನಗುವಿನ ಬಾಗಿನ...
ಎದೆಯಿಂದ ಎದೆಗೆ ಪ್ರೀತಿ ಸಿಂಚನ...
ಭಾವ ಕುಸುರಿಯಲಿ ನೆಲ ಮುಗಿಲ ಬೆಸೆದ ಬೆಳಗು...
ಶುಭದಿನ... 🫂

ಬೆಳಕಿನ ಕುಡಿಯೊಂದು ಎನ್ನೆದೆಯ ನಗೆಯ ಮರಿಯ ಕೈಕುಲುಕಿದಾಗ ಕಣ್ಣಂಗಳದಲಿ ನನ್ನೆಲ್ಲಾ ನೇಹಗಳ ಒಡಲ ಪ್ರೀತಿಯ ಬಣ್ಣದ ಪರಿಷೆ ನಡೆಯಿತು...
ಬೆಳಗೆಂದರೆ ಪ್ರೀತಿಗೆ ಪ್ರೀತಿಯಿಂದ ಪ್ರೀತಿ ವಿನಿಮಯ...
ಶುಭದಿನ... 🤝🫂

ಹೂವು ಮನಸಾರೆ ಮೈನೆರೆಯುವ ಹೊತ್ತು...
ಜೀವೋತ್ಸವ ರಾಗ ಬೆಳಗು...
ಶುಭದಿನ... 👣

ಬೆಳಕನೂ ನಗುವನೂ ಬೆರೆಸುವ ಕೌಶಲ್ಯವ ಕಲಿತು ಬೆಳಗು ನೀ ಜಗದ ಸಂತೆಯಲಿ ಎಂದ ಮಳೆ ಬೆಳಗು...
ಶುಭದಿನವಾಗಲಿ... 🧘

ಎನ್ನೆದೆಗೊರಳಲ್ಲಿ ನಗೆಯ ಹೊಸ ಹಾಡು ಹುಟ್ಟಲೀ ಬಿಡಲಿ ಬೆಳಗಾಗುವ ಹೊತ್ತಿಗೆ ಹೊಸತೇ ಎಂಬಂತೆ ಬೆಳಕರಳದೇ ಇರದು...
ಬೆಳಕು ಶುಭವೇ ಅಹುದು - ನಾನೇ ಎನ್ನೆದೆಯ ಶುಭ್ರವಾಗಿಸಿಕೊಳ್ಳಬೇಕೆಂಬುದೂ ಹೌದು...
ಶುಭದಿನ... 🧘

ಬೆಳಕೆಂದರೆ ಪ್ರೀತಿ ಹಾರೈಕೆ - ಹೂ ದುಂಬಿಗಳ ಕನಸ ಆರೈಕೆ...
ಬೆಳಗೆಂದರೆ ಒಲವ ಸಂಭ್ರಮ...
ಶುಭದಿನ... 🪻🦋

ಹೆಜ್ಜೆಯ ಗುರುತುಗಳಿಲ್ಲದ ಕತ್ತಲೂ, ಬೆಳಕೂ ಈ ಎದೆ ನೆಲದ ಮೇಲೆ ನಾನಾ ವಿಧ ಮೊಹರುಳಿಸುವ ಪರಿಯೇನು - ಜಗ ಮರೆತು ಕುಂತ ಈ ಗಾಂಪನ ಬೆರಗು ಬೆಳಗು...
ಶುಭದಿನ... 🫂

ಕಳೆದಿರುಳ ಹಾಡಿನ ತರಾನಾದ ತರಂಗಗಳಿನ್ನೂ ಎದೆಯಲ್ಲಿ ಮಿಡಿಯುತ್ತಲೇ ಇರುತ್ತವೆ...
ಬೆಳಗು ಇರುಳ ಮಿಂದ ಅದೇ ಮೊಗವನ್ನು ಬೆಳಕ ಕನ್ನಡಿಯಲಿ ತೋರುತ್ತದೆ...
ಅದೇ ನಿನ್ನೆಗಳನೇ ತೊಳೆದು ಜಗದೆದುರಿಗಿಟ್ಟು ಹೊಸ ದಿನವೆನ್ನುತ್ತೇನೆ - ನಿನ್ನೆಯ ಅಳುವಿಗೂ ನಗೆಯದೇ ಬಣ್ಣ ಮೆತ್ತಿದೆನಾದರೆ ಅದೇ ಏನೋ ಸಮಾಧಾನ ಹೊಸ ಹಗಲಿಗೆ...
ಶುಭದಿನ... 🤝🫂

ನಿದ್ದಂಡಿಯಾದ ಆಳಸಿ ಹುಳು ನಾನು - ಅಲಾರಾಂನ ತಲೆ ಮೊಟಕಿ ಮತ್ತೆ ಮುಸುಕೆಳೆದುಕೊಳ್ತೇನೆ...
ಯಾವ ಗಡಿಬಿಡಿ, ಯಾವ ಆಲಸ್ಯವೂ ಇಲ್ಲದೇ ಸಾವಧಾನದ ಸಾರಥ್ಯದಲ್ಲಿ ಬಾನಿಂದ ಬೆಳಕಿಳಿಯುತ್ತದೆ ಮತ್ತು ವಸುದೆ ಬೆಳಕಾಗುತ್ತಾಳೆ / ಪ್ರೀತಿಯ ಬೆಳಕೇ ಆಗುತ್ತಾಳೆ...
ಶುಭದ ಹಾರೈಕೆ, ಆರೈಕೆಯ ಬೆಳಕಾಗಲಿ ಬೆಳಗು... 🤗

ನಗೆಯ ಮೂಲ ಶಕ್ತಿ ಎದೆಯ ಬೆಳಕೇ ಇರಬೇಕು...
ಪ್ರೀತಿಗೆ ಪ್ರೀತಿಯಿಂದ ಬಾಗುವ ವಿನೀತ ಬೆಳಗು...
ಶುಭದಿನ...🤝🫂

ಇಲ್ಲೇ ಎಲ್ಲೋ ಕಳೆದುಕೊಂಡ ನಗೆಯ ಸೂಜಿಯ ಹುಡುಕಲು ಎದೆಯಲಿಷ್ಟು ಪ್ರೀತಿ ಬೆಳಕು ಬೆಳಗಬೇಕು...
ಬೆಳಗಿದು  ಧಾರೆ ಧಾರೆ ಪ್ರೀತಿ ಸೊಬಗ ಸುರಿಯಲಿ ಎದೆಯಿಂದ ಎದೆಗೆ - ಹೊಲಿಯಬೇಕಿದೆ ಬದುಕನು...
ಶುಭದಿನ... 🤝🫂

ಇರುಳು, ಹಗಲೆಂಬೋ ಕಾಲನ ನಡಿಗೆಯ ಕವಿತೆಯಲ್ಲಿ ನಮ್ಮೆಲ್ಲ ಹೆಸರಿನಲೂ ಒಂದೊಂದು ಸಾಲಿದೆ - ಆಹಾ! ಎನಿತು ಸೌಭಾಗ್ಯ, ಏನೀ ನಿರ್ಮಮ ನಿರ್ಮಲ ಕಾರುಣ್ಯ...
ಶುಭದಿನ... 🤝🫂

ಜಗದ ಜಾಡ್ಯವ ತೊಳೆವ ಬೆಳಕ ಹೊಳೆ ಧಾರೆಗೆ ಎದೆಯ ಮೊರದಲಿಟ್ಟು ನನ್ನದಿಷ್ಟು ನಿನ್ನದಿನ್ನಿಷ್ಟು ನಗೆಯ ಪದ್ಯದ ಬಾಗಿನವ ಕೊಡಲಾದರೆ...
ಅಲ್ಲಿಗದು ಶುಭದಿನವೇ ಸರಿ...🤝🫂

ಮುಗುಳ್ನಗುವಿರಲಿ, ಮಳ್ಳು ನಗುವೇ ಇರಲಿ, ಹಂಚಿಕೊಂಡ ಎರಡೂ ರುದಯಗಳನು ಅಯಾಚಿತವಾಗಿ ಒಂದು ಹದದಲ್ಲಿ ಸಂತೈಸುತ್ತದಲ್ಲ...
ಬೆಳಕೆಂದರೆ ಅದೇ - ಕಣ್ಣಲಿಷ್ಟು ನಗೆಯ ಹನಿಗಳ ತೇವವ ಕಾದುಕೊಳ್ಳಬಲ್ಲ ಧ್ಯಾನ...
ಶುಭದಿನವೇ ನೇಹೀ ನಗೆ ನಾಲೆಯೇ... 🤝🫂

ಇರುಳಿಡೀ ತಾನಾಳಿದ ಜಗವನು ಬೆಳಕಿಗೆ ಆಡಲು ಬಿಟ್ಟು ತನ್ನಿರವನೆ ಮರೆತು ನೆರಳಾಗಿ ನಿಲ್ಲುವ ಕತ್ತಲ ಔದಾರ್ಯ ಈ ಹಗಲು...
ಶುಭದಿನ... 🤝

ಪ್ರೀತಿಯ ನಿತ್ಯಾರಾಧನೆ... 

ತಬ್ಬಿದ್ದು ನೇಹವಾದರೆ, ಪ್ರೀತಿಯಾದರೆ ಕೊಟ್ಟುಬಿಡಬೇಕು ಸುಮ್ಮನೆ, ಕೊಟ್ಟು 'ಬಿಡಬೇಕು' ಸುಮ್ಮನೇ; ಅರ್ಥಾರ್ಥಗಳ ಗೊಂದಲವಿಲ್ಲದೇ, ಪರಿಣಾಮದ ಹಿರಿಮೆ ಗರಿಮೆಗಳ ಕೊಂಬಿಲ್ಲದೇ, ಸಾಂತ್ವನದ ಸಾನ್ನಿಧ್ಯದ ಸವಿಭಾವ ಎದೆ ತುಂಬಿ ನೆನಪುಳಿವ ಹಾಗೆ ಸುಮ್ಮನೆ - ಬೆಳಕು ಬಯಲ ಹಬ್ಬಿ ತಬ್ಬಿ ಹಸಿರ ಹರಸಿದ ಹಾಗೆ ಸದ್ದಿಲ್ಲದೆ ಸುಮ್ಮನೆ...
ಶುಭದಿನ... 🤝

ಬೆಳಕೆಂದರೆ ಅರಿವಿನ ಯಜ್ಞ - ಬೆಳಗು ಅದರ ನಾಂದೀ ಮಂತ್ರ...
ಶುಭದಿನ... 🧘

ನಾಳೆಗೆಂದು ಬೊಗಸೆಯಲಿ ಉಳಿಸಲಾಗದು
ಇಂದು ಎದೆಗೆ ತಾಕಿದ್ದನು ಅಳಿಸಲಾಗದು
ಈಗ ಈ ಕ್ಷಣ ಸೋಕಿದಷ್ಟನೂ ಆಗಿಂದಾಗಲೇ ಸವಿದಷ್ಟೂ ಸೊಗಸು...
ಬೆಳಕು - ಪ್ರೀತಿ - ಬದುಕು...
ಶುಭದಿನ... 🤝

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರಾ ಐವತ್ತು ಮತ್ತೊಂದು.....

ಬೆಳಗೆಂಬ ಬಹುವಿಧ ವಾರ್ತಾಲಾಪ.....   

ಎಲ್ಲದರಲ್ಲೂ ಶುಭವನ್ನೇ ಬಯಸುವ ಮನಸಿಗೆ - ಎಲ್ಲದರಲ್ಲೂ ಒಂದಿಲ್ಲೊಂದು ಬೆಳಕೇ
ತುಂಬಿದೆ - ಎಲ್ಲದರಲ್ಲೂ ಒಳಿತನ್ನೇ ಹುಡುಕಯ್ಯಾ ಮರುಳೇ ಎಂದು ಹಿತವಾಗಿ ತಿವಿದ ಸಂತ ಬೆಳಗು...
ಶುಭದಿನ... 🧘

ನಿನ್ನೆಯ ಬೇಗುದಿಗಳೆಲ್ಲ ಇಂದಿನ ಈ ಬೆಳಕಲ್ಲಿ ಬಳಿದು ಹೋಗಲಿ...
ಇರುಳ ಕಾಡಿದ ಕಣ್ಣ ಹನಿಗಳಲಿ ಹೊಸತೇ ನಗೆಯ ಕಾಮನಬಿಲ್ಲು ಕಟ್ಟಲಿ...
ನೂರು ಸದಾಶಯಗಳಾಸೆಯ ಒಂದು ಹೊಸ ಬೆಳಗು...
ಶುಭದಿನ... 🧚

ಎಷ್ಟೊಂದು ಗಡಿಬಿಡಿ ನೋಡೀ ಬೆಳಕಿಗೆ - ತೂಕಡಿಸುವ ಕಂಗಳ ಕ್ಷಣದ ಖುಷಿಗೆಂದು ಒಂದಿನವೂ ತುಸು ಸಾವಧಾನದಲಿ ಓಡುವಾ ಎಂಬುದಿಲ್ಲ... 
ಕಾಲನ ಊಳಿಗದಲಿ ಅದೇನು ಒಪ್ಪಂದವೋ...
ಬೆಳಗಾಯಿತು - ಕಣ್ಣುಜ್ಜಿ ಬೆಳಕ ದರ್ಶನಕೆ ಅಣಿಯಾಗಬೇಕು... 
ಶುಭದಿನ... 🤗

ಬೆಳಕು ನಮ್ಮನ್ನು ದುಡಿಸಿಕೊಳ್ಳುತ್ತದಾ...
ಬೆಳಕನ್ನೇ ನಾವು ದುಡಿಸಿಕೊಳ್ತೇವಾ...
ಗೊಂದಲದ ನಡುವೆಯೇ ಒಟ್ನಲ್ಲಿ, 
ಬದುಕಿಗಾಗಿ ಬೆಳಕನ್ನು ದುಡಿದುಕೊಳ್ಳಲು ಬೆಳಕಿನ ಬೆನ್ನು ಬಿದ್ದಿರ್ತೇವೆ...
ಬೆಳಗೆಂಬ ಗರಡಿಮನೆ...
ಶುಭದಿನ... 🧚

ಕತ್ತಲ ಕುಡಿಯದೇ ಬೆಳಕು ಜೀರ್ಣವಾಗಲಿಕ್ಕಿಲ್ಲ - ಪ್ರಖರ ಬೆಳಕಲ್ಲಿ ನೆರಳ‌ ಹುಡುಕುತ್ತೇವೆ...
ಕತ್ತಲ ಪರಿಚಯ ಇಲ್ಲದಿದ್ದರೆ ಹಗಲಲ್ಲೂ ಬೆಳಕು ಕಾಣುವುದು ದುಸ್ತರ - ಕಣ್ಣ ಮುಚ್ಚಿ ಕೂತಾಗಲೇ ಹೆಚ್ಹೆಚ್ಚು ಕಾಣುವುದಂತೆ...
ಕತ್ತಲ ನೆಂಚಿಕೊಂಡೇ ಕುಡಿಯುವಲ್ಲಿ ಬೆಳಕೂ ಒಂದು ಹಿತವಾದ ನಶೆಯೇ ಇರಬಹುದು...
ಶುಭದಿನ... 🪴

ಪ್ರೀತಿಯ ಎಣ್ಣೆ ಎರೆದುಕೊಂಡಿರೋ ವಸುಧೆ...
ಮಂಜಿನ ಮಡಿಲಲಿ ಅಡಗಿ ಕೂತಿದೆ ಬೆಳಗು...
ಶುಭದಿನ... 🍫🍬

ದಂಡೆಯಾ ಮೌನಕೇ 
ಶರಧಿಯಾ ಅಲೆಗಳಾ
ಬಾಹು ತೋರಣ...
ಸುರ ಸಂಭಾಷಣೆಯಾ ಧ್ಯಾನ ಬೆಳಗು...
ಶುಭದಿನ... 🏝️

ದೂರ ದಾರಿಯ ಧೂಳಿನಲ್ಲಿ ಬೆಳಕು ಕತ್ತಲ ಬೇಲಿಯ ದಾಟಿತು - ಬೆಳಗಾಯಿತು...
ಶುಭದಿನ... 🍬

ಎದೆಯು ಬರೆದ ಭಾವಗಳಿಗೆಲ್ಲ ಬೆಳಗೆಂಬೋ ಬೆಳಕಿನ ಶುಭ್ರ ಶುಭದ ಅಲಂಕಾರ...
ಸಿಂಗಾರದ ಸಿರಿ ಬೆಳಗು...
ಶುಭದಿನ... 🪴

ನನ್ನ ನಗುವಿನ್ನೂ ಬಾಕಿ ಇದೆ...
ಸಾಕ್ಷಿ: ಈ ಬೆಳಗಿಗೆ ಕಣ್ಣು ನಕ್ಕಿದೆ...
ನಿನ್ನ ಕಾಂಬಲು ಇನ್ನೊಂದು ಹಗಲಿನ ಉಡುಗೊರೆ - ಬದುಕಿನಿಂದ...
ಶುಭದಿನ... 🧘

ಜಗದ ಬಯಲಲ್ಲಿ ಬೆಳಕಿನ ಹೂವು ಹೊಸತಾಗಿ ಅರಳುವ ಹೊತ್ತಿಗೆ - ನಿನ್ನ ನೆನಪಿನ ದುಂಬಿ ಹೊಸದೇ ಹುರುಪಿನಲಿ ಎನ್ನೆದೆಯ ಮುದ್ದಿಸುವಲ್ಲಿ - ಶುಭಕದು ಶುಭ ಮುಹೂರ್ತ...
ಶುಭದಿನ... 🫂🤝

ಮಂಗಳಮಯವಾಗಿ ಧಾರೆ ಸುರಿವ ಬೆಳಕಲ್ಲಿ ಎದೆಯ ಜೋಪಡಿಯಲಿರೋ ಅದು ಇದು ಎಲ್ಲದನ್ನೂ ತೋಯಿಸಿ ತೊಳೆದು ಮಡಿ ಮಾಡಿಕೊಂಡು ಶುಭವನಾಗಿಸಿಕೊಂಡರೆ ಆತು - ಸರ್ವಂ ಶುಭಮಯಂ...
ಶುಭಮಸ್ತು ಅಂತಲ್ಲದೇ ಬೇರೇನನೂ ಹರಸದ ಪಾಪಚ್ಚಿ ಬೆಳಗು...
ಶುಭದಿನ... 🧚

"ಸೂರ್ಯ ನೆತ್ತಿಗ್ ಬಂದ, ಇನ್ನೂ ಕುಂಡೆ ಮ್ಯಾಲ್ ಮಾಡ್ಕ್ಯಂಡ್ ಮನ್ಗೇ ಇದ್ದೆ, ದುಡಿಯೂ ಮಕ್ಕೊ ಹಿಂಗ್ ಬಿದ್ಕಂಡ್ ಇದ್ರೆ ದರಿದ್ರ ಹೊಕ್ತು ಮನ್ಗೆ...
ಮದ್ರಾತ್ರೆ ತನ್ಕ ಟೀವಿ, ಮೊಬೈಲು ನೋಡೂದು, ಮಜ್ಜಾನ್ತನ್ಕ ವರ್ಗುದು, ಅವಲಕ್ಷಣ..." 
ಆಯಿಯ ಅಸಹನೆಯ ಸುಪ್ರಭಾತವ ನೆನಪಿಸೋ ಆಳ್ಶಾ ಬೆಳಗು...
ಶುಭದಿನ... 🛌

