ಗೊಂಚಲು - ನಾಕ್ನೂರಾ ಐವತ್ತು ಮತ್ತೆ ಎಂಟು.....

ಮೋಹಾಲಾಪದ ಸಿಹಿ ಕಂಪನಗಳು.....

ಅಲ್ವೇ -
ಡಾಕ್ಟ್ರು ಜಾಸ್ತಿ ಸಿಹಿ ತಿನ್ಬೇಡ, ವಯಸ್ಸಾಯ್ತು ಅಂದಿದಾರ್ಕಣೇ - ಹಿಂಗೆ ಕಾಡ್ಬೇಡ್ವೇ...
ಹೊಟ್ಟೆಗೆ ಕಣೋ ಸಿಹಿ ನಿಷೇಧ, ಮನ್ಸಿಗೆ ಕನ್ಸಿಗೆ ಅಲ್ಲಾ...
ಏನೂ, ಕನ್ಸೀಗ್ ಬರ್ತೇನೆ ಅಂದ್ಯಾ... ಹುರ್ರೇ.... 🥰

ಓಯ್ -
ಸಾಕ್ ಸಾಕು ನಿನ್ನ ರಸಿಕ ಹಗ್ಣ, ಸುಮ್ನಿರೋ ಮಾತ್ರ...
ನೇರವಾಗಿ ಸಿಹಿ ರಕ್ತಕ್ಕೆ ಸೇರ್ಬಾರ್ದಂತೆ ಅಷ್ಟೇ ಕಣೇ ಮತ್ತು ರಕುತ ಕುದ್ದು ಬೆವರಾಗಿ ಹರಿದು ಹೆಚ್ಚಾದ ಸಿಹಿ ಹೊರಹೋಗುತಿರಲೂಬೇಕಂತೆ... 
ನೀನು ಮತ್ತು ನಿನ್ನ ನೆನಪು, ಕನಸುಗಳೇ ನನ್ನ ಸಿಹಿಯಡುಗೆ ಮತ್ತು ಸಿಹಿ ರೋಗಕೆ ಮದ್ದು ಕೇಳೇ ಇನ್ನೂ...
___ ಮೋಹಾಲಾಪದ ಸಿಹಿ ಕಂಪನಗಳು...
&&&

ಕೇಳೇ -
"ನಿನ್ನ ಭುಜದ ತಿರುವಿಂದ ಬೆನ್ನಿಗೆ ಜಾರಿದ ಸುಖದ ಸ್ವೇದ ಬಿಂದುವಿಗೂ ಹಿತಾಘಾತಗಳ ಓಘಕ್ಕೆ ಚದುರಿಬಿದ್ದ ನಿನ್ನ ಮುಡಿಯ ಮಲ್ಲಿಗೆಯ ಘಮದ ಪಾಕವಂಟುವಾಗ ಸಜ್ಜೆಮನೆಯ ಸಂಭ್ರಮವನು ಇರುಳು ತೇಲುಗಣ್ಣಲ್ಲಿ ಹಾಡಾಗಿ ಗುನುಗುತ್ತದೆ...
ಬೆಳಕೂ ನಾಚುವ ಬೆತ್ತಲೆ ಉತ್ಸವದಲ್ಲಿ ನಿದ್ದೆಗೇನು ಕೆಲಸ...." 🫢

ಈ ಪೋಲಿ ಪ್ರಾಣಿಯ ಇರುಳ ಕಾಡೋ ಮೋಹದ ಕೂಸಿಂಗೆ ಹಿಂಗೆಲ್ಲಾ ಸಂದೇಶ ಕಳಿಸಿ ಅವಳ ಪುಟ್ ಪುಟಾಣಿ ಎದೆ ಗೊಂಚಲ ಬಿಗ್ಗ ಬಿಗಿ ಬಡಿತವ ಕನಸಿ ಪ್ರತಿಕ್ರಿಯೆಗೆ ಕಾಯುವ ನನ್ನಾ ಸುಖ ಸಂಕಟವ ಯಾರಿಂಗೆ ಹೇಳೂದು, ಹೆಂಗೆ ವಿವರ್ಸೂದು... 🙈
&&&

ಕೇಳೇ ಇಲ್ಲೀ - 
ನೀನುಟ್ಟ ಕನಕಾಂಬರ ಸೀರೆ ಎನ್ನ ಕಣ್ಣಲ್ಲಿ ನೆರಿಗೆ ಒದೆಯುತ್ತಿದೆ...
ಚಂಚಲ ಸೆರಗು ಕುಪ್ಪಸ ಗೂಡಿನ ಪಹರೆಯ ಮರೆತು ಮುದ್ದಿನ ಯುದ್ಧಕೆ ಕರೆವಂತಿದೆ...
ಬೊಗಸೆ ಬೊಗಸೆ ಬಿಡಿ ಮಲ್ಲಿಗೆ ತರುವೆ - ತುಸು ಬಿಡುವಾಗಿರು ಚೆಲುವೇ...
ಛಳಿಯ ಋತುವಿನ ಈ ಕೊನೆ ಕೊನೆಯ ದಿನಗಳಿಗಿಷ್ಟು ಪ್ರೇಮದ ಬಿಸಿ ಬಿಸಿಯ ಕಿಡಿ ಸೋಕಲಿ...
(?)ಪ್ರೇಮಿಗಳಿಗಿಷ್ಟು ಪ್ರೇಮ ಒಲಿಯಲಿ...
&&&

ಅಷ್ಟೇ.... ಉಳಿದಂತೆ ಕನಸು ಮತ್ತು ಮನಸಿಗೆ ವಯಸ್ಸಪ್ಪದು ಅನ್ನೋ ಪ್ರಮೇಯವೇ ಇಲ್ಲೆ ಎನ್ ಪ್ರಕಾರ.... ಮತ್ತೆ ಎಲ್ಲಾ ಕನಸೂ ನನಸಾಗಿನೇ ಪೂರ್ಣ ಅಪ್ಪದು ಅನ್ನೋ ಭಾವವೂ ಇಲ್ಲೆ... ಕೆಲವು ಕನಸನ್ನ ಕನಸು ಕಾಣೋ ಸುಖಕ್ಕೆ ಅಂತಷ್ಟೇ ಆದ್ರೂ ಕಾಣ್ತಾ ಇರವು... ಬದುಕು ಸಹನೀಯ ಅನ್ನಸ್ಲೆ...
ನೀ ನನ್ನ ಕನಸು - ಯಾವತ್ತಿಗೂ.......
____ ಕಪ್ಪು ಹುಡುಗೀ...
&&&

