ಗೊಂಚಲು - ನಾಕ್ನೂರೆಂಬತ್ತೈದು.....

ಪ್ರೀತಿಯ ಮರಿಗಳ ಕಿಲಕಿಲ ಬೆಳಗು.....

ಪಟ ಸೌಜನ್ಯ: ಸ್ನೇಹಿತೆ 'ವೀಣಾ...'

ಬೆಳಕು ಯೆದೆಯೇರಿ, ಹೆದೆಯೇರಿಸಿ ಆಳಲು ನಿಂತರೆ, ಹೆಗಲೇರಲು ಬಂದ ಶನಿಯೂ ನಡು ಬಗ್ಗಿಸಿ ಆಳಾದಾನು... 
ನಡಿ, ಬೆಳಗಾನೆದ್ದು ಒಂದೀಸು ಬೆಳಕನು ಒಳಗೆಳಕೊಳ್ಳುವಾ... 
ಶುಭದಿನ... 🤝🫂

ಒಂದು ಹಿಡಿ ಪ್ರೀತಿ ಬೆಳಕಿದ್ದರೆ ಯೆದೆಯಲಿ
ಶುಭದ ಗಣಿಗಳನೇ ಕಾಣಬಹುದು ಎಲ್ಲೆಂದರಲ್ಲಿ, ಎಲ್ಲದರಲ್ಲಿ... 
ಶುಭದ ನಗೆಯ ಖನಿಯೇ - ಶುಭದಿನ... 🤝🫂

ಒಲ್ಲದ ಮನಸಲ್ಲಿ ಬಿಗಿದ ತೋಳಿಂದ ಕಳಚಿಕೊಂಡು, ಮೈಯ್ಯ ಬಿಲ್ಲಾಗಿಸಿ ಆಲಸ್ಯದ ಗಂಟು ಬಿಡಸಿ, ಕಳೆದಿರುಳ ಕಾವ್ಯವಾಗಿಸಿದ ಸಿಂಗಾರ ಸೊಬಗ ನೆನೆದು ಪಿಸುನುಡಿಯಲಿ ತುಟಿಗೆ ಪ್ರೀತಿ ಹೇಳಿ, ಅಮಲುಗಣ್ಣಲ್ಲೇ ಅರಳು ಹೂವಿನ ನಗೆ ನಕ್ಕಳು... 
ಯೆದೆಯ ಗೂಡಲಿ ಕನಸ ರೆಕ್ಕೆ ಪಟಪಟಿಸಿ ಹೊಸ ಹಗಲಿನ ಶುಭದ ಸಂಭಾಷಣೆ ಮೊದಲಾಯಿತು... 
ಶುಭದಿನ... 🫂🤝

ತನ್ನ ಸ್ಪರ್ಷಕೆ ಹೂವರಳೋ ಸದ್ದಿಗೆ ಮುದಗೊಂಡು ಮಧುರ ಕಂಪನದಿ ಹೊಳೆಯೋ ಬೆಳಕನು, ಹೂವಿನೆದೆ ತೊಟ್ಟನು ಹೀರಿ ಸುಖದಿ ತೇಗುವ ದುಂಬಿ ಅಭಿಮಾನದಿ ಅಭಿವಾದಿಸುವಾಗ, ಪ್ರೀತಿ ಮಡಿ ಮಡಿಯಾಗಿ ಜಗದ ಒಡಲ ತುಂಬಿ ನಗೆ ಬೀರಿತು... 
ಹಗಲು ಮೈನೆರೆಯಿತು... 
ಶುಭದಿನ... 🌻💞

ಮಣ್ಣಿಂದ ಅರಳೋ ಹೂವಿನ ಜೀವ
ಮತ್ತೆ
ಮಣ್ಣಾಳಕೆ ಮರಳೋ ಹೂವಿನ ಭಾವ
ಎರಡೂ ಬೆಳಕ ತಬ್ಬಿದವೇ ಅಲ್ಲವೇ... 
ನಾವೂ
ಅರಳಿ, ಮರಳುವ ನಡು ಹಾದಿಗಿಷ್ಟು ನಗೆಯ ಬೆಳಕ ಹಬ್ಬಿಸಿದಿರಾಗದೇ... 
ಬೆಳಗು ಬಡಿಸುವ ಪ್ರೀತಿಯ ಕಂಡು 
ಈ ರುದಯವೂ ಒಂದೀಸು ಪ್ರೀತಿ ನಗೆಯ ಹಡೆಯಲಿ... 
ಶುಭದಿನ ನೇಹೀ... 🤝🫂

ಕತ್ತಲಷ್ಟೇ ತುಂಬಿದ ನನ್ನೀ ಮಬ್ಬು ತಲೆಯೊಳಗೂ ನಿನ್ನದೊಂದು ಮುಗುಳ್ನಗುವು ಇಷ್ಟೇ ಇಷ್ಟು ಬೆಳಕ ಬಿತ್ತಬಹುದು... 
ಬೆಳಗಾನೆದ್ದು ನಾ ನಿನ್ನೆದೆಗೆ ನಗೆಯ ಬಯಸಿದರೆ ನಂಗೂ ಇನಿತು ನಗೆಯು ಸಿಗಬಹುದು... 
ಕೇಳಿಲ್ಲಿ -
ಹಗಲ ಮೊದಲ ಹೆಗಲಲ್ಲಿ ಶುಭದ ಫಲ ಸಿಕ್ಕರೆ ಯೆದೆಯಲ್ಲಿ ದಿನವೆಲ್ಲಾ  ಪ್ರೀತಿ ಒಸಗೆ ಒಸರಬಹುದು... 
ಶುಭದಿನ ನೇಹೀ... 🤝🫂

ನಭದ ಮೂಲೆಯಲೆಲ್ಲೋ ಅಡಗಿ ಮಲಗಿದಂತಿದ್ದ ಬೆಳಕು ಮೋಡದ ಹೊದಿಕೆಯ ಒದ್ದು ವಸುಧೆಯ ಕಣ್ಣಿಗೆ ಕಣ್ಣ ಕೂಡಿಸಿ ಕೂಕೀ ಅಂದಂತೆ ಮೆಲ್ಲಗೆ ಬೆಳಗಾಯಿತು....
ನಿದ್ದೆಯ ಮುಸುಕು ಸರಿಸಿ ಮೈಮುರಿದು ನಿನ್ನ ನನ್ನ ಯೆದೆಯ ಸೊಂಪಾದ ನಗೆಯು ತಂಪಾಗಿ ತೆಕ್ಕೆ ಬೀಳಲಿ... 
ಪ್ರೀತಿಯ ಮರಿಗಳ ಕಿಲಕಿಲ ಬೆಳಗು... 
ಶುಭದಿನ... 🤝🫂

ನಗೆ ಮುಗುಳ ದೀಪ ಹಚ್ಚಿ 
ಬೆಳಕಿಗೆ ಬೆಳಕಿನಾರತಿ ಎತ್ತು...
ಪ್ರೀತಿ ಪಾರಾಯಣದ ನಾಂದಿ ಹಾಡಿ
ಬೆಳಗನು ಬೆಳಕಿಂದ ಬೆಳಗು... 
ಯೆದೆಯ ಬೆಳಕು ಜಗದ ಬೀದಿಯ ಬೆಳಕಲಿ ಬೆರೆತು ಇನ್ನಷ್ಟು ಬೆಳೆಯಲಿ, ಹೊಳೆಯಲಿ, ಹೊಳೆಯಾಗಿ ಹರಿಯಲಿ... 
ಶುಭದಿನ... 🤝🫂

ಬೆಳಕಿನ ಬಾಗಿಲಲಿ ಕನಸಿನ ಹಸೆ ಬರೆದು, ಯಾರೂ ತುಳಿಯದಿರಲೆಂದು ಬೆಳಕನೇ ಬೇಡಿಕೊಂಡು, ಬೆಳಕಿನಧಿಪತಿಗೆ ಕರ ಜೋಡಿಸಿ ತಲೆ ಬಾಗಿ, ಶುಭದ ತುಂಬು ಭರವಸೆಯಲಿ ಯೆದೆಯುಬ್ಬಿಸಿ ಬದುಕ ಬವಣೆಗಳ ಗೆಲ್ಲಲು ಹೊರಟು - ಯಾವುದೋ ನಗೆಯು ತೋಳ್ದೆರೆದು ಕರೆದಂತೆ ಭಾವ ತುಂಬಿ, ಎಳೆ ಬೆಳಕು ಚೆಲ್ಲಿದ ಹಾದಿಯ ಮೇಲೆ ಮತ್ತೆ ಚೂರು ಪ್ರೀತಿಯಾಯಿತು...
ಬೆಳಗಾಯಿತು... 
ಶುಭದಿನ... 🤝🫂

ಕಾಲನ ಹೊಳೆಯಲಿ ಯಾವುದೂ ಹಳತಾಗುವುದಿಲ್ಲ; ಸೋಲಿಲ್ಲ, ಗೆಲುವಿಲ್ಲ - ಪ್ರೀತಿಯೊಂದೇ ಹರಿವು... 
ಮುರಿದ ಇಮಾರತಿನ ಗೋಡೆ ಮೂಲೆಯ ಇರುವೆ ಗೂಡಲ್ಲಿ ದಿನವೂ ಸಹಸ್ರ ಮರಿಗಳ ಜನ್ಮೋತ್ಸವ; ಆಳ್ವಿಕೆ ಮುಗಿದರೂ ಅರಳುವಿಕೆಯ ಸೊಬಗಿಗೆ ಕೊನೆಯಿಲ್ಲ - ಖಾಲಿಯಾಗದ ಪ್ರೀತಿ ಖಜಾನೆ... 
ಕಲ್ಲೆದೆಯ ಬಿರುಕಿನಲೇ ನೀರ್ಜಿನುಗು, ಹಸಿರೂ, ಹೂವೂ ವಸಂತೋತ್ಸವ - ಬೋರ್ಗಲ್ಲಿಗಿಂತ ಬಲು ಬಿರುಸು ಪ್ರೀತಿ... 
ಪ್ರಕೃತಿ ಪ್ರೇಮದಾಟದ ಮೂರ್ತ ಮಜಲುಗಳಿಗೆ ಋತುಗಳ ಹೆಸರು, ಬಣ್ಣ, ಬೆಡಗು; ನಿತ್ಯ ನವೀನ ಸಿಂಗಾರ ಸಂಭ್ರಮ, ವಿಭ್ರಮ - ಬೇವು, ಬೆಲ್ಲ ಪ್ರೀತಿ... 
ನಲಿವಿಗೊಂದು ನೆಪ - ನಗುವರಳುವಾಗಲೆಲ್ಲ ಹಬ್ಬ... 
ಪ್ರೀತಿ ಪ್ರೀತಿ ಪ್ರೀತಿ - ಉಗಾದಿ... 
ಶುಭಾಶಯ - ಶುಭದಿನ... 💞🤝🫂🍬

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರೆಂಬತ್ನಾಕು.....

ಬೆಳಗು - ಬೆಳಕಿನ ತಿಲ್ಲಾನ... 🤝🫂

ಬೆಳಗೆಂದರೆ ಬಲು ಬೆರಕಿ ಮಾಯಾ ಬಜಾರು...  
ಯೆದೆಯ ನೂರು ಭಾವಾನುಭಾವಗಳ ಕೊಟ್ಟು, ಕೊಂಡು, ಕೊಟ್ಟುದಕ್ಕೆ ಬೀಗಿ, ಕೊಂಡುದಕ್ಕೆ ಕರುಬಿ, ಕೊಡಬೇಕಿದ್ದುದನು ಕೊಡಲಾಗದೇ, ಕೊಳ್ಳಬೇಕಿದ್ದುದು ಸಮಾ ಸಿಗದೇ ಅಷ್ಟೋ ಇಷ್ಟೋ ಅಷ್ಟೂವೋ ಬಾಕಿಯಾಗಿ, ದಿನದ ಬಗಲ ಚೀಲದಲಿ ಸಂಜೆಗಿಷ್ಟು ನಗು, ನೋವುಳಿದರದಕೆ ಕಣ್ಣೀರೋ ಪನ್ನೀರೋ ಕುಡಿಸಿ ಮಲಗಿಸಿ ಅಷ್ಟೇ... 
ಅದ್ಕೂ ಹೆಚ್ಚು ಕಳಮಳವೇನೂ ಬೇಡ, ನಾಳೆಗೆ ಮತ್ತೆ ಬೆಳಗಾಗುತ್ತದೆ... 
ಬೆಳಗೆಂದರೆ ನಿತ್ಯ ಬಿಚ್ಚಿಕೊಳ್ಳುವ ಸಂತೆ - ಬಲು ಬೆರಕಿ ಮಾಯಾ ಬಜಾರು... 
ಶುಭದಿನ... 🤝🫂

ಬೆಳಕಿನ ಭಾಷೆ ಪ್ರೀತಿ...
ಹರಡಿಕೊಳ್ಳಲಿ ಯೆದೆಯಿಂದ ಯೆದೆಗೆ ಬೆಳಕಿನಾ ನೀತಿ
ಬೆಳಗು ಬಯಲ ಹರವಿಕೊಳ್ಳುವ ರೀತಿ... 
ಶುಭದಿನ... 🤝🫂💞

ಕಾಯುವ ಎದೆಯ ಬಾಗಿಲಿಗೇ ಬಂದು ಬೆಳಕು ಪ್ರೀತಿಯ ಸುರಿಯುವಾಗ - ಭುವಿ ಬಣ್ಣಗಳ ಗರಿಬಿಚ್ಚಿ ಪ್ರೀತಿಯನು ಸಂಭ್ರಮಿಸುವುದು... 
ಯೆದೆಯಿಂದ ಯೆದೆಗೆ ಪ್ರೀತಿಯನಷ್ಟೇ ಕೊಟ್ಟು ಕೊಳ್ಳುವ ಕಾರುಣ್ಯದ ಕಲಿಕೆ/ಸಲಿಗೆ ಬೆಳಗು... 
ಶುಭದ ಪರಿಭಾಷೆ... 
ಶುಭದಿನ... 🍫🤝💞

ಅನಕ್ಷರಸ್ಥ ನಾನು, ಅಕ್ಷರಕ್ಷರ ಜೋಡಿಸಿ ಬರೆದ ಒಂದು ಸಾಲೂ ಬೆಳಕಾಗಬಹುದೇನೋ - ಕಣ್ಣ ತುಂಬಿದ ಬೆಳಕು ಯೆದೆಯ ಬೆಳಗಬಹುದಾದರೆ... 
ನಿನ್ನ ಬೆಳಗೊಂದು ನಗೆಯ ಕಿಡಿಯ ಮುಡಿಯಬಹುದೇನೋ - ನಾ ಹಂಚಿಕೊಂಡ ಶುಭದ ನುಡಿಯಲಿಷ್ಟು ಪ್ರೀತಿಯ ಹುಡಿಯಿದ್ದರೆ... 
ಶುಭದಿನ... 🤝🫂

'ನಾನು' ಕಟ್ಟಿಕೊಂಡಿರುವ ಗೋಡೆಗಳ ನಡುವೆ ಬಾಗಿಲು, ಕಿಟಕಿ, ಯಾವುದೂ ಇಲ್ಲದಿದ್ದರೆ ಎಲ್ಲೋ ಮೂಲೆಯಲಿ ಸೀಳಿರುವ ಸಣ್ಣ ಬಿರುಕನಾದರೂ ಹುಡುಕಿ ಒಳಬರಲು ಹವಣಿಸುವ ಬೆಳಕು... 
ಆ ಬರಡು ಗೋಡೆಯನೇ ತಬ್ಬಿ ಹಬ್ಬಿ ಹೂಬಿಡುವ ಯಾವುದೋ ಬಳ್ಳಿ... 
ದಿವ್ಯ ಕಾರುಣ್ಯದ ಪಾಠ...!!!
ಬೆಳಗೆಂದರೆ ನಿಷ್ಕಾರಣವಾದ ಸಮೃದ್ಧ ಪ್ರೀತಿಯ ಭವ್ಯ ಸನ್ನಿಧಿ... 
ಶುಭದಿನ ನೇಹೀ... 🤝🫂

ಪಟ ಸೌಜನ್ಯ: ಸ್ನೇಹಿತೆ 'ವೀಣಾ...'