ಅದೇ ಬೀದಿ, ಅದೇ ಬೆಳಕು, ಹೊಸತು ಪಾಠದ ಪಾಕ - ಹೊಸ ಬೆಳಗಿನ ಸೌಂದರ್ಯ...
ಶುಭದಿನ... 🕊️

ಬೆಳಕನು ನಂಬಿರುವ, ನೆಚ್ಚಿಕೊಂಡಿರುವ ಜೀವಗಳಿಗೆಲ್ಲಾ ಬೆಳಕು ಸಿಗಲಿ...
ಎದೆಯ ಗೂಡಿಗೂ ಬೆಳಕು ತೂರಲಿ...
ಶುಭ ಬೆಳಗು... 🤝

ಜಗದ ಜೀವಗಳ ಕಂಗಳ ಕನ್ನಡಿಗಳಲಿ ತನ್ನ ಸಿಂಗಾರ ರೂಪವ ಕಂಡು ಮುದಗೊಂಡು ಅವರ ಕನಸುಗಳ ಕಾಳಜಿಗೆ ನಿಲ್ಲುವ ಬೆಳಕಿನ ನಿತ್ಯದ ನಗುವಿನ ಹಾರೈಕೆ ಬೆಳಗು...
ಶುಭದಿನ... 🦋

ಬೆಳಕಿನ ಕೋಲು ನೆತ್ತಿ ನೇವರಿಸುವಲ್ಲಿ ಇಬ್ಬನಿಯ ಎದೆ ಕಾವ್ಯದಲ್ಲಿ ಒಂದು ಕ್ಷಣ ಇಂದ್ರಛಾಪದ ಸಂಭ್ರಮ ಮತ್ತು ಅದೇ ಘಳಿಗೆ ಮರಣದ ಮುನ್ನುಡಿ - ಬೆಳಗು ಹೇಳುವ ಬದುಕಿನ ಸರಳ ಪಾಠ...
ಶುಭದಿನ... 🌈

ಇರಲಿ ಬಿಡು ಹಾಗೇ ರಂಗವಲ್ಲಿಯ ಚುಕ್ಕಿಗಳ ಜೋಡಿಸುವಲ್ಲಿನ ಒಂದು ಸೊಟ್ಟ ಗೆರೆ - ನಕ್ಕು ಬಿಡು ಕಾಡುತಿರುವಲ್ಲೂ ಎದೆಯನು ಅಷ್ಟಿಷ್ಟು ಅಪಸವ್ಯಗಳ ಕಾವಿನ ಬರೆ...
ಮುಂಬೆಳಗಿನ ನಿನ್ನಾ ನಗುವೆಂದರೆ - ಬೆಳಕು ಬೆಳಕನು ಸಂಧಿಸಿ ಬೆಳಗು ಬೆಳಗುವಂತೆ ನಿನಗೆ ನೀನುಣಿಸಿಕೊಳ್ಳುವ ಜೀವದ್ರವ್ಯ ಕಾವ್ಯ... 
ಶುಭದಿನ... 🫂

ಬೆಳಗಿನ ಬಯಲನು ನಿನ್ನಾ ನಗೆಯ ಹೂವಿಂದ ಅಲಂಕರಿಸಿ ಆ ಬೆರಗನು ಎನ್ನ ಕಣ್ಣ ಕನ್ನಡಿಯೆದುರು ನಿಲಿಸು - ನೀನು ಬೆಳಕು, ನೀನೇ ಬೆಳಕು...
ಶುಭದಿನ... 👣

ಕಾಂಬ ಕಣ್ಣಿಗೆ ನೂರಾರು ಸಾವಿರಾರು ಬಣ್ಣಗಳ ಒಡೆದು ತೋರುವ ಬೆಳಕು ಕತ್ತಲಿಗೆ ಹೇಳುವ ಮಾತಲ್ಲಿ ನನ್ನ ಅಂತರಂಗದ ಬಣ್ಣದ ವಿವರಗಳು ಸಿಗಬಹುದಾ - ಹುಡುಕಾಟದ ಬೆಳಗು...
ಶುಭದಿನ... 🧚

ಪಟ ಪಾತಿ : ಗೆಳತಿ 'ವೀಣಾ...'

ಹೂಬನದ ಬೇಲಿಯ ದಾಟಿ ಬೆಳಕು ಬನಕಿಳಿದಾಗ ಗಿಡ ಗಿಡಗಳ ಮೈತುಂಬಾ ಹೂವು, ಚಿಗುರು ಚಿತ್ತಾರ - ಮಾಲಿಯ ಕಣ್ತಪ್ಪಿಸಿ ಗಾಳಿಯ ಹೆಗಲೇರಿದ ಘಮಕೆ ಊರೆಲ್ಲ ವಸಂತೋತ್ಸವದ ಝಲಕ್ಕು...
ಜೀವೋತ್ಸವ ರಾಗಕ್ಕೆ ಬೇಲಿಯ ಹೆಣೆಯಲಾದೀತಾ - ಹೂ ಮೃದುಲವು ಎದೆ ತಾಕಲಿ...
ಶುಭದಿನ... 🪻

ಒಂಚೂರು ಕದ ತೆರೆದು ನೋಡು - ಮನೆ ತುಂಬಾ ಬೆಳಕೇ ಬೆಳಕು...
ಒಂದಿನಿತು ನಗು ಸುರಿದು ನೋಡು - ಎದೆ ತುಂಬಾ ನಲುಮೆ ಭಾವದ ಹೊನಲು...
ಅನುದಿನವೂ ಶುಭದಿನವೇ ನೇಹವೇ... 🤝🫂

ಒಂದು ಹೊಸ ಹಾಡಿನ ಪಲ್ಲವಿಯಂಥಾ ಲಾಲಿತ್ಯ ಬೆಳಗು...
ಮಂದಹಾಸವ ಸುರಿದು ನಿಲ್ಲು - ಉದಯರಾಗದ ಆ ಪಲ್ಲವಿಯನು ಮರಳಿ ಮರಳಿ ದಿನವಿಡೀ ಹಂಚುತಿರೋಣ...
ನಗೆಯ ನಾಡಿಯ ನುಡಿ ಜಾಡು - ಉದಿಯ ಕುದಿ...
ಶುಭದಿನ... 🫂🤝

ನಗೆಯ ಕಡಲಾಗಲಿ ಬೆಳಕಿನೊಡಲು...
ಬೆಳಕಿನ ಕಡಲಲಿ ತೇಲಲಿ ನಗೆಯ ಹಾಯಿ ಸಾಲು ಸಾಲು...
ಶುಭದಿನ... 🚣

ನಿದ್ದೆ ಮರುಳಲ್ಲಿ ತೆಕ್ಕೆ ಸಡಿಲಾದ ಪ್ರಣಯಿಗಳು ತಿಳಿ ಎಚ್ಚರದಲಿ ಒಬ್ಬರನ್ನೊಬ್ಬರು ಹುಡುಕಿ ಬಳಸಿದಂತೆ ಕತ್ತಲ ಚಾದರವ ಸರಿಸಿ ಬೆಳಕೂ, ನಗೆಯೂ ಹೆಗಲ ತಬ್ಬಿಕೊಂಡ ಮಧುರ ಮೋಹಕ ಘಳಿಗೆ ಈ ಬೆಳಗು...
ಶುಭದಿನ... 🤝🫂

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರಾ ಐವತ್ತು.....

ಆಯೀ ಅಂಬೋ ಭಗವದ್ಗೀತೆ..... 

ನಿನ್ನ ಭಜನೆಯೂ ನನ್ನ ನಾ ಕಾಯ್ದುಕೊಳ್ಳುವ ಹಗ್ಣಗಳಲ್ಲಿ ಒಂದಾದಲ್ಲಿ 'ನಾನು' ಎಂಬುದಷ್ಟೇ ಸತ್ಯ; ಉಳಿದ ಕಲಾಪಗಳೆಲ್ಲವೂ ಬರಿ ಪೊಳ್ಳು ಪೊಕ್ಳೆ ಅಷ್ಟೇ...

___ ಬೆಳಕನು ಪ್ರೀತಿಸುತ್ತಾ ನೆರಳಿನಲಿ ಸಂಸಾರ ಹೂಡುವುದು...
&&&

ನಾಳೆ ಯಾರಾದರೂ ಯಾಕಾದರೂ ನನ್ನ ನೆನೆಯಬೇಕು...

ಇಂದು ಒಂದಾದರೂ ನಗೆ ಮುಗುಳ ಯಾರದೇ ಎದೆ ಮಡಿಲಿಗೆ ಸುರಿಯದವನನು...

___ ಒಣ ಒಣ ಹೆಗಲಿನ ತೊಗಲು ಗೊಂಬೆ...
&&&

ನಾನಲ್ಲದ ನಾನು ನನ್ನೆದೆಯ ಕನ್ನಡಿಯಲಿ ಕಂಡಾಗಲೆಲ್ಲ ಕಂಗಾಲಾಗಿ ನಿನ್ನೆದುರು ನಿಲ್ಲುತ್ತೇನೆ - ನಿನ್ನ ಪಟದ ಕಣ್ಣೊಳಗಿಳಿಯಲೂ ರಕ್ತ ಆರಿದವನಂತೆ ಆಯಾಸಗೊಳ್ಳುತ್ತೇನೆ...

ಸತ್ತು ನೀನು ಸುಖಿ ಅನ್ನಿಸುವಾಗ ಬದುಕಿರುವ ನನ್ನ ಭಂಡ ಬಾಳಿನ ಸೋಲಿನ ಅರಿವಾದವನಂತೆ ಕನಲುತ್ತೇನೆ...

ಆದರೂ,

ಮಾತಾಗಬೇಕು - ನಿನ್ನ ಮೌನದ ಎತ್ತರವ ಮುರಿಯಬೇಕು ಎಂಬ ಸುಳ್ಳೇ ಹಠಕ್ಕೆ ಬೀಳುತ್ತೇನೆ...

ಮತ್ತದೇ ಭಂಡ ಬಾಳಿನ ತೋಳಿನಲಿ ಸರಸಕ್ಕೆ ಬೀಳುತ್ತೇನೆ...

ಮತ್ತೆ ಮತ್ತೆ ಪ್ರತಿ ಸಂಜೆಯಲೂ ನಿನ್ನ ಪಟದೆದುರು ತಲೆ ಕೊಡವುತ್ತ ನಿಲ್ಲುತ್ತೇನೆ - ಭಾವಗಳೆಲ್ಲಾ ಪಾಪ ನಿವೇದನೆಯ ಹಣ್ಣು, ಕಾಯಿ...

ಚಂಚಲ ನಾನು, ಚಿರಾಯು ಪಾಪಿ - ಒಳಗೆ ನನ್ನನಷ್ಟೇ ಪ್ರೀತಿಸಿಕೊಳ್ಳುವ ನಾನು ನನ್ನ ಅಂಕಿತ ನಾಮವನಿಟ್ಟು ಜಗದೆದುರು ನಿನ್ನ ಪ್ರತಿಮೆಗಳ ನಿಲ್ಲಿಸುತ್ತೇನೆ...

ದೇವರು ನೀನು - ಪಟದೊಳಗೆ ಅದೇ ಮಾಸದ ನಗು...

___ ಇದೆಲ್ಲದರ ವಿಮೋಚನೆಯ ದಿನ ಅದೇ ಇರಬಹುದು - ನಿನ್ನ ಪಟದ ಕೆಳಗೆ ನಾನೂ ಪಟವಾದಾಗಿನದು...

ಎಲ್ಲಾ ಹಸಿವೂ ಹಂಗಂಗೇ ಇಂಗಿ ಹೋಗುವಂಗೆ ಒಂದು ಬದುಕನೇ ನುಂಗಿ ತೇಗುವ ಸಾವಿನದೊಂದು ದಡೆ ಮತ್ತು ಆ ಬದುಕಿನ ಸುತ್ತ ಸನಿಹ ಬೆಸೆದುಕೊಂಡವರು ಬದುಕನೇ ಹಳಿಯುವಂಗೆ ಕಾಡುವ ಎಂದೂ ಇಂಗದ ಎದೆಯ ಖಾಲಿತನದ ನೋವಿನದೊಂದು ದಡೆ...

ಸಾವಿನ ತೂಕ ಹೆಚ್ಚಾ...? 

ಸಾವಿನ ಮಗ್ಗುಲ ನೋವಿನ ಭಾರ ಹೆಚ್ಚಾ...??

ಉತ್ತರ ಕಾಣದ ಕಣ್ಣ ಮುಂದೆ ಮಸುಕು ಮಸುಕು ನೀಲಿ ಬಯಲಿಂದ ನನ್ನ ಹೆಸರನು ಕೂಗುವ ನಕ್ಷತ್ರವ ಹುಡುಕುವ ಆಟವೊಂದೇ ಸಮಾಧಾನ...

___ ಅಂತಕನ ದೂತರಿಗೆ ಪ್ರಾರ್ಥನೆಯ ದರ್ದಿಲ್ಲ...

ನಮ್ಮನ್ನು ಆಳಲು ಬಿಟ್ಟು ತಾವು ಅಳಿದವರ ಔದಾರ್ಯವ ಮರೆಯಬಾರದೆಂದೇ ಶ್ರಾದ್ಧ ಮಾಡ್ತಾರಂತೆ...

ಮರುಳನಾದರೂ ಮರೆತಾದರೂ ಮರೆಯಲಾದೀತಾ ಮಡಿಲ ತಂಪನು - ಇಲ್ಲಿನೆಲ್ಲಾ ಮಿಡಿತಗಳೂ ಅಲ್ಲೆಲ್ಲಿಂದಲೋ ನೆನಪಾಗಿ ಸುರಿವ / ಸುಳಿವ ನಿನ್ನ ಹೆಸರನೇ ನುಡಿಸುತ್ತವೆ ಹೊತ್ತು ಹೊತ್ತನು...

ನನ್ನೆದೆಯಲಿ ನಿತ್ಯವೂ ನಿನ್ನ ಶ್ರಾದ್ಧ...

___ ಈ ನಗೆಯ ನಾಡಿ ನೀನು...

ಕಾಲನ ಕಾಲು ನೆತ್ತಿಯ ತುಳಿಯುವ ಹೊತ್ತಲ್ಲೂ ಸದಾ ಇಲ್ಲೇ ಮೇಲೆಲ್ಲೋ ನಗುತ್ತಾ ಕೂತು ಎದೆಯ ತೇವವ ಕಾಯುವ ಕರುಳ ಬೇರು...

___ ಆಯೀ ಅಂಬೋ ಭಗವದ್ಗೀತೆ...

ಅವಳ ನುಡಿಯಲ್ಲಿ ಗುಮ್ಮನೂ ಅವಳ ಆಜ್ಞಾವರ್ತಿ ಸೇವಕ...

ಈ ಬದುಕಿನ ಎಲ್ಲಾ ಹಿತ ಅಹಿತಗಳ ತುಂಬು ಸಭೆಯಲ್ಲಿ ಮೊದಲ ಸಾಲಿನ ನೆನಪು ನೀನು...

ಆಗಸದ ಬಯಲ ಹಾದಿಯಲ್ಲಿ ಲೋಹದ ರೆಕ್ಕೆಗಳ ದನಿ ಕೇಳಿದಾಗಲೆಲ್ಲಾ ಬೆರಗಿನಿಂದ ಕಣ್ಣರಳಿಸಿ ನೋಡುತ್ತಿದ್ದೆ ಮೊದಲೆಲ್ಲಾ...

ಅಳಿಯದ ಬೆರಗಿನೊಡನೆಯೇ ಸಣ್ಣ ಪಾಪಪ್ರಜ್ಞೆಯಂಥದ್ದೇನೋ ಕಾಡಿ ಮುಖ ಮಣ್ಣ ನೋಡುತ್ತಾ ಮೌನವಾಗುತ್ತೆ ಈಗೆಲ್ಲಾ...

"ಒಂದ್ ಸಲ ಇಮಾನ್ ಹತ್ತಿ ನೋಡ್ಲಾಯ್ತು" 

ಅಂಗಳದ ತುದಿಯಿಂದ ಸಣ್ಣಗೆ ದನಿ ಮೊರೆದಂತೆ ಭಾಸ - ನೀ ಅರುಹಿದ್ದ ಅದೊಂದು ಆಸೆಯನು ಹಾಗೇ ಉಳಿಸಿ ಕಳಿಸಿಬಿಟ್ಟೆನಲ್ಲ ನಿನ್ನನು...

ಅಂಥಾ ಬಡತನವೇನಿರಲಿಲ್ಲ - ತುಟ್ಟಿಯಾದದ್ದಾದರೂ ಏನು - ಏನೇ ಸಮಜಾಯಿಷಿ ಕೊಟ್ಟುಕೊಂಡರೂ ಮನಸು ಬಡವಾದದ್ದೇ ಹೆಚ್ಚು ನಿಜ ಅನ್ನಿಸಿಬಿಡತ್ತೆ ಈಗ...

ಹೇಳದೇ ಉಳಿದ ಅದಿನ್ನೆಷ್ಟು ಕನಸುಗಳಿದ್ದವೋ ಕರುಳ ಗಂಟಿನೊಳಗೆ - ಅವುಗಳ ಲೆಕ್ಕವೆಲ್ಲಾ ಬರೆಯದೇನೇ ಚುಕ್ತಾ ಬಿಡು...

ಇಲ್ಲಿಂದ ಹೊರಟವರೆಲ್ಲ ಅಲ್ಲಿ ನಕ್ಷತ್ರವಾಗುವರಂತೆ - ನೀನೀಗ ವಿಮಾನ ಹಾರುವ ಹಾದಿಗಿಂತ ಎತ್ತರ...

ಆದರೂ.........

ನಕ್ಷತ್ರಕೂ ವಿಮಾನಯಾನ ಕನಸೇ ಇರಬಹುದಾ..... !!?

___ ಕನಸಿಗಾದರೂ ಬಂದು ಬೈದು ಹೋಗು ಒಮ್ಮೆ....

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರ್ನಲ್ವತ್ತರಮೇಲೊಂಭತ್ತು.....

ಮಾಗಿಯ ಮೈನೋವು..... 

