ಗೊಂಚಲು - ನಾಕ್ನೂರರ್ವತ್ತೈದು.....

ಈಗಲೂ ಒಬ್ಬನೇ ನಗುತ್ತೇನೆ..... ನಿನಗಾಗಿ ಕಾಯುತ್ತಾ ಬಾಗಿಲಲೇ ನಿಂತಿದ್ದೆ ಅನಾದಿಕಾಲದಿಂದಲೂ - ಎದುರಿನ ಅಗಾಧ ಬಯಲು, ನಿಶಾಂತ ಆಗಸ ಅನಾಯಾಸ ನನ್ನದಾದವು... ನೀ ಬಾರದೇ ಹೋದದ್ದು ಎಂಥ ಮಧುರ ಶಾಪ - ಯೆದೆಯ ಗದ್ದಲಕೆ ಕರುಳ ಮೌನ ಸಂವಾದಿಯಾಗಿ ಉಳಿದದ್ದು ನಿನ್ನದೇ ಅಮೂರ್ತ ಕಲಾಪ... ಎದೆಗೆ ಸಿಕ್ಕಿದ್ದನ್ನು ಕೈಗೆ ಸಿಗದಂತೆ ಎತ್ತರದಲಿ ಎತ್ತಿಟ್ಟು, ಸಿಗಬೇಕಾದ್ದು ಇನ್ನೇನೋ ಇದೆ ಎಂದು ಸಿಗಲಾರದ್ದನ್ನು ಹುಡುಕುವ ಸಿಕ್ಕು ಬದುಕಾಯಿತು... ಪ್ರೇಮ ಕನಸಿಗೆ ಸಲೀಸು - ನೆನಪುಗಳಲ್ಲಿ ಪ್ರೇಮಿಯಷ್ಟೇ ಉಳಿಯುವುದು; ಪ್ರೇಮದ ಬೂದಿಗೆ ಕಣ್ಣು ತುರಿಸುತ್ತಲೇ ಇರುತ್ತದೆ ಕಾಲಕೂ... ನೋಡು, ಮಹಾಕಾವ್ಯಗಳ ತುಂಬಾ ವಿರಹದ್ದೇ ಪಾರುಪತ್ಯ... ಕಾಲನ ತುರಿಕೆಗೆ ಪ್ರೇಮದೌಷಧಿ ಕುಡೀ ಅಂದರು - ಪ್ರೇಮದ ಗಾಯಕ್ಕೀಗ ಕಾಲನಲ್ಲಿ ಮದ್ದು ಹುಡುಕುತ್ತಿದ್ದೇನೆ... ___ ಎಲ್ಲರೊಳಗೂ ಯಾರೋ ಬಂದು ತುಂಬಿಕೊಡುತ್ತಾರೆಂದು ಕಾಯುವ ಮತ್ತು ಎಂದಿಗೂ, ಯಾರೂ ಬಂದು ಭರ್ತಿ ಮಾಡದಿರುವ / ತುಂಬಲಾಗದ ಒಂದು ಖಾಲಿ ಜಾಗ ಅಥವಾ ಖಾಸಗೀ ಮೌನವೊಂದು ಉಳಿದೇ ಇರುತ್ತದೇನೋ... &&& ನಮ್ಮವರು ನಮಗೆ ಬೇಕಾದಂತೆ ನಡ್ಕೋತಿಲ್ಲ ಅಥವಾ ನಾವು ಹೇಳಿದ್ದನ್ನ ಕೇಳ್ತಿಲ್ಲ ಅನ್ನೋ ಅನಗತ್ಯ ಹತಾಶೆಗೂ; ಮತ್ತು ನಮ್ಮವರೇ, ಅವರೇ ಕೊಟ್ಟ ಮಾತಿನಂತೆ, ಅವರೇ ರೂಪಿಸಿದ ದಾರಿಯಲ್ಲವರೇ ನಡೆಯದೇ ಹೋದಾಗ ಅಥವಾ ಅವರೇ ಖುದ್ದು ನಮಗೆ ