ಗೊಂಚಲು - ನಾಕ್ನೂರ್ತೊಂಭತ್ತೈದು.....

ನಡುರಾತ್ರಿಯ ಜ್ಞಾನೋದಯ.....

ಶಾಶ್ವತ ಸುಖವೆಂಬೋದು ಶಾಶ್ವತ ಹುಡುಕಾಟವಷ್ಟೇ; ಅದು ಶಾಶ್ವತವಾ ಗೊತ್ತಿಲ್ಲ - ಯಾರಿಗೋ ಸಿಕ್ಕಿದ್ದು, ಯಾರೋ ಯಾರಿಗಾದರೂ ತೋರಿಸಿದ್ದಂತೂ ವಿರಳ ಸತ್ಯವಲ್ವಾ... 
ಅದಕೇ,  
ಎನ್ನಂತಾ ಸಾಮಾನ್ಯರಲಿ ಸಾಮಾನ್ಯನಿಗೂ ಅನುಭವವೇದ್ಯವಾಗಿ ದಕ್ಕುವ ಕ್ಷಣ ಕ್ಷಣಗಳ ಕಣ ಕಣವನೂ ಹೀರಿ ಕ್ಷಣಿಕಗಳ ಒಟ್ಟು ಮೊತ್ತದಿ ಬದುಕಿನ ಒಟ್ಟಂದವ ಕಾಣವುದೇ ವಿಹಿತ ಅಂತೀನಿ... 
ಬೆಳಗಿನಷ್ಟೇ ಇರುಳೂ ಪಕ್ಕಾ ಅಂದಮೇಲೆ, ಬೆಳಕು ಕರುಣಿಸುವ ಸಚ್ಚಿದಾನಂದ ಸತ್ಯವಾದರೆ ಕತ್ತಲು ತೋರುವ ಕ್ವಚಿತ್ ಆನಂದವೂ ಸತ್ಯವೇ ಅಲ್ಲವಾ... 
___ ಈ ಕ್ಷಣದಂದದ ಆನಂದದ ನಶೆ ಏರಿಸಿಕೊಂಡ ಸಾಮಾನ್ಯನು ನಾನು... 
&&&

'ನನ್ನಿರವನು ಸಂಭ್ರಮಿಸದವರ ಜೊತೆ ನಾನೇಕಿರಲೀ' ಅಂದ್ಲು; ಅವರ ಮೇಲಿನ ಕೋಪ ಕಣ್ಣಲ್ಲಿ ರವರವ ಅಂತಿತ್ತು... 
'ನಿನ್ನನ್ನು ನಾವಿಬ್ಬರೂ ಸೇರಿ ಸಂಭ್ರಮಿಸ್ವಾ', ಗೋಧೂಳಿ ಹೊತ್ತಿದು ಹೂಂ ಅಂದುಬಿಡು ಆಗದಾ ಅಂದೆ...
ರಣ ಕೋಪವೀಗ ನನ್ನ ಮೇಲೆ ತಿರುಗಿತು... 
ಥೂ... ಅಸಹ್ಯ ನುಡಿಬೇಡ...
ಸಲಹಿಕೊಳ್ಬೇಕು ಕಣೋ ಶ್ರೀ, ಪ್ರೀತೀನ; ಸಹಿಸಿಕೊಳ್ಳೋದಲ್ಲ...
ಹಾಂ... ಸತ್ಯಸ್ಯ ಸತ್ಯ‌.. ಆದ್ರೆ ಪ್ರೀತಿಯನು ಸಲಹಿಕೊಳ್ಳೋದಂದ್ರೆ ಅವರು 'ನಿನ್ನಿರವನ್ನ' ಸಂಭ್ರಮಿಸೋದಾ ಅಥವಾ 'ನಿಮ್ಮಿರವು' ನಿನ್ನ ಆತ್ಮಸ್ತ ಸಂಭ್ರಮದ ತಾಯ್ಬೇರಾಗುವುದಾ? ಕೇಳಿ ಸುಮ್ನಾದೆ...
ಒಂದು ಕ್ಷಣ ಅವಳ ಬಿಡುಗಣ್ಣಲ್ಲಿ ಅಲೆಗಳು ಸ್ಥಬ್ದ ಚಿತ್ರ...
ನಿನ್ನನ್ನು ನೀನು ಸಂಭ್ರಮಿಸಲೂ ಅವರೇ ಬೇಕಿರುವಲ್ಲಿ ನಿನ್ನಿರವು ಹೇಗೆ ಬೇರೆ ಮೆರವಣಿಗೆಯಾಯಿತು ಅಂತಂದು ಮಾತು ಮುಗಿಸಿದೆ...
ಕರೆ ಅವರದ್ದೇ ಇರಬೇಕು - ಕೋಳಿ ಜಗಳ ಮುಂದುವರಿದಿದೆ... 
___ ಪಾಪ ನಾನು - ಒಂಟಿ ನಡಿಗೆ ಮುಂದುವರಿಸಿದೆ...
&&&

ಪ್ರೇಮ ಬೆಳಕು ಅಂತಾರೆ - ಬೆಳಕಲ್ಲಿ ಪ್ರೇಮಿಸಲು ಹೆದರುತಾರೆ...!!
ಕಾಮ ಕೂಪ ಅಂತ ಹಳಿಯುತಾರೆ - ಕಾಮವಿಲ್ಲದೇ ಪ್ರೇಮವ ಅದ್ಹೇಗೆ ಹಡೆಯುತಾರೆ...!! ಬೆಳೆಯುತಾರೆ...!!!
ದೇವನು ಅಮೂರ್ತ ಅನ್ನುತ್ತಲೇ ಅವನ ಚಂದ ಚಂದ ಮೂರ್ತಿಗಳ ಕಡೆದವರು ನಾವು... 
ಗೋಪುರಕೆ ಶ್ರೇಷ್ಠತೆಯ ಮೆತ್ತಿ, ಮೆಟ್ಟಿ ನಿಂತ ಮೆಟ್ಟಿಲನು ಮರೆಯುವುದಾ...
ನೆಲವ ತಬ್ಬಿ, ಮುಗಿಲ ಹಬ್ಬಿ ಮೋಹಕ ಮಾಯೆಗಳಲಿ ಸಹಜವಾಗಿ ಸಂವಾದಿಸುವುದು ಅಷ್ಟು ಕಷ್ಟವಾ...?!
___ ಪ್ರೇಮ - ಕಾಮ - ಪೊಳ್ಳು ಪಾವಿತ್ರ್ಯ... 
&&&

ವತ್ಸಾ -
ಹೊರಗಿಂದ ಒಂದಿಷ್ಟು ಭಾವನಾತ್ಮಕ ಸಂವೇದನೆಗಳ ಅಪೇಕ್ಷೆ ಪ್ರತಿ ಜೀವಿಯಲೂ ಸಹಜವಾಗಿ ಇದ್ದೇ ಇದೆ - ಅದು ತಪ್ಪಲ್ಲವೇ ಅಲ್ಲ... 
ಆದ್ರೆ ನಾವು ಮನುಷ್ಯ ಪ್ರಾಣಿಗಳು "ಇಂಥದ್ದೇ ವ್ಯಕ್ತಿಯಿಂದ ಇಂತೆಲ್ಲಾ ಸಂವೇದನೆಗಳು ಸಿಗಬೇಕು, ಆ ವ್ಯಕ್ತಿ ಮತ್ತು ಅವರ ಸಂವೇದನೆಯೂ ಇಂಥದ್ದೇ, ಇಂತಿಷ್ಟೇ ಸಂಯೋಜನೆಗಳಲಿ ಬೇಕು" ಅಂತ ಬಯಸಿ ಬೇಟೆಗೆ ಹೊರಡ್ತೀವಲ್ಲ, ಅಲ್ಲೇ ನಮ್ಮ ಭಾವ, ಬಂಧ, ಸಂಬಂಧಗಳ ಸೋಲು ಮತ್ತು ನೋವಿನ ಮೂಲವಿರೋದು... 
ನಮ್ಗೆಲ್ಲಾ, ತರಹೇವಾರಿ ಹೆಸರುಗಳ ಅಲಂಕಾರ, ಅಹಂಕಾರಗಳಿಲ್ಲದ ಭಾವ, ಬಂಧಗಳ ಸಹಜ ಸೌಂದರ್ಯದ ಬಗೆಗೆ ಏನಂಥಾ ಭಯವೋ ಕಾಣೆ...
___ ಅಲ್ಲಲ್ಲಿ ಸಿಕ್ಕ ಇನಿತು ನೇಹವನು ಅಂತಂತೇ ಅನುಭಾವಿಸಲರಿಯದೇ, ಇಲ್ಲೇಲ್ಲೋ ಬೇಕಾದಂತೆ ಸಿಗದ ಪ್ರೇಮದ ಅನುಭವಕಾಗಿ ಅನವರತ ಎದೆಯ ಗೆಬರ್ತಾ ಕೂತಿರ್ತೀವಿ... 
&&&

ಕೆಲವರೆಲ್ಲಾ
ಪಡೆದದ್ದು ನೆನಪಾಗಿ ಕಾಡಬಾರದೂ ಅಂತಲೇ ಕೊಡುವುದನ್ನು ಮರೀತಾರೇನೋ... 
___ ದುಡ್ಡು, ಸಮಯ, ಪ್ರೀತಿ ಎಲ್ಲವಕ್ಕೂ ಒಂದೇ ತೂಕ ಅಂತವರಲ್ಲಿ...
&&&

ವಿನಿಮಯವಾಗಲು 
ಕಣ್ಣಲ್ಲಿನ ಮುಗುಳುನಗೆಯೊಂದು ಸಾಕು 'ಕುಶಲೋಪರಿಗೆ...'
ಚರ್ಚೆ ವಿಚರ್ಚೆ ಕೂಡಲು
ಪ್ರಜ್ಞೆಯ ಸಮಾನ ಸಂಗತಿಗಳಿದ್ದರೆ ಸಾಕು 'ಅಭಿರುಚಿಗೆ...'
ಹರಿದು ಹಗುರಾಗಲು 
ನೀ ಕೇಳದೆಯೂ ನನಗೆ ನನ್ನೊಳಗನೆಲ್ಲ ಹೇಳಿಕೊಳ್ಳಬೇಕು ಅನ್ನಿಸುವ ಆಪ್ತತೆಯ ಜೀವ ಸೆಲೆ ಯೆದೆಯಾಳದಲಿ ಒಡಮೂಡಬೇಕು/ಪಡಿಮೂಡಬೇಕು "ಪ್ರೀತಿಗೆ, ನೋವಿಗೆ..." 
___ ಸಹಜ / ಗಂಭೀರ / ತೀವ್ರ ಒಡನಾಟ... 
&&&

ನಿಜಾ ಹೇಳ್ಲಾ -
ಮನಸು ಮಾತು ಕೇಳದೇ ನಿನ್ನ ಮಾತಾಡ್ಸದ್ದೇ, ಕಣ್ಣು ಚಡಪಡಿಸಿ ನಿನ್ನ ಹುಡ್ಕದ್ದೇ ನಿನ್ನ ಭವನದ ಬೀದಿಯಲೊಮ್ಮೆ ಓಡಾಡಬೇಕು - ಹಚ್ಚಿಕೊಂಡ ತಪ್ಪಿಗೊಂದು ಹರಕು ಪ್ರಾಯಶ್ಚಿತ್ತ (?) ಮಾಡಿಕೊಳ್ಳಬೇಕು... 
ಹಳತಾಗದ ಅಥವಾ ಹೊಸ ಹೊಸದಾಗಿ ಹಸಿಯಾಗಿ ಒಳಗೇ ಮಿಸುಗುವ ಹುಸಿಯಲ್ಲದ ಒಂದು ಮುನಿಸಿನ ಮುಯ್ಯಿ ತೀರಿಸಿಕೊಳ್ಳಬೇಕು... 
___ ತುಂಬು ಚಂದಿರನಲ್ಲೊಂದು (ನೇಹ) ಕಲೆಯಿದೆ... 
&&&

ವತ್ಸಾ -
ಇಷ್ಟೇ ಇಷ್ಟು ಬಳಕೊಂಡರೂ ಅಷ್ಟು ದೂರದತಂಕಾ ಘಮಗುಡುವ 'ವಿಕ್ಸ್‌ನ' ಪರಿಮಳ ಕಣ್ಣ ಹನಿಗಳ ಬಚ್ಚಿಡುವ ಎಷ್ಟೊಳ್ಳೆ ಮುಖವಾಡ...!! 
____ ಯಾರಿಗೂ ಹೇಳೋದು ಬ್ಯಾಡ, ಇದು ನಡುರಾತ್ರಿಯ ಜ್ಞಾನೋದಯ....... 🫣

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರ್ತೊಂಭತ್ನಾಕು.....

ನಾನೆಂಬ ಚಿರದಾಹಿಯೂ.....

ಒಂದೊಮ್ಮೆ ಜೀವದಷ್ಟು ಆಪ್ತರಾಗಿದ್ದವರು ಉದ್ದಾನುದ್ದ ವಾಕ್ಯಗಳ ರಚಿಸಬೇಕಿಲ್ಲ, ನೂರು ಕಥೆ ಹೇಳಬೇಕಿಲ್ಲ, ಸುಮ್ಮನೆ ಒಂದು ಆಪ್ತ 'ಹೂಂ'ಕಾರದಲೂ ಸ್ಪಂದಿಸಿಬಿಡಬಹುದು... 
ಒಂದೇ ಒಂದು ಕಿರು (ತೇ)ಭಾವಸೂಚಕ, ಅರ್ಧ ವಿರಾಮದ ಮಾತಲ್ಲಿ/ಸಂದೇಶದಲ್ಲಿ ಮನಸನು ತಬ್ಬಿ, ದೂರಾಬಾರಗಳ ಮೀರಬಹುದಾದಲ್ಲೂ ಸುಮ್ಮನಿದ್ದುಬಿಡಲು ಕಲಿತು, ಒಂದು ಸಹಜ ಕಾಳಜಿಯ ಪ್ರಶ್ನೆಗೂ ಉತ್ತರಿಸಲಾಗದಷ್ಟು ಕಾರ್ಯಕಾರಣದಲಿ ವ್ಯಸ್ತರಾದವರನ್ನು, ಭಾವ ನಿರ್ಯಾಣದಲಿ ಮೌನವಾದವರನು ಅವರ ಸುವ್ಯವಸ್ಥಿತ(?), ಗಂಭೀರ, ವೇಳಾಪಟ್ಟಿಯ ಬದುಕಲ್ಲೇ 'ಅವರದವರೇ ಹರಿಬಿಡಿಸಿಕೊಳ್ಳಲಿ' ಅಂತಂದು ಬಿಟ್ಟುಬಿಡುವುದು ಒಳಿತು... 
ವತ್ಸಾ,
ಅರ್ಥ ಮತ್ತೇನಲ್ಲ - 
ನಿನ್ನೊಡನಾಡುವ 'ಸ್ಪಂದನೆ'ಯ ತೇವ ಸತ್ತ ಮೇಲಷ್ಟೇ ಒಣ ಒಣ ಬಣ ಬಣ 'ಪ್ರತಿಕ್ರಿಯೆ' ಶುರುವಾಗುವುದು - ಒಂದಿನ ಅದೂ ನಿಂತೇ ಹೋಗುವುದು... 
ಪೂರ್ತಿ ನಿಲ್ಲುವ ತನಕ ಕಾಯುವುದಾ, ಇಲ್ಲಾ ಸಣ್ಣ ಸೂಚನೆಗಳಲೇ ಅರಿತು ಸೃಷ್ಟಿಯಾದ ಸೂಕ್ಷ್ಮ ಅಂತರವ ಒಪ್ಪಿಕೊಳ್ಳುವುದಾ - ಆಯ್ಕೆ ನಿನ್ನದೇ; ಕಾರಣ, ಆ ಪ್ರೀತಿ ನೇಹವೂ ನಿನ್ನದೇ ಆಗಿದ್ದಿದ್ದು...
ಸ್ಪಂದನೆ - ಪ್ರತಿಸ್ಪಂದನೆ, ಕ್ರಿಯೆ - ಪ್ರತಿಕ್ರಿಯೆಗಳೆಲ್ಲ ಹೋಗಿ ಈಗ ಬರೀ ಲೈಕು, ಲವ್ವಿನ ಎಮೋಜಿಗಳ ಮೂಲಕ ಆಪ್ತತೆಯ ತೂಕ ಅಳೆದುಕೊಳ್ಳುವ ಕಾಲ - ಹಾಗೆಯೇ ಈಗ ಅದಿದ್ದದ್ದು...
___ ಶ್ರೀ, ಹಂಗೋ ಹಿಂಗೋ ಹೆಂಗಾದರೂ ಉಳಿಸಿಕೊಳ್ಳುವುದ ಕಲೀಬೇಕಷ್ಟೇ - ಜೀವಭಾವವ... 
&&&

