Thursday, December 13, 2018

ಗೊಂಚಲು - ಎರಡ್ನೂರೆಂಬತ್ತೆಂಟು..‌‌...

ಮಣ್ಣ ಋಣ.....

ಯಾವ ಕನಸಿನ ನಾವೆಗೆ ಯಾವ ಕಣ್ಣಿನ ಹಾಯಿಯೋ - ಆ ದಿಗಂತದ ಛಾಯೆಯೋ...
ನೀರಿಗಿಳಿಸದೇ ತೆರೆಯ ಕೋರೆಯ ಸೀಳಿ ದೋಣಿ ತೇಲೀತೇ - ಗಾಳಿ ಗುಮ್ಮನ ಗುದ್ದಿಗೆ ಎದೆಯೊಡ್ಡಿ ನಿಲ್ಲದೇ ಬದುಕ ಹಣತೆ ಬೆಳಗೀತೇ..‌.
#ಹಲವು_ಚಿತ್ರ_ಒಂದು_ಚೌಕಟ್ಟು...
⇱⇲⇳⇱⇲

ಕಣ್ಣ ಹನಿಯನ್ನ ರೆಪ್ಪೆ ಮರೆಯಲ್ಲೇ ಬಚ್ಚಿಡಬಹುದು ಜಗದ ಜಗುಲಿಗೆ ಬೀಳದಂತೆ - ಎದೆಯ ಧಾರೆಯ ಅವುಡುಗಚ್ಚಿ ಬಚ್ಚಿಡುವುದೆಲ್ಲಿ ಮತ್ತು ಹೇಗೆ ಇರುಳ ಕಣ್ಣು ಉಕ್ಕದಂತೆ...
#ಬಿಕ್ಕಳಿಕೆ...
⇱⇲⇳⇱⇲

ಮಾತು ಹುಟ್ಟದ, ಮೌನ ಒಗ್ಗದ, ನನಗೇ ನಾನು ಅಪರಿಚಿತ...
ಎಚ್ಚರಕೆ ನೂರೆಂಟು ಬಾವು - ತಬ್ಬಬಾರದೇ ನಿದ್ದೆಯ ಸೆರಗಿನ ತಂಪು ತಾವು...
ಕಾಯುವ ಕಷ್ಟ ಮತ್ತು ಅನಿವಾರ್ಯತೆ...
#ಮಣ್ಣ_ಋಣ...
⇱⇲⇳⇱⇲

ನಾಲಿಗೆಯ ಸಾವಿರ ಬಡಬಡಿಕೆಗಳೂ ಮನದ ಮೌನದ ಗೋಡೆಯ ಕೆಡವಲಾರದೆ ಕಂಗೆಡುವಾಗ - ಖಾಲಿ ಬೀದಿಯ ಕವಲುಗಳಲಿ ಹುಡುಕುತ್ತೇನೆ ಒಂದು ಸಣ್ಣ ನಗುವಿನ ಕಡ ಸಿಕ್ಕೀತಾ...
ಅಲ್ಲೇಲ್ಲೋ ಮೂಲೆಯಲಿ ಸುಳಿದಂತಾಗುವ ಬೆಳಕ ಬೆನ್ನಿನ ನೆರಳು ಇಲ್ಲಿಂದ ಎದ್ದು ಹೋದವರದ್ದೇ ಇರಬೇಕೆನಿಸುತ್ತೆ - ಮೌನ ಮತ್ತಷ್ಟು ಬಲಿಯುತ್ತದೆ...
#ಹೆಗಲು...
⇱⇲⇳⇱⇲

ನಿನಗೆ ನಾನು ಬೇಡವಾಗಿ - ನನ್ನೇ ನಾನು ಕಳೆದುಕೊಂಡೆ...
ನನ್ನ ನನಗೆ ಪರಿಚಯಿಸಿದ ತೀರಾ ತೀರಾ ಆತ್ಮೀಯ ಕತ್ತಲು - ಬೆಳಕಿನಲ್ಲಿ ಅಪರಿಚಿತ...
ಬದುಕಿಗೊಂದು ಗುರುತೂ ಇಲ್ಲ - ಶೃದ್ಧಾಂಜಲಿ ಸಭೆಯಲ್ಲಿ ಹೆಸರು ಜಗಜ್ಜನಿತ...
#ಅಳುವ_ಕಡಲಿನ_ಅಲೆಗಳು... 
⇱⇲⇳⇱⇲

ಬೆಳಕನ್ನು ವಾಚಾಮಗೋಚರ ಹಾಡಿ ಹೊಗಳೋ ಮನುಷ್ಯನಿಗೆ ಕತ್ತಲೆಂದರೆ ಕಡು ವ್ಯಾಮೋಹ...
#ನಾನೆಂಬ_ಬಣ್ಣಬಣ್ಣದ_ಮುಖವಾಡಗಳು...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

Monday, December 10, 2018

ಗೊಂಚಲು - ಎರಡ್ನೂರೆಂಬತ್ತು ಮತ್ತೇಳು.....

ಭಾವತರ್ಪಣ..... 

ಬೆವರು, ನೀರು, ಕಣ್ಣೀರು - ಬಣ್ಣ, ರೂಪಗಳೊಂದೇ ನನ್ನದು ನಿನ್ನದು; ರಾಗ, ರುಚಿ, ಭಾವ ಮಾತ್ರ ನಾ ತುಂಬಿದಂತೇ ನನ್ನದು...
#ಅನಾವರಣ...
↢↖↗↭↘↙↣

ಅಚ್ಚರಿಯು ಏನಿಲ್ಲ...
ಹಗಲು ವೇಷದ ಹಾದಿಯಿದು - ಹಳಿಯ ಹಂಗಿನ ನಡಿಗೆ...
ಮೆಚ್ಚುಗೆಯ ಮುಚ್ಚಳಿಕೆಯ ಬೂದಿ ಭಾರದ ಗಳಿಕೆ...
ಮಳೆಯೂ - ಬಿಸಿಲೂ - ಮಳೆಬಿಲ್ಲೂ; ಕಪ್ಪನ್ನು ಮುಚ್ಚಿಟ್ಟ ಬಯಲಿಗಷ್ಟೇ ಬಣ್ಣದ ಮೆರಗು...
ಕ್ಷಣ ಕ್ಷಣದ ಬಣ್ಣ ಊಸರವಳ್ಳಿಗೆ ಅಳಿವು ಉಳಿವಿನ ಗುರಾಣಿ...
ನಾನಿಲ್ಲಿ ತಳ್ಳಲಾಗದ ಕ್ಷುದ್ರ ನೆನಪು ಮತ್ತು ತಬ್ಬಲಾಗದ ಕೆಟ್ಟ ಕನಸು - ಒಂದು ನಿಮಿಷ ಮೌನ...
#ನಗುವೆಂಬೋ_ಛದ್ಮವೇಷ...
↢↖↗↭↘↙↣

ಮೌನವೇ - ನಿನ್ನಿಂದ ಕಲಿತ ಮಾತೊಂದು ನಿನ್ನಲ್ಲೇ ಉಳಿದ ತನ್ನ ನೂರೆಂಟು ಸಂಗಾತಿಗಳ ಹುಡುಕಾಡಿಕೊಂಡು ಸೋತ ಮಾತಿನ ಸ್ವಾನುಕಂಪದ ಅರೆಹುಚ್ಚು ಬಡಬಡಿಕೆಗಳ ಬಾಜಾರಿನಲ್ಲಿ ಅವಿರತ ಅಂಡಲೆಯುತಿದೆ...
ತಪ್ಪಿಯೂ ಸುಳಿಯದಿರು ಈ ಎದೆ ಬೀದಿಯೆಡೆಗೆ - ನಿನ್ನೆತ್ತರವ (?) ಹಾಡುವ ನಾಲಿಗೆ ಸತ್ತೀತು...
#ಒಂದು_ಘಳಿಗೆ_ಮೌನ...
↢↖↗↭↘↙↣

ನಿನ್ನಿಂದ ತುಂಬಿಕೊಂಡದ್ದು ನೆರಳಾಗಿ ಬೆನ್ನಲ್ಲೇ ಇದ್ದರೂ ಲಕ್ಷ್ಯವಿಲ್ಲ, ಲೆಕ್ಕವಿಲ್ಲ - ನಿನ್ನ ಕಳೆದುಕೊಂಡು ಖಾಲಿಯಾದ ಮಡಿಲನ್ನು ಯಾವ ಬೆಳಕೂ ತುಂಬಲಾಗುತ್ತಿಲ್ಲ - ತಪ್ಪಿಹೋದ ಘಳಿಗೆ ಮತ್ತೆ ಕೈಗೆಟುಕದಿದ್ದರೂ ನೆನಪಲ್ಲಿ ಮಾಯೆಯಂತೆ ಎದುರಿಗೇ ಬಂದು ಬಂದು ಕಣ್ಣ ತೀರವ ಗುದ್ದಿ ಗುದ್ದಿ ಕಾಡುತ್ತದೆ...
ಇನ್ನಾದರೂ ಎಲ್ಲ ಕೊಡವಿಕೊಂಡು ಏಳಬೇಕು - ಇಲ್ಲಿಯ ಖಾಲಿಯಲೆಲ್ಲ ನಿನ್ನಿಂದ ಹೆಕ್ಕಿಕೊಂಡ ನನ್ನೇ ನಾ ತುಂಬಿಕೊಳ್ಳಬೇಕು...
ನೀಲಿಯೇ ಕೂಗಿ ಕೂಗಿ ಹೇಳಬೇಕು:
.......... ಹಿಂಗಿಂಗೆ ಹಿಂಗಾಡ್ತಾ ಹಿಂಗಿದ್ದ ಇಂಥೋನು ಇನ್ನಿಲ್ಲ ಎಂದು ತಿಳಿಸಲು ವಿಶಾಧಿಸುತ್ತೇನೆ....
#ನಿನ್ನೆಗಳ_ಆ_ನನಗೆ_ಭಾವಪೂರ್ಣ_ಶ್ರದ್ಧಾಂಜಲಿ...
↢↖↗↭↘↙↣

ಒಂದು: ಗೋಡೆ ಕಟ್ಟಿಕೊಂಡು ಬೇಯುತ್ತಿದ್ದೆ, ಪ್ರೀತಿಯಿದ್ದದ್ದೇ ಆದರೆ ನೀ ಗೋಡೆಯ ಹಾರಿ ಬರಲೀ ಎಂದು - ಪರೀಕ್ಷೆ ತಪ್ಪಾ...?
ಇನ್ನೊಂದು: ಕುಂಟು ನನಗೆ, ಬಾಗಿಲು ತೆರೆದು ಬಂದೀಯೆಂದು ಕಾಯ್ದು ಕೂತಿದ್ದೆ ಇಲ್ಲೇ ಹೊರಗೆ - ನಿರೀಕ್ಷೆ ತಪ್ಪಾ...??
ಪ್ರೇಮ: ಸೇತುವಾಗಲೆಂದು ಒಳಸುಳಿದೆ ಗೋಡೆ ಮಾಡಿ ಹೊರಗುಳಿದಿರಿ - ಕಾಯ್ದುಕೊಳ್ಳಬೇಕಿತ್ತಲ್ಲವಾ ನಿಮ್ಮೊಳಗೆ, ಹುಡುಕುತ್ತಲೇ ಸವೆದಿರಿ ನನ್ನ ಪರರೊಳಗೆ...
#ಸೋಲು_ಯಾರದ್ದು...

ಪ್ರೇಮ ಪ್ರೇಮಿಯಲ್ಲಿ ಸೋಲುವುದು ತಾನು, ತನ್ನಂತೆ, ಕೇವಲ ತನ್ನದೆಂಬೋ ಹಸಿ ಹಸಿ ಸ್ವಾರ್ಥದಲ್ಲೇ ಅಲ್ಲವಾ...??
#ಸ್ವಂತಕ್ಕೆ_ಕುರುಡು_ಪರರದ್ದು_ಸುಳ್ಳು...

ನನ್ನದೇ ಜೀವ ಭಾವಕ್ಕೆ ನನ್ನನ್ನ ಅಪ್ರಾಮಾಣಿಕನಾಗಿಸೋ ಆತ್ಮ ವಂಚನೆ ಅನೈತಿಕವೇ ಅಲ್ಲವಾ...??
ಸೃಷ್ಟಿ ಸಹಜ ಕಾಮ ಅಪವಿತ್ರ ಹೇಗಾಯ್ತು...!!!
↢↖↗↭↘↙↣

ನಾ ಕರೆದಿರಲಿಲ್ಲ ನಿನ್ನ...
ಬಂದ ಮೇಲೆ ಹೊರಗೂ ಬಿಟ್ಟಿಲ್ಲ ನೀ ನನ್ನ...

ಹೊಟ್ಟೆ ತುಂಬಿರಬೇಕಲ್ಲ...
ತುಂಬ ಹಸಿವಲ್ಲೂ ತೇಗು ಬರತ್ತೆ ಅಲ್ವಾ...

ಬಕಾಸುರ ಹಸಿವು ಪ್ರೀತಿಗೆ - ತುಂಬೀತೇ ಬಡಪೆಟ್ಟಿಗೆ...
ಒಳಮನೆಯ ಕತ್ತಲ ರಾವು ಅಂಗಳಕೂ ಬಂದಲ್ಲಿ ತುಂಬೀತು ಯಾವ ಹಸಿವಿನ ಜೋಳಿಗೆ...

ಹಾವು ಸಾಯಡಾ ಕೋಲು ಮುರೀಯಡಾ...
"ಮೌನವ ಕಲಿಸು ಇಲ್ಲಾ ಮೌನದಿ ಮಲಗಿಸು..."
#ಭಾವತರ್ಪಣ...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

ಗೊಂಚಲು - ಎರಡ್ನೂರೆಂಬತ್ತಾರು.....

ಮರುಳನ ವ್ಯರ್ಥಾಲಾಪಗಳು.....

ನಟ್ಟ ನಡು ಸಂತೆಯ ಮಟ ಮಟ ಮಧ್ಯಾಹ್ನ ಗಕ್ಕನೆ ಎದೆಯ ಹೊಕ್ಕೋ ಮಸಣ ಮೌನ - ನಿನ್ನ ನೆನಪು...

ಕಣ್ಣ ತೀರದ ಹನಿಯಾಗಿ ಇಳಿದು ಹೋದ ಕನಸಿಗೊಂದು ಹೆಣಭಾರದ ಪತ್ರ ಬರೆದು ಮಳೆಯ ಮೋಡದ ಬೆನ್ನಿಗಂಟಿಸಿದ ಮರುಳತನ ನನ್ನ ಕವಿತೆ...

ಪ್ರೀತಿಯ ದೀಪವಾಗಬೇಕಿತ್ತು - ಅಷ್ಟಿಷ್ಟು ಕೊಟ್ಟು ತುಂಬಿಕೊಳ್ಳುತ್ತಾ.....
ಬಂಜರು ದ್ವೀಪವಾದೆ - ಎಗ್ಗುಸಿಗ್ಗಿಲ್ಲದೇ ಪಡೆಪಡೆದು ಖಾಲಿಯಾಗುತ್ತಾ.....

ಒಂದು ಸಣ್ಣ ನೋವನ್ನಾದರೂ ಬಿತ್ತುತಿರು - ಇರುವಿಕೆಯ ಅರಿವಿನ ಸಮಾಧಾನ...
#ಬದುಕು_ಭಾವ...
ππ¡¡¡ππ

ಗಿಜಿಗುಡುವ ರಸ್ತೇಲಿ ಹೆಜ್ಜೆಗೊಮ್ಮೆ ಕಾಲ್ತೊಡರಿ ಮುಗ್ಗರಿಸ್ತೇನೆ - ಕಾಲ್ತುಳಿತಕ್ಕೆ ಕಣ್ಣಿಲ್ಲದ ಭಯ; ಅದೇ ಖಾಲಿ ಖಾಲಿ ಹಾದಿಯೆಂದರೆ ನನ್ನ ಕಾಲ ಸಪ್ಪಳಕೆ ನಾನೇ ಬೆಚ್ಚಿ ಸಣ್ಣ ಕರುಳಿನಾಳದಿಂದ ವಿಪರೀತ ಭೀತಿ...
ಹೇಗೆ ನಡೆಯುವುದಿಲ್ಲಿ ಎದೆ ನಡುಗದೇ...
#ನೆನಪ_ಕೈಚೀಲ_ಕನಸ_ಕಂದೀಲು...
#ಭಾವ_ಬಂಧ_ಸಂಬಂಧ...
ππ¡¡¡ππ

ಒಂದೊಂದು ಮುರ್ಕಿಯಲ್ಲೂ ಯಾವ್ಯಾವುದೋ ಹಿಂದುಮುಂದಿನ ಎಳೆತಕ್ಕೆ ಒಂದೊಂದೇ ಕೊಂಡಿ ಕಳಚಿಕೊಳ್ಳುತ್ತದೆ...
ನನ್ನ ಮಾತಿನ ಆಖೈರು ಪೀಕನೆಲ್ಲ ತನ್ನ ಮೌನದ ಕಣಜದಲ್ಲಿ ದಾಸ್ತಾನು ಮಾಡಿಟ್ಟುಕೊಂಡ ಬಿಕನಾಸಿ ಬದುಕಿನೆದುರು ಅರೆಪಾವು ನಗುವಿಗಾಗಿ ಕೈಚಾಚಿ ನಿಲ್ಲುತ್ತೇನೆ ಪ್ರತಿ ಹೆಜ್ಜೆಗೂ...
ಕೂಡುವುದೊಂದು ಕಾಲ - ಕಳೆಯುವುದೊಂದು ಕಾಲ; ಕೊರಳ ಘಂಟೆ ಕಟ್ಟಿಕೊಂಡು ತುಡುಗು ಮೇಯಲು ಹೊರಟ ಕಳ್ಳ ದನದಂತ ಮನಸು...
#ನಾನು...
ππ¡¡¡ππ

ಹಿಂತಿರುಗಿ ನೋಡಿದರೆ ಬರೀ ಹಾಯ್ದು ಬಂದ ಕಲ್ಲು ಮುಳ್ಳುಗಳ ರಾಶಿ ರಾಶಿಯಷ್ಟೇ ಕಾಣುತ್ತೆ - ಮುಂದಾದರೋ ಅಸೀಮ ಕತ್ತಲ ಬಯಲು...
ಹೇ ಜೀವವೇ ನೀ ಅಲ್ಲಲ್ಲಿ ಆಗೀಗ ದಾಟಿದ ಮೀಟಿದ ಚೂರುಪಾರು ನಗೆಯ ಬೆಳಕನ್ನೇಕೆ ನೆನೆದು ಹಾಡುವುದೇ ಇಲ್ಲ...!!!
ಮನಸಿದು ಹಾದಿ ತಪ್ಪಿದ್ದೆಲ್ಲಿ; ಹರಿದ ಪಾದದ ರಕ್ತದ ಕಲೆಯಲ್ಲಾ, ಮಂಜುಗಣ್ಣಿನ ಹನಿಯ ಕರೆಯಲ್ಲಾ...???
ಜೀರ್ಣವಾಗದ ನಿನ್ನೆಗಳು ಹರಳುಗಟ್ಟಿ ಸಣ್ಣ ಕರುಳಿನಾಳದಲ್ಲಿ ಮುಳ್ಳು ಮುರಿವ ಮೃತ ಸಂಜೆ...
#ಮಸಣ_ಮೌನದ_ಮನಸು...

ತೀಕ್ಷ್ಣ ನಾಲಿಗೆ, ಮಂದ ಕಿವಿ, ವಿಕ್ಷಿಪ್ತ ತರ್ಕಗಳ ವಿಲೋಮ ಹಾದಿ...
#ನಾನು...

ಕಾಲು ಎಡವಿದ್ದು ಹಿಂತಿರುಗಿ ನೋಡಿದ್ದಕ್ಕಾ ಅಥವಾ ಮುಂದಿಟ್ಟ ಅಡಿಗೆ ಅನುಭವದ ಆಸರೆ ಇಲ್ಲದ್ದಕ್ಕಾ...??
ಬದಲಾವಣೆ ಜಗದ ನಿಯಮ - ಅದ್ನಾ ಅರಗಿಸ್ಕೊಳ್ಳೋಕಾಗ್ದೇ ಇದ್ದಿದ್ದು ನನ್ ಕರ್ಮ...
#ಹಾದಿ...
ππ¡¡¡ππ

...............ಪಾಪಿ ಚಿರಾಯುವಂತೆ - ನನ್ನಂತೆ, ನಿನ್ನಂತೆ.....

ಬಂದ ದುಪ್ಪಟ್ಟು ವೇಗ ಹೋಗುವಾಗ ಪ್ರೀತಿಗೆ...
ಅದಕೇ ವೇಗವೆಂದರೆ ಭಯ ಈಗ ಈ ಪಾಪಿ ಪ್ರಾಣಿಗೆ...
ಸಾವಧಾನವ ಕಲೀರೋ ಅನ್ನೋಳು ಅಜ್ಜಿ ಮಾತಿಗೊಮ್ಮೆ - ಸೋತ ಹಾದೀಲಿ ನೆನಪೀಗ ಅಜ್ಜಿ ಹೆಜ್ಜೆಗೊಮ್ಮೆ...

ಅಳುವಾತನ ಜತೆ ಕೂತು ಅಳುವುದು ಎನಗೊಗ್ಗದ ಮಾತು...
ಅಳು ಅಳುವನ್ನೇ ಹಡೆವ ಭಯವಿದೆ ನೋವಿಗೆ ನಗೆಯೊಂದು ಭರವಸೆಯ ಹೆಗಲಾಗದ ಹೊರತು...
ಬರೀ ಕರುಣೆಗೆ ಹುಟ್ಟಿದ ಕೂಸು ಬಾಳಿದ್ದು ಭ್ರಾಂತು...
ಪ್ರೀತಿ ಪ್ರೀತಿಗೇ ಹುಟ್ಟಬೇಕಾದ ತಂತು...

ಇನ್ನಾಗದೂ ಅನ್ನಿಸಿದಾಗ ಬಾಂಧವ್ಯದ ಕೊಂಡಿ ಹರಿದದ್ದು ಅಥವಾ ಹರಿದುಕೊಂಡದ್ದಲ್ಲ ಸೋಲು; ಬದಲಿಗೆ ಬಿಡಿ ಬಿಡಿಯಾಗೋ ಪ್ರಕ್ರಿಯೆಯಲ್ಲಿ ಇನ್ನಿಲ್ಲದಂತೆ ಭಾವದ ಸೆಲೆಯ ಕಲುಷಿತಗೊಳಿಸಿದ್ದು ಅಥವಾ ಗಬ್ಬೆಬ್ಬಿಸಿಕೊಂಡದ್ದು ನಿಜದ ಸೋಲು...
#ನಾನು...

ಇರಲಿ ಕೋಟೆ ಗೋಡೆಗೊಂದು ಕಳ್ಳಗಂಡಿ - ಒಂದು ಹೆಜ್ಜೆ ಬಯಲಿಗೆ; ಮಸಣ ಮೌನ ಕಾಡುವಾಗ ರಣ ಕೇಕೆಯೂ ತುಸು ಜೀವಂತಿಕೆ...

#ಅರ್ಥ_ಕೇಳಬೇಡಿ_ಮರುಳನ_ವ್ಯರ್ಥಾಲಾಪಗಳಿಗೆ...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

ಗೊಂಚಲು - ಎರಡ್ನೂರೆಂಬತ್ತು ಮತ್ತೈದು.....

ಪೊಕ್ಕು ವ್ಯಾಖ್ಯಾನ..... 

ಏನಯ್ಯಾ ನಿನ್ನ ಸಾಧನೆ...?
ಬೆಳಕೇ -
ಸಾಧನೆ ಗೀಧನೇ ಮಣ್ಣು ಮಸಿ ಎಲ್ಲ ಗೊತ್ತಿಲ್ಲ...
ನೋವನೆಲ್ಲ ನಿನ್ನುಡಿಗೆ ಸುರಿದು ನಿಸೂರಾಗಿ ನಿನ್ನೆದೆ ಕುಡಿಕೆಯ ನೇಹದ ಪ್ರೀತಿ ಬೆಣ್ಣೆಯ ಮೆದ್ದವನ ಮುಡಿಯ ಸಿರಿಯೊಂದಿದೆ - ಅದು ಕರುಬುಗಳ ಖಬರಿಲ್ಲದ ಖುಲ್ಲಂಖುಲ್ಲಾ ಹುಚ್ಚು ನಗು...
ಈಗಿಲ್ಲಿರೋದೂ, ಹಾಂಗೆ ಚೂರು ಪಾರು ಅಲ್ಲಿಲ್ಲಿ ಕೊಡಬಹುದಾದದ್ದೂ ಎಲ್ಲ ಅದೊಂದೇ - ನಡೆಗೆ ಪಡಿ ಕೊಟ್ಟು ಸಲಹಿದ ನಾಲ್ಕಾಣೆ ನಂಜಿಲ್ಲದ ನಗು...
#ನೀನೇ_ಸಾಕಿದ_ಕಳ್ಳ_ಮತ್ತವನ_ಗಳಿಕೆ_ಉಳಿಕೆ...
↧↧↧↤↰↱↦↥↥↥

ಚಂದಿರನ ಪಾಳಿ ಮುಗಿವ ಮುನ್ನವೇ ಕರುಳ ಗಂಟಿನ ನಟಿಕೆ ಮುರಿದು ಮನದ ಮೇವಿನ ಮೋಹಕೆ ನಗೆ ಅಗುಳು ಕರೆದ ಕಡೆಗೆ ನಡೆವ ಕವಿ ಬದುಕಿನ ಕಾವ್ಯದ ವ್ಯಾಕರಣದ ಪಾದ ತಪ್ಪಿದ ಮೇಲೆ ತಾ ಗೀಚಿದ ಎಲ್ಲಾ ಕವಿತೆಯ ಪಾದಕ್ಕೂ ಪ್ರಾಸ, ಅನುಪ್ರಾಸ, ಗಣ, ಲಯ, ಮಾತ್ರೆ, ಉಪಮೇಯ, ಉಪಮಾನ ಅಲಂಕಾರ ಎಂತೆಲ್ಲಾ ಛಂದೋಬದ್ಧ ವ್ಯಾಕರಣದ ವಜನು...!!
ಶಬ್ದಗಳ ಸೌಹಾರ್ದದಲಿ "ನೋವು ನಗೆಯ ಸಾಂತ್ವನಿಸಿದಂತೆ ಎದೆ ಬಗೆದ ಕವಿತೆ..."
ಈ ಬಯಲಾಟ ಮುಗಿಯುವುದೆಂದು...???
#ಕಣ್ಣಾಮುಚ್ಚೇ_ಕಾಡೇ_ಗೂಡೆ...
↧↧↧↤↰↱↦↥↥↥

ನಾನು:
ನಿನ್ನೊಳಗಿನ ಹಂಬಲದ ತೀವ್ರತೆ ಇಳಿಮುಖವಾಗ್ತಿದ್ದಂಗೇ ಹುಟ್ಟಿಕೊಳ್ಳುವ ಸಬೂಬುಗಳ ಕೌದಿಯ ಹೊದ್ದ ಕ್ಷುದ್ರ ನಿರ್ಲಕ್ಷ್ಯದ ಧಾಳಿಗೆ ನನ್ನೊಳಗಿನ ಆರ್ದ್ರ ಕೊಂಡಿ ತಣ್ಣಗೆ ಕಳಚಿಕೊಳ್ಳುತ್ತ ಸಾಗುತ್ತದೆ - ಇಲ್ಲೆಲ್ಲೋ ಕಳಚಿಕೊಂಡು ಅಲ್ಲೆಲ್ಲೋ ಹುಡುಕುವ ಆಟಕ್ಕೆ ಏನೇನೋ ಸುಂದರ ಸುಳ್ಳಿನ ಹೆಸರ ಹಚ್ಚೆ...

ಪ್ರಜ್ಞೆ:
ಆರೋಪಿ ನೀನಲ್ಲ - ಬದಲಾವಣೆ ಜಗದ ನಿಯಮ; ಆರೋಪ ನಿನಗಿಲ್ಲ - ಬೆಳಕು ಪಡಿಮೂಡುವಲ್ಲಿ ಬದಲಾವಣೆ ಜೀವದ ಚಂದ...

ಮನಸು:
ನೀ ನಡೆವ ಹಾದಿಯಲಿಂದು ಸಾವಿರ ಹುಣ್ಣಿಮೆ ಕನಸುಗಳು ಬೊಗಸೆ ತುಂಬಿಯಾವು - ಆದರೇನು, ಅಂದೆಂದೋ ನಿನ್ನ ಕಾಲಿಗೆಡವಿದ ನಾನೆಂಬ ಸಣ್ಣ ಹಣತೆಯ ಉರಿಯ ಸೌಗಂಧವ ಅವೆಂದೂ ತೊಳೆಯಲಾರವು...

ಮೌನ:
ನನ್ನನ್ನು ನನ್ನಲ್ಲಿ ಮಾತ್ರ ಹುಡುಕು...

ಉಪಸಂಹಾರ:
ನೀನು ಬಿಟ್ಟಿಲ್ಲ - ನಾನು ಸಿಕ್ಕಿಲ್ಲ; ಸ್ವಗತದಲ್ಲೂ ಆರೋಪ ಪ್ರತ್ಯಾರೋಪ - ಬಾಂಧವ್ಯದ ಹಾದಿಯಲೀಗ ಮುಳ್ಳುಕಂಟಿ...
↧↧↧↤↰↱↦↥↥↥

ಸುಳ್ಳು ಹುಟ್ಟಾ ಪರಮ ಸ್ಫುರದ್ರೂಪಿ - ಮೇಲಿಂದ ಅದಕ್ಕೆ ಸುಣ್ಣ ಬಣ್ಣ ಬಳಿದು ಸಭ್ಯತೆಯ ಹೆಸರಲ್ಲಿ ಮಾರುಕಟ್ಟೆಗೆ ಬಿಡ್ತೇನೆ - ಆಹಾ!!! ಭಲೇ ವ್ಯಾಪಾರ, ಜೇಬಿನ ತುಂಬಾ ಫರಾಕುಗಳ ಗರಿ ಗರಿ ಬಿರುದು ಬಾವಲಿಗಳು...
ಸತ್ಯವೋ - ಬಿಡಿ ಅದು ಬೆಳಕಿನ ಹಣೆಗಣ್ಣು...
#ಪೊಕ್ಕು_ವ್ಯಾಖ್ಯಾನ...
↧↧↧↤↰↱↦↥↥↥

ಹೆಡ್ಡ ನಾನು - ಚೂರೂ ನೋವಿನ ನೆಲಗಟ್ಟಿಲ್ಲದ ಸುಖದ ಸೂರು ಬಲುಬೇಗ ಜಾಳು ಜಾಳೆನಿಸುತ್ತೆ ನನಗೆಂದೂ...
ಮತ್ತೆ ಹೇಳ್ತೇನೆ - ಸ್ವರ್ಗದ ಏಕತಾನ ಸುಭೀಕ್ಷ ಸೌಖ್ಯಕಿಂತ ನರಕದ ಶಿಕ್ಷೆಯ ವೈವಿಧ್ಯ ಹೆಚ್ಚು ಸಹಜ, ಸ್ವಾಭಾವಿಕ ಮತ್ತು ಅತೀವ ಆಕರ್ಷಕ ಅನ್ಸತ್ತೆ ನಂಗೆ; ಅದಕೆಂದೇ ಸದಾ ಸುಖವ ಹಳಿಯುವ ನರಕದಂತ ಬದುಕಿನೆಡೆಗೆ ಅಸೀಮ ವ್ಯಾಮೋಹವಿದೆ ಅಫೀಮಿನ ನಶೆಯಂಗೆ...
ಹಾಗೆಂದೇ, "ಪೂರ್ಣ ಸ್ವಂತವೆನಿಸುತಿದ್ದ ಆ 'ಕಪ್ಪು ಹುಡುಗಿ' ಸತ್ತ ಮೇಲೂ ಇನ್ನೂ ಹತ್ತಾರು ವಸಂತಗಳ ಬದುಕಿದೆ ಈ ಹಂಸೆ..."
ಪಾಳು ಗುಡಿಯ ಅಂಗಳದಲಿ ನಿಂತೇ ಇದೆ ಗರುಡಗಂಭ...
ಉಹುಂ, 'ನಾನು' ಸಾಯುವುದಿಲ್ಲ - ನನಗಿಲ್ಲಿ ನಾನೇ ಎಲ್ಲ...
#ಉಸಿರಿನೊಂದು_ಕನಸು...
↧↧↧↤↰↱↦↥↥↥

ಜೀರ್ಣ ಆಗದೇ ಹೋದಲ್ಲಿ ಮಾತು, ಮೌನ, ಭಾವ, ಬಂಧ ಎಲ್ಲವೂ ಅಷ್ಟೇ; ಅಜೀರ್ಣವಾದದ್ದೆಲ್ಲ ಬೇಧಿಗೆ ಹಾದಿಯೇ - ಅನ್ನವಾದರೂ, ಪ್ರಾಣವಾದರೂ...
#ಬೇಧಿ_ಬೇಗುದಿ...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

Tuesday, December 4, 2018

ಗೊಂಚಲು - ಎರಡ್ನೂರೆಂಬತ್ನಾಕು.....

ಚಿಟ್ಟೆ ಪಾದದ ಧೂಳು.....
(ಕಪ್ಪು ಹುಡುಗಿಯೆಂಬ ಕನಸ ಕನವರಿಕೆ - ಮಾಗಿ ಬಾಗಿಲಲ್ಲಿ...) 

ಈಗಷ್ಟೇ ತನ್ನ ವರ್ಷದ ಪಾಳಿ ಆರಂಭಿಸಿದ ಛಳಿ ತನ್ನ ಬಾಗಿಲಲಿ ಬಿಡಿಸಿದ ರಂಗೋಲಿಯನು ಕಳ್ಳ ದಾರಿಯಲಿ ಬಂದ ಸಣ್ಣ ತುಂತುರು ಮಳೆಯೊಂದು ಅಳಿಸುತ್ತಿದೆ...
ಕಾರಣ, ಅಲ್ಲೆಲ್ಲೋ ಕಡಲ ಗರ್ಭದಲಿ ಸಿಡಿದ ಗಾಳಿಯಲೆಯ ಉದ್ವೇಗಕ್ಕೆ ಇಲ್ಲಿಯ ಎಂದೋ ಹೆಪ್ಪಾದ ತುಂಡು ಮೋಡಗಳು ಕರಗಿ ಕವಿತೆಯಾಗುತ್ತಿವೆ...
ಹೊಸ ಹಗಲು ಅರಳುವ ಹೊತ್ತಲ್ಲಿ ಅಂಥಾ ಛಳಿ ಮಳೆಯ ತಿಲ್ಲಾನಕ್ಕೆ ಮೈಯ್ಯೊಡ್ಡಿ ಇದ್ಯಾವುದೋ ರಣ ಗಡಿಬಿಡಿಯ ಬೀದಿ ನಡುವಿನ ಕವಲಿನಲ್ಲಿ ಕೆಲಸವಿರದ ಖಾಲಿ ಕೈಯ್ಯ ಅಬ್ಬೆಪಾರಿಯಂತೆ ನಿಂತಿದ್ದೇನೆ...
ವಿನಾಕಾರಣ ಎದೆಯ ಪದ ಪಾದವ ತೋಯಿಸೋ ನಿನ್ನ ನೇಹದ ನೆನಪಾಗುತ್ತಿದೆ - ಅರ್ಥವಾಗದ ನವಿರು ಮಾಧುರ್ಯವೊಂದು ಮೈಮನವ ಹೊಕ್ಕಿ ಸುಳಿಸುತ್ತುತ್ತೆ; ಮಾಗಿಯ ಇರುಳಿಗೆ ಗಟ್ಟಿ ಹೊದ್ಕೊಂಡ ಮೇಲೂ ಒಂದು ಸಣ್ಣ ಛಳಿ ಉಳಿದು ಮುದ ನೀಡುತ್ತಲ್ಲಾ ಹಾಗೆ...
ಭಾವದ ಬಿಗಿತ ಬೆಳೆಯುತ್ತಾ ಸಾಗಿ ಅಪರಿಚಿತ ಹಾಡಿಯಲಿ ಕಣ್ಣು ಕೋಡಿ ಹರಿದರೆ ನೀನೇ ಹೊಣೆ ಹೊರಬೇಕು - ನೋವಿಗೆ ಕಲ್ಲಾದ ಎದೆಯನೂ ಪ್ರೀತಿಗೆ ಕಣ್ಣು ತುಳುಕುವಂತೆ ಕೆತ್ತಿದ್ದು ನೀನೇ ತಾನೆ...
ಹೇಳಿದ್ದು ನೀನೇ ಅಲ್ಲವಾ, "ಎದೆಯ ಮೌನವ ಆಲಿಸು - ಕರುಳ ಮಾತನು ಲಾಲಿಸು; ನಗೆಕಾವ್ಯನಾದೋಪಾಸನೆಯ ನೈವೇದ್ಯವಾಗಲೀ ಬದುಕು..."
ನೋಡಿಲ್ಲಿ, ಮಾಗಿಬಾಗಿಲ ಮಳೆಗೆ ನಿನ್ನ ಸೆರಗಿನಂಚು ಹಿಡಿದ ಮೂಗ ಹಾಡಾಗುತಿದ್ದಾನೆ - ಮಡಿಲ ಮಗುವಾಗಿಸಿಕೋ...
#ಬೆಳಕವಳು_ಕಪ್ಪು_ಹುಡುಗಿ...💞
§§¿?¿?§§

ತುಟಿ ಒಡೆದದ್ದು ಸುರಿವ ಶೀತಕ್ಕೆ ಅಂತಂದು ಆಯಿಯ ನಂಬಿಸಿದೆ...(?)
ಉಫ್... ಛಳಿಗೆ ಮಾತು ಬರುವುದಿಲ್ಲ ನೋಡಿ - ಅಬ್ಬ ಬಚಾವಾದೆ...
ತಂಪು ಮುಸ್ಸಂಜೆಗಳಲಿ ಬಲು ತುಂಟಿ ಅವಳು - ಅವಳ ಸನ್ನಿಧಿಯಲಿ ನಾ ಚಂದಿರನನೂ ಮೆಚ್ಚಬಿಡೆನೆಂಬ ಹಠದವಳು...
ಎನ್ನೆದೆ ಮಾಳವ ಶೃಂಗಾರದಿ ಸಿಂಗರಿಸಿ ಆಳಿ ತಾರೆಗಳ ಅಣಕಿಸಿ ಮೆರೆವ ಕಾರ್ತೀಕ ದೀಪ...
#ನನಗೆಂದೇ_ಉರಿವ_ಕಪ್ಪು_ಹುಡುಗಿಯ_ಕರುಳ_ಹಣತೆ...
§§¿?¿?§§

ಅದೇನಂದ್ರೆ -
ಮಾಸ್ತರ್ ಗೋಡೆಯ ಕರಿ ಹಲಗೆ ಮೇಲೆ ರೇಖಾ ಗಣಿತದ ಬೇರೆ ಬೇರೆ ಕೋನಗಳ ಚಿತ್ರ ಬಿಡಿಸುವಾಗ ಅವಳ ಬಿಂದಿ, ಮೂಗುತಿ ಹಾಗೂ ಝುಮ್ಕಿಗಳನು ಕಣ್ಣ ರೇಖೆಯಲಿ ಸೇರಿಸಿ ಎದೆಯ ರೇವಿನಲಿ ಮಳ್‌ಮಳ್ಳ ಕನಸುಗಳ ಚಿತ್ರ ಬರೆಯುತಿದ್ದ ಅಡ್ಡ ಬೆಂಚಿನ ಹೆಡ್ಡ ನಾನು...
ಸಣ್ಣದೊಂದೂ ಸುಳಿವೀಯದೇ ಸಟಕ್ಕನೆ ನನ್ನೆಡೆಗೆ ತಿರುಗಿ ಅರಳುತ್ತಿದ್ದ ಆಕೆಯ ಜೋಡಿ ಬಿಂಬಿರಿಯಂಥ ಚಂಚಲ ಕಂಗಳು ನನ್ನ ಉಸಿರಿನೆಲ್ಲಾ ಬಿಳಲಿನಲೂ ಪೆಕರು ಪೆಕರಾಗಿ ಎಬ್ಬಿಸುತಿದ್ದ ಕಮ್ಮನೆ ಕಂಪನಕೆ ಎಂದಿಗೂ ಭಾಷೆಯ ವಿವರಗಳಿಲ್ಲ ಬಿಡಿ...
ಎನ್ನೆದೆಗೆ ಕಣ್ಣೋಟದ ಕಿಡಿ ತೂರಿ ಮರು ಘಳಿಗೆ ಮುಂಗುರುಳನು ಕಿವಿಗೆ ಮುಡಿಯುವ ನೆವದಿ ಅವಳ್ಯಾಕೋ ಅಡಗಿಸಿಡಲು ಹೆಣಗುತಿದ್ದ ತುಟಿಯಂಚಿನ ಸಣ್ಣ ನಗೆ ಲಾಸ್ಯ ಇಂದಿಗೂ ಒಗಟೇ ನನ್ನಲ್ಲಿ...
ನಿನ್ನೆಗಳ ಕಡೆದು ಕಾಯ್ದಿಟ್ಟ ನಗೆಯ ಅಫೀಮು ಅವಳು - ಎದೆಯ ಹೊಕ್ಕುಳಲಿ ಹೊಯ್ದಾಡೋ ಜೊಂಪೆ ಜೊಂಪೆ ನೆನಪ ಕಂಪು...
ಅಂದು ನನ್ನಾ ಹೊಸ ಹರೆಯದ ಬೀಗವಿಲ್ಲದ ಬಾಗಿಲಿಗೆ ಜೇನ್ದುಂಬಿ ಕನಸುಗಳ ಬಲೆ ನೇಯ್ದು ಕೊಟ್ಟ ಪಾಪದ ಕೂಸು - ಇಂದೀಗ ಯಾವ ಪ್ರೇಮದ ತೋಳಿನ ಅರಳು ಮಲ್ಲಿಗೆ ಹೂವೋ...
ಎದೆಯ ದೈವವದು ಎಲ್ಲಿದ್ದರೇನಾತು - ನಚ್ಚಗಿರಲಿ ಇದ್ದಲ್ಲಿ ಆ ನವಿಲ್ಗರಿಯ ಮರಿ...
#ಚಿಟ್ಟೆ_ಪಾದದ_ಧೂಳು...
§§¿?¿?§§

ಹೆಣ್ಣೇ -
"ಪ್ರಕೃತಿಗೆ ತನ್ನ ತಾ ಸಿಂಗರಿಸಿಕೊಳ್ಳೋ ಆಸೆ ಅತಿಯಾದಾಗ ನಿನ್ನ ಸೃಷ್ಟಿಸಿ ಮೈಮುರಿದು ನಾಚಿತು..."
ಎನ್ನೆದೆ ರೇವಿನ ಖಾಲಿಯ ತುಂಬ ನಿನ್ನ ಮನದ ಹುಕಿಯಂತೆ ನೀ ನಡೆದಾಡಿದ ನಿಂದೇ ಗೆಜ್ಜೆ ಪಾದದ ಗುರುತು...
#ಹೆಣ್ಣೆಂದರೇ_ಸೊಬಗು...

ಕೆಲವೆಲ್ಲ ಕನಸುಗಳು ಸುತಾರಾಂ ನನಸಾಗದೆಯೂ ನಿರಂತರ ಹಿತ ಭಾವದಲ್ಲಿ ತೋಯಿಸುತ್ತಿರುತ್ತವೆ ಮತ್ತೆ ಮತ್ತೆ - ಉದಾಹರಣೆಗೆ ನೀನು...
ಇನ್ನಷ್ಟು ವಿವರ ಬೇಕಾ - ಧಿಮಿಗುಡುವ ಮಳೆ, ನಿನ್ನ ಮೃದು ಸ್ಪರ್ಷಕೆ ಸುಳಿ ಗಾಳಿಯ ಸೀಳಿ ನಯವಾಗಿ ಓಡೋ ಬೈಕ್, ಹಿಂದಿನಿಂದ ನಿನ್ನ ಗಟ್ಟಿ ತಬ್ಬಿ ಕುಳಿತ ನಾನು ಮತ್ತು ನಿಂತಲ್ಲೇ ನಿಂತು ಮೈಮರೆತು ಮುಗುಳ್ನಗುವ ಕಾಲ...
#ಸತ್ತೋಗೋಷ್ಟು_ಖುಷಿಯಾಗೋ_ಪುಟ್ಟ_ಆಸೆ...
§§¿?¿?§§

ಈ ಮಾಗಿಯ ಅಟಾಟೋಪಕ್ಕೆ ಎಲುಬಿನಾಳದಿಂದೆದ್ದು ಬರೋ ಛಳಿ ಮಗ್ಗಲು ಬದಲಿಸದೇ ಕಾಡುವಾಗ "ನಾಚಿಕೆಯ ಕದವ ಮುಚ್ಚಿ, ಬೆತ್ತಲ ದೀಪವ ಹಚ್ಚಿ, ಎನ್ನೆದೆಯ ಮಂಚವನೇರಿ ಮಲಗೇ ಮಲಗೆನ್ನ ಮಡಿಲ ಹೂವೇ - ಕಾಮನೊಲೆಯ ಹಚ್ಚಿ, ಹರೆಯ ಮದವ ಮಥಿಸಿ, ಸುಖದ ನಿತ್ರಾಣದಲಿ ಛಳಿಯ ಸೊಕ್ಕನು ಸುಡುವ ಬಾರೇ ಬಾರೆನ್ನ ತೋಳ ಕಾವೇ" ಅಂತೆಲ್ಲಾ ಹುಚ್ಚುಚ್ಚು ಬಡಬಡಿಸಿ ಸಂದೇಶ ಬರೆದು ನಿಂಗೆ ಕಳಿಸದೇನೇ ನಿಂಗೆ ತಲುಪಿತು ಅನ್ಕೊಂಡು ಮುಸುಕೆಳೆದುಕೊಳ್ತೇನೆ...
ಬೆಳಗಿನ ಮೂರು ಜಾವ ಮುಂಚೆ, ಅಲಾರಾಂ ಕೂಗೋಕೂ ಮೂರೂವರೆ ನಿಮಿಷ ಮುನ್ನವೇ ಸ್ವಪ್ನ ಮೇಳನದ ಸೂರು ಹರಿದು ಎಚ್ಚರಾಗಿಬಿಡತ್ತೆ; ಮುಂಬೆಳಗಿನ ಕನಸು ನಿಜವಾಗುವುದಂತೆ ಕಣೇ ಹುಡುಗೀ - ಆಸೆ ಬಲಿಯುತಿದೆ ಈ ಕಾರ್ತೀಕದ ಮಗ್ಗುಲಿಗಾದರೂ ಉಸಿರ ಬೆವರಿನ ಸಂಕಲನದಿ ಮೈಯ ಬಯಲು ಮಿಂದೀತೇ...
#ತೋಳ_ಕಸುವಿಗೆ_ನಿನ್ನ_ತೂಗುವ_ಕನಸು...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

Saturday, December 1, 2018

ಗೊಂಚಲು - ಎರಡ್ನೂರೆಂಬತ್ತರಮೇಲ್ಮೂರು.....