ಹೊಗಳಿ ಹೊಗಳಿ ಒಲಿಸಿಕೊಂಡೇನೆಂಬ ಭ್ರಮೆ ಬೇಡ - ಗುರ್ರ್ರ್ರ್ ಅಂದು ಮೂಗು ಮುರಿದಳು...
ಪರಾಕಿನ ಪಾಂಡಿತ್ಯವಲ್ಲವೇ, ಎದೆಯ ಮೀಯಿಸುವ ಕಣ್ಣೆದುರಿನ ಹೆಣ್ತನದ ಚೆಲುವನ್ನು ಸುಳ್ಳೆನ್ನಲಾಗದ ರಸಿಕನೆದೆಯ ನಲಿವು ಅದು ಅಂದೆ ಬಿಡುಗಣ್ಣಲಿ ನಗುತ್ತಾ...
ಹಿಂಗೆ ಛಳಿಗೆ ಕಂಪನಗಳ ಬೆರೆಸಿ ಏನೇನೋ ಅಂದು ಅಂದೇ ನನ್ನಂತ ಎಷ್ಟು ಹೆಣ್ಣುಗಳ ಎದೆ ಕದ್ದೆಯೇನೋ ಕಳ್ಳ ಕೊರಮ ಅಂತ ಬಿರುಗಣ್ಣಲಿ ಎದೆಯ ತುಳಿದುಬಿಟ್ಟಳು...
ಕದ್ದದ್ದು ಖರೆಯೋ ಸುಳ್ಳೋ ಕಾಣೆ, ಕಾಲಕೂ ಹೆಣ್ಣೆದೆಯ ಚೆಲುವಿಗೆ ಬೇಷರತ್ತಾಗಿ ಸೋತವನಂತೂ ಹೌದೇ ಹೌದು - ಹೀಗೆ ಶರಣು ಬಂದವನನು ನಿನ್ನಾ ಹೆಣ್ಣೆದೆಯ ಬಿಗಿಯಲೇ ಬಂಧಿಸಿ ಈ ಉಕ್ಕುವುಸಿರಿಗೆ ಆ ಬಿಸಿಯೂಡಿ ಗೆಲ್ಲಿಸೇ ಅಂದೆ ಕಣ್ಣ ನಶೆಯಲವಳ ತೇಲಿಸುತ್ತಾ... 
ಬಿಟ್ಟರೆ ತುಂಬಾ ಮಾತಾಡ್ತೀಯಾ ಪಾಪಿ ಅನ್ನುತ್ತಾ ಬೆನ್ನ ಪರಚಿ ತುಟಿಗಳ ಮು(ಕ)ಚ್ಚಿದಳು...
___ ಮಾಗಿಯ ಮೈನೋವಿಗೆ ಸೋತಲ್ಲದೇ ಪೋಲಿಯ ಉಸಿರಿಗೆ ಬೆಲೆಯೇನು...
&&&

ಎದೆಗಣ್ಣ ಹನಿಗಳ ಭಾವ ಸಾಂದ್ರತೆಯಿಂದ ಕಾಣದೇ, ದೇಹದ ಅನ್ಯೋನ್ಯತೆಯನಷ್ಟೇ ಕಂಡು ಆಡಿಕೊಂಡು ಪ್ರೀತಿ ಬಂಧಗಳನು ಪವಿತ್ರ ಅಪವಿತ್ರ ಅಂತ ನೈತಿಕತೆಯ ತಕ್ಕಡಿಯನು ತೂಗುವ ನಾವು ರಾಧೆ ಕೃಷ್ಣರನ್ನು ದೇವರಾಗಿಸಿ ಸಮಾಧಾನಗೊಂಡೆವು...
____ ಪ್ರಕೃತಿ ಸಂಗೀತವ ಮೈಲಿಗೆ ಅನ್ನುವ ಅಹಂಕಾರ...
&&&

"ಬೆಳಕಲ್ಲಿ ನಗೆಯ ಬೆಳಕಾಗಿ ನಿಂತವಳ ರೋಮಾಂಚಕ ಕತ್ತಲ ತಿರುವುಗಳನು ಹುಡುಕುವಾಗ ಪೋಲಿ ಹೈದನ ಕಣ್ಣಲ್ಲಿ ಮಾಗಿ ಕರಗುತ್ತದೆ" ಅಂತ ನಾಟಕೀಯ ಮಾದಕತೆಯಲಿ ಉಸುರಿದೆ...
"ಎದೆಯಾಳದ ಕತ್ತಲನೂ ನೋಡು" ಅಂದಳು ಮುಗುಮ್ಮಾಗಿ...
ಅಯ್ಯೋ ಬಿಟ್ಟೇನಾsss, ಎಲ್ಲೆಲ್ಲಾ ಅಲೆದೂ ಅಲ್ಲೇ ಬಂದು ನಿಲ್ಲುವುದು ಕಣ್ಣ ಕವಣೆಯ ಬಿಗಿತ, ಅದು ರಸಿಕನೆದೆಯ ನೂರು ಹಸಿ ಆಸೆ ಕಂಪನಗಳ ಹೋರಿನ ಕಂಪಿನುಸಿರ ಮೊದಲ ಚಾರಣದ ಕಿರು ಏರು ಹಾದಿ ಅಂದೆ...
ಪಾಪೀsss ಎಂದವಳ ಹುಸಿ ಮುನಿಸಿನ ತಲೆ ಮೊಟಕಿ ಅಳುವಿನ್ನೂ ಬಾಕಿ ಇದೆಯಾ ಎನ್ನುವಾಗ ಕರುಳಾಳದಲೆಲ್ಲೋ ಹೂತಿದ್ದ ನೋವ ಹನಿ ಕಣ್ಣ ಕಡಲಲ್ಲಿ ತುಳುಕಿ ಮಾತಾಗಿ ಹರಿಯುತ್ತದಲ್ಲ, ಅದು ನಾಚಿಕೆ ಬಿಟ್ಟ ಪೋಲಿಯೊಬ್ಬನ ನೇಹವೂ ಚಿಪ್ಪಿನೊಳಗವಿತು ಕೂತವಳ ಒಡೆದ ಎದೆಗೆ ಪರಮಾಪ್ತವಾಗಿ ಬೆಸೆದು ಬದುಕ ತೂಗುವ ಹೊತ್ತು...
___ ಗೋಪಿಯೆದೆಯಲಿ ಗೊಲ್ಲ ಗಾರುಡಿಯಾಗುವುದು ಹೀಗೇ ಇರಬಹುದು...
&&&

ಮಾತಾಡಿ(ಸಿ)ದರೆ 'ಮುತ್ತು' ಉದುರಿಸೋ ಹುಟ್ಟಾ ಪೋಲಿ ನಾನು - ಅವಳ ತುಂಬು ಯೌವನಕೊಂದು ತುಂಟ ನುಡಿ ನಮನ ಸಲ್ಲಿಸಿದೆ...
ನಿನ್ನಾsss - ಸಾಯ್ಸೋಕೆ ಯಾವ ಆಯುಧ ಬಳಸಲೀ ಅಂತ ಯೋಚಿಸ್ತಿದೇನೆ ಅಂದ್ಲು, ಮುನಿಸಿನಲಿ ಎದೆ ಸೆಟೆಸಿ, ಊರಗಲ ಕಣ್ಣಾಗಿ...
ಸೆಳೆದು ಎದೆ ಗೊಂಚಲ ನಡು ಕುಲುಮೆಗೆ ಸೇರಿಸಿಕೋ - ರಸಿಕನ ಕೊಲೆಗೂ ಒಂದು ಮಾಧುರ್ಯ ಮತ್ತು ಘನತೆ ಇರಲೀ ಅಂದೆ...
ಮೂಗಿನ ತುದಿ ಕೆಂಪಾಗಿ, ಕಂಗಳು ಕಲಮಲಿಸಿ, ಕಂಪಿಸುವ ತುಟಿಯ ತೇವದಲಿ ಮಾತು ಮರೆತು, ಎದೆಗೆ ಕೈಕಟ್ಟಿ ನಿಂತಿದಾಳೀಗ - ಹೆಣ್ಣ ಲಜ್ಜೆಯ ವಜ್ಜೆಗಿಂತ ಚೆಲುವು ಇನ್ನಾವುದಿದೆ...
___ ಆಹಾ!!! ಕಿವಿ ಹಾಲೆಯ ಬಿಸಿಗೆ ಹಲ್ಲೂಡುವ ಮಾಗಿ ಮುಸ್ಸಂಜೆಯ ಪ್ರಣಯ ಕಲಹಕ್ಕೆ ನವಿಲ್ಗರಿಯ ನವಿರು...
&&&

ಉತ್ಕಟವಾಗಿ ಜೀವಿಸುವುದಕ್ಕೊಂದು ಗೆಲುವಿನ ನಗು ಬೇಕಿತ್ತು...
ನಿನ್ನ ಬೆತ್ತಲೆ ತೋಳ ಬಿಗಿಯಲ್ಲಿ ಬೀಗಿ, ಊರು ಸರಸಿಯಲಿ ಕರಗಿ ಕರಗಿ ಎದೆಗೊರಗಿದೆ...
ಇರುಳೀಗ ಹೊರಳಿ ಹೊರಳಿ ಎದೆಯಿಂದ ಎದೆಗಂಟಿ ಬೆನ್ನಿಗಿಳಿದ ಬೆವರ ಹನಿಗಳೊಡಗೂಡಿ ಇಬ್ಬರ ಗೆಲುವನೂ ಸಂಭ್ರಮಿಸುತಿದೆ...
____ ಸೋಲರಿಯದ ಸಂಗಮ...
&&&

ಕತ್ತಲನ್ನೂ
ಬೆತ್ತಲನ್ನೂ
ಬೆಳುದಿಂಗಳನ್ನೂ 
ಎಳೆ ಬಿಸಿಲನ್ನೂ 
ಅಪಾರವಾಗಿ ಮೋಹಿಸುತ್ತೇನೆ...
ಕಾರಣ - 
ಕಾರಣವೇ ಇಲ್ಲದೆ ಅವು ನಿನ್ನ ಹುಡುಕುವಂತೆ ಎನ್ನೆದೆಯ ಕಾಡುತ್ತವೆ...
ನನ್ನೇ ನಾನು ಕಾಣುವುದಕ್ಕೆ ಚಂದ ಕಾರಣಗಳ ಕಟ್ಟು ಕಟ್ಟುತ್ತವೆ...
___ ಕಾರ್ಯ ಕಾರಣಗಳ ಆಚೆಯ ಕಾವ್ಯ - ನಿನ್ನ ನೆನಪು, ನಮ್ಮ ಕನಸು, ಬದುಕ ಧ್ಯಾನ(ಧ್ವನಿ)...
&&&

ನಿನ್ನದೊಂದು ಕಳ್ಳ ನಗುವಿನಲ್ಲೂ ನೂರು ಮಾಧುರ್ಯವಿದೆ ಅಂದೆ...
ಎಷ್ಟು 'ಮುಗ್ಧ ಮರುಳ' ನೀನೂ ಅಂದಳು - ಕಣ್ಣ ತುಂಬಾ ಸೋಬಾನೆಯ ಸರಿಗಮ ತುಂಬಿಕೊಂಡು...
ಅನ್ಯಾಯವಾಗಿ 'ದೊಡ್ಡವ'ನಾಗಿ ಹೋದೆ - ತಿರುಬೋಕಿ ಮನಸಿನ ಮೋಹಾಲಾಪದ ಕಂಪನ ಮೈತುಂಬ ಸಿಡಿದು...
ಸಂಜೆಯ ಪಾದಕಂಟಿದ ಬಣ್ಣಾ ಬಣ್ಣದ ಕವಿತೆ - ಅವಳ ಕೊರಳ ಕಂಪಿನ ಹಾಡು ಹಬ್ಬ... 
ಬಳಸು ತೋಳಲ್ಲಿ ತಿಳಿಗತ್ತಲ ತಿರುವಿನ ಸ್ವೇದ ಸಾಲುಗಳೆಲ್ಲಾ ಉಸಿರ ಪೂಸಿಕೊಳ್ಳುತ್ತಾವೆ - ಈರ್ವರ ಮೈತುಂಬಾ ತುಟಿಯಿಂದ ಗೀಚಿದ ಹೃದಯದ ಕಲೆಗಳು...
___ ಕುಡಿದವನೇ ಬಲ್ಲ ಮೋಹೀಮಿಳನದ ಮಧುರ ವಿಷದ ನಶೆಯಾ...
&&&

ನೀನು ಹೀಗೆ ಮಾಡು/ಹಾಗೆ ಮಾಡಬೇಕಿತ್ತು ಎಂದು ಅವಳು,
ನೀನು ಹೀಗಿರಬಾರದು/ಹಾಗಿರಬೇಕಿತ್ತು ಎನ್ನುವ ಅವನು,
ಒಬ್ಬರಿನ್ನೊಬ್ಬರನು ತನ್ನಂತಾಗಿಸಲು/ತನ್ನಿಷ್ಟದಂತಾಗಿಸಲು ಶರಂಪರ ಹೆಣಗಾಡುತ್ತಾ...
'ನಿಂಗೆ ನಾನು ಎಂದಿಗೂ ಅರ್ಥವೇ ಆಗಿಲ್ಲ' ಎಂಬ ಹರಕು ವಾದಿಂದಲೇ ಒಬ್ಬರಲ್ಲೊಬ್ಬರು ಹರವಿಕೊಳ್ಳುತ್ತಾ...
ಕಾಲಕ್ರಮೇಣ ಒಬ್ಬರಿನ್ನೊಬ್ಬರನು ಅರ್ಥೈಸಿಕೊಂಡವರಂತೆ ಗಂಭೀರರಾಗಿ, ಇವನು ಅವಳಂತಾಗಿ, ಅವಳು ಇವನಂತಾಡಲುತಾಗಿ ಅಥವಾ ಅವರಂತವರನು ಬದುಕಲು ಬಿಟ್ಟು ಬಿಡುವ ಒಣ ವಾದಕ್ಕೆ ಜೋತುಬಿದ್ದು, ಮಾತು ಮೌನಗಳೆರಡೂ ಭಾವ ಬೆಸೆಯಲು ಸೋತು ಮೂಲೇಲಿ ಕೂತು, ಅದೇ ತಾಕಲಾಟಗಳು ಅದಲು ಬದಲಾಗಿ, 'ನೀನು ಮೊದಲಿನಂತಿಲ್ಲ' ಎಂಬ ಹೊಸ ಅಸ್ತ್ರವೊಂದು ಹುಟ್ಟಿಕೊಂಡು ಬಾಂಧವ್ಯದ ಅಂಕದ ರೋಚಕತೆಯನ್ನು ಕಾಯುವಲ್ಲಿಗೆ...
ಅಲ್ಲಿಗೆ -
ಬಂಧ, ಬಾಂಧವ್ಯ, ಸಂಬಂಧಗಳ ಸುಳಿ ಚಕ್ರದ ಒಂದು ಸುತ್ತು ಸಂಪನ್ನ...
____ ಹಿಡಿಯಲುಳಿಯದ_ಬಿಡಲೊಲ್ಲದ_ಪ್ರಿಯಾನುಭಾವ ರಾಗ...
&&&

ನದಿ ಅಂದರೆ ಹರಿವು - 
ಧಾರೆ ಧಾರೆ ಕಣ್ಣಸುಳಿತೀರ್ಥವ ಹರಿಸಿ ರಾಧೆ ಕಾದದ್ದು ಯಮುನೆ ಹರಿದಲ್ಲೆಲ್ಲ ಸುದ್ದಿ...
ಶರಧಿಯದು ಇದ್ದಲ್ಲೇ ಕರುಳ‌ ಕೀಳುವ ಹೊಯ್ದಾಟ - 
ಒಳಗೇ ನುಂಗುವ ಕೃಷ್ಣನ ವಿರಹದ ಪರಿತಪನೆಯ ಉಗುಳೂ ಗಾರು ಉಪ್ಪೇ ಇರಬಹುದು...
___ ರಾಧಾ ರಾಧೇ...

ಕಾಯುವುದರಲೂ ಸುಖವಿಲ್ಲ, ಕಾದದ್ದನ್ನು ಅಂದೂ ಸುಖವಿಲ್ಲ - ಬಾರದವರಿಗೆ, ಬರಲಾಗದವರಿಗೆ...
___ ಕೃಷ್ಣ ಕೃಷ್ಣಾ...
&&&

ಪ್ರತಿ ಭೇಟಿಗೂ ಒಂದು ವಿದಾಯ ಇದ್ದೇ ಇದೆಯಂತೆ...
ಎಂದೋ 'ಒಂದು ದಿನ' ಇದು ಹೀಗಾಗುತ್ತೆ/ಹೀಗೇ ಆಗುತ್ತೆ/ಹೀಗಾಗಬಹುದು ಎಂಬುವ ಒಂದು ಅಂದಾಜಿರುತ್ತೆ ಬುದ್ಧಿಗೆ...
ಆದ್ರೆ,
ಆ 'ಒಂದು ದಿನ' ಇಂದೇ ಆಗಿರಬಹುದು/ಬರಬಹುದು ಎಂಬುದನ್ನು ಒಪ್ಪಿಕೊಳ್ಳಲು ಮನಸು ತಯಾರಿರುವುದಿಲ್ಲ ಅಷ್ಟೇ...
ನನ್ನ ಬಗ್ಗೆ ನಂಗೆ ಎಷ್ಟೇ ಗೊತ್ತಿದ್ದರೂ........
____ ಜೋಡಿಸಿದ ತುಂಡು ಹಗ್ಗದ ಗಂಟಿನಲ್ಲಿ ಅದೇನೇನು ಕ(ವ್ಯ)ಥೆಗಳಿರುತ್ತವೆಯೋ...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರ್ನಲ್ವತ್ತರಮೇಲೆಂಟು.....

ಸಾಯ್ಲಿ ಅತ್ಲಾಗೆ..... 