ಇನ್ನಾರೂ ಕೊಡಲಾರದ್ದನ್ನು ನಾನೇನು ಕೊಟ್ಟೆ ಅಂತ ಕೇಳಿದಳು... 
ಕೊಡಮಾಡದೇ ನಿನ್ನಲೇ ನೀನೇನ ಉಳಿಸಿಕೊಂಡೆ ಹೇಳೂ ಅಂದೆ...
ಉತ್ತರ ನಿರುತ್ತರಗಳ ಗಾಢತೆಗೆ ಎರಡೂ ಜೋಡಿ ಕಣ್ಣ ಕಲ್ಯಾಣಿಯಲಿ ಚಂದ್ರ ಕಲೆಸಿ ಹೋದ... 
ನಗ್ನ ಮೈಯ್ಯ ಪ್ರೀತಿ ಮೈಮುರಿದು ಮುದ್ದಾಗಿ ನಕ್ಕಿತು... 
___ ಕೊಟ್ಟ ರಾಣಿ - ಪಡೆದ ಬೈರಾಗಿ - ಎಂದೂ ತುಂಬದ ಕಾಲನ ಕೈಯ್ಯ ಭಿಕ್ಷಾ ಪಾತ್ರೆ... 🥹🫂
&&&

ಪ್ರೇಮವನು ವ್ಯಾಖ್ಯಾನಿಸೂ ಅಂದರೆ, 
ಮೈಮನಸಿಗಂಟಿದ ಬೆವರಿನತ್ತರಿನ ಘಮದಲಿ ಹೇಗೆಲ್ಲ ಹಬ್ಬಿ ತಬ್ಬಿದ ಯಾರ್ಯಾರ ಉಸಿರಿರುವುದೋ/ಹೆಸರಿರುವುದೋ ಎಂದು ಹುಡುಕಲಾಗದೆ ಸೋಲುತ್ತೇನೆ, ಮತ್ತದೇ ಚಂದಕೆ ಬೀಗುತ್ತೇನೆ...
"ಮನಸಿನ ಹಸಿ ಮಾತಿಗೆ ಮೈತಬ್ಬಿದ ಅನುರಾಗವೂ...
ಮೈಬಿಸಿಯ ತಿದಿ ತೀಡಿ ಮನಸಿಗೇರಿದ ಅನುಭಾವವೂ..." 
___ ನಾನೆಂಬ ಚಿರದಾಹಿಯೂ...
&&&

ಕೇಳೋ ಗೂಬೆ,
ನಿನ್ನ ಸಂಗದಿಂದ -
ಈ ಮನಸಿಗೆ ಸಿಕ್ಕಿದ್ದು ಚಿಟಿಕೆ ಪ್ರೀತಿ (?)... 
ಮೈತುಂಬಾ ನಿನ್ನ ರಕ್ಕಸ ಉನ್ಮಾದದ ಉಸಿರ ಗುರುತು... 
ಇಂದು, ನಾಳೆಗಳಿಗೆ ಉಳಿದದ್ದು 
ಕೆಟ್ಟ ಕನಸೆಂದು ಮರೆಯಲಾಗದ 
ಇರುಳ ಕಂಗಳ ತೋಯಿಸೋ ನೆನಪುಗಳ ನವೆ... 
ಸುಮ್ಮನೆ ಗಾಳಿ ಸೋಕಿದರೂ ತುರಿಕೆ, ಪರಪರ ಕೆರೆದರೆ ಗಾಯ...
ಹೇಯ್,
ತುಂಬಾನೇ ದುಬಾರಿಯಾಯಿತು ಕಣೋ ನಿನ್ನಾ ನೇಹ... 
___ ಎಷ್ಟು ಚಂದಿತ್ತು - ನೀ ಸಿಗುವ ಮುಂಚಿನ ನಾನು ನಂಗೆ ಮತ್ತೆ ಸಿಗುವಂತಿದ್ದಿದ್ದರೆ.... 
&&&

ವತ್ಸಾ -
ಕೊಡೋದ್ರಲ್ಲಿ ನಂದ್ಯಾವತ್ತೂ ಮೋಸ ಇಲ್ಲ...
ನಾನು ನನ್ನ ನೂರು ಪ್ರತಿಶತ ಕೊಡ್ತೇನೆ - ಹೊತ್ತುಗೊತ್ತಿಲ್ದೇ ಅವರ್ನ ಖಷಿಯಾಗ್ಸೋಕೆ ನನ್ನೆಲ್ಲಾ ಶಕ್ತಿ, ಯುಕ್ತೀನ ವಿನಿಯೋಗಿಸ್ತೇನೆ ಗೊತ್ತಾ... 
ಆದ್ರೇ..........
ತಡಿ, ತಡಿ, 
ಚೂರು ನಿಲ್ಲು... 
ಎಲ್ಲ ಎಲ್ಲಾ ಬಸಿದು ಕೊಡೋಕ್ಮುಂಚೆ ನೀನ್ ಕೊಡ್ತಾ ಇರೋದು 'ನೀನು ಬೇಕೂ' ಅನ್ನೋರಿಗಾ ಅಥ್ವಾ 'ನಿಂಗೆ ಬೇಕೂ' ಅನ್ನಿಸೋರಿಗಾ ಅನ್ನೋದನ್ನ ಒಮ್ಮೆ ಗಮನಿಸ್ಕೊಂಡಿದೀಯಾ...?! 
ಇಲ್ಲಾಂದ್ರೆ ಆಮೇಲೆ ಹೀಗೆ, 
ನಲಿನಲಿದು ನೀಡಿ ನೀಡಿ ತುಂಬಿಕೊಂಡ ಹಾಯೀ ಭಾವ ಮೂಡಬೇಕಾದಲ್ಲಿ, ಹಲ್ಮೊಟ್ಟೆ ಕಚ್ಚಿ ಕೊಟ್ಟು ಕೊಟ್ಟು ಖಾಲಿಯಾದ ನಿತ್ರಾಣ ತುಂಬಿಕೊಳ್ಳುತ್ತೆ...
ಏನ್ಗೊತ್ತಾ,
ಅಪಾತ್ರ ದಾನ ಅತೀ ಆದ್ರೆ - ನಿನ್ನಲ್ಲಿ ಮುಂದೆ ಕೊಡುವುದಕ್ಕೂ ಏನೂ ಉಳಿದಿಲ್ಲ ಮತ್ತು ಯಾರೋ ನಿಂಗೆ ಕೈಯ್ಯೆತ್ತಿ ಕೊಡ್ತೀನಂದ್ರೆ ಮಡಿಲೊಡ್ಡೋಕೂ ಧೈರ್ಯ ಸಾಕಾಗದೇ, ಭರಪೂರ ಸಿಕ್ರೆ ನಗುವನೂ ನಂಬೋ ಗುಂಡಿಗೆ ಇಲ್ಲ ಅನ್ನಂಗಾಗೋಗತ್ತೆ... 
ಒಂದೋ, 
ವಿನಾಕಾರಣ ಹಂಚಿ ಸುಖಿಸುವುದ ಕಲಿ (*ಇದು ಬಲು ಕಷ್ಟ ಮತ್ತು ಬಲು ಚಂದ)...
ಇಲ್ಲಾ, 
ಮೊಗೆದು ಕೊಟ್ಟದ್ದನ್ನೊಂಚೂರು ಮರಳಿ ಬಯಸ್ತೀಯಾದರೆ, ಕೊಳಗದಲಿ ಪಡೆದರೆ ಅಟ್ವೆಯಷ್ಟಾದರೂ ತಿರುಗಿ ಕೊಡುವ ಮನಸೂ, ಕನಸೂ ಇರೋ 'ನೀನು ಸಾಕೆನಿಸುವುದಿಲ್ಲ' ಅನ್ನೋರಿಗೆ ಕೊಡು (* ಕೊನೇಪಕ್ಷ, ಪಡಿ ಪಡೆಯುತ್ತಿರುವಷ್ಟು ಹೊತ್ತಾದರೂ ಹಿಡಿ ನಗೆಯ ಮುಡಿ ತುಂಬ್ತಿರ್ತಾರೆ)... 
ಹೆಚ್ಚಿನ್ಸಲ, 
ನಾವು ನಮ್ಗೆ ಕೊಡ್ತೀನನ್ನೋರಿಗೆ  ಬೆನ್ನು ಹಾಕಿ, ನಮ್ಗೆ ಬೆನ್ನಾಗಿ ಹೋಗ್ತಿರೋರ ಹಿಂದೆ ಓಡ್ತಾ ಇರ್ತೇವೆ - ಬೆನ್ನಿಗೆ ಕಣ್ಣಿಲ್ಲ ನೋಡೂ...
ಆಗ, 
ಯಾರ್ಗೂ ಯಾರ ಮುಖವೂ ಕಾಣದ, ಕಣ್ಣ ಕನ್ನಡಿಯಲೊಂದು ಹನಿಗವಿತೆಯೂ ಹುಟ್ಟದ ಸ್ವಯಂ ಮರುಕದ ಒಣ ವೇದನೆಯಷ್ಟೇ ಉಳಿಯುತ್ತೆ ನಮ್ಮೆಲ್ಲರಲೂ...
___ ಪ್ರೀತಿ ಪ್ರೇಮ ಪ್ರಣಯ ಪಂಚಾಯ್ತಿ... 
&&&

ಮನೆಯಂಗಳದಿ ಗ್ರೀಷ್ಮದ ಬಾಗಿಲು ಇನ್ನೇನು ತೆಗೀತಾ ಇದೆ... 
ಹೊಂಗೆ ಹೂವಿನ ಹಾಸಿಗೆ ಹಾಸಿದ ಬೀದಿ...
ಗಡಿಬಿಡಿಯಿಂದ ರಸ್ತೆ ದಾಟೋ ಹೆಗ್ಗಣ, 
ಎಸೆದಿಟ್ಟ ಕಸದ ಗುಡ್ಡೇಲಿ ಏನೋ ಹುಡುಕಾಡೋ ಬೆಕ್ಕಿನ ಮರಿಗಳು, 
ಬೆಳಗಿಂದ ಕಾದಿಟ್ಕೊಂಡು ಈಗ ಯಜಮಾನನ ಆಜ್ಞೆಗೆ ತಕ್ಕಂಗೆ ಖಾಲಿ ಮಾಡಲು ಹೊರಟ ಜಾತಿ ಕುನ್ನಿಗಳು, 
ಮನೆ ಸೇರೋ ಗಡಿಬಿಡಿಯ ಗಾಡಿಗಳು,
ಕಿಟಕಿಯಿಂದ ಜಾರಿ ಹಾದಿಯ ಕಿವಿಗೆ ಬೀಳೋ ಮನೆ ಮನೆಗಳ ಒಳಮನೆಯ ಕಿರುನಗೆ, ಹುಸಿ ಮುನಿಸಿನ(?) ಜಗಳಗಳು,
ಸೂರು ಬೆಳಗೋ ಕನಸಿನ ಮೂರು ಕಾಸಿನ ದುಡಿಮೆಗೆ ಬೆಳಗಿಂದ ಸುಳ್ಳು ನಗೆ ನಕ್ಕು ನಕ್ಕು ಸುಸ್ತಾಗಿ ತಡ ರಾತ್ರಿ ಮನೆ ಸೇರೋ ಧಾವಂತದಲಿ ಗುಡು ಗುಡು ನಡೆಯೋ ಹುಡುಗ ಹುಡುಗೀರು, 
ನಡು ರಾತ್ರಿಯಲೂ ಇದೇ ಸಹಜ ಅನ್ನಿಸುವ ಎಷ್ಟೆಲ್ಲಾ ಗಜಿಬಿಜಿ...
ಮುಗಿದ ನಿನ್ನೆಗಳ ಗಾಯಗಳ ಕೆರೆಯುತ್ತಾ, ಸಿಗದ ನಾಳೆಗಳ ಹೊಲಿಯಲು ಹೆಣಗುತ್ತಾ, ಹಳಹಳಿಕೆಯಲಿ ಬದುಕನೇ ಹಳಿಯುತ್ತಾ, ಅಬಲಾಶೆಯ ಹಸಿವು ತೀರದೇ, ನಿದ್ದೆ ಬಾರದೇ - ನಗರ ಬೇಗ ಮಲಗುವುದಿಲ್ಲ, ಮಲಗುವುದೇ ಇಲ್ಲವೇನೋ... 
ಹೊಸ ರುಚಿಯ ಕಾಳಿನಾಸೆಗೆ ಪಂಜರಕೆ ಬಂದು ಬಣ್ಣದ ಮಾತು ಕಲಿತ ಗಿಳಿ...
ಕತ್ತಲು ಕಾಣದ ಪೇಟೆಯಲ್ಲಿ, ಗದ್ದಲವೇ ಮೈಗೂಡಿ, ಮಸಣಕೂ ಇರುಳ ಮೌನದ ಕಥೆ ಕೇಳಿದರೆ ಭಯವಾದೀತು...
ಮನೆಯಂಗಳದಿ ಗ್ರೀಷ್ಮದ ಬಾಗಿಲು ಇನ್ನೇನು ತೆಗೀತಾ ಇದೆ... 
ಹೊಂಗೆ ಹೂವಿನ ಹಾಸಿಗೆ ಹಾಸಿದ ಬೀದಿ - ಅದೇ ಅಷ್ಟಿಷ್ಟು ಬೆರಗು, ಭರವಸೆ... 
___ ಒಂದಿರುಳ ಬಣ್ಣಗಳು...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರ್ತೊಂಭತ್ಮೂರು.....

ಬೆಳಕು ನುಡಿಸುವ ವಿಶ್ವ ಪ್ರೇಮದ ಗೀತೆ - ಬೆಳಗು.....🤝🫂

ವೀಡಿಯೋ ಸೌಜನ್ಯ: ಗೆಳತಿ ವೀಣೆ...