ಬೆಳಕು ಬಾಗಿಲಿಗೆ ಬರುತಿದೆ... 
ಏಳಿ, ಎದ್ದೇಳಿ...
ಪ್ರೀತಿಯ ಮಸೆಗಲ್ಲಿಗೆ ಉಜ್ಜಿ ಉಜ್ಜಿ 
ಕನಸ ಕುಡುಗೋಲಿನ ಸಾಣೆ ಹಿಡಿದು
ಸನ್ನದ್ಧರಾಗಿ
ಶುಭದ ಕೊಯ್ಲಿಗೆ ಹೊರಡಿ... 
ಬೆಳಗಾಯಿತು - ಶುಭದಿನದ ಶುರುವಾತು... 🌾

ಬೆಳಗಾಯಿತು...
ಬೆಳಕಿನ ಬೈರಾಗಿಯ ಸಂತೀಗೆ ಶುಭದ ಮರಿ ಕಿಡಿಗಳು ಬಾಗಿಲ ಬಡಿಯುತಿವೆ... 
ಕಣ್ಣ ಬೊಗಸೆಯಿಂದ ಮೊಗೆಮೊಗೆದು ಎದೆಯ ಹರಿವಾಣವ ತುಂಬಿಕೊಳ್ಳುವಾ... 
ಪ್ರೀತಿಯ ಕರುಳ ಕಣಜದಲಿ ನಗೆ ಮುಗುಳು ತುಂಬಿ ತುಳುಕಲಿ...
ಶುಭದಿನ... 🤝🫂🌾

ಕನಸ ಹೂಗಳು ಅರಳುವ ಹಾದಿ
ಪ್ರೀತಿ ಕಂಗಳ ಹಬ್ಬ
ಯೆದೆಯ ಹಿಗ್ಗಿನ ಕಬ್ಬ
ಬಣ್ಣ ಬೆಡಗಿನ ಬೆಳಗು... 
ನೇಹದಲಿ ಹೆಗಲು ತಬ್ಬಿ 
ನಗೆಯ ಬಣ್ಣಗಳ ಮೆತ್ತಿ 
ಬೆಳಕ ಮೀಯುವಾ, 
ಈ ಹಗಲಿದು ಮಧುರ ಹಾಡಾಗಲಿ... 
ಶುಭದಿನ... 🤝🫂

ಬೆಳಗಾಯಿತು...
ಬೆಳಕಿನ ಹೂ ಅರಳಿದೆ 
ಕನಸಿನ ಕೇಸರವನುಂಡು
ನಗೆಯ ಅಂದ, ಗಂಧವ ಉಸಿರಾಡುವಾ...
ಬಾ
ದಿನದಾರಂಭಕೆ ಪ್ರೀತಿಯ ಬಣ್ಣ ಬೆಡಗಿನುಡುಗೆ ಉಟ್ಟು
ಶುಭದ ಕಾವ್ಯ ಸವಿ ಸೊಬಗ ಮುಡಿದುಕೊಳ್ಳುವಾ...
ಶುಭದಿನ... 🤝🫂

ಮುಂಜಾನೆಯೆಂಬೋ ಮಧುರ ಮಾಯಾಲಾಪ...
ಕಣ್ಣ ಹನಿಗಳ ಗಾಳಿಸಿ ನಗೆಯ ಆಯುವ/ಆಳುವ ಭಂಡ ಭಾವದೆದೆಗಳಲ್ಲಿ ಬೆಳಗೆಂದರೆ ಶುಭದ ಮಯೂರ ನರ್ತನ... 
ಶುಭದಿನ... 🤝🫂

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರೆಂಬತ್ತಾ ಮೂರು.....

ಯಾವ ಜನುಮದ(ಕೆ) ಗುರುತೋ.....

ವತ್ಸಾ -
ನಡೆವ ಪಾದದ ಒಡೆದ ಗಾಯವನು ಉಪ್ನೀರಲ್ಲಿ ತೊಳೆದಂಗೆ ನಿನ್ನ ಮಾತು ಮತ್ತು ಮೌನ...
ಹೂಂ,
'ಮಾತು' ಇರಿಯದಿರಲೀ ಎಂದು ನಾಲಿಗೆ ಕಚ್ಚಿ ಹಿಡಿದು ಅತ್ತ ತಿರುಗಿದರೆ 'ಮೌನ' ಮಸಣವನೇ ತನ್ನ ಮನೆ ಮಾಡಿಕೊಂಡಿತ್ತು...
ಅಷ್ಟೇ,
ಮಾತು ಕೊಂದ ಬಂಧಕ್ಕೆ ಮೌನ ಗೋರಿ ಕಟ್ಟಿ ನಕ್ಕಿತ್ತು...
ಆದ್ರೂ ಏನ್ಗೊತ್ತಾ,
ನಾನೋ ನೀನೋ ಆಡಿದ್ದಾಗಲೀ, ನುಂಗಿದ್ದಾಗಲೀ, ನಾನೂ ನೀನೂ ಗ್ರಹಿಸಿದ್ದು ಹೆಂಗೆ ಎಂಬುದರ ಮೇಲೆ ಪರಿಣಾಮ ನಿಶ್ಚಯ - ಕೈಹಿಡಿದು ನಡೆಸುವುದಾ ಅಥವಾ ಯೆದೆಬಗೆದು ಕೊಲ್ಲುವುದಾ ಯೆಂಬುದು...
___ ಬಂಧ - ಬಡಿವಾರ...
&&&

ಕೇಳೇ -
ಮೋಹ ಮದಕೆ ಮನಸೋತು, ಸುಖದ ಅಗ್ಗಿಷ್ಟಿಕೆಯಲಿ ಮತ್ತೆ ಮತ್ತೆ ಅರಳಿ ಹೊರಳಿ ಬೆಮರಿ ಮೈಮರೆವ ಕೊಂಡಾಟದಾಸೆಯ ಈ ಇರುಳ ಬಾಗಿಲ ಛಳಿಯ ಬೇಗೆಯ ಹೊತ್ತಿಗೆ, ಸುಳ್ಳೇ ಆದರೂ 'ಸಾಕು ಸಾಕೆಂಬ' ನಿನ್ನ ಬಿಗುಮಾನದ ಮಾತಿಗಿಂತ ಅರಸಿಕ ಉರಿ ಸುಂಗು ಬೇರೊಂದಿಲ್ಲವೇ - ಕಮ್ಮಗೆ ಸುತ್ತ ಸುಳಿದು, ಸುಮ್ಮನೇ ಮುಂಗುರುಳ ಕಿವಿಗೆ ಮುಡ್ಕೊಂಡು, ಅಯಾಚಿತದಲಿ ಸೆರಗ ಸರಿ ಮಾಡ್ಕೊಂಡು, ನಿನ್ನನೇ ನೀ ಕಣ್ಣಲೇ ತೀಡಿಕೊಂಡು ಒಳಗೊಳಗೇ ನಕ್ಕು ನನ್ನ ಕೆಣಕುವ ನಿನ್ನ ಅಣಕೂ, ನಿನ್ನ ಒದ್ದೆ ಕೊರಳಿಂದ ಜಾರುತಿದ್ದ ಒಂಟಿ ಹನಿಯಲಿ 'ಕಾಮನ' ಬಿಲ್ಲು ಮು(ಡಿ)ರಿದ ಹಳೇಯದೊಂದು ನೆನಪೂ ಮೈತುಂಬಾ ಬಿಸಿ ಉಸಿರ ಹರಿದಾಟದ ಪುಳಕ ತುಂಬುವಾಗ...
___ ಮಾಗಿಯಲಿ ರಸಿಕ ತೋಳ ಬೆತ್ತಲೆಯ ಕೊರೆದ ಪ್ರಣಯೀ ದಂತಚಿತ್ರದ ಗಾಯಗಳು ಮಾಯಗೊಡಬಾರದು...
&&&

ಹೇ!! ಮೋಹಾರಾಗ ಮಂಜರೀ -
ಎದೆಯ ಕಮರಿಯಲೊಂಚೂರು ತಾವು
ತೋಳ ಬಿರುಸಿನಲಿಷ್ಟು ಕಾವು
ನಡುವ ಮಿಡಿತಗಳಿಗಿಷ್ಟು ಮೇವು
ಕಸರಿಲ್ಲದೇ ಕೊಸರಾಡದೇ ಕೊಟ್ಟುಬಿಡು
ಈ ಛಳಿಯ ಕಾಲವ ಬೆಚ್ಚಗೆ ದಾಟಿಕೊಳ್ಳುತ್ತೇನೆ...
___ ಪ್ರಣಯವಿಲ್ಲದೇ ಮಾಗಿಯಲಿ ರಸಿಕನಿಗೆ ಶಾಪ ವಿಮೋಚನೆಯಿಲ್ಲ...
&&&

ಅನಿರೀಕ್ಷಿತಗಳ ನಿರೀಕ್ಷೆಯ ನಿನ್ನ ಮೋಹಾ ಮೋದದ ಕನಸುಗಳು ಎನ್ನ ಛಳಿ ಇರುಳ ಸಖಿಯಾಗಿ ತಬ್ಬುತ್ತದೆ;
ಮತ್ತು
ನಾನು ಮಾಗಿಯ ಯೆದೆ ನೋವನ್ನು ಮಜವಾಗಿ ದಾಟಿದ ಹುಕಿಯಲ್ಲಿ ಸುಖವಾಗಿ (ಕೆ)ನರಳುತ್ತೇನೆ...
ಭಾವದಲಿ ಬೇಲಿಗಳ ಮುರಿದು ಮೈಛಳಿಯ ಬಿಟ್ಟ ಕನಸಲ್ಲಿ ನಾ ರಾಣಿ ಜೇನ ಎದೆ ಗೊಂಚಲನಾಳಿ(ಡಿ)ದ ಅಂತಃಪುರದ ಆಳಾಗುತ್ತೇನೆ;
ಹಾಗೇ
ಬೆವೆತ ನನ್ನುಸಿರಲ್ಲಿ ನಿನ್ನ ಕಂಕುಳಲಿ ಸಿಡಿದ ಆಸೆ ಸ್ವೇದ ಗಂಧದ ಸೆಳಕೊಂದು ಸುಳಿದಂತಾಗಿ ಮತ್ತೆ ಮತ್ತೆ ಕಮ್ಮಗೆ ಕನಲುತ್ತೇನೆ...
___ ಯಾವ ಜನುಮದ(ಕೆ) ಗುರುತೋ...

ಬಟ್ಟೆಯ ಬಡಿವಾರದಲಿ ಕಣ್ಣು ಮಿಂಚುವ ಅವಳ ಪ್ರಸಾದನ ಸೌಂದರ್ಯದ್ದೊಂದು ತೂಕವಾದರೆ,
ಇವಳ ಚೆಲುವಾದ ಬೆತ್ತಲೆಯು ಮೈಮನಕೆ ಬಡಿಸುವ ಅಸೀಮ ಆನಂದಾಲಂಕಾರದ್ದೇ ಇನ್ನೊಂದು ತೂಕ...
___ ಕತ್ತಲಿಲ್ಲದ ಮನಸಿನ ಬೆತ್ತಲೆ ಮೈಯ್ಯಲ್ಲಿ ಈಜಿ (ತ)ದಣಿಯುವುದು ಶಬ್ದಕೆ ನಿಲುಕದ ಕಾವ್ಯಾಲಂಕಾರ...
&&&

ಕೇಳೇ -
ರಣ ಅಮಾಸೆ, ಮತ್ತದರ ಹಿಂಚು ಮುಂಚಿನ ರಾತ್ರಿಗಳಲೂ ಕೂಡಾ ಬೆಳ್ದಿಂಗಳ ಕುಡಿದು, ಬೆವರ ಮೀಯುವ ಆಸೆ ವಿಪರೀತ - ಒದಗಿ ಬರ್ತೀಯಾ ಅಲ್ವಾ ಸಹಚಾರಿಯಾಗಿ...?
ಇರುಳ ಬಳಸಿ ಬರೆವ ಶೃಂಗಾರಾಲಂಕಾರ ಸಂಹಿತೆಗೆ...!!
ಈ ಚರ್ಚರೀ ಛಳಿಯ ಮಡುವಲ್ಲಿ ಉರಿದುರಿದು ಮಿಡಿಯಲಿ ನಡು ನಾಡಿ ಯುಗಳ ಗೀತ...
___ ಪರಮ ಪೋಲಿಯ ಅಂತಃಪುರದ ಪಿಸುಮಾತು... 

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :) 

ಗೊಂಚಲು - ನಾಕ್ನೂರೆಂಬತ್ತಾ ಎರಡು.....

ಎದ್ದೇಳು - ಬೆಳ್ಗಾತು.....