ಕೇಳು -  
ಎದೆಯ ಆಸೆ ಆಶಯ ಎರಡೂ ಈ ಕಂಗಳು ಸದಾ ನಗುತಲೇ ಇರಬೇಕು ಅನ್ನುವುದೇ ಆದರೂ,
ಒಮ್ಮೊಮ್ಮೆ -
ಮಲೆನಾಡ ಮನೆಗಳ ದೇವರ ಪೀಠದಲ್ಲಿ ದೇವರ ಪೋಟೋದ ಮರೆಯಲ್ಲಿ ಅಡಗಿ ಕೂತ ಮರಿ ಕಪ್ಪೆ ಸಮಾ ಆರತಿಯ ಹೊತ್ತಿಗೆ ಉಚ್ಚೆ ಹಾರಿಸುತ್ತಾ ಮೈಮೇಲೆ ನೆಗೆದು ಭಯ ಮೂಡಿಸುವಂತೆ ಕರುಳ ಸುರುಳಿಗಳ ಮಡತೆಯ ಮಧ್ಯದಲ್ಲೆಲ್ಲೋ ಹುಗಿದಿಟ್ಟು ಮರೆತಿದ್ದ ನೋವ ವಿಷ(ಯ)ವೊಂದು ಉಮ್ಮಳಿಸಿ ಗಂಟಲಿಗೆ ಬಂದು ಕೂತುಬಿಡುತ್ತದೆ...
ಕಪ್ಪೆಯ ಭಯಕ್ಕೆ ಪೂಜೆ ನಿಲ್ಲುವುದಿಲ್ಲ, ಅಂತೆಯೇ ಸಣ್ಣ ನೋವಿನಂಬಿಗೆ ಜೀವವೇನೂ ಹೋಗುವುದಿಲ್ಲ - ಆದ್ರೆ ಆರತಿ ತಟ್ಟೆ ಕೈತಪ್ಪುವುದೂ, ಕ್ಷಣವೊಂದಕೆ ನಗೆಯ ಮಂತ್ರ ನಾಲಿಗೆಯ ಬುಡದಲೇ ಕಚ್ಚಿ ನಿಲ್ಲುವುದೂ ಸುಳ್ಳಲ್ಲವಲ್ಲ...
___ ಚೂರು ಮನುಷ್ಯನಾದ ಮಾತ್ರಕ್ಕೆ...
&&&

ಶಬ್ದಗಳು ಕಿವಿಯ ತುಂಬಿ ಆಹಾ ಅನ್ನುವುದಕ್ಕೂ, ಭಾವಗಳು ಎದೆಯ ತುಳಿದು ಗುರುತಾಗುವುದಕ್ಕೂ ಏಸೊಂದು ಅಂತರ...
ಎದೆಯ ಮೌನದುಡಿಯೊಳಗೆ ಕಡೆಕಡೆದು ಮಿಡಿವ ಭಾವಾನುವಾದವೆಲ್ಲ ಮಂತ್ರವೇ, ತಂತ್ರವೇ, ತಾರುಣ್ಯವೇ...
___ ಈ ಎದೆಯಿಂದಾಯೆದೆಗೆ ಬೆಸೆವ ಪ್ರೀತಿಯ ಸಂಕ - ಮೌನ ಪೂಜೆ - ಮಾತು ಮಂತ್ರಾಕ್ಷತೆ...
&&&

ಕೇಳಿಲ್ಲಿ -
ಸಾವೊಂದೇ ಬದುಕಿನ ಸಮಾಧಾನ ಅಂತನ್ನಿಸುವ ಹೊತ್ತಿನಲೂ ಸಾಯದೇ ಬದುಕುತ್ತಿರುತ್ತೇವೆ, ಬದುಕನೇ ಆಯ್ದುಕೊಳ್ಳುತ್ತಿರುತ್ತೇವೆ...
ಅದಾಗಿಯೂ ಹೆಂಗೆಂಗೋ ಬದುಕ್ತಾ ಬದುಕ್ತಾ ಒಂದಿನ ಸತ್ತೇ ಹೋಗ್ತೇವೆ...
ನಾ ಸತ್ತಾದಮೇಲೂ ಇಲ್ಲಿ ಬದುಕಿರೋ ಕೆಲವರ ನೆನಪ ಹಣತೆಯ ಬೆಳಕಿಗಾದರೂ ಎದೆಯೊಡ್ಡುವಂತೆ ಬದುಕಿದ್ದೇನಾ / ಬದುಕಬಲ್ಲೆನಾ ಎಂಬುದು ಲೆಕ್ಕ - ಪ್ರಶ್ನೆ ಕೇಳಿಕೊಳ್ಳಲೂ ಭಯ, ಬದುಕಿ ಬದುಕಿ ನನಗೇ ನಾನೇ ಬೇಸರಾಗುವಷ್ಟು ಕಾಲ ಬದುಕಿಯೂ...
___ ಸಾಯ್ಲಿ ಅತ್ಲಾಗೆ...
&&&

ಮುಂದೆಂದೋ ನಿನಗಿಂತ ಉತ್ತಮರ್ಯಾರೋ ಸಿಕ್ಕಿ ನಿನ್ನ ಮರೆವುದು ಸಾಧ್ಯವಾಗುವುದಾದರೆ, ನನ್ನ ಪ್ರೀತಿ ಸುಳ್ಳಾ ಅಥವಾ ನಿನ್ನ ವ್ಯಕ್ತಿತ್ವ ಅಷ್ಟು ಜಾಳಾ...?!
ಇಬ್ಬರ ಆಯ್ಕೆಯೂ ತಪ್ಪು ಅಥವಾ ಅಪ್ರಾಮಾಣಿಕ ಎಂಬುದಷ್ಟೇ ಸತ್ಯವಲ್ಲವಾ...
___ ಕೇಳಿಲ್ಲಿ - "ಕೃಷ್ಣನ ತುಲಾಭಾರದಲ್ಲಿ ಗೆದ್ದದ್ದು ಚಿನ್ನದ ತೂಕವಲ್ಲ, ತುಳಸೀ ಕುಡಿಯ ಪ್ರೀತಿ..."
&&&

ಈ ಅಕಾಲ ಮಳೆ ಮತ್ತು ನಿನ್ನ ಮುರುಕು ಮೌನ ಎರಡೂ ಒಂದೇ ಥರ ನೋಡು...
ಮಳೆ ಮತ್ತು ಮೌನ ಎರಡೂ ಚಂದವೇ - ಆದರೆ, ಅಕಾಲದಲ್ಲಿ ಅವುಗಳ ಪರಿಣಾಮ ಮಾತ್ರ ಯಾರಿಗೂ ಶ್ರೇಯಸ್ಕರವಲ್ಲ...
___ ವಿಲಾಪ...
&&&

ಪುಟ್ಟ ಪುಟ್ಟ ಬಿಳಿ ಕ್ಯಾನ್ವಾಸುಗಳಂಥ ಹಸಿ ಎದೆಗಳ ಒಳಗೆ
ಬಣ್ಣಾ ಬಣ್ಣದ ಕನಸುಗಳ "ಕಲರವ..."

ಎದೆಯ ಭಾವದ ಪತ್ರ - ಕಣ್ಣ ಮುಂದಿನ ಚಿತ್ರ
ಅಷ್ಟುದ್ದ ಬಿಳಿ ದೋತರದ ಮೇಲೆ
ಬಿಡಿ ಬಿಡಿಯಾಗಿದ್ದೂ ಬೆರೆವ - ಬೆರೆತೂ ಬಿಡಿ ಬಿಡಿಯಾಗಿಯೇ ಬೆಳೆವ
ನೂರಾರು ಬಾಳ ರೇಖೆಗಳ ಹಸ್ತ ಮುದ್ರಾ "ಕಲರವ..."

ಬಣ್ಣ ಬಣ್ಣಗಳು ಬೆರಳು ಬೆಸೆದು
ಗುರುತಾಗಿ ಉ(ಲಿ)ಳಿಯಲಿ
ನನ್ನ, ನಿನ್ನ, ಅವನ, ಅವಳ, ನಮ್ಮ ನಿಮ್ಮೆಲ್ಲರ ಜೀವಾಭಾವಯಾನದ "ಕಲರವ..."

ಕಲಮಲಗಳ ಮೀರಿ
ಘಲಘಲಿಸಲಿ ನಗೆಯ ಕಿರು ದಾರಿ...
ಎಳೆ ರುದಯಗಳ "ಕಲರವ..."

ಕಲರವ...

ಏನ್ಗೊತ್ತಾ -
ಸಾವಿನೆದುರು ಕೂತವನಿಗೆ ನಾಳಿನ ಕನಸುಗಳು ಅಷ್ಟೇನೂ ಗಾಢ ಅನಿಸಲ್ಲ - ಗಾಢವೇನು ಲೆಕ್ಕಕ್ಕೇ ಇರಲ್ಲ ಬಿಡು...
ಆದ್ರೆ,
ಈ ಕ್ಷಣದವರೆಗಿನ ನೆನಪುಗಳು, ಹೀಗೆಲ್ಲ ಜೀವಿಸಿದ್ದಿದೆಯಲ್ಲ ಅನ್ನಿಸಿ ಮಂದಹಾಸವ ಸುರಿವ ನೆನಹುಗಳ ಜೋಳಿಗೆಯಲಿನ ಹಿತ ಭಾವದಲೆಗಳು ತುಂಬಾನೇ ಆಪ್ಯಾಯಮಾನ...
ಅದಕೆಂದೇ,
ನನ್ನ ಅನುಕ್ಷಣದ ಕನಸೇನೆಂದರೆ ಪುಟ್ಟ ಪುಟ್ಟ ಪುಟಾಣಿ ಖುಷ್‌ಖುಷಿಯ ನೆನಪುಗಳನು ಎದೆ ಸಂದೂಕದಲಿ ಜೋಡಿಸುತ್ತಾ ಸಾಗುವುದು...
ಮಧುರ ಮೆಲುಕುಗಳ ಒಡ್ಡೋಲಗದ ಮೆಲ್ಲ ನಗೆಯಲ್ಲಿ ಸಾವು ತಾನು ಗೆದ್ದೂ ಕೂಡಾ ಸೋತ ಲೆಕ್ಕವೇ...
___ ಮುಂದೆ ನರಕದಲಿ ಇವೇ ಖುಶಾಲಿನ ಕಥೆಗಳ ಹಂಚಿ ಚಿತ್ರಗುಪ್ತನ ಗಡಂಗಿನಿಂದ ಒಂದು ಗಳಾಸು ಸ್ವರ್ಗದ ವೈನು ಕೊಳ್ಳುವ ಇರಾದೆಯಿದೆ... 🤭
&&&

ವತ್ಸಾ -
ಈ ಸಂಜೆಗಳ ಹಸಿ ಎದೆಯ ಪೆರಟುವ ಏಕಾಕಿತನ ಇಷ್ಟಿಷ್ಟಾಗಿ ಮನವ ಒರಟಾಗಿಸಿದರೆ ಅಂಥ ಪರಿ ಅಪರಾಧವಲ್ಲ - ಬದ್ಲಿಗೆ ಮನಸನ್ನ ಚೂರು ಚೂರೇ ಅ(ತಿ)ಸೂಕ್ಷ್ಮಗೊಳಿಸುತ್ತಾ ಸಾಗಿದರೆ ಮಾತ್ರ.........
ಸುತ್ತ ನಾಕು ಜನ ಆಡಿಕೊಳ್ಳುವವರಾದರೂ ಇರಬೇಕು - ಒಂಟಿ ಹೆಣ ಬಿದ್ದರೆ ದೇಹ‌ ಕೊಳೆತ ಹೊತ್ತಲ್ಲಿ ಆರೆಂಟು ಕಥೆ ಹುಟ್ಟುವ ಅವಕಾಶವಾದರೂ ಇರುತ್ತೆ...
ಎದೆಯ ಭಾವಕೋಶ ಕೊಳೆತ ನಾತ ಬೀದಿಗೆ ಬರಬಾರದು ಅಂತ ಬಾಯ್ತುಂಬಾ ನಗೆಯ ಸುಗಂಧ ಪೂಸಿಕೊಂಡು ಅಲೆಯುವುದು...
____ ಭಂಡ ಬಾಳು...
&&&

ಕೇಳಿದ್ದನ್ನೆಲ್ಲಾ ಕೊಡುವ ಮಾಯಾ ದೀಪವೊಂದು ಸಿಕ್ಕರೆ ನನಗಾಗಿ "ನಿನಗೆ ದೀರ್ಘಾಯುಷ್ಯ ಮತ್ತು ಆ ಆಯಸ್ಸಿನುದ್ದಕ್ಕೂ ನಿನ್ನಿಷ್ಟದ ನಗುವನ್ನ ಕೇಳ್ತೇನೆ" ಅಂದೋಳ ಆಸೆ ಈಡೇರಲಿ...
"ಪ್ರಾರ್ಥನೆಗಳು ಫಲಿಸುವಲ್ಲಿ ಪ್ರೀತಿ ಚಿರಂಜೀವಿ..."
___ ಆತ್ಮಸ್ಥ ಸ್ನೇಹ ಸನ್ನಿಧಿ...
&&&

ಕವಿತೆ ಮುಗಿದಾಗ ಕವಿಯೂ ಮುಗಿಯುತ್ತಾನಾ...?
ಕವಿ ಮುಗದಲ್ಲಿಂದಲೇ ಕವಿತೆ ಹುಟ್ಟುವುದಾ...?
ಕವಿ ಮತ್ತು ಕವಿತೆ ಓರೆಗಣ್ಣಲ್ಲಿ ಒಬ್ಬರನ್ನೊಬ್ಬರು ನೋಡಿಕೊಳ್ಳುತ್ತಾ, ಬೆನ್ನ ಮೇಲಿಂದ ಓಡು(ದು)ವ ಜಗದ ಮೂಲಕ ತಮ್ಮನೇ ಪರಸ್ಪರ ಪರಿಚಯಿಸಿಕೊಳ್ಳುತ್ತಾ, ಒಂದೇ ಪಾಕದಲ್ಲಿದ್ದೂ ಎಂದೂ ಸಂಧಿಸದೇ ಸಾಗುವ ರೈಲು ಕಂಬಿಗಳಾ...?
ಸಂಧಿಸಿಯೂ ಬೇರೆ ಬೇರೆಯಾಗಿಯೇ ಉಳಿವ, ಹರಿವ, ದೋಣಿ ಮತ್ತು ನೀರು, ಕವಿ ಹಾಗೂ ಕವಿತೆ - ದಡದಿಂದ ದಡಕ್ಕೆ ಪ್ರೀತಿ ಸಾಗುವಳಿಯಾ...?
ಬಗೆಹರಿಯದ / ಬಗೆಹರಿಯಬಾರದೆನಿಸುವ ಗೊಂದಲ...
ಬರೆಯಿಸಿಕೊಳ್ಳುವ ಹಾಗೂ ಬರೆಯುವ ಜುಗಲ್ಬಂದಿ ಒಡನಾಟದಲ್ಲಿ ಕವಿ ಕವಿತೆಯಿಂದ ಮತ್ತು ಕವಿತೆ ಕವಿಯಿಂದ ಮುಕ್ತ ಮುಕ್ತ...
___ ಅನುಭಾವ...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರ್ನಲ್ವತ್ತರಮೇಲೇಳು.....

 ಶುಭವೇ ನಂಬಿಕೆ.....

ನಿದ್ದೆ ತಿಳಿದೆದ್ದು ಕನಸು ಮೈಮುರಿಯುವಾಗ 
ನೆನಪು ತೋಳ ಚಿವುಟಿ ದಿನವು ಶುಭವೆಂದರೆ 
ಆ ಮುಗುಳ್ನಗುವಿಗೆ ನಿನ್ನ ಹೆಸರು...
ಶುಭವೇ ನೀನೇ ನೆಹವೇ...
ಶುಭದಿನ... 🫂
***

ತುಸು ಬೆಳಕಿಗೆಂದು ಬಾಗಿಲು ತೆರೆದೆ 
ನಿನ್ನ ನಗೆ ಮುಗುಳು ಒಳತೂರಿ ಬಂತು
ತುಂಬು ಬೆಳಗಾಯಿತು...
ಶುಭದಿನ... 😚
***

ಬೆಳಗು ಎಂಬುವ ನಗೆ ಧುನಿಯ ರಾಗ ಸಂಯೋಜನೆ...
ಶುಭದಿನ... 🕊️
***

ಶಬ್ದವೇ ಇರದೆ ಹೂವರಳುವಂಗೆ ಅರಳುವ ಒಂದು ಮುಗುಳ್ನಗೆ - ನೂರು ಖುಷಿ ಖುಷಿಯ ಬಣ್ಣಗಳ ಎದೆಯಿಂದ ಎದೆಗೆ ದಾಂಟಿಸುವ ಪ್ರೀತಿ ಸಂಕಲನ...
ಈ ಬೆಳಗಿನೊಂದಿಗೆ ನಗೆಯೊಂದನು ಕಳಿಸಿರುವೆ, ಬರಮಾಡಿಕೊಂಡು ನಕ್ಕುಬಿಡು - ನೇಹ ಬೆಳಕಾಗಲಿ...
ಶುಭದಿನ... 🫂🕊️
***

ಎದೆಯು ನು(ಮಿ)ಡಿದ ಶುಭವನೆಲ್ಲ ಬೆಳಕು ತನ್ನುಡಿಯಲಿ ಲಾಲೈಸಿ ಸಲಹಲಿ...
ಬೆಳಗು ಎದೆಯ ಬೆಳಕಾಗಲಿ...
ಶುಭದಿನ... 🧚
***

ಬೆಳಗೆಂದರಿದು ಬೆಳಕಿನ ಕಿಡಿಯ ಮಂಗಳ ಮಂತ್ರದಿ ಎದೆಯಿಂದ ಎದೆಯನು ಮೀಟುವ ಒಂದು ಪ್ರೀತಿ ಸಾಲು...
ಶುಭದಿನ... 💞🫂
***

ಬೆಳಕಿಗೆಂದು ಬಾಗಿಲು ತೆರೆದೆ - ಶುಭವಾಗಿ ನಿನ್ನ ಅಕ್ಕರೆಯ ನಗು ಕೈಕುಲುಕಿತು...
ನೇಹ ಲತೆಯ ಹೂವರಳಿ ಬೆಳಗಾಯಿತು...
ಶುಭದಿನ... 🤝🫂
***

ಮಗು ತುಳಿದ ರಂಗೋಲಿಯ ಸವರಿ ಹಬ್ಬದ ಸಡಗರವನೆತ್ತಿ ನೆನಪಿನ ಜೋಳಿಗೆಯ ಖಾನೆಗಳ ತುಂಬಿಕೊಳುವ ವಿಲಾಸದ ನಗುವಿನ ಮರು ಹಗಲು...
ಶುಭದಿನ... 🍫🍬
***

ಎನ್ನ ದಿನವೊಂದ ಬೆಳಗಿಸಿಕೊಳ್ಳುವಾಸೆಗೆ ನಿನ್ನ ನಗೆಯೊಂದನು ಕಡವ ಕೇಳುತ್ತಾ ಶುಭದಾಶಯದಿ ಸಂದೇಶವ ಕಳಿಸುತ್ತೇನೆ...
ದಿನ ದಿನವೂ ಶುಭದಿನ - ನಿನ್ನ ನಗೆಯಿಂದ... 🫂🤝
***

ಅತಿ ಮುದ್ದಿಗೆ ಬಿದ್ದ ಮೋಡ ಮತ್ತು ಬೈಯ್ಯಲಾರೆ, ಭರಿಸಲಾರೆ ಎಂಬಂತೆ ಮೈಯ್ಯೊಡ್ಡಿ ಛಳಿಯ ಛವಿಯೇರಿ ನಿಂತ ಒದ್ದೊದ್ದೆ ನೆಲ...
ಮಿಜಿ ಮಿಜಿ ಮಳೆ ಬೆಳಗು... 🌧️☔
***

ನೆಲಕುರುಳಿದ ಹೂವ ಕಣ್ಣಲ್ಲಿ ದುಂಬಿಯ ಚಿತ್ರವೊಂದು ಹಾಗೇ ಇದ್ದಿರಬಹುದಾ...
ಹೊಸ ಪಾತ್ರದ ಗಾಂಭೀರ್ಯ, ಸಾವಿನ ಸೌಂದರ್ಯ, ಮುಕ್ತವಾಗುವ ಔನ್ನತ್ಯಗಳನು ಎದೆಗೆ ಸುರಿದು ಬೆಳಕೇ ಹೂವಿನೊಡಲ ಮಗುವಾಗಿರಬಹುದಾ...
ತುಳಿದವರ ಪಾದಕೂ ತನ್ನ ಘಮ ಅಂಟಿಸುವ ಔದಾರ್ಯ ಪ್ರಕೃತಿಯ ಅಕಾರಣ ಪ್ರೇಮದ್ದೇ ರುಜುವಲ್ಲವಾ...
ಕಣಕಣದಲೂ ಭರವಸೆ, ಪ್ರೀತಿಯ ನೂರಾರು ಮುಖಗಳ ರೂಪಾಂತರಗಳ ಘನತೆ - ಬೆಳಗು ಹೇಳಿದ ಜೀವಾಭಾವದ ಪಾಠ...
ಶುಭದಿನ... 💞🪻
***

ಇರುಳ ತುಂಬಾ ಅವನ ಕೊರಳ‌ ಬಳಸಿ ಹಂಚಿಕೊಂಡ ಪ್ರೇಮದ ಸವಿಯ ಕಂಪು ಕಂಪನ ಅವಳೆದೆಯಲಿನ್ನೂ ಬಾಕಿ ಉಳಿದು ಕನಸಿನಂಥ ಕಾವ್ಯವಾಗಿ ಮುಂಬಾಗಿಲ ರಂಗೋಲಿಯಾಗಿ ಅರಳುವ ನವಿರಾದ ರಸಿಕ ರಸರಾಗ ಬೆಳಗು...
ಶುಭದಿನ... 🪻🦋🙈
***

ಗಿರಿ ವಕ್ಷದ ತೆರೆಯಾಗಿ ಮೋಡವ ಹೊದ್ದು ಮಲಗಿ ರವಿಯ ಮುದ್ದಿನಾಸೆಯ ಅಣಕಿಸುವ ಭುವಿಯ ಬಿಂಕದ ನಗು ಈ ಬೆಳಗು...
ಶುಭದಿನ... 🌫️
***

ಹೊಳೆಯ ‌ಹರಿವಿನ ಸದ್ದಿಗೆ ಸಂವಾದಿಯಾಗಿ ನೀ ಎನ್ನೊಳಗರಳುವ ಧ್ಯಾನ ಬೆರೆತ ಉಗುರು ಬೆಚ್ಚನೆಯ ಕಂಪನದ ಕಾವ್ಯ ಬೆಳಗು...
ಶುಭವೇ ನಂಬಿಕೆ - ಶುಭದಿನ... 🫂

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರ್ನಲ್ವತ್ತರಮೇಲಾರು.....