ನಿನ್ನೆಡೆಗಿನ ಉನ್ಮಾದ 
ಎನ್ನೊಳಗಿನ ಧ್ಯಾನ.......
___ ಪ್ರಣಯ ಹಡೆದ ಪ್ರೇಮ ಕಾವ್ಯ...
&&&

ಕಾಯುತ್ತಾ ಕಾಯುತ್ತಾ 
ಕಾಯುವ ಎದೆ ಕಾವು ಕರಗದಂತೆ ಕಾಯ್ದುಕೊಳ್ಳುತ್ತಾ
ಕಾಯುವುದೇ ತ್ರಿಕಾಲ ಕಾಯಕವಾಗಿ
ಕಾಯುತ್ತಾ ಕೂತಲ್ಲೇ ಕಾವ ಕಾಯ ಹಣ್ಣಾಗಿ 
ಕರೆದೊಯ್ಯಲು ಸಾವು ಬಂದಂತಿದೆ ನಿನ್ನ ಪರವಾಗಿ...
___ ಮೃತ ಭಾವ ಸಂಜೆ...
&&&

ನಿನ್ನೆದೆಯ ಮೊನೆಯಿಂದ ಎನ್ನೆದೆಯ ಬಯಲಲ್ಲಿ ನೀ ಗೀಚಿದ ಪ್ರಣಯ ಬೀಜಾಕ್ಷರಗಳ ಮರ್ಮರಕೆ ಸೋಲುತ್ತಾ, ಲೆಕ್ಕ ತಪ್ಪುವ ನರ ನಾಡೀ ಮಿಡಿತಗಳೊಡನೆ ನೆನಹುಗಳ ಮೆಲ್ಲುತ್ತಾ, ಉಗ್ಗುವ ಉಸಿರೊಂದಿಗೆ ತೇಕುತ್ತ ಸರಿಯುತಿದೆ ಈ ಛಳಿಯ ಸಂಜೆ...
___ ಪುಟ್ಟ ಪುಟಾಣಿ ಎದೆ ಗೊಂಚಲ ಬಿರು ಬಿರುಸು ಆಸೆ ಮೊನೆಗಳ ಬಳಪ ಬರೆವ ಪ್ರಣಯ ಕವಿತೆಗೆ ಎದೆ ಕೊಟ್ಟು ಸೋತವನು...
&&&

ನಿನ್ನ -
ಗುಟ್ಟಿನಲಿದ್ದ ಹಮ್ಮಿನ ಮಾತನೂ ಸುಮ್ಮನಿರಲಾರದೇ ಮನೆತುಂಬ ಹರಡುವ ಎಂದೋ ನಾ ತೊಡಿಸಿದ ಕಾಲಂದುಗೆ,
ಉನ್ಮಾದ ಇಳಿದ ಮೇಲಿನ ಸಮ್ಮಾನದ ನೂರು ಮುದ್ದು,
ಸಣ್ಣ ವಿದಾಯಕ್ಕೂ ಕಣ್ಣು ತೋಯುವ ಗಟ್ಟಿ ತಬ್ಬುಗೆ,
ಕಣ್ಣ ಮುದ್ದಿಸುವಾಗ ಉಸಿರಿಗಂಟಿದ ಕಾಡಿಗೆಯ ತಿಳಿಗಂಪು...
ಆಹಾ!!! ಎಷ್ಟೊಂದಿವೆ ಗೊತ್ತಾ,
ನನ್ನ - 
ನಿತ್ಯ ನೈಮಿತ್ಯಕೆ ವಿಲಾಸದ ನವಿರು ನಗೆ ತುಂಬುವ ಭಾವಾನುರಾಗದ ತಿಲ್ಲಾನಗಳು...
___ ರಸರಾಜಿ ಬೆಳಗು - ಬೈಗು... 🫂🫂
&&&

ಅವಳೆದೆಯ ಪ್ರೀತಿ ಬಣ್ಣವ ಎನ್ನ ಕರುಳ ಕನಸ ಕೊನರಿಗಿಷ್ಟು ಬಳಿದು ತನ್ನ ಕುಂಚ ಕಾವ್ಯಕೆ ತಾನೇ ಬೆರಗಾಗುತಾಳೆ ಕನಸಿನೂರ ಪುಟ್ಟ ದೇವತೆ... 
ಬದುಕು ಬಣ್ಣಾ ಬಣ್ಣದ ನಗೆ ಹಬ್ಬದ ಹಾಡಿ...🌈
___ ಮೈಮನಸು ಮಗುವಾಗಿ ಹಬ್ಬವಾಗುವುದು... 🥰

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರಾ ಐವತ್ತು ಮತ್ತೇಳು.....

ಸ್ಮಶಾನ ಭಸ್ಮ ಲಲಾಟದ ಅಲಂಕಾರವಾಗಿ.....

'ಅಳು' ಅಗಾಧ ಶರಧಿಯೇ ಯಾವತ್ತೂ -
'ನಗು' ಅದರ ವಿಸ್ತಾರದ ನಡುವೆ ಎಲ್ಲೋ ನಾಕು ಹನಿಗಳ ಮೇಲೆ ತೇಲೋ ಹಾಯಿ ದೋಣಿ ಅಷ್ಟೇ...
ಕ್ಷಣಕಾದರೂ ಸಾಗರದ ಎದೆಯನೇ ಸೀಳಿ ಹಾಯಬಲ್ಲೆ ಎಂಬುದೇ ನಗೆ ಹಾಯಿಯ ಸ್ವಂತದೊಂದು ಸಣ್ಣ ಹುಚ್ಚು ಹೆಮ್ಮೆ... 
____ ಬದುಕಿನ ಋಣ ತೀರುವ ತನಕ...
&&&

ಬಂದೇ ಬರುವ ಬೆಳಕಿ(ಗಿ)ಗೆ ತನ್ನೆದೆ ಒಲಿದಂತೆ ಉಲಿಯುವ ಕಾಕ, ಪಿಕ, ಗುಬ್ಬಿ, ಗೋಪಿ ಹಕ್ಕಿಗೊರಳಿನ ಕೂಜನ...
ಅಂಗಳದಂಚಿನ ದೇವ ಕಣಗಿಲೆ, ಅಮ್ಮನ ಕೈಸಾರಣೆಯ ಡೇರೆ, ಸೋಣೆ ಹೂ ಸಂಸಾರ, ತೋಟ, ತೊರೆ ಏರಿಯಲ್ಲಿ ಬಿರಿದ ತೆಂಗು, ಅಡಿಕೆಯ ಸಿಂಗಾರ - ಮನೆ ಬಾಗಿಲಿಗೇ ಬರುವ ಕಂಪಿನುತ್ಸವ...
ಮಳೆ ಕಾಡಿನ ಊರು ಕೇರಿಯಲಿ ತಾನು ಹಬ್ಬಿಸಿದ ನಿತ್ಯ ವಸಂತದ ಬಳ್ಳಿಯ ಸೊಕ್ಕು ಸೊಬಗನು  ನೋಡಿ ನಲಿಯಲು ಮೋಡದ ರಥವೇರಿ ನಿತ್ಯವೂ ತಾನೇ ಬರುವ ನೀಲಿ ಬಾನಿನ ಸಂತ...
___ ಸಾಹಿತ್ಯದ ಹಂಗಿಲ್ಲದ ಹಾಡು ಹಸೆ - ನನ್ನೂರ ಭಾವ ಪಸೆ...
&&&

ಇಲ್ಕೇಳು -
ನಿರೀಕ್ಷಿಸುವುದಾದರೆ ಪ್ರೀತಿಯನ್ನು,
ಘನವಾಗಿ, ಗೌರವದಿಂದ ಪ್ರೀತಿಸಬಲ್ಲವರಿಂದ ನೇಹದ ನೆತ್ತಿಯ ನೇವರಿಕೆಯ ಅಪೇಕ್ಷಿಸಬೇಕು...
ಕಾರಣ -
ಪ್ರೀತಿ ಅಂದ್ರೆ ಅಂಗಡಿಯವ ಚಿಲ್ಲರೆಯ ಬದಲಿಗೆ ಕೊಡುವ ನಾಲ್ಕಾಣೆ ಚಾಕ್ಲೇಟಲ್ಲ ಅಲ್ವಾ...
ಏನ್ಗೊತ್ತಾ -
ಪ್ರೀತಿಯ ಆಳ, ಅಗಲ, ಎತ್ತರ, ಘನತೆ ಗೊತ್ತಿಲ್ಲದ ನಾನೆಂಬ/ನನ್ನಂಥ ಕಾಂಜಿಪೀಂಜಿಗಳಿಂದ ಪ್ರೀತೀನ ಬಯಸಿದ್ರೆ ಅವ್ರು ಅಕ್ಕರೆಯನ್ನೂ ಹೆಣದ ಮೆರವಣಿಗೇಲಿ ಎಸೆವ  ಚಿಲ್ಲರೆಯಾಗಿಸ್ಬಿಡ್ತಾರೆ...
____ ಕಥೆಯಲ್ಲದ ಕಥೆಯ ಮುಖ್ಯ ಪಾತ್ರದ ಹೆಸರು "...ನಾನು..."
&&&

ಸ್ವಾತಂತ್ರ್ಯ - ಸಾಧ್ಯತೆಗಳ ಎದುರು ಆಯ್ಕೆಯ ಸ್ವಾತಂತ್ರ್ಯ ನಿನ್ನದೇ ಆಗಿರಲಿ...
ಸ್ವಾತಂತ್ರ್ಯ - ನಿನ್ನ ನಗುವ ನೀನೇ ಆಳುವ ಸ್ವಾತಂತ್ರ್ಯ ನಿನಗಿರಲಿ...
ಸ್ವಾತಂತ್ರ್ಯ - ಸಹಬಾಳ್ವೆ, ಸಹಚಾರಗಳ ಚಂದ ಸ್ವಾದವನುಂಡು ಬಾಳ್ಮೆ ಮಾಡುವ ಸ್ವಾತಂತ್ರ್ಯ ನಿನ್ನದಾಗಿರಲಿ...
ಗೆಳತೀ - ನಿನ್ನ ದಿನವಂತೆ, ನಿನ್ನಂತೆ ನೀ ನಿನ್ನ ಪ್ರೀತಿಸಿಕೊಳ್ಳುವಂತಾಗಿ, ನಿನಗೆ ನಿನ್ನದೇ ಶುಭ ಸಾಂಗತ್ಯವಿರಲಿ....
ಶುಭಾಶಯವು... 🧚
___08.03.2025
&&&

ಹೆಣ ಭಾರವಾ...?
ಅಥವಾ 
ಹೆಣ ಹೊತ್ತ ಹೆಗಲಿನ ಉರಿ ಉರಿ ನೆನಪು ಹೆಚ್ಚು ಭಾರವಾ...?
ಸುಟ್ಟ ಜಾಗದಲ್ಲಿ ನೆಟ್ಟ ಕಲ್ಲುಗಳು ಉತ್ತರಿಸಬಹುದಾ... 
ಮಸಣದ ಬೆಂಕಿಯೆದುರು ಮೈ ಸುಟ್ಟುಕೊಂಡ ಪ್ರಶ್ನೆಗಳು ಹೆಗಲಿಂದ ಇಳಿಯುವುದೆಂತು / ಎಂದು...?!
ಕಥೆ ಮುಗಿಯುವುದಿಲ್ಲ ಸಾವಿನಲ್ಲೂ ಅಥವಾ ಅಲ್ಲಿಂದಲೇ ಶುರುವಾಗುತ್ತದೆ...!!
____ ಉಸಿರ ಮೈತುಂಬಾ ಎದೆಯ ಚುಚ್ಚುವ ಖಾಲಿತನದ ಮುಳ್ಳುಗಳು...
&&&