ಕಣ್ಣ ಕಾವಳದಲಿ ಸೂರ್ಯನುದಯಿಸುವ ಹೊತ್ತು...
ಬೆಳಗಾಯಿತು - ಬೆಳಕ ಬಳ್ಳಿ ಕಣ್ಣ ಚಪ್ಪರದಿಂದ ಯೆದೆಗೂಡಿನ ಮಾಡಿಗೆ ಹಬ್ಬಲಿ...
ಶುಭದಿನ... 💞🤝

ಬೆಳಗು ಕಣ್ಣಿಂದ ಮಾತಾಗುವಾಗ ಯೆದೆ ತೆರೆದು ಕೇಳು ಕಂದಾಽಽ - ನಿಸರ್ಗದ ನಿರ್ವ್ಯಾಜ ಅಕಳಂಕ ಪ್ರೀತಿ ಬೆಳಕು ಕರುಳ ತೊಳೆದೀತು...
ಶುಭವಾಗುವುದೆಂದರೆ ಯೆದೆಯ ದುರ್ಬೀನಿನಿಂದ ಯೆಲ್ಲೆಡೆಯೂ ಶುಭವನೇ ಕಾಣುವುದು...
ಶುಭದಿನ... 🤝🫂

ಶುಭ ನುಡಿಯೆ
ಬೆಳಕೆಂಬೋ ಶಕುನದ ಹಕ್ಕಿ
ಯೆದೆಯಂಗಳದಿ ಅರಳದೇ
ನಗೆ ಮುಗುಳ ಚಿತ್ತಾರ ಚುಕ್ಕಿ...
ಕೊರಳ‌ ಬಳಸುವ ಪ್ರೀತಿ ಹೂವಿನ ಘಮ - ಬೆಳಗು...
ಶುಭದಿನ... 🤝🫂

ಮನದ ಮೋಹದ ತಾಪದಲಿ ಮುಸುಕಿನೊಳಗೆ ಮೈಯ್ಯಿ ಮೈಯ್ಯ ಕಡೆದು ಉಸಿರ ಅಗ್ಗಿಷ್ಟಿಕೆ ಹಚ್ಚಿ ಮೂರೂ ಲೋಕವ ಮರೆಯದೇ ಈ ಮಾಗಿಯ ಬಾಗಿಲ ದಾಟುವುದಾಗದು ಅನ್ನಿಸುವ ಹೇಮಂತದ ಮುಂಜಾವು...
ತಂಗಾಳಿಯೆಡೆಗೆ ಹುಸಿ ಕೋಪ ತೋರಿ ಹಸಿ ಬಿಸಿ ಕನಸು, ನೆನಪು, ವಿರಹ, ಪ್ರೇಮಗಳ ತಬ್ಬುವ ಪಡ್ಡೆ ಪ್ರಣಯೀ ಬೆಳಗು...
ಶುಭದಿನ... 🤝🫂

ಪ್ರೇಮ ಕಲಹದ ಕತ್ತಲನು ಪ್ರಣಯ ದೊಂದಿಯಲಿ ಕರಗಿಸಿ ಮಾಗಿ ಛಳಿಯನು ಸಲೀಸು ಗೆದ್ದು,
ಹೊದ್ದು ಮಲಗಿದ ನಿನ್ನನು ಬದಿ ಸರಿಸಿ ಹಗಲಾಯಿತೆಂದು ಎದ್ದು ಬರುವುದು ಬಲು ಸಾಹಸವೇ ಜೀವವೇ...
ಇದು -
ಮಾರ ತಾ ಒಂಟಿ ಪಡ್ಡೆಗಳ ಕೆಣಕಿ ಕುಹಕದಿ ನಗುವ ಥಂಡಿ ಥಂಡಿ ಕಾಲದ ಬೆಳಗು...
ಕೇಳು -
ನಿನಗೆ ನಾನು ನನಗೆ ನೀನು ಛಳಿಯ ಕಾಲದ ಮಲೆಕಾನ ಜೇನು...
ಶುಭದಿನ... 🤝🫂

ಬೆಳಗು ಧರೆಗಿಳಿದಂತೆ
ಬೆಳಕು ಎದೆಗಿಳಿಯಲಿ...
ತೆನೆಗಟ್ಟಲಿ ನಗೆಯು ಕಣ್ಣಲಿ
ಕೆನೆಗಟ್ಟಲಿ ಪ್ರೀತಿ ಯೆದೆಯಲಿ...
ಶುಭದಿನ... 🫂🤝

ಶುಭ ಸುರಿಯೇ ಬೆಳಕಿನ ಕಿಡಿಯೇ
ಬೆಳಗು ಉತ್ಥಾನವ ಸಾರಲಿ...
ಪ್ರೀತಿಯ ತಾಯ್ಬೇರು ಎದೆಗಿಳಿಯಲಿ...
ನಗೆಯ ಬಣ್ಣ ಬೆಡಗಿಗೆ ಕಣ್ಣರಳಲಿ...
ಶುಭದಿನ... 🫂🤝

ಪ್ರೀತಿ ಹೆಗಲನಾತು ಬೆಳಕಿಗಭಿಮುಖವಾಗಿ ನಗೆಯ ನೂರು ನೂರಾರು ತೀರಗಳನೆಲ್ಲ ಮೆಲ್ಲ ಅಲೆವ ಹಂಬಲದ ಸವಿ ಹಗಲು...
ನೀನೆಂಬ ಶುಭದ (ಬಿ)ಹಸಿ ಕನಸನುಣಿಸುವ ಛಳಿ ಛಳಿಯ ಮುಂಜಾವು...
ಶುಭದಿನ... 🫂🤝

ಬೆಳಕು ಬಾಗಿಲಿಗೆ ಬಂದಾಗ ಮತ್ತೇಂತಾ ಶುಭವ ಹುಡುಕುವುದು...
ಬೆಳಕೇ ಸ್ವತಃ ಅಸೀಮ ಶುಭವಹುದು...
ಬೆಳಕೊಂದು ನಗೆಯ ಹಾಯಿ - ಬೆಳಗಿಗೊಂದು ನಗೆಯ ಹಾಯ್...
ಶುಭದಿನ... 🤝🫂

ಹುಡುಕಿ ಹೊರಟ ಪ್ರೀತಿ ಪಡಿ ಬಾಗಿಲಿಗೇ ಬಂದಂತೆ ಬೆಳಕಿಳಿದು ಬರುವುದು - ಹಂಗೆ ಬೆಳಗಾಗುವುದು...
ನಗೆಯ ಮುಡಿ ಕೊಟ್ಟು ಬೆಳಕ ಯೆದೆಗೆ ಬರಮಾಡಿಕೊಳ್ಳುವುದು - ಅಂದ್ರೆ ಪ್ರೀತಿಗೆ ಪ್ರೀತಿಯನೇ ಕೊಟ್ಟು ಎದೆ ತುಂಬಿಕೊಳ್ಳುವುದು...
ಶುಭದಿನ... 🫂🤝

ಬೆಳಗನು ಕುರಿತು ನಾ ದಿನಾ ಬರೆವ ಸಾಲುಗಳಲಿ ಬೆಳಕನು ಹುಡುಕಲು ಹೋಗಿ ಹೀನಾಮಾನ ಸೋಲುತ್ತೇನೆ...
ಮತ್ತೆ
ನನ್ನೆಲ್ಲಾ ಬಡಬಡಿಕೆಗಳ ಕೆನ್ನೆ ಹಿಂಡಿ ನೀ ಬೀರುವ ಕಕ್ಕುಲಾತಿಯ ನಗುವಲ್ಲಿ ಆಹಾ! ಬೆಳಕು ಸಿಕ್ಕಿತೆಂದು ಬೀಗುತ್ತೇನೆ...
ಹಾಗೇ
ಬೆಳಗೆಂದರೂ, ಬೆಳಕೆಂದರೂ ನಗುವಲ್ಲದೇ ಮತ್ತಿನ್ನೇನೆಂದು ಯಾರೂ ಕೇಳದ ಪ್ರಶ್ನೆಗೆ ನಾನೇ ಉತ್ತರಿಸಿ ಬೆನ್ತಟ್ಟಿಕೊಳ್ತೇನೆ...
ನಿನ್ನ ನಗು - ನನ್ನ ಬೀಗು - ಚಂದ ಬೆಳಗು...
ಶುಭದಿನ... 🫂🤝

ಕಂದಾ -
ಬೆಳಕು, ಬೆಳಗಾಯಿತೇಳೂ ಅನ್ನುತ್ತಾ ಸುಮ್ನೆ ಒಳಬರುತ್ತೆ ಅಷ್ಟೇ...
ಹಾಗೆ ತೆರೆದಿಟ್ಟ (ಯೆದೆ) ಕಿಟ್ಕೀ, ಬಾಗ್ಲೂ, ಸಂದಿಗೊಂದಿಯಿಂದೆಲ್ಲ ಒಳತೂರಿ ಬರೋ ಬೆಳಕಿನ ಹೆಗಲ ಬಳಸಿ ನಾವು ಹೊರಗಡಿಯಿಟ್ಟು ನಮ್ನಮ್ಮ ಹಂಬಲದ ಶುಭವನು ನಾವ್ನಾವೇ ಗೆದ್ದು ತಂದು ಪಳಗಿಸಿಟ್ಕೋಬೇಕು...
ಬೆಳಗೆದ್ದು ಬೆಳಕೆಂಬ ಮುಫತ್ತು ಶುಭದ ಹೆಗಲೇರಿ ಉಳ್ಕಿ ಎಲ್ಲಾ ತುಟ್ಟೀ ಶುಭಗಳ ಕಾಣ್ಬೇಕು...
ಎದ್ದೇಳು - ಬೆಳ್ಗಾತು...
ಶುಭದಿನ... 🤝🫂

ಜಗದ ಜೀವ ಜಾಲಕೆಲ್ಲ ಮುಫತ್ತಾಗಿ ಪ್ರೀತಿ ಹಂಚೋ ಕಾರುಣ್ಯದ ಜಾಡು - ಬೆಳಗು...
ಅದೇ ಬೆಳಕನು ಕುಡಿದು ಬೆಳೆದ ಶಿಶುವೇ ಆದರೂ, ಕೊಟ್ಟು ಕೊಟ್ಟು ಸೋತೆನೆಂದು ಬೀಗುವ, ಇಷ್ಟು ಕೊಟ್ಟು ಅಷ್ಟು ಬೇಕೆನ್ನುವ ಕಟ್ಟುನಿಟ್ಟು ಲೆಕ್ಕಾಚಾರದ ಭಂಡ ವ್ಯಾಪಾರ ನನ್ನ ಹಾಡು...
ಕಲಿಸೋಕೆ ನಿಂತದ್ದು ದೇವರೇ ಆದರೂ ಕಲಿಯುವುದು 'ನಾನೇ' ಆದಾಗ ಕಲಿಕೆ ಸುಲಭವಲ್ಲ - ಅಲ್ಲಿಗೆ, ಹೂಗಿಡವ ನೆಟ್ಟೆಯಾದರೂ ನೀ ಹೂವಾಗಲಾರೆ ಎಂದ ಬೆಳಕು...
ಸುಳ್ಳೇ ಹಠವ ಬಿಟ್ಟು ಬಾಳೆನ್ನುವ ಪ್ರೀತಿ ಪಾಠ ಬೆಳಗು...
ಶುಭದಿನ... 🤝🫂

2026 -
ಪುಟ ತಿರುವಿಕೊಂಡ ದಿನದರ್ಶಿಕೆ ನಿನ್ನೆಗಳ ಅಶುಭದ ಕಿಡಿಗಳನೆಲ್ಲ ಅಲ್ಲಿಯೇ ಕೊಡವಿಕೊಂಡು, ಹೊಸತೇ ಶುಭದ ಮುಹೂರ್ತಗಳನಷ್ಟೇ ಮೈದುಂಬಿಕೊಂಡು ನಗಲಿ...
ಶುಭ 'ವರ್ಷ'ವಾಗಲಿ...
ಮುದವಾಗಿ ನಕ್ಕುಬಿಡಿ - ಹದವಾಗಿ ಹರವಿಕೊಂಡ ಬೆಳಕ ನಗೆಯ ಮುನ್ನುಡಿಯಾಗಲೀ ಮೊದಲ ಹಗಲು...
ಶುಭದಿನ - ಶುಭಾಶಯ... 🤝🫂

ಹಂಚಿಕೊಂಡು ಪ್ರೀತಿ ಹುಗ್ಗಿ
ಸುತ್ತೆಲ್ಲ ನಗೆಯ ಸುಗ್ಗಿ...
ಯೆದೆಯ ಕುಂಭದಿ ತುಂಬಿ ಬೆಳಕು
ಸಗ್ಗ ಸಂಪದ ಸಂಕ್ರಾಂತಿ...
ಆಗಲಾಗಲಿ ಪ್ರೀತಿ ನಗೆಯ ಪರ್ವಕಾಲ
ಎಳ್ಳು ಬೆಲ್ಲದ ರುಚಿಯ ಬೆಳಗು...
ಶುಭದಿನ - ಶುಭಾಶಯ... 🍬🍫

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :) 

ಗೊಂಚಲು - ನಾಕ್ನೂರೆಂಬತ್ತಾ ಒಂದು.....

ಸಾವಿತ್ರೀಽಽಽ........
ಇಂದಿನದು ನಿನ್ನ ಹುಟ್ಟಿನ ತೇದಿಯಂತೆ - ಹುಟ್ಟಾಗಿ, ಬದುಕಾಗಿ, ಸಾವಾಗಿ ನಿನ್ನ ಘನತೆಯ ನೆನಪಷ್ಟೇ ಈಗ ನನ್ನ ಗಳಿಕೆ, ಉಳಿಕೆ... 