ಅಂದ ಚಂದ ಗಂಧಗೂಡಿ ಮೈದಳೆವ ಹೂ ಬೆಳಕಿನ ಮರಿಗಳ ಸೊಬಗು...
ಹೂವೂ, ಚಿಟ್ಟೆಯೂ, ಕಿಟ್ಟಾಟವಾಡುವ ಬೇಲಿಯಿರದ ಬಾವ ಬೆಡಗು...
ಯೆದೆಯ ಕಣ್ಣು ತುಂಬಿ ತುಳುಕೋ ಪ್ರೀತಿಯ ಬಣ್ಣಾ ಬಣ್ಣ ಬೆಳಗು...
ಶುಭದಿನ... 🤝🫂

ಬೆಳಗೆಂಬ ಒಲವ ಮಾಯೆ...
ಒಲವೆಂಬ ಬೆಳಕ ಛಾಯೆ... 
ಶುಭವದೇ - ಪ್ರೀತಿಯು ಪ್ರೀತಿಯ ನಗೆಯ ಕಾಯೆ... 
ಶುಭದಿನ... 🤝🫂

ಅಕ್ಷಿಗಳ ಕಕ್ಷೆಯಲಿ ಬೆಳಕು ಬಣ್ಣಾ ಬಣ್ಣಗಳ ರಂಗವಲ್ಲಿಯನಿಡುವ ಹೊತ್ತು... 
ಬೆಳಗಾಯಿತು - ಯೆದೆಗೂ ಇಷ್ಟು ಒಲವ ಗೆಲುವ ಬಣ್ಣ ತುಂಬಲಿ... 
ಶುಭೋದಯ... 🤝🫂

ಬೆಳಗಾನೆದ್ದು ಬೆಳಕಿನ ವಾಮನ ಪಾದ ಎದೆಯ ತುಳಿದರೆ ಉಸಿರುಸಿರೂ ಬೆಳಕೇ ಆಗಿ ಕಣ್ಣು ಹರಿದಲ್ಲೆಲ್ಲಾ ಪ್ರೀತಿ ಸಾಮ್ರಾಜ್ಯ...
ನಗೆಯ ಕೋಶ ತುಂಬಿ ತುಳುಕಿ ತ್ರಿಕಾಲವೂ ಶುಭದ ಸುಗ್ಗಿ...
ಶುಭದಿನ... 🤝🫂

ಬೆಳಕು ನಿನ್ನೂರ ದಾರಿ ತೋರಬಹುದು...
ಅಥವಾ 
ನೀನೇ ಬೆಳಕಿನ ಹಾದಿಯಿರಬಹುದು...
ನಾನೋ (ತು)ಹುಡುಗು ಬುದ್ಧಿಯ, ಖುಷಿಯ ಹುಡುಕಾಟದ ಬಡ ಪಥಿಕನು...
ಬೆಳಕೇ -
ನನ್ನ ಬಂಡಿಯ ನಕ್ಷೆ ನಿನ್ನ ಕಕ್ಷೆಯ ಮೀರದಂಗೆ ನೀನೇ ಕಾಯಬೇಕು...
ಪ್ರೀತಿ ಪ್ರೀತಿ ಬೆಳಗು - ನಗೆಯ ಗುನುಗು ಬೆಳಗು...
ಶುಭದಿನ... 🤝🫂

ಒಂದು ಹೆಜ್ಜೆ ನಗೆಯ ಕಡೆಗೆ...
ಪ್ರೀತಿ ಪಾರಾಯಣ ಬೆಳಗು...
ಶುಭದಿನ...🤝🫂

ಬಣ್ಣದಲದ್ದಿದ ಪಾದದ ಕೂಸು ಊರೆಲ್ಲ ಅಲೆದು ಹಾದಿ ಬೀದಿಯ ಮೈತುಂಬಾ ಬಣ್ಣದಾ ಹೆಜ್ಜೆಯ ಹಚ್ಚೆ ಗುರುತು...
ಪ್ರೀತಿ ಕೋಡಿ ಹರಿದಾಂಗೆ ಬಿಚ್ಚು ನಗೆಯ ಹಂಬಲದ ಹೂಬೆಳಗು...
ಶುಭದಿನ... 🤝🫂

ಕನಸಿಂದ ಕಣ್ತೆರೆದರೆ ಬೆಳಕು ಕಸುವಾಗಿ ಎದೆ ತುಂಬಿ; ಬೆಳಗೆಂದರೆ ಕರುಣಾಳು ಕಲ್ಪತರು...
ಶುಭದಿನ... 🤝🫂

ಬೆಳ್ಳಂಬೆಳಗು ಬೆಳಕಿನುಡಿಯಿಂದ ನಗೆ ಮುಗುಳ ಹೆಕ್ಕಿ ತಂದು ಯೆದೆಯಂಗಳವ ಸಿಂಗರಿಸೆ, ದಿನದ ಪುಸ್ತಕದ ನಡುವೆ ಶುಭದ ನವಿಲುಗರಿ ಮರಿ ಹಾಕಬಹುದು...
ಶುಭದಿನ... 🤝🫂
&&&

ಮುರಿದ ಕೊಂಬೆಯ ಮೈಸವರಿದ ತಂಗಾಳಿ ಪ್ರೀತಿಯದ್ಯಾವುದೋ ಗುಟ್ಟು ಹೇಳಿರಬಹುದು... 
ಬೆಳುದಿಂಗಳ ಹಾಲ್ಕುಡಿದ ಮುದಿ ಎಲೆಯು ಮರು ಜನುಮದ ಕಥೆಯ ನಂಬಬಹುದು... 
ಶುಭವನೇ ಎಣಿಸುವ ಯೆದೆಯಾದರೆ, 
ಇರುಳ ಮಡಿಲಲಿ ಬೆತ್ತಲು ಪ್ರೀತಿಯ ಹಡೆಯಬಹುದು - ಕತ್ತಲ ಸೆರಗ ಹೊದ್ದು ಪ್ರೀತಿ ಬೆತ್ತಲಾಗಲೂಬಹುದು... 
ಶುಭರಾತ್ರಿ... 💞

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರ್ತೊಂಭತ್ತೆರಡು.....

ಪ್ರೇಮ ಪಂಚಾಕ್ಷರಿಯ ಗುನುಗು ಬೆಳಗು.....

ಭವದ ಭವ್ಯತೆಗೆ ಭಾವದ ದಿವ್ಯತೆಯ ತುಂಬಿ ದೇವ ದುಂದುಭಿಯಂತೆ ಧರೆಗಿಳಿದ ಬೆಳಕು ಎದೆಗೂ ಇಳಿಯಲಿ...
ಪ್ರೇಮ ಪಂಚಾಕ್ಷರಿಯ ಗುನುಗು ಬೆಳಗು...  
ಶುಭದಿನ...🤝🫂

ಬೆಳಗು ಮಳೆಯಾಗಿ ಹಬ್ಬಿ ಇಳೆಯ ತಬ್ಬುತಿದೆ...
ಪ್ರೀತಿ ಬೆಚ್ಚಾನೆ ನೆನಪಾಗಿ ನಗೆಯಾಗಿ ರುದಯವ ತಬ್ಬಲಿ...
ಹೃದಯದ ದಿನವಿದು ಪ್ರೀತಿಯ ಬನವಾಗಲಿ...
ಶುಭದಿನ...🤝🫂
___29.09.2026

ನೀನು ಕಣ್ಣಲಿ ಮಿಡಿದ ನಗೆಯ ಕಂಪನ
ಎನ್ನ ಯೆದೆಯಲಿ ದೇವರಾಗವಾಗಿ ಮೆಲ್ಲನನುರಣಿಸಿ
ಬೆಳಗೆಂದರೀಗಿಲ್ಲಿ ಶುಭದ ಸುಗ್ಗಿಯ ಹಾಡು...
ಶುಭದಿನ... 🤝🫂

ಕಣ್ಣುಜ್ಜಿ ನಿದ್ದೆ ಪರದೆಯ ಹರಿದರೆ, ಎದುರಾದ ಕನ್ನಡಿಯಲೊಂದು ನಗೆಯ ಮಿಂಚನು ಕಂಡು ಜೀವ ಹೂವಾಯಿತು... 
ಬೆಳಗಾನ ಬೆಳ್ಳಂಬೆಳಕು ನೆತ್ತಿ ತೋಯಿಸೋ ಹೊತ್ತು ನನ್ಮೇಲೇ ನಂಗೇಕೋ ಸಣ್ಣ ಪ್ರೀತಿಯಾಯಿತು... 
ಈ ಇಂಥ ಬೆಳಗು ಶುಭವಲ್ಲದೆ ಇನ್ನೇನು... 
ಶುಭದಿನ... 🤝🫂

ಬಾಗಿಲಿಲ್ಲದ ಬಯಲಲ್ಲಿ ಇರುಳ ಕತ್ತಲ ಕರಿ ಚಾದರ ಹೊದ್ದು ನಿದ್ದೆ ಹೋದ ಬೆಳಕು ಯಾವ ಮಗ್ಗುಲಲೆದ್ದು ಕಣ್ಬಿಟ್ಟರೂ ಬೆಳಗಾಗುತ್ತದೆ ಎಂದಿನಂತೆ... 
ನಾನೋ ಒಳಿತಾಗಲೆಂದು ಬಲಮಗ್ಗುಲಲೆದ್ದು, ಶುಭವ ಹುಡುಕಲು ಗುಡಿಸಲ ಬಾಗಿಲ ತೆರೆದು ಬೀದಿಯ ಹಾದಿಯ ಎದೆಮೇಲೆ ಪಾದವೂರುತ್ತೇನೆ ಎಂದಿನಂತೆ... 
ಇಂದೂ ಅಥವಾ ಇಂದಾದರೂ ಶುಭವಾಗಬಹುದು... 
ಶುಭದಿನ... 🤝🫂

ಬೆಳಕು ಸಾವಿರ ಕಿರಣಗಳಾಗಿ ಬಯಲಿಗೆ ಬಿದ್ದು ಬೆಳಕೇ ಬೆಳಕಾಗಿ ಬೆಳಗುವಂತೆ;
ಶುಭವೂ ನೂರಾರು ಹೋಳುಗಳಾಗಿಯೇ ಬದುಕ ಬಾಗಿಲೆದುರು ಹರಿಯುವುದು, ಎನ್ನ ಬೊಗಸೆಗೆ ಸಿಕ್ಕಷ್ಟನು ಉಂಡು ನಗುವುದ ಕಲೀಬೇಕು ಆನು... 
ಅಲಾರಾಂ ಕರೆಯುತಿದೆ - ಯಾವ ಪ್ರೀತಿ ಬಾಗಿಲು ಬಡಿಯುವುದೋ ಈ ಹಗಲಿಗೆ... 
ಉಸಿರ ಬಿಸಿಗೆ ಶುಭದಿನ... 🤝🫂

ಅಲ್ಲಾ, 
ಎಷ್ಟು ಪ್ರೀತಿಯ ಕುಡಿದರೆ ಬೆಳಕಾಗಬಹುದು...!? 
ಅವನ ಒಡಲ ನಿಗಿನಿಗಿ ಬೆಂಕಿ ಬೆಳಕಾಗಿ ಹರಿದು ಅಲ್ಲಿಂದಿಲ್ಲಿಗೆ ಬರುವ ಹಾದಿಯಲಿ ಅದೆಷ್ಟು / ಅದೆಂತ ಪ್ರೀತಿ ಪೇಯವ ಕುಡಿದಿರುತ್ತೋ ಕಾಣೆ, ನನ್ನ ತಾಕುವ ಹೊತ್ತಿಗೆ ಸುಡುವುದನೇ ಮರೆತಿರುತ್ತದಲ್ಲ...!! 
ಎಷ್ಟು ಬೆಳಕ ಕುಡಿದರೆ ನಾ ಪ್ರೀತಿ ಕವಿತೆಯಾಗಬಹುದು...!? 
ಪ್ರೀತಿ ಪ್ರೀತಿ ಬೆಳಗು... 🤝🫂

ಯೆದೆಯ ಬೆಳಕಲಿ ಮಿಂದು ಸಿಂಗಾರಗೊಂಡ ಸಿರಿ ಪ್ರೀತಿ 
ಬಯಲ ಬೆಳಕಲಿ ನಗೆ ಕನಕ ಹಂಚಲು ನಿಂತು 
ಬಾಚಿ ತಬ್ಬಲಿ ತಬ್ಬಲಿ ಜಗವನು...
ಪ್ರೀತಿ ನಗೆಯಲಿ ಬೆಳಗು ಸಿರಿವಂತ... 
ಶುಭದಿನ...🤝🫂

ಜಗದ ಬೆಳಕಿನ ಬಯಲಲಿ ಯೆದೆಯ ಬೆಳಕು ಮೆರೆಯಲೀ... 
ನಡೆವ ಹಾದಿಯ ಉದ್ದಕೂ ಪ್ರೀತಿಯನು ಪ್ರೀತಿಯೇ ಎದುರ್ಗೊಂಡು ತಬ್ಬಲಿ... 
ಶುಭದಿನ... 🤝🫂

ಹುಡುಕಿ ಹೊರಟ ನಗೆಯು ಬಾಗಿಲಿಗೇ ಬಂದು ನಿಂದಂಗೆ ಬೆಳಗಾಗುವುದು - ಬೆಳಕಿನ ಪ್ರೀತಿಯ ಮಳೆಯಾಗುವುದು... 
ರಂಗೋಲಿ ತುಳಿದಾಡುವ ಮಗುವಂಥಾ ಬೆಳಗು... 
ಶುಭದಿನ... 🤝🫂

ಒಂದೆಳೆ ಪ್ರೀತಿ ಅಕ್ಕರೆಯ ಬಂಧ ಕೈಹಿಡಿದು ಹಾದಿಯುದ್ದಕೂ ಕಾಯುವುದು... 
ಬೆಳಕು ಆ ಪ್ರೀತಿಯ ಅಕ್ಕರದ ಸಕ್ಕರೆ ನಗುವಿನ ನಡೆ ನುಡಿಗೆ ಪ್ರೀತಿಯ ಸಾಕ್ಷಿಯಾಗುವುದು... 
ಬೆಳಗೆಂಬ ಪ್ರೀತಿ (ರ)ಕಕ್ಷೆ... 
ಶುಭದಿನ... 🤝🫂

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರ್ತೊಂಭತ್ತೊಂದು.....

ಪಾಪಿ ಚಿರಾಯುವಂತೆ.....
(ಸುಡು ಮಣ್ಣಲಿ ಹುಟ್ಟಿದ ಗಟ್ಟಿ ಪಿಂಡ.....)

ಅಗೋ ಅಲ್ಲಿ ಬಿದ್ದಿರುವ ಹೆಣ ಎನ್ನದೇ...

ಉಸಿರಿಗೆ ನಿನ್ನ ನೆನಪ ಪೂಸಿಕೊಂಡು
ಕನಸಿನ ಕಾವ್ಯಕೆ ಕಾವಿಲ್ಲದೇ
ಅಗೋ ಅಲ್ಲಿ ಬಿದ್ದಿರುವ ಹೆಣ ಎನ್ನದೇ... 
___ ಚೂರೇ ಚೂರು ಜೀವಂತಿಕೆಗಾಗಿ ನೂರು ನೂರಾರು ಬಡಿವಾರಗಳು... 
&&&

ಬದುಕಿದ್ದು, ಬದುಕಲಾರದ್ದು, ಬದುಕಬಾರದ್ದು ಎಲ್ಲವನು ಬರೆದು ಬರೆದು ಬದುಕಿನ ಬರಡುತನವ ನೀಗಿಕೊಳ್ಳಲು ಹೆಣಗುವುದು... 
__ ಹುಟ್ಟು ಎಷ್ಟೆಷ್ಟನ್ನೋ ಬರೆದೇ ಇಲ್ಲ, ಸಾವು ಬರೆಯುವಂಥದನ್ನ ಓದಲು ನಾನಿರಲ್ಲ, ಅದಕೇ ಬದುಕನ್ನು ಬರೆದು ಬರೆದು (ಸಾ)ಹಾಯುವುದು...
&&&

ಒಂದು ಎಳ್ಳಿನ ಮೊನೆಯಷ್ಟೂ ಶ್ರಮವಿಲ್ಲದೇ ನಾನಿಲ್ಲಿ ಹುಟ್ಟಿ ಆಗಿದೆ, ಹಂಗಂಗೇ ಸಾವಾಗುವುದೂ ಖರೇ ಖರೇ, ಇನ್ನೇನು, ಅವುಗಳ ನಡುವೆ ಇರುವ ಈ ಬದುಕನ್ನು ಮಾತ್ರ ನಾನೇ ಶ್ರಮವಹಿಸಿ, ಪ್ರೀತಿ ತುಂಬಿ ಆಗಮಾಡಿಕೊಳ್ಳಬೇಕು... 
___ ಹುಟ್ಟಿನೀ ತೇದಿಗೆ ನಗೆಯದಲ್ಲದೇ ಇನ್ನಾವ ಬಣ್ಣ ಬಳಿಯಲಿ... 
&&&

ಸತ್ತವನೆದೆಯಲಿ ಕವಿತೆ ಹುಟ್ಟುವುದಿಲ್ಲ... 
ಕವಿತೆ ಕಟ್ಟಿದವನು ಸಾಯಲಿಕ್ಕಿಲ್ಲ... 
___ ನಗು... 
&&&

ಗೆದ್ದೆನೆಂದು ಸುಳ್ಳೇಪಳ್ಳೇ ಬೀಗುವ ನಾನು 
ಗೆಲ್ಲಿಸಿದ ಖುಷಿಯಲಿ ಕಣ್ತುಂಬಿ ನಗುವ ನೀನು 
ನಡುವೆ ಹರಿವ ಎಷ್ಟು ಎಷ್ಟೋ ಪ್ರೀತಿ ನದಿಗಳು... 
___ ರುದಯ ದುಂಬಿಯ ಹಾಡು... 
&&&

ಎನ್ನ ಭೇಟಿ ಆಗಿಲ್ಲ ನಿನಗಿನ್ನೂ - ಪ್ರೀತಿಯದೆಂತು ಪರಿಚಯವಾದೀತು... 
ಒಳನಾಡಿಗಳಲಿ ಒಡನಾಡಬಾರದೇ... 
___ ಹೂದುಂಬಿ ಸಂಪುಟ... 
&&&

ವತ್ಸಾ -
ನಿಂಗೆ ನೀನು ತುಂಬಾ ಬದುಕು ನೋಡಿಬಿಟ್ಟಿದೀನಿ ಅನ್ಸತ್ತೆ ಅಂದ್ರೆ, ಹಂಗಂತ ನಿನ್ನ ನೀನು ನಂಬಿಸಿಕೊಂಡು, ನಿನ್ನ ಸುತ್ತಲೂ ಅದನ್ನೇ ಒಪ್ಪಿಸಲು ಹೆಣಗುವಿಯಾದರೆ, ನಿನ್ನ ನೋಟ ತುಂಬಾನೇ ಬಾಲಿಶವಾಗಿದೆ ಅಂತಲೇ ಅರ್ಥ... 
ಚಿತೆಯ ಉರಿಗೆ ಬಾಡಿದ ಮಸಣದ ಹೂಬಳ್ಳಿಯ ಮಾತಾಡಿಸಬಲ್ಲೆಯಾದರೆ ಹೇಳು, ಆಗ ಚೂರು ಒಪ್ಪಬಹುದು ನೋಡು ನಿನ್ನಾ ಬಕ್ಕಣದ ಬಿಗುಮಾನವ... 
___ ರುದಯ ಕಂಡು ನಾಲಿಗೆ ಕುಣೀಬೇಕು ಕಣಾ...
&&&

ನಾಳಂಗ್ ಬೆಳ್ಕ್ ಹರಿಯೂ ಹೊತ್ತಿಂಗೆ ನಾ ಸತ್ ಬಿದ್ರೆ ಕಡೀಗೆ ನಿನ್ಗೆ ಎನ್ ಬಗ್ಗೆ ಯಾವಾಗೂ ಎಂತಾ ನೆನ್ಪವ್ತಾ ಇರ್ತು ಅಂತ ಕೇಳೀರೆ ಎಂತಾ ಹೇಳ್ಲೀ...
ನೆನಪಪ್ಲೆ ಎಂತಾ ಉಳ್ದಿರ್ತು, ಎನ್ಗೆ ಆನೇ ಮರ್ತೋದ್ಮೇಲೆ...
ಜೀವ ಚಟ್ಟದ್ ಮೇಲಿಲ್ಲೆ ಹೇಳೂದ್ ಒಂದ್ ಬಿಟ್ರೆ ಹೆಣಕ್ಕೂ ಯನ್ಗೂ ಅಂತಾ ವ್ಯತ್ಯಾಸ ಏನಿರ್ತ್ಲೆ ಬಿಡು...
ಇಲ್ಲದ್ದೋದ್ ಹಲ್ಬೂದ್ ಬಿಟ್ಟು ಸುಮ್ಮಂಗಿಪ್ಪೂದ್ ಕಲಿ ಮಾತ್ರ...
___ ನೇಹ ಸಾನಿಧ್ಯ - ಬದುಕೆಂಬೀ ಕಥೆಯ ಪಾತ್ರಗಳು...
&&&

ನಿನ್ನ ಪ್ರೀತಿಯ ಛಾಯೆ ಕಾಯುವ ನನ್ನ ಹಾದಿಯ ತುಂಬಾ ನಗೆಯ ಮರಿಗಳ ಗಲಗಲ ಗದ್ದಲ...
ಈ ಬದುಕು, ಇದರ ಬಾಗು ಬಳುಕು ನಿನ್ನ ಪಡಿಯಚ್ಚು... 
ನಗೆಯ ಗಣಿ ನಿನ್ನ ಒಡಲು - ನಂದೂ ತಾನೇ ನಿನ್ನ ಮಡಿಲು... 
ಅಲ್ವಾ!
"ನನ್ನದಾಗಿದ್ದನ್ನಷ್ಟೇ ನಾನು ಬಿಟ್ಟು ಕೊಡಬಹುದು, ಹಂಚಿ ಹರಿಯಬಹುದು"  ನೋಡೂ...!! 
ಅದಕೇ -
'ನಗು' ನನ್ನ ಜಗದ ಗುರುತು... 😊
&&&

ಇಲ್ಕೇಳು - 
ನೋಡಿ, ಒಡನಾಡಿ, ಕೂಡಿಯಾಡಿದವರ ವಿರಹ, ವಿರಾಗ, ವಿದಾಯಗಳಿಗಿರುವ "ಎಲ್ಲೋ ಹೇಗೋ ಚಂದ ಇದ್ರಾತು ಬಿಡು" ಅನ್ನೋ ಹಾರೈಕೆಯ ಕನಸಿನ ಕಾರುಣ್ಯ 'ವಿಯೋಗ'ಕ್ಕೆ ಇಲ್ಲ ನೋಡು... 
ಅದಕೇ
ಯೆದೆಗಂಟಿದವರ, ಒಡಲ ಮರಿಗಳ ಮರಣದೆದುರಿನ ಖಾಲಿತನದಿಂದೆದ್ದ ಕೈಕಾಲೇ ಆಡದ ಅಸಹಾಯ ಭಾವವೊಂದು ಆ ಮುಂದಿನ ಅಡಿಅಡಿಗೂ ಕರುಳ ಸಿಕ್ಕುಗಳೆಡೆಯಲಿನ ಮಾಯದ ಹುಣ್ಣಂತೆ ಕಾಡುತ್ತಿರುತ್ತದೆ... 
ಹಾಗೆಂದೇ
ತನ್ನ / ತನ್ನವರ ಸಾವಿನ ಸುಳ್ಳು ಕನಸಿಗೂ ಕಣ್ಣು ಕೋಡಿ ಬೀಳುತ್ತದೆ... 
ಏನಿಲ್ಲ
ಕಣ್ಣೊರೆಸ್ಕೋ - ನಾನಿನ್ನೂ ಬದ್ಕೇ ಇದ್ದೇನೆ... 
ಪಾಪಿ ಚಿರಾಯುವಂತೆ... 
ನಾನೋ ಪಾಪವೇ ಮೈವೆತ್ತಿದ ಪ್ರಾಣಿ... 
&&&

ಪಾಪಿ ಚಿರಾಯುವಂತೆ... 
ನಾನೋ ಹುಟ್ಟಾ ಪರಮ ಪಾಪಿ ಪ್ರಾಣಿ - ಸುತ್ತಾ ಪಾಽಽಪದ ಜೀವಗಳು... 
___ ಈ ನೆತ್ತಿ ಕಾಯ್ವ ನೇಹದ ನೆಂಟಸ್ತಿಕೆಗಳು... 
&&&

ಮಮಕಾರದ ಮಡಿಲೇ -
ಸ್ವಾತಂತ್ರ್ಯವ 'ಕೊಡುವ' ಮಾತಾಡುವವರ ಕೊಡವಿಕೊಂಡು, ಪ್ರೀತಿ 'ಕೊಡುವ' 'ಪಡೆವ' ಹುಚ್ಚಿನಿಂದ ಕಳಚಿಕೊಂಡು, ಸ್ವಾತಂತ್ರ್ಯ ಮತ್ತು ಪ್ರೀತಿಯ ಸಹಜತೆಯನು ಸಹಜವಾಗಿ ಜೀವಿಸುವಂತಾಗಿ; ನೀನು ನೀನಾಗಿ ಚಿಗುರಿ, ನೀನು ನೀನಷ್ಟೇ ಆಗಿ ಹಬ್ಬಿ ಹರಡಿ, ಪ್ರತಿ ದಿನವೂ ನಿನ್ನ ದಿನವಾಗಲಿ... 
ಶುಭಾಶಯವು ಕೂಸೇ... 🤝🫂
&&&

ನೆನಪಲ್ಲಿ ನೆನೆಯಬಾರದೆಂದು ಅವಳ ನೆನಪಿಗೆಂದು ದಿನವಿಡೀ ಏನೂ ಬರೆಯಲಿಲ್ಲ... 
ಮರೆತೇನೆಂಬ ನರಕ ಸುಖ... 
ಹೋಗತ್ಲಾಗೆ, ಹುಟ್ಟು (ಸುಟ್) ನೆನಪು ಸುಟ್ಟರೂ ಹೋಗ್ತಿಲ್ಲ... 
___ ಸತ್ ದಿನ...

ನೀನು ತುತ್ತಿಟ್ಟು ಕರುಣಿಸಿದ ನಗುವಿಗಿನ್ನೂ ಜೀವವಿದ್ದರೆ ಅದು ನಿನ್ನದೇ ಪ್ರಾರ್ಥನೆಯ ಫಲ..... 
____ ಈ ತೇದಿಗೆ ನಿನ್ನದೇ ಹೆಸರು/ಉಸಿರು.... 
&&&

ಯಾವ ಹೊತ್ತಲೂ ಹೊಸ್ತಿಲು ದಾಟಿ ಒಳ ಬರಬಹುದಾದ ಶುಭದ ಪರಿವಾರಕೆ ಬರುವಾಗ ಕತ್ತಲು ಮೆತ್ತಬಾರದು, ಹೊಸಲ ಪಟ್ಟಿ ಎಡವಬಾರದು ಎಂದು ಹೆಬ್ಬಾಗಿಲಲಿ ಹಣತೆ ಹಚ್ಚಿಡುತಿದ್ದ ಅಮ್ಮನ ಕಣ್ಣ ಮುಗ್ಧ ನಗೆಯಲ್ಲೇ ಎಲ್ಲಾ ಶುಭದ ಗಣಗಳೂ ಬೆಚ್ಚಗೆ ಕೂತಿದ್ದವು... 
ಅದಕೇ, ಅಮ್ಮಂದಿರು ಒಳಹೊರಗಾಡುತಿದ್ದರೆ ಶುಭವು ಬೆನ್ನಿಗಿದ್ದಂಗೇ ಲೆಕ್ಕ... 
ಮುಂಬೆಳಗಿಗೆ ಮಮತೆ ಮಡಿಲ ನೆನಪೂ ಶುಭವನೇ ಪ್ರಾರ್ಥಿಸುತ್ತದೆ... 
ಶುಭದಿನ... 🤝🫂

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರ್ತೊಂಭತ್ತು.....

 ಬೆಳಗೆಂದರೆ ಪ್ರೀತಿಯ ದೈವ ದರ್ಶನ.....

ಶುಭದ ಬೆಳಕು ಸುರಿದು
ಯೆನ್ನೆದೆಯ ನಗುವು ನಿನ್ನೆದೆ ಗೂಡಲಿ ಬೆಳೆದು
ನಿನ್ನೆದೆಯೊಲವು ಎನ್ನೆದೆಯಂಗಳದ ಕೊಳೆಯ ತೊಳೆದು
ಬೆಳಕಾಗಲಿ, ಬೆಳಕೇ ಆಗಲಿ ಕತ್ತಲು ಮೆತ್ತಿದ ನನ್ನಾ ನಿನ್ನಾ ಒಳಮನೆ...
ಬೆಳಗಾಗುವ ಹೊತ್ತಿಗೆ... 
ಶುಭದಿನ... 🤝🫂

ಎನ್ನ ಇರುಳಿಗೆ ಜೋಗುಳದ ತೆರದಿ ಶುಭ ಹಾರೈಸಿ ಮಮತೆಯ ತೊಟ್ಟಿಲಲಿ ತೂಗಿದವರೇ ಹಗಲಾಗುವ ಹೊತ್ತಿಗೆ ಶುಭ ಸುಪ್ರಭಾತದ ಪ್ರಾರ್ಥನೆಯಿಂದೇ ತಟ್ಟಿ ಎಬ್ಬಿಸುತ್ತಾರೆ; ಕನಸ ಗೆಲ್ಲೂ ದಾರಿ ನೋಡು ಎಂದು ಅಕ್ಕರೆಯಿಂದ ಕಿವಿ ಹಿಂಡಿ ಕಣ್ಣ ಜೊಂಪನು ತೊಡೆಯುತಾರೆ... 
ಒಳಿತೇ ಆಗುವುದು...
ಹಗಲಿರುಳ ನೆತ್ತಿ ಕಾಯುವುದು - ಒಳಿತು ಹರಸುವವರ ಪ್ರೀತಿ ನೆಳಲು... 
ಶುಭದಿನ... 🤝🫂

ಎನ್ನ ಹೆಸರಿನ ಆಯಸ್ಸಿನ ಖಾತೆ ಕಿರ್ದಿಯಲಿ ಇನ್ನೊಂದು ಹೊಸ ಹೂ ಬೆಳಗು ಸೇರಿತೆಂಬುದು ಎಂಥಾ ಧನ್ಯತೆ... 
ಇಷ್ಟೇ ಇಷ್ಟು ಬೆಳಕಿನ ದರ್ಶನಕೆ ಮತ್ತೆ ಒಂದು ಅನಾಯಾಸದ ಅವಕಾಶ... 
ನಿನ್ನ ನಗೆಯ ಹೊನಲಿನಲ್ಲಿ ಮನ ಮುಳುಗಿ  ಮೀಯುವ ಮತ್ತು ಎನ್ನ ಆನು ಗೆದ್ದುಕೊಳ್ಳುವ ಚಂದ (?) ಬಡಿದಾಟವಿನ್ನೂ ಜೀವಂತ... 
ಶುಭದಿನವೇ ಸರಿ... 🤝🫂

ಯೆದೆಯ ಬೆಳಕಿಗೆ ಕನ್ನಡಿಯಾಗಲಿ ಬೆಳಗು... 
ಶುಭದಿನ... 🤝🫂

ಗೋಡೆ ಮೇಲಿನ ಅವಳ ಚಿತ್ರದ ನಗುವೂ ಎಷ್ಟು ಜೀವಂತವಿದೆ...!!
ಬೆಳಕು ಒಳಗಿದ್ದರೆ ಬೆಳಗು ಶುಭವನ್ನೇ ಹಾಡುತ್ತದೆ...!! 
ಅನಿಶ್ಚಿತ ಬದುಕ ನೂರು ಶರಗಳಿಗೆದೆ ಕೊಟ್ಟೂ ನಗೆಯ ಧಾರಣೆ ಮಾಡುವ ಶುಭದ ಸಂಕಲ್ಪವಾಗಲಿ ಬೆಳಗು... 
ಶುಭದಿನ... 🤝🫂

ಬೆಳಕಿಗೆ ಮುಖ ಮಾಡಿ, ಯೆದೆಯಲಿ ನಗೆಯ ಹೂವರಳಿ, ದಿನವೆಲ್ಲ ಪ್ರೀತಿಯ ಪರಿಮಳ ಚೆಲ್ಲಾಡಲಿ... 
ನೇಹದ ಬಳ್ಳಿ ಯೆದೆಯಿಂದಲೆದೆಗೆ ಹಬ್ಬಲು ಬೆಳಗು ಚಪ್ಪರವಾಗಲಿ...
ಶುಭದಿನ... 🤝🫂 

ಬೆಳಕಿನ ಹಸಿವಲಿ ದೇಹೀ ಅಂದಾಗಲೆಲ್ಲ ಪ್ರೀತಿ ಅನ್ನವನಿತ್ತು ಯೆನ್ನೆದೆಯೊಳು ನಗೆಯ ಬಿತ್ತಿದವರನೆಲ್ಲ ಹುಳುಕಿಲ್ಲದೇ ನೆನೆಯಬೇಕು 'ನಾನು' - ಬೆಳಗಾಗುವ ಹೊತ್ತಿಗೆ... 
ಶುಭವೆಂದರೇ ಪ್ರೀತಿ ಪರಿಕ್ರಮ - ಎದೆ ಹೂವಂತಾಗಲಿ ಮೆತ್ತಗೆ... 
ಶುಭದಿನ... 🤝🫂

ಬೆಳಕಿನ ಕಡಗೋಲು 
ಕಡೆಕಡೆದು ಯೆದೆಗಡಲ ಹಾಲಾಹಲವ 
ತೇಲಲಿ ಪ್ರೀತಿ ನವನೀತ...
ಶುಭದಿನ... 🤝🫂

ಯೆದೇನ ತಿವಿದು ಎಬ್ಬಿಸೋ ಮುಂಬೆಳಗಿನ ನಿನ್ನ ಮಡಿಲ ಕನಸ ಕವಲು... 
ಬೆಳಗಿಗೆ ಕಣ್ತೆರೆದು 'ಕರಾಗ್ರೇ__' ಅಂದು ಮಣಮಣಿಸುವಲ್ಲಿ ಬೊಗಸೆ ತುಂಬಾ ನಿನ್ನ ನೆನಪ ಚಿತ್ರ ಸಾಲು... 
ಬದುಕ ಪ್ರೀತೀನ ನೀ ಕಾಯುವ ಬಗೆ ನನ್ನ ಪ್ರತಿ ಬೆಳಗಿನ ಶುಭದ ನಗೆ... 
ಶುಭದಿನವೇ ಮತ್ತೆ... 🤝🫂

ಬೆಳಕಿನ ರೂಪವೂ, ಪ್ರೀತಿಯ ಕಣ್ಣೂ ನಗೆಯೇ ಇರಬಹುದು... 
ಅದಕೇ
ಯೆದೆಗಿಳಿದ ಬೆಳಕೂ, ಪ್ರೀತಿಯೂ ಶಾಂತ ನಗೆಯಾಗಿ ಹೊರ ಚಿಮ್ಮುವುದು... 
ಬೆಳಗು ಸಂಪನ್ನವಹುದು - ನಗೆಯು ನುಡಿಯಾಗಿ ಯೆದೆಯಿಂದಲೆದೆಗೆ ಹರಿದು... 
ಶುಭದಿನ... 🤝🫂

ಬೆಳಕಿನ ಪ್ರೀತಿಯೇ ಹಂಗೆ
ಅಥವಾ 
ಪ್ರೀತಿಯ ಬೆಳಕೇ ಹಾಂಗೆ
ಯೆದೆಯ ಭಾವ ಹಾಯುವ ವಿಸ್ತಾರದ್ವರೆಗೂ ಶುಭದ ಸಂವೇದನೆಯನೇ ತೋರುತ್ತದೆ... 
ಏಳಿ ಏಳಿ ಬೆಳಗನು ಎದುರ್ಗೊಂಬಲು ಯೆದೆಯ ಒಪ್ಪ ಮಾಡಿಕೊಂಡು ಅಣಿಯಾಗುವಾ... 
ಶುಭದಿನ... 🤝🫂

ಬೆಳಕು ಪ್ರೀತಿಯ ಗತಿ ತೋರುವಾಗ,
ಪ್ರೀತಿ ಬೆಳಕಿನದೇ ಪಥ ಪಂಥವಾಗಿರುವಾಗ,
ಬೆಳ್ಳಂಬೆಳಗು ಕಣ್ಣಿಂದ ಇಳಿವ ನಗೆಯ ಹನಿಯಲಿ 
ಬದುಕಿನ ಬಣ್ಣದ ಬಿಲ್ಲರಳುವುದು... 
ನಗೆಯ ವರ್ಷವಾಗಲಿ ದಿನವೆಲ್ಲ... 
ಶುಭದಿನ... 🤝🫂

ಶುಭ ಶುಭ ಮುಂಜಾವು... 
ಬೆಳಕು ಯೆದೆಯಾ ತಬ್ಬಿ ಪ್ರೀತಿಯ ನಂಜೇರ್ಯಾವು... 
ಬೆಳಗಾನ ಬಾಗಿಲು ಬೆಳಗಿ ನೇಹ ನಗೆಯಾಗಿ ಹರಡ್ಯಾವು... 
ಶುಭ ಶುಭ ಮುಂಜಾವು... 🤝🫂

ದಟ್ಟ ಕಾನನದ ಪುಟ್ಟ ದಾರಿಯೂ
ಬೆಟ್ಟ ಬೆಳಗುವ ಬೆಳಕೂ
ಕೈಕೈ ಹಿಡಿದು ನಡೆಯುವಾಗ
ಪ್ರೀತಿ ಯೆದೆದುಂಬಿ ನಕ್ಕಂತೆ ಪ್ರಚ್ಛನ್ನ ಬೆಳಗು... 
ಶುಭದಿನ... 🤝🫂

ಪಿಳ್ಳಂಗೋವಿಯ ಕರೆಗೆ
ಗೋಪಿಯೆದೆ ಕರಗಿ
ಬೆಳಕನು ಮಿಂದ ಪ್ರೀತಿ 
ತಂಪು ನೀರಾಗಿ ಹರಿದು
ಬೆಳಗು ಜೀವನ್ಮುಖಿ... 
ಶುಭದಿನ... 🤝🫂

ಬೆಳಗು ಕಣ್ಣಲಿ ಕಲೆತು ಎನ್ನ ಎದೆಗಂಟಿರುವ ಕತ್ತಲನೂ ತೊಡೆಯಲೀ... 
ಬೆಳಗಾಯಿತು - ಬೆಳಕಾಗಲಿ... 
ಶುಭದಿನ... 🤝🫂

ಆ ದಿನಮಣಿಗೆ, ಅರೆ ಘಳಿಗೆ ಬಿಡದಲೇ ಒಡಲುರಿಸಿಕೊಂಡು ಜಗ ಬೆಳಗಿ ಮರಳಿ ಸಿಕ್ಕಿದ್ದೇನು...?!
ಪ್ರೀತಿಗೆ ಇದಕಿಂತ ದೊಡ್ಡ ಆಖ್ಯಾನ/ವ್ಯಾಖ್ಯಾನ ಬೇರೆ ಇದ್ದೀತೇನು...!!
ಬೆಳಗಿಂದ 'ನಾನು' ಏನನ್ನೋ ಕಲಿಯಬೇಕಿದೆ; ಕಲಿತರಾಗದೇ...
ಶುಭದಿನ... 🤝🫂

ಬೆಳಗು ಗುರುವಾಗಿ ಎದೆಯ ಬೆಳಗಲಿ...
ಶುಭದ ಸಾರಥಿ ಬೆಳಗು...
ಶುಭದಿನ... 🤝🫂

ಸೋತಿದ್ದಕ್ಕೆ ಕೊಡುವುದಾ, ಕೊಟ್ಟು ಕೊಟ್ಟು ಸೋಲುವುದಾ... !!
ಗೆದ್ದು ಕೊಟ್ಟೆನೆಂದು ಬೀಗುವುದಲ್ಲ; ಕೊಟ್ಟು ಗೆಲ್ಲಿಸಿ ಮುಗುಳ್ನಗುವುದು... 
ಬೆಳಗೆಂಬ ಪ್ರೀತಿ ಪರಿಪಾಕ... 
ಶುಭದಿನ... 🤝🫂

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರೆಂಬತ್ತೊಂಭತ್ತು.....

 ಅಲ್ಲಿಗೀ ದಿನವು ಶ್ರೀಮಂತ.....

ಸೋಲರಿಯದೇ ಕೊಡುವ ಸುಖವ ಬೆಳಕಿನಿಂದ ಕಲಿಯಬೇಕು... 
ಬೆಳಕಿನೆದುರು ಪ್ರೀತಿಯಿಂದ ಸೋತು ಹೂವಾಗಿ ಅರಳಬೇಕು... 
ಬೆಳಗೆಂದರೆ ಪ್ರೀತಿಯ ದೈವ ದರ್ಶನ... 
ಶುಭದಿನ... 🤝🫂

ಬೆಳಗಾನೆದ್ದು
ಪ್ರೀತಿಯ ನೊಗ ಹೊತ್ತು
ಭರವಸೆಯ ನೇಗಿಲ ಹೂಡಿ
ನಗೆಯ ಬಿತ್ತಿ 
ನಗೆಯ ಬೆಳೆದು
ಫಲವಂತ 
ಬೆಳಕು ಹೊಕ್ಕ ಎದೆಯ ನೆಲ... 
ಶುಭದಿನ... 🤝🫂

ಬೆಳಗಿನೆದೆಯ ಮಿಡಿತವೇ -
ಬೆಳಕಿನೆಡೆಗೆ ಎದೆ ತೆರೆದ ನನ್ನೆಲ್ಲಾ ಪ್ರೀತಿ ಪ್ರಾರ್ಥನೆಗಳ ಪ್ರತಿ ಪದಗಳ ಉಸಿರುಸಿರೂ ನಿನ್ನದೇ ಹೆಸರು... 
ಶುಭದಿನ... 🤝🫂

ಕಾಗೆಯ ಕೂಗಾಟದಲಿ ಕೋಗಿಲೆಯ ಮರಿಗೆ ರೆಕ್ಕೆ ಬಂದ ಸಂಭ್ರಮದ ಕಥನವಿದೆ...!!
ಆಹಾ...!!
ಕಾಕೆಯೆದೆಯ ಮುಗ್ಧ ಬೆಳಕನು ಮಿಂದ ಪುನೀತ ಬೆಳಗು... 
ಶುಭದಿನ... 🤝🫂

ಎಲ್ಲಾ ಹೊಸತಿಗೂ ಎಲ್ಲರ ಕಣ್ಣಲ್ಲೊಂದು ಒಳಿತಿನ ಗಳಿಕೆಯ ನಿರೀಕ್ಷೆ ಇದೆ... 
ಅದಕೆಂದೇ, 
ಹೊಸ ಹಗಲೆಂದರೆ ಹೊಸತೇ ಶುಭದ ಆಶಯವಿದೆ... 
ಈ ಹಪ್ಪು ಹಳೇಯ ತೊಗಲ ಗೂಡಿನಲ್ಲೂ ಹೊಸದಾಗಿ ಪ್ರೀತಿ ಸಂಚಯಿಸಲಿ... 
ಶುಭದಿನ... 🤝🫂

ಅಂತಃಕರಣದ ಕಿರು ಬೆರಳ ಮೊನೆಯಲಿ, ಬೆಳಕಿನ ಮೈತುಂಬಾ ಶುಭದ ಆಶಯ ಮಂತ್ರ ಬರೆದು ಬೆಳಗನು ಎದುರುಗೊಂಬುವಾ... 
ಪ್ರೀತಿ ಕೈಹಿಡಿಯಲಿ... 
ಶುಭದಿನವೇ - ಹೇ!! ನೇಹ ಕುಂಜವೇ... 🤝🫂

ಇರುಳ ಪಲ್ಲಂಗದ ಮೇಲೆ ಪ್ರೀತಿಯ ತೀವ್ರ ಕಚ್ಚಾಟ... 
ಮರು ಹಗಲು ಬೆಳಕಿನ ಬಾಗಿಲಲಿ ಯುದ್ಧದ ಗಾಯಗಳಿಗೆ ವಯಸ್ಸು ಬೀಗಿ, ಮನಸು ನಾಚುತ್ತದೆ... 
ಹರೆಯದ ತೋಳಲ್ಲಿ ಮೋಹದ ಕನಸು ನನಸಾದ ಕಾಲಕ್ಕೆ ಜಗದ ಚೆಲುವೆಲ್ಲ ಅಥವಾ ಜಗವೆಲ್ಲ ಚೆಲುವಾಗಿ ಸುಖದ ಅಮಲುಗಣ್ಣಲ್ಲಿ ತೇಲುತ್ತದೆ... 
ಇರುಳ ಪಲ್ಲಂಗದ ಮೇಲಿನ ಪ್ರೀತಿಯ ತೀವ್ರ ಕಚ್ಚಾಟ ಹಗಲಿಗೆ ಹೆಗಲಾಗಿ ನಗೆಯನ್ನು, ಪ್ರಚ್ಛನ್ನ ಸಾವಧಾನದ ಬಗೆಯನ್ನು ಗೆದ್ದು ಕೊಡುತ್ತದೆ... 
ನೀನ್ನ ಗೆಲುವಲ್ಲಿ/ಗೆಲ್ಲಿಸುವಲ್ಲಿ ನನ್ನ ಮೇಲೆ ನನಗೆ ಪ್ರೀತಿಯಾಗುತ್ತದೆ...
ಬದುಕ ನಲುಮೆಯ ಕಾವ್ಯವೇ -
ಪ್ರತಿ ದಿನವೂ ಪ್ರೀತಿಯ ದಿನವಾಗಲಿ - ನಿನ್ನ ಗೆಲುವಾಗಲಿ... 
ಶುಭದಿನ... 💞🫂

ಶುಭವು ಯೆದೆಯಾರ ಆವರಿಸಿ, ಆದರಿಸಿ ಪ್ರೀತಿಯ ನೆತ್ತಿ ಕಾಯಲಿ... 
ಎದೆ ಬಿರಿದು ಹೆಗಲು ತಬ್ಬಿದ ಪ್ರೀತಿ ಇಂದು ನಾಳೆಗಳ ಹಾದಿ ಬೆಳಕಾಗಲಿ... 
ಹಬ್ಬಿ ತಬ್ಬಿದ ಯೆದೆಯೆದೆಗಳ ಉಡಿ ತುಂಬಾ ನಗೆಯ ಹೂವರಳಲಿ... 
ಪ್ರತಿ ಬೆಳಗೂ ತುಂಬು ಪ್ರೀತಿ ಪಯಣದ ಮುನ್ನುಡಿಯಾಗಲಿ...
ಶುಭದಿನ... 🤝🫂

ಬೆಳಕಿನಾಲಯದ ಕಿಬ್ಬಿಗಳ ಹಬ್ಬಿದ ಪ್ರೀತಿ ಬಳ್ಳಿಯ ತುಂಬಾ ಮಧುರ ಕನಸುಗಳ ಕುಸುಮಗಳರಳಿ; ಬೆಳಗು ಮುಗ್ಧ ಮನಸುಗಳ ಕಾವ್ಯ ಗೋಪುರ... 
ದಿನವೆಲ್ಲ, ಜಗವೆಲ್ಲ ರಿಂಗಣಿಸಲಿ ನಗೆಯ ನೂಪುರ... 
ಶುಭದಿನ... 🤝🫂

ಗೆಲುನಗೆಯ ಹರಸಿ ಹಾರೈಸಿ ಶುಭದ ಪ್ರಾರ್ಥನೆ... 
ಮೆಲುನಗೆಯ ಹಂಚಿ ಹರಡಿ ಶುಭದ ಸಮಾರಾಧನೆ... 
ನಗೆಯು ನಗೆಯ ಸಂಧಿಸಿ ಬಂಧಿಸಿ ಪ್ರೀತಿಯ ಶುಭ ಸಂಪಾದನೆ... 
ಶುಭೋದಯ... ಶುಭದಿನ... 🤝🫂

ಯೆದೆಯ ಬೆಳಕಿನ ಬಳ್ಳಿಯಲಿ ಪ್ರೀತಿಯ ಹೂವರಳಿದರೆ ಬೆಳಗು ನಗೆಯ ಬಣ್ಣಾಬಣ್ಣದ ಸಿಂಗಾರ ಸಿರಿಯ ಹಂಚುತ್ತಾ ಬಾಗಿಲಿಗೆ ಬರುವ ಶುಭದ ಹರಿಕಾರ... 
ತೆರೆದಿಟ್ಟರೆ ಯೆದೆಯ - ಪ್ರೀತಿ ಹಾಗೂ ಬೆಳಕು ಒಂದು ಘಳಿಗೆ ಹಿಂದಿಲ್ಲ ಮುಂದಿಲ್ಲದಂಗೆ ಒಂದೇ ಲಯದಿ ಒಳಗಡಿಯಿಡುವ ಅಗ್ನಿ ದಿವ್ಯಗಳು...
ಶುಭದಿನ... 🤝🫂

ಬೆಳಗು ಕಣ್ಣ ಕೊಳಕೆ ಸ್ನಿಗ್ಧ ನಗೆಯ ನಾವೆಯನಿಳಿಸಿ ಕೈಕುಲುಕಿ 
ಬೆಳಕು ಯೆದೆ ನೆಲದಿ ಪ್ರೀತಿ ಹೊನ್ನ ಬಿತ್ತಿ 
ದಿನವೆಲ್ಲ ಶುಭದ ಜೈತ್ರಯಾತ್ರೆ... 
ಶುಭದಿನ... 🤝🫂

ಬೆಳಕಿನಂಬುಧಿಯಲಿ ಶುಭದ ನಾವೆ ತೇಲಿ ಬರುವುದಂತೆ...
ಯೆದೆಯ ಬಾಗಿಲ ತೆಗೆದು, ಪ್ರೀತಿ ಹರಿವಾಣದಲಿಷ್ಟು ನಗೆಯ ಹೂವನಿಟ್ಟು ಬೆಳಗನು ಎದುರುಗೊಂಬುವಾ... 
ಪ್ರೀತಿಯೂ, ನಗೆಯೂ, ಶುಭವೂ ಯೆದೆಮನೆಯ ತುಂಬು ಹೊನಲಾಗಲಿ... 
ಶುಭದಿನ... 🤝🫂

ಊರೆಲ್ಲಾ ಬೆಳಕನು ಹುಡುಕಿ ಸುಸ್ತಾದವನ ಎದೆ ಬಗೆದರೆ ಬೆಳಕು ಪ್ರೀತಿಯ ತಬ್ಬಿ ಮುಗುಮ್ಮಾಗಿ ಮಲಗಿತ್ತು... 
ಯೆದೆಯ ಪ್ರೀತಿಯನು ಮುದ್ದಾಗಿ ತಟ್ಟಿ ಎಬ್ಬಿಸಿದರೆ ಬೆಳಕು ಮಗುವಂತೆ ಮೈಮುರಿದು ಎದ್ದೀತು... 
ಪ್ರೀತಿ ಬೆಳಕಿನ ಬೆಳಗು... 
ಶುಭದಿನ... 🤝🫂