ಶುಭದಿನವೇ ಖರೆ..... 

ಶುಭದಿನ ಪೋಲಿಯೆದೆಯ ಪುಟ್ಟ ಮೋಹವೇ... 😘😘😘
***

ಶುಭವು ನಡೆದು ಬರುವ ರಾಜಬೀದಿಯನು ಬೆಳಕು ಸಿಂಗರಿಸಿದ ಹಾಂಗೆ ಈ ಬೆಳಗು...
ಶುಭದಿನ... 🍂🏜️
***

ನಗೆಯ ಬಣ್ಣ ಯಾವುದು ಅಂದೆ - ಎದೆಗಣ್ಣ ಬೆಳಕು ಎಂದು ನಕ್ಕಿತು ಬೆಳಗು...
ಶುಭದಿನ... 🤩🎉
***

ಇರುಳು ಮೈಗಂಟಿಸಿದ ಹಸಿ ಬಿಸಿ ಝೇಂಕಾರಗಳ ನೆನಹು ದಡದಂಚಲೇ ಹೊಯ್ದಾಡುವ ಕಿರು ಅಲೆಗಳಂತೆ ಕಟ್ಟುಸಿರಾಗಿ ಆಲಾಪಿಸುವಾಗ ಕಣ್ಮಿಟುಕಿಸಿ ನಾಚಿಕೆಯ ಸುರಿವ ತುಂಟ ಬೆಳಗು...
ಶೃಂಗಾರ ಸಿಂಗಾರ ಕಾವ್ಯೋದಯ - ಶುಭದಿನ... 🪻🦋
***

ಮರುಳಾ, ರಜೆಯೆಂಬುದು ನಿನ್ನ ವ್ಯವಸ್ಥೆ - ಕಾಲನೋಟಕ್ಕೆ ರಜೆಯೆಂಬುದಿಲ್ಲ ಎಂದು ಎನ್ನ ಆಲಸ್ಯವ ತಿವಿದ ಮಾಸ್ತರರಂತ ಬೆಳಗು...
ಶುಭದಿನ... 🧑‍🏫
***

ಬೆಳಗೆಂಬ ಸಂಜೀವಿನಿಯ ಕರ ಸ್ಪರ್ಷಕೆ ರುದಯದ ಕನಸ ತಾಯ್ಬೇರಿನಲಿ ಹೊಸತಾಗಿ ಜೀವಸಂಚಾರ - ನಗೆಯ ನೂರು ಬಣ್ಣಗಳ ಹೂವರಳಿ ಮೈಮನದಿ ಚೈತನ್ಯದ ದಿವ್ಯ ಗಂಧ...
ಶುಭದಿನ...  🧚💞
***

ಹೆಸರೇ ಇಲ್ಲದ ಹೂವು, ಹೆಸರ ಹಂಗ್ಯಾಕೆ ಎನುವ ದುಂಬಿ - ಬನವೆಲ್ಲ ಸೃಷ್ಟಿ ಸಿಂಗಾರ...
ಎದೆಯರಳಿ, ಕರುಳು ತುಂಬಿ, ಯಾರುಯಾರಿಗೆ ಎಷ್ಟೆಷ್ಟು ಕೊಟ್ಟದ್ದೂ, ಪಡೆದದ್ದೂ ಲೆಕ್ಕವಿಡದ ಸಾನಿಧ್ಯ - ಪ್ರೇಮ ಪುರೋಹಿತ ಬೆಳಗು...
ಶುಭದಿನ... 🪻🦋🫂
***

ನನ್ನೆದೆಗೆ ದಾಂಟಿಸಿದ ನಿನ್ನದೊಂದು ಕಣ್ಣ ಹೊಳಪಿನ ಮುಗುಳುನಗೆ - ಹಚ್ಚಿಕೊಟ್ಟಂಗೆ ನೀ ದಿನವಿಡೀ ನನ್ನೊಳಗೆ ನಾ ಬೆಳಗಲು ಪ್ರೀತಿ ದೀಪವನೆನಗೆ...
ಶುಭದಿನವೇ ಖರೆ... 💞
***

ಬೊಗಸೆಯೊಡ್ಡಿ ಬೆಳಕ ತುಂಬಿಕೊಂಡೆನಾದರೆ ಹೋಕಿಲ್ಲದೆ ಹೊಸತೇನೋ ಒಂದನು ಎದೆಗೆ ಸುರಿದು ನಗುವ ನಿತ್ಯ ಉತ್ಸವದೊಂದು ಸೆಳಕು ಈ ಬೆಳಗು...
ಶುಭದಿನ... 🍬🧚
***

ಒಂದು ನಗೆಯ ಹೊಳಪಿನಲ್ಲಿ ನೂರು ಭಾವ ಮುನ್ನುಡಿ...
ಬೆಳಕು ಬೆಳಕ ತಬ್ಬಿದಂತೆ ನಗೆಗೆ ನಗೆಯ ಮರುದನಿ...
ನಕ್ಕುಬಿಡು ನೇಹವೇ, 
ಎದೆಯ ಕಾವ್ಯ ಅರಳಲಿ - ಬೇಲಿಸಾಲಿನಲ್ಲಿ ಹೂವು ಹೊಸತು ಹಾಡ ಕಟ್ಟಲಿ - ಜೀವ ಭಾವ ಬೆಳಗಲಿ...
ಶುಭ ಬೆಳಗು... 🤩
***

ಇರುಳೆಲ್ಲ ಕಾಡಿದ (ನಿನ್ನ) ಕನಸು ಮುಂಬೆಳಗಿನ ಮಂದಹಾಸವಾಗಿ ಸಣ್ಣ ಬಿನ್ನಾಣದಲಿ ಬೆಳಕ ಎದುರ್ಗೊಳ್ಳುತ್ತದೆ - ಅವ್ಯಕ್ತ ರೋಮಾಂಚವೊಂದು ಹಾಗೇ ಮುಂದುವರೆಯುತ್ತದೆ...
ಶುಭದಿನ... ☺️
***

ನನ್ನ ಸಾವಿರಾರು ಶುಭಾಶಯಗಳ ಒಟ್ಟು ತೂಕ = ಒಂದೇ ಒಂದು ಬೆಳಕಿನ ಕುಡಿಯ ಮೊತ್ತ...
ಶುಭವೆಂದರೇ ಬೆಳಕು - ಶುಭದಿನ... 🍬🍫
***

ಇನ್ನೆಲ್ಲ ಹೊಸತು, ಅಲ್ಲಿಯದೆಲ್ಲಾ ಮರೆತೇ ಮುಂದೆ ಬಂದೆ ಅಂದುಕೊಳ್ಳುವಾಗಲೂ ಒಂದ್ಯಾವುದೋ ಭಾವ ತಂತು ನೆನಪಿನ ಕೋಶವ ಕಿರುಬೆರಳಲ್ಲಿ ಕೆರೆಯುತ್ತದಲ್ಲ - ಅರೇ, ಅಷ್ಟುದ್ದ ಇರುಳ ದಾಂಟಿದ ಮೇಲೂ ನಿನ್ನೆಯ ಬೆಳಕಿನುಂಡೆಯ ತುಂಡೇ ಉಳಿದು ಇಂದಿನ ಬೆಳಗಾಯಿತಾ...?!
ಗೊಂದಲದ ನಡುವೆಯೇ ಯಾವುದೋ ಭರವಸೆ - ಜೋಳಿಗೆಯಲಿ ನಿನ್ನೆ ಕಣ್ತಪ್ಪಿದ ಶುಭದ ಹರಳಿರಬಹುದು - ಅದನಾಯ್ದುಕೊಳ್ಳೋಕೆ ಇದು ಇನ್ನೊಂದು ಅವಕಾಶವಿರಬಹುದು...
ಶುಭದ್ದೇ ದಿನ... 🧚
***

ಅದೇ ನಿನ್ನೆಯ ಹಾದಿಯಲ್ಲೇ ಇಂದೆಂಬ ಇಂದಿನ ಬೆಳಕೂ ಮೈದಳೆದಿದೆ - ಹಾಗಿದ್ದೂ ಹೊಸತೇ ನಗೆಯ ಮುನ್ನುಡಿ, ಮತ್ತೊಂದು ಭರವಸೆಯ ಬೆಳಕ ಕಿಡಿಗೆ ಕಣ್ಣು ಕೂಡಿದೆ ಎಂಬಂತೆ ಭಾಸವಾಗುವುದಿದೆ ನೋಡು...
ಶುಭವೆಂದರೆ ಅದೇ -
ತುಳಿದ ಹಾದಿಯ ಧೂಳಿನಲ್ಲೇ ನಿತ್ಯ ಮೈಮನವ ತೊಳೆದು ಹಸನಾಗುವ ಹಿರಿತನ ಅಥವಾ ಕೊಳಕೆಂಬುದೇನಿಲ್ಲ ಕೊರಳೆತ್ತಿ ಕೊನರುವ ಕುಡಿಯ ಎದೆ ಕುದಿಗೆ ಎಂದು ತಿವಿಯುವ ಬೆಳಕು...
ಶುಭದಿನ... 🪴
***

ಕನಸಿನ ಮರಿ ಹಕ್ಕಿಯ ಕಣ್ಣಲ್ಲಿ ಬೆಳಕಿನ ಕಿಡಿ ಬೆಳಗು...
ಶುಭದಿನ... 🐣🕊️

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರ್ನಲ್ವತ್ತರಮೇಲೈದು.....

ವೈರುಧ್ಯಗಳಿಗೆ ಹಣೆಬರವೇ ಹೊಣೆಯಂತೆ(!).....

ನಾವೆಲ್ಲಾ,
ಕಳೆಗೆ ಬೇಲಿ ಕಟ್ಟಿ ಕಾಯುತ್ತಾ,
ಬೆಳೆಯ ಬಯಲಲಿ ಬಿಟ್ಟು ಹಳಹಳಿಸುತ್ತಿರುತ್ತೇವೆ ವತ್ಸಾ...
ನಮ್ಮ ಸಮಯವ ನಾವೇ ಹರಣ ಮಾಡಿದರೆ ಆಲಸ್ಯದ ಸುಖವಾದರೂ ಇರುತ್ತೆ ಕಣೋ - 
ನಾವೇ, ಅದೇ ನಮ್ಮ ಸಮಯವ ಹಡಬೆ ದನ ತುಡುಗು ಮೇಯುವಂತೆ ಇನ್ಯಾರೋ ಸುಖಾಸುಮ್ಮನೆ ತಿಂದು ತೇಗಲು ಬಿಟ್ಟು ಕನಲುತ್ತ ಕೂರುವಂತಾದರೆ ಅದಕೇನೆನ್ನುವುದು, ಯಾರ ಹಳಿಯುವುದು ಹೇಳು...?!
ನಮಗೆ ನಾವೇ ಕೊಟ್ಟುಕೊಳ್ಳುವ ಏನೇನೋ ಸುಳ್ಳು ಸಮಜಾಯಿಷಿಗಳು ಆ ಕ್ಷಣಕೆ ಸಮಾಧಾನಿಸಿದರೂ, ಒಳಗಿಂದೊಳಗೆ ಮನಸು ಅಶಾಂತವೇ ಅಲ್ವಾss...
___ ಸುತ್ತ ನೆರೆಯುವ ಸುಖವಿಲ್ಲದ, ಹಾಗಂತ ಅಸಮಾಧಾನವ ಮುಕ್ತ ಹೇಳಲೂ ಆಗದ ಹತ್ತಿರದ (?) ಸಂಬಂಧಗಳು... 
&&&

ಜಗವೆಲ್ಲಾ ತುಂಡಿಲ್ಲದ ಕೆಲಸದಲ್ಲಿ (?) ಗಡಿಬಿಡಿಯಲ್ಲಿರುವಾಗ ನಾನೊಬ್ಬ ಖಾಲೀ ಕುಂತು ಮಾಡುವುದೇನು...!?
ನಾನು ಕೋಣೆ ಸೇರಿ ಸುಖವಾಗಿ ಮಲಗಿ ಸಂಪರ್ಕಗಳಿಗೆಲ್ಲ ಬೀಗ ಹಾಕಿ ಜಗತ್ತಿನಿಂದ ಬೇರೆಯಾಗಿ ಅದೇನೋ ಅಗೋಚರ ತರಾತುರಿಯಲ್ಲಿದ್ದೇನೆಂದು ಸ್ವಯಂ ಸಾರಿಕೊಂಡೆ...
ಇದೀಗ -
ಅಲ್ಲಲ್ಲಿ ಕೃತಕ ಕುತೂಹಲ ಮತ್ತು ಅಚ್ಚರಿಯ ಭಯ ಸೃಷ್ಟಿಸಿದ ಸುಖವೂ ನನ್ನದಾಯಿತು...
____ ಬಲು ಬೆರಕಿ ಬುದ್ಧಿವಂತ... 😜
&&&

ಬೆತ್ತಲ ಅರಸುವ ಆ ಕಾಮಕ್ಕಿಂತ ಬೆಳಕ ಮೇಯುವ ಈ ಪ್ರೇಮವೇ ಹೆಚ್ಚು ಬೆತ್ತಲಾಗಿಸುತ್ತದೆ...
____ ಬೆಳಕಿನ ನಿಗಿ ನಿಗಿ ಉರಿ ಪ್ರೇಮ - ಇರುಳಿಗೂ ಬೆಳಕೀವ ಧಗಧಗ ಕಾಮ...
*** ಅರ್ಥ ಗಿರ್ಥ ಕೇಳಬೇಡಿ...
&&&

ತುಂಬಾ ಹತ್ತಿರ ಬರಬೇಡ - ಪರಮ ಪೋಲಿ (?) ಹಾಡಲ್ಲೂ ಒಂದು ಪದ ಪಾದ ನೋವಿನ ಬೀಜ ಕಂಡೀತು...
___ ಉಗೋಡಾಗದ ಕಾಡು(ವ) ಮಾತು...
&&&

ಜಗವೆಲ್ಲಾ ಪುರುಸೊತ್ತಿಲ್ಲದೇ ಓಡುವಾಗ ನಾನೊಬ್ಬ ನಿಂತು ನೋಡುತ್ತೇನೆ, ನೋಡುತ್ತಾ ನಿಂತೇ ಇರುತ್ತೇನೆ...
ನಿಂತು ನೋಡುತ್ತಲಿರುವಷ್ಟೆಲ್ಲಾ ಗಳಿಸಿದ್ದೇನಂತ ಅಲ್ಲ; ನಿಂತು ನೋಡುವ ಸಮಾಧಾನಕ್ಕೆ, ಬದುಕಿದು ಬಡಿದು ಕಲಿಸಿದ ಅಂಥ ಸಾವಧಾನದ ಸಮಪಾಕವ ಹಾಂಗೇ ಕಾಯ್ದುಕೊಳ್ಳುವುದಕ್ಕೆ...
ಓಡಲಾಗದ ಆಲಸ್ಯ ಅಂತೀರೇನೋ - ಅದನ್ನೂ ಅತೀವ ಆರಾಮದಲೇ ಸ್ವೀಕರಿಸುತ್ತೇನೆ...
ಗೆಲುವಿನಷ್ಟೇ ಗೆಲುವಿಗಾಗಿ ಚಪ್ಪಾಳೆ ತಟ್ಟುವುದೂ ಹಿರಿಮೆಯೇ ಅಂತನ್ನಿಸುತ್ತೆ ನಂಗೆ ಈಗೀಗ...
____ ನನ್ನ ಸಾಧನೆ...
&&&