ಈ
ಬದುಕು ತನ್ನ ಕ್ರಿಯೆಗಳ ಮೂಲಕ ಮತ್ತೆ ಮತ್ತೆ ನನ್ನ ನಶ್ವರತೆಯ ಪಾಠ ಹೇಳುತ್ತೆ...
ನಾನೋ ಪ್ರತೀ ಬಾರಿಯೂ ನನ್ನ ಪ್ರತಿಕ್ರಿಯೆಗಳ ಮೂಲಕ ನಗೆಯಾಗಿ ಬದುಕ ಜೀವಿಸುವ ಹಾಡಾಗುತ್ತೇನೆ...
ಸಾವನ್ನೂ ನೆಪಗಳ ಜೊತೆಗೆ ಸಮೀಕರಿಸಿ ಸಮಾಧಾನಗೊಂಡು ಬದುಕ ಸಂಯೋಜಿಸಿ ಸಂಭ್ರಮಿಸುವುದು...
___ ಸ್ಮಶಾನ ಭಸ್ಮ ಲಲಾಟದ ಅಲಂಕಾರವಾಗಿ...
&&&

ವತ್ಸಾ -
ವಿಷಯ ಚಿಕ್ಕದೇ ಇರತ್ತೆ - ಆದ್ರೆ, ಬದುಕು ತುಂಬಾ ದೊಡ್ಡದಿರತ್ತೆ...
ಮತ್ತು 
ಚಿಕ್ಕ ಚಿಕ್ಕ ಸಂಗತಿಗಳನು ಚೊಕ್ಕದಾಗಿ ಹರಿಬಿಡಿಸುವುದರಲ್ಲೇ ಬಾಳಿನ ದೊಡ್ಡತನವೂ ಇರತ್ತೆ...
____ ಸಣ್ಣ ಕಾಳಜಿ - ರೂಢಿಗತ ನಿರ್ಲಕ್ಷ್ಯ...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರಾ ಐವತ್ತು ಮತ್ತಾರು.....

ನೇಹದೋಂಕಾರ ಝೇಂಕಾರ ಹಗಲು.....

ಬೆಳಕು ನಗೆಯ ಭಾವ ಭಾಷ್ಯವಾಗಲಿ... ನೇಹಮಯೀ ಬೆಳಗು... 🤝🍬🫂

ಹಲಸಿನ ಹಸಿ ಹಪ್ಪಳಕೆ ಕಾಯ್ಕೊಬ್ರಿಯ ಜೊತೆ ಮಾಡಿ ಮೆಲ್ಲ ಮೆಲ್ಲುವ ರುಚಿ ಮುಂಬೆಳಗಿನ ನಿನ್ನ ಕನಸು...

ಕಚಗುಳಿಗಳ ಕಾವ್ಯ ಬೆಳಗು... 

ಶುಭದಿನವೇ ಸೈ... 🤝🫂

ಗುಡಿಯ ಅಲಂಕರಿಸಿದ ಘಂಟೆ ಒಂದೇ ಹೊತ್ತಿನಲ್ಲಿ ದೇವನನೂ ಭಕ್ತನನೂ ಕೂಗಿ ಮಾತಿಗೆ ಕೂರಿಸಿದಂತೆ ಈ ಬೆಳಕಿನುದಯ ರಾಗ...