ಇದೀಗ.....  

ಎಲ್ಲೆಲ್ಲಿಂದಲೋ ಏನೇನೆಲ್ಲ ಖುಷಿ ಖುಷಿಯ ನಶೆಯ ಬಣ್ಣಗಳ ಬರಗಿ ತಂದು ಕೀಲಿಸಿ ಕೀಲಿಸಿ ತುಂಬಿದರೂ ಎದೆ ಗರ್ಭದಾಳದ ಸಾವಿನಂತ ಖಾಲಿತನ ಮಿಸುಕಾಡದೆ ಹಾಗ್ಹಾಗೇ ಉಳಿದೇ ಹೋಗುತ್ತದೆ...
#ಮಸಣಕ್ಕೆ_ಬೇಲಿ_ಹಾಕಿ_ಸಾವಿಗೆ_ಕಾಯುವುದು...
↰↲↳↱↝↜↰↲↳↱

ಭರವಸೆಯ ಪಸೆ ಆರದಿರಲೆಂದು ಹಚ್ಚಿಟ್ಟ ಸೂತಕದ ಮನೆಯ ತಲೆ ಬಾಗಿಲ ಹಣತೆಗೆ ಎಣ್ಣೆ ಸುರಿಯುವ ತುಂಬು ತೋಳಿನ ಕಸುವನೂ ಗಡಗೆಡಿಸುತ್ತದೆ ಹೆಗಲಿಗೆ ಗಟ್ಟಿ ಮೆತ್ತಿಕೊಂಡ ಸಾವಿನ ಕರಕಲು ವಾಸನೆ...
#ಎಲ್ಲ_ನೆನಪಾಗುತಿದೆ...

ಬದುಕು ಮುನಿಸಿಕೊಂಡಲ್ಲಿ ಸಾವು ಅತೀ ಕರುಣೆ ತೋರಬಾರದು...
#ಕೊಳೆತದ್ದೆಲ್ಲ_ದುರ್ನಾತವೇ...

ಹುಟ್ಟಿಯೇ ಇಲ್ಲದ್ದನ್ನು ಹುಡುಕುವ ಪುರುಡು ಧಾವಂತ ನೀ ಬದುಕೇ...
#ಅಸ್ತಿತ್ವ...

ಎಲ್ಲೆಲ್ಲೋ ಸುಳಿದು ಅಲ್ಲೇ ಬಂದು ನಿಲುವ ನೆನಹು - ವಾಚಾಳಿಯ ಗಂಟಲ ಹುಣ್ಣು...
#ನಿನ್ನೆ...

ಸತ್ತವನ ಎದೆಯ ಬದುಕಿರುವ ಕನಸು - ಆ ಕಪ್ಪು ಹುಡುಗಿ...
#ನಾಳೆ...

ನನ್ನ ಪಾತ್ರವಿಲ್ಲಿ ಖಾಲಿ ಗೋಡೆಯ ಚಿತ್ರವಷ್ಟೇ...
#ಇದೀಗ...
↰↲↳↱↝↜↰↲↳↱

ಸಾವಕಾಶದಿ ಸಾಯುತಿರೋ ಸಹನೆ ಹಾಗೂ ಹೆಣೆದುಕೊಂಡಿದ್ದ ಕೊಂಡಿಗಳೆಲ್ಲ ಒಂದಾನ್ಕೆ ಲಡ್ಡಾಗಿ ತುಂಡು ತುಂಡಾಗುತಿರುವಂತ ವಿಲೋಮ ಭಾವ ಪ್ರಕ್ಷುಬ್ಧತೆಗೆ ಎದೆಯ ಹೊಸ್ತಿಲು ಕಿರಿದಾಗುತ್ತಾಗುತ್ತಾ ಅದರ ಹಾದಿ ಇನ್ನಷ್ಟು ಒರಟೊರಟು - ಒಳಗೆಲ್ಲಾ ಸಂತೆಮಾಳದ ಬೀದಿಗುಂಟ ಗಾರುಹಿಡಿದ ಅಪರಾತ್ರಿಯಲಿ ಗೋಳುಸುರಿವ ಕುಂಟು ಬೆಳಕಿನ ವಿಚಿತ್ರ ಅಸ್ವಸ್ಥ ಖಾಲಿತನ - ನಂದ್‌ನಂದೇ ಅನ್ನಿಸೋ ಗಳಿಕೆ, ಉಳಿಕೆಯೆಲ್ಲ ಈಗಿಲ್ಲಿ ಈ ಕೊನೆಮೊದಲಿಲ್ಲದ ಖಾಲಿತನವೊಂದೇ......
ಬದುಕಿನಂಥಾ ಬದುಕಿನ ಹುಚ್ಚು ನಶೆಯೂ ತುಂಬಲಾರದ ಈ ನಿರ್ವಾತವ ನೀನಾದರೂ ತುಂಬಬಲ್ಲೆಯಾ ನಿರ್ವಾಣಿ ನಿದ್ದೆಯೇ...
#ಬೆಳದಿಂಗಳ_ನಿತ್ಯಶ್ರಾದ್ಧ...
↰↲↳↱↝↜↰↲↳↱

ಚಿತ್ರಗುಪ್ತನ ವಿಳಾಸ ಸಿಕ್ಕೀತಾ...?
ಯಾರು ಕೊಟ್ಟಾರು...??
ಮತ್ತೇನಲ್ಲ, ಖಾಸಾ ಮಸಣ ಪೂಜೆಗೆ ಮುಹೂರ್ತ ಕೇಳಲಿಕ್ಕಿತ್ತು...
ಕಾಡು ಹಾದಿಗೆ ಎರಡಾದರೂ ಗಟ್ಟಿ ಹೆಗಲು ಹೊಂದಿಸಿಕೊಳ್ಳಬೇಕಲ್ಲ...
#ಬಡ_ಬದುಕಿನ_ಸಿದ್ಧತೆ...
↰↲↳↱↝↜↰↲↳↱

ಫಕ್ಕನೆ ಗೆಲುವೊಂದು ದಕ್ಕಿಬಿಟ್ಟಾಗಲೂ, ಎಲ್ಲ ಸರಾಗ ನಡೆಯುತ್ತಿದೆ ಅಂದಾಗಲೂ ತುಂಬ ಭಯವಾಗುತ್ತೆ - ವಿಚಿತ್ರ ತಳಮಳ - ರುಚಿಯೇ ಬೇಧಿಯ ಮೂಲವಲ್ಲವಾ...
ಅಮ್ಮನೂರಿನ ಹಾದಿಯಲ್ಲೂ ಕನಸ ಹೂಳಿದ ಗುರುತು ಕಣ್ಣಿಗಡರುತ್ತೆ - ದಕ್ಷಿಣ ಬಾಗಿಲ ಊರ ದೊರೆ ಅಡಿಗಡಿಗೆ ಮುಳ್ಳಾಗಿ ನಗುತಾನೆ - ಶಾಪಗ್ರಸ್ತ ಪಯಣ...
ನಿನ್ನೆಯ ಮೋಹಕೆ ಕರುಳು ಕಲಮಲಿಸಿದರೆ ಯಾರ ಹೊಣೆ ಮಾಡಲಿ...
ಗ್ರೀಷ್ಮದಲ್ಲೇ ಕಣ್ಣ ಕೊಳದಿ ನೆರೆ ಉಕ್ಕುವುದಂತೆ...

ತಯಾರಿ ಇರಬೇಕಂತೆ ಹೊರಡೋ ಮುಂಚೆ - ಏನ್ಮಾಡೋದು ಹಾಳು ಆಲಸ್ಯ, ಹುಟ್ಟು ಎದೆಯ ಜಡ್ಡು, ಎಲ್ಲ ಸೇರಿ ತಯಾರಿಯ ತರಾತುರಿ ಶುರುವಾಗುವ ಮುನ್ನವೇ ಹೊರಡೋ ಹೊತ್ತು ಮೀರಿರುತ್ತೆ...
ರಣ ಗಡಿಬಿಡಿಯ ಕಾಲವೋ ನನಗೆಂದು ಚೂರೂ ಕಾಯುವುದಿಲ್ಲ - ಜವನ ಕೋಣಕ್ಕೆ ಕುಣಿಕೆ ಇಲ್ಲ...
ಹೌದೂ, ಕಂದಮ್ಮಗಳ ಹೀಚು ನಗೆಯನೂ ತಿಂದು ತೇಗುವ ಆ ಗಡವ ಕಾಲನ ಕ್ರೂರ ಹಸಿವಿಗೆ ಅಮ್ಮಂದಿರ ಬೆಂದ ಕರುಳ ಶಾಪ ತಟ್ಟುವುದಿಲ್ಲವೇ...

ಹೇಗಿಷ್ಟು ಮರೆಗುಳಿಯಾದೆ ನಾನು - ಗೋಳು ಸುರಿವ ನನ್ನ ಉಳಿವಿನ ಅಂಬಲಿಯ ಹಂಬಲಕೆ ನಿನ್ನನೂ ಮರೆತುಬಿಡುವಷ್ಟು...
                       .............ಇನ್ನು ಹೊರಡಬಹುದು...

ಭಾವಗಳೆಲ್ಲಾ ಸುತ್ತಲಿನ ಕಣ್ಗಳಲ್ಲಿ ಇಷ್ಟಿಷ್ಟೇ ಸೋಲ್ತಾ ಇವೆ - ಜೀವ ಹೋಗಿಲ್ಲ ಎಂದು ಘೋಷಿಸಲು ತೇಕು ತೇಕು ಉಸಿರಾಟವೊಂದೇ ಪ್ರಮಾಣ - ಬದುಕೆಂಬೋ ಬದುಕು ತೀವ್ರ ನಿಗಾ ಘಟಕದ ಮೂಲೆಯ ಬೆಡ್ ನಂ...‌‌‌‌.......
#ಇದೆಂತಾ_ಕರ್ಮ_ಮಾರಾಯ್ರೆ...
↰↲↳↱↝↜↰↲↳↱

ಅಲ್ಲೊಂದು ಮಡಿಲ ನಗು - ಇನ್ನೆಲ್ಲೋ ಎದೆಯ ಸೂರು - ಎಷ್ಟೆಲ್ಲ ಕಿತ್ತು ತಿಂದರೂ ಜವನ ತಿಜೋರಿಗೆ ಬರ್ಕತ್ತಿಲ್ಲ; ಯಾರೂ ಕರೆಯದೆ, ಯಾರನೂ ಹೇಳದೇ ಕೇಳದೇ, ಯಾವ ಮಂತ್ರ ಏನು ತಂತ್ರಕೂ ತಲೆಕೊಡದೇ ತಲೆಗಳುರುಳಿಸಿ ಕಣ್ಣೀರ ಕೋಡಿ ಕುಡಿವ ಅಚಲ ಕಾಯಕ ನಿಷ್ಠೆ ಅವನದು...
ಅವನ್ಯಾರೋ ದೇವನಂತೆ, ಶಿಷ್ಟ ಶಿರವ ಕಾವನಂತೆ - ಎಲ್ಲಿದ್ದಾನೆ ಅವ...
ಮುಗುಳು ನಗೆಯ ಬೆರಗನು ಕಾಯದ ದೈವವಿದ್ದರೆ ಅವನಿಗೆನ್ನ ಧಿಕ್ಕಾರವಿರಲಿ - ಅಸಮ ಸಾವು ವಿಜೃಂಭಿಸುವಲ್ಲಿ ದೇವನಿರವಿನ ನಂಬಿಕೆಗೆ ಬಲವಿಲ್ಲ...
ಉಹುಂ - ಚಿತೆಯ ಎದುರು ನಿಂತವನಲ್ಲಿ ಕರ್ಮಾಕರ್ಮದ ವಾದಕ್ಕೆ ಕೂರಬೇಡಿ...
#ನಿನಗಿದೋ_ಹಿಡಿಶಾಪ...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

Tuesday, November 20, 2018

ಗೊಂಚಲು - ಎರಡ್ನೂರೆಂಬತ್ತರಮೇಲೆರಡು.....

ಮಾಗಿಯ ಬಾಗಿಲು.....

ಭಾಮೆ, ರುಕ್ಮಿಣಿಯರಲೂ ಕೃಷ್ಣನಿಗೆ ರಾಧೆಯ ನೆರಳೇ ಕಂಡಿರಬಹುದು...
ಬೃಂದಾವನದ ಬಿದಿರ ಮೆಳೆಯ ಹೊಕ್ಕ ತಿಳಿಗಾಳಿ ಸುಯ್ದಾಟವೂ ರಾಧೆಯೆದೆಗೆ ಕೊಳಲ ದನಿಯನೇ ಸುರಿದಿರಬಹುದು...
ಗೋಕುಲದ ಯಮುನೆಯ ಹರಿವಿನಲಿ ಮಥುರೆಯ ಕಡಲ ಕನಸು - ಮಥುರೆಯ ಶರಧಿಯ ಹೊಯ್ದಾಟದಲಿ ಯಮುನೆಯ ಹಾದಿಯ ಬೆಳಕು...
ಪ್ರೇಮವೆಂದರೆ ಅದೇ ತಾನೇ - ಎದೆಯ ಧ್ಯಾನವೇ ಕಣ್ಣ ತುಂಬುವುದು...
ಪ್ರೇಮದ ಭಾಷೆ ಪ್ರೇಮವೇ - ಭಾಷ್ಯ ಅವರವರು ಬರಕೊಂಡಂತೆ...
#ಕಾರ್ತೀಕ_ಹುಣ್ಣಿಮೆ...
⇚⇖⇗⇘⇙⇛

ಕಪ್ಪು ಹುಡುಗೀ -
ಮುಂದಿನೆಲ್ಲ ಮಿಡಿತಕೂ ನಿನ್ನ ಹಸಿ ಮೈಯ ಪ್ರತಿ ಹಿರಿಕಿರಿ ಬಾಗು ಬಳುಕಿನಲೂ ನನ್ನುಸಿರ ಬಿಸಿ ಬಿಸಿ ರೋಮಾಂಚದ ನವಿರು ನೆನಪುಳಿಯಬೇಕು...
ಬಿಸಿಲು ಮಚ್ಚಿನ ನಟ್ಟ ನಡುವೆಯ ಸ್ವಂತ ಸ್ವಂತ ಏಕಾಂತ, ಹೊದ್ದ ಬಾನ್ಬೆಳಕ ಕೌದಿಯೊಳಗೆ ಹುಟ್ಟುಡುಗೆಯ ಹದುಳದಲ್ಲಿ ನೆಣೆಬಿದ್ದ ನಮ್ಮೀರ್ವರ ಬಿಗಿದ ಮೈಯ ಬೆಂಕಿಯಿಡೋ ಉರುಳುರುಳು ಕಚಗುಳಿಗೆ ಹಾಸಿಗೆ ನಾಚುವಾಗ ಮಂಚ ಕಿರು ದನಿಯಲಿ ಭಣಿತ ಸುಸ್ತಿನ ಮಾತಾಡಬೇಕು...
ಜೀವಭಾವದೆಲ್ಲ ಬಿಳಲುಗಳ ನುರಿನುರಿದು, ನೆತ್ತಿ ಸಿಡಿದು, ನಡು ಸುರಿದ ಆತ್ಯಂತಿಕ ರಮಣೀಯತೆಯಲಿ ಇಡಿ ಇಡಿಯಾಗಿ ಸಡಿಲವಾದ ನರಮಂಡಲದ ಉದ್ದಕೂ ಬಸಿದ ಬೆವರ ಹನಿ ಹನಿಯೂ ಬಯಸಿ ಉಂಡ ಸುಖದ ವೈಭೋಗದ ಕಥೆ ಹೇಳಬೇಕು...
ನನ್ನ ತುಂಬಿಕೊಂಡ ನಿನ್ನ ತೃಪ್ತ ಗೆಲುವಿನ ನಗೆಗೆ ಇರುಳ ಕಾವಳದ ಕಣ್ಣಲಿಷ್ಟು ಅಸೂಯೆ ಮೂಡಬೇಕು - ಗಾಳಿಗೂ ಉಸಿರುಗಟ್ಟಬೇಕು...
ಬೆನ್ನಿಗಂಟಿದ ಸಾವೂ, ಕಣ್ಣಿಗೊತ್ತಿಕೊಂಡ ಬದುಕೂ ಒಟ್ಟೊಟ್ಟಿಗೆ ನಿನ್ನ ಎದೆ ಗಿರಿಯ ತಪ್ಪಲಲ್ಲಿ ತಲೆಯಿಟ್ಟು ಆಪ್ಯಾಯನ ಸಂಭ್ರಾಂತ ನಶೆಯಲಿ ನಿದ್ದೆಹೋಗಬೇಕು...
ಬಾ ಇಲ್ಲಿ ಸಂಭವಿಸಲಿ ಸುರತ ಸಂಲಗ್ನ - ಮತ್ತೆ ಮತ್ತೆ...

ಹೇ ಇವಳೇ -
ನಿನ್ನ ಮೋಹದಲೆಯ ತೆಕ್ಕೆಯಲ್ಲಿ ಮನ್ಮಥನ ಹೂ ಬಿಲ್ಲಿಗೆ ಅನುಕ್ಷಣವೂ ಹೊಸ ಯೌವನ - ಈ ಪುಂಡ ಹೈದನ ಮೈಮನದ ನಿತ್ಯ ಸಂತುಷ್ಟ ನಿದ್ದೆಗೂ ನಿನ್ನದೇ ತೋಳು ಹೆಣೆದ ಅನುಭೋಗದ ನೆರಳಿನಾಲಿಂಗನ...
#ಪ್ರಣಯ_ರಸಗವಳ_ಕಿರುಪಯಣ...
⇚⇖⇗⇘⇙⇛

ಮೈಯ್ಯಾರೆ ಹೊದ್ದು ಮಲಗೋ ರತಿ ರಂಗಿನ ಪುಂಡು ಕನಸಿಗೂ ಒಂದು ಹೆಣ್ಣಾಸರೆ ಇರದ ಮುರುಟು ಮುರುಕು ಛಳಿಯ ರಾತ್ರಿಗಳು - ಪೋಲಿ ಹುಡುಗನ ದುರ್ಭಿಕ್ಷ ಕಾಲ...🤐
#ಮಾಗಿಯ_ಬಾಗಿಲು...
⇚⇖⇗⇘⇙⇛

ಮಳೆಬಿಲ್ಲ ಮುಖಕಂಟಿದ ಒದ್ದೆ ಬೆಳಕು...
ಸೂಜಿ ಮಲ್ಲಿಗೆ ಘಮಕೆ ಮೂಗರಳಿಸೋ ಸಂಜೆ ಗಾಳಿ...
ಅವಳ ಕಿವಿ ತಿರುವಿನಿಂದಿಳಿದು ಕೊರಳ ಶಂಖವ ಹಾಯ್ವ ಸ್ವೇದಬಿಂದು...
ಮೊದಲ ಮೋಡಕೂ ಮುನ್ನ ಹುತ್ತದೊಳಗಣ ಶಾಖಕೆ ಗೆದ್ದಲು ರೆಕ್ಕೆ ಕಟ್ಟಿಕೊಂಡು ಹಾತೆಯಾಗುವ ಪರಿ...
ನಾನಿರುವ ಕೊನೆಯ ಬೆಂಚಿನ ಕಡೆಗೆ ತಿರುಗಿ ನೋಡಿದವಳೇ ಜಗದೇಕ ಚೆಲುವೆ - ಮುಗ್ಧತೆಯ ಬೇರಿನ ಬೆವರಿಳಿಸಿದ ಮೊದಮೊದಲ ಸ್ವಪ್ನಸ್ಖಲನ, ಎಲ್ಲೆಂದರಲ್ಲಿಯ ಯಾವಾಗಂದರಾವಾಗಿನ ಅನಪೇಕ್ಷಿತ ನಿಮಿರು...
ಆಲೆಮನೆಯ ದಿನದ ಮೊದಲ ಹಾಲು ಬೆಲ್ಲ ಹೀರುವ ಒಳ್ತೋಡಿನ ಮುಖದ ಕರಿವದನ ರಣ ಬೆಂಕಿ ಶಾಖಕ್ಕೆ ಸುಟ್ಟು ಕಂದುಗಪ್ಪು ಮೋರೆಯಾಗುವ ಚಂದ...
ಬೆಳದಿಂಗಳ ಬೆನ್ನಿಗಂಟಿಕೊಂಡು ನಡು ಬಳಸಿ ನಡೆವ ಜೋಡಿ ಕನಸುಗಳು...
ಹಗಲ ಬಾಗಿಲಿಗೆ ಅಮ್ಮನಿಡೋ ಭರವಸೆಯ ಚುಕ್ಕಿ ರಂಗೋಲಿ - ಮುಂಗಾರಿಗೂ ಮುಂಚೆಯೇ ನೆಲವ ಬಗೆದು ಬೀಜವ ಉಪಚರಿಸಿಟ್ಟು ಬದುಕಿಂಗೆ ಅಪ್ಪ ಕೊಡೋ ರಟ್ಟೆ ಬೆವರ ಬಾಗಿನ...
ಜೇನ್ಗೂಡ ಮರಿ ರಟ್ಟಿನ ಹಾಲಿನ ರುಚಿ - ಗಾಣಮನೆ ಛಳಿ ಇರುಳು, ಹಾಲೆಬೆಲ್ಲ, ಇಸ್ಪೀಟು ಪಾರಾಯಣ ಮತ್ತು ಊರ ಪೋಲಿ ಕಥೆಗಳು...
ಮೊದಲಿರುಳ ಮಂಚದ ಗಿಜಿಗುಡುವ ಮೌನ - ಉಸಿರುಸಿರ ಉಗ್ಗಿನ ಮಾತು...
ವರ್ಷೊಪ್ಪತ್ತಿನ ಹೊತ್ತಿಗೆ ಭುಜದ ಒರಟಿಗೆ ಮೂಗುತಿಯ ಗೀರು, ಬೆನ್ನ ಬಯಲ ತುಂಬಾ ಪ್ರೇಮದೊಡೆತನದ ಹೆಸರು - ಹೆಗಲೇರಿದ ಮಗಳ ಕಾಲಂದುಗೆಯ ಘಲಿರು...
ಎಲ್ಲಿಂದೆಲ್ಲಿಗೋ ಬೆಸೆವ ಇಂದು ನಾಳೆಗಳ ನಗೆಯ ಬಿಳಲಿನ ನಂಟು - ಎದೆ ಗೂಡಿನ ಉಡಿ ತುಂಬಿದ ಖುಷಿ ಖುಷಿಯ ಬೇರಿನ ಗಂಟು...
#ಬಿದಿರು...
⇚⇖⇗⇘⇙⇛