ಬೆಳಕೆಂದರೂ, ಬೆಳಗೆಂದರೂ -
ಈ ಯೆದೆಯ ಪ್ರೀತಿ ಬಳ್ಳಿ
ಆ ಯೆದೆಯ ಪ್ರೀತಿ ಗಿಡ
ಒಂದನೊಂದು ಹಬ್ಬಿ ತಬ್ಬಿ
ನಗೆ ಹೂವಾಗಿ ಅರಳಿ
ಪ್ರೀತಿಯು ಪ್ರೀತಿಗೆ ಪ್ರೀತಿಯಿಂದ ಹೇಳಿದ 
ಶುಭ ಸುಪ್ರಭಾತ... 
ಶುಭದಿನ... 🤝🫂

ಪ್ರೀತಿಯನು ಉಸಿರಿಗೆಳೆದುಕೊಂಡರೆ ಬೆಳಕು ಎದೆಗಿಳಿಯಿತು... 
ಪ್ರೀತಿಯಿಂದಿಷ್ಟು ನಗೆಯ ಹಂಚಿದರೆ ನಮ್ಮಾ ಸುತ್ತಣ ಜಗವೇ ಬೆಳಕಾಯಿತು... 
ಬೆಳಗಾಯಿತು -
ಬೆಳಕನು ಹಾಡುವುದಾದರೆ ಪ್ರೀತಿಯ ಗಮಕ ಒಲಿಯಬೇಕು... 
ಶುಭದಿನ... 🤝🫂

ಬೆಳಕನು ಕೇಳಿದೆ ಎಳ್ಳಷ್ಟು ನಗೆಯ ಕೊಡು ಎಂದು... 
ಪ್ರೀತಿಯ ಹಂಚಲು ನಿಲ್ಲು ಮುಯ್ಯಿ ಕೇಳದೇ, ಯೆದೆ ತುಂಬಾ ನಗೆಯೇ ನಗೆಯಾಗಿ ನೆಲೆ ನಿಲ್ಲುತೇನೆ ಅಂತು... 
ಬೆಳಕಿನಂಗೆ ಪ್ರೀತಿ ಹಂಚಿದರೆ ಬೆಳಕಾಗುತ್ತದಂತೆ ಎದೆ... 
ಶುಭ ಬೆಳಗು... 🤝🫂

ನಿನ್ನೊಳಗಿನ ಪ್ರೀತಿ ಬೆಳಕು ಚೆಂದ ನಗೆಯಾಗಿ ಎನ್ನ ತಲುಪಿತು - ಬೆಳಗಾಯಿತು... 
ಯೆನ್ನೆದೆಯ ಶುಭದ ನುಡಿಸಾಣಿಕೆ ನಿನ್ನ ಕರುಳ ಮೀಟಿ ನಗೆ ಬಳ್ಳಿ ನೂರು ಕವಲಾಗಿ ಹಬ್ಬಿ ಪ್ರೀತಿ ಜಗವ ತಬ್ಬಲಿ... 
ಬೆಳಗು ಪ್ರೀತಿ ನಗೆಯ ಸಂಕಲನ... 
ಶುಭದಿನ... 🤝🫂

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರೆಂಬತ್ತೆಂಟು.....

ಬೆಳಗು ಜೀವನ್ಮುಖಿ.....

ಶುಭಕೋರಲು ಪದಗಳಿಲ್ಲಾ ಎಂದು ತಲೆಕೆರ್ಕೊಂಡು ಹಾಸಿಗೆಯಲೇ ಕೂತಿದ್ದೆ... 
ಬಾಗಿಲಲಿ ಬೆಳಕು ಎಂದಿನಂತೆ ನಕ್ಕಿತ್ತು - ಶುಭವು ನನ್ನ ಪದಗಳಲಿಲ್ಲ ಅಂದಂತಾಯ್ತು... 
ತನಗಿಂತ ಶುಭವಿನ್ನಿಲ್ಲ ಎಂಬಂತೆ ಮೈದಾಳಿದ ಬೆಳಗಿನ ಪ್ರೀತಿಯ ಎಳೆ ಬೆಳಕು ಎಲ್ಲೆಲ್ಲೂ ಮುಗುಳ್ನಗುವಾಗಿ ಅರಳಿತ್ತು... 
ನಾನಿಷ್ಟು ಹೆಕ್ಕಿಕೊಂಡು ನಿನ್ನೊಡನಿಷ್ಟು ಹರವಿಕೊಂಡು ಬೆಳಗು ನಗುವಾಗಿ, ಒಲವಾಗಿ, ಶುಭದ ಹಾಡಾಗಿ ಯೆದೆಯಿಂದಲೆದೆಗೆ ಹರಿಯಿತು... 
ಶುಭದಿನ... 🤝🫂

ನಿನ್ನೆ ಉಂಡ ಪ್ರೀತಿಯ ನೆನಪು,
ನಾಳೆ ಉಡಬಹುದಾದ ಸುಖದ ಕನಸು,
ಇಂದೀಗ ಮನದುಂಬಿ ಬೀರಿದ ನಗೆಯ ಹೊನಲು,
ಇಂತೆಲ್ಲಾ ಒಳನಾಡಿ/ಒಡನಾಡೀ ಶುಭದ ಬೀಜ ಮಂತ್ರ - ಎದೆಯ ಬೆಳಕು... 
ಯೆದೆಯೆದೆಗಳ ಗೂಡು ಹೆಣೆಯಲು ಎಳೆ ಎಳೆ ಒಲವ ಸುರಿದು ಯೆದೆಯ ಬೆಳಗಲಿ ಬೆಳಗು... 
ಶುಭದಿನ... 🤝🫂

ಪ್ರೀತಿಯನು ಪ್ರೀತಿಯಿಂದ ಕಾಣುವುದಾದರೆ, ಆಸ್ಥೆಯಿಂದ ಪ್ರೀತಿಯನೇ ಜೀವಿಸುವುದಾದರೆ ಪ್ರತಿ ವಾರ, ತಿಥಿ, ನಕ್ಷತ್ರ ಎಲ್ಲವೂ ಪ್ರೀತಿಯನೇ ಹೇಳುತ್ತವೇನೋ... 
ಪ್ರತಿ ಚರಣವೂ, ಪ್ರತಿ ಕರಣವೂ ಪ್ರೀತಿಯನೇ ಹರಿಸುತ್ತದೇನೋ... 
ಯೆನ್ನೆದೆಯಲೊಂದು ಬೆಳಗಿನ ಕಣ್ಣಿದ್ದರೆ - ಈ ಕ್ಷಣ, ಆ ಕ್ಷಣ, ಕ್ಷಣ ಕ್ಷಣವೂ ಪ್ರೀತಿಯ ಕರುಳ ಕಿರಣಗಳ ಕುಡಿಗಳಾಗೇ ತೋರುವುದೇನೋ... 
ಶುಭದಿನ... 🤝🫂

ಯೆದೆಯ ನೂರು ನಲ್ಮೆ ಭಾವಗಳ ತಟ್ಟಿ ಎಬ್ಬಿಸೋ ಬೆಳಗೆಂಬ ಭಾವಗೀತೆ... 
ಬೊಡ್ಡು ಬುರುಡೆಯ ಕತ್ತಲ ಮುಸುಕು ಸರಿಸಿ ಪ್ರೀತಿಗೆ ಕಣ್ಬಿಟ್ಟರೆ ಹೂ, ಹಕ್ಕಿ, ಹಗುರ ಮನಸು... 
ಶುಭದಿನ... 🤝🫂

ನಿನ್ನೆಗಳಲಿ ಅದೆಷ್ಟೇ ಸೋಲೂ, ನೋವುಗಳೂ ಗುಮಿಗೂಡಿದ್ದರೂ, ಇಂದು ಎಲ್ಲಾ ಒಳಿತಾಗುವುದು ಯೆಂಬ ಭರವಸೆಯನು, ನಾಳೆಗಳಲಿ ಶುಭವೇ ತುಂಬಿರುವುದೆಂಬ ಕನಸನೂ, ಕಸರಿಲ್ಲದೇ ಹುಟ್ಟುಹಾಕಿ ಪ್ರತಿ ಬೆಳಗೂ ಎದೆ ಬಡಿತಕೊಂದು ಹೊಸತೇ ಕಸುವ ತುಂಬಿಕೊಡುತ್ತದಲ್ಲ - ಅದಕೇ ಹೊಸ ಬೆಳಗೆಂದರೆ ಹೊಸಾ ಬೆಳಕಿನ ಪ್ರೀತಿ ಪಯಣ ಎಂಬುವುದು... 
ಶುಭದಿನ... 🤝🫂

ಬೆಳಕಿನ ಕಿಡಿ ಹೂವ ಕಣ್ಣನು ಮುದ್ದಿಸಿ ದಿನದ ಬಾಗಿಲಿಗೆ ಬಣ್ಣಾಬಣ್ಣದ ಸಿಂಗಾರ... 
ಹೂವರಳಿ ಬೆಳಕಿನ ಪ್ರೀತಿಗೆ ಪ್ರೀತಿ ಹೇಳಿ ಊರೆಲ್ಲಾ ಸುಗಂಧಮಯ... 
ಕೇಸರವನುಂಡು ಹಿಗ್ಗಿ ತೇಗಿದ ದುಂಬಿ ಕೊರಳಿಂದ ಜೀವರಾಗ ಸುಪ್ರಭಾತ... 
ಶುಭೋದಯ... ಶುಭದಿನ... 🤝🫂

ಬೆಳಕಿನ ಬಳ್ಳೀಲಿ 
ಪ್ರೀತಿಯ ಹೂವರಳಿ
ಜಗದ ಯೆದೆಯಲ್ಲಿ 
ಕಣ್ಣಿಟ್ಟು ನಗುವಾಗ
ಬೆಳಗಾಯಿತೆಂಬರು... 
ಜೀವದ ಜಡ ಹರಿದು
ಬೆಳಕಾಯಿತೆಂಬರು...
ಶುಭದಿನ... 🤝🫂

ಬೆಳ್ಳಾನೆ ಬೆಳಗೆದ್ದು
ಬೆಳಕಿನ ಗಣಿ ಬಗೆದು
ನಗೆಯ ಬಂಗಾರವ ಹೆಕ್ಕಿ ತಂದು 
ಯೆದೆಯ ಬಳ್ಳವ ತುಂಬಿಕೊಳ್ಳುವಾ... 
ಅದನೇ ಹಂಚಿ ಹರಡಿ ನಲಿಯುವಾ..‌.
ಅಲ್ಲಿಗೀ ದಿನವು ಶ್ರೀಮಂತ... 
ಶುಭದಿನ... 🤝🫂

ಕಣ್ಣರಳಿಸಿ ಬೆಳಕನು ಪ್ರಾರ್ಥಿಸಿ 
ಯೆದೆ ಭಾಂಡವ ಪ್ರೀತಿಯಲಿ ತುಂಬಿಕೊಂಡು
ಸುತ್ತೆಲ್ಲ ನಗೆಯ ಬಣ್ಣಗಳ ಹಂಚಿದರೆ
ಶುಭದಿ ಸಂಪನ್ನ ಮುಂಜಾವು...
ಪ್ರೀತಿ ನಗೆ ಹೊನಲು ಬೆಳಗು...
ಶುಭದಿನ... 🤝🫂

ಬೆಳಕನು ಗುಣಿಗುಣಿಸಿ ಬಂದ ಪ್ರೀತಿ ಉತ್ತರಕೆ ನಿನ್ನ ಹೆಸರು... 
ಅದಕೇ, 
ಬೆಳಗೆಂದರೆ ನಿನ್ನ ನೆನಪು, ಕನಸುಗಳ ಬಿಸಿ ಉಸಿರು... 
ಪ್ರೀತಿ ಬೆಳಗು... 
ಶುಭದಿನ... 🤝🫂

ಬೆಳಕಿನ ಬಯಲಲಿ 
ಪ್ರೀತಿಯ ಬೀಜ ಬಿತ್ತಿ 
ನಗೆಯ ಬೆಳೆ ಬೆಳೆದು 
ಅದನೆ ಉಂಡು, ಅದನೇ ಹಂಚಿ 
ರುದಯಗಳ ಬೆಳಗಿಕೊಳ್ಳುವಾ... 
ಬೆಳಗಾಯಿತು... 🤝🫂

ಬಿದ್ದ ಮರದ ಗೆಲ್ಲುಗಳಲಿ ಯಾವ ಹಕ್ಕಿಯ ಗೂಡಿತ್ತೋ...!!
ಉದುರಿದ ಚಿಗುರೆಲೆಗಳಿಗೆ ಯಾರು ಹೇಳಿಯಾರು ಸಂತಾಪ...!!
ಈ ಹೊತ್ತು ಕೋಗಿಲೆ ಅದೇ ರಾಗದಲಿ ಚರಮಗೀತೆಯ ಹಾಡುತಿರಬಹುದಾ...!!
ಚಿತ್ರಗುಪ್ತನ ಲೆಕ್ಕದ ಪಟ್ಟಿಯಲೂ ಇದೆಲ್ಲಾ ಲೆಕ್ಕಕ್ಕಿಲ್ಲದ ಚಿಲ್ಲರೆ ಬಾಬ್ತಿರಬಹುದಾ...!!
ಇಂತೆಲ್ಲ ಹುಚ್ಚು ಜಿಜ್ಞಾಸೆ ಸರಿಯಾ......!!
ರಣ ಗಾಳಿಯ ಕೈಹಿಡಿದು ಸುರಿದ ಮಳೆಯ ಮರು ಹಗಲು ಎಂದಿನಂತೆಯೇ ಬೆಳಗಾಗಿದೆ... 
ಎಲ್ಲ ಅವಗಡಗಳ ಮಗ್ಗುಲಲೇ ಎಲ್ಲಾ ಎಂದಿನಂತೆಯೇ ಮುಂದೋಡುವುದನೇ ಶುಭವೆನ್ನುವುದೇನೋ...!!
ಎಂದಿನಂತೆ ಶುಭದಾಶಯ - ಶುಭದಿನ... 🤝🫂

ಕರುಣದಲಿ ದುಡಿದುಡಿದು ಪ್ರೀತಿಯ ಹಂಚುವ ಯೆದೆಗಳಾಳದ ಬೆಳಕು ಜಗದಗಲ ಪಸರಿಸಲಿ... 
ಗೊಬ್ಬರದ ಪ್ರೀತಿ ಹೂವಾಗಿ ನಕ್ಕು, ಹಣ್ಣಾಗಿ ಮಿಕ್ಕು, ಬೆಳಗು ಪ್ರೀತಿಯ ನಾಂದಿ ಗೀತೆ... 
ಶುಭದಿನ... 🤝🫂🫂

ಭುವಿಯೊಡಲ ಗುಡಿ ನೆತ್ತಿಗೆ ಮುಡಿ ಬಾಗಿ ಮುದ್ದಿಟ್ಟು ಪ್ರೇಮ ವರ್ಷದ ಉಡಿ ತುಂಬಿದ ಮಡಿ ಮಡಿ ಎಳೆ ಹಗಲು - ಆಡ್ಮಳೆಯ ಬೆಳಗು... 
ಪ್ರೀತಿ ಹುಡಿಯ ಘಮದ ಶುಭದಿನ... 🤝🫂

ಬಾನುಡಿಯ ಬೆಳಕು 
ಭುವಿಯೊಡಲ ಮೊಳಕೆ
ಜಗದಗಲ ಪ್ರೀತಿ ಸಂಚರಣ... 
ಬೆಳಗು ಪ್ರೀತಿಯ ಹೆಸರು/ಉಸಿರು... 
ಶುಭದಿನ... 🤝🫂

ಸುಮನಸುಗಳ ನೂರು ನೂರಾರು ಒಳಿತಿನ ಪ್ರಾರ್ಥನೆಗಳು ಫಲಿತು
ಪ್ರೀತಿ ಬೀಜ ಮೊಳೆತು
ನಗೆಯ ಫಲ ಕಳಿತು
ಸುಶಾಂತ ದಿನದ ಶುಭಾರಂಭ ಬೆಳಗು... 
ಶುಭೋದಯ... 🤝🫂

ಹೂವಿನ ಅರಳುವ ಹಂಬಲಕೆ ಇಂಬು ಕೊಟ್ಟ ಬೆಳಕೇ ಜೇನಿನಾಸೆಯ ದುಂಬಿಗೆ ಹೂವಿನ ದಾರಿಯನೂ ತೋರುತ್ತದೆ...
ಚಿಗುರಿ ಬೆಳಗುವುದೆಲ್ಲ ಪ್ರೀತಿಯ ಫಲವಾದರೆ, ಬೆಳಕು ಪ್ರೀತಿಯ ಮೂಲ...
ಅವಿರತ ಪ್ರೀತಿಯ ಪಡ್ಚಾಕ್ರಿ ಮಾಡೋ ಬೆಳಕು ತನ್ನ ಹಾದಿಯಲಿ ನನಗೊಮ್ಮೆ ನಿನ್ನ/ನಗೆಯ ಪರಿಚಯಿಸಬಹುದು...
ಚಂದ ಬೆಳಗಿನ ಶುಭಕಾಮನೆ... 🤝🫂

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :) 

ಗೊಂಚಲು - ನಾಕ್ನೂರೆಂಬತ್ಯೋಳು.....