ಪ್ರಾರ್ಥನೆಗೆ ಬಾಗಿದ ಭಕ್ತ, ಹಾರೈಸಲು ಬಾಗಿದ ದೇವ ಇಬ್ಬರೆದೆಯಲೂ ನಾದದೆಚ್ಚರ... ದರ್ಶನ ಬೆಳಗು... ಶುಭದಿನ... 🤝🫂 ಅಜ್ಞಾತ ಹಕ್ಕಿಯ ಹಾಡು, ಹೆಸರಿಲ್ಲದ ಹೂವಿನ ಅಂದ, ಬಯಲನೆಲ್ಲ ತಬ್ಬಿದ ಮಂಜು ಮಣಿಗಳ ಸಾಲು, ಪ್ರಕೃತಿಯ ಪರಿವೇಷದಲಿ ಇನ್ನೂ ಏನೇನೆಲ್ಲಾ ಗಡಿಬಿಡಿಯ ಉದ್ಗಾರಗಳು - ಅಣು ರೇಣು ತೃಣ ಕಾಷ್ಠಗಳೆಲ್ಲಾ ಮೈಮುರಿದೆದ್ದು ಸಂಭ್ರಮದ ಸುಪ್ರಭಾತಕ್ಕೆ ಎಷ್ಟೆಲ್ಲಾ ಬಣ್ಣಗಳು... ಪರಮ ಆಳಸಿ ನನ್ನ ಕಿವಿಯಲ್ಲಿ ಮಾತ್ರ ಕೀಲಿಯ ಗೊಂಬೆಯ ಅದೇ ಶಬ್ದ ಸಂಸಾರ... ಶುಭವಾಳಲಿ ದಿನವನೆಲ್ಲ... 🤝 ನಿದ್ದೆ ಮತ್ತು ಎಚ್ಚರದ ಶಕ್ತಿ ಸಂವಹನವನ್ನು ಚಂದ ನಿಭಾಯಿಸುವ ಕತ್ತಲು ಮತ್ತು ಬೆಳಕಿನ ಅಘೋಷಿತ ಮೈತ್ರಿ - ಚರಾಚರಗಳ ಚಾರಣವ ಕಾಯುವ ಪ್ರಕೃತಿಯ ಪ್ರೀತಿಯ ಅಸೀಮ ದಿವ್ಯತೆ... ಶುಭದಿನ... 🤝🪻 ಇರುಳು ಎದೆ ಮೇಲೆ ಬರೆದ ಕವಿತೆಗಳನು ಹೊಂಬೆಳಗ ಮೊದಲ ಕಿರಣಗಳು ತೊಳೆದ ಕನ್ನಡಿಯಲಿ ಓದಿಕೊಂಡು ಉಲ್ಲಾಸದ ಹೂ ನಗೆಯೊಂದನು ಎತ್ತಿಕೊಂಡೆ... ಹಗಲ ಹಾಡಿ(ದಿ)ಗೀಗ ನಿನ್ನ ಹೆಸರು... ನೇಹದುತ್ಥಾನವೀ ಬೆಳಗು...🤝🫂 ಮಂಜು ಮಳೆ ತೊಳೆದಿಟ್ಟ ಊರ ದಾರಿಯಲಿ ಎಷ್ಟೆಲ್ಲಾ ಏನೆಲ್ಲಾ ನೆನಪುಗಳ ಹೆ(ಗೆ)ಜ್ಜೆ ಗುರುತು.... ಬಯಲ ಮಂಜಿನ ಹನಿ ಕಣ್ಣಲೂ ಇಳಿದಂಗಾಗಿ ಎದೆಯ ಬಟ್ವೆ ಭರ್ತಿಯಾದ ಭಾವ.... ಪ್ರೀತಿ ದ(ಧು)ನಿಯ ತಳಿರ ಬೆಳಗು... ಶುಭದಿನ...‌🤝🫂 ಬೆಳಕಿನ ಬೆನ್ನಿಗಾತು ಕೂತ ಕತ್ತಲು ಈ ಮನುಜ ಜಗದ ದೊಂಬರಾಟ, ನಟನಾ ಚಾತುರ್ಯವ ನೋಡಿ ನಗುವಾಗ ಒಳಗೇ ಕಂಪಿಸುವ ಬಿಡಿ ಬೆಳಗು...🤝 ಬೆಳಕೆಂಬ ಗುರುವಿನ ಶುಭಾಶೀರ್ವಚನದಂತ ಧನ್ಯ ಬೆಳಗು... 🤝 ಒಂದು ಮರುಹುಟ್ಟಿನಂತೆ ತಾಜಾ ತಾಜಾ ಅರಳಿದ ಬೆಳಗು... ಶುಭದಿನ...🪻🫂 ಅಲ್ಲೆಲ್ಲೋ ಊರ ಹೊರಗೆ ಕಾಡು ಕೋಳಿಯ ಸುಪ್ರಭಾತಕ್ಕೆ, ಚಿಟ್ಗುಬ್ಬಿಗಳ ಉಭಯಕುಶಲೋಪರಿ ಬೆರೆತು ಹಿತವಾದ ಗದ್ದಲವಾಗಿ, ಹೂ ಮೊಗ್ಗು ಮೈಮುರಿದು, ಇರುವೆಗಳು ಮನೆವಾರ್ತೆಗೆ ಹೊರಡಲನುವಾಗುವಾಗ, ವಸುಧೆಯ ವಕ್ಷಗಳಿಗೆ ಮೂಗುಜ್ಜುತ್ತಾ ಮಲಗಿದ್ದ ಕೆಂಪು ಮೂತಿಯವನು ಅವಳ ಪ್ರೀತಿಯ ಅವಳಿಗೂ ಇಷ್ಟು ಕೊಡಲೆಂಬಂತೆ ಅವಳ ಕಣ್ಣಲ್ಲಿ ಬೆಳಕ ತುಂಬಿ ಅವಳೊಡಗೂಡಿ ನಕ್ಕಾಗ ಜಗದ ಜ್ಞಾತರೆಲ್ಲಾ ಬೆಳಗಾಯಿತೂ ಅಂದು ಕೈಮುಗಿದರು... ಶುಭದಿನ... ⛅ ನಿನ್ನೆಡೆಗೆ ಹಾಯುವ ನನ್ನ ಕನಸು ಕಂಗಳಿಗೆ ಬೇಷರತ್ತಾಗಿ ಬೆಳಕ ಸುರಿದು ಒಂದು ನೇಹದ ಹಾದಿಗೆ ಇನ್ನೊಂದು ನೇಹದ ಹೆಗಲೀಯುವ ಬಲು ಸೊಬಗ ಬೆಳಗು... ಪ್ರೀತಿ ಪರಿಪಾಕ... ಶುಭದಿನ... 🤝🫂 ಶುಭ ನುಡಿವ ಕೊರವಂಜಿಯ ಹಾದಿಯಲೂ ಇಷ್ಟು ಶುಭವ ಸುರಿಯಲಿ ಹೊಸ ಬೆಳಗು... ನಗೆಯ ಹಾಡಾಗಲಿ ಮಡಿಲು... ಶುಭದಿನ... 🤝🫂 ಮನಸು ಬಯಸುವ ಪ್ರಶಾಂತಿಗೂ, ಬುದ್ಧಿಯ ಅವಿರತ ದೊಂಬರಾಟಕೂ, ನಿದ್ದೆ ಎಚ್ಚರಗಳ ಮೋಹಾ ಮಾಯೆಯ ಕಡೆದು ಒಡೆದು ತೋರುವ ಜಾದೂಗಾರ ಬೆಳಗು... ಶುಭದಿನವೇ ಇರಬಹುದು... 🤝🫂 'ಶುಭಂ' ಎಂದು ಬರೆದಲ್ಲಿಂದ ಇನ್ನೆಲ್ಲಾ ಶುಭವೇ ಎಂಬ ಆವಾಹಿತ ಮುಗ್ಧತೆಯಲ್ಲಿ ನಿರಾಳವಾಗುವ ಪ್ರೇಕ್ಷಕನ ಎದೆಯಲ್ಲಿ ಸಿನ್ಮಾ ಒಂದು ಮುಗಿದ ಕೆಟ್ಟ ಕನಸಿನಂತೆ ಅಥವಾ ಮಧುರ ಪ್ರೇಮ ಕಾವ್ಯದಂತೆ ಕದಲುತ್ತಲೇ ಇರುತ್ತಲ್ಲ ಅಂಥ ವಿಚಿತ್ರ ವಿಸ್ಮಯ ಬೆಳಗು... ಶುಭದಿನ... 🤝🫂 ಒಂದು ಸಣ್ಣ ನಗೆಯ ಹಂಬಲ ಮತ್ತು ಭರವಸೆಯಲಿ ಬಿರಿವ ಎದೆಯ ನೂರು ಕನಸುಗಳ ಕಂಗಳನು ಸಾಂತ್ವನಿಸೋ ಹೊಸ ಹೂ ಬೆಳಕ ಕುಡಿ ಈ ಬೆಳಗು... ಶುಭದಿನ... 🤝🫂 ಬೆಳಗೆಂದರೆ ಸಾವಿರಾರು ಕಲರವಗಳ ಮಾಯಾ ಬಜಾರು... ಪ್ರೀತಿಯ ಪಾನಕ ಹಂಚುತ್ತಾರಲ್ಲಿ ಪುಟಾಣಿ ನಗೆಯ ಅರವಟಿಗೆಯ ತೆರೆದು ಕೂತೋರು... ನೇಹಮಯೀ ಹಗಲು... 🤝🫂 ಅದೇ ಹಳೇಯ ಭಾವಾನುಭಾವಗಳ ಕಿಲುಬುಗಳನೆಲ್ಲ ಹೊಸ ಬೆಳಗ ಬೆಳಕಲ್ಲಿ ತೊಳೆದು ಹೊಳಪಾಗಿಸಿ ಮತ್ತೆ ನಗೆಯ ಲಕೋಟೆಯಲಿಟ್ಟು ನಿನ್ನೆದೆಗೆ ದಾಟಿಸಲೆಳಸುತ್ತೇನೆ... ಪಡೆದ ಪ್ರೀತಿಯ ಸಾಲದ ಮಾಧುರ್ಯ ಕೆಲವು ಕಾಲದ ಮಟ್ಟಿಗೆ ನವೀಕರಣವಾದಂತೆ ಭಾಸ... ಮನಸು ಮನಸುಗಳ ನೇಹದ ಚಂದ ಒಡಂಬಡಿಕೆಗೆ ಸಾಕ್ಷಿಯ ರುಜು ಹಾಕಲು ಅನುಗಾಲವೂ ತಾನು ಜೊತೆಯಿರಬಲ್ಲೆನೆನುವ ಅಂತಃಕರುಣೀ ಬೆಳಗು... ಶುಭದಿನ... 🤝🫂 ದಿನದ ಮೊದಮೊದಲ ಬೆಳಕ ಕಿಡಿಯಿಂದ ನಗೆಯ ಕುಡಿಯೊಂದ ಹಕ್ಕಿನಿಂದೆಂಬಂತೆ ಕಡ ಪಡೆದು ನಾನೇ ಬರೆದುಕೊಂಡ ನನ್ನ ಸುನೀತ ದಿನ ಭವಿಷ್ಯಕೆ ಸಾಕ್ಷಿ ಕನ್ನಡಿಯೊಳಗಿನ ಅರಳು ಕಂಗಳ ಸಂಭ್ರಮದ ಋಜು... ನೊಸಲ ಮೇಲೆ ನಿನ್ನ ಹೆಸರು - ಶುಭವೇ ಒಳಹೊರಗಾಡುವ ಉಸಿರು... ಶುಭದಿನ... 🤝🫂 ನಿಷ್ಕಾರಣ ಪ್ರೀತಿ ಹಂಚಿಕೆಯ/ಸಂಚಿಕೆಯ ಬಗೆಗೆ ಒಂದು ಸಾಲು ಬರೆಯುವ ಹವಣಿಕೆಯಲಿ ಕಣ್ತೆರೆದೆ - ತನ್ನ ಜೊತೆ ನಿನ್ನ ತೋರಿ ನಸು ನಕ್ಕಿತು ಬೆಳಗು... ನೇಹದೋಂಕಾರ ಝೇಂಕಾರ ಹಗಲು... ಶುಭದಿನ... 🤝🫂 ವಸುಧೆಯ ಎದೆ ಮೇಲೆ ಭಾನು ಬರೆವ ಹೊಸ ಪ್ರೇಮ ಗೀತೆ - ಬೆಳಗು... ಪ್ರೀತಿಗೆ ಪ್ರೀತಿಯ(ಯೇ) ಉಡುಗೊರೆ - ದಿನಾಂತಕೆ ಈರ್ವರ ಯೆದೆ ಜೋಳಿಗೆ ತುಂಬಾ ನಗೆಯೇ ನಗೆ... ಶುಭದಿನ... 🤝🫂 *** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರಾ ಐವತ್ತು ಮತ್ತೈದು.....