ಕರಡಿ ಪ್ರೇಮವೇ -
ಕೂಡು ಹಾದಿಯ ನೆನಪ ಹಾಸಿ ಹೊದ್ದು ಬೆಚ್ಚಗಾದ ಮಾಗಿ ಮುಖಕೆ ವಿರಹದುರಿಯ ಪರಿಮಳ...
ತುಟಿಯು ತುಟಿಯ ತೀಡುವಾಗಿನ ನಿನ್ನ ಉಸಿರಿನ ಹಸಿ ಪರಿಮಳ....
ಹೆಗಲ ಮೇಲೆ ಹಚ್ಚೆಯಾದ ಮಡಿ ಮಿಂದ ಒದ್ದೆ ಹೆರಳ ಪರಿಮಳ...
ಕದ್ದು ಕೊಂಡ ಏಕಾಂತದ ಅಮಾಯಕ ಘಳಿಗೆಯಲಿ ನಾಕು ಕಾಲು ಬಳ್ಳಿ ಬೆಸೆದು ಒಡಲು ತುಂಬಿದ ಪರಿಮಳ...
ಹೊತ್ತು ಮೀರಿ ಅಲೆದಲೆದು ನಡು ಬಳಸಿದ ಸುಸ್ತಿನ ನಿದಿರೆಗೆ ನಾಭಿ ಪಾರಿಜಾತದ ಲಾಲಿಯ ಪರಿಮಳ...
ಮೊನ್ನೆ ನೀ ಬಂದಾಗ ಬಳಸಿದ ನನ್ನಂಗಿಯ ತೊಳೆಯದೇ ಹಾಗೇ ಮಡಚಿಟ್ಟಿದ್ದೇನೆ - ಈಗ ಬೆಳದಿಂಗಳ ಮುಂಗೈಗೆ ನಿನ್ನದೇ ಪರಿಮಳ...
ಕಾರ್ತೀಕ ಹುಣ್ಣಿಮೆಯ ಮಗ್ಗಲು - ಊರ ತೋಟದ ಮಲ್ಲಿಗೆಗೂ ಹರೆಯದ ಬೆನ್ನಿನ ಬೆವರ ಅಂಟಿನ ಪರಿಮಳ...
ಮುಂಬೆಳಗಿನ ಕನಸಿಗೆ ಅಂಗಳಕಿಟ್ಟ ಅಮ್ಮನ ರಂಗೋಲಿಯ ತುಳಿಯುವ ತೆಂಗಿನ ಹೂವಿನ ಪರಿಮಳ...
ಕೇಳಿಲ್ಲಿ - ಕಣ್ಣ ದೀಪದಲಿ ಕಾರ್ತೀಕದ ಬೆಳಕು; ಈ ಬದುಕಿಗೆ ನೀನೆಂದರೆ ಹೊಸ ಹುಟ್ಟಿನ ಗಾಢ ಪರಿಮಳ...
#ಮಾಗಿ_ಬಾಗಿಲು...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

Wednesday, November 14, 2018

ಗೊಂಚಲು - ಎರಡ್ನೂರೆಂಬತ್ತು ಮೇಲೊಂದು.....

ಬಾಲಂಗೋಚಿ ಬೆಳಕು ಹಾಗೂ ಬಿಟ್ಟಿ ಉಪದೇಶಗಳು.....  

ತಮ್ಮ ಹೀಚು ಬೆರಳಿಗಂಟಿರೋ ಖುಷಿ ಖುಷಿಯ ನಗೆ ಬೆಲ್ಲದಂಟನು ನನ್ನೆದೆಯ ಗೋಡೆಗೆ ಮೆತ್ತಿ ಇಲ್ಲಿಷ್ಟು ಮೃದು ಚಿತ್ತಾರ ಕೆತ್ತಿ ಚಪ್ಪಾಳೆ ತಟ್ಟಿ ಕಿಲಕಿಲ ಕಿರುಚಿ ಕೇಕೆ ಹಾಕೋ ಕೂಸು ಕಂದಮ್ಮಗಳ ಕರುಳ ಪ್ರೀತಿ ಅದು ಯಾವ ಪದಕೂ ನಿಲುಕದ ಶುದ್ಧ ದೈವತ್ವ...
"ಪ್ರೀತಿ ಹಂಚುವ ಕಲೆಯ ನಿರ್ವ್ಯಾಜ್ಯ ಪ್ರೀತಿಯಿಂದಲೇ ಕಲಿಯಬೇಕು - ಮತ್ತದಕ್ಕೆ ಮತ್ತೆ ಮತ್ತೆ ಮಗುವೇ ಆಗಬೇಕು..."
ಕೊರಳನಾತುಕೊಳ್ಳುವಲ್ಲಿ ಕರುಳ ಗೀತಿಕೆ; ಅದ್ಯಾವ ಹೋಲಿಕೆ ಆ ಮುದ್ದಿನ ಸೌಗಂಧಕೆ...
ಈ ಎದೆಯ ಗೂಡಿನಲಿ ಅನುಕ್ಷಣವೂ ಮುಗ್ಧ, ತುಂಟ ಮಗುವೊಂದು ಆಡುತಿರಲಿ...
#ಬಾಲಂಗೋಚಿ_ಬೆಳಕು...
⇛↺⇜⇝↻⇚

ಮನೋವಿಕಾಸ ಅಂದ್ರೆ ಮಗು ಮುಗ್ಧತೆಯ ಬೆರಗನ್ನು ಕಳಕೊಳ್ಳೋದಾಗ್ಲೀ, ಘನ ಗಾಂಭೀರ್ಯದ ಕಿರೀಟ ತೊಡಿಸಿ ಮುಗುಳ್ನಗುವ ಸೊಗವ ಕೊಂದುಕೊಳ್ಳೋದಾಗ್ಲೀ ಖಂಡಿತಾ ಅಲ್ಲ...
ಬದಲಿಗೆ,
ಮುಗ್ಧತೆಗೂ ಮೂರ್ಖತೆಗೂ, ಭಾವೋದ್ವೇಗಗಳಿಗೂ ಭಾವುಕತೆಗೂ ಇರುವ ಸೂಕ್ಷ್ಮ ವ್ಯತ್ಯಾಸವ ಅರಿಯಬಲ್ಲವರಾಗುವುದು...
ಆಕರ್ಷಣೆಯ ಹಿಗ್ಗನ್ನು ಆಕರ್ಷಣೆಯಾಗಿಯೇ ಗುರುತಿಸಿ ಒಪ್ಪಿಕೊಂಡು, ಭಾವವನ್ನು ಜೀವಿಯಿಂದ ಆಚೆ ನಿಂತೂ ಜೀವಿಸಲು ಕಲಿಯುವುದು...
ಮಳೆಬಿಲ್ಲ ಸೊಬಗಿಗೆ ಬೆರಗುಗಣ್ಣಾಗುತ್ತಲೇ ಕೈಯ ಕುಂಚದ ಅಗಾಧ ಸಾಧ್ಯತೆಗಳಿಗೆ ಬಿಳಿ ಹಾಳೆಯ ಅವಕಾಶದ ಬಯಲಾಗುವುದು...
ಒಪ್ಪವಾದ ಕಲ್ಪನಾ ಲೋಕವ ಸಾಕಿಕೊಂಡೇ ಕಲ್ಪನೆಗಳಿಂದ ಕನಸನ್ನು ಬೇರ್ಪಡಿಸಿಕೊಳ್ಳಬಲ್ಲವರಾಗುವುದು ಅಥವಾ ಹುಚ್ಚೆದ್ದ ಕಲ್ಪನೆಗಳಿಂದಲೇ ಕನಸೊಂದ ಹೆಕ್ಕಿ ಕಾವುಕೊಡಬಲ್ಲವರಾಗುವುದು...
ಯುದ್ಧದ ಹೊತ್ತಲ್ಲಿ ಹಿತವಾದ ಸುಖವೀವ ಭ್ರಮೆಗಳ ಹೆಡೆ ಮೆಟ್ಟಿ ಕಟು ವಾಸ್ತವವ ತುಂಟ ನಗುವಿನೊಡಗೂಡಿ ಎದುರ್ಗೊಳ್ಳುಲು ಮನವ ಅಣಿಗೊಳಿಸುವುದು...
ಕೋಟಿ ತಾರೆ, ಮಿಂಚು ಹುಳ, ಕರಿಕಾನ ಕತ್ತಲ ಕಾಲ್ದಾರಿಯ ಬೆಡಗು ಬಿನ್ನಾಣಗಳಿಗೆ ಮುಕ್ತವಾಗಿ ಎದೆ ತೆರೆದೇ ಸಾವನ್ನು ಸಾಯಬಡಿಯಲು ಬದುಕಿಂಗೆ ತುಸು ಪ್ರೀತಿಯ ಧೈರ್ಯ ಕಲಿಸುವುದು...
ಮನೋವಿಕಾಸ ಅಂತಂತಂದ್ರೆ ಮತ್ತೇನಲ್ಲ; ಮಗುವ ಮನದ ಬೆಳವಣಿಗೆಯೆಡೆಗಿನ (ದೊಡ್ಡವನಾಗುವ) ತೀವ್ರ ತುಡಿತದ 'ಮುಗ್ಧ ಒಲವ'ನ್ನು ಹಂಗಂಗೇ ನಡೆವ ಹಾದಿಯುದ್ದಕ್ಕೂ ನಗುವಾಗಿ ಸಲಹಿಕೊಂಬುವುದು... ಅಷ್ಟೇ...
#ಬಿಟ್ಟಿ_ಒಣ_ಉಪದೇಶ...
⇛↺⇜⇝↻⇚

ಸಭ್ಯತೆ ಅನ್ನೋದು ಮಾನಸಿಕ ಅನುಸರಣೆಯ ಪರಿಭಾಷೆಯೇ ಹೊರತು ಬರೀ ದೈಹಿಕ ಮಡಿಯ ಸ್ಥಿತಿ ಖಂಡಿತಾ ಅಲ್ಲ...
#ಕಸದ_ಬುಟ್ಟಿ...
⇛↺⇜⇝↻⇚

ಬೆಳಕೇ -
ತನ್ನೊಳಗೆ ತಾನು ನಿನ್ನನ್ನು ತಣ್ಣಗೆ ಪ್ರೀತಿಸಿಕೊಂಡು ಜತನದಿಂದ ಕಾಯ್ದಿಟ್ಟುಕೊಳ್ಳೋ ಹಠಕ್ಕೆ ಬಿದ್ದವನ ಎದೆ ಮಿಡಿತಕ್ಕೆ ನೀ ನೀಡುವ ನೋವಿನ ಎಡೆ ಕೂಡ ಅಪ್ಯಾಯಮಾನವೇ...

ಹಾಗೆಂದೇ, ಗೋರಿಯ ಮೇಲೆ ಹಸಿ ಹುಲ್ಲು ಚಿಗುರಿದಂಗೆ ಇಲ್ಲೊಂದು ಹೊಸ ಕನಸ ಮರಿ ನಗಲಾರದೇ - ನೀ ತುಳಿದ ಎದೆ ಹಾದಿಗೆ ಮತ್ತೊಮ್ಮೆ ಅರೆಘಳಿಗೆ ಜೀವ ಬರಲಾರದೇ...

ಕಾರಣ, ಪ್ರೀತಿ ಕೊಡೋದು ನನ್ನೆದೆಯ ತುಡಿತ ಮಿಡಿತದ ಭಾವತೀವ್ರತೆಯ ಒಸಗೆಯಲ್ಲಿದೆ - ಅದೇ ಪ್ರೀತಿ ಪಡೆಯೋದು ಪಡಿ ಕೊಡುವ ನಿನ್ನ ಮಡಿಲ ನಾಜೂಕು ಚೌಕಾಶಿಯ ಮರ್ಜಿಯಲ್ಲಿದೆ...

ಕೊಟ್ಟಲ್ಲದೆ ಪಡೆಯಲು ಪ್ರೀತಿ ಭಿಕ್ಷೆಯೇ...?
ಕೊಡದೇ ಪಡೆವ ಹುಕಿಯಲ್ಲಿ ಪ್ರೀತಿ ಭಿಕ್ಷೆಯೇ...

ನಾನಿಲ್ಲಿ ಬೆಳಕಿನ ಮನೆ ಬಾಗಿಲಲ್ಲಿ ನಿತ್ಯ ಭಿಕ್ಷುಕ...
ಬದುಕಿಲ್ಲಿ ಕನಸು - ಸಾವೀಗ ಬೆಳಕು...
#ವಿಕ್ಷಿಪ್ತ...#ಜಡ್ಡು...#ಬದುಕು_ಸಾವು...#ಕನಸು_ನೆನಹು...#ಪ್ರೀತಿ_ಗೀತಿ...#ಇತ್ಯಾದಿ....

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

Tuesday, November 6, 2018

ಗೊಂಚಲು - ಎರಡ್ನೂರೆಂಬತ್ತು.....

ಅರೆಪಾವು ಬೆಳಕ ಕುಡಿ.....   

ಬಯಸಿದ್ದು, ಕನಸಿದ್ದು ಕೈಗೂಡಿದರಷ್ಟೇ ನಗುವುದೆಂದಾದರೆ ಅಬಲಾಶೆಯ ಮನದ ತೂತು ಕಣಜ ತುಂಬಿದ ದಾಖಲೆ ಇದೆಯಾ...
ಬಯಸುವ, ಕನಸುವ ಆ ಹಾದಿಯ ಹಸಿರಿಗೆ ಬೆರಗಿನ ಕಣ್ಕೀಲಿಸುವ, ದಕ್ಕಿದ್ದನ್ನು ಹೆಕ್ಕಿಕೊಂಡು ಕಸರಿಲ್ಲದೆ ಕಣ್ಣಿಗೊತ್ತಿಕೊಂಬ ನಿಸೂರು ಕಾಣ್ಕೆಯಲಿ ನಗೆಯ ಸಲಹಿಕೊಂಡ ಬಯಲ ಜಂಗಮನ ಜೋಳಿಗೆ ತುಂಬಾ ಪುಟ್ಟ ಪುಟ್ಟ ಕಂತೆ ಕಂತೆ ಬೆಳಕ ಕುಡಿಗಳು...
ನಗೆಯ ಹಬ್ಬವಾಗಲಿ ನಡಿಗೆ - ಒಳಗೊಂಡು ನಿನ್ನನು, ನನ್ನನು, ಅವರಿವರೆಲ್ಲರನು...😊🤗
#ನಗೆ_ಮುಗುಳ_ದೀಪೋತ್ಸವ... 
⇄⇅⇆⇂⇃⇄⇅⇆

ಸಾಂತ್ವನವೆಂದರೆ ಅಳುವಾತನ ಹೆಗಲಿಗೊರಗಿ ನಿನ್ನ ನೋವೇ ದೊಡ್ಡದೆಂದು ನಾವೂ ಕಣ್ಣೀರ ತೊಡೆಯುವುದಲ್ಲ; ಬದಲಾಗಿ ದೃಢ ನೋಟದಿ ಕೆನ್ನೆ ತಟ್ಟಿ ಅಳುವಿನಾಳದ ನಗೆಯ ಹನುಮ ಬಲವ ಎಚ್ಚರಿಸುವುದು - ಅವನಿಗೆ ಅವನ ಪರಿಚಯಿಸುವುದು...
ಜಾಂಬವಂತರ ನೇಹ ಬೇಕು ನೋವಿನ ಜಂಬರು ಕಳೆಯಲು...
#ದ್ಯುತಿ...
⇄⇅⇆⇂⇃⇄⇅⇆

ಬಾಗಿಲು ತೆರೆದು ಕತ್ತಲನು ತುಂಬಿಕೊಂಡೆ - ಮೌನ ಮೈಮುರಿದು ತುಂಟ ನಗೆ ನಕ್ಕಿತು - ನರ ನಾಡಿಗಳಲೆಲ್ಲ ಅಮಲೇರಿದಂಗೆ ತೊನೆದು ತೊದಲಿ ಮಾತೇ ಮಾತು... ಯಾರೋ ಸ್ವೇಚ್ಛೆ ಅಂದದ್ದನ್ನು ನಾನು ಸೌಂದರ್ಯ ಎಂದೆ... ನೀನು ಶೃಂಗಾರ ಅಂದದ್ದನ್ನು ನಾನು ಬದುಕ ತೆಕ್ಕೆಗೊದಗಿದ ಸಿರಿ ಸೌಗಂಧ ಅಂಬೆ...
ಕತ್ತಲ ಗರ್ಭದಲ್ಲಿ ಬೆಳಕ ಕುಡಿ ಮಿಡಿಯುತ್ತದೆ - ಮನೆ ದಾರಿಯ ಕಾಲು ಸಂಕ...
ಎಷ್ಟು ಚಂದ ಈ ಇರುಳ ಹಾದಿ - ಕಣ್ಮುಚ್ಚಿ ನೋಡಬೇಕಷ್ಟೇ...
#ಬೆಳಕ_ನಶೆ...
⇄⇅⇆⇂⇃⇄⇅⇆

ಕೇಳಿಸ್ತಾ -
ನೋವನ್ನ ಅರಗಿಸ್ಕೊಂಡು ನಗೋದಕ್ಕೂ, ನೋವನ್ನೇ ಆಸ್ವಾಧಿಸಿ ಪ್ರೀತ್ಸೋದಕ್ಕೂ ತುಂಬಾ ತುಂಬಾನೇ ವ್ಯತ್ಯಾಸ ಇದೆ...
ನೋವಿಗೆ ಎದುರು ನಿಂತರೆ ಗೆದ್ದಾಗ ಬೊಗಸೇಲಿ ನಗು ಅರಳುತ್ತೆ - ಸೋತರೂ ಮರು ಯುದ್ಧಕ್ಕೆ ಅನುಭವದ ನಗು ಜೊತೆಯಾಗುತ್ತೆ - ಒಟ್ನಲ್ಲಿ ನಗುವಿನದೇ ಆವರ್ತನ...
ನೋವಿನ ಆಸ್ವಾಧನೆ ಆಯ್ಕೆ ಆದಾಗ ಅದರ ಉಪ ಬೆಳೆ ಅಳು - ಅಳುವಿಗೆ ಗೊಬ್ಬರವಾಗಿ ಸ್ವಾನುಕಂಪ - ಅದರ ಫಲ ಹೇತ್ಲಾಂಡಿತನ - ಅಲ್ಲಿಂದ ಕೈ ಇಟ್ಟಲ್ಲೆಲ್ಲ ಸೋಲು - ಅದರಿಂದ ಮತ್ತೆ ಅಳು - ಮತ್ತೆ ಮತ್ತೆ ಅದೇ ಸುಳಿಚಕ್ರ...
ನಗೆಯು ಆಯ್ಕೆ, ಆದ್ಯತೆಯಾದಲ್ಲಿ ಕ್ರಿಯೆಯ ರೂಪ ಸಹಜ ಭಾವುಕತೆ...
ಅಳು ಅನಿಯಂತ್ರಿತ ಅಭ್ಯಾಸವಾದರೆ ಅದು ಭಾವ ವಿಪ್ಲವ...
#ಬದುಕಿದು_ಬಡಿದು_ಹೇಳಿದ_ಪಾಠ...
⇄⇅⇆⇂⇃⇄⇅⇆

ವಿಸ್ತಾರ ಮೌನ ನೀಲಿಯೇ -
ಪೂರಾ ಪೂರಾ ದಡ್ಡನಾಗಿಸು ಇಲ್ಲಾ ನಾಲಿಗೆ ಸೀಳಿ ಚೂರು ಮೂಗನಾಗಿಸು ಎನ್ನ - ಅರಿತೆನೆಂಬ ಮತ್ತು ಅರಿತೇನೆಂಬ ಹುಸಿ ಹಮ್ಮಿನ ಶಬ್ದ ಸಂಭೋಗದ ಗೀಳು ಸಹಜ ಪ್ರೀತಿಯ ಹರಿವನೇ ಕೊಲ್ಲುವ ಮುನ್ನ...
#ಅರೆಪಾವು_ಬೆಳಕ_ಅರಿಕೆ...
⇄⇅⇆⇂⇃⇄⇅⇆

ಮೌನ ಶ್ರೇಷ್ಠ ಅಂದದ್ದು ಮಾತಿನ ಹಿರಿಮೆ...
ಮಾತು ಮಲಿನ ಅಂದಲ್ಲಿ ಮೌನ ಸಾವು...
ಒಳಗಿಳಿದ ಮಾತು - ಮೌನ, ಸಾವು...
ಹೊರ ಹರಿದು ಮೌನ - ಬೆಳಕು, ಹುಳುಕು...
ನಾನು ಜ್ಞಾನ, ನಾನೇ ಅಜ್ಞಾನ; ಯಾನ ಅಯೋಮಯ...
#ವಿಕ್ಷಿಪ್ತ...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

Saturday, November 3, 2018

ಗೊಂಚಲು - ಎರಡ್ನೂರಾ ಎಪ್ಪತ್ತೊಂಭತ್ತು.....

ಅಳಿವಿಲ್ಲದ ಆತ್ಮದುಲಿಗಳು..... 

ಬುದ್ಧನ ಯರ್ರಾಬಿರ್ರಿ ಹಾಡಿ ಹೊಗಳುವ ನಾನು ಸಣ್ಣದೊಂದು ನೋವನ್ನೂ ಸ್ವಂತವಾಗಿ ಮೀರಿದ್ದಿಲ್ಲ...
ನಿತ್ಯವೂ ಹೊಸ ಹೊಸ ಮುಖದಲ್ಲಿ ತುಳಿಯ ಬರೋ ಎಲ್ಲ ಬೇಗುದಿಗಳಿಗೂ ಒಂಟಿಯಾಗಿಯೇ ಎದೆಕೊಟ್ಟು ನಿಡಿದಾಗಿ ನಗಬಲ್ಲ ಆಯಿಗೆ ಬುದ್ಧನ ಹೆಸರೂ ಗೊತ್ತಿಲ್ಲ...
ಭಗವದ್ಗೀತೆಯನೇ ವಿಮರ್ಶೆ ಮಾಡೋ ದೊಡ್ಡಸ್ತಿಕೆ ನಂದು - ಚಿತ್ತ ಭ್ರಾಂತಿಯ ತೊಳೆದುಕೊಂಡು ಯಾವ ಪ್ರೀತಿಯನೂ ಗೆದ್ದದ್ದಿಲ್ಲ...
ತನ್ನಿಷ್ಟ ದೈವ ಕೃಷ್ಣನ ಕಾಡುವ ಅಪವಾದಗಳಿಗೂ ಕಣ್ಣಹನಿಯಾಗುವ ಆಯಿ ಅವಳ ಹಾದಿಯ ತಡೆಯುವ ಎಂಥದೇ ಯುದ್ಧಕ್ಕೂ ಬೆನ್ನು ತೋರಿದ್ದಿಲ್ಲ...
ಅವಳ ಬದುಕೇ ಭಗವದ್ಗೀತೆಯ ಭಾಷ್ಯ - ಸಾಸಿವೆಯ ತರಲಾರಳು ನಿಜ, ಆದರೆ ಜೀವಕ್ಕೆ ಮೊದಲ ನಗು ಕಲಿಸಿದವಳು ಅವಳೇ; ಬುದ್ಧರಿಗೂ, ಕೃಷ್ಣರಿಗೂ...
#ಆಯೀ_ಅಂದರೆ_ಆಳ...😍#ಆಯಿ_ಅಂದರೆ_ಬೇರು...😘
^^^^

ತನ್ನ ಕಂದನ ಅಸಾಧ್ಯ ತುಂಟತನದೆಡೆಗಿನ ಆಕ್ಷೇಪಣೆಯ ಹೊತ್ತಲ್ಲೂ ಆ ಅಮ್ಮನ ಕಂಗಳಾಳದಿ ಮೆರೆವ ಗರ್ಭಸ್ಥ ಖುಷಿಯ ಪ್ರೀತಿ ದೀಪ; ಅದು ವ್ಯಾಸರ ಅಕ್ಷರ ಅಧ್ವರ್ಯಕ್ಕೂ ನಿಲುಕದ ಜಗದ ಅಮೂರ್ತ ಜೀವ ಕಾವ್ಯ...
ಯಾವ ಮಂತ್ರ, ಯಾವ ಶಬ್ದ, ಯಾವ ಮಾಂತ್ರಿಕ ಬಿಡಿಸಬಹುದು; ಬೈಗುಳಕ್ಕೂ ಕಣ್ಣ ಹನಿಯ ಭಾವ ಸ್ಪರ್ಶದ ಆ ಕರುಳ ಕರುಣೆಯ ಒಗಟನು...
#ಆಯಿಯೆಂಬೋ_ಹುಚ್ಚು_ಹುಡುಗಿ...
^^^^

.....ನಿಲ್ಲಿಸುವುದು ಎಲ್ಲಿಗೆ...??
.....ಹೊರಟದ್ದೆಲ್ಲಿಗೆ...??  ಯಾಕಂತ...!??
.....ನೆನಪು ಉಳಿದೇ ಹೋಗುತ್ತದೆ..‌‌... ಮತ್ತು ನೆನಪಷ್ಟೇ ಉಳಿಯುತ್ತದೆ.....
.....ಸವೆಸಿದ ಹಾದೀಲಿಷ್ಟು ಕಲ್ಲು ಮುಳ್ಳಿಲ್ಲದಿದ್ದರೆ, ಮೌನ ಚುಚ್ಚಿರದಿದ್ದರೆ ಗೆಲುವಿನ ವೇದಿಕೆಯಲ್ಲಿ ಮಾತು ಹುಟ್ಟುವುದು ಹೇಗೆ...
.....ಅವೆಲ್ಲದರಾಚೆಯೂ ಚಂದದೊಂದು ಬೆಳಗಿದೆ; ಬೇಲಿಸಾಲಿನ ಹೂವಿಗೂ ವಿಶೇಷ ಅಂದ ಗಂಧವಿದೆ... ಕಣ್ಣು ಮೀಯಲು - ಉಸಿರ ತುಂಬಿಕೊಳ್ಳಲು...
#ಮತ್ತೊಂದು_ದಿನ...
^^^^

ನೇಹವೇ -
ನಿನ್ನ ಕೊಟ್ಟ ಬದುಕಿಗೆ ಕೃತಜ್ಞ - ನೀ ಬಯಸದೇ ನಿನಗೆ ಕೊಟ್ಟ ಎಲ್ಲದಕ್ಕೂ ಕ್ಷಮೆಯಿರಲಿ...
ಸಾವು ಸಾರ್ವತ್ರಿಕ ಸತ್ಯವೆಂಬುದು ಸಾಮಾನ್ಯ ತಿಳುವಳಿಕೆ; ಆದರೆ ನನಗಿನ್ನೂ ದೂರವಿದೆ ಎಂಬುದು ಬದುಕಿನ ಪ್ರೇರಣೆ...
ಬದಲಾವಣೆ ಎಲ್ಲರ, ಎಲ್ಲದರ ಸಹಜ ನಿಯಮ ಎಂಬ ಸ್ಪಷ್ಟ ಅರಿವಿದೆ; ಆದರೂ ಎದುರುಗೊಳ್ಳುವಾಗ ಯಾಕಿಂತ ಯಾತನೆ...?
ವಿದಾಯದ ಘಳಿಗೆಯಲೊಮ್ಮೆ ತಿರುಗಿ ನೋಡುವಷ್ಟೂ ಸಣ್ಣ ತಳಮಳವೂ ಕರುಳ ಸೋಕದಿದ್ದರೆ ಅದು ಬದಲಾವಣೆಯ ಹಚ್ಚೆ ಗುರುತಾ...? ಭಾವದ ಸಾವಿನ ನೆರಳಲ್ಲವಾ...??
ಪ್ರತಿ ತಿರುವಲ್ಲೂ ನನ್ನದೇ ಹೆಸರಿನ ಘೋರಿಯೊಂದು ಎದ್ದು ನಿಲ್ಲುತ್ತದೆ - ಹೊಸ ಹೊಸ ಸಮರ್ಥನೆ, ಸಮಜಾಯಿಷಿ, ಸಬೂಬುಗಳ ಸಹಯೋಗದಲ್ಲಿ...
ಬದುಕನ್ನೇ ಕಳೆದುಕೊಂಡ ದಿಗಿಲಿಗಿಂತ ಆಪ್ತ ಜೀವದ ಪುಟ್ಟ ಪುಟ್ಟ ಕಕ್ಕುಲಾತಿಯ ಭಾವ ವಿನಿಮಯಗಳಿಂದ ದೂರಾದ ನೋವು ಹೆಚ್ಚು ಪ್ರಖರ ಎಂಬುದು ಈ ಹಾದೀಲಿ ಮತ್ತೆ ಮತ್ತೆ ಸಾಬೀತಾದ ಅನುಭವ...
ಬೆನ್ನಿನ ಚಿತ್ರವಷ್ಟೇ ಕಣ್ಣಿನ ದುಡಿಮೆಯಾದ ಕುರೂಪಿ ಹಾದಿ - ಖಾಲಿತನದ ಖಜಾನೆ...
#ಮತ್ತೆ_ಮತ್ತದೇ_ಮರಣ...
^^^^

ಕೇಳಿಲ್ಲಿ -
ನಿನ್ನ ನೆರಳಿದ್ದ ನಿನ್ನೆಗಳ ಎಳೆತಂದು ಎದೆಯ ಕಣ್ಣ ಸೀಳೋ ಮಳೆಯೆದುರು ಕಬೋಜಿಯಂತೆ ಪ್ರಕ್ಷುಬ್ಧನಾಗಿ ನಿಂತ ಸಂಜೆಗಳಲೆಲ್ಲ - "ಅಯ್ಯೋ ಶಿವನೇ, ಈ ರಣ ಮಳೆಗಾಲದಲ್ಲಿ ಸತ್ರೆ ಸುಡೋಕೆ ಸೌದೆ ಹೊಂದ್ಸೋದೂ ಕಷ್ಟ ಕಣೋ ನನ್ನಪ್ಪಾ; ಮುಂಗಾರೊಂದು ಕಳೆದರೆ ಸಾಕು" ಅಂತಿದ್ದ ಹಣ್ಣಣ್ಣು ಒಂಟೊಂಟಿ ಅಜ್ಜಿಯರ ಜೀವನಪ್ರೀತಿಯ ನೆನಪೊಂದು ವಿಚಿತ್ರ ಬೆರಗು...
#ಪಿಚಿಪಿಚಿ_ಅಂಗಳ...
^^^^
ಅನಂತ 💕 ಗೋದಾವರಿ 
ಕಳೆದುಕೊಂಡ ನೋವು - ಹಚ್ಚಿಟ್ಟು ಹೋದ ದೀಪ...
ನಿದ್ದೆ ಮಂಪಲ್ಲಿ ನಾನೇ ಬಿಟ್ಟದ್ದಾ ಅಥವಾ ಯಾವ ಮಾಯದಲ್ಲೋ ಬೆರಳ ಬಿಡಿಸಿಕೊಂಡು ಅವರೇ ಎದ್ದು ಹೋದದ್ದಾ - ನಡೆಸಿ ನುಡಿಸಿ ಕಾಯ್ದ, ಕನಸಿ ಹರಸಿ ಕಾಯ್ವ ಹಿರಿಯರೆಲ್ಲ ಉಳಿದದ್ದು ಇರುಳ ನೀಲಿ ಬಯಲ ನಕ್ಷತ್ರಗಳಂತೆ...
ಈಗಲೂ ಎದೆ ಕೂಗಿಗೆ ನಡಿಗೆ ನಡುಗಿದರೆ ಅವರ ಬೆನ್ಗಾವಲ ನೆರಳ ನೆನಪೊಂದು ಊರುಗೋಲು...
ನೆನಪು ಕಾಡಿದಷ್ಟೂ ಜೀವ ಜೀವಂತ...
ಈ ಬದುಕ 'ಅ ಆ ಇ ಈ'ಗಳ ಕೈ ಹಿಡಿದು ತಿದ್ದಿಸಿದ ಜೀವತಂತುಗಳು - ಅಳಿವಿಲ್ಲದ ಆತ್ಮದುಲಿಗಳು...
#ಅವಳು_ಗೋದಾವರಿ - #ಅವನು_ಅನಂತ...😍😘 

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

ಗೊಂಚಲು - ಎರಡ್ನೂರಾ ಎಪ್ಪತ್ತು ಮತ್ತೆಂಟು.....

ಕಥೆಯಾಗದ ಪಾತ್ರ..... 

ಜವಾಬ್ದಾರಿಗಳ ಹೊರೆಯಿಲ್ಲ, ಭಾವಗಳ ನೆರೆ ಇಲ್ಲ, ನಡಿಗೆಗೊಂದು ಉದ್ದೇಶವಿಲ್ಲ, ಸ್ವಂತ ಕೃತಿ ಸ್ಮೃತಿಗಳಿಗೆ ಅರ್ಥ ಹುಡುಕಲಿಲ್ಲ - ನಡೆದದ್ದೇ ಹಾದಿ, ನುಡಿದದ್ದು ಮಂತ್ರ ಅಂತಂದು ಸ್ವಾರ್ಥಕ್ಕೆ ಸ್ವಂತಿಕೆಯ ಬಣ್ಣದ ಹೆಸರಿಟ್ಟು ಬದುಕಿದ್ದು ಕಾಲಕೂ; ಆದ್ರೂ ಆಖೈರು ಉಸಿರು ಯಾಕಿಷ್ಟು ಭಾರ ಭಾರ...
ಹೆಣ ಭಾರ ಅಂದರೆ ಇದೇನಾ...
ಹೆಣದ ಭಾರ ಬೂದಿಗಿಲ್ಲ - ಸುಟ್ಟು ಹೋಗಬೇಕು - ಸುಟ್ಟಲ್ಲದೆ ಸುಖವಿಲ್ಲ - ಆದರೆ ಸಲೀಸು ಸಾಯಲಾದೀತಾ...?
ಜವ ಕರೆಯದೇ ಯಾರು ಸಾಯುವುದು...??
#ಕಥೆಯಾಗದ_ಒಂದು_ಪಾತ್ರ...

ಭಾವ ಸತ್ತ ಮೇಲೂ ಬಾಯಿ ಹೊಲಿದುಕೊಳ್ಳದೇ ಬಡಬಡಿಸಿ ಬಂಧದ ಚಂದ ಕೆಡಿಸಿಕೊಳ್ಳೋ ಮನಸೇ ನೀ ಬಯಲ ದಾರಿಯಲ್ಲಿ ಮಾತು ಬಿದ್ದೋಗಿ ಬೆತ್ತಲೆ ಸಾಯಬೇಕು...
#ಕಥೆಯಾಗದ_ಒಂದು_ಪಾತ್ರ...

ಮುಸುಕಿದ ಕತ್ತಲ ಕರಿ ಪತ್ತಲದಡಿಯಲಿ ಅತ್ತದ್ದಕ್ಕೂ, ಅಳಿಸಿದ್ದಕ್ಕೂ, ನಗಿಸಿ ನಕ್ಕದ್ದಕ್ಕೂ, ಹಲಹಲಾ ಎಂದು ಸ್ವಚ್ಛಂದ ಕುಣಿವ ಎಲ್ಲ ಭಾವಕ್ಕೂ ಒಂದೇ ಗಾಢತೆ; ಕತ್ತಲೆಂದರೆ ಎಂಥ ಶುದ್ಧ ಬಣ್ಣ - ಅನಾಯಾಸದಿ ತಬ್ಬಿದ ಸಾವಿನಂತೆ...
#ಕಥೆಯಾಗದ_ಒಂದು_ಪಾತ್ರ...

....ಹಾಗೆಂದೇ ಮನಸಿನ ಮನೆಯ ಸೂತಕ ಕಳೆಯುವುದೇ ಇಲ್ಲ - ಅಂಗಳದಂಚಲ್ಲಿ ದಿನಕ್ಕಿಷ್ಟು ಕನಸುಗಳು ಅಡ್ಡಡ್ಡ ಮಲಗುತ್ತವೆ...
ಕಲ್ಪನೆಯ ಕಣ್ಣಿಗೂ ವಿಷದ ಹೂ ಬಿದ್ದಂತಿದೆ - ಇಲ್ಲೀಗ 'ನನಗೂ ಸೇರದ ನಾನು...'
ಬೊಜ್ಜದ ಮನೆಗೆ ಕರೆಯದೆಯೂ ಬಂದು ಸರತಿ ಊಟಕ್ಕೆ ಕೂರೋ ಮುದಿ ನೆನಪುಗಳ ಸಂಭಾಳಿಸಿಕೊಂಡು ಒಂಚೂರೂ ಕಸರುಳಿಯದಂತೆ ಬದುಕಿನೊಂದಿಗೆ ಕರಗುವುದು ಹೇಗೆಂದು ತಿಳಿಯದೆಯೇ ತಳಮಳಿಸುವ ಪಾಳುಬಿದ್ದ ಪಾಪದ ಮನಸಿನ ಉಸಿರೂ ಭಾರ - ಹಾಳಾದ್ದು ಈ ಬಡಪಾಯಿ ಭಾವಗಳ ಗೂಡಿನ ಸೂತಕ ಕಳೆಯುವುದೇ ಇಲ್ಲ...
#ಕಥೆಯಾಗದ_ಒಂದು_ಪಾತ್ರ...

ಬಿರಿದ ಎದೆಯ ಬಿರುಕಿನೇ ಕುಂಡವಾಗಿಸಿ - ತುಂಡು ಕನಸ ಕಿಡಿ ನೆಟ್ಟು - ಮರಳಿ ಬರಬೇಕಿದೆ - ಮತ್ತೆ ನಗಬೇಕಿದೆ - ನನ್ನೊಳು ನಾ ಹುಟ್ಟಿ...
ಬೀಜದ ಓಟೆ ಒಡೆದಾಗಲೇ ಅಲ್ಲವಾ ಚಿಗುರಿಗೆ ಹಾದಿ...
#ಕಥೆಯಾಗದ_ಒಂದು_ಪಾತ್ರ...

ಅರ್ರೇ!!! ನಾನಿನ್ನೂ ನೆನಪಲ್ಲಿದೀನಾ...??
ಹ್ಯಾಂಗ್ ಮರೀಲೀ - ಭಾವ ಸತ್ತದ್ದು ನಂದಲ್ವಲ್ಲಾ...
ಕಟುವಾಗಬೇಡ, ನನ್ನಲ್ಲೂ ಸತ್ತದ್ದಲ್ಲ - 'ನಿನ್ನಂತೆ' ಹರಿಯಲಾರದೇ ಹೋದದ್ದಷ್ಟೇ...
ಇದ್ದು 'ನಮ್ಮಂತೆ' ಬೆರೆಯಬಹುದಿತ್ತೇನೋ - ದುಡುಕಿದೆವಾ...??
ಸಿಹಿಯಾಗಿ ಹರಿದು ಸೇರಿದ್ದೂ, ಉಪ್ಪಾಗಿ ತೊನೆದು ಹೀರಿದ್ದೂ ಸೇರಿ ಮಳೆಯಾಗಿ ಮತ್ತೆ ಸಿಹಿಯೇ ಅಲ್ಲವಾ - ಕಾಯಬೇಕಿತ್ತಾ...??
ಎಷ್ಟು ಕಾಯುವುದು...? ಎಲ್ಲಿಯವರೆಗೆ...?? ಇಷ್ಟಕ್ಕೂ ಇಲ್ಲಿ ಆವಿಯಾದ ಹನಿ ಇಲ್ಲೇ ಮಳೆಯಾಗಿ ಸುರಿಯುತ್ತೆ ಅನ್ನೋ ಭರವಸೆ ಏನೂ...???
ಮಾತು, ಮೌನದ ಮಥನದಲ್ಲಿ ಬೆಂಕಿಯೇ ಹುಟ್ಟಬೇಕಾ - ಬೆಣ್ಣೆಯೂ ತೇಲಬಹುದಿತ್ತೇನೋ...
ಒಡೆದ ಕೊಳಲಲ್ಲಿ ಗಾಳಿ ಅಪಸ್ವರವೇ ಅಲ್ಲವಾ...?
ಕೃಷ್ಣ ಕಣ್ಣು ಬಿಚ್ಚಿದ - ರಾಧೆ ಚಿತ್ರವಾದಳು, ರಾಧೆ ನಿಡುಸುಯ್ದಲ್ಲಿ ಕೊಳಲು ಉಸಿರ ಮರೆಯಿತು; ದೂರವೇ ಕಾಯ್ದದ್ದಾss ಬಂಧವ...!?
ಉಪಸಂಹಾರವನ್ನು ಹೇಗೆ ಬರೆದರೆ ಚೆಂದವಿತ್ತು...? ಯಾರು ಬರೆಯಬೇಕಿತ್ತು...?? ಹೌದು, ಇಷ್ಟಾಗಿಯೂ ಉಪಸಂಹಾರ ಬರೆಯುವ ಅವಕಾಶ ಇದ್ಯಾ ಬದುಕಿಗೆ...???
ಪ್ರಶ್ನೆ ಪ್ರಶ್ನೆ ಬರೀ ಪ್ರಶ್ನೆಗಳೇ - ಉತ್ತರದಾಯಿತ್ವವನ್ನೂ ಪ್ರಶ್ನಿಸುವ ಪ್ರಶ್ನೆಗಳು...
ಕೊನೆಗೂ ಎಲ್ಲಿಗೂ ಮುಗಿಯದ ಸಂಭಾಷಣೆ - ಅದು ಆಳಕಿಳಿದಷ್ಟೂ ಸಂವೇದನೆ; ಅದಕೇ ಮುಗಿಯದಿರಲಿ ನನ್ನೊಳಗಣ ಸಂಭಾಷಣೆ - ಅದಷ್ಟೇ ಬದುಕಿನ ಆವೇದನೆ...
#ಕಥೆಯಾಗದ_ಒಂದು_ಪಾತ್ರ...

ನಾನಿನ್ನೂ ಹುಟ್ಟಿಯೇ ಇರಲಿಲ್ಲ, ಆಗಲೇ ಎದೆ ಗೂಡಿನ ಕನಸ ಕಣ್ಣೊಂದು ಊದಿಕೊಂಡು ಊನವಾಗಿತ್ತು; ಮೊದಲಾಗಿ ತಬ್ಬಿದ ಕೊನೆಯ ಸೋಲು - ಉಳಿದೆಲ್ಲ ಸರಣಿ ಅದರ ಬಣ್ಣ ಬಣ್ಣದ ಕವಲುಗಳಷ್ಟೇ...‌‌
ಅಥವಾsss
ನಾ ಹುಟ್ಟಿದ್ದು ನನ್ನ ಮೊದಲ ವೀರೋಚಿತ ಗೆಲುವು - ಬಹುಶಃ ಹೇಳಿಕೊಳ್ಳಬಹುದಾದ ಕೊನೆಯದೂ ಕೂಡಾ; ಉಳಿದಂತೆ ಅಲ್ಲಿಷ್ಟು ಇಲ್ಲಿಷ್ಟು ಕತ್ತಲ ಮಿಂದ ನೆರಳಿನಂಥವು ಸಿಕ್ಕಾವು...
#ನಾನೆಂಬ_ಕಥೆಯೊಂದು_ಹೀಗಿರಬಹುದು...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

Wednesday, October 24, 2018

ಗೊಂಚಲು - ಎರಡ್ನೂರಾ ಎಪ್ಪತ್ತು ಮತ್ತೇಳು.....

ಅವಳ್ಯಾರೋ ಕಪ್ಪು ಹುಡುಗಿ.....
(ನನ್ನೊಂದಿಗೇ ನಡೆದು ಹೋಗುವವಳು...) 

ಈ ಇಂಥ ವಾಚಾಳಿಯ ಎದೆಗೂ ಅಂಟಿದ ಒಂದಾಣೆ ಒದ್ದೆ ಮೌನ ಅವಳು...
ಮಳೆ ಹನಿಯ ಬೆನ್ನಿಗೆ ಅವಳ ನೆನಪ ಚಿತ್ರ ಅಂಟಿದೆ...

ಅವಳ ಬೆತ್ತಲಿಗೆ ಕತ್ತಲು ಸುಡುವಾಗ ಕಿಟಕಿಗೆ ಕಣ್ಣಿಟ್ಟ ಚಂದ್ರನೂ ನನ್ನಂತೆಯೇ ಬೆವರುತ್ತಾನೆ - ಇರುಳ ಸವತಿಯಂಥಾ ಕಪ್ಪು ವಿಗ್ರಹದೆಡೆಗೆ ಬೆಳದಿಂಗಳಿಗೆ ಮತ್ಸರ...
ಬೆವರ ಝರಿಯಲ್ಲಿ ಜಗದ ಮಡಿಯ ತೊಳೆವ ನನ್ನ ಪಾಲುದಾರ ಪಾಪಿ ಅವಳು...

ನಾ ಖುದ್ದು ಕೆರ್ಕಂಡ್ ಕೆರ್ಕಂಡ್ ಮಾಯದಂಗೆ ಕಾದಿಟ್ಕೊಂಡ ಎದೆಯ ಹಸಿ ಹಸಿ ಜೀವನ್ಮುಖೀ ಗಾಯ ಅವಳು...