ಶಣ್ಣಿ -
ನನ್ನ ಜ್ವರದ ರಾತ್ರಿಗಳಲಿ ಘಳಿಗೆಗೊಮ್ಮೆ ಎದ್ದು ಜಗ್ಳಿಗೆ ಬಂದು ನಿದ್ದೆ ಹೋಗಿದಾನಾ ಇಲ್ವಾ ಅಂತ ಇಣುಕಿ ನೋಡಿ ಹೊದಿಕೆ ಸರಿಮಾಡಿ ಸಮಾಧಾನಗೊಳ್ಳುತಿದ್ದ ಪಾಪದ ಹುಡ್ಗಿ; ಈಗ ತಾಸಿಗೊಮ್ಮೆ ನಾನೆದ್ದು ಗೊಣಗುತಿದ್ದರೂ ಕೇಳದವಳ ಹಂಗೆ ಗೋಡೆ ಮೇಲೆ ಚಿತ್ತಾರದ ಚಿತ್ರವಾಗಿ ನಗ್ತಿದಾಳೆ...
ಪಾಪ ನಾನು - 
ಎಷ್ಟು ಜನುಮದ ಪಾಪ ಬಾಕಿ ಇದ್ಯೋ ತೊಳೀಲಿಕ್ಕೆ; ಅವಳೂ ತೊರೆದು, ಜವನೂ ಮರ್ತು ಮತ್ತೂ ಬದುಕು ಸವೆಸಲಿಕ್ಕೆ...
ಸಾವಿತ್ರೀ -
ಮನಸು ಸೋತು ಶೀತಲವಾದಾಗಲೆಲ್ಲಾ ನಿನ್ನ ನೆನಪಿನ ಕಾವು ಹೆಚ್ಚು ನೋಡು...
ಮೊನ್ನೆ ಯಾವತ್ತೋ ನೀ ಮಣ್ಣಾದ ಜಾಗಕ್ಕೆ ಹೋಗಿದ್ದೆ ಕಣೇ - ನಿನ್ನ ಗುರುತಾಗಿ ನೆಟ್ಟ ಕಲ್ಲು ಹಂಗೇ ಇದೆ...
ಹೇಳೇ - 
ಸಾವಾಗುವುದೆಂದರೆ ಇಲ್ಲಿನೆಲ್ಲಕೂ ಕಲ್ಲಾಗುವುದಾ...!!! 
ಆದ್ರೂ -
ನಿನ್ನ ಧ್ಯಾಸ ಕಾಯುವಾಗ ನನ್ನ ಜೀವ, ಭಾವ ಕಲ್ಲಾಗುವುದು ಹೇಗೇ... 
___ ನೀ ಪ್ರಾರ್ಥಿಸಿದಂಗೇ ಇರಲಿ ನನ್ನ ಬದುಕು... 
&&&

ಪ್ರೀತಿಯೊಂದನೇ ಬಾಳಿ ಬದುಕಿದ ಮಡಿಲು ನೀನು... 
ಪ್ರೀತಿಯನ್ನೂ ಪ್ರೀತಿಯಿಂದ ಹೇಳಲು ಬಾರದ ಹೆಡ್ಡ ನಾನು... 
ಮೌನದಲೇ ಮನದ ನೂರು ಕಂಗಾಲುಗಳ ನುಂಗಿ ಮಂದಹಾಸವ ಜೀವಿಸಿದಾಕೆ ನೀನು...
ಸಾಮಾನ್ಯ ಮೌನವನೂ ಭರಿಸಲಾಗದೇ ಭಂಡಬಿದ್ದು ಬಡಬಡಾಯಿಸುವ ಖಾಲಿಪೀಲಿ ಬಡಾಯಿ ನಾನು...
ನನ್ನ ಐಬುಗಳನು ಜಗದ ಕಣ್ತಪ್ಪಿಸಿ ಮಡಿಲಲ್ಲಿ ಮಡಚಿಟ್ಟು ಕಾಳಜಿಯಿಂದ ಸರಿದೂಗಿಸಲು ನೀನೂ ಇಲ್ಲದ ಈ ಹೊತ್ತನು ಸಲೀಸು ಹಾಯುವುದು ಹೇಗೆ ಹೇಳು... 
ನಿನ್ನ ಹರಿದ ಹಳೆ ಸೀರೆಗಳನು ಹಾಸಿ ಹೊದ್ದು ಮಲಗಿ ನಿದ್ದೆಗೆ ಮಡಿಲ ಕಂಪನುಣಿಸಬಹುದಷ್ಟೇ - ಆದ್ರೆ, ಕಾಣೋ ಕನಸಿಗೆ ಒಡಲ ಭದ್ರತೆಯ ಕರುಳ ಕಾರುಣ್ಯದ ಸೂತ್ರವನೆಲ್ಲಿಂದ ತರಲೇ...
ಭಟ್ರಿಗೆ ಆಟಿಕೆಯ ದೋಣಿಯನು ದಾನ ಕೊಟ್ಟು ನಿನ್ನನು ವೈತರಣಿಯ ದಾಟಿಸಿದೆ ಅಂದುಕೊಂಡು ನನ್ನ ಬದುಕಿನ ಹುಟ್ಟನು ಕಳಕೊಂಡ ಕರ್ಮ ನನ್ನದು...
____ ಈ ಬಯಲ ಬಿಸಿಲಿಗೆ ನಿನ್ನ ನೆನಪ ನೆರಳಷ್ಟೇ ಸಾಲುತಿಲ್ಲ ಕಣೇ... 
&&&

ನೀನಿಲ್ಲಾ ಅನ್ನೋ ನೋವೂ ಖಾಲಿಯಾಗಿಬಿಟ್ಟರೇ ಎಂಬ ಭಯದಲ್ಲೇ ನಿನ್ನ ನೆನೆಯುತ್ತೇನೆ - ನೀನಿಲ್ಲದ ಈ ಹಾದಿಯ ಧೂಳಲ್ಲಿ ಹೂತಿರುವ ಹಕ್ಕಳೆದ್ದ ನಗುವನ್ನು ಹೆಕ್ಕುವಾಗ... 
___ ಭಂಡ ತುಂಡು ಬದುಕಿಗಾಗಿ... 
&&&

ತುಂಬಾ ನೋವಿನಲ್ಲಿದ್ದೆ - ನಗುವನ್ನು ಬೆಳೆದುಕೊಳ್ಳದೇ ಬದುಕನ್ನು ಕೊಂದುಕೊಂಡರೆ ದೇವರು ಮೆಚ್ತಾನಾ, ಎದ್ದು ಕಣ್ಣು ತೊಳಕೊಂಡು ಮುಂದಿಂದೇನೋ ನೋಡು ಹೋಗು ಅಂದ್ಳು ತಲೆ ಸವರಿ... 
ಸಾವಿನ ಮನೇಲೂ ನಗ್ತಾ ಕೂತಿದ್ದೆ - ಅಳುವನ್ನು ಮರೆತು ಕಲ್ಲಾಗ್ಬೇಡ್ವೋ, ದೇವ ಮೂರುತಿಯೂ ಬರೀ ಶಿಲೆಯಷ್ಟೇ ಅನ್ನಿಸಿದರೆ ಹಳಿಯಲೊಂದು ನಾಮವೂ ಇಲ್ಲದಂತಾಗಿ ನಾಳೆಗೆ ನಗು ಅನಾಥವೆನಿಸಿ ಮನ್ಸಿಗೆ ಭಾಳಾ ಸುಸ್ತಾಗುತ್ತೆ ಕಣೋ ಅಂತಾಳೆ ಹೆಗಲು ತಬ್ಬಿ... 
____ ಅಳುವ ಅಳಿಸಲು ನಗಬೇಕು - ನಗುವ ಉಳಿಸಲೊಮ್ಮೆ ಅಳಬೇಕು... 
&&&

ಬದುಕು ಎದುರಿಗಿಡುವ ನೂರು ನೋವುಗಳಿಗೂ ಹುಡುಕಿದರೆ ತುಸು ದೂರದಲ್ಲಾದರೂ ಒಂದಿಲ್ಲೊಂದು ನಿವಾರಕ ಮದ್ದಿದೆ ಅಥವಾ ಮರೆಸುವ ನಶೆಯಿದೆ; ಹಲ್ಮೊಟ್ಟೆ ಕಚ್ಚಿ ಸಾವರಿಸಿಕೊಂಡು ಎದ್ದು ನಿಂತರೆ ಮಗ್ಗುಲಲ್ಲೆಲ್ಲೋ ಒಂದು ನಗೆಯ ಜಾಡಿದೆ - ಕಾರಣ, ಹಂಗೋ ಹಿಂಗೋ ಬದುಕಿನೊಂದಿಗೆ ಅಲ್ಲೊಂದು ತಂತು ಕಡಿಯದ ಒಡನಾಟವಿದೆ... 
ಆದರೆ, 
ಕರುಳಿಗೆ ಹತ್ತಿರದ ಸಾವು ತಂದಿಡುವ ಸ್ಥಬ್ದತೆಗೆ, ಅದು ಮುಂದಿಡುವ ನಿರ್ವಾತಕ್ಕೆ, ಅರ್ಥವೇ ಆಗದ ಅಥವಾ ಅರ್ಥವೇ ಇಲ್ಲದ ಅಪರಾಧೀ ಭಾವವೊಂದು ಕಾಲವೂ ಕಾಡಿ ಹಿಂಡುವ ಹತಾಶೆಯನು ನಿವಾಳಿಸುವ ಯಾವ ಕಷಾಯವೂ ಇಲ್ಲ, ಕಾಷಾಯದಲೂ ಅದಕೆ ಉತ್ತರವಿಲ್ಲ; ಏನೇ ಸುಳ್ಳು ಸಮಾಧಾನಗಳ ಹೆಣೆದರೂ ಕರುಳ ಉರಿ ಪೂರಾ ಆರುವುದೇ ಇಲ್ಲ - ಕಾರಣ, ಸಾವಿನೊಂದಿಗೆ ಸಾಂಗತ್ಯದ ಸಂವಹನವೂ ಸ್ವರ್ಗಸ್ಥವೇ... 
____ ಕರುಳ ಕೋಶಕ್ಕಂಟಿದ ಚಿತಾ ಭಸ್ಮವ ಕಣ್ಣ ಹನಿಯ ಹೊಳೆಯೂ ತೊಳೆದೊಯ್ಯುವುದಿಲ್ಲ... 
&&&

ನನ್ನಲ್ಲಿ
ಕಳಚಿ ಹೋದ ಅವಳ ಮಮತೆಯ ನೆನಪೂ ಸತ್ಯ 
ಕೂಡಿಯಾಡೀತೆಂಬ ಇವಳ ಮೋಹದ ಕನಸೂ ನಿತ್ಯ 
ಎರಡೂ
ಎನ್ನ ಉಸಿರ ದೀಪವ ಜೀವಂತವಿಟ್ಟ ಈ ಬದುಕಿನ ಕಾರುಣ್ಯದ ಬೊಗಸೆಗಳು... 
ಹಾಗೆಂದೇ 
ನಾ ನೆನಕೆಗಳ ಬೆನ್ನಿಗಾತುಕೊಂಡು ಕನಸುಗಳ ತಬ್ಬಿ ಸುಖಿಸುತಿದ್ದರೆ
ಇಳಿವ ಕಣ್ಣ ಹನಿಯು 
ಯೆದೆಯೊಡೆದ ಗಾಯದ ಹೈಣವಾ ಅಥವಾ ಯೆದೆಗೆದೆ ತೀಡಿ ಮೆರೆದ ಬೆಮರಿನ ಲಾಸ್ಯವಾ ಯೆಂದೆನ್ನ ಕೇಳಬೇಡಿ...
ಇಲ್ಕೇಳೀ -
ನೆನಹು ಕಾಡದ, ಸ್ವಪ್ನ ಕೂಡದ ದಿನವೊಂದಿದ್ದರೆ
ಆ ಕೊನೇಯ ಶುಭ ದಿನ
ನಾ
ಅವಳೊಡಲ ಮತ್ತೆ ಸೇರಿದೆನೆಂದು ಬಗೆಯಿರಿ... 
ಮತ್ತು 
ಶ್ರದ್ಧಾಂಜಲಿಯ ಮೌನದಲಿ ನನ್ನ ಹೆಸರಿನ ನಗುವೊಂದ ಮೆತ್ತಿಕೊಳ್ಳಿ...

ಮತ್ತೇನಿಲ್ಲ 
ಜಗದ ಹುಚ್ಚುಗಳೆಲ್ಲಾ ತುಸು ಹೆಚ್ಚೇ ನನ್ನಲ್ಲಿ... 
ಅವಳ ದೇವರ ಹುಚ್ಚುಗಳಿಗೆ ಸಾಲು ಸಾಲು ಸವಾಲು 'ನಾನು...' 
&&&

ಕಳೆಕಳೆಯಾದ ಅವಳ ನಗುವಿತ್ತು
ಮತ್ತಾಗ
ಬಡವನ ಮನೆಗೂ ಜೀವವಿತ್ತು... 
ಸೂತಕದ ಕಳೆಯೀಗ ದೇವರ ಪೀಠಕೂ
ಮತ್ತವಳ
ಮಡಿಲ ಕಳಕೊಂಡ ಬಾಗಿಲ ಬೀಗಕೂ... 
"ಹತ್ತಾರು ಪ್ರಸಾದನಗಳಿಂದಲ್ಲ ಮನೆ ಚಂದವೆನಿಸುತಿದ್ದದ್ದು - ಒಳಹೊರಗಾಡುವ ಅವಳ ಪ್ರೀತಿ ಸರಬರವೇ ಮನೆಯನು ಚಂದವಿಟ್ಟದ್ದು; ಅವಳ ಮಮತೆಯೇ ಮನೆಗೆ ನೂರು ಸಿರಿ ಸಿಂಗಾರ ಅಲಂಕಾರ ಕೊಟ್ಟದ್ದು" ಎಂಬುದೆನಗೆ ತಿಳಿಯಲು ಅವಳು ಮಸಣವ ಮನೆ ಮಾಡಿಕೊಳ್ಳಬೇಕಾಯಿತು... 
ಈಗ
ಕಳೆಸತ್ತ ಅಂಗಳದಲಿ ಕಣ್ಮುಚ್ಚಿ ನಿಂತ ಎನಗೆ ಖಾಲಿ ಕೊಟ್ಟಿಗೆಯಲಿ ಅವಳು ಕರುವಿನೊಂದಿಗೆ ಗೊಣಗಿದಂಗೆ ಕೇಳಿಸಿದರೆ ನಾನಿನ್ನೂ ಜೀವಂತ... 
____ ಸಾವಿತ್ರೀಽಽಽ........ 

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :) 

ಗೊಂಚಲು - ನಾಕ್ನೂರೆಂಬತ್ತು.....

ಸುಡುಗಾಡಿನ ಬೆಂಕಿ ಉರಿಯ ಬೆಳಕು ನನ್ನ ಮಾತು.....

ಬುರುಡೆ ತುಂಬಾ ತುಂಬಿಕೊಂಡ ಬುಡುಬುಡುಕೆಗಳೆಲ್ಲ ಖಾಲಿಯಾಗಲೆಂದು ಬರೆಯುತ್ತಾ ಹೋದೆ - ಕಳೆಕಳೆಯಾಗಿ ಎನ್ನೆದೆಯ ಕಣಜವ ತುಂಬಿಕೊಂಡ ನಸುನಗುವಿನ ರಾಶಿಯೆದುರು ಎನಗೇ ತುಂಬು ಬೆರಗು ಈಗ...
ನಿನ್ನೊಳಗೆ ನೀನು ಬೆಳಗುವಾಗಲೆಲ್ಲ ಮಗುವಾಗುತೀಯ ಅಂದಿದ್ದಳು ಆಯಿ - ಹಂಚುತ್ತಾ ಮಗುವಂಗೆ ನಗೆಬೆಲ್ಲ...
ನನ್ನೆದುರು ನಾನೇ ನಗುತ್ತ ನಿಂತದ್ದು ಕನಸಲ್ಲವಲ್ಲ...!!
ಬೆರಳ ಹಿಡಿದು ನಡೆದು ಬಂದ ಪ್ರೀತಿ ಗಂಧ... 
ಉಸಿರಿಗಂಟಿದ ನೆರಳ ಹಾಡು...
___ ಪ್ರೀತಿಯ ನೆನಪುಗಳ ಸೃಷ್ಟಿಸಿಕೊಳ್ಳಬೇಕು ಪ್ರೀತಿಯಿಂದ... 