ಈ ಬಂಧ, ಸಂಬಂಧಗಳ ನೆಚ್ಚಿಕೊಳ್ಳಲೇಬಾರದು ನೋಡು...
ಯಾಕೆ...? ಏನಾಯ್ತು...??
ನನ್ನವರೂ ಅನ್ನಿಸಿಕೊಂಡವರು ನನ್ನನು ನಿತ್ಯವೂ ಮಾತಾಡಿಸ್ತಿರಬೇಕು ಅನ್ಕೋತೀನಿ...
ಅದ್ಕೆ...?
ಮಾತು ಹೋಗ್ಲಿ, ಹಗಲಿಗೆ, ರಾತ್ರೀಗೆ ಒಂದು ಶುಭಾಶಯವೂ ತತ್ವಾರ ಈಗಿತ್ಲಾಗೆ...
ಅದೇ ನಿನ್ನವರೂ ಅಂತ ನೀ ಅಂದುಕೊಂಡವರನ್ನು ನೀನೇ ಮುಂದಾಗಿ ನಿತ್ಯವೂ ಮಾತಾಡಿಸ್ತೀಯಾ...?  
ಮಾತಾಡ್ತೀನಲ್ಲ, ಯಾವಾಗ ಅವರ ಮಾತಿಗೆ ಉತ್ತರ ಕೊಡದೇ ಇದೀನಿ ಹೇಳೂ...
ಅವರ ಸಂದೇಶಕ್ಕೆ, ಅವರ ನುಡಿಸಾಣಿಕೆಗೆ ಮರು ಉತ್ತರ/ಮಾರುತ್ತರಗಳನ್ನು ಕೊಡುವುದನಲ್ಲ ನಾ ಕೇಳ್ತಿರೋದು, ನೀನೇ ನೀನಾಗಿ ಅವರೊಡನೆ ಒಮ್ಮೆಯಾದರೂ ಪ್ರೀತಿಯಿಂದ ಸಂವಾದಕ್ಕಿಳೀತೀಯಾ ಅಂತ...
ಅವರು ಮಾತಾಡಿಸದೇ ನಾನ್ಯಾಕೆ ಮಾತಾಡಿಸ್ಲಿ, ಅವ್ರಿಗೆ ಬೇಡ ಅಂದ್ಮೇಲೆ ನಂಗೂ ಬೇಕಿಲ್ಲ...
ನಿನ್ನ ಮೌನವನೂ ಅವರು ಅರ್ಥೈಸಿಕೊಳ್ಳಬೇಕೆಂದು ಹಠ ಹೂಡ್ತೀಯಲ್ಲ, ಅವರ ಮೌನಕೆ ಕಿವಿಯಾಗುವ ಸಣ್ಣ ಪ್ರಯತ್ನವನಾದರೂ ಮಾಡ್ತೀಯಾ ಹೋಗ್ಲೀ...? 
ಹೇಳಿದ್ರೆ ಹೇಳಿದ್ನೆಲ್ಲಾ ಕೇಳಿಸ್ಕೊಳ್ಳಲ್ವಾ...? ಅವರಾಗಿ ಹೇಳದೇ ನಾನಾಗಿ ಕೆದಕಿ ಕೇಳುವುದೇನು...?? ನಂಗೆ ಬೇರೆಯವರ ವಿಷಯದಲ್ಲಿ ಮೂಗು ತೂರ್ಸೋದು ಆಗಲ್ಲ...
ಮತ್ತೆ ನಿನ್ನವರೂ ಅಂದದ್ದಲ್ವಾ ನೀನು ಅಥವಾ ಅವರು ಹಂಗಂದಿದ್ದನ್ನು ಒಪ್ಪಿಯೇ ಈಗ ಇಷ್ಟು ಅವರು, ಇವರು, ಬೇರೆಯವರು ಎಂಬ ಪರಿತಾಪದ ಆರೋಪಗಳು ತಾನೆ...
ನಿಂಗೆ ನನ್ನ ನೋವು ಅರ್ಥ ಆಗಲ್ಲ ಬಿಡು - ಎಷ್ಟೆಲ್ಲಾ ಮಾಡಿದೀನಿ ನಾ ಅವರಿಗೆ, ಈಗ ನಾನೇ ಬೇಡಾಗಿದೀನಿ, ನೀನೂ ಅವರ ಪರವೇ ಅಥವಾ ಅವರಂಥವನೇ, ನಿನ್ನತ್ರ ಹೇಳ್ಕೊಂಡಿದ್ದೇ ನನ್ನ ತಪ್ಪು - ಎಲ್ಲಾ ಇಷ್ಟೇ, ಒಳ್ಳೇತನಕೆ ಬೆಲೆ ಇಲ್ಲ...
"ಧ್ವನಿಯಾಗುವುದಕ್ಕೂ ಪ್ರತಿಧ್ವನಿಯನಷ್ಟೇ ನೀಡುವುದಕ್ಕೂ ವ್ಯತ್ಯಾಸವೇ ಗೊತ್ತಿಲ್ಲದ/ಗೊತ್ತಿಲ್ಲದಂತಾಡುವ ಪರಮ ಮುಗ್ಧ (?) ಹೃದಯಿಗಳ ವಿಲಾಪ" ಇದು ಅನ್ಸಲ್ವಾ...
ಹೋಗೋ, ನಿನ್ನತ್ರೆಂತಾ ಮಾತು - ನೀನು ಭಾಳ ತಿಳ್ಕೊಂಡೋನು ಬಿಡು, ನಾವೆಲ್ಲ ದಡ್ರು, ಸುಮ್ಮಿರು ಸಾಕು, ನಂಗೆಲ್ಲಾ ಗೊತ್ತು...
____ ಟಾಟಾ, ಬೈಬೈ, ಗಯಾ... 
&&&

ಸ್ವರ್ಗದಲ್ಲಿ ನನ್ನ ಬಿಡಾರ...
ಸ್ಮಶಾನದಲ್ಲಿ ಸಂಸಾರ...
ನನ್ನೀ ಸುಖವ ಆಡಿಕೊಂಡು ನರಿಯು ಊಳಿಡುವಾಗ - ಕುಂಡೆ ಕುಣಿಸಿ ನಗುವ ಈ ಬದುಕದೆಷ್ಟು ಸುಂದರ...
____ ವೈರುಧ್ಯಗಳಿಗೆ ಹಣೆಬರವೇ ಹೊಣೆಯಂತೆ(!)...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರ್ನಲ್ವತ್ತರಮೇಲ್ನಾಕು.....

ಕವಿತೆ(?).....

ಇನಿದು ಇನಿದು ಮಳೆ ಬೀಳುವಾಗ ಈ ಎದೆಗೆ
ಘಲ್ ಘಲಿರೆನುವುದು ನಿನ್ನಾ ಕನಸ ಕಾಲಂದುಗೆ...
ಕಳ್ಳ ರುದಯವಿದು ಸುಮ್ಮನಿದ್ದುಬಿಡುವುದಾದರೂ ಹೆಂಗೆ
ಉಸಿರ ತುಂಬಿ ಹರಿವಾಗ ನಿನ್ನಾಸೆ ಪ್ರಣಯ ಗಂಗೆ...

ಸದ್ದೇ ಇರದೇ ಸ್ವಾಗತಿಸೋ 
ನಿನ್ನಾ ಕಣ್ಣಾ ರೆಪ್ಪೆಗಳಾ...
ಸ್ವಾತೀ ಹನಿಯಾ ಕುಡಿದಾ
ಪ್ರೀತಿ ಕಪ್ಪೆ ಚಿಪ್ಪುಗಳಾ...
ಅರ್ಥವಾಗದ ಭಾವಗಳ ಹಿಡಿದು
ಅರ್ಧವೇ ಬರೆದ ಕವಿತೆಗಳಾ...

ನೆನೆದು ನೆನೆದು ನೆನೆಯುತ್ತೇನೆ
ದಾಂಟಲು ಕಡು ವಿರಹದ ಈ ರಾತ್ರಿಗಳಾ...
ಇರು ನೀನು ಹಿಂಗೇ 
ಅಷ್ಟು ದೂರವಿದ್ದೂ ಇಷ್ಟೊಂದು ಹತ್ತಿರ...
ಅಲ್ಲಿದ್ದೇ ಕಾಡುವಂಗೆ
ಆ ಕಾಡಿನಾಚೆಯಾ ಆ ನೀಲ ಸಾಗರ...

ಪ್ರೀತಿಯ ಹುಡುಕುವ ಕವಿಯೂ
ಸಾವನು ಹಲುಬುವ ಕವಿತೆಯೂ
ಒಟ್ಟಿಗೇ ಮಲಗಿದ ರಮಣೀಯ(?) ಕಥೆಗೆ 
ಖಾಯಂ ನಾಯಕನೀ ನನ ಒಡಲು... 

ಭಾವ ಬೇಯುವ ಇರುಳು
ಕಟ್ಟಿ ಬರುವಾಗ ಕೊರಳು
ನೆತ್ತಿಯಾ ಮಿಡಿವ ನಿನ ಬೆರಳು
ಮಾತನಾಡುವ ಕಡಲು...
ನೀನು 
ನನ್ನ ಮೌನ ಮಡಿಯುವ ಮಡಿಲು...

***ಕೆಲಸವಿಲ್ಲದ ಕವಿ ಕವಿತೆ(?) ಕ(ಕು)ಟ್ಟುವ ಪರಿ - ಪದ ಪಾದ ಬೆರಕೆಗೆ ಸೂತ್ರ ಸಂಬಂಧ ಕೇಳಬೇಡಿ... 🫢

ಗೊಂಚಲು - ನಾಕ್ನೂರ್ನಲ್ವತ್ತರಮೇಲ್ಮೂರು.....

ಮಾತು ಮೌನಗಳ ಜುಗಲ್ಬಂಧಿ.....

ನಂದಿನ್ನೂ ಮಾತು ಮುಗಿದೇ ಇರಲಿಲ್ಲ - ಅವಳು ಮಹಾಮೌನಕೆ ಜಾರಿದಳು...
ನಾನಿನ್ನೂ ವಟವಟ ಹಲುಬುತ್ತಲೇ ಇದ್ದೇನೆ - ಅವಳ ಗಾಢ ಸುಷುಪ್ತಿಯಲೂ ನನ್ನ ದನಿಯವಳನು (ಕೂ)ಕಾಡಬಹುದೆಂಬ ಭ್ರಮೆಯಲೂ ಹಿತವಿಹುದು...
ಮಾತು ಜಾರಿಯಿರುತ್ತದೆ ಶತಾಯಗತಾಯ - ಅವಳೆದುರು ಹಚ್ಚಿಟ್ಟ ದೀಪದೆದುರು ಅವಳು ಹಚ್ಚಿದ ದೀಪ ಸೋಲಬಾರದೆಂಬ ಹಠವೂ ಇರಬಹುದು...
ನೂರು ನಶೆಗಳಲಿ ದೊಡ್ಡ ನಗೆ ನಕ್ಕು ಮರೆತೇನು ಅಂದುಕೊಂಡೆ - ಇದೆಲ್ಲ ನಗೆಯ ನೆರಳಲೂ ನನ್ನ ಹರಕೆಯಿದೆ ಮಾಣೀ ಅಂದಂತಾಗಿ ನೆನಪಾದಳು...
____ ಉಳಿದಷ್ಟೂ ಬದುಕಿನ್ನು ಅವಳೊಡನೆಯ ಮಾತು ಮೌನಗಳ ಜುಗಲ್ಬಂಧಿಯೇ...

ಎಲ್ಲರೂ ದೇವರ ಕಾಣಲು ದೀಪ ಬೆಳಗುತ್ತಿದ್ದಲ್ಲಿ ನಾನು ಮಳ್ಳನಂತೆ ಅವರನೇ ನೋಡುತ್ತಾ ನಿಂತಿದ್ದೆ... 🤐
___ ಕೈಮುಗಿಯೋ ಅಂತ ಬೈಯ್ಯಲು ಈಗ ನನ್ನ ದೇವಿಯೂ ಸ್ವರ್ಗಸ್ಥೆ...
&&&

ರುದಯದ ದಿನವಂತೆ...
ಚಂದಗೆ ಕಾಯ್ದುಕೊಳ್ಳುವಾ ನಮ್ಮ ನಮ್ಮ ಹೃದಯವ...
ಸಣ್ಣ ರಂಧ್ರಕೂ ದೊಡ್ಡ ನೋವಿದೆ ಅಲ್ಲಿ...
ಹೃದಯ ಅನಗತ್ಯ ದೊಡ್ಡದಾದರೆ ಸಣ್ಣ ಸಣ್ಣ ನೋವುಗಳ ಮೂಟೆಯೇ ಬರುತ್ತೆ ಜೊತೆಗೆ...
ಇರಲಿ,
ಆದಾಗ್ಯೂ ಆದಷ್ಟೂ ನಗೆಯನೇ ತುಂಬಿಕೊಳ್ಳೋಣ - ಪುಟ್‌ಪುಟಾಣಿ ಖುಷಿಗೂ ದೊಡ್ಡ ಸಂಭ್ರಮ ಕೂಡಾ ಇದೆ ಅಲ್ಲಿ...
ನೋವಾದರೆ ಹಂಚಿಕೊಂಡಷ್ಟೂ ಹಸನಾಗುವ, ಪ್ರೀತಿಯಾದರೆ ಮೊಗೆದು ಸುರಿದಷ್ಟೂ ತುಂಬಿ ತುಳುಕುವ ಮಾಯಾ ಜೋಳಿಗೆಯೂ ಹೌದು ಅದು...
ಹಾಗಾಗಿ,
ಪ್ರೀತಿಯಿಂದ ಪ್ರೀತಿಯೊಂದಿಗೆ ನಡೆಯೋಣ, ಪ್ರೀತಿಯಾಗೋಣ/ಪ್ರೀತಿಯೇ ಆಗೋಣ...
ಶುಭಾಶಯ - ಪ್ರಿಯ ಹೃದಯಗಳಿಗೆ... 💞
___ ೨೯.೦೯.೨೦೨೪
&&&

ಈ ಇವಳ ಮೈಯ್ಯ ಘಮದಿ 
ಆ ಅವಳ ಪ್ರೇಮವ ಹುಡುಕಿ 
ಉಳಿಯಬಹುದೇ ನಾನು ನನಗೆ 
ಅವಳು ಪರಿಚಯಿಸಿದ ಹಾಗೇ...
ಅಲ್ಲಿ ಸಿಗದ ಕಿಚ್ಚಿಗೆ 
ಇಲ್ಲಿ ಉರಿವ ಹುಚ್ಚಿಗೆ
ತಣಿಯಬಹುದೇ ಅವಳ ಬಿಸಿ
ಈ ಕರುಳ ಕಾಂಡದೊಳಗೆ...
___ ತಾಳ ತಪ್ಪಿದ ತ್ರಿಶಂಕು ಸುಖ...
&&&

ನನ್ನ ಪಾಲಿನ ಶುಭ್ರ ಶುಭವೇ -
ನೆತ್ತಿ ಮೇಲಿನ ಚಂದಮ ಬೆಳುದಿಂಗಳ ಕೈಯಿಟ್ಟು "ಶುಭದ ತೋಳಲ್ಲಿ ಸರಸ ಯೋಗ" ಅಂದು ಹರಸಿ ಕಳಿಸಿದ...
ಬೇಗ ಬರಬಾರದೇ (ಬಾsss) - ಈ ಉಸಿರಿಗಾಗಲೇ ಉಗ್ಗು ರೋ(ವೇ)ಗ...
ಮಧುಮಂಚದ ಮಂದ ದೀಪಕೆ ತುಂಟ ತೂಕಡಿಕೆ...
ಇರುಳಿಗಾಗಿ ಕಂಡ ಕನಸು ಇನಿತಿನಿತೂ ನಿಜವಾಗಲಿ - ನಿನ್ನ ಹೊದ್ದು ಮೆದ್ದ ಮುದ್ದು ಲೆಕ್ಕ ತಪ್ಪಿಹೋಗಲಿ...
___ ಶುಭರಾತ್ರಿ ಅಂದವರಿಗೆಲ್ಲಾ ಶುಭವೇ ಆಗಲಿ...
*** ನಾಳೆ ಅಮಾವಾಸ್ಯೆ, ನಿಂಗೆ ಈಗೆಲ್ಲಿ ಚಂದ್ರ ಕಾಣಿಸ್ದ ಅಂತೆಲ್ಲಾ ಅರಸಿಕ ಪ್ರಶ್ನೆ ಕೇಳಂಗಿಲ್ಲ... 😜
&&&

ಉದಿ ಆದಾಗಿಂದ ಕೊರಳು ಗುನುಗಿದ ರಸಿಕ ಹಾಡೊಂದು ಇರುಳ ಬಾಗಿಲಲಿ ನಿನ್ನುಸಿರ ಬಿಸುಪ ಬಯಸಿ, 
ನೀನೀಗ ಈ ಕಂಗಳು ಮುಡಿದ ಮಧುರ ಮೋಹದ ಪೋಲಿ ಪೋಲಿ ಕನಸು...
ನಿನಗೂ ಶುಭರಾತ್ರಿ... 🥰
&&&

ಈ ಬದುಕು ಒಂಥರಾ ಹಸ್ತಮೈಥುನದ ಸುಸ್ತಿನಂಗೆ...
ಸುಖವಾ ಅಂದ್ರೆ ಸುಖವೇ - ಆದ್ರೆ, ತೃಪ್ತಿಕರವಾ ಅಂತ್ಕೇಳಿದ್ರೆ ಮಾತ್ರ ಪರಮ ಗಲಿಬಿಲಿ...
____ ಅತೃಪ್ತ ಸುಖ ಸಾಗರ...
&&&

"ಪೋಲಿ ರುದಯದ ಪ್ರಾಯ ಕಳೆಯುವುದೇ ಇಲ್ಲ..."
___ ಹಿತ ಮತ್ತು ನೋವು...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರ್ನಲ್ವತ್ತರಮೇಲೆರಡು.....

ಒಂದು ಇನ್ನೊಂದು ಮುಂಜಾವು.....