ನಡು ಹಗಲಿಗೊಂದು ಬೆತ್ತಲೆ ಬಾಗಿನ - ಕತ್ತಲ ತಿರುವುಗಳಿಗೆಲ್ಲ ಸೂರ್ಯ ಸ್ನಾನ - ರತಿ ರಾಗ ರಂಜನೆಯ ಮಧುರ ಪಾಪಕ್ಕಲ್ಲಿ ಮನ್ಮಥನ ಹೊಣೆ, ಹರೆಯದ ಋಣ...
ನನ್ನೆಲ್ಲಾ ಸುಖೀ ಸಾಂಗತ್ಯದ ಹಸಿವು ಅವಳೇ...

ಖಾಲಿ ಖಾಲಿ ಎದೆಗೆ ಹೆಗಲ ಸನ್ನಿಧಿಯ ಸೌಗಂಧವಿಷ್ಟು ತುಂಬಲಿ - ಸಂಜೆಗಳು ಸಾಯದಂತ ಕನಸೊಂದಾದರೂ ಕಣ್ಣಾಳದಿ ನಗಲಿ ಎಂಬೆಲ್ಲ ನನ್ನ ಗೆಲುವಿನ ಸ್ವಚ್ಛಂದ ಸ್ವಾರ್ಥ ಅವಳು...

ಇರುಳ ಮಂಚಕೆ ಬೆಳದಿಂಗಳ ಮಿಂದು ಬಂದ ಬೆತ್ತಲೆ ಕರಡಿ ಅವಳು - ಕಣ್ಣ ಚಮೆಯಿಂದ ತುಟಿ ತಿರುವನು ತೀಡಿ ಚುಮುಚುಮು ಮುಂಜಾವಿನ ಸುಖದ ಮಂಪರಿಗೆ ಮತ್ತೆ ಮೆತ್ತೆಯ ನಶೆ ಏರಿಸಿ ಬಿಸಿ ಉಸಿರ ಸುಪ್ರಭಾತವ ನುಡಿವವಳು...
ಅವಳ ಉಸಿರಿಗೆ ನಾನು ಕೊಳಲು - ನನ್ನ ಬೆರಳಲಿ ಅವಳು ವೀಣೆ - ಮುಂಬೆಳಗ ಮುಂಗುರುಳಿಗೆ ಪ್ರಣಯದ ನುಡಿಸಾಣಿಕೆ...
ನನ್ನೆಲ್ಲ ಹುಚ್ಚು ತೀವ್ರತೆಯ ಹಿಂದುಮುಂದಿನ ನೆರಳವಳು...

ಅಮಾವಾಸ್ಯೆ - ಕರಡಿ ಕಾನು - ತಾರೆಗಳ ಮುಡಿದ ಬಾನ ಬೆಳಕಲ್ಲಿ ಹಾದಿ ತಪ್ಪಿದವನ ಮಾತಿನ ಕಂದರಕೆ ಮೌನದ ಕಂದೀಲು ಹಿಡಿದು ಬಂದ ಕನಸುಕಂಗಳ ನಶೆ ಅವಳು - ಪಿಶಾಚ ಪ್ರೇಮದ ಸಾರಥಿ...

ಸಾವಿನ ತೊಟ್ಟಿಲಲಿ ಅಳುವ ಕೂಸಿಗೆ ಬದುಕಿನ ಚಿತ್ರ ಭಿತ್ತಿಯ ನೂರಾರು ನಗೆಯ ಬಣ್ಣಗಳ ಕಥೆ ಕಟ್ಟಿ ಹಾಡುವ ಅಮ್ಮನ ಲಾಲಿ ಅವಳು...

ನೆನಪ ಸೊಗಡೆಂದರೂ, ಕನಸ ಬಸಿರೆಂದರೂ, ಕಣ್ಣ ನೀರೆಂದರೂ, ತೋಳ ಕಸುವೆಂದರೂ, ಹಾದಿಯ ಸೊಬಗಿಗೆ ಸುಮ್ಮನೇ ಕಟ್ಟಿಕೊಂಡ ಕಲ್ಪನೆಯ ಹಾಡೆಂದರೂ, ಉಸಿರ ಬಿಸಿಯಾಗಿ, ಹೆಜ್ಜೆ ಬೆಳಕಾಗಿ, ಏನೂ ಅಲ್ಲದೇ ಎಲ್ಲವೂ ಆಗಿ ಹೆಸರೇ ಇಲ್ಲದ ಅವಳೇ ಅವಳು - ಎಷ್ಟೆಷ್ಟೋ ಬರೆದ ಮೇಲೂ ಮತ್ತಷ್ಟೇ ಉಳಿದೇ ಹೋಗುವ ಕವಿತೆ...

ಅವಳ್ಯಾರೋ ಅವಳು ಕಪ್ಪು ಹುಡುಗಿ ಎಂಬುದು ಪ್ರಶ್ನೆ - ಅವಳ್ಯಾರೋ ಕಪ್ಪು ಹುಡುಗಿ ಎಂಬುದೇ ಉತ್ತರ...

ಅವಳೆಂದರೆ ಬದುಕು - ಅವಳೆಂದರೆ ಸಾವು... 

Thursday, October 4, 2018

ಗೊಂಚಲು - ಎರಡ್ನೂರಾ ಎಪ್ಪತ್ತು ಮತ್ತಾರು.....

ಮಳೆಬಿಲ್ಲ ಬೆಮರು..... 

ಮಳೆಬಿಲ್ಲಿನಂಥವಳೇ - 
ಮಳೆಯೊಂದಿಗಿನ ನಿನ್ನ ನೆನಪನ್ನು ಬೇರ್ಪಡಿಸಲಾಗದೇ ಸದಾ ಸೋಲುತ್ತೇನೆ...
ತೋಯ್ದು ತೊಪ್ಪೆಯಾಗಿ ನನ್ನನೂ ತೋಯಿಸಿ ಮನೆ ಸೇರಿ ಹೆಗಲ ಚೀಲದಿಂದ ಕೊಡೆ ತೆಗೆದಿಟ್ಟು ಕಣ್ಮಿಟುಕಿಸಿ ಗೊಳ್ಳನೆ ನಗುತ್ತಿದ್ದ ನಿನ್ನವು ಮಾತ್ರ ಅನ್ನಿಸ್ತಿದ್ದ ಮುದ್ದು ಸಂಜೆಗಳು...
ಇರುಚಲನು ಮಿಂದ ಕಿಟಕಿ ಸರಳುಗಳ ತುಕ್ಕಿನ ಹಸಿ ಘಮಲಿಗೆ ಉಸಿರು ಬೀಗುವಾಗ ಸದ್ದಿಲ್ಲದೆ ಕಳ್ಳ ಬೆಕ್ಕಿನಂತೆ ಕರುಳ ಸೇರಿ ತುಟಿ ತಿರುವಲ್ಲಿ ಅರಳುತಿದ್ದ ಆಸೆ ಉಂಗುರ...
ಬೀದಿಗಿಳಿದು ತೋಯಲಾಗದ ಮಳೆಯ ಮಧ್ಯಾಹ್ನದ ಉತ್ತರಾರ್ಧದಲಿ ಒಟ್ಟೊಟ್ಟಿಗಿನ ಬಿಸಿನೀರ ಅಭ್ಯಂಜನಕೆಳೆದು ಕನ್ನಡಿಗೆ ನಾಚಿಕೆಯ ಬಿಂಬವ ಅಂಟಿಸಿದ್ದು...
ಒದ್ದೆ ಜಡೆಯ ಕೊಡವುವಾಗ ಇದ್ದಲ್ಲೇ ಘಲ್ಲೆಂದು ಲಘುವಾಗಿ ಕಂಪಿಸುವ ಆ ಪುಟ್ಟ ಎದೆ ಗೊಂಚಲು ನನ್ನಲ್ಲಿ ಎಬ್ಬಿಸುತಿದ್ದ ಅಬ್ಬರದ ಪ್ರಣಯಾತುರ ಅಲೆಗಳು...
ಮಿಂದೆದ್ದು ಬಂದವನ ತಾಜಾತನದ ಕಮ್ಮನೆ ಕಂಪಿಗೆ ಕಣ್ಣರಳಿಸಿ ಒರಟು ನಡು ತಬ್ಬಿ ತೆರೆದೆದೆಗೆ ಮುದ್ದಾಗಿ ಉಜ್ಜಿ ಗಂಡು ಬೆತ್ತಲೆಗೂ ರಂಗು ತುಂಬುತಿದ್ದ ಮೂಗುತಿಯ ಗೀರುಗಳೆಲ್ಲ ರೋಮಗಳ ಮರೆಯಲ್ಲಿನ್ನೂ ಬಿಮ್ಮಗೆ ಕೂತೇ ಇವೆ ಕಣೇ...
ಮತ್ತೆ ಹಸಿಯಾಗಿ ಕಾಡುವ ಬಾನು ಮುಡಿ ಬಿಚ್ಚಿ ಮೋಡ ಕರಗಿದ ಆ ತಿಳಿ ಬೆಳಕ ಹಾಸಿನಲಿ ಬೆನ್ನ ಬಯಲಲ್ಲಿ ನೀ ನೆಟ್ಟ ಉಗುರ ಹಳೇ ಗಾಯಗಳು...
ಮೀಯೋ ಕೋಣೆಯ ದರ್ಪಣದಂಚಿಗೆ ಅಂಟಿಸಿ ನೀ ಮರೆತ ಬಿಂದಿಗಳ ಚಿತ್ತಾರ ಇನ್ನೂ ಹಾಗ್ಹಾಗೇ ಇದೆ ಮಾರಾಯ್ತೀ - ಈ ನೆನಹುಗಳಂತೆಯೇ...
ಒಟ್ಟಾಗಿ ದಾಳಿಯಿಡುವ ಆ ಬಿಡಿ ಬಿಡಿ ಚಿತ್ರಗಳು ಈ ಎದೆಯ ಇಡಿ ಇಡಿಯಾಗಿ ಸುಡುತ್ತವೆ...
ನನ್ನೊಲವ ಕಪ್ಪು ಹುಡುಗೀ - ನೀನಿಲ್ಲದ ಮಳೆಗಿಲ್ಲಿ ಕನಸುಗಳಿಲ್ಲ; ನೆನಪಿನ ಉರಿಗಿಂದು ಸಾವಿನ ಬಣ್ಣ...
🔃🔃🔃

ವಸುಧೆ ಕೊರಳಿಗೆ ಮಳೆಯ ಮುತ್ತಿನ ಮಣಿ ಹಾರ - ದಿನಮಣಿಗೆ ಮೋಡದ ಹೊದಿಕೆ - ಕಡು ಸಂಜೆಗೂ ಮುಂಚಿನ ನಿದ್ದೆಗಣ್ಣ ಕೂಸಿನಂಥ ತಿಳಿಗತ್ತಲು; ಈ ತಂಪಿಗೆ, ಏಕಾಂತದ ಕಂಪಿಗೆ, ಇಂಪಾಗಿ ಸೊಂಪಾಗಿ ನೀ ಹಾಡಾಗಿ ಬಂದರೆ - ಎದೆಗೂಡ ತುಂಬೆಲ್ಲಾ ಒಲವಾ ಚೆಲುವ ಪಾರಿಜಾತದ ತಳಿರು, ಕಾಲ್ಗೆಜ್ಜೆ ಘಳಿರು...
ಇಬ್ಬನಿಯು ನೆಲ ತಬ್ಬಿದಂತೆ ಕೆನ್ನೆ ಗುಳಿಯ ಸುತ್ತ ತುಟಿಯ ತೇವದ ಚುಕ್ಕಿ ರಂಗೋಲಿ - ಕಟಿಯ ಬಳುಕಿನಂಚಲಿ ಹಸಿ ಬಿಸಿ ಸುಳಿ ಮಿಂಚು... 
ತುಸು ಸಾವರಿಸಿ ಸಹಕರಿಸು - ಆ ಬೆತ್ತಲ ಬೆಳದಿಂಗಳ ಬೆಂಕಿ ಚಿತ್ತಾರದಲಿ ಈ ಇರುಳ ಬಾಗಿಲ ಸಿಂಗರಿಸು... 
ಮರಳಿ ಹೊರಳಿ ನಾಭಿ ಸ್ಫೋಟಿಸಲಿ... 
ಹೊಸ ಹೊಸದಾಗಿ ಹಸಿವು ಕೆರಳಿ ಮತ್ತೆ ಮತ್ತಲ್ಲೇ ಮತ್ತಿನ ಮುದ್ದು ಹುಟ್ಟಲಿ...
#ಮಳೆ_ಸಂಜೆಯ_ಮತ್ತಿನಾಸೆ... 
🔃🔃🔃

ಬೆತ್ತಲೆ ಸೀಮೆಯ ಶ್ರೀಮಂತ ಅಂದದ ಗಣಿಯೆರಡು ಮಂದ ಬೆಳಕನ್ನು ಮೀಯುವಲ್ಲಿ, ನಾಚಿಕೆಯ ಬಾಗಿಲ ವಾಡೆಯಿಂದ ಇಣುಕಿದ ಅರೆಬರೆ ದಿಟ್ಟಿ ಉಸಿರ ಕೈ ಹಿಡಿದು ಹಾದಿ ತಪ್ಪಿ ಏರು ಜಾರಿನ ಊರೆಲ್ಲ ಅಲೆದಲೆದು, ಬೆನ್ನ ಹಾಳಿಯಲಿ ಬೆವರ ಟಿಸಿಲೊಡೆದು ಮಧುರ ಪಾಪದ ಕೇಳಿಯ ಒಪ್ಪಂದಕೆ ನಡು ಗದ್ದೆ ಕೊನೆಯ ಋಜು ಒತ್ತಿತು...
#ಪ್ರೇಮೋತ್ಖನನ...
🔃🔃🔃

ಸ್ನಾನದ ಮನೆ ಮೂಲೇಲಿ ಮೊಟ್ಟೆ ಇಟ್ಟು ಕಾವಿಗೆ ಕೂತ ಪಾರಿವಾಳದಂತೋಳು ನೀನು - ಮನ್ಸಿಗೆ ತುಸುವೂ ವಿರಾಮ ಕೊಡದೇ ಎಲ್ಲೆಲ್ಲೂ ಸತಾಯಿಸ್ತೀಯಾ... 
ಛೀsss ನಾಚ್ಕೆ ಆಗಲ್ವೇನೆ - ಗಂಡೈಕ್ಳು ಮೀಯೋ ಹೊತ್ತಲ್ಲೂ ಕಣ್ಣು ಕೂಡ ಮಿಟುಕಿಸದೆ ಕೂರ್ತೀಯಲ್ಲ... 😜
#ಒಂದು ಪಾರಿವಾಳದ ಬಾಣಂತನ...
🔃🔃🔃

ಬೆಚ್ಚನೆ ರಮಣೀಯತೆಯ ಸಾಕಿಕೊಂಡ ತನ್ನ ಮೆತ್ತನ್ನ ಎದೆ ದಿಬ್ಬಗಳ ನಟ್ಟ ನಡುವಣ ಕಿರು ಓಣಿಯಲ್ಲಿ ನನ್ನ ಬಿಸಿ ಉಸಿರಿಗೆ ಆಸೆಯ ಘಮ ಉಣಿಸಿ ಕುಚ್ಚು ತಟ್ಟುತಾಳೆ - ಇರುಳೊಂದು ಹಿಂಗಿಂಗೆ ಶುರುವಾಗಿ ಮತ್ತೇರಿ ಬೆವರಾಗುತ್ತದೆ...
ಅವಳು ಹೇಳೋ ಶುಭರಾತ್ರಿ...😍
🔃🔃🔃

ನನ್ನುಸಿರು ನಿನ್ನುಸಿರೊಂದಿಗೆ ಹರೆಯದ ಹಸಿವಿನ ಪಿಸುಮಾತನಾಡುವಾಗ ತುಂಟ ತುಟಿಗಳು ಮಕ್ಕಳಂದದಿ ಕಚ್ಚಾಡುತ್ತವೆ -  ನಿನ್ನೆದೆ ಮೆತ್ತೆಯ ಅಲಂಕರಿಸಿದ ಮೊದಲ ಬೆವರ ಹನಿಗೆ ಎನ್ನ ಕಿರು ಬೆರಳು ಸುಡುವಾಗ ಕಿಬ್ಬೊಟ್ಟೆ ಇಳಿಜಾರಿನಲ್ಲಿ ಪತಂಗ ನಾಟ್ಯೋತ್ಸವ - ಸುಖ ರಸ ರಾಗಕ್ಕೆ ಇಕ್ಕಳಗಾಲಿನ ಶಯನಬಂಧದಿ ನೇಗಿಲ ಕಸುವು ನೆಲವ ಸೀಳಿ, ಒದ್ದೆ ನೆಲ ನೇಗಿಲ ನುಂಗಿ ಭುವಿ ಗರ್ಭದಿ ಬೀಜಾಂಕುರದ ಕನಸು...
#ಇರುಳ_ಬೆವರು_ಬೆತ್ತಲೆ_ಬೆಳಕು...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

ಗೊಂಚಲು - ಎರಡ್ನೂರಾ ಎಪ್ಪತ್ತೈದು.....

ಅವಳ(ಳೇ)_ಕಾವ್ಯ.....  

ಒಂದು ಸ್ವಚ್ಛಂದ, ಸಮೃದ್ಧ ಸುಖ ಸಾಂಗತ್ಯವ ಸುರಿದು ನೀ ಎದ್ದು ಹೋದ ಮೂರುವರೆ ನೂರು ಘಳಿಗೆಯ ನಂತರವೂ, ಇನ್ನೂ, ಈಗಲೂ ನಿನ್ನ ಕಂಕುಳ ತಿರುವಿನ ಹಸಿ ಬಿಸಿ ಘಮದ ನೆರಳು ಮಂಚದ ಮನೆಯ ಮೂಲೆ ಮೂಲೆಯನೂ ಏಕಸ್ವಾಮ್ಯದಿ ಆಳುತಿದೆ...
ಮತ್ತೆ ನಾಭಿ ಕುಂಡ ಕೆರಳುತಿದೆ  - ನಿನ್ನ ಮೈಸಿರಿಯ ಮುಡಿಬಿಚ್ಚಿ, ತೋಳ ಸಿಡಿಯ ಉರಿಯಲಿ ಮರಮರಳಿ ಮರುಳು ಅಲೆಯಂತೆ ಹೊರಹೊರಳಿ ಮತ್ತೆ ಮತ್ತೆ ಉರಿದುರಿದು ಹೋಗಬೇಕು...  
#ಇರುಳ_ಹೊಕ್ಕುಳಿಗೆ_ಇಕ್ಕಳ_ಕಾಲಿನ_ಕಂಬಳದ್ದೇ_ಧ್ಯಾನ...
🔀🔀🔀

ಬಿಸಿಲಿಗೆ ಬೆಂಕಿ ಹಚ್ಚುತಾಳೆ - ಮುದ್ದಿನ ಮಾತಲ್ಲಿ ಕೊರಳಿಗೆ ಆಸೆ ಪುನುಗು ಪೂಸಿಕೊಂಡು...
ಮೋಹದಲೆಯ ಸಿಡಿಸುತಾಳೆ - ಎದೆ ಕಣಿವೆಯಲಿ ಬೆಳುದಿಂಗಳ ಬಚ್ಚಿಟ್ಟುಕೊಂಡು...
ಮನಸ ಬೆರಳಿಗೆ ಕನಸಿನುಂಗುರ - ಕನಸ ಮೈಗೋ ಬೆವರ ಮಜ್ಜನ...
ಹರೆಯ ಕರೆವ ತೋಳ ತುಡಿತ ತಡೆಯಲಿ ಹ್ಯಾಂಗೆ - ಆ ಹಾದಿಯ ಬೇಲಿ ಮುರಿಯದ ಹಾಂಗೆ...
🔀🔀🔀

ಮಳೆ ಇಳಿದ ತಿಳಿ ನೀಲಿ ಬಯಲಲ್ಲಿ ತೇಲಾಡೋ ತುಂಡು ಬಿಳಿ ಮೋಡಗಳಂಚಿಗೆ ನಗೆಯ ಉಯ್ಯಾಲೆ ಕಟ್ಟಿ ಮೊರೆಯುತಿದ್ದಾನೆ ಚಂದಿರ...
ಬಾ ಹುಡುಗೀ ಬೆಳದಿಂಗಳ ಮೀಯೋಣ - ಹೆಜ್ಜೆ ಗೆಜ್ಜೆಯ ತಾಳಕೆ ಕಟಿಯ ಏರಿಯಲಿ ಕಿರು ಬೆರಳು ಹಾದಿ ತಪ್ಪಲಿ - ತುಟಿಯ ತಿರುವಿಗೆ ಉಸಿರು ಮಗ್ಗಿ ಕಲಿಸಲಿ...
ಇರುಳ ಮೊದಲ ಜಾವಕೆ ಮುತ್ತು ಮತ್ತೇರಲಿ...
🔀🔀🔀

ಏನ್ಗೊತ್ತಾ -
ಕನಸ ಕಣ್ಣಿನೆದುರು ನಕ್ಷತ್ರ ಉದುರಿದಂತೆ - ಯಾರೋ ಗೋಪಿಯ ಸುಳ್ಳೇ ಬಿಂಕದ ಒಂದೆಳೆ ತುಂಟ ಮಾತು, ಒಂದೇ ಒಂದು ಹಸಿ ತುಟಿಯ ಕೊಂಕು ನಗು - ಬೇಕಷ್ಟಾಯಿತು; ಅದು ಅಜ್ಜಿ ದೃಷ್ಟಿ ನಿವಾಳಿಸಿ, ಬೆಲ್ಲ ಬೆರೆಸಿ ಕುಡಿಸಿದ ಸರ್ವ ರೋಗ ನಿವಾರಕ ಮನೆ ಮದ್ದಿನಂತೆ - ಗಂಟಲಿಗಿಳಿದರೆ ಸಾಕು ಎದೆ ಬಗೆದ ಯಮ ನೋವೂ ಈಗಿದ್ದು ಈಗಿಲ್ಲದಂತೆ...
ಪೋಲಿ ಹೈಕಳ ಬದುಕು ಎಷ್ಟು ಸರಳ, ಸರಾಗ, ಸಹಜ ಮಾರಾಯ್ತೀ...
#ಹುಟ್ಟಾ_ಪೋಲಿಯ_ಪಕ್ಕಾ_ಅನುಭವಾಮೃತ...
🔀🔀🔀

ನಿದ್ದೆಗಣ್ಣ ಎದೆಯ ತೋಯಿಸೋ ನಿನ್ನ ಒದ್ದೆ ಮುಡಿಯ ಹಬೆಹಬೆ ಹನಿಯ ತಂಪು - ಕಿವಿ ತಿರುವಿನ ಸೀಗೆಯ ಸೊಂಪಾದ ಕಂಪು - ಗೆಜ್ಜೆ ಕಿಂಕಿಣಿಯಲಿ ಇನ್ನೂ ಬಾಕಿ ಉಳಿದ ಇರುಳ ಬಿಸಿಯುಸಿರ ಸುಸ್ತಿನ ಹಿತದ ಆಕಳಿಕೆಯ ಇಂಪು...
ದಿನನಿತ್ಯದ ಹೊಸ ಬೆಳಗೂ ಹಿಂಗಿಂಗೇ - ಹೊಂಗೆ ಇಬ್ಬನಿಯ ಮಿಂದಂಗೆ...
#ನಿನ್ನಿಂದ...
🔀🔀🔀

ನಕ್ಷತ್ರ ಕಂಗಳಾಳದಿ ಎದೆಯ ಕಾವ್ಯದ ರೂಹು...
ನಗೆಯ ಬೆಳಕಿನ ಹಾದಿ ತುಟಿಯ ತಿರುವು...
ಕೊರಳ ಶಂಖದ ದನಿಯೋ ನಿನ್ನ ಹೆಸರು...
ಕುಡಿ ಮೀಸೆ ಮರೆಯ ತುಂಟ ಕುಂಟು ನಗೆಯಲಿ ಅದ್ಯಾವ ವಶೀಕರಣ ವಿದ್ಯೆಯೋ...
ಕನಸ ಚೆಲ್ಲಿ ಹೋದವನೇ ಇನ್ನೆಷ್ಟು ಕಾಲ ಎದೆ ಮಾತ ಎದೆಯಲೇ ಕಾಯಲಿ...
ಪ್ರೇಮದ ಮಿಡಿ ನಾಗರ ಹೆಡೆ ಬಿಚ್ಚಿದ ಕಾಲಕ್ಕೆ ಸೆರಗ ಮರೆಯಲಿ ನಿನ್ನಾಸೆ ಸೊಗಸ ಅದ್ಹೇಗೆ ಮುಚ್ಚಿಡಲಿ...
ಸಂಜೆಯ ಬಾಗಿಲಿಗೆ ಬಾರೋ ಈ ಅಪರಿಚಿತ ಬೇಗುದಿ ತುಸು ಅಳಿಯಲಿ...
ಹೆಣ್ಣೆದೆಯ ಬೃಂದಾವನದ ಇರುಳಿಗೆ ಬೆಳದಿಂಗಳು ಸುರಿಯಲಿ...
#ಅವಳ(ಳೇ)_ಕಾವ್ಯ...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

Thursday, September 6, 2018

ಗೊಂಚಲು - ಎರಡ್ನೂರಾ ಎಪ್ಪತ್ನಾಕು.....