ನಿನ್ನೆ ಮೊನ್ನೆಯಷ್ಟೇ ಹದಿನಾಕು ತುಂಬಿತು ಇಲ್ಲಿನೀ ಅಕ್ಷರ ಸಾಂಗತ್ಯಕ್ಕೆ - ಪಾವನ ಪಯಣಕ್ಕೆ... 
ತೇದಿ 25 ಜನವರಿ 2026ಕ್ಕೆ... 

ನನ್ನಲ್ಲಿ ಹೊಸತಾಗಿ ಬರೆಯಲು ಏನೂ ತೋಚದೇ ಇರುವಷ್ಟು ಬುದ್ಧಿ ಬರಡಾದಾಗಲೂ, ಹಳೆಯ ಪಾಡನ್ನೇ ಹೊಸ ರೂಪರಾಗದಲಿ ನೆನೆನೆನೆದು ಹಾಡಿ, ಹೊಸತೇ ಆಗಿ ನಗುವಾಗಿ ಬೆರೆತು, ಯೀ ಯೆದೆಯ ಭಾವಾಭಿಮಾನ/ಭಾವಾತಿರೇಕಗಳಿಗೆ ಜೊತೆಯಾದ ಅಕ್ಷರ ಪ್ರೀತಿಯ ತಂತುಗಳಿಗೆಲ್ಲ ನನ್ನ ಪ್ರೀತಿ ಪ್ರೀತಿ ಪ್ರೀತಿ... 💞🤝🫂
&&&

ವತ್ಸಾ -
ನಿನ್ನ ನೀನು ಕಳೆದುಕೊಂಡು ಕಂಗಾಲಾದಾಗ 'ಅಯ್ಯೋ ಮಂಗಾ ಇಲ್ಲೇ ಇದೀಯೋ' ಅಂತಂದು ತೋಳು ತಿವಿದು ತಬ್ಬಿ ಯೆದೆ ಬಡಿತದ ಮಿಡಿತಗಳ ದಾಟಿಸಿ ಜೀವದುಂಬಿ ನಗಲು/ನಗಿಸಲು ಒಂದೇ ಒಂದು ಬೆಚ್ಚಾನೆ ಹೆಗಲಿದ್ದರೂ ನಿನ್ನೀ ಬದುಕಿಗೆ ಜೊತೆಯಾದಂತೇ ಲೆಕ್ಕ ನೂರು ಸಿರಿ ಸಂಪದ...
___ ನೇಹ ನಾಲೆ...
&&&

ನಿತ್ಯವೂ -
ನಗು ಕನಸಾಗಿ ಯೆದೆಯ ಕಾಡುತ್ತದೆ... 
(ಸಾ)ನೋವು ನೆನಪಾಗಿ ಕರುಳ ಕದಡುತ್ತದೆ... 
___ ಕಣ್ಣ ಹನಿಯ ಹಾಡುವಾಗ ಭಾಷೆ ಬಡವಾಗುತ್ತದೆ... 

ಕೇಳಿಲ್ಲಿ -
ನಗುವಾಗ ನೂರು ಅಲಂಕಾರಗಳ ಹೆಣೆಯುವ ರಸಿಕ ನಾಲಿಗೆ, ನೋವಿನೆದುರು, ಸಾವಿನೆದುರು ಪದಗಳ ಮರೆತು ಸ್ಥಬ್ದವಾಗುತ್ತದೆ... 
___ ಅಳುವಿಗೆ ವಾರಸಿಲ್ಲ - ಕರುಳಿನ ಗಾಯಕ್ಕೆ ಕಾಲನೂ ಮದ್ದು ಕೊಡಲ್ಲ... 
&&&

ಸುಡುಗಾಡಿನ ಬೆಂಕಿ ಉರಿಯ ಬೆಳಕು ನನ್ನ ಮಾತು... 

ತುಂಬಾ ಬದಲಾಗಬೇಕಿತ್ತು, ಬದಲಾಗಬೇಕಿದೆ - ಬದಲಾಗಲಾಗದೇ ಬಾಕಿ ಉಳಿದೆ... 
___ ನಿಮ್ಮಿಂದ ಮೊಗೆಮೊಗೆದು ಪಡೆದ ಪ್ರೀತಿ ಮತ್ತು ನಿಮ್ಮಗಳಿಗೆ ನಾನೆತ್ತಿ ಕೊಟ್ಟ ನೋವು ಎರಡೂ ನೆನಪಲುಳಿಯಲಿ ಎನಗೆ... 
&&&

ಅಲ್ಲಾ -
ಏನೂ ಕೊಡದೆಯೂ ಎಲ್ಲ ಸಿಗತ್ತೆ ಕೆಲವರಿಗೆ... 
ಏನು ಹೇಳೋಣ ಎಲ್ಲ ಕೊಟ್ಟೂ ಏನೂ ಸಿಗದ ಪಾಪದ ಕೈಗಳಿಗೆ... 
ಪಡೆದೂ ಪಡೆದೂ ಹಿರಿದಾಗದ ರುದಯ... 
ಕೊಟ್ಟೂ ಕೊಟ್ಟೂ ಬರಿದಾಗದ ಕರುಳು...
___ ನಿಮ್ಮ ದೇವರ ಕಾಟಾ ಸರಿ ಇಲ್ಲ ಬಿಡಿ... 
&&&

ಶ್ರೀ -
ಮಾತಿನಿಂದ ಕಟ್ಟಿದ ಸೇತುವೆಯ ಮಾತೇ ಮುರಿದು ಮುಕ್ಕಿತ್ತು... 
___ ಮೌನವು ಮಸಣ ಅಂದ ನಿನ್ನ ಮುಸುಡಿ ನೋಡಬೇಕೀಗ... 

ವತ್ಸಾ -
ಸ್ವಾಭಿಮಾನ, ಸ್ವಾನುಕಂಪಗಳ ಗೆರೆ, ಅರ್ಥ ವಿಸ್ತಾರಗಳ ಅರಿವಾಗುವುದು ತುಂಬಾ ತಡವಾಗಿಬಿಟ್ಟರೆ..... 
ಹಿಂತಿರುಗಿ ನೋಡಿದರೆ ಕಳೆದುಕೊಂಡದ್ದರ ಲೆಕ್ಕ ಸಿಗೂದು ಕಷ್ಟ... 
___ ವಿವೇಕವ ಚಿಂತೆ ಮಣಿಸಿದರೆ.... 
&&&

ದೇವರೇ -
ನಾನು ನೀನಾಗುವ ಸ್ಪರ್ಧೆಯಲಿಲ್ಲ;
ಹೋಗಲಿ,
ನಿನ್ನ ಹೊಂದುವ ಓಟದಲೂ ಇಲ್ಲ... 
ಅದಕೇ,
ಈ ಉಸಿರ ಋಣ ತೀರುವವರೆಗೂ 
ಇಲ್ಲಿನ್ಯಾವ ಭಂಡ ಬಡಿವಾರಗಳ ಬಗೆಗೂ 
ಇನಿತೂ ತಕರಾರುಗಳಿಲ್ಲ... 
___ ನನ್ನ ಸಂಗದಲಿ ನಾ ನಿತ್ಯಸುಖಿ... 
&&&

ಪ್ರಾಮಾಣಿಕತೆ ಕಷ್ಟವಲ್ಲ... 
ಆದರೆ,
ಸಂತೆಯಲಿ ನಿಂತು ತನ್ನ ಶುದ್ಧತೆಯನು ರುಜುವಾತುಪಡಿಸಬೇಕಾದ ಅದರ ಅಸಹಜ ಅನಿವಾರ್ಯತೆ ಇದೆಯಲ್ಲ, ಅದು ಬಲು ಕಿರಿಕಿರಿಯ ಸಂಗತಿ... 
___ ಗುಲಗಂಜಿಯೊಡನೆ ಚಿನ್ನ ವಾದಕಿಳಿಯಬಾರದೇನೋ... 
&&&

ಬೆತ್ತಲಾಗುವುದು ಸುಲಭ -  
ಹಾಂ, ಬೆತ್ತಲಾಗುವುದು ತುಂಬ ಸುಲಭ ಸುಳ್ಳಿಗೆ... 
ಗೂಡು ಅದರದ್ದು ಕತ್ತಲಲ್ಲವಾ...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರಾ ಎಪ್ಪತ್ತು ಮತ್ತೂ ಒಂಭತ್ತು.....

ದಿನಕ್ಕೊಂದು ಮುತ್ತಿನ ಕಥೆ.....
ಭಾವಕಾವ್ಯ ಕೌಮುದೀ -
ಸೋಲು ಒಳ್ಳೆಯದೇ - ಸೋತದ್ದು ಪ್ರೀತಿಗೇ ಆದಲ್ಲಿ... 
ನಿಂಗೆ ಸೋತೇ ಅನ್ನುವಾಗ ಜಗವ ಗೆದ್ದ ಬೀಗು ಉಸಿರಲ್ಲಿ... 
___ ದಿನಕ್ಕೊಂದು ಮುತ್ತಿನ ಕಥೆ...
💞💞💞

ಮುಸುಕು ಮಂಜು, ಬಿರು ಮಳೆ, ಹೋರು ಗಾಳಿ, ಎತ್ತರದ ಏರಿನೆದುರು ಸಳಸಳನೆ ಸುರಿದ ಬೆವರು, ಅಷ್ಟೆಲ್ಲಾ ರುದ್ರ ರಮಣೀಯತೆಯ ಯಥಾವತ್ತು ಬರೆದ ಚಿತ್ರವೂ ಉಸಿರ ಬಳ್ಳಿಗೆ ಚುಚ್ಚಿದ ಮುರಿದ ಭಾವದ ಮುಳ್ಳಿನ ಗಾಯದ ಆಳ ಹೇಳುವುದಿಲ್ಲ... 
ಧಾರೆ ಧಾರೆ ಸುರಿವ ಕಣ್ಣ ಹನಿಯೂ ಹೆಪ್ಪು ಮೌನದಿ ಗುಮಿಗೂಡಿದ ಗಾಢ ನೋವಿನ ಒಂದಂಶದ ಭಾರ ತೂಗುವುದಿಲ್ಲ... 
ಹತ್ತಾರು ನಶೆಗಳಲಿ, ನೂರು ನಖರೆಗಳಲಿ ಕಳೆದುಹೋದರೂ ಕಳೆದುಕೊಂಡ ನಿನ್ನ(ನ್ನೆ) ನಗೆಯ ಪ್ರೀತಿ ಸಾರ ಸಿಗುವುದಿಲ್ಲ...
___ ಕೂಗಿ ಕೂಗಿ ಕರೆದಂತೆ ಭಾಸವಾಗಿ ಸುಸ್ತಾಗಿಯೂ ಗಂಟಲಲ್ಲೇ ಉಳಿದ ನಿನ್ನ ಹೆಸರು... 
💞💞💞

ಎಂಥ ಗಾಢವೋ ನದಿಯ/ನದಿಯಂಥವಳ ವಿರಹದ ಎದೆಗುದಿ - ಒಡೆದೂ ಮುರಿದೂ ದುಡು ದುಡು ಧುಮ್ಮಿಕ್ಕಿ ಹರಿಯುತಾಳೆ ಸೇರಲು ಅವನ/ಸಾಗರನ ಎದೆಗುಡಿ... 
___ ಪ್ರೀತಿ ಪಾರಾಯಣ... 

ಕಂಗಳಾಳ(ಡಿ)ದ ಮಾತು... 
ಬೆನ್ಬಯಲು ಬರೆದ ಕವಿತೆ... 
ನಡು ಮ(ಮಿ)ಡತೆ ತೀಡಿದ ತಲ್ಲಣ... 
ಯೆದೆಯಮೇಲೂರಿದ ಬೆಳದಿಂಗಳ ಕಾಲ್ಗಳ ಗೆಜ್ಜೆ ಘಲಿರು... 
ಆಹಾ...!! 
ಹೆಣ್ಹರೆಯದ ಚೆಲುವು ರಸಿಕನೂರ ಚೆಂಡಾಡುವ ಪರಿಯೇ...!!!
____ ಮೋಹಾ ಮಾರುತ...

ಸಾಯಬೇಡಾ ಅಂತಂದು ಮಧುರವಾಗಿ ಕೊಲ್ಲುವ ಕಲೆಯ ಕಲಿಸಿದ್ಯಾರು ಚೆಲುವಿ(ವೆ)ಗೆ... 
____ ಬಿನ್ನಾಣದ ಕಾವ್ಯ...