ನಿನ್ನ ಕಾಣುವ ಎನ್ನ ಕನಸಿನ ನೂರು ಹಾದಿಗೂ ಬೆಡಗೂ, ಬೆರಗೂ, ಒಲವ ಭಾವ ಸೊಬಗೂ ತುಂಬುವ ತುಂಬು ಬೆಳಕು - ಇದು ನನ್ನ ಬೆಳಗು...
ನಲುಮೆ ಪಂಚಾಂಗ...
ಶುಭೋದಯ... 🧚🥀

ರಂಗೋಲಿ ತುಳಿದು ಹುಳ್ಳಗೆ ನಗುವ ಹಸುಳೆಯ ತರದಿ ನಿದ್ದೆಯನಳಿಸಿ ಕಣ್ಣ ಕರಿ ಗೋಳದಲಿ ಬೆಳಕನು ತುಂಬಿ ಕೇಕೆಯ ಹಾಕುವ ಮಂಗಳ ಬೆಳಗು...
ಶುಭದಿನ... 🧚🦸

'ನಾನು' 'ನಂದೂ' ಎಂಬೆಲ್ಲಾ ನೂರು ನಖರೆಗಳ ನಡುವೆಯೇ ನೀನು ನನ್ನವನೆಂಬ ಹಾಗೆ ಅನಾಯಾಸದಿ ಚಿಮ್ಮುವ ಒಂದು ಚಿಟಿಕೆ ನಗುವಿನ ವಿನಿಮಯ - ಎದೆಯಿಂದ ಎದೆಗೆ...
ಸ್ನೇಹಮಯೀ ಬೆಳಗು... 🤝

ಮರುಬೆಳಗು ಎನ್ನದೆಂಬ ಕಳೆದಿರುಳ ಪ್ರೇಮ
ಮತ್ತೆ ಎನ್ನೆದೆಯಲಿ ನಿನ್ನ ಬಿತ್ತಿ ಬೆಳೆಯುವುದು...
ನಾನೆಂಬ ಬಡವನ ಭಂಡ ಭರವಸೆಯ ತುಂಟ ಹಗಲು...
ಶುಭದಿನ... 🫂🤸

ಮತ್ತೊಂದು ಹಗಲು - ಮತ್ತಿನ್ನೊಂದು ಅವಕಾಶ ಬೆಳಕ ಕಾಣಲು...
ಶುಭದಿನ... 🍬

ಇರುಳಿಡೀ ಸುರಿದೂ ತೃಪ್ತವಾಗದ ಬಾನು - ಮಬ್ಬು ಮಬ್ಬು ಬೆಳಗು... 🌧️

ಸುಡುವ ಸೂರ್ಯನ ಒಡಲು ಎಂಥಾ ತಂಪು ಪ್ರೇಮದ ತಾಣ - ಬೆಳಕೆಂದರೆ ಅನುಗಾಲವೂ ಜಗವ ಹರಸಿ ಕಾಯುವ ಪ್ರಾಣ...
ಶುಭ ಮುಂಜಾವು... 🌞🌦️🏝️

ಎದೆಯಿಂದ ಎದೆಗೆ ಪ್ರೀತಿ ಬೆಳಕನು ದಾಟಿಸಲಿ ಹಬ್ಬದ ಹುಗ್ಗಿ...
ಬೆಳಕಿಗಿಷ್ಟು ಎದೆಯ ಸಿರಿಯ ಬಳಿದರೆ ಸಂಭ್ರಮವೀ ಬೆಳಗು...
ಶುಭದಿನ... 🤝💞🫂

ಬೆಳಕಿನ ಕಣ್ಣೆದುರು ಹರವಿಟ್ಟ ಎದೆಯ ಕನಸುಗಳಿಗೆಲ್ಲ ಬಿಳಿ ಬಿಳಿಯ ಬಣ್ಣ...
ಶುಭದಿನ... 🧚🦸

ಬೆಳಕಿನ ಭರವಸೆಯ ಎಳೆ ಪಾದ ಎದೆಯ ಹೊಸಿಲ ತುಳಿದು ನಗೆಯ ರಂಗೋಲಿಯಿಟ್ಟು ಪ್ರೀತಿ ಹೇಳುವಲ್ಲಿ ನಂದ್ ನಂದೇ ಅನ್ನಿಸುವ ಚಂದ ಬೆಳಗು...
ಶುಭದಿನ... 🎉🍬

ಬೆಳಗೆಂಬ ನಿನ್ನ ಪ್ರೀತಿಯ ಬಣ್ಣ... 💞🍬

ಬೆಳಕೆಂದರೂ ಬೆಳಗೆಂದರೂ ನಗು ನಗು ಮತ್ತು ನಗು ಅಷ್ಟೇ - ಬೆಳಕೇ ಅಲ್ಲವಾ ನಿನ್ನ ನಗು... 
ಶುಭದಿನ... ☺️🤗

ಶುಭವನೇ ಅರಸುತ್ತಾ, ಹಾರೈಸುತ್ತಾ ಮತ್ತೂ ಒಂದು ಹಗಲು...
ಶುಭದಿನ... 🫂

ಬೆಳಕು ಶುಭ ನುಡಿದರೆ ಬದುಕು ಬೆಳಕಾದಂಗೆ, ಹಂಗೇ ಶುಭದ ಮಿಡಿತಗಳ ಉಡುಗೆ, ಉಡುಗೊರೆಗಳಿಷ್ಟು ಮುಫತ್ತು ಸಿಕ್ಕಂಗೇ ಲೆಕ್ಕ...
ಶುಭದ/ಶುಭವೇ ಬೆಳಗು... 🧚🦸

ಮಾತು ಮಾತಿನ ನಡುವೆ ಸುಳಿವ ತಿಳಿ ಉಸಿರಲ್ಲಿ ಬೆಳಕು ಮೈದಳೆಯಲಿ - ನುಡಿದ ನುಡಿಯೆಲ್ಲಾ ಲಯಬದ್ಧ ಶುಭದ ಮನೋಮಿಡಿತವಾಗಲಿ...
ಬೆಳಗೆಂಬ ಶುಭ ಶುಭದ ಸ್ವರ ಸಂಯೋಜನೆ... 🍬

ಮತ್ತದೇ ಹಗಲು - ಮುಗಿದು ಹೋಗುವ ಮುನ್ನ ಶುಭದ ಕಿಡಿಯೊಂದ ಎದೆಗೆ ಮುಡಿಸಿ ಹೋಗಲಿ...
ಮತ್ತದೋ ಬೆಳಗು...
ಶುಭದಿನ... 🧚

ಬೆಳಗೆಂಬ ಭರವಸೆಯ ಸಾರಥಿ... 🦋

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರ್ನಲ್ವತ್ತು ಮೇಲೊಂದು.....

ಬೆಳಗೆಂಬ ಶುಭವಾರ್ತೆ - ಬೆಳಗೆಂಬುದೇ ಶುಭವಾರ್ತೆ.....

ಸೋಬಾನೆಯ ಸೋಪಾನದಿ ಮಲಗಿದ್ದ ಶುಭದ ಕುಡಿಗಳೆಲ್ಲ ಗಡಬಡಿಸಿ ಎದ್ದು ಬೆಳಕಲ್ಲಿ ಮುಖ ತೊಳೆದು, ಬೆಳಕನೇ ಅಲಂಕರಿಸಿಕೊಂಡು ನಮ್ಮೆಲ್ಲ ಬೆಳಗ ಹಾದಿಯಲಿ ಮುಂದಾಗಿ ನಡೆವಾಗ - ಆಹಾ! ಈ ಬೆಳಗಿನ ಸೊಬಗೇನು...
ಶುಭದಿನ... 🧚🪻

ಹೂವಿನೆದೆಗೆ ಕಿವಿಯಿಟ್ಟ ಬೆಳಕು
ಪ್ರೀತಿ ಅರಳುವ ಸದ್ದಿಗೆ ರೋಮಾಂಚ ಬೆಳಗು...
ಗಾಳಿ ಹಾದಿಯ ತುಂಬಾ ಸೃಷ್ಟಿ ಗಂಧ
ಉಸಿರುಸಿರ ತಿತ್ತಿಗಳಲಿ ಒಲುಮೆ ಹರಿವು...
ಶುಭದಿನ... 🪻🦋

ಅಲ್ಲೆಲ್ಲೋ ಉರಿದುರಿದು ಬೆಳಕನುಣಿಸುತಾನೆ
ಇಲ್ಲಿವಳು ಮೈದುಂಬಿ ಅರಳರಳಿ ಹಸಿರ ಹಡೆಯುತಾಳೆ...
ನೋಡು 
ಜ್ಯೋತಿರ್ವರ್ಷಗಳ ದಾಟಿ ಪ್ರೀತಿ ಎದೆಯ ಸೋಕುವ ರೀತಿ... 
ಪ್ರೇಮವೇ ಬೆಳಗು...
ಶುಭದಿನ... 🌦️

ಬೆಳಕೇ ಹರಿಯಲಿ ಎದೆಯಿಂದ ಎದೆಗೆ - ಪ್ರೀತಿ ಸಂಯೋಜನೆ...
ಶುಭದಿನ... 🍬🪻

ಬೆಳಕು ಬರೆದ ಕವಿತೆಯ 
ಹಕ್ಕಿಗೊರಳು ದನಿಯೆತ್ತಿ ಹಾಡಿ 
ಹೂವೆದೆಯ ಚಲುವರಳಿ 
ಅಲ್ಲಿಂದಿಲ್ಲಿಗೆ ಇಲ್ಲಿಂದಲ್ಲಿಗೆ ಓಡಿಯಾಡುವ ಪ್ರೀತಿ... 
ಬೆಳಗೆಂದರೆ ಜಗವೆಲ್ಲ ಒಲವ ಸಂಭ್ರಮ... 🪻🦋
ಶುಭದಿನ... 🍬

ಮತ್ತೊಂದು ಕಿರು ಪಯಣ - ಬೆಳಕಿನೊಂದಿಗೆ, ಬೆಳಕಿನೆಡೆಗೆ...
ಬೆಳಗಾಯಿತು... 🍬🪻

ಬೆಳಕು ಎನ್ನೆದೆಯ ಹಲಗೆಯ ಮೇಲೆ ಪ್ರೀತಿ ಅಕ್ಷರ ಬರೆದು ಅರಿವಿನ ಹರಿವು ಇನ್ನಷ್ಟು ಹಿರಿದಾಗಲಿ...
ಬೆಳಗಾಯಿತು - ಬೆಳಕಾಗಲಿ...
ಶುಭದಿನ... 💞🪻

ಹಂಚಿ ತಿನ್ನುವ ಪ್ರೀತಿಯಲಿ ಹಬ್ಬವಾಗುವ ಬೆಳಗು...
ಶುಭಾಶಯ - ಶುಭದಿನ... 🍬💞

ಬಗೆ ಬಗೆಯ ರೂಪ ರಾಗಗಳಲಿ ನೈವೇದ್ಯವಾಗಲಿ ಎದೆಯಿಂದ ಎದೆಗೆ "ಪ್ರೀತಿ" ಕಜ್ಜಾಯ...
ಪ್ರೀತಿಯ ಶುಭಾಶಯ - ಶುಭದಿನ... 🍬🍫🍭

ಉತ್ಸವದ ಮರು ಹಗಲು
ಹಾಗೇ ಉಳಿದ ಖುಷಿಯ ಅಮಲು...
ಬದುಕು ಹಿತದಲ್ಲಿ ಮೈಮುರಿದಾಗಲೆಲ್ಲ ಪ್ರೀತಿ ಪ್ರೀತಿಯಿಂದ ತೇಗುತ್ತದೆ...
ಶುಭದ ಸುಖದ ಬೆಚ್ಚನೆ ಹರಿವು...
ಶುಭದಿನ... 💞

ಹಬ್ಬದ ರಜೆ ಮುಗಿದು ಶಾಲೆಗೆ ಹೊಂಟ ಕೂಸಿನ ಪಾಟೀಚೀಲದಲ್ಲಿ ಮುದುಡಿ ಕುಳಿತ ಖಾಲಿ ಕೇಪಿನ ಡಬ್ಬದಲಿ ಹಬ್ಬದ ಖುಷಿ, ಕೇಕೆ, ಕಥೆ, ಸುದ್ದಿಗಳು ಊರಿಗೆಲ್ಲ ಹಂಚಿಯೂ ಮಿಗುವಷ್ಟು ಬಾಕೀ ಇದೆ - ಮಗುವ ನಿದ್ದೆಗಣ್ಣಲ್ಲಿ ಹಬ್ಬವಿನ್ನೂ ಚಾಲ್ತಿ ಇದೆ...
ಎದೆಯೊಳಗಿನ ಮಗುವ ಮಾತಾಡಿಸಿ...
ಶುಭದಿನ... 🍫💞

ದುಂಬಿ ಕಣ್ಣ ತುಂಟ ಆಸೆ ನೋಟ
ಹೂವಿನೆದೆಯ ಶೃಂಗಾರದ ಢವಢವ
ಪ್ರೀತಿ ಅರಳುವ ಕಲರವ...
ಬೆಳಗಾಯಿತು... 🪻🦋

ಬೆಳಕು ಜಗದೆಲ್ಲರೆದೆಯ ಭರವಸೆಯ ಅಮೃತ ಗಿಂಡಿಯ ತಿಕ್ಕಿ ತೊಳೆದು ಒಪ್ಪ ಮಾಡಿ ನಗುವ ಚೆಲ್ಲಿ ನಿಂತಂತೆ ಬೆಳಗಾಯಿತು - ಬೆಳಕೇ ಬಯಲಾಯಿತು...
ಶುಭದಿನ... 🧚

ನಗೆಯ ಪನ್ನೀರಲ್ಲಿ ಬೆಳಕ ಪಾದವ ತೊಳೆದು ಕಣ್ಣಿಗೊತ್ತಿಕೊಂಡರೆ ದಿನವಿಡೀ ಊರೆಲ್ಲ ಪ್ರೀತಿ ಪಯಣ...
ಬೆಳಗಾಯಿತು... 🤝

ಬೇಡನ ಬಾಣಕ್ಕಿನ್ನೂ ಜೀವ ಬಂದಿಲ್ಲ, 
ಬೆಳಕಿನ ಋಣವಿಷ್ಟು ಇನ್ನೂನು ಬಾಕಿ ಇದೆ, 
ಹಕ್ಕಿಯ ರೆಕ್ಕೆಯ ಅನುನಯದಿ ಸವರುವ ಪ್ರೀತಿ ಬೆಳಗು...
ಶುಭದಿನ... 💞🪴

ಇರುಳ ದಾಂಟಿ ಬಂದವರ ಕೆನ್ನೆ ಸವರುವ ಬೆಳಕು - ನಗೆ ಮುಗುಳ ಅರಳಿಸೋ ಬೆಳಗು...
ಶುಭದಿನ... 🪻🍬

ಸಾಕು,
ನಿದ್ದೆಯ ಗುದ್ದಿ ಬೆಳಕಿಂಗೆ ಎದೆ ತೆರೆದು ಎಚ್ಚರಾಗೆನುವ ಬೆಳಗು...
ಶುಭದಿನ... 🤗

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರ್ನಲ್ವತ್ತು.....

ನಗುವನ್ನು ಸುಮ್ಮನೆ ನಂಬಿಬಿಡುವುದೇ ಸುಖವು.....

ಯಮುನೆಯ ತಣ್ಣನೆ ಹರಿವು, ಬೃಂದಾವನದ ಉನ್ಮತ್ತ ಹಸಿರು, ಗೋವಳದ ಮಂಗಳಮಯ ಉಸಿರು; ಕೊಳಲ ದನಿಯಾಗಿ, ನವಿಲ ಗರಿಯಾಗಿ, ರಾಸರಾಗದ ಸವಿಯಾಗಿ ಅವನ ಸಹಯೋಗದಲಿ ಮಿಂದ ಪ್ರೇಮಾಲಾಪದ ಹೆಸರಲೂ ಎಷ್ಟೊಂದು ನವಿರು...
ಅವನು ಹುಟ್ಟುವ ಮೊದಲೂ ಪ್ರೇಮವಿತ್ತೇನೋ, 
ಅವನ ಕಾಲಾಹುತಿಯ ನಂತರವೂ ಪ್ರೇಮ ಇದೆ ಅಂತಾರೆ,
ಆದರೆ
ಅವನಂತೆ ಪ್ರೇಮಿಯ ನೀಗಿಕೊಂಡು, ಪ್ರೇಮವ ಜೀವಿಸಿ, ಪ್ರೇಮವೇ ಆಗಿ ಹೋಗಲು ಅವನೇ ಆಗಬೇಕೇನೋ...
ಊಹೂಂ 
ಸುಲಭವಿಲ್ಲ - ಅವನಾಗುವುದು, ಅವನಾಗುವುದ ಬಿಡಿ ಒಂದು ರಜ ಅವನಂತಾಗುವುದೂ...
___ "ಕೃಷ್ಣಾ" ಎಂಬ ಚಿರ ಯೌವನ...
&&&

'ನೀ ನನ್ನ ಇಷ್ಟ, ನೀ ನನಗೆ ನಂಗಿಂತಾ ಇಷ್ಟ' ಹಂಗಂತ ದಿನಕೆ ನೂರು ಬಾರಿ ಹೇಳಿಬಿಡಬಹುದು - ಪ್ರೀತಿಯಾಗಲೀ, ನೇಹವಾಗಲೀ ಅದಷ್ಟೇ ಆದರೆ...
ಆದರೆ,
ನಾನು ನಾನಾಗಿಯೇ ಉಳಿದು ನಿನ್ನೊಡನಾಡುವ ಜವಾಬ್ದಾರಿಯಾಗಿ, ಕಾಳಜಿಯಾಗಿ, ಅನುಸರಣೆಯಾಗಿ, ಬದುಕೆಂಬ ಬದುಕಿನ ನೆರಳು ಬೆಳಕಿನಾಟದಲೆಲ್ಲಾ ಆತ್ಮಸ್ಥ ಭರವಸೆಯ ಹೆಗಲಾಗಿ ಸಖ್ಯವ ನಿಭಾಯಿಸುವ ನಡತೆಯಲ್ಲಿ ನಾ ನನ್ನ ಪ್ರೀತಿ ಹೇಳ್ತೀನಿ ಅಂತ ಹೊರಟರೆ ಮಾತ್ರ ತುಂಬಾನೇ ಗಟ್ಟಿ ಇರಬೇಕು ಗುಂಡಿಗೆ...
____ ವ್ಯಕ್ತಪಡಿಸಬೇಕೆಂಬ ಗಡಿಬಿಡಿ ಮತ್ತು ವ್ಯಕ್ತಪಡಿಸುವ ಚಂದ...
&&&

ಎದೆಯ ಬಾಗಿಲಿಗೆ ಹಿಂಗೆ ಬಂದು ಹಂಗೆ ಹೋಗುವ ಸಂಚಾರೀ ಭಾವಗಳಿಗೇ ಸ್ಥಿರ ಭಾವದ ಪಟ್ಟ ಕಟ್ಟಿಕೊಂಡು 'ನೀನು' ಅಥವಾ 'ನೀನು ಮಾತ್ರ' ಅಂತೆಲ್ಲಾ ಆಪ್ತತೆಯ ಆಣೆ ಪ್ರಮಾಣದಂಗೆ ಮಾತಾಡಿಬಿಡ್ತೇನಲ್ಲ, ಮತ್ತದನ್ನು ನೀನು ಅಥವಾ ನಿನ್ನಂಥವರು ಸುಖಾಸುಮ್ಮನೆ ನಂಬಿ ಬಿಡ್ತೀರಲ್ಲ - ಎಂಥಾ ದುರಂತ ಅದು...
ಅಲ್ಲಿಗೆ,
ನಾಕು ದಿನ ಒಡನಾಡುವ ಹೊತ್ತಿಗೆ ಭಾವವೂ, ಬಂಧವೂ ಹೊತ್ತು ನಡೆಯಲಾರದಷ್ಟು ಭಾರ ಭಾರ; ಅಲ್ಲಿಂದ ಮುಂದೆ ಶುರು: 'ಇಷ್ಟೇನಾ ನನ್ನ ಅರ್ಥ ಮಾಡ್ಕೊಂಡಿದ್ದೂ, ವ್ಯಕ್ತಪಡಿಸಿದರೆ ಮಾತ್ರವೇ ಆಪ್ತ ಅಂತಲಾ, ನನ್ನ ಮೌನವೂ ಅರ್ಥವಾಗಬೇಕು ಆಪ್ತತೆ ಅಂದ್ರೆ' - ಸುರಕ್ಷಿತ ಅಂತರ ಕಾಯ್ದುಕೊಳ್ಳಲು ನೂರು ಸಬೂಬುಗಳ ಮಾತಿನ ವ್ಯಾಪಾರ...
ನನ್ನೊಳಗೇ ಇನ್ನೂ ಗಟ್ಟಿಯಾಗಿರದ ಭಾವವನ್ನು ಯಾವುದೋ ಹುಕಿಗೆ ಬಿದ್ದು ನಿನಗೆ ದಾಟಿಸಿರುವಾಗ, ಮೊದಲಾಗಿ ನುಡಿಯುವಾಗಲೇ ನನ್ನಲ್ಲಿ ಸ್ಪಷ್ಟತೆ ಮತ್ತು ಸ್ಥಿರತೆ ಇಲ್ಲದಾಗ, ಜಾಳು ಭಾವ ಜೊಳ್ಳು ಮಾತುಗಳನು ಜೊತೆಗಿಟ್ಟುಕೊಂಡು ಗಟ್ಟಿ ಬಂಧವ ಬಯಸುವಾಗ, ಬಾಂಧವ್ಯವೊಂದನು ನಿಭಾಯಿಸುವಲ್ಲಿ ನವಿರು ಚಂದವಾಗಲೀ, ಮುಕ್ತ ನಗುವಾಗಲೀ ಹೇಗೆ ಉಳಿದೀತು ಹೇಳು...
ಕೊನೆಗೆ,
ಪ್ರಾರ್ಥನೆಯ ಹೆಸರಲ್ಲಿ ಬೇಡಿಕೆಗಳ ಪಟ್ಟಿ ಹಿಡಿದು ದೇವರನ್ನೇ ಮಾತಿಗೆಳೆಯುವ ನಾವು ಮನುಷ್ಯಮಾತ್ರರ ಸಂಬಂಧಗಳಲಿ ಮೌನದ ಎತ್ತರವ ಸಾಬೀತುಪಡಿಸಲು ಹೊರಡುತ್ತೇವೆ...
___ ಬುದ್ಧಿವಂತಂಗೆ ಮೂರ್ಕಡೆ... 
&&&