ಊರ ಗಾಂಪರಿಗೆಲ್ಲ ಉಂಡಷ್ಟು ಪ್ರೀತಿ ಫಲ.....

ಬಿರಿದ ಕಂಗಳಲಿ ಬೆಳಗು ಪ್ರೀತಿಯ ತುಂಬಲಿ...

ಸುಡು ಸುಡು ಅಗ್ನಿ ಹಣೆ ಬರಹ... 
ಚಿತಾ ಭಸ್ಮವೇ ಬೋಳೆ ರುದಯದ ಅಲಂಕಾರ... 
ನೂರು ಅಹಂಕಾರಗಳ ತಲೆ ತುಳಿದು ಮಸಣವೇ ಮನೆಯಾಗಿ ಪ್ರೀತಿ ತಾಂಡವ...
ಕೂಡಿ ಹರಿವ ಪ್ರೇಮದ ನಗೆ ಬೆಳದಿಂಗಳಲಿ ಕುಡಿದ ವಿಷವೂ ಅಮೃತ...
ಸೃಷ್ಟಿ ಸಂಭ್ರಮ ದರ್ಶನ ಬೆಳಗು...
ಶುಭಾಶಯ - ಶುಭದಿನ... 📿
&&&

ಇಲ್ಯಾವುದೋ ಬೇಲಿ ಗಿಡದ ಹೂವು - ಗಿಡದಿಂದ ಬೇರ್ಪಡದೇ
ಅದ್ಯಾವುದೋ ಗೋಡೆ ಗೂಡಿನ ದುಂಬಿ - ಗೂಡು ತೊರೆಯದೇ
ಹೀಗೆ ಬಂದು ಹಾಗೆ ಹೋಗಿ ಆಡಿ ಹಾಡಿ ತೂಗಿ ತಬ್ಬಿ
ಹಂಚಿದ್ದು ಹರವಿದ್ದು - 
ಊರ ಗಾಂಪರಿಗೆಲ್ಲ ಉಂಡಷ್ಟು ಪ್ರೀತಿ ಫಲ...
ಹೂ ಅರಳುವ ಸದ್ದನು ದುಂಬಿಯೆದೆ ಬಾಗಿಲಲಿ ಕೂಗಿ ಹೆಳುವ ಶೃಂಗಾರ ಸಿಂಗಾರ ಬೆಳಗು...
ಶುಭದಿನ... 🪻🦋🫂
&&&