ಸಜ್ಜೆಮನೆಯ ಸಜ್ಜಿಗೆ ನುಡಿಗಳು.....

ಕೇಳೋ - 
ನಿರಂತರ ನೂರಾರು ಕೊಂಡಾಟಗಳಲಿ ಎಲ್ಲೋ ಒಂದ್ನಾಕು ಮಿಲನ ಕೂಟಗಳು ಅತಿಮಧುರ ಉತ್ಸವವಾಗುತ್ತವೇನೋ; ಒಳನಾಡಿಗಳು ಒಡನಾಡಿ ಮೈಯ್ಯಾದ ಮೈತ್ರಿಗಳೆರಡೂ ಒಟ್ಟೊಟ್ಟಿಗೇ ಸಂಪ್ರೀತ ಸಮೃದ್ಧಿಯಲಿ ಉನ್ಮಾದದುತ್ತುಂಗವ ಕಂಡು ಆ ಆಹಾಕಾರವು ನಿತ್ಯ ಸ್ಮರಣೀಯವೆನಿಸುತ್ತದೇನೋ... 
ಅಂತದೊಂದು
ಅಯಾಚಿತವೋ, ಆಕಸ್ಮಿಕವೋ ಎಂಬಂತೆ ಎಂದೋ ಒಂದೊಮ್ಮೆ ಸಂಭವಿಸಿಬಿಡುವ ಒಲವಿನುನ್ಮಾದದ ಸಮಾರೋಪವ ಮರಮರಳಿ ಹುಡುಕುತ್ತಾ, ಆ ಜೀವಾಭಾವದುನ್ಮೇಶದ ಮರು ಸೃಷ್ಟಿಗೆ ಚಡಪಡಿಸಿ ತಡಕಾಡುತ್ತಾ ಬದುಕಿಡೀ ಉಂಡಾಡುವುದು... 
ಉಳಿದಂತೆ
ಈ ಮುದ್ದಿನ ಗುದ್ದಾಟವೆಲ್ಲಾ ಹೊರಗಿನ ಜಂಜಾಟಗಳು ಹೊರೆಯುಳಿಸದಂತೆ, ಒಳಮನೆಯಲಿ ಪರಸ್ಪರ ಹೊಂದಾಣಿಕೆಯಲಿ ಹೊರಳಾಡುವ ಮೊಂಡಾಟವಷ್ಟೇ...
___ ಸಂಸಾರ ಮಿಥುನ ಕಾವ್ಯ... 
&&&

ಕವಿ ಮಹಾಶಯಾ, 
ಕಣ್ಣ ಮೇಲೊಂದು ಕವಿತೆ ಬರಿ ನೋಡೋಣ ಅಂತಂದು ಬಟ್ಟಲು ಕಂಗಳ ಅರಳಿಸಿ ನಿಂದಳು... 
ಸಗ್ಗದ ಕನಸಲಿ ತುಟಿಗಳ ಲೇಖನಿಯಾಗಿಸಿ ಅವಳ ಮೊಗವ ಬೊಗಸೆಗೆ ತುಂಬಿಕೊಂಡೆ... 
ಕೋತೀ ಅಂದು ರೆಪ್ಪೆ ಮುಚ್ಚಿಕೊಂಡವಳ ಬಿಗಿದೆದೆಯ ಬಡಿತವೀಗ ನನ್ನದೇ ನೂರು ಕವಿತೆಗಳ ವಾಚಿಸಿ ಕೇಳಿಸುತಿದೆ ಎನ್ನೆದೆಗೆ... 
___ ಕಣ್ಣಿಂದ ತುಟಿಗಳು ಕಾವ್ಯವ ಕದ್ದು ಮೈತುಂಬಾ ಹಂಚುವ ಸದ್ದಿನ ಸುದ್ದಿ ಕೇಳಬೇಡಿ... 
&&&

ಅಯ್ಯೋ ಯೆನ್ನ ಹೆಣ್ಕೋತೀ -
ಇಲ್ಲೆಲ್ಲೋ ಸುರಿದು ಸುರಿದು ಗುಪ್ಪೆ ಗುಪ್ಪೆ ಪ್ರೀತಿ ಪಡಿಯ ನಡುವೆ ಎನ್ನ ಕೂರಿಸಿ ಹೋಗಿ, ಅಲ್ಲೆಲ್ಲಿಂದಲೋ ನನ್ನ ನೆನಪಿಸಿಕೊಳ್ತೀಯಾ ಅಂತ ಕೇಳಿ ಕೇಳಿ ಕೆಣಕಿದರೆ ಏನೆಂದು ಉತ್ತರಿಸಲೇ... 
ಯೆದೆಯ ಧಾರೆಗೆ ಕಣ್ಣು ತೋಯದಂತೆ ಕಾಯ್ದುಕೊಂಡ ಭಂಡ ಗಡವ ನಾನು... 
___ ಪ್ರೀತಿ ಪಲ್ಲಂಗದ ಒಂಟಿ ಆಕಳಿಕೆಯಲಿ ಕಣ್ಣು ಕೂಡುವುದಿಲ್ಲ...
&&&

ಒಂದಿನ ರವಿರಾಯ ಕಂತುವ ಹೊತ್ತಲ್ಲಿ, ಮಳೆ ಕಾಡ / ಮಲೆನಾಡ ಘಾಟಿಗಳ ತಿರುವುಗಳಲಿ ಸಾವಧಾನದಲಿ ಬೈಕಿನ ಕಿವಿ ಹಿಂಡಿ ಅಂಡಲೆಯುವಾಗ ಜೊತೆಗೆ ನೀನಿರಬೇಕು - ಬೆನ್ನನವುಚಿ ಕೂತ ನಿನ್ನ ತೊಡೆ ಚಿವುಟಿ ನಾ ಬೆಳುದಿಂಗಳ ಕೂಟದ ಲಲ್ಲೆ ನುಡಿಯನಾಡುವಾಗ ನಿನ್ನಲಿ ಹುಟ್ಟುವ ಕಿಬ್ಬೊಟ್ಟೆಯ ತಟವಟವು ಕೆನ್ನೆಯ ನಾಚಿಕೆಯ ರಂಗಾಗಿ ಎನ್ನ ಹೆಗಲಲಿ ಹಲ್ಲೂಡಬೇಕು...
ಹಂಗಾಗುವಾಗ,
ಹೆಂಗೆಂಗೋ ಹಸಿವೇರುವ ಮನಸಲಿ ಮರು ಸೂರ್ಯೋದಯಕೊಂದು ಮರಿ ಕನಸ ನೇಯುವ ಕನಸು... 
___ ಆ ಕನಸು ಈ ಹೊತ್ತಿನ ಸೊಗಸು... 

ಬೆನ್ನಿಗವುಚಿ ಕೂತು, 
ಧೂಳೆಬ್ಬಿಸಿ, ಕರ್ಣಕಠೋರ ದನಿಯಲಿ ಅರಚುತ್ತಾ, ಹಾದಿಯ ಎದೆಮೇಲೆ ಓಡಾಡೋ ಚಕ್ರಗಳ ದಟ್ಟಣೆಯನು ಬಾಲಿಶವೆಂಬಂತೆ ಬೈಯ್ಯುತ್ತಾ, ನನ್ನೆಲ್ಲಾ ಹುಚ್ಚಾಟಗಳಿಗೆ ಮ(ಮು)ದ್ದಾಗೋ ನೀನಿಲ್ಲದೇ ಹೋಗಿದ್ದರೆ, ನಾ ಮಹಾನಗರಿಯ ಈ ರಸ್ತೆಗಳಿಗೆ ಜೀವವೇ ಇಲ್ಲ ಎಂದುಬಿಡುತ್ತಿದ್ದೆ... 
___ ಎನ್ನೆದೆಯ ಕನಸೆಲ್ಲ ಉಸಿರಾಡೋ ಜೀವಂತ ಕಾವ್ಯ ನೀನು...

ಬೀದಿ ದೀಪಗಳ ಝಗಮಗದಲಿ ಕಲೆಸಿ ಕಳೆದುಹೋದ ಬೆಳದಿಂಗಳನು ನಿನ್ನ ಬೊಮ್ಮಟೆ ಬೆತ್ತಲಿಗೆ ಕಚಗುಳಿ ಇಟ್ಟಾಗ ಹುಟ್ಟುವ ಗಲಗಲ ನಗೆಯಲಿ ಹುಡುಕುತ್ತೇನೆ, ಹುಡುಕಿ ತಾಕಿ ತಬ್ಬಿ ಸವಿಯುತ್ತೇನೆ... 
ಚಂದಿರನೂ ಏಕಾಂಗಿ ಅನ್ನಿಸೋ ಈ ನಗರದಲಿ ನಿನ್ನೊಡನಾಡುವ ಆ ಉನ್ಮತ್ತ ಸಂಯೋಗದ ಕುದಿಯೇ/ಕನಸೇ ನನ್ನ ಉಸಿರ ಕಸುವು... 
____ ಸೋಲುವ ಸುಖಕ್ಕೆ ಸೋಲಬೇಕು ಮತ್ತೆ ಮತ್ತೆ ನಿನ್ನ ಸಹಚಾರದಲಿ... 

ನೂರು ಹಡಾಹುಡಿಗಳ ದಾಟಿ ಅದ್ಯಾವುದೋ ಗಮ್ಯ ತಲುಪೋಕಾದರೆ ನಂಗೆ ನಾನು ಸಾಕೇ ಸಾಕು... 
ನಗೆಯೊಂದ ಮೆಲ್ಲುತ್ತಾ ಈ ಹಸಿರು ಹಾಡಿಗಳಲಿ ಸುಮ್ಮನೇ ಅಲೆಯೋವಾಗ ನಿನ್ನ ಸಜೀವ ಸಾಂಗತ್ಯದ ಸವಿ ಸಿಕ್ಕರೆ ಬೇಕು ಬೇಕು... 
___ ಮನ್ಸು ಹಾಡು ಮೆಟ್ಕೊಂಡ ಕಾಡು ಹಾದಿ...
&&&

ಬದುಕಿದ್ದೂ ಸ್ವರ್ಗ ಕಾಣುವ ನನ್ನ ಏಕೈಕ ಹಾದಿ - ನಿನ್ನ ಬೆತ್ತಲೆ ತೋಳಲ್ಲಿ ಕರಗಿ ಬೆವರಾಗಿ ಕಳೆದೋಗುವ ಜೀವಾಭಾವ ಸಮಾಧಿ ಸ್ಥಿತಿ ಕಣೇ... 
___ ನಿನ್ನ ಮೋಹದ ಕಪಿ ಮುಷ್ಟಿ... 
&&&

ಸ್ವಪ್ನ ಮಂಜರೀ -
ಇಲ್ಲಿನ ಯಾವ ನಶೆಯೂ ತಣಿಸದ ಮೋಹದ ತೃಷೆ ನೀನು... 
ಎಲ್ಲಿಂದಲೋ ಸುಳಿವ ತಂಪು ಗಾಳಿ - ಒಳಮನೆಯಲಿ ಧಗಧಗಿಸೋ ನಾಭಿ ಕುಂಡ... 
ಆ ಧಗೆಗೆ ಉಸಿರು ದಿಕ್ಕು ತಪ್ಪುವಾಗ -
ಬೆಳಕೂ ನಾಚಿ ಅಡಗುವ ನಿನ್ನಾ ಬೆತ್ತಾಲೆ ಕತ್ತಲ ತಿರುವುಗಳಲಿ ಎನ್ನ ಬೆಮರು ಮಿಥುನ ಯಜ್ಞದ ಹವಿಸ್ಸಾಗಬೇಕು... 
ಆ ಸಾಹಚರ್ಯಕ್ಕೆ, ಈ ಇಂಥ ಆಡ್ಮಳೆಯ ಇರುಳ ಎಣೆಯಾಟಕೆ ನೀ ಜೊತೆಯಾಗಬೇಕು... 
___ ಕಾಯುವ ಕಾವಿಗೆ ಹರೆಯ ಕರಗುತಿದೆ... 
&&&

ಹೇ! ಕರಿಕಾನಿನಂದದ ಕಣ್ಣ ಕುವರೀ -
ಚಂದಕೊಂದು ಬಲು ಚೆಂದ ಹೆಸರು ನೀನು... 
ನಿನ್ನಾ ವದನ
ಜೊನ್ನ ಸರಸಿಯಲಿ ಮಿಂದ ಕರಿ ಮೋಡದ ತುಂಡು ಬೆವರಿದಂತಿದೆ - ನನ್ನ ತುಟಿ ತಾಕಿ ಬಿಸಿಯೇರಿ ಕಿವಿಹಾಲೆಯ ಮರೆಯಿಂದ ಹನಿವಾಗ ಸ್ವೇದ ಬಿಂದು... 
ಪ್ರಣಯ ಸ್ಫುರಣ ತೇವ ತೇವ ಭುಜದ ತಿರುವಲ್ಲಾಗ ಪುನ್ನಾಗ ಪುಷ್ಪ ಗಂಧ... 
ಉಸಿರ ಹೋರಿಗೆ ನಲುಗೋ ಮುಂಗುರುಳು ಉಸುರೋ ನನ್ಹೆಸರ ಕೇಳಿದ ಗಾಳಿಯಲೂ ಬಿಸಿ ಕಂಪನ... 
ಬಾ
ಬೆತ್ತಲ ಮಡಿಯನುಡು...
ಕತ್ತಲು ಕಂತುವ ಮುನ್ನ
ಹಿಂಗೇ, ಹಿಂಗಿಂಗೇ
ಇಷ್ಟು, ಇನ್ನಷ್ಟು 
ಕೂಡಿ ಕೊಂಡಾಟವಾಡಿ
ಕುಡಿದು ಬರುವ 
ಸ್ವರ್ಗ ಸೀಮೆಯ ಜೇನ... 
ಗ್ರೀಷ್ಮವಿನ್ನೂ ಪೂರಾ ಪಾದವೂರಿಲ್ಲ
ಇರುಳ ತೋಳ ತಿಳಿ ಕಾವಲ್ಲಿ 
ಕಾವೇರಿ 
ಸೂರೆಗೊಳ್ಳುವ ಸುರ ಸುಖವ
ಇಟ್ಟು ಇಟ್ಟು 
ಪ್ರೀತಿ ದುಖಾನಿಗೆ ಕನ್ನ... 
___ ಸಜ್ಜೆಮನೆಯ ಸಜ್ಜಿಗೆ ನುಡಿಗಳು... 

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರೆಂಬತ್ತಾರು.....

ಆಯಿ ಎಂಬ ಭಗವದ್ಗೀತೆ.....

ಅವಳ‌ ಮಡಿಲ ತುಂಡರಸ ನಾನು...