ಯೆದೆಯ ನೂರು ಗಾಯಕೂ ಪ್ರೀತಿ ಒಂದೇ ಮದ್ದಂತೆ... 
ಮತ್ತು
ಈ ಪ್ರೀತಿ ಒಂಥರಾ ದೇವ ಪೂಜೆಗಿಟ್ಟ ನೈವೇದ್ಯದಂತೆ - ಇಟ್ಟದ್ದೇನೋ ಅವರೆದುರಿಗೆ, ರುಚಿ ದಕ್ಕುವುದು ಮಾತ್ರ ನನ್ನದೇ/ನನ್ನೆದೆ ನಾಲಿಗೆಗೆ...
____ ಎದೆಗಣ್ಣ ಬೆಳಕು... 
💞💞💞

ಒಡೆದ ತುಟಿಗಳಿಗೆ ಮದ್ದನು
ಒಡೆದ ತುಟಿಗಳೇ ಕೊಡಬೇಕು... 
ಬಂದು ಹೋಗು ಮತ್ತೊಮ್ಮೆ
ಅಡ್ಡ ಮಳೆ, ಉದ್ದುದ್ದ ಛಳಿಯ ಇರುಳ(ಲಿ) ಮೈಗೆ ಬೆಂಕಿ ಬೀಳಲಿ... 
___ ಮಧುರ ಪಾಪದ ಮಾಧುರ್ಯ... 
💞💞💞
ನಾನು - ನೀರಿಗಿಳಿವ ಧೈರ್ಯ ಇಲ್ಲಾ ಅಂದವಳೆದುರು  ನಡು ಹಿಡಿದು ಈಜು ಕಲಿಸುವ ಖುಷಿಯ ಕನಸು ಕಾಣ್ತೇನೆ... ಜಲಕ್ರೀಡೆಯ ಆಸೆಯೇ ಇಲ್ಲವೆಂದರೆ ನೀನು  ಸೇರುವ ಹಾಗೂ ಮರೆಯುವ ನಡು ದಾರಿ ಸಿಗದ ವಿರಹದ ಮಡುವಲಿ ಒಂಟಿ ತೇಲುವ ಕೊರಡಾಗುತ್ತೇನೆ... ___ ಪ್ರಣಯ ಶರಧಿಯ ತೀರಗಳಲಿ ನಿನ್ನ ಮೋಹಕ ಮೋಹಕೆ ನಗು(ಡು)ವನೊತ್ತೆಯಿಟ್ಟವನು... ಆ ಚೆಲುವು ಅದರ ಹಸಿವು ನನ್ನ ಬದುಕಿಸಿರೋ ಅಮೃತವೂ ಅದೇ ನಾ ಸಾವನು ಒಪ್ಪುವ ಪ್ರಾರ್ಥನೆಯೂ ಅಲ್ಲೇನೇ...  ____ ಅವಳಾ ಬೆತ್ತಲೆ ಮೈ ಬಯಲು... 💞💞💞
ಕೇಳೇ - ನಿನ್ನ ಹೆಸರಲೀ ನಾ ಬರೆದಿಟ್ಟ ನನ್ನ ಉಸಿರಿದೆ... ನನ್ನ ಇರುಳ ತೋಳಲೀ ನೀ ಮರಮರಳಿ ಅರಳಿ  ಬೆವರಾಗಿ ಘಮಿಸುವುದು ಗೆದ್ದು ಗೆದ್ದು ಸಂಭ್ರಮಿಸುವುದು ನನ್ನ ಜೀವ ಜಾತ್ರೆಯ ಮಹಾ ಮೋಹಕ ಸೋಲು...  ಇಲ್ಲೇ ನಿನ್ನ ಮನೆಯ ದಣಪೆಯಾಚೆ ನಿಂತಿದ್ದೇನೆ - ಹಸಿ ಹಸಿವು;  ಕರೆದುಕೋ ಬಿಸಿ ಕನಸಿಗಾದರೂ - ಇಷ್ಟಾದರೂ ತೃಷೆ ತಣಿದರಷ್ಟೇ ಉಳಿವು... ____ ಹೇ!! ಕಾಡು ಹೂವಿನಂಥ ಹುಡುಗೀ... 💞💞💞
ಕೇಳೇ ಕಾವ್ಯ ಕಂಪನವೇ - ನನ್ನೆಲ್ಲಾ ಖುಷಿ ಖುಷಿಯ ಘಳಿಗೆಗಳಲೂ ನಿನ್ನದೊಂದು ಆಪ್ತ ಒಡನಾಟದ ನೆನಪು ನನ್ನ ಸಲಹುತ್ತದೆ ಇನ್ನಷ್ಟು ಮತ್ತಷ್ಟು ಮಗದಷ್ಟು ಮೊಗೆದಷ್ಟೂ ಸವಿಯಾಗಿ... ___ ನೆನಪು ಬಾಧಿಸುತ್ತದೆ - ಬಾಗಿಸುತ್ತದೆ - ಮಾಗಿಸುತ್ತದೆ - ಬಾಳಿಸುತ್ತದೆ ಬರಗೆಟ್ಟ ಭವವ... (ಮು)ಮಂದಸ್ಮಿತ ಮಾಯೆಯೇ - ಎವೆ ಬಾಡದೇ ಕನವರಿಸಿ ಕಾಯುತ್ತ ಕೂತ ನಗ್ನ ಕಂಗಳ ತೀರಕೆ ಬೆಚ್ಚಗೆ ಬುಳ್ಳಗೆ ಕನಸಾಗಿಯಾದರೂ ಬಾ... ಇರುಳ ಮೈದುಂಬಿ ಬರಲಿ ಸುರತ ಸಗ್ಗದ ಸೊಗವು - ಬಿಸಿ ಹರೆಯದ ಹಸಿ ಸುಖಾಘಾತಕೆ... ನಿನ್ನುಸಿರ ಹೋರೆನ್ನ ಮೀಸೆ ಬೇರುಗಳ ಸುಡುವಲ್ಲಿ, ನಿನ್ನ ತೋಳಿನಬ್ಬರಕೆ ನಾ ಜಗವ ಮರೆವಲ್ಲಿ, ಯಾವ ಸೋಲಿಗೂ, ಗೆಲುವಿಗೂ ಹೆಸರಿಲ್ಲ, ಕಸರಿಲ್ಲ... ___ ನೀನೆಂದರೇ ಈ ಉಸಿರ ತೀಡುವ ಮೋಹಾಲಾಪದ ಓಂಕಾರ ಝೇಂಕಾರ... ಮೊಗದ ಮಚ್ಚೆಯಲಿ ಲಜ್ಜೆ ಸರಸಿಜವನರಳಿಸಿ ನಗುವವಳೇ - ಯೆದೆಯು ಯೆದೆಯ ಮೀಟಿ ಬೆರೆ(ವೆ)ತು ಬರೆವ ನೂರು ನವಿರು ಹಾಡುಗಳ ಚೆಂದ ಭಾವಾನುವಾದ - ನಿನ್ನ ಮೋಹದ ನೆನಪಲರಳುವ ನನ್ನ ತುಂಡು ತುಂಟ ನಗು... ,,,,, ಕನಸು ಕಲ್ಪನೆಗಳ ಬೇಗುದಿಯಲಿ ಕಂಡು ಉಕ್ಕಿದ್ದು "ನಿನ್ನೊಡನಾಡುವುದು" ತುಂಬಾನೇ ಬಾಕಿ ಇತ್ತು - ನಿನ್ನ ನಾಚಿಕೆಯ ಎದೆ ಸುಳಿಗೆ ಉಸಿರು ಸಿಕ್ಕಿ ಎಲ್ಲಾ ಮರೆತುಹೋಯಿತು... ____ ಯಮುನೆಯಲಿ ಈಸುಬಿದ್ದ ಗೋಪಿಯರ ಹರೆಯ ಮತ್ತು ಹುಣ್ಣಿಮೆಯ ಗಾಳಿ ಬೃಂದಾವನದ ಬಿದಿರ ತೀಡಿ ಹಾಡುವ ಕೃಷ್ಣ ಕಾವ್ಯ ಸಂಕಲನ... 💞💞💞
ನೆನಪಿನ ಮತ್ತಾಗಿ ಮುದ್ದುಕ್ಕಿಸುವವನೇ - 'ಎಂಥ ಮುದ್ದು ನೋಡವನು' ನಾಕು ಹೆಜ್ಜೆ ಬಯಲಿಗೆ ಹೋಗಿ ಚಂದಮನ ಕಂಡು ಬಾ ಅಂದ್ಲು... ನೀನಿಲ್ಲದೂರಲ್ಲಿ ಅವನೇ ನನ್ನ ಸಂಕಟ ಹಾಗೂ ಸಾಂತ್ವನ ಅಂದೆ...  ___ ವಿರಹದುರಿಗೆ ಮದ್ದು ಮತ್ತು ಆಜ್ಯ ಎರಡೂ ಹೊಯ್ಯುವ ಬೆಳುದಿಂಗಳು... 💞💞💞
ಯೆದೆಯ ಕೌಮಾರ್ಯಕೆ ನಗೆಯ ಸಂಜೀವಿನಿಯನುಣಿಸಿದವಳೇ - ನಿನ್ನಿಂದ ಪಡೆದುದನು ನಿನಗೊಪ್ಪಿಸುವಾಗ, ಒಪ್ಪವಾಗಿ ನಿನಗೊಪ್ಪಿಸಿ ನಿನ್ನ ಮೆಚ್ಚುಗೆಯ ನೋಟದಲಿ ಮಿಂದು ಬೀಗುವಾಗ ನಾನು ನೀನೇ ಆದಂತೆ ಭಾವ ಭಾಸ - ಪ್ರೀತಿಯಾದರೂ, ಜೀವವೇ ಆದರೂ...  ___ ನೀನೆಂಬ ಸುನೀತ ಸಂಗಾತ... ಹಿಂದಿನಿಂದ ಏನೋ ಜಗ್ಗಿದಂಗೆ ಮುಂದೆ ಮುಂದೆ ಯಾರೋ ಕರೆದಂಗೆ ನೆನಪೂ ಕನಸೂ  ಕಾಡುವಾಗ ಹಾಡುವಾಗ... ಅದಾವ ನಡು ಬಿಂದುವಲಿ  ಮಧುರ ಪಾಪದ ಸಿಂಧುವಲಿ ನಿನ್ನ ಕೂಡಿಯಾಡುವುದು ಕೊಂಡಾಟದಲಿ ಮೀಯುವುದು...  ___ ಬಾ ಸೇರಿಕೋ - ಕಾರುಣ್ಯದಲಿ ತಾಳಿಕೋ...
*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರಾ ಎಪ್ಪತ್ತು ಮತ್ತೆಂಟು.....

ನಡು ರಾತ್ರಿಯ ಎಚ್ಚರಗಳನು ತಬ್ಬುವ ಸತ್ಯಗಳು.....

ನನ್ನ ನಟನೆಗೆ ನಾನೇ ಬೇಸತ್ತು ವೇಷ ಕಳಚಿಟ್ಟು ಹೊರಟ ಹಾಗೆ ಕನಸಾಯಿತು... 
ಸಾವಿನ ಕನಸಾಗುವುದು ಶುಭವೆಂದರು... 
ನಾಟಕ ಮುಂದುವರೆದಿದೆ... 
____ ಯಮನ ಬಂಟರಿಗೂ ನೀರು ಮಜ್ಜಿಗೆ ಉಪಚಾರ... 
&&&

ಗುಡಿಯ ದೇವರ ನೋಡಬೇಕೆಂದರೆ ದುಡ್ಡು ಮಾಡು - ಸರ್ವಾಲಂಕಾರಭೂಷಿತ ಮೂರ್ತಿ ಕಾಣುವುದು... 
ಯೆದೆಯಲಿನ ದೇವರ ಕಾಣುವುದಾದರೆ ಪ್ರೀತಿ ಮಾಡು - ಜೀವ ವಿಗ್ರಹದೊಳಗೆ ನಿಷ್ಪತ್ತಿಯಾದ ಜೀವಂತ ಶಕ್ತಿ ತಾಕುವುದು... 
___ ನನ್ನ ಆಧ್ಯಾತ್ಮ... 

ಸಾವ ಬಯಸುವುದಲ್ಲ -
ಇರಬಹುದು,
ಮಸಣ ವೈರಾಗ್ಯ ಅಂದ್ರೆ ಮಸಣ ಕಾಯುವವನ ಮೇಲೆ ಪ್ರೀತಿಯಾಗುವುದೂ... 
ಗೊತ್ತಲ್ಲ,
"ಫಕೀರನ ದೇವರು ಸಂಸಾರಿ..." 
___ ನನ್ನ ಆಧ್ಯಾತ್ಮ... 

ಧುಮುಗುಡುವ ಜಲಪಾತ, ಭೋರ್ಗರೆವ ಕಡಲ ಒಡಲು, ತುಂಬಾ ಮಾತಾಗುವ ಕರಡಿ ಅಪ್ಪಿನ ಕಾಡು ಮೌನ, ಉಸಿರ ಹೋರಿನ ಕಾಮನ ಹಬ್ಬ - ಇದೇ ಇಂಥವೇ ನನ್ನೀ ಯೆದೆಯ ಕೂಡುವ, ಭಾವಕೋಶವ ಕಾಡುವ ಹೆಜ್ಜೆಗೊಂದು ನಗೆಯ ಕಾವ್ಯ...
ಹರಿವು ಯೆದೆಯಲರಳಿಸುವ ಮಳೆಬಿಲ್ಲು - ನನ್ನ ಆಧ್ಯಾತ್ಮ... 
&&&

ಬ್ರಹ್ಮ ಮಾಡಿದ ಹಾದಿಯಲ್ಲೇ ಯಮನೂ ನಡೆದು ಬರುತ್ತಾನೆ... 
ಅಲ್ಲಿಗೆ, 
ಎಲ್ಲಾ ರಸ್ತೆಗಳೂ ಅಲ್ಲಿಗೇ ತಲುಪುತ್ತವೆ... 
ಆದರೆ, 
"ನಗೆ/ಪ್ರೀತಿ ಹೊನಲ ಹಂಚುವ ದಾರಿಯಲಿ ಪ್ರೀತಿ/ನಗೆ ಹೂಗಳು ಅರಳಿ ಬಣ್ಣಗಳ ಸೊಬಗು ಚೆಲ್ಲಿರುತ್ತದೆ..."
ನಾವಲ್ಲಿ 
ಕಪ್ಪು ಕನ್ನಡಕದಲಿ ಕಣ್ಣ ಹುಗಿದಿದ್ದರೂ ತುಟಿಯಂಚಿಗೆ ಕರಗಿದೆದೆಯ ಬೆಳಕು ಮೆತ್ತಿಕೊಳ್ಳುತ್ತದೆ...
___ ಯೆನ್ನೆದೆಗೂಡಿನ ಬಾಗಿಲಲಿ ಒಲುಮೆ ಮಂದಹಾಸವ ಚೆಲ್ಲುವ ಎಲ್ಲವರಿಗೂ ನನ್ನಿ ನನ್ನಿ... 💞
&&&

ಕೇಳಿಲ್ಲಿ -
ಕವಿತೆ ಕುಟ್ಟಿದಷ್ಟು ಸಲೀಸಲ್ಲ ಬದುಕು ಕಟ್ಟಿಕೊಂಬುದು - ಕಣ್ಣಳಿಳಿದರೆ ಮಾತೇ ಆಡದೇ ಮನಸಿಗೆ ಗೊತ್ತಾಗುತ್ತದೆ ಹಸಿವ ಹುಗಿದಿಡಲು ಕತ್ತಲೇ ಲೇಸೆಂಬುದು...
ಹನಿಗಡಲ ಇಂಗಿಸಿಕೊಂಡು, ಎದೆಗೆ ಬಿದ್ದ ಬೆಳಕ ಬೀಜವ ಜೋಪಾನ ಮಾಡಲು ಕತ್ತಲನರಸುವಂತೆ ಕಾಣುವ, ಬೀದಿ ದೀಪಗಳಂಥಾ ಆ ಅನಾಥ ಕಂಗಳು ಬಲು ಕಾಡುತ್ತವೆ...
ಕಟ್ಟಡಗಳ ಕಾಡಿನ ಎದೆ ಸೀಳಿ ಉಪ್ಪು ಖಾರ ಸವರಿದಂತೆನಿಸುವ ದಟ್ಟ ಜನಜಂಗುಳಿಯ ಬೀದಿ...
ಅದೇ ಬೀದಿಯ ಪಕ್ಕೆಗಳಲೇ ಅವರ ಬಾಲ್ಯ ತರಚಬೇಕು, ಯೌವನದ ರುಚಿಗಳ ಪರಿಚಯಿಸಿಕೋಬೇಕು, ಪ್ರೀತಿ ಅರಳಬೇಕು, ಮೋಹ ಕೆರಳಬೇಕು, ಸಂಸಾರದ ಕಣ್ಣ ಹನಿಗಳ ಕೊ‌ಸರಾಡದೆ ಕುಡಿಯಬೇಕು...
ಉಫ್ -
ದಾಕ್ಷಿಣ್ಯಗಳ ನೀಗುವ "ಇರುಳ ಕಾರುಣ್ಯ" ಎಷ್ಟು ಹಿರಿದು ಗೊತ್ತಾ ವತ್ಸಾ...!!
___ ಕತ್ತಲ ಉಡಿಯಲಿ ಕುದಿವ ಕಥೆಗಳು... 
&&&

ಕೇಳಿಲ್ಲಿ -
ಬದುಕಿದ್ದೇನೆ - ಬದುಕಿಯೇ ಇದ್ದೇನೆ... 
ಬಸವನಿಗೆ ಬಿಟ್ಟ ಗೂಳಿಯ ಥರ - ಯಾರೂ ಬಂಧಿಸುವವರಿಲ್ಲದ ಸ್ವಾತಂತ್ರ್ಯ ಮತ್ತು 'ಇಲ್ಲೊಂಚೂರು ನಿಲ್ಲೋ' ಅನ್ನುವವರಿಲ್ಲದ ನಿರ್ವಾತದ ಜೊತೆಗೆ... 
___ ನನ್ನದೇ ಸ್ವಭಾವ ವೈಕಲ್ಯ - ಬಲು ಸಸ್ತಾ ಬದುಕು... 