ಹಾದಿ ಪಾದಕ್ಕೆ ಹೇಳಿದ ಪಾಠ..... 

ನೀ ನಂಬಲಾರದ ಅಪ್ರಿಯ ಸತ್ಯ"ನಾನು..."
ನೀ ನಂಬಿರೋ ಗಾಢ ಸುಳ್ಳು"ನಾನು..."
ನನ್ನ ಉರಿಯಲಿ ನಾನೇ ಬೇಯುವ ನಗ್ನತೆಯು "ನಾನು..."
ನಾನಿಲ್ಲಿ ನಾನೆಂದರೆ ನಾನು ಮಾತ್ರ...
#ಬದುಕು#ಸಾವು
↻↢↯↯↣↺

ಜೊತೆಯಿದ್ದು ಒಂಟಿಯಾಗುವುದಕಿಂತ ಧಿಕ್ಕರಿಸಿ ಏಕಾಂಗಿಯಾಗುವುದು ಹಿತವೇನೋ...
ನನ್ನ ಭಾವಗಳಲ್ಲಿ, ಕ್ರಿಯೆ ಪ್ರಕ್ರಿಯೆಯ ನಿಲುವುಗಳಲ್ಲಿ ಸ್ಪಷ್ಟತೆ ಇಲ್ಲದೇ ಹೋದಲ್ಲಿ ನನಗೆ ನಾನು ಪ್ರಾಮಾಣಿಕನಾಗಿರಲು ಅದ್ಹೇಗೆ ಸಾಧ್ಯ...!?
ಅಂತಿಮವಾಗಿ ನಾ ಜೀವಿಸೋದು ನಂಗೋಸ್ಕರ - ನೋಡೋರ ಕಣ್ಣಿನ ಕಾಮಾಲೆ ಅದು ಅವರ ಸಮಸ್ಯೆ...
ಕುಹಕದ ಬಾಯಿ ಮುಚ್ಚುವಂತೆ ಬದುಕಬೇಕು ಅಥವಾ ಅವನ್ನು ನಿರ್ಲಕ್ಷಿಸಿ ಮುನ್ಸಾಗಬೇಕು - ಎರಡನ್ನೂ ಮಾಡಲಾಗದ ನನ್ನ ಕೀಳರಿಮೆಗೆ ಅವರಿವರ ದೂರಲೆಂತು...?
ಮೊದಲಾಗಿ ನನಗೆ ನಾನು ಪ್ರಾಮಾಣಿಕನಾಗಿರಬೇಕು - ಅಂತಿಮವಾಗಿ ನಾ ಜೀವಿಸೋದು ನಂಗೋಸ್ಕರ...
#ಹಾದಿ_ಪಾದಕ್ಕೆ_ಹೇಳಿದ_ಪಾಠ...
↻↢↯↯↣↺

ಗೆದ್ದದ್ದು ನಾನಲ್ಲ - ನೀನು ಗೆಲ್ಲಿಸಿಕೊಂಡದ್ದು...
ಎಷ್ಟು ಸೋತರೆ ಮೌನ ಸಿದ್ಧಿಸೀತು ನನ್ನೊಳಗೂ...
ಮೆದುವಾಗಲಾ ಇಲ್ಲಾ ಬಿಗುವಾಗಲಾ...???
ಎಲ್ಲಾದಕ್ಕೂ...........ನೀವು ಕರೆ ಮಾಡುತ್ತಿರುವ ಚಂದಾದಾರರು 'ನಿಮ್ಮ' ವ್ಯಾಪ್ತಿ ಪ್ರದೇಶದಿಂದ ಹೊರಗಿದ್ದಾರೆ..‌.
#ಮಾತು #ಮೌನ
↻↢↯↯↣↺

ಅಯ್ಯೋ ಮರುಳೇ -
ಸ್ವಾತಂತ್ರ್ಯ, ಸ್ವೇಚ್ಛೆಗಳು ಕೊಂದದ್ದಕ್ಕಿಂತ ನೂರು ಪಟ್ಟು ಹೆಚ್ಚಾಗಿ ಭಾವ, ಬಂಧ, ಸಂಬಂಧಗಳನ್ನು ಕಾವಲಿನ ಕತ್ತಿ ಹಿಡಿದ ಈ ಬೇಲಿಗಳೇ ತಿಂದು ಹಾಕುತ್ತವೆ...
ಭಾವಕ್ಕೆ ಬೆರಗು ತುಂಬಲಾರದೇ ದೇಹದ ಬೆವರಿಗೆ ಬೆಚ್ಚುವ ಲೋಕವೇ -
ಪ್ರೀತಿಯ ಪಾವಿತ್ರ್ಯವ ಕಾಯುವುದು ಭಯದ ಬಂಧನದ ಗಡಿಯಲ್ಲ, ಮಡಿ ಮಡಿಯಾದ ಕಟ್ಟಳೆಯ ಗುಡಿಯಲ್ಲ; ಬದಲಾಗಿ ಪ್ರೀತಿ ಮಾಗುವುದು, ಬಾಗುವುದು ಖಾಯಿಲೆ ಬೀಳದ ಪಕ್ವ ಮನಸಿನ ಸುಂಕವಿಲ್ಲದ ಕಾಳಜಿಯ ಕುಡಿಯಲ್ಲಿ...
#ವಿಪರೀತದ_ಸತ್ಯ..
↻↢↯↯↣↺

ಬಾಗುವಿಕೆಯ ಬಲದ ಮೇಲಲ್ಲವಾ ಬಂಧದ ಬಾಳಿಕೆ...
#ನಾನು...
↻↢↯↯↣↺

ಮೌನವ ಸಲಹಿಕೊಳ್ಳಲರಿಯದ ಮನಸು ಸುಖಾಸುಮ್ಮನೆ ಮಗುಚಿಬಿದ್ದರೆ ಮಾತಿಗೆ ಉಗ್ಗು ರೋಗ............... ಕಷ್ಟ ಕಷ್ಟ....... ಎಷ್ಟಂತ ಸುಳ್ಳು ಸುಳ್ಳೇ ನಗುವುದು............ ಎಲ್ಲಿಯೂ ಸಲ್ಲದ...... ಯಾರೂ ಒಲ್ಲದ....... ವಿಕ್ಷಿಪ್ತ ಅಸ್ತಿತ್ವ...............‌‌ ದಾಟಿ ಬಂದ ಹಾದಿಯ ತುಂಬಾ ನೋಡನೋಡುತ್ತಾ ಮುರಿದುಬಿದ್ದ ಒಂದೊಂದೇ ಒಂದೊಂದೇ ಮೆಟ್ಟಿಲು.................... ಕೊನೆಗುಳಿದದ್ದು ಅಸ್ವಸ್ಥ ಉಸಿರೊಂದೇ......
#ನಾನು...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

ಗೊಂಚಲು - ಎರಡ್ನೂರಾ ಎಪ್ಪತ್ಮೂರು.....

ಶಬ್ದ ಸೋಲುವ ಸಾಹಿತ್ಯ..... 

ಪ್ರಕೃತಿ ಪ್ರೇಮದೊಡನೆ ಸಂವಾದಕ್ಕಿಳಿದಾಗಲೆಲ್ಲ ಒಳಗುಡಿಯ ಜೀವದೊಲುಮೆಯ ಕಂದೀಲು ಕರುಳ ಕಸರಿನ ಕಿಟ್ಟವ ಕೊಡವಿ ನಗೆಯ ಹೊನಲುಕ್ಕಿ ಉರಿಯುತ್ತೆ - ಅವಳ ನುಡಿಯೆಂದರೆ ಮರಳಿ ಮರಳಿ ಮೊರೆವ ಜೀವ ಭಾವ ಮುರಳಿ...
ಅದಕೆಂದೇ ಸೋಲು, ಸಾವು, ನೋವುಗಳು ಸೊಕ್ಕಿ ಕಾಡುವಾಗಲೆಲ್ಲ ಪ್ರಕೃತಿಯ ಮಡಿಲು ಅಡಿ ಮುಡಿಯ ಕಾಡುತ್ತೆ - ಮತ್ತೆ ಜೀವಿಸಲು ಕಾರಣಗಳ ಹೊಂದಿಸಿಕೊಳ್ಳಲು ಅವಳಲ್ಲಿಗೆ ಓಡುತ್ತೇನೆ - ಹುಚ್ಚಾಟದ ಪುಂಡ ಮಗುವಾಗುತ್ತೇನೆ...
#ನಾನುಳಿಯುತ್ತೇನೆ_ನನಗೆ...
↬↩↨↨↪↫

ಬದುಕೇ -
ನನ್ನ ಪ್ರೀತಿಯ ನಂಬಿ ನಾ ನಿನ್ನ ಪ್ರೀತಿಸಿದ್ದು...
ತಿರುಕನ ಹಣೆಯ ಕನಸಿನ ನಸೀಬು ನಿನ್ನ ಪ್ರೀತಿಯೂ ಇಷ್ಟು ಸಿಕ್ಕಿದ್ದು...
ಕೆನ್ನೆ ತಟ್ಟುವ ಮಳೆ ಹನಿಯೂ ಬೆಚ್ಚಗೆ ನಿನ್ನ ಹರಿವಿನೊಟ್ಟಿಗೆ...
#ಶಬ್ದ_ಸೋಲುವ_ಸಾಹಿತ್ಯ...
↬↩↨↨↪↫

ಹಸಿರು ಗರ್ಭ ಧರಿಸಿ ಮಳೆಯ ಕೊಯ್ಲೋ - ಮಳೆ ಬಿತ್ತಿದ ಹಿತ್ತಲ ಮದ್ದಿನ ಬೀಜ ಈ ಹಸಿರ ಪೈರೋ - ಯಾರು ಯಾರಿಗೆ ನೆಳಲೋ, ಬೆಳಕೋ - ಏಸು ಸೊಬಗಿನ ಬೆಡಗು ಬಿನ್ನಾಣ; ಕಸರಿಲ್ಲದ ಭುವಿ ಬಾನು ಸುರತ ಚಕ್ರ ಪಯಣ...
ಗಾಳಿ ಗೊಲ್ಲನ ಕೊಳಲ ಇಂಪು - ಮೈಮನದ ಮುಡಿ ಬಿಚ್ಚಿದ ನಲಿವಿನುಲಿಯ ಲೋಬಾನದ ಕಂಪು - ಈ ಮಿಣುಕು ಮುಚ್ಚಂಜೆಯ ಚುಕುಬುಕು ಹಾದಿಯ ಚೊಕ್ಕ ನಗೆಯ ಮಜ್ಜನೋತ್ಸವ...🎊💞
#ಶಬ್ದ_ಸೋಲುವ_ಸಾಹಿತ್ಯ...
↬↩↨↨↪↫

ಮನೆಯ ದಣಪೆ ಆಚೆಯ ಬೇಣದಲ್ಲಿ ದಿನಕ್ಕೊಂದು ಹೊಸ ಕಾಡು ಸೊಪ್ಪಿನ ಮನೆ ಕಟ್ಟಿ ಅಪ್ಪ ಅಮ್ಮನ ಆಟ ಆಡೋವಾಗ ಅಮ್ಮನ ಪಾತ್ರ ಮಾಡಿ ಒರಳು ಗುಂಡನ್ನು ಪಾಪು ಅಂತ ಮಡಿಲಲ್ಲಿ ಆಡಿಸ್ತಿದ್ದ ಮುದ್ಮುದ್ದು ಹುಡ್ಗೀರೆಲ್ಲ ಈಗ ಅಖಂಡ ಸಂಸಾರಿಗಳಾಗಿ ಎಲ್ಲಿ ಕಳೆದೋಗಿದಾರೋ...
#ಕಳೆದೋದ_ಬಾಲ್ಯದ_ಬಾಲಗಳು...
#ಮಲೆನಾಡ_ಮಡಿಲು...
↬↩↨↨↪↫

ಭಾವಕ್ಕೆ ಪದ ದಕ್ಕಿದ ಘಳಿಗೆಯ ಕವಿಯ ಮಂದಹಾಸವ ಕದ್ದು ಸವಿದೆ - ಕವಿತೆ ನನ್ನದಾಯಿತು...😍
↬↩↨↨↪↫

ಕೊಳಲ ಮಡಿಲಲಡಗಿಸಿಕೊಂಡು ನಾದವ ಜಗಕೆ ಬಿಟ್ಟಳು - ಕೃಷ್ಣ ಮತ್ತೆ ಮತ್ತೆ ಹುಟ್ಟಿದ...
ಕರಿಯನ ದಿನವಂತೆ - ಬೆಣ್ಣೆ ರಾಧೆ ನೆನಪಾದಳು...
ಅವಳು ಕೊಳಲ ಕಾಯ್ದಳು - ಇವ ಪಾಂಚಜನ್ಯವ ಮೆರೆದ...
#ಅಷ್ಟಮಿ...
↬↩↨↨↪↫

ದಾರಿಯ ಬಿಳಲು ಬೆಳಕನ್ನು ಮಿಂದಾಗ ಹುಳವ ಹೆಕ್ಕೋ ಬೆಳ್ಳಕ್ಕಿಯ ಕಣ್ಣಲ್ಲಿ ಗೂಡ ಬಾಗಿಲು ಕಾಯೋ ಮರಿಯ ಚಿತ್ರ...
#ಶಬ್ದವಿರದ_ಸಾಹಿತ್ಯ...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

ಗೊಂಚಲು - ಎರಡ್ನೂರಾ ಎಪ್ಪತ್ತೆರಡು.....

ಪ್ರೇಮ ಹೊಕ್ಕುಳ ಬೆಂಕಿ.....  

ಸಾಖೀ -
ಈ ಪ್ರೇಮಕ್ಕಿರೋ (?) ಭ್ರಮೆಯ ಜೀವಿಸುವ ಮಾಯಕ ತೀವ್ರತೆ ನೀ ತುಂಬಿ ಕೊಡುವ ಮಧು ಬಟ್ಟಲ ಉನ್ಮತ್ತ ಅಮಲಿಗೂ ಇಲ್ಲವಲ್ಲೇ...!!!
#ಕತ್ತಲ_ಸತ್ಯ...
⇴⇵⇴

ಜೋಗಿಯ ಕಾಲಿನ ಜಂಗಮ ಮೋಹವೇ -
ಓಡೋ ಮೋಡದ ಮೂಗು ಚಿವುಟೋ ಘಾಟಿ ಗುಡ್ಡದ ಮೇಲೆ ನೆನಪ ಮೇಯುತ್ತ ಕಾದು ಕೂತಿದ್ದೇನೆ ಕಣೇ - ಮರಿ ಕನಸಿಗೆ ತುರಾಯಿ ಕಟ್ಟಲು ನೀ ಬರಬಹುದಾ ನವಿಲ ಗರಿ ಹೆಕ್ಕೋ ನೆಪ ಹುಡುಕಿಕೊಂಡು...
ಹಸಿ ಹುಲ್ಲಿಗೆ ನಿನ್ನ ಆಸೆ ಹುಯಿಲಿನ ಮೆದು ಪಾದದ ಬಿಸಿ ತೀಡುವಾಗ ಬೆನ್ನ ತುಂಬ ಮೆರೆವ ಹೆರಳ ಘಮ ಸೋಕಿ ಕಾಡು ಮೊಲ್ಲೆಯೊಂದು ಮೆಲ್ಲ ಕಂಪಿಸೀತು...
ಕೇದಗೆಯ ತೋಪನು ಬಳಸಿ ಕಾಡು ಕೋಳಿ ಕೆದರಿದ ಹಾದಿಯಲಿ ನಿನ್ನ ಹೆಸರ ಬರೆದಿಟ್ಟು ಬಂದಿದ್ದೇನೆ - ಆ ಪುಳಕಕ್ಕೆ ಪುಟ್ಟ ಮೊಲೆಗಳ ಕಟ್ಟು ಬಿಗಿದರೆ ಹರೆಯಕ್ಕೆ ಹಗಲು ಅಡ್ಡವಿದೆ ಅನ್ನದಿರು - ಒಂದು ಹೆಜ್ಜೆ ಅಡ್ಡ ಇಟ್ಟರೆ ಗುಡ್ಡದ ಕಿಬ್ಬಿಯ ಇಬ್ಬದಿಗೂ ಜೊಂಪೆ ಜೊಂಪೆ ಹಸಿರು ಪೌಳಿಯ ಕಾವಲಿದೆ...
ಪ್ರಕೃತಿ ಎಂದಿಗೂ ಪ್ರಣಯ ಪಕ್ಷಪಾತಿ, ನನ್ನಂತೆ - ಒಲ್ಲೆ ಒಲ್ಲೆ ಅನ್ನುತಲೇ ಒಪ್ಪಿ ನಾಭಿ ಒಲೆಯ ಹೊತ್ತಿಸಿಬಿಡು, ನೀನೂ ನನ್ನಂತೆ - ಒಳಗೊಳಗೇ ಕಾಡಲು ನಾಳೆಗಿಷ್ಟು ಮಧುರ ಪಾಪದ ನೆನಪುಳಿಯಲಂತೆ...
ಕಿಬ್ಬದಿಯ ಕೀಲು ಕನಲುವಂತೆ ತಬ್ಬಿಕೊಳಲಿ ಹರೆಯ ಮತ್ತೆ ಮತ್ತೆ -  ಬೆವರಲ್ಲಿ ಬೆವರು ಬೆರೆವಂತೆ ಜೀಕುವಾ ಮೈಯ್ಯಲ್ಲಿ ಮೈಯ್ಯ ಮತ್ತೆ ಮತ್ತೆ...
ಹೆದರಬೇಡ ಮಳೆ ಮತ್ತು ಇಳೆ ಪ್ರಣಯದ ವಿರುದ್ಧ ಸಾಕ್ಷಿ ಹೇಳುವುದಿಲ್ಲ; ಅಂತೆಯೇ ಪ್ರತಿ ಸಂಜೆಗೂ ದಿಕ್ಕು ಬದಲಿಸೋ ಜೋಗಿ ತಾ ನಡೆದ ಹಾದಿಯಲಿ ಅವನ ನೆನಹುಗಳ ಹೊರತಾದ ಗುರುತುಳಿಸುವುದಿಲ್ಲ...
#ಇಷ್ಟಕ್ಕೂ_ಒಡಲಾಗ್ನಿ_ಸುಡದೇ_ಸುಖ_ಹುಟ್ಟೀತೆಂತು...
⇴⇵⇴

ಕಾಲಕೂ ಪ್ರೇಮವ ಸಾಕಿದ್ದು 'ಸುಳ್ಳೇ' ಅನ್ಸುತ್ತೆ...
#ಸಾವನೂ_ಸುಳ್ಳೆಂದವನು...
⇴⇵⇴

ಮಳೆಯ ಮುಸ್ಸಂಜೆಯಲಿ ಜೀವ, ಭಾವಗಳೆರಡೂ ಬಯಕೆ ಬೆಂಕಿಯ ತಬ್ಬಿ ನಿನ್ನ ಹೆಸರ ಕೂಗುತ್ತವೆ...
#ಪ್ರೇಮ_ಹೊಕ್ಕುಳ_ಬೆಂಕಿ...
⇴⇵⇴

ಪಡೆಯುವುದಷ್ಟನೇ ರೂಢಿ ಮಾಡಿಸಿದ್ದು ನಿಮ್ಮದೇ ತಪ್ಪಲ್ಲವಾ.....
#ಪ್ರೀತಿ_ಪೇರಳೆ...
⇴⇵⇴

ಅವನು ಕೊಂದ ಪ್ರೇಮ (?) ಅವಳಲ್ಲಿ ಕೊಳೆಯುತ್ತಿದೆ...
#ಬಲಿ...

ಘೋರಿಯ ಮೇಲೆ ಗರಿಕೆಯಿಷ್ಟು ಹುಟ್ಟಲಿ ಈ ಮಳೆಗೆ...
#ಪ್ರಾರ್ಥನೆ...