ಮುಸುಕು ಸರಿಸಿ ಅಳಶಾತನದಲಿ ಮುಸುಡಿ ಉಜ್ಜಿಕೊಂಡು ಕೂತಾಗ ಅವಳ ನಿತ್ಯದ ಬೈಗುಳವೊಂದು ಅಚಾನಕ್ ನೆನಪಾಗಿ ಬೆಳಗಿಗೆ ಕಣ್ಬಿಟ್ಟೆ - ನೂರು ದೈವಗಳ ದಿವ್ಯ ಮಂತ್ರೋಕ್ತ ಆಶೀರ್ವಾದ ನೆತ್ತಿ ಸವರಿದಂತ ಕಂಪನದ ನಗು ಯೆನ್ನೆದೆಯಲಿ... 
ಇನ್ನೀಗ ಈ ದಿನದ ಶುಭದ ಪ್ರವಾಹಕ್ಕೆ ಅಡೆತಡೆಗಳಿಲ್ಲ...
ಮಮತೆ ಮಡಿಲು ನಗೆಯ ಮುಡಿ ಕಾಯುವಾಗ ಹಗಲುಗಳೆಲ್ಲ ಶುಭದ ಶ್ರೀಮಂತ ತೊಟ್ಟಿಲು...
ಶುಭದಿನ... 
ಹೂವರಳುವಂಗೆ ನಗುತಿದ್ದವಳ ಮಡಿಲ ನೆನಪಿಗಿಂತ ಶುಭವಿನ್ನೇನಿದೆ... 🥰
&&&

ಆಗೆಲ್ಲಾ ಸಣ್ಣ ರಂಪಕ್ಕೂ ಎಲ್ಲಾ ಬಿಟ್ಟೆದ್ದು ಓಡಿ ಬರೋಳು... 
ಈಗ ಅವಳ ಮಡಿಲು ಬೇಕೆಂದರೆ ಅವಳಿದ್ದಲ್ಲಿಗೇ ಹೋಗಬೇಕು... 
ಆದರೂ, 
ದಾರಿ ಹೇಳದೇ ಅಷ್ಟು ದೂರ ಬಿಟ್ಟು ಹೋದದ್ದು ಎಷ್ಟು ಸರಿ...!? 
___ ಆಯೀ... 

ಬದುಕ ಬವಣೆಗಳ ಯುದ್ಧಕೆ ತಾನು ಎದೆ ಕೊಟ್ಟು ಎನ್ನೆದುರು ಪ್ರೀತಿಯ ಎಡೆ ಇಟ್ಟವಳು...
ಅರ್ಥಾರ್ಥಗಳ ಹಂಗಿಲ್ಲದೇ ಬರಿ ಸ್ವಾರ್ಥದಲಿ ನಾನೋದಿದ ಏಕೈಕ ಮಹದ್ಗ್ರಂಥ ಅವಳು...
___ ಆಯಿ ಎಂಬ ಭಗವದ್ಗೀತೆ... 

ಇಲ್ಲೇ ಎಲ್ಲೋ ಎನ್ನ ಮನೆ ಬೀದಿಯಲ್ಲೇ ನೀನು ಮತ್ತೆ ಸಿಕ್ಕಿ ಯೆದೆಯ ತಬ್ಬಿದಂತೆ ಕನಸಾಗುತ್ತದೆ - ಅದೇ ಅಂದಿನ ಬಿಸುಪಿನಲ್ಲಿ...
ನೋಡಿದ್ಯಾ -
ನನ್ನ ಕನಸೂ ನನ್ನ ಆಡಿಕೊಂಡು ನಗುತ್ತದೆ ಇಂದೀಗ...
ಉಸಿರಾದವರ ವಿದಾಯ, ವಿಯೋಗವನ್ನು ಎಂದೂ ಒಪ್ಪದ ಮಳ್ಳು ಮನಸನು ಕಟ್ಟಿಕೊಂಡು ಇಂದು ನಾಳೆಗಳ ದಾಟುವುದು ಹೇಗೆ ಹೇಳು...
ಎಲ್ಲಕ್ಕೂ ಕಾಲವೇ ಮದ್ದು ಎಂಬುದು ಎಂಥ ಕ್ಲೀಷೆಯ ಮಾತು ಗೊತ್ತಾ - ಮರಳಿ ಕೊಡಲಾರದ್ದನ್ನು ಕಿತ್ತುಕೊಂಡ ಕಾಲ ಕಳೆದುಕೊಂಡವರ ಕರುಳ ನೋವಿಗೆ ಮದ್ದಾಗುವುದಾದರೂ ಹೇಗೆ ನೀನೇ ಹೇಳು...
ಕಾಣದ ವಿಧಿಯನು ಹಳಿದು, ಎದುರಿರುವ ಹರಿವನ್ನು ಒಪ್ಪಿ, ನಾ ಪಡೆದು ಬಂದದ್ದೇ ಇಷ್ಟು, ಜಗನಿಯಮ ಇರುವುದೇ ಹೀಗೆ ಎನ್ನುತ್ತಾ ನಗೆಯ ನಟನೆಯಲ್ಲಿ ಪಳಗಬಹುದಷ್ಟೇ - ನಿನ್ನ ಬೆನ್ನಿಗೆ ಮುಖ ಮಾಡಿ ಇಲ್ಲೇ ಉಳಿದ ನನಗಾಗಿ, ಬಿಟ್ಟೂ ಬಿಡದೆ ನೆನಪಾಗಿ ತಬ್ಬುವ ನಿನಗಾಗಿ, ನನ್ನವರೆಂಬುವರ ಸುಳ್ಳು ಸಮಾಧಾನಕ್ಕಾಗಿ...
ಆದ್ರೂ,
ಭಾವದಲಿ ನೂರಿದ್ದೇನು, ಜೀವದಲಿ ಉಸಿರಿಲ್ಲದ ಮೇಲೆ - ನನ್ನೊಂದಿಗೀಗ ನೀನಿಲ್ಲ ಎಂಬುದಷ್ಟೇ ಅಂತಿಮ ಸತ್ಯ ಅಲ್ವಾ - ಅದನು ಒಪ್ಪಿಕೊಂಡು ಕಾಲದೊಂದಿಗೆ ಮುನ್ಸಾಗುವ ಶಕ್ತಿ, ಯುಕ್ತಿಯನು ಕಾಲದಲಿ ಕಾಲವಾದ ನೀನೇ ಕೊಡಬೇಕಷ್ಟೇ...
 ___ ಬದುಕು ನಾಟಕ ರಂಗ - ಚೆನ್ನಾಗಿ ನಗಬಲ್ಲವನು ನಟನವಿಶಾರದ...

ಅವೆಲ್ಲಾ ಸಂಭ್ರಮಗಳು ನಿನ್ನೊಂದಿಗೇ ಮುಗಿದು ಹೋದವು... 
ಮತ್ತು 
ಸಂಭ್ರಮದಲಿ ಆಡಲು ಮರೆತ ಮಾತುಗಳು ಎಲ್ಲ ಮುಗಿದ ಖಾಲಿಯಲಿ ನೆನಪಾಗಬಾರದು ನೋಡು... 
___ ನಿತ್ರಾಣ ಮೌನ...

ಈ ಚಿತ್ತ ಕೋಶದಲಿ ನಿನ್ನ ನೆನಪಿನ ಕಾವು ಅಂಟದ ಒಂದಾದರೂ ನೆನಪು ನಗುವುದು ಕಾಣುವುದಿಲ್ಲ... 
ಮತ್ತು 
ನಿನ್ನಿಂದಾಚೆ ಹೊಸ ನೆನಪುಗಳ ಸೃಷ್ಟಿಸುವ ಕನಸೂ, ಕಸುವೂ ಈ ಮನಸಿಗುಳಿದಿಲ್ಲ...
____ ಚಿತ್ತುಕಾಟು ಚಿತ್ತ(ತ್ರ) ಭಿತ್ತಿ... 

ಬೆಳದಿಂಗಳು ಯೆದೆಕೊರೆವ ಮಾತಾಡುವಾಗ,
ಕತ್ತಲು ವಿಚಿತ್ರವಾಗಿ ಸಂತೈಸುತ್ತದೆ...
___ ದಾರಿ ಮರೆತು ದಿಕ್ಕೆಟ್ಟವರಿಗೆಂದೇ ರಾತ್ರಿಗಳನು ಹೆಣೆಯಲಾಗಿದೆಯಾ...?! 

ಎಲ್ಲಾ ಮರೆತುಹೋಗಲೀ ಎಂದೊಮ್ಮೆ ಶಪಿಸಬಾರದೇ... 
___ ಮೈಯ್ಯೆಲ್ಲಾ ಕಣ್ಣಿನ ನೆನಪಿನ ಶಾಪಕ್ಕೊಂದು ಉಶ್ಯಾಪ ಬೇಕಿದೆ... 

ದಿನವೂ ತಲೆಚಿಟ್ಟು ಹಿಡಿವಂತೆ ಮನೆ ಅಂಗಳದಲೇ ಅವುಗಳ ಕಛೇರಿ ನಡೆದಿರುತ್ತದೆ...
ಆದರೋ,
ಶ್ರಾದ್ಧದ ದಿನ ಮಾತ್ರ ನಾ ಗಂಟಲು ಹರಿವಂತೆ ಕೂಗಿ ಕರೆದರೂ ಒಂದೇ ಒಂದು ಕಾಕೆಯ ಮುಖವೂ ಕಾಣದೇ ಕರುಳು ತಿವಿಯುತ್ತದೆ... 
ಎನ್ನ ಪಾಪದ ಬಾಬತ್ತಿಗೆ ಅವಳ ಹೆಸರಿಗಿಟ್ಟ ಅಗುಳು ಹಳಸುವಂಗೆ ಮಾಡಬೇಡೀ ಎಂದು ಯಾರಲ್ಲಿ ಕೇಳುವುದು, ಅವಳೇ ಮುನಿದಂತ ಭಾವ ಕಾಡುವಾಗ... 
____ ಬಲಿ ಬಾಳೆಯ ಬಯಲಿಗಿಡುವಾಗ ಉಸಿರು ನಡುಗುತ್ತದೆ ಪ್ರತೀಸರ್ತಿ...  
&&&

ಬದುಕಿಗಷ್ಟೇ ಋತುಗಳ ಲೆಕ್ಕ... 
ಸಾವಿಗಾದರೋ ವರುಷಗಳು ಲೆಕ್ಕಕ್ಕಿಲ್ಲ - ಸಾವಾದರೆ ಯಾವ ಲೆಕ್ಕಾಚಾರದ  ಬಾಕಿಯೂ ಲೆಕ್ಕಕ್ಕೆ  ಸಿಗದಂತೆ ಎಲ್ಲ ಎಲ್ಲಾ ಚುಕ್ತಾ ಮೋಕ್ತ... 
___ ನೆಪ ಹೇಳದೇ ನೆನಪುಗಳ ನೇಯುವ ಬದುಕು - ಇನ್ನೆಲ್ಲ ನೆನಪು ಮಾತ್ರವೆನ್ನಲೊಂದು ನೆಪ ಹುಡುಕುವ ಸಾವು... 

ಬಲು ಬೆರಕಿ ಜನುಮ - ಮರಾಮೋಸದ ಸಾವು - ನಗುವ ಹುಡುಕಿ ಹುಡುಕಿ ಬಣಗುಡುವ ರಣರಣ ಸುಸ್ತು... 
ಎಂಥ ಸಾವು ಮಾರಾಯ ಅನ್ನುವಲ್ಲಿ ಸಾವೇ ಹಿತ ಅನ್ನೋದು ಒಳ ಭಾವವಾ...?! 
&&&

ಮಾಣೀ -
ತುಂಬಾ ದುಡಿಯಬೇಕು... 
ತುಂಬಾ ಸಂಪಾದಿಸಬೇಕೆಂದರೆ ತುಂಬಾನೇ ದುಡಿಯಬೇಕು... 
ಕರುಳ ದಾರದಲಿ ರುದಯವ ಕಡೆ ಕಡೆದು, 
ಕಣ್ಹನಿಯ ಗಾಳಿಸಿ ಗಾಳಿಸಿ ಕುಡಿದು, 
ಕಟ್ಟುಸಿರ ಕಡಿದು ಬಾಗಿ ಬಾಗಿ ಭಂಡ ಬಿದ್ದು ರುದ್ರ ನಗೆಯಲೇ ಬದುಕ ಸುಡಬೇಕು... 
ತುಂಬಾ ತುಂಬಾ ಸಂಪಾದಿಸಬೇಕೂ ಅಂದರೆ, ತುಂಬಾ ಅಂದ್ರೆ ತುಂಬಾನೇ ದುಡಿಯಬೇಕು... 
___ "ಪ್ರೀತಿ ಸಂಪಾದನೆ... "
&&&

ಕೇಳೇ, 
ಸತ್ತು ಸುಖಿಯಾದವಳೇ -
ಅಡಿಗಡಿಗೆ ಎಡಗುವ ನಿನ್ನ ನೆನಪು - ಉಸಿರ ನಾಳ ಹಿಸುಕಿದಂಗೆ ಗಂಟಲ ಒಣಗಿಸೋ ಉಮ್ಮಳಿಕೆ - ಯೆದೆಯ ಹಸಿ ಗೋಡೆ ತುಂಬಾ ಬದುಕು ಗುರಿಯಿಟ್ಟು ಹೊಡೆದ ಕಲ್ಲುಗಳ ಮಾಯದ ಗಾಯ...
ಅಷ್ಟಾಗುವಾಗಲೂ,
ಏನೋ ಹಳೆಯದ್ಯಾವುದೋ ಪಾಪ/ತಾಪ ನೆನಪಾದಂತೆ ತಲೆತಲೆಗೆ ಹೊಡೆದುಕೊಂಡು, ಎಲ್ಲಾ ಮರೆತಂತೆ ಕಣ್ಣೊರೆಸಿಕೊಂಡು, ತೋಳೇರಿಸಿ ಹಲ್ಕಿರಿದು ಗಹಗಹಿಸೋ ಹುಂಬ ಹುಚ್ಚು - ಬದುಕಿಗಾಗಿ ಅಲ್ಲ, ಬದುಕಿರುವ ಕರುಮಕ್ಕಾಗಿ...
ಅಲ್ಲೂ, ಗೊತ್ತಿಲ್ಲೆ ಯೆನ್ಗೂ,
ಯಾವ ಮೋಹದ ಮುರಳಿ ಕರೆಯ ಮೋಹ/ದಾಹವಿನ್ನೂ ಯೆದೆಯಲಿ ಬಾಕಿ ಇದೆಯೋ...!!! 
ಹಂಗಂದ್ಕಂಡು,
ಈ ಹುಚ್ಚನ/ಹುಚ್ಚಿನ ನಗೆಯ ಸತ್ಯವನು ಶಂಕಿಸಬೇಡಾ ಅಂತೇನೆ...
ಅದೂ -
ನೀನೇ ಕಲಿಸಿಟ್ಟು ಹೋದ ವಿದ್ಯೆಯೇ ಅಹುದು...
___ ಸಾವಾಸಲ್ಲ ಮಾರಾಯ್ತೀ, ಅರ್ಥವೇ ಆಗದ ಈ ಬದುಕು, ಸಾವಿನ ಲೆಕ್ಕಪತ್ರದ್ದು... 
&&&

ಅತ್ತು ತೊಟ್ಟಿಲ ಹುಡುಕಿದರೂ, ತೊಟ್ಟಿಲ ನೆನಪಾಗಿ ಅತ್ತರೂ ಎತ್ತಾಡಿಸಿ ತೂಗಿದ ಕೈ ಅವಳು... 
ಮತ್ತೆ ಮತ್ತೆ ಬದುಕು ಚಿವುಟುವಾಗಲಂತೂ ಮೊದಲು ನೆನಪಾಗುವುದೇ ಅವಳ ಮಡಿಲು... 
ಹೊಟ್ಟೆ ಬಟ್ಟೆ ಕಟ್ಟಿ ನಗೆಯ ಬಟ್ಟಿ ಇಳಿಸುವ ವಿದ್ಯೆ ಬಲ್ಲವಳು... 
ಕರುಳ ಸ್ವಾರ್ಥ ಕೈಗೂಡದೇ ಎದೆಯು ಬಣಗುಡುವಾಗಲೂ ತನ್ನೊಡಲ ಪ್ರೀತಿ ಒರತೆ ಬತ್ತದಂಗೆ ಕಾಯ್ದುಕೊಂಬವಳು... 
ಎಲ್ಲ ಆಯಿಯಂದಿರು ಅದ್ಹೇಗೆ ಹಾಗೆಯೇ ಇರುವುದು...!!!
ಪ್ರೀತಿಯ ಕೊಡುವ ಕಾರುಣ್ಯವ ಕಲಿವುದಾದರೆ ಆಯಿಯಿಂದಲೇ ಕಲಿಯಬೇಕು... 
ಅವಳೆದೆಯ ಹಾಲು ಬತ್ತಿದರೂ ಮನದ ಮಮತೆ ಬತ್ತುವುದೇ ಇಲ್ಲ...
___ ಆಯೀ ಎಂಬ ಬೆರಗು, ಬೆಳಕು... 

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)