ವತ್ಸಾ -
ಬಿತ್ತಲಾರದವನು ಬೆಳೆಯ ಬಯಸಬಾರದು - ಪ್ರೀತಿಯಾದರೂ, ನಗುವನಾದರೂ... 
ಬಯಲಿನಾಸೆಯ ನೀನು ಬಿಸಿಲು, ಮಳೆಯ ಹಳಿಯಬಾರದು... 
___ ನಿನ್ನದೋ ಸ್ವಭಾವ ವೈಕಲ್ಯ - ಬಲು ಸಸ್ತಾ ಬದುಕು... 
&&&

ಕತ್ತಲೆ ಕಾನಿನ ಕಾಲು ದಾರಿಯ ಕವಲಿನಲಿ ಕಂಗಾಲಾಗಿ ನಿಂತವನಿಗೆ ಅಲ್ಲೆಲ್ಲೋ ಎಡಗುವ ಹರಿದು ಬಿದ್ದಿರೋ ಹರಕು ಚಪ್ಪಲಿಯೂ ಒಂದು ಗಟ್ಟಿ ನಿಟ್ಟುಸಿರಿನ ಭರವಸೆಯೇ - ಕಳೆದೋದದ್ದು ನಾನೊಬ್ಬನೇ ಅಲ್ಲ ಇಲ್ಲಿ ಅಥವಾ ಈ ಹಾದಿಯಲೂ ಅಲ್ಲೆಲ್ಲಾದರೂ ಜೊತೆಗ್ಯಾರೋ ಸಿಕ್ಕಾರು ಎಂಬ ಆಶಾಭಾವ... 
___ ಮಸಣ ಕಾಯುವವನಿಗೆ ಬೆವರ ವಾಸನೆಯೇ ಜೀವಶಕ್ತಿಯೇನೋ...
&&&

ಇಲ್ಕೇಳೇ -
ಪ್ರತಿಕೃತಿಗಳ ಮೂಲಕ ಜೀವಿಸುವ ಪ್ರಕೃತಿ ತನ್ನ ಉಳಿವಿಗೆ ಹೂಡುವ ಕೂಟದಲಿ ನಾನು ನೀನು ಒಪ್ಪವಾಗಿ ಒಪ್ಪಿ ನೇರ ಭಾಗಿಯಾದರೆ ಅದು ಶುದ್ಧ ಕಾಮ, ನಾವದನ್ನು ಸುತ್ತಿ ಬಳಸಿ ತಲುಪುವುದಕ್ಕೆ ಇಟ್ಟುಕೊಂಡ ಹೆಸರು ಪ್ರೇಮ ಅಂತನ್ನಿಸುತ್ತೆ ನೋಡು ನಂಗೆ...
............. ಪಾವಿತ್ರ್ಯದ ತಕ್ಕಡಿಯಲಿ ಆ ತೀರವ ಸುಖವಾಗಿ ತಲುಪುವುದು ಕ್ಷುದ್ರವಂತೆ, ಮಧುರ ಪಾಪಕ್ಕೆ ಪುಣ್ಯ ಲೇಪದ ಸೋಗಿಗೆ ಬಂಧನದ ಬೇಲಿ ಬೇಕಂತೆ... 
___ ನೀರು ಜೀವ ದ್ರವ್ಯ - ಶಂಖದಿಂದ ಬಂದ್ರೆ ತೀರ್ಥ... 

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರಾ ಎಪ್ಪತ್ತಾ ಏಳು.....

------ ತುಂಬಾ ಸುಖವೂ ಸುಸ್ತಾಗಿಸುತ್ತೆ.....

ವತ್ಸಾ -
ಒಂದು ಒಡನಾಟದಲ್ಲಿ ಯಾವುದೋ ಒಂದು ಬದಿಯಿಂದ ಮಾತು ಮೊದಲಾಗುವುದು ನಿಂತು ಬರೀ ಪ್ರತಿಕ್ರಿಯೆಗಳಷ್ಟೇ ವಿಕ್ರಯವಾಗೋದು ಶುರುವಾದರೆ ಅಲ್ಲಿಗೆ ಅಲ್ಲಿ ನೇಹ ನೇಪಥ್ಯಕೆ ಸೇರುತಿರುವ, ಮತ್ತದು ಆಪ್ತತೆಯ ವಿನಿಮಯ ಮಡಿದು ನಡುವೆ ನಿರ್ವಾತವೊಂದು ಹುಟ್ಟಿಕೊಳ್ಳುವ ದಾರಿಯ ಆರಂಭದಂತೆನಿಸುತ್ತೆ...
ಕಾರಣ, 
ನೂರು ಸಬೂಬುಗಳ ನೀಡಿದರೂ / ನೀವಿಕೊಂಡರೂ ನಿರ್ಲಕ್ಷ್ಯವೆಂಬೋದು ಮಂಜುಗತ್ತಿಯಾಗಿ  ನೇರ ಯೆದೆಯನೇ ಇರಿಯುತ್ತದೆ... 
___ ಇನ್ನು ಸುಮ್ಮನಿದ್ದುಬಿಡಲಾ ಅನ್ನಿಸಿದ ನಂತರ ಸುಮ್ಮನಾದರೂ ಒಂದು ಮಾತು ಹುಟ್ಟುವುದು ಕಸಿವಿಸಿಯ ಕಂದರದಿಂದಲೇ......... 
&&&

ಪ್ರೀತಿ ಸಿಹಿ ಅಂದರು... 
ಅಖಂಡ ಪ್ರೇಮದ ನೂರು ನದಿಗಳ ನೀರು ಕುಡಿದೂ ಸಾಗರನ ಯೆದೆ ಹಸಿವು ಇಂಗಿದಂತಿಲ್ಲ - ಉಪ್ಪು ಸಿಹಿಯಾಗಲಿಲ್ಲ... 
ಅಲ್ಲಾ, ಈ
ಪ್ರೀತಿಯ ರುಚಿ ಸಿಹಿಯಾ...? ಉಪ್ಪುಪ್ಪಾ...?? 
ಹಂಗೇ,
ಈ ಪ್ರೀತಿ ಅಂಬೋದು ಚೂರೂ ಸಿಗ್ದಿದ್ರೆ ಸಪ್ಪೆ ಸಪ್ಪೆ - ಅತಿಯಾದ್ರೆ ಉರಿ ದಾಹ... 
____ ಬದುಕಿನ ಪ್ರೀತಿ ಪಾರಾಯಣ... 
&&&

ಏನಿಲ್ಲಾಽಽಽ -
ಪೂರಾ ಪೂರಾ ಅಪರಿಚಿತತೆಯೇ ಒಳ್ಳೆಯದಿತ್ತಾ ಅಂತ... 
ಒಂದೊಮ್ಮೆ ಯೆದೆಬಾಗಿಲ ತೋರಣದಂತಿದ್ದು, ತೀರಾ ತೀರಾ ಆಪ್ತ ಆಲಿಂಗನದ ಆನಂದ ಧಾಮಕೆ ಬಂದು, ಇನ್ನೀಗ ಕಣ್ಣ ಕಕ್ಷೆಯಲೇ ಇದ್ದೂ ಯೆದೆಯ ಭಾವಾನುಭಾವಗೊಳದಲ್ಲಿ ಮಿಂದು ಹೋದ ಕುರುಹೊಂದೂ ಇಲ್ಲವೇನೋ ಎಂಬಂತೆ ಕಿಟಕಿಯಾಚೆಯ ಬಯಲಲ್ಲಿ ಮುಖ ತಿರುವಿ ನಿಂತು, ಗಂಟಲಿಗಿಳಿದ ಬಿಸಿ ತುಪ್ಪದಂತೆ ಕಣ್ಣ ಮಳೆಯಾಗಿ ಕಾಡುವುದಕಿಂತ; ಎಲ್ಲೋ ತಿರುವಲ್ಲಿ ಹಾಗೇ ಎದುರಾಗಿ ಕಣ್ಣ ಸಂಧಿಸಿ ಸಣ್ಣದೊಂದು ಪುಳಕವಾಗಿ ತುಸು ಕಾಲ ಕಾಡಿ ಮರೆಯಾಗೋ ಚಂದ ಅಪರಿಚಿತತೆಯೇ ಒಳ್ಳೆಯದಿತ್ತಾ ಅಂತ........ 
___ ನೆನಪು - ಜ್ವರ ಇಳಿದ ಮೇಲೂ ನಾಲಿಗೆಯಲುಳಿದ ಕಹಿ ಉಗುಳಿನಂಗೆ... 
&&&

ಮಲಗುವುದಷ್ಟೇ ಆದರೆ ಮೈಯ್ಯಲಿಷ್ಟು ಆಸೆಯ ಬಿಸಿ ಗುಮಿಗೂಡಿದರೆ ಸಾಕು... 
ಮುದ್ದಿಸುವುದಾದರೋ ಎದೆಯ ಸುಳಿಗಳಲಿ ಇಷ್ಟೇ ಇಷ್ಟಾದರೂ ಪ್ರೀತಿಯ ತೇವವೂ ಬೇಕು... 
___ ನಡು ರಾತ್ರಿಯ ಎಚ್ಚರಗಳನು ತಬ್ಬುವ ಸತ್ಯಗಳು... 
&&&

ನೀನು ನಿನಗಾಗಿ ನನ್ನಿಂದ ದೂರ ದೂರ ಸರಿಯುತಿರುವ ಸತ್ಯದ ಅರಿವಿದ್ದೂ, 
ನಾನು ನನಗಾಗಿ ನಿನ್ನ ಹುಡುಕಿ ಹುಡುಕಿ ಸೇರುವ ಹುಕಿಯಲಿದ್ದೇನೆ/ದುಡುಕಿನಲಿದ್ದೇನೆ... 
ಒಲವಿಂದ ಗಳಿಸಿಕೊಳ್ಳುವ, ಉಳಿಸಿಕೊಳ್ಳುವ ಒಲವಿಲ್ಲದವನು, ಬಲದಿಂದ ಬೆಸೆದುಕೊಳ್ಳುವ, ಬಳಸಿಕೊಳ್ಳುವ, ಬಾಲಿಶ (ಕೊಂ)ಮೊಂಡಾಟಕೆ ಬಿದ್ದಿದ್ದೇನೆ... 
ಪ್ರೀತಿಯ ಹಾಡಲರಿಯದಿದ್ದೊಡೇನು, ಪ್ರೀತಿಯ ಕಾಡಲು ಮರೆಯಲಾರೆನು... 
____ "ನಾನು... "
&&&

ಶ್ರೀ -
ಉಳ್ಕಿ ಏನೂ ಬೇಡ ಕಣೋ, 
ನಿನ್ನೊಳಗಿರೋ "ನಂಗೆ ಸಿಕ್ಕಿಲ್ಲ ಮತ್ತು ನಾನು ಕೊಟ್ಟೆ"  ಅನ್ನೋ ಎರಡು ಹಡಾಹುಡಿ ಭಾವಗಳ ಮೇಲೆ ಒಂಚೂರು ಹಿಡಿತ ಸಾಧಿಸಿದರೂ ಸಾಕು ಎಷ್ಟೋ ಬಂಧ ಸಂಬಂಧಗಳು ಹಂಗೋಹಿಂಗೋ ದಡಸೇರಿ ಪ್ರೀತಿಯ ಉಸಿರ ಉಳಸ್ಕೊಂಬಿಡ್ತಾವೆ ನೋಡು... 
___ ಹಂಚಿ ಹಿಗ್ಗುವ ಹರಿವಿನ ಹಾಡು... 
&&&

------ ತುಂಬಾ ಸುಖವೂ ಸುಸ್ತಾಗಿಸುತ್ತೆ... 
ಸುಖ ಅಭ್ಯಾಸವಾದಷ್ಟೂ ಅತೃಪ್ತಿಯ ತೂಕವೂ ಬೆಳೆಯುತ್ತೆ ನೋಡು... 
ಹೇಯ್ -
ತುಂಬಾ ನಗಬೇಡ - ಅನುಮಾನವಾಗುತ್ತೆ... 
ಅಳು ಹುಟ್ಟುತ್ತೆ, ನಗುವನ್ನು ಬೆಳೀಬೇಕಾಗತ್ತೆ ನೋಡು... 
____ ತುಂಬಾ ಸಲ ಕಣ್ಣಂಚಿನ ಒದ್ದೆಯೂ ತುಂಬಾ ಮುಚ್ಚಿಡುತ್ತೆ... 
&&&

ಏನ್ಗೊತ್ತಾ -
ಈ ನೋವು ಖಾಲಿತನಗಳಿಗೆ ನಾನೆಷ್ಟು ಒಗ್ಗಿ ಹೋಗಿದೀನಿ ಅಂದ್ರೆ ನಂಗೇ ಫಕ್ಕನೆ ಸಿಕ್ಕ ನಗುವೊಂದಕ್ಕೆ ಸ್ಪಂದಿಸಿ ಸಂಭ್ರಮಿಸೋದೂ ಅಪರಾಧ ಅಥವಾ ಕ್ರೌರ್ಯ ಅನ್ನಿಸ್ಬಿಡತ್ತೆ ಒಮ್ಮೊಮ್ಮೆ... 
___ ಜಡ್ಡುಗಟ್ಟಿದ ಯೆದೆ, ತೇವವಾರಿದ ಕಣ್ಣು... 
&&&

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರಾ ಎಪ್ಪತ್ತು ಮೇಲಾರು.....