ಪ್ರೇಮಿಯೆಡೆಗಿನ ಹುಚ್ಚು ಅಳಿದ ಮೇಲೆ ಬದುಕ ಪ್ರೇಮ ತುಸು ನಿರಾಳ ಉಸಿರಾಡುತಿದೆ...
#ನನ್ನೊಳಗಿನ_ಹಣತೆ...
⇴⇵⇴

ನಿನ್ನ ಕುಪ್ಪಸ ಗೂಡಿನ ಶ್ರೀಮಂತ ಸೀಮೆಯಲಿ ಸ್ವಯಂ ಬಂಧಿಯಾದ ನನ್ನ ಕಣ್ಣ ಬೆಳಕಿಗೆ ತೋಳಾಸರೆ ನೀಡಿ ನೀನೆ ಕಾಯಬೇಕು...
ಬಿಗಿದ ಉಸಿರಿಗೆ ಕಂಕುಳ ಬೆವರ ಉನ್ಮತ್ತ ಘಮದ ಉರಿ ತುಂಬಿ ಈ ಕಾಯವ ಕಾಯಿಸಬೇಕು...
ನಿನ್ನ ಕಿವಿಯ ತಿರುವಿನ ಕಳ್ಳ ಮಚ್ಚೆಯಿಂದ ಹೊರಳಿ ಕೊರಳ ಶಂಖ ಮಾಲೆಗೆ ನನ್ನ ನಾಲಿಗೆ ಮೊನೆ ತೀಡಿ, ನನ್ನೊರಟು ಬೆನ್ನ ಹಾಳಿಯಲಿ ನಿನ್ನುಗುರ ಉಂಗುರ ಕೇಳಿ...
ಆಸೆ ಬೆಂಕಿಗೆ ಸಿಕ್ಕ ಐದರ ಮೇಲರ್ಧ ಅಡಿ ಆಕಾರವ ಊರು ಮೋರೆಯ ತೇವದಲದ್ದಿ ನೀರೇ ನೀನೆ ಕರಗಿಸಬೇಕು...
ಉತ್ಕಂಠ ಕೊಂಡಾಟದ ಉರುಳುರುಳು ಉಜ್ಜುಗದಿ ಮಂಚದ ಮೆತ್ತೆ ಹೊತ್ತಿ ಸ್ವರ್ಗ ಸಾಲಿನ ದೀಪ ಉರಿಯಬೇಕು...
ಹುಡುಗೀ, ನಿನ್ನ ತೋಳ್ತೊಡೆಗಳ ಹೂಂಕಾರ, ಸುಖೀ ಮುಲುಕಿನ ಝೇಂಕಾರಗಳಲಿ ಒರಟೊರಟು ಗಂಡು ಮೈಯ ಕೀಲುಗಳೆಲ್ಲ ಕಡೆದು ಒಂದೇಟಿಗೇ ಈ ಜನ್ಮದ ನಾಭಿ ಹಸಿವಿನ ಜಾಡ್ಯ ಹರಿಯಬೇಕು...
ಬೆವರ ಮಳೆಯ ಮಿಂದ ಮೈಯ್ಯಲ್ಲಿ ಮನಸೂ, ಕನಸೂ ಹೊಸದಾಗಿ ಅರಳಬೇಕು...
#ಪ್ರಕೃತಿ_ಪೂಜೆಗೆ_ಹರೆಯದ_ಪೌರೋಹಿತ್ಯ...
⇴⇵⇴

ಸುಡು ಸುಡು ಒಂಟೊಂಟಿ ಸಂಜೆಗಳ ಒರಟು ಅಂಗೈಯ ಮುರುಕು ರೇಖೆಗಳಿಗೆ ಕನಸ ಬೆವರ ನವಿರು ಘಮ ‌ಸವರಿದ ರೇಷಿಮೆ ಪಕಳೆಗಳ ಸ್ವರ್ಗ ಸೀಮೆಯ ಕುಸುಮ ಅವಳು...
ಸೋತ ಹಗಲಿನ ಹೆಗಲಂಥ ನಿತ್ರಾಣ ಇರುಳಲೂ ಆರದಂತೆ ಕಾಯ್ದುಕೊಟ್ಟು ನಾಭಿ ಜ್ವಾಲೆಯ; ಮರು ಹಗಲ ಗೆಲುವ ಎತ್ತಿ ಕೊಡೋ ಮಡಿಲು ಅವಳಲ್ಲದೇ ಇನ್ನಾರು...
#ಅವಳು_ಪಾರಿಜಾತ...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

ಗೊಂಚಲು - ಎರಡ್ನೂರಾ ಎಪ್ಪತ್ತೊಂದು.....

ಬಣ್ಣ..... 

ಹೌದೇ ಹೌದು... ನಾನೀಗ ಬದಲಾಗಿದ್ದು ಹೌದು - ನಿನ್ನ ಕಣ್ಣಲ್ಲಿ; ಅಷ್ಟೇ, ಮತ್ತದು ಅಷ್ಟೇ...
#ಮಾಸಿದ_ಬಣ್ಣ...
#ನಿನ್ನೆಯಂತಿಲ್ಲದ_ಹಾದಿ...
↢↡↟↣

ಎಷ್ಟು ಬಾರಿ ಕ್ಷಮೆ ಕೇಳಿದರೆ ಅಷ್ಟು ಬಾರಿ ಮಾಡಿದ ಅದೇ ತಪ್ಪು ಸರಿಯಾದೀತು...
ಮೃದುವಾಗಿ ತಾಕಲು ಬಾರದವನ ಎದೆಯಲ್ಲಿ ಪ್ರೀತಿ ಎಷ್ಟಿದ್ದರೇನು ಬಂತು...
ಕಿವಿಯಾಗಲಾರದವನ ಮಾತಿನ ಅಹಂಕಾರಕ್ಕೆ ಜೊತೆಯ ಕರುಳ ನೋವೆಂತು ಅರಿವಾದೀತು...
'ಹತ್ತು ಹೆಜ್ಜೆ ನಿನ್ನ ಏಕಾಂತ ಎನಗೆ ಬೇಕು' ಎಂಬಷ್ಟೂ ಯಾರೊಬ್ಬರದೂ ಒಳನಾಡಿಯ ಮೀಟಲಾರದವನಿಗೆ ಮೌನ ಸಿದ್ಧಿಸುವುದೆಂತು...
ಎಷ್ಟೆಲ್ಲ ನೇಹಗಳ ಒಡನಾಟವಿದ್ದೂ ಒಂದಾದರೂ ಹೃದಯದ ಸೊಲ್ಲಾಗದವನ ಬದುಕ ಗೆಲ್ಲುವ ಹಠದ ಗಳಿಕೆಯೆಂದರೆ: ಜಾಳು ಮಳೆಗೂ ಬೆದರುವ ಹಡಾಲೆದ್ದ ಹಾಳು ಮನಸು - ಕೊಳೆತ ಕಳ್ಳಿಯಂಥ ಸಂಜೆಗಳು - ಬೆತ್ತಲೆ ಕಣ್ಣು - ಕಾಡು ಕನಸು - ಮನಸ ಬಸಿರುಗಳ ಸುಡದೇ ಒಂಟಿ ಹಾದಿ ಸಲೀಸಲ್ಲ ಎಂಬ ಹುಂಬ ಸಮಾಧಾನ.....ಅಷ್ಟೇ....
#ಧಗಧಗಿಸಿ_ಕುಣಿವ_ಚಿತೆಯ_ನೆಳಲು...
#ನಾನು...
↢↡↟↣

ನಂಬಿಕೆ ಅಂದರೆ ಇಷ್ಟೇ ಇರಬೇಕು - ನಂಬಲು ಶಕ್ಯವಾದ ಸಮರ್ಥನೆಗಳಿರುವ 'ಸತ್ಯವಾದ ಸುಳ್ಳು...'
#ಕರ್ಮಾಕರ್ಮಫಲ...
↢↡↟↣

ಮಾತು ಕಲಿತ ಮನುಷ್ಯನ ಬಹು ದೊಡ್ಡ ಸಾಧನೆ: ಸುಳ್ಳನ್ನು ಸುಂದರವಾಗಿ ಬದುಕೋ ತಂತ್ರ...
#ಬಣ್ಣ...
↢↡↟↣

ಯಾವುದೇ ಒಂದು ವಿಷಯ ವಿಚಾರದ ಸತ್ಯಾಸತ್ಯತೆಯನ್ನು ಪ್ರಮಾಣೀಕರಿಸುವ ಘನ ತಕ್ಕಡಿ - "ನಾನು..."
#ಬಣ್ಣ...
↢↡↟↣

ತೊರೆದ ಹಾದಿಯ ಅಳಿದುಳಿದ ನೆನಪಿಗೆ ಹೊಸ ಬಣ್ಣ ಬಳಿದಂತೆ, ಮಟ ಮಟ ಮಧ್ಯಾಹ್ನ ಹರೆಯದ ಹರಿವಿನ ಮೊದಮೊದಲ ಮೋಹ "ನೀನೇ ಬರಿ ನೀನೇ, ಎಲ್ಲೆಲ್ಲೂ ನೀನೇ" ಅಂತ ತುಂಟ ಸಂದೇಶ ಕಳಿಸಿದರೆ ಬಡ ಪಾಪಿ ಜೀವ ತಡೆದೀತು ಹೇಗೆ ಒಳಗಿನ ಉರಿಯ... 😜
#ದಣಿವು_ನೀಗುವ_ಸಣ್ಣಪುಟ್ಟ_ಸಲಿಲಗಳು...😍
↢↡↟↣

ಹಬ್ಬಿ ಹಸಿರಾಗಿರಲಿ ನೇಹ ಬಂಧ ಮೀರಿ ದೇಶ ಕಾಲ...
ನಗೆಯ ಅವಲಕ್ಕಿ ಬೆಲ್ಲವಾಗಿ ತಬ್ಬಿಕೊಂಡಂತೆ ಕರಿಯ ಕುಚೇಲ...
#ನೇಹವೆಂಬೋ_ನೆತ್ತಿಯ_ನೆರಳು...
                                       ತೇದಿ: 05-08-2018

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

Wednesday, September 5, 2018

ಗೊಂಚಲು - ಎರಡ್ನೂರಾ ಎಪ್ಪತ್ತು.....

ಆಯಿ_ಆನು..... 

ಇಬ್ಬರೂ ಒಟ್ಟಿಗೇ ಕೆಮ್ಮುತ್ತೇವೆ - ಅವಳು ಮುಂಬಾಗಿಲ ಎಡ ಬಲದಲ್ಲಿ, ನಾನು ಅಂಗಳದಂಚಲ್ಲಿ...
ಅವಳು ಅತ್ತ ಮುಖ ತಿರುವ್ತಾಳೆ - ನಾನು ಸರಸರನೆ ಸರಗೋಲು ಸರಿಸ್ತೇನೆ...
ಇಬ್ಬರೂ ನಮ್ಮ ನಮ್ಮ ನೆಳಲಲ್ಲಿ ಒಬ್ಬರನ್ನೊಬ್ಬರು ಹುಡುಕಿಕೊಳ್ತೇವೆ - ನೆರಳು ನರಳಿದಂಗೆ ಅಸ್ಪಷ್ಟ ಕಣ್ಣಿಗೆ...
ಅಲ್ಲಿಂದಾಚೆ ಖಾಲಿ ಮನೆಯೊಳಗೆಲ್ಲ ನಾನು - ಹಾದಿ ಬಯಲ ತುಂಬಾ ಅವಳು...
#ವಿದಾಯ...
↯↹↹↹↯

ಸಾವೇ ಇಲ್ಲವೇ ನೋವಿಗೆ...??
ನಗು ಕೂಡಾ ನೋವಿನ ಸುಂದರ ಮುಖವಾಡವಾ...??
ಸಾವೂ ಸಹಿತ ನೋವಿನ ಸ್ಥಾನ ಪಲ್ಲಟವಷ್ಟೇಯೇನೋ...
ಕೇದಗೆಯ ಕಂಪು - ಮುಳ್ಳು ಹಾದಿ - ಸರ್ಫ ಬಂಧ - ಬದುಕಿನ ಬಣ್ಣ...
ನಗೆಯ ಹಿಂದಣ ನೋವಿಗೆ ನಾವೇ, ನಾವಷ್ಟೇ ವಾರಸುದಾರರು....
#ಬೆಳಕಿಗೆ_ಹಾದಿಯದೇ_ಬಣ್ಣ#ಬಣ್ಣವಿಲ್ಲದ_ಕಣ್ಣಹನಿ...
↯↹↹↹↯

ಅತ್ತಾರೆ ಅತ್ತು ನಿಡುಸುಯ್ಯುವಂತೆ ಅಳು ಒಗ್ಗದ ಹುಂಬನಿಗೆ ನೋವ ನಸನಸೆಯ ದಾಟಿ ಕನಸ ಕುತ್ರಿಯ ಕಾಯಲು ಮೊಗಬಿರಿಯೆ ನಗುವೊಂದೆ ಶಾಶ್ವತ ಆಸರೆ...
#ಸ್ವಯಂಭೂ_ನೋವೂ_ಸ್ವಯಾರ್ಜಿತ_ನಗುವೂ...
↯↹↹↹↯

ಕಂದನಿಗೆ ಉಸಿರು ತುಂಬಲು ಸಾವಿಗೂ ಎದೆ ಕೊಟ್ಟೇನೆಂಬಳು - ತುಂಬು ಬದುಕನೇ ಎಡೆ ಇಟ್ಟೇನೆಂಬಳು... 
ಗೆಳತಿ ಅವಳು ಪುಟ್ಟ ಅಮ್ಮ...
ಅಮ್ಮ ಅಂದರೆ ದೇವನೂ ಬೆದರುವ ಗುಮ್ಮ...
#ಆಯಿ...
↯↹↹↹↯

ಬಣ್ಣ ಮಾಸಿದ ಮೇಲೂ ಬೆಚ್ಚನೆ ಭಾವವನೇ ನೇಯುವುದು ಅಮ್ಮನುಟ್ಟ ಸೀರೆ... 
ಅದರ ಮುದುರಿನ ಕನಸೆಲ್ಲಾ ಹೊತ್ತು ತಿರುಗುವುದು ನನ್ನ ಏಳ್ಗೆಯ ತೇರೇ...
ಅಮ್ಮ ಅವಳು ಪುಟ್ಟ ಗೆಳತಿ - ನನ್ನ ನೆತ್ತಿ ಕಾಯೋ ಬೇಶರತ್ ಪ್ರೀತಿ...
#ಆಯಿ...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

ಗೊಂಚಲು - ಎರಡ್ನೂರಾ ಅರ್ವತ್ತೊಂಭತ್ತು.....

ಆನು.....  

ಎತ್ತಿಡುವ ಪ್ರತಿ ಹೆಜ್ಜೆಯೂ ಒಂದು ಹೊಸ ಕಲಿಕೆಯ ಪರೀಕ್ಷೆಯೇ; ಹಾದಿಯ ಹಾಳೆಯ ಅಂಕುಡೊಂಕು ಸಾಲುಗಳ ಕಣ್ಮುಚ್ಚಿ ಓದೆ, ಅಲ್ಲಿ ಏನಿದೆಯೋ ಅದನ್ನೇ ಆಲಿಸೆ...
ಜೊತೆ ನಡೆವ, ಟೂ ಬಿಡುವ, ಮುಂದೋಡುವ, ಹಿಂದಡಿಯಿಡುವ, ಎದುರಿಂದ ಬರುವ, ಎದುರಾಗಿ ನಿಲ್ಲುವ ಎಲ್ಲರೂ, ಎಲ್ಲವೂ ಅರಿವಿನ ಓಘದ ಅರವಟಿಕೆಗಳೇ...
ಎದೆ ಗೋಡೆಯ ಮೇಲಿನ ನೋವಿನ ಗೀರುಗಳು, ಕಣ್ಣಂಚಿನ ನಗೆ ಹನಿಗಳೇ ಅಂಕಪಟ್ಟಿ - ಅಂಡಿನ ಮೇಲಿನ ಸೋಲಿನ ಬಾಸುಂಡೆಗಳೂ, ಜುಟ್ಟಿಗೆ ಕಟ್ಟಿದ ಗೆಲುವಿನ ತುರಾಯಿಗಳೂ ಮಂಡೆಗೆ ಬಂಡೆ ಬಲ ತುಂಬುವ ಬಯಲ ಆಟೋಟಗಳು...
ಓದಬೇಕಷ್ಟೇ - ಉಂಡಾಡಿ ಉಡಾಳನೂ ಓದಲೇಬೇಕಷ್ಟೇ - ಮಹಾ ಗುರು ಅಂತಕ ಉಸಿರಿಗೆ ಒದ್ದು ಅವನೂರಿಗೆ ಒಯ್ಯುವವರೆಗೂ ನಿಲ್ಲಿಸುವಂತಿಲ್ಲ ಈ ಊರ ಕಲಿಕೆ...
ಸಾವೆಂಬೋ ಮಹಾಗುರುವಿನ ವಿಧೇಯ ಶಿಷ್ಯ ಈ ಬದುಕು - ನಾನಾದರೋ ಬದುಕೆಂಬ ಪಾಠಶಾಲೆಯ ಅತಿ ದಡ್ಡ ವಿದ್ಯಾರ್ಥಿ - ಶಿಕ್ಷಣದಿಂದ ಕಲಿತದ್ದಕ್ಕಿಂತ ಶಿಕ್ಷೆಯಿಂದ ಕಲಿತದ್ದೇ ಹೆಚ್ಚು...
#ಅರಿವಿನ_ಉರಿಗೆ_ಬಿದ್ದರೆ_ನನಗೆ_ನಾನೇ_ಗುರು...
↟↜↝↜↝↟

"ಅರ್ರೇ ನಿನ್ನ ನಗುವಿಗೇನಾಯ್ತು...!!?
ನಿಂಗೆ ನಗು ಚಂದ..."
ಸಹಚರ ಸಲಿಗೆಯ ವಿಚಿತ್ರ ತಳಮಳದ ಪ್ರಶ್ನೆಗೆ, ಅಕಾರಣ ಪ್ರೀತಿಗೆ ಉತ್ತರ ಎಲ್ಲಿಂದ...? ಹೇಗೆ...??
ಕೆಲವಕ್ಕೆ ಉತ್ತರವಾಗೋದು ಮಾತಿಗೂ, ಮೌನಕ್ಕೂ ಸಲೀಸಲ್ಲ...
ಆದರೊಂದು, ಇಂಥ ಸಣ್ಣ ಸಲಿಗೆಯಿಂದ ಒಳಗೊಳಗೇ ಸೋತು ಸುಸ್ತುಬಡಿದು ಮುರುಟಿ ಹೋದ ಮನಸಿನಲ್ಲೇನೋ ಹೊಸ ಚಡಪಡಿಕೆ - ಹಗುರ ಜೀವಂತಿಕೆಯ ಕದಲಿಕೆ...

ಕೂಸುಮರೀ ಕನಸೇ -
ಕಳೆದುಕೊಂಡ ನಿನ್ನೆಗಳಲ್ಲಿ ನೀನಿದ್ದೆ - ಈ ಸಂಜೆಯ ತೋಯಿಸಲು ಆ ನೆನಪುಗಳಿವೆ - ಅಂತೆಯೇ ಕಳೆದುಕೊಳ್ಳೋಕೇನೂ ಉಳಿದಿರದ ತೂತು ಜೋಳಿಗೆಯ ಫಕೀರನ ನಗು ಬತ್ತಿದ ಕಣ್ಣಲ್ಲೂ ಆಗೀಗ ಮತ್ತೆ ಜೀವಿಸೋ ಸಣ್ಣ ಸವಿ ಸಂಚೊಂದು ಮಿಂಚುವುದು; ಅದು ಉಳಿದಿರೋ ಅಪರಿಚಿತ ಖಾಲಿ ಖಾಲಿ ನಿಸೂರು ನಾಳೆಗಳಿಗಿಷ್ಟು ಹೊಸ ಬೆಳಕ ತುಂಬಿಕೊಳ್ಳುವ ಆಸೆಯ ಬೆರಗು ಮತ್ತು ಭಯ...
ಒಂದು ಮನಸಿಗೆ ನಿನ್ನನೇ ಉಳಿಸಿಕೊಂಡಿಲ್ಲ ಇನ್ನೇನ ಗಳಿಸಿಕೊಂಡೇನು ಅಂತನ್ನಿಸುವ ಹೊತ್ತಿಗೇ ಇನ್ನೊಂದು ಮಗ್ಗುಲಲ್ಲಿ ಕನಸ ಸಾಯಗೊಡಬಾರದು ಮತ್ತದು ಸಾಯುವುದಿಲ್ಲ ಪಥ ಬದಲಿಸುತ್ತದಷ್ಟೇ ಅಂತಲೂ ಅನ್ನಿಸುವುದು ಜೀವನ್ಮುಖೀ ನೆಲಗಟ್ಟಿನ ಅಕಳಂಕ ಸೋಜಿಗವಲ್ಲವೇ...
#ನಾನು...
↟↜↝↜↝↟

ಹೂಬನಕೆ ಬೇಲಿಯ ಹೆಣೆದೆ...
ಹೂಗಂಧ ಗಾಳಿಯೊಂದಿಗೆ ಕದ್ದೋಡಿತು, ಬಣ್ಣ ಬೆರಗಿನ ಅಂದ ಬೆಳಕಲ್ಲಿ ಲೀನವಾಯಿತು...
ಬೇಲಿಯೀಗ ಬೇಸರಾದಾಗ ಕೂತೆದ್ದು ಹೋಗುವ ದುಂಬಿ ಕಾಲಿನ ವಿಶ್ರಾಂತಿ ಸ್ಥಂಭ..‌.
ನಾನೋ ಹೊಸೆಯುತ್ತಲೇ ಇದ್ದೇನೆ ಮತ್ತೆ ಹೊಸ ಬೇಲಿಯ...
#ಬೇಲಿ_ಕಾಯುವ_ಬಡವ...
↟↜↝↜↝↟

ಗಂಟು ಕಳಚಿಕೊಳ್ಳಲಿ ಅಂಬುದು ನಂದೇ ಗಟ್ಟಿ ನಿರ್ಧಾರ ಮತ್ತು ನಂಟೂ ಕಳಚಿ ಹೋಗೇಬಿಟ್ಟದ್ದು ನನ್ನ ಶಾಶ್ವತ ನೋವು...
ನಡುಗಡ್ಡೆ ನಡುವಿನ ಒಣ ಮರ...
#ನಾನು...
↟↜↝↜↝↟

ನನ್ನತನವ ಕಾಯ್ದುಕೊಡೋ ಸ್ವಾಭಿಮಾನ ಎದೆಗೂಡಿನ ಒಳಮನೆಯ ಮಿಡಿತ...
ಗೆಲುವಿನ ಭ್ರಮೆ ಮೂಡಿಸಿ ಸೋಲನ್ನು ಎತ್ತಿ ತೋರಿಸೋ ಅಹಂಕಾರ ಹೊರಗಿನ ಕುಣಿತ...
#ನಾನು...
↟↜↝↜↝↟

ಎನ್ನದೇ ಕಣ್ಣಲ್ಲಿ ಎನ್ನ ಹಾದಿಯ ಕಂಡದ್ದಕ್ಕಿಂತ ಜನದ ನಾಲಿಗೆಯ ಮೊನಚಿಂದ ಅಳೆದದ್ದೇ ಯಾವತ್ತೂ... ಹಾಗೆಂದೇ ಅನ್ಸುತ್ತೆ ಆಗೀಗ ಜಗ ಎನ್ನ ಹಣಿದದ್ದಕ್ಕಿಂತ ಆನೇ ಎನ್ನ ಕಾಲಿಗೆ ಉರುಳು ಸುತ್ಕೊಂಡಿದ್ದೇ ಹೆಚ್ಚೇನೋ ಅಂತ...
#ಆನು...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)