ಬೆಳಗು ಹೊಸಿಲ ತುಳಿಯುವ ಹೊತ್ತಲ್ಲಿ ಅವಳೆನ್ನ ಕನಸಿಂದ ಎದ್ದು ಹೋಗುತ್ತಾಳೆ...
ಇರುಳಿಡೀ ಅವಳನೇ ಹೊದ್ದು ಮಲಗಿದ್ದೆನೆಂಬ ಭಾವ ವಿಲಾಸದಲಿ ಮೈಮುರಿಯುತ್ತೇನೆ...
ಬೆಳಕ ಕನ್ನಡಿಯಲೀಗ ಪೋಲಿ ಎದೆಯ ಅವಭೃತ ಸ್ನಾನದ ಕಮ್ಮನೆಯ ನಗು ಮಿನುಗು...
ಶುಭ ಸಾನಿಧ್ಯ - ಶುಭದಿನ... 🧚
&&&

ದ್ಯುತಿಯ ಸಣ್ಣ ಕಿಡಿಯೆದುರೂ ಕರಗಿ ಹೋಗುವ ಕತ್ತಲ ಎದೆಯಲೂ ಬೆಳಕ ಹುಡುಕಾಟವಿದ್ದಂತಿದೆ...
ಅಂತೇ,
ಬೆಳಕು ಸುಡುವಲ್ಲಿ ನೆರಳಾಗುವ ಎತ್ತರ - ಕತ್ತಲಿನೆದೆಯ ಪ್ರೀತಿ ಔದಾರ್ಯವೇ ಆಗಿದೆ...
ಕತ್ತಲ ಲಾಲಿಯಲಿ ತೊಳೆದ ಕಂಗಳಲಿ ಶಾಂತ ಬೆಳಗು...
ಶುಭದಿನ... 🧘🫂
&&&

ಹುಡುಕುವ ಎದೆಗಣ್ಣಿಗೆ ಅಣು ಕಣದಲೆಲ್ಲಾ ಪ್ರೀತಿಯೇ ಕಾಣಲಿ,
ಪ್ರೀತಿಯ ಹಂಚುವ ಪಾಪಚ್ಚಿ ಎದೆಗಳು ಹಾಯುವ ಹಾದೀಲಿ ಬೆಳಕು ಶುಭವನೇ ಸುರಿಯಲಿ...
ವಸಂತ ಸಂಭ್ರಮದ ಆ ಹಾದಿಯಲೊಮ್ಮೆ ನಮ್ಮ ಪ್ರೀತಿಯ ಭೇಟಿಯಾಗಲಿ...
ಶುಭದಿನ... 💞🫂 
&&&

ಥರಾವರಿ ಹೂಗಳ ಮಧ್ಯೆ ತುಳಸೀ ಕುಡಿಯ ಸೇರಿಸಿದಂಗೇ ತುಂಡು ತುಂಡು ಕ್ಷಣ ಕ್ಷಣಗಳ ನಗೆ ಮುಗುಳನೆಲ್ಲ ನಡುನಡುವೆ ಜೊತೆ ಮಾಡಿ ಮಾಲೆ ಕಟ್ಟಿ ದಿನವಿಡೀ ಎಷ್ಟು ಚಂದವಾಯ್ತೂ ಎಂದು ಮತ್ತೆ ವಿಲಾಸದಿ ನಕ್ಕು ಬೀಗುವಾ ನಗೆ ಮೋಹವೇ ಶುಭವು...
ಶುಭದಿನ... 🤝🫂
&&&

ಸುವರ್ಣ ತೇಜದ ಬೆಳಕ ಸಿರಿ ಬಾನು ಭುವಿಯ ಉಡಿ ತುಂಬಿ 
ಹೂವು ದುಂಬಿ ಅನನ್ಯ ಅನ್ಯೋನ್ಯತೆಯಲಿ ಅನುರಾಗವ ಪರಿಚಯಿಸಿಕೊಳ್ಳುವಾಗ
ಅಂದ, ಗಂಧ, ಗಾನವೆಲ್ಲ ಸಾನುರಾಗದಿ ಬಯಲ ಹಾದಿಯ ಗುಂಟ ಊರು ಕೇರಿಗಳಿಗೆ ಪ್ರಣಯಾನುರಾಗ ಪೂಜೆಯ ಸಿಹಿಯ ಹಂಚುತ್ತವೆ...
ಪ್ರೇಮಮಯೀ ಬೆಳಗು... 🤝🫂
&&&

ಕೊಟ್ಟಿಗೆಯ ಮಕ್ಕಳ ಮೈಸವರಿ ಎದೆಯ ಗುಟ್ಟುಗಳ ಹೇಳಿಕೊಳ್ಳುವ ಆಯಂದಿರ ಸೆರಗಿಗಂಟಿದ ಸಗಣಿ ವಾಸನೆ - ಪ್ರೀತಿಯ ನಿಜ ಘಮವಿದ್ದೀತು...
ತಂಬಿಗೆ ಕತ್ತಿನಿಂದ ಏರಿ ಬರುವ ನೊರೆ ಹಾಲಿನ ಸಾವಧಾನದಂತೆ ಬೆಳಕು ಗುಡ್ಡದ ಹೆಗಲೇರುತ್ತದೆ - ಅವಸರದ ಆವೇಷ ಇಲ್ಲದ ಪ್ರೀತಿ ಸಂರಚನೆ...
ಹಳ್ಳಿಗಾಡಿನ ಬೆಳಕಿನ ಬೇರು, ಪ್ರೀತಿಯ ಹೋರು - ಮಣ್ಣ ಮಡಿಲಲ್ಲಿ...
ಬೆಳಗೆಂದರೆ ಪ್ರೀತಿ...
ಶುಭದಿನ... 🤝💞🫂
&&&

ಹುಡುಕುವ ಕಣ್ಣಿಗೆ ಬಣ್ಣವಾಗಿ ಬೆಳಗುವ ಬೆರಗು ಬೆಳಕು...
ಬೆರಗಿನ ಸೌರಭ ಈ ಬೆಳಗು...
ಶುಭದಿನ... 🤝
&&&

ಶುಭವನೇ ಧ್ಯಾನಿಸುತ್ತಾ 
ಧ್ಯಾನಿಸಿದ್ದರ ಸಿದ್ಧಿಯ ನಂಬುತ್ತಾ
ಸಿದ್ಧಿಸಿದ್ದೇ ಶುಭವೆನ್ನುತ್ತಾ
ನಗುವ ಕಾಯ್ದುಕೊಂಡು ಬದುಕಿ ಬಿಡುವ 
ನಿತ್ಯ ಶುಭಾಕಾಂಕ್ಷಿ ಭಾವಲೋಕ...
ಶುಭದಿನ... 🤝
&&&