ಎಷ್ಟೆಲ್ಲಾ, ಏನೇನೆಲ್ಲಾ ಸಂಪಾದಿಸುವ ಹುಚ್ಚಿನಲ್ಲಿ, ಹರಸಾಹಸ ಗೈದೂ ಗಳಿಕೆಯಾಗಿ ಸಿಗುವ ಶೂನ್ಯ ಅಥವಾ ಎಷ್ಟೆಷ್ಟೆಲ್ಲಾ, ಏನೇನೋ ಸಾಧಿಸಿ, ಸಂಪಾದಿಸಿ ಗುಡ್ಡೆ ಹಾಕಿಕೊಂಡು ಹಮ್ಮಿನಲಿ ಎದುರು ಕೂತಾಗಲೂ ಇವಕ್ಕೇನಾ ಇಷ್ಟೊಂದು ಹೆಣ್ಮಿರಿ ಬಡಿದಾಡಿದ್ದೂ ಅನ್ನಿಸಿ ಒಮ್ಮೆಲೇ ಕಾಡುವ ಶೂನ್ಯ...
ಉಫ್...
ಈ 'ಶೂನ್ಯ'ವೆಂಬೋ 'ಗುರುವು' ಮಾಡುವ ಪಾಠವು ಕಾಡುವ, ಕೂಡುವ, ಕಲಿಸುವ ಪರಿಗೆ ಬದುಕಿನದು ನಮೋನ್ನಮಃ...
___ ಶೂನ್ಯದಿಂದ ಶೂನ್ಯದೆಡೆಗೆ ಗಡಿಬಿಡಿಯ ನಡಿಗೆ - ನಾನು ಶೂನ್ಯನೂ...
&&&

'ಸಾವು' ಅಂದ್ರೆ ಚಿರ ನಿದ್ರೆ...
ಸತ್ಯವೇ ಅದು...
ಆದ್ರೂ,
ಬದುಕ ಬಾಗಿಲಲಿ ನಿಂತು ಅಂಗಳದಲಿ ಸರಿದಾಡುವ ಸಾವನು ನೋಡಿದೆನಾದರೆ 'ಸಾವು' ಎಚ್ಚರವೂ ಹೌದು...
ಕೆಲವೆಲ್ಲಾ ದಿನಗಳಲಿ ಸತ್ತಂತೆ ಬದುಕ್ತಿರ್ತೇನೆ - ಜಡ ಜಡವಾಗಿ...
ಆಗೆಲ್ಲೋ,
ಒಂದು ಸಿಡಿದ ಚಿತೆಯ ನೆನಪಾಗಿ, ಕಳ್ಳ ಬೀಳುವ ಈ ಎದೆಬಡಿತದಲ್ಲಿ ಹೊಂಚಿ ಕೂತಿರುವ ಅಭಯವಿಲ್ಲದ ನನ್ನ ದಿನಗಳ ಲೆಕ್ಕ ಶುರುವಾಗಿ, ಈಗಿಲ್ಲಿ ನಿಂತಿರುವ ನಾನು ಒಂದು ಕನಸೂ ಅನ್ನಿಸಿ, ಯಾವುದೋ ಅಚ್ಚರಿಯ ಇನಾಮು ಎಂಬುದರಿವಾಗಿ, ಸರಕ್ಕನೆ ಕಣ್ಣು ಬಿರಿಯುತ್ತದೆ... 
ಅಲ್ಲಿಂದಾಚೆ, 
ಕಣ್ಣೆದುರಿನ ಮೋಹಗಳಲಿ ಕರಡಿ ಮುದ್ದು ಉಕ್ಕುತ್ತದೆ...
ತೋಳ ಹರಹಿಗೆ ಸಿಕ್ಕ ಏನೆಂದರೆ ಏನನೂ ಬಿಡದೇ ಹಪಹಪಿಸಿ ಬಾಚಿ ತಬ್ಬಿ ಸರಸಕಿಳೀತೇನೆ...
ಪರಮ ಕಂಜೂಸು ಬದುಕನೂ ಪರಮೋಚ್ಛ ತೀವ್ರತೆಯಲಿ ಜೀವಿಸಲೆಳಸ್ತೇನೆ...
ಎಲ್ಲಾ ಹಗಲಲೂ ಬೆಳಕ ಬಯಲ ಸೌಂದರ್ಯದಲ್ಲಿ, ಪ್ರತಿ ಇರುಳಲೂ ಬೆತ್ತಲನು ಅಪ್ಪುವ ಮಾಧುರ್ಯದಲ್ಲಿ ಕರಗಿ ಕರಗಿ ನನ್ನ ನಾನು ನೀಗಿಕೊಳ್ಳಲು ಹವಣಿಸ್ತೇನೆ...
ಇಡೀ ಬದುಕಿಗೇ ಹಿಡಿ ಹಿಡಿಯಾಗಿ ಮಿಲನೋತ್ತುಂಗದ ಹಗುರತೆಯ ತುಂಬಿಕೊಳ್ಳಲು / ತುಂಬಿಕೊಡಲೂ ತುದಿಗಾಲಲ್ಲಿ ತಯಾರಾಗ್ತೇನೆ...
ಅದಕೇ - 
ಸಾವೆಂದರೆ ನನ್ನ ಅಂತಿಮ ಯಾತ್ರೆ ಹೆಂಗೋ ಹಂಗೇ ಸಾವೂ ಅಂದರೆ ನನ್ನೀ ಬದುಕಿನೆಚ್ಚರದ ಆರಂಭ ಸೈತಾ...
____ ಮಸಣವಾಸಿಯ ಕಳ್ಳು ಕಾವ್ಯ...
&&&

ನಿನ್ನಾ ಅನುಗಾಲದ ಅನುರೂಪ ನಗುವಿನ ಗುಟ್ಟೇನು...?
......ಹಹ್ಹಾ.....
...... ಎಲ್ಲೂ ತಾವಿಲ್ಲದಂಗೆ ಈ ಎದೆ ಗೂಡನೇ ತಬ್ಬಿ ಹಬ್ಬಿರುವ ನೋವ ಬಳ್ಳಿ, ಮತ್ತದರ ಬೆನ್ನಿಗಂಟಿ ಬರುವ ಸಂವಾದಿ ಬಳಗ...
ಹಂಗೇ 
ಬದುಕ ಬಾಗಿಲಿಂಗೆ (ಪಾಲಿಗೆ) ಬಂದ ಎಂಥದ್ದೇ ಅತಿಥಿಗಳನು ಆದರದಿ ಆದರಿಸುವ ಜನ್ಮ ಸಂಸ್ಕಾರ...
____ ನೋವು ನಗುವಿನ ಮೆಟ್ಟಿಲು...

ಹಾಗಲ್ಲ
ನಾ ಹೇಳಿದಷ್ಟು ಸುಲಭವಾ ನೀ ಸುಖಾಸುಮ್ಮನೆ ನಂಬುವುದು...
ನೋವೆಂದರೆ
ನಗುವವನ ಎದೆಯ ನೋವಿಗೆ ಸಾಕ್ಷಿ ಬೇಕೆಂದರೆ ಆ ನಗುವಲ್ಲೇ ಹುಡುಕಬೇಕಿರುವುದು...
___ ನಗುವನ್ನು ಸುಮ್ಮನೆ ನಂಬಿಬಿಡುವುದೇ ಸುಖವು...
&&&

ವತ್ಸಾ -
ಹೆಗಲೇರುವ ನೋವುಗಳಲ್ಲಿ ಇರುವ ಒಗ್ಗಟ್ಟಿನಲ್ಲಿ ಒಂದಂಶದಷ್ಟಾದರೂ ಗಲ್ಲ ತಿವಿಯುವ ನಲಿವುಗಳಲ್ಲಿದ್ದಿದ್ದಾದರೆ ಸಾಕಿತ್ತು, ನಗೆಯ ಆಯುಷ್ಯವ ಗೆಲ್ಲುವ / ಮೆಲ್ಲುವ ಹಾದಿ ಇಷ್ಟು ಸಿಕ್ಕುಸಿಕ್ಕಾಗಿರುತಿರಲಿಲ್ಲ ನೋಡು...
____ ಒಡೆದ ಕಾಲ್ಬೆರಳಿಗೇ ಎಡವಲೆಂದೇ ಕಾಯುತ್ತಾ ಕೂತಂತಿರುತಾವೆ ಕಲ್ಲುಗಳು...
&&&

ಇಷ್ಟಕ್ಕೂ ಎಲ್ಲಾ ಹೇಳ್ಕೊಂಡು ನಗಬಹುದಾದ ದೇವರಿಂದಲೂ ಒಂದಿಷ್ಟೇನನಾದರೂ ಮುಚ್ಚಿಟ್ಟುಕೊಳ್ಳಲು ಹವಣಿಸುವ ಮನುಷ್ಯರು ನಾವು...
ಬಯಲ ಬೇವರ್ಸಿಯಂತಾಡುವ ನನ್ನೊಳಗೂ ಗುಟ್ಟುಗಳಿಷ್ಟು ಉಳಿದಿರಬಹುದು - ಎನಗೆ ಆನೇ ಹೇಳಿಕೊಳ್ಳಬೇಕಿರುವುದೂ ಎಷ್ಟೋ ಬಾಕಿ ಇರಬಹುದು...
ಇಷ್ಟಾಗಿಯೂ - ನೀ ಮಾತಿಗೆ ಸಿಕ್ಕಾಗ, ಮೌನಕೆ ಹೆಗಲಾಗುವಾಗ ನನ್ನದೆನುವ ಎಲ್ಲಾ ಖುಲ್ಲಂಖುಲ್ಲಾ ಎಂಬಷ್ಟು ಆಪ್ತತೆ ನೋಡು ನೀನೆಂದರೆ ನೇಹವೇ...
___ ನಿಂಗೂ ನಾ ಹಂಗೇನಾ..? ಹಂಗೆಂದಾದರೂ ಆದೇನಾ...??

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರ್ಮೂವತ್ತೊಂಭತ್ತು.....

ಪ್ರಣಯ ಕಾವ್ಯದ ಕಾಲ್ಸಂಕ.....

ಪರಿಚಿತ ಹಾದಿಯಲಿ ಅಪರಿಚಿತ ಕವಿ ಬರೆದೆಸೆದ ಅಪೂರ್ಣ(ರ್ವ) ಭಾವಗೀತೆಯೊಂದು ನನಗೇ ಕಾದು ಎದೆಯ ಹೊಕ್ಕಂಗೆ - ನೀ ಸಿಗುವ ಎಲ್ಲಾ ಸಂಜೆಗಳು... 🥰
____ ಪ್ರಣಯ ಕಾವ್ಯದ ಕಾಲ್ಸಂಕ...
&&&

ವತ್ಸಾ -
"ನೀ ನನ್ನ ಇಷ್ಟ ಅನ್ನೋದರ ಅರ್ಥ ನೀ ನನ್ನ ದೌರ್ಬಲ್ಯ ಅಂತ ಅಲ್ಲ..."
ನಿನ್ನ ನೆನೆವವರ ನೆನೆಯುತ್ತಿರು, ನೆನೆನೆನೆದು ಒಡನಾಡುತ್ತಿರು ಭಾವವೇ - ಆಗ ನಿನ್ನನೇ ತೊರೆದವರ ನೆನೆದೂ, ನೆನಪುಗಳು ಸೆಳೆದೂ, ತುಳಿದೂ ನಗಬಹುದು ಜೀವವೇ...
____ ನನ್ನ ಧ್ಯಾನ - ನನ್ನ ಆಧ್ಯಾತ್ಮ...
&&&

ಇಲ್ಲಿ ಮೋಡ ಮುಸುಕಿದ ವಾತಾವರಣ, ಯಾವ ಕ್ಷಣದಲ್ಲೂ ಹುಚ್ಚು ಮಳೆಯಾಗಬಹುದು ಅಂತ ಸಂದೇಶ ಬಂತು - ಆಹಾ!! ಎಂಥ ಚಂದ ಪೋಲಿ ಕಾವ್ಯ ಎಂದು ನಲಿದೆ...
ಸದಾಶಿವಂಗೆ ಅದೇ ಧ್ಯಾನ ಅಂತಂದು ಮೂಗು ಮುರಿದವಳ ಹೊಳೆದ ಮೂಗುತಿಯಲ್ಲಿ ಕಳ್ಳ ಆಸೆಯ ಸೆಳಕು... 
ಬೆಳ್ಳಂಬೆಳಗಲಿ ಮೈ ಮನಕೆ ತುಟಿ ಕೊಂಕಲೇ ಕಡು ರೋಮಾಂಚವ ಸುರಿದು "ಹೋಗೋ, ಕೆಲ್ಸ ನೋಡು ಹೋಗು" ಅಂತ ಹಿತವಾಗಿ ತಿವಿದರೆ ಹೆಂಗೆ ತಡೆದೀತು ಪೋಲಿ ಜೀವ ಆ ಸವಿ ಸುಖವಾ...
____ ಕರಿ ಮೋಡ ಬಿತ್ತಿದ ಛಳಿಯ ಛವಿ ಮತ್ತು ಕಪ್ಪು ಹುಡುಗಿಯ ವಲವ ವಯ್ಯಾರದ ಬಿಸಿ...
&&&

ಉರಿದುರಿದು ಘಮಿಸಲು ಇರುಳಿಗಾಗಿ ತಪಿಸುವ ನಾ ನಿನ್ನ ಮೋಹದ ಧೂಪ...
ಮಳೆ ಛಳಿಯ ಮಡುಹಿನಲಿ ನಾಭಿ ಕೋಡಿಯಿದು ಮದನನ ಮಧುರ ಶಾಪ...
ಕೇಳೇ -
ಮೊದಲ ಮಳೆಯಲಿನ ಮೃದ್ಗಂಧದಂಗೇ ಕಾಡುತ್ತದೆ, ಮರಳಿ ಹೊರಳಿ ಕರೆಯುತ್ತದೆ, ಪ್ರತೀ ಮಿಲನೋತ್ಸವದ ಉತ್ತರಾರ್ಧದದಲೂ ಹೊಮ್ಮುವ ನಿನ್ನ ಮೈತಿರುವುಗಳ ಮತ್ತ ಘಮ...
____ ಮಳೆ‌ ನುಡಿಸುವ ಹೂ ಹಕ್ಕಿ ಹಾಡಿನ ಧರ್ಮ...
&&&

ಹೇ ದೇವಾ,
ಅವಳ ಭಕ್ತಿಗೆ ಒಲಿದೆಯಾದರೆ ನನ್ನನೇ ಕರುಣಿಸು...
ನಿಂಗೆ ಸೋತೇ ಅಂದಳು - ಮತ್ತೀಗ ನನ್ನ ಬದುಕನೇ ನಿರ್ದೇಶಿಸುತ್ತಾಳೆ...
"ಸೋತವರು/ರೇ ಆಳುವುದು ಒಲವಲ್ಲಿ ಮಾತ್ರವೇ ಇರಬೇಕು..."
___ ಮಧುರ ಪಾಪದ (ಹುಚ್ಚು) ಕಿಚ್ಚು... 
&&&

ಇದಿರು ಹಾಯುವ ಪ್ರತಿ ನಡೆ ನುಡಿಗಳಲೂ ಮಧುರ ಸ್ವರ ವಿನ್ಯಾಸವ(ನಷ್ಟೇ) ಹುಡುಕುವ ತುಂಬು ಎದೆ ಭಾವಕೆ ಅವಳದೇ ಹೆಸರಿಡುವೆ...
___ ಅವಳೆಂದರೆ - ಎನ್ನ ಹಾದಿಯ ಕರಿ ಕಾನು / ಕಾರ್ಮುಗಿಲು / ಪಾಳು ಗುಡಿಯ ಕಪ್ಪು ಕಲ್ಲು ದೇವರೆದುರಿನ ಕಿರು ಘಂಟೆ...
&&&

ಕಾಲನೇ, ಒಂದೇ ಒಂದು ಕೊನೆಯಾಸೆ / ಪ್ರಾರ್ಥನೆ:
ಬರೀ ಕಲ್ಲಲ್ಲ ನೀನೆಂದು ನಂಬಿದವಳ ರುದಯದ ಕನಸುಗಳೆದುರು ಕಲ್ಲಾಗಬೇಡ...
ಸುಳ್ಳೇ ಆದರೂ ಮುನಿದು ಅವಳ ನಗೆಯ ಹಾದಿಗೆ ಮುಳ್ಳು ಸುರಿಯಬೇಡ...
ಯುದ್ಧವೇನಿದ್ದರೂ ಸಮ ಬಲರ ನಡುವೆ ಇರಬೇಕು - ನಾನಿಲ್ಲದಲ್ಲಿ ಅವಳನು ಕಾಡದಲೇ ನೀನೇ ಕಾಯಬೇಕು...
___ ಭಾವುಕತೆ... 
&&&

ನಂಗೆ ಮಾತ್ರ ಕೊಡೂ ಅಂದ್ರೆ ನಾನು ಓಡೋಗ್ತೀನಿ - ನಂಗ್ನಂಗೂ ಮಾತ್ರ ಕೊಡೋ ಅಂದಲ್ಲಿ ಭರಪೂರ ಸುರೀತೀನಿ...
____ ಪ್ರೀತಿ ಪಲ್ಲಂಗ ಪುರಾಣ...
&&&

ಎಷ್ಟೊಂದು ಶಬ್ದಗಳ ಕೂಡಿಸಿ, ಕಳೆದು, ಭಾಗಿಸಿ ಶೇಷವಾಗಿಯೇ ಉಳಿಯಿತು ಭಾವ...
ನಿನ್ನದೊಂದು ಸುನೀತ ಸ್ಪರ್ಷದಿಂದ ಕವಿತೆಯಾಯಿತು ಜೀವ...
ನೋಡು
ಕವಿತೆ ಅಂದರೆ ಅದೇ ಅಂತೆ - ಶಬ್ದಾಲಂಕಾರಗಳ ಕೊಡವಿ ನೇರ ಎದೆಯನೇ ಮುಟ್ಟುವ ಸಂಪ್ರೀತ ಸನ್ನಿಧಿಯ ಶ್ವಾಸ...
___ ಪ್ರೀತಿಯೆಂದರೂ......

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)