ಶುಭ + ಬೆಳಕು = ಶುಭದಿನ - ಪ್ರೀತಿ ಸಂಧಿ... 🤝🫂

ಮುಗಿದುಹೋದ ನಿನ್ನೆಗೆ ಮರಳಲಾರದ ಪಾಪದವನ ಅನುತಾಪದ ಯೆದೆಗೆ ಮರಳಿ ಮರಳಿ ಪ್ರೇಮ ತುಂಬೋ ಕಾರುಣ್ಯ ಸಿಂಧು ಬೆಳಗು... 
ಮುಗಿದ ಸಮಯವ ಮರೆತು, ಮುಂದಿರುವ ಬಾಳ್ಮೆಯ ನೆನೆದು, ಮುಷ್ಟಿ ಬಿಗಿದು ಕಳಕೊಂಡ ನಗುವನು ಬೊಗಸೆಯೊಡ್ಡಿ ಪಡೆಯಲೊಂದು ಸಣ್ಣ ಅವಕಾಶದ ಬಾಗಿಲು ಬೆಳಗು... 
ಬೆಳಗಾಗಿದೆ - ತೆರೆದಿದೆ ಶುಭದ ಕಕ್ಷೆ... 🤝🫂

ಬೆಳಗಾಯಿತು...
ಕಣ್ಣ ಗೋಳದ ತುಂಬಾ ಬೆಳಕೇ ಬೆಳಕು...
ಜಗ ಬೆಳಗೋ ಬೆಳಕು ತಾನೇ ತಾನಾಗಿ ತಲುಪಲಾರದ ಎನ್ನ ಯೆದೆಯ ಕುಹರದಲೊಂದು ಪ್ರೀತಿ ಪಣತಿಯ ನಾನೇ ಹಚ್ಚಿಡಬೇಕು...
ನನ್ನ ಬದುಕ ಬೊಗಸೆಗೆ ನಂಗಾಗಿ ಶುಭವ ನಾನೇ ತುಂಬಿಕೊಳ್ಳಬೇಕು - ನಿಂಗಾಗಿ ಶುಭವ ಪ್ರಾರ್ಥಿಸುತ್ತಾ... 
ಶುಭಾಶಯ - ಶುಭದಿನ... 🤝🫂

ಬೆಳಕಿನ ಪಂಜು ಉರಿದುರಿದೆಚ್ಚರ ಜಗದ ಬಯಲ ಮಂದಿರ... 
ಪ್ರೀತಿ ಚಿಮಣಿಯ ಹಚ್ಚಿಟ್ಟರೆ ಬೆಳಕು ಮಂದಿ ಯೆದೆಯ ಕುಹರ... 
ನೆಟ್ಟ ಪ್ರೀತಿ ಕೊರಡು ಬೆಳಕಾಗಿ ಚಿಗುರಿ ಹಬ್ಬುವುದು ಎದೆಯ ಮಂಟಪಕೆ ನೂರು ಕವಲಿನ ನಗೆಯ ಬಳ್ಳಿ... 
ಕೊಟ್ಟು ಕೊಟ್ಟು ತುಂಬಿಕೊಂಬುವ ಹಬ್ಬ - ಪ್ರೀತಿ ಪ್ರೀತಿ ಬೆಳಗು... 🤝🫂

ಬೆಳಗಾಯಿತು...
ಅವನು ಮೂಟೆ ಮೂಟೆ ಬೆಳಕನು ಸುರಿದೇ ಸುರಿವ - ನಮ್ಮ ಜೀವ ಪಾತ್ರೆಯ ಅಳತೆಯ ಹಂಗಿಲ್ಲದೇ... 
ನಾವಿಲ್ಲಿ ಹಿಡಿ ನಗುವನಾದರೂ ಹಂಚಿಕೊಳ್ಳುವಾ - ನಮ್ಮ ನಮ್ಮ ಯೆದೆಗೂಡು ಒಂದರೆ ಚಣ ಹಿಗ್ಗಿನಲಿ ಅರಳುವಷ್ಟಾದರೂ... 
ಅಂತರ್ವಾಹೀ ಪ್ರೀತಿ ಬೆಳಗಿ ಹಬ್ಬಿ ತಬ್ಬಿ ಕಾಲವೂ ಕಾಯುವ ಚಂದನೆ ಪರಿ ಬೆಳಗು... 
ಶುಭದಿನ ನೇಹೀ...🤝🫂

ಬೆಳಕಿನೊಡಗೂಡಿ ಬರುವ ನೆನಪುಗಳು, 
ನೆನಪಿಗಂಟಿ ಬರುವ ಬೆಳಕು,
ಕನಸಿನ ವಸ್ತುವನು ವಾಸ್ತವದ ಮೊರದಲಿಟ್ಟು ಕೇರಿ ಕೇರಿ ನೋಡಿ ಪಯಣವನು ಗಟ್ಟಿಯಾಗಿಸುವ ಅನುಭವದ ಗರಡಿಮನೆ...
ಬೆಳಗು ಬದುಕ ಪ್ರೀತಿಯ ಬೇರಿನ ನಿಚ್ಚಳ ಕನ್ನಡಿ... 
ಶುಭದಿನ... 🤝🫂

ಯೆದೆಯ ಸಂಚಿಯಿಂದ ತೆಗೆದ ಕಟ್ಕಟೀ ಬೆಳಕಂಥ ಅಡಿಕೆ ಮತ್ತೆ ತುಸು ಪ್ರೀತಿ ಸುಣ್ಣವ ನಗೆಯ ವೀಳ್ಯದೆಲೆಗೆ ಬೆರೆಸಿ ಹಂಚಿ ತಿಂದರೆ ಬದುಕು ಬಲು ರುಚಿಯ ಕವಳ...
ಇನ್ನಷ್ಟು ಸಿಹಿ ಸಿಹಿಯಾದ ನಾಲ್ಗೆ ರುಚಿಯ ಹುಕಿಯಿದ್ದರೆ ಪ್ರೀತಿಯ ಹಲವಾರು ಕವಲುಗಳಾದ ಅಕ್ಕರೆಯ ಸಕ್ಕರೆ, ತಬ್ಬುಗೆಯ ಕರ್ಪೂರದ ತಂಪು, ಏಲಕ್ಕಿ ಕಾಳಿನ ರಸಿಕತೆ, ಭಾವದ ಬಡೆಸಪ್ಪಿನ ಕಂಪು ಇಂಥವಿನ್ನಷ್ಟು ರಸಗಳನು ಬೆರೆಸಿ ಜಗಿಯಬಹುದು...
ಬೆಳಕಾಗುವುದೆಂದರೂ, ಬೆಳಗಾಗುವುದೆಂದರೂ ಪ್ರೀತಿಯನು ಪ್ರೀತಿಯಿಂದ ಹಂಚಿ ಸವಿಯುವುದೇ ಅಲ್ಲವಾ...
ಶುಭದಿನ... 🤝🫂

ರುದಯ ರುದಯಗಳ ಪ್ರೀತಿಯ ಬಣ್ಣಗಳ ವೈಭವವ ತೋರುವ 
ಮತ್ತು 
ಬಣ್ಣಾಚಾರದ ಪ್ರೀತಿಯ ಮುಖಗಳ ಬಣ್ಣ ಇಳಿಸುವ 
ಎದೆಯ ಬೆಳಕನು ಎಲ್ಲರುಡಿಗೂ ತುಂಬಿಕೊಡಲಿ ಈ ಬೆಳಗು...
ಪ್ರೀತಿಯ ಬಣ್ಣವೇ ಬೆಳಕು... 
ಶುಭದಿನ ಪ್ರೀತಿಯೇ... 🫂🤝

ನೂರು ನೂರಾರು ನಗೆ ಮುಗುಳ ಚಂದ ಸಂಕಲನವೀ ಬೆಳಗು... 
ಪ್ರೀತಿ ಬೆಳಕಾಗಲಿ ನಿನ್ನ ನನ್ನ ಯೆದೆಯಂಗಳದ ಹೊರಗೂ ಒಳಗೂ... 
ಬೆಳುದಿಂಗಳನುಂಡು ನೆಲವ ತಬ್ಬಿದ ಪಾರಿಜಾತದ ಬೇರಿಗೂ, ಕಾದ ನೆತ್ತಿಗಿಷ್ಟು ನೆರಳನೂ ಊಡದ ಜಾಲಿಯ ಮುಳ್ಳಿಗೂ ಅದೇ ಪ್ರೀತಿ ರಸವ ಬಡಿಸುವ ಬೆಳಗು... 
ಪ್ರೀತಿ ನಗೆಯ ಲಾವಣ್ಯ ಬೆಳಗು...
ಶುಭದಿನ... 🤝🫂

ಮೈಯ್ಯೆಲ್ಲಾ ಕಣ್ಣಾದ ಬೆಳಕಿನ ಒಡಲ ದಿಟ್ಟಿ ಪ್ರೀತಿ... 
ಮಡಿಲಲಿ ದಾರಿದೀಪಗಳ ಅಕ್ಷಯ ಪಾತ್ರೆಯಿರುವ ಪ್ರೀತಿಯ ಮೂಲ ಬಣ್ಣ ಬೆಳಕು... 
ಪ್ರೀತಿ ಬೆಳಕಿನ ದೃಶ್ಯ ಕಾವ್ಯದಾರಂಭ ಬೆಳಗು... 
ಶುಭದಿನ... 🤝🫂

ಇರುಳ ತುಂಬಾ ಸೊಕ್ಕಿ ಉರಿದು ಉಕ್ಕಿ ಯೆದೆಯ ಮೇಲೊರಗಿದ ನನ್ನೊಡನಾಡಿ ಬೆಳಕು ಬಿಂಕದಲಿ ಸಾಕಿನ್ನೆಂದು ಈ ತೋಳಿಂದ ಕೊಸರಿ ವಸನವನರಸುವಾಗ ಕೊರಳ ತಿರುವುಗಳ ಅಲಂಕರಿಸಿದ ನನ್ನ ಹಸಿವಿನ ಗುರುತುಗಳ ಸೋಕಿದ ಛಳಿ ಗಾಳಿ ಕಂಪನಕೆ ಅಮಲುಗಣ್ಣಲಿ ಮೋದದಿ ನಕ್ಕಾಗ - ಬೆಳಗಾಯಿತು... 
ಶುಭದಿನ... 🍬

ನೇಹೀ -
ಪ್ರತಿ ಬೆಳಗನೂ ಪ್ರೀತಿ ರೆಕ್ಕೆಯ ಬಿಚ್ಚಿ ಕನಸಿನ ಗಗನವ ಅಳೆದು ಸಂಭ್ರಮಿಸಲು ಇನ್ಯಾವ ಕಾರಣ ಬೇಕು ಹೇಳು... 
ಈವರೆಗಿನ ಎಲ್ಲಾ ಬೆಳಗಿಗೂ ನಾನೂ ನೀನೂ ಕಣ್ತೆರೆದೇ ಸಾಕ್ಷಿಯಾದ ದಿವ್ಯ ಆಮೋದಕಿಂತ... 
ಉಸಿರ ಜೀವೋತ್ಸವಕಿಂತ ದೊಡ್ಡ ಮಹೋತ್ಸವ ಯಾವುದಿದೆ...!! 
ಶುಭದಿನ... 🤝🫂

ಶುಭವೆಂದರೆ ಮತ್ತೇನಲ್ಲ - ಬೆಳಕಿನ ಕೂಸು ಯೆದೆಯ ತೊಟ್ಟಿಲಲಿ ದೇವನಗೆ ಬೀರುವುದು... 
ಭಾವಕೋಶ ಮತ್ತು ಬುದ್ಧಿಕೋಶ ಜೊತೆ ಸೇರಿ ಪ್ರೀತಿಕೋಶವ ಕಾಯುವುದು... 
ಶುಭದಿನ... 🤝🫂

ಪ್ರೀತಿ ಬೆಳಕಿನ ಕೂಸಿರಬಹುದು... 
ಬೆಳಕಿನ ಆಳ ವಿಸ್ತಾರಗಳ ಅನುಭಾವ ದಕ್ಕಲು ಪ್ರೀತಿ ಬೆಳಕಿನ ಭಾಷೆಯೂ ಇರಬಹುದು... 
ಬೆಳಕು ಎದೆಗೂಡ ಇಣುಕಿದರೆ ಪ್ರೀತಿ ಶುಭದ ಹೊಸಿಲಕ್ಕಿ ತುಳಿದು ಹೊಲಿಯಾಗಿ ಯೆದೆಮನೆಯ ಸೇರಬಹುದು... 
ಎನ್ನ ಯೆದೆಬೆಳಕು ನಿನ್ನಂಗಳದ ಪ್ರೀತಿ ಹೂವಾಗಿ ಅರಳಲಿ ಮತ್ತು ಅದಲೂ ಬದಲು... 
ಶುಭದಿನ ನೇಹೀ... 🤝🫂

ಶುಭವನಲ್ಲದಿದ್ದರೂ 
ಶುಭದ ಸಂದೇಶವನಾದರೂ ತಂದು ಸುರಿ ಹಗಲೇ...
ನಗುವನಲ್ಲದಿದ್ದರೂ
ನಗೆಯ ಕನಸನಾದರೂ ಎದೆಗಾತುಕೊಂಡು ದಾಟಿಬಿಡುತ್ತೇನೆ (ದೀ)ದಿನ ಕಾಲವ... 
ಶುಭದಿನ... 🤝🫂

ನಿನ್ನ ಕಣ್ಣಲ್ಲರಳುವ ಎನ್ನ ನೆನಪಿನ ತಾವರೆ ನಿನ್ನ ದಿನದಾರಂಭಕೆ ನಗೆಯ ಘಮ ಸುರಿದರೆ - ಬೆಳಗು ಪ್ರೀತಿಯ ಬಾಯಲ್ಲಿ ಶುಭದ ಶಕುನವ ಹೇಳಿಸಿ ಮೈಮನಕೆ ಬೆಳಕಿನ ಕಿಡಿ ತಾಗಿಸಿ ತಟ್ಟಿ ಎಬ್ಬಿಸಿದಂತೆ ಲೆಕ್ಕ... 
ನನ್ನ ಶುಭದಿನ - ನಿನಗೂ ಶುಭವೇ ಹಾರೈಕೆ... 🤝🫂

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)