ಶುಭದ ಕೊಟ್ಟ ಕೊನೆಯ ಹನಿಯಲ್ಲೂ ಇರುವ ನಗೆಯ ಸಾರಕ್ಕೆ ನಮ್ಮದೇ ಹೆಸರಿರಲಿ...
ಶುಭದಿನ... 🫂🤝
&&&

"ನೂರು ನಂಬಿಕೆಗಳ ಹಾಡಿ ನಾನು ನಾನು ಎಂಬ ನಾನು ನೀನು...
ಬೆಳಕಿನ ಎದೆ ಬಗೆದರೆ ಒಂದೇ ಕಿಡಿಯ ನಾನಾ ರೂಪ (ಶಾಪ) ನಾನು ನೀನು..."
ಹೊಸಾ ತೇದಿಯ ಶುಭಾಶಯ - ಶುಭದಿನ... 🤝🫂🍫
&&&

ಮೂಟೆ ಮೂಟೆ ನಗೆ ಚಟಾಕಿಯೂ ಮುಟಿಗೆ ಮೌನದ ಒಗಟ ಒಡೆಯಲು ಹೆಣಗಾಡಬೇಕು...
ಬಯಲ ಬೆಳಗಿದಂತಲ್ಲ ಬೆಳಕಿಗೂ ಗವಿಯೊಳಗೆ ನೇರ ಪ್ರವೇಶವಿಲ್ಲ...
ಮುಚ್ಚಿಟ್ಟ ಭಾವದ ಹುಳಿಯಿಂದ ಎದೆಯೊಳಗೆ ಸಣ್ಣ ಕರೆ, ಅಡಗಿ ಕೂರೋ ಜೀವಕೆಂದೇ ಗುಹೆಯೊಳಗೆ ಚೂರು ಕತ್ತಲು - ಉಳಿದೇ ಬಿಡುತ್ತದೆ...
ಪುಟಾಣಿ ಅರಿವಿನ ಕಿರು ಹಾದಿ ಬೆಳಗು...
ಶುಭದಿನ... 🤝🫂
&&&

ಬೆಳಕು ಸುರಿಯುವ ಸದ್ದಿಗೆ
ಕಂಗಳರಳುವ ಕಾವ್ಯವು
ಭವದ ಭಾವದ ಭೃಂಗಕೆ
ಬೆಳಗು 
ಪ್ರೀತಿ ಹೇಳುವ ಚಂದವು... 
ಶುಭದಿನ... 🤝🫂🪻
&&&

ನನ್ನೊಳಗಿನ ಬೆಳಕಿಗೆ ನಾ ನಿನ್ನ ಹೆಸರಿಟ್ಟು ಕೂಗಿದರೆ ಬೆಳಕು ಪ್ರೀತಿಯಾಗಿ ರೂಪಾಂತರವಾದ ಭಾವ...
ಅಥವಾ 
ಇರಬಹುದು ಪ್ರೀತಿಯೇ ಬೆಳಕಿನ ನಿಜ ರೂಪ...
ಪ್ರೀತಿ ತುಂಬಿದ ಶುಭದಿನ... 🤝🫂
&&&

ಹೊಸತೆಂದರೆ ಹೊಸ ಬೆಳಕು...
ಎಷ್ಟು ಬೆರಗೋ ಅಷ್ಟು ಪ್ರಶ್ನೆಗಳು...
ಉತ್ತರ ಹುಡುಕುವ ಹುಕಿ ಇಲ್ಲದವನೆದೆಯಲೂ ಹುಟ್ಟಿ ಸಾಯುತ್ತವೆ ಹೊಸತೆಂದರೆ ಹೊಸ ಸಾಲು ಸಾಲು ಸವಾಲುಗಳು...
ಪರಿ ಪರಿ ಪ್ರಶ್ನೆಗಳ(ಳೇ) ಹೊಸ ಬೆಳಗು...
ಶುಭದಿನ... 🤝🫂
&&&

ಹೊಸ ಪರಿಚಯಗಳ ಮುನ್ನುಡಿಯಾಗೋ ಸಣ್ಣ ಸಣ್ಣ ವಿದಾಯಗಳು...
ದೇಶ, ಭಾಷೆ, ಭಾವ, ಬೆಳಕು - ಎಲ್ಲ ಎಲ್ಲಾ ಹೊಸ ಪರಿಚಯಗಳೂ ಒಳಿತನೇ ತರಲಿ...
ಶುಭದಿನ... 🤝🫂
&&&

ಇರುಳ ತಬ್ಬಿ ಇಬ್ಬನಿಯ ಮಿಂದ ಇಳೆಯ ತಬ್ಬುವ ಬೆಳಕು
ಅದೇ ಸಮಾ ಆವರ್ತನದಲಿ ಪ್ರೀತಿ ನಿತ್ಯೋತ್ಸವ...
ಪಿಸುನುಡಿಯಲಿ ಹೇಳಿದ ಬಯಲಾಗುವ ಪಾಠ ಬೆಳಗು...
ಶುಭದಿನ... 🤝🫂
&&&

ಬೆಳಕು ಅದೇ ಔದಾರ್ಯದಲಿ ಧಾರೆ ಸುರಿಯುತಿದೆ...
ಅಲ್ಲಿಗೆ -
"ಬದಲಾದದ್ದು ಪಥವಷ್ಟೇ, ಪ್ರೀತಿಯಲ್ಲ..."
ನೇಹದಾ ನಗೆ ಸುಗ್ಗಿ ಸಂಗೀತ ಬೆಳಗು...
ಶುಭಾಶಯ - ಶುಭದಿನ... 🫂🤝💞
&&&

ಬೆಳಕೀವ ಒಳಿತಿನ ದಾರಿ ಕಾಯುತ್ತಾ ಬಿರಿದ ಕಂಗಳಲಿ ಬೆಳಗು ಪ್ರೀತಿಯ ತುಂಬಲಿ...
ಶುಭದಿನ... 🫂🤝
&&&

ಎದೆಯ ತಾಕಿ ನಗೆಯ ನಾಡಿಯ ಮೀಟಲಿ ಬೆಳಗೆಂಬ ಭಾವಗೀತೆ...
ಶುಭದಿನ... 🤝🫂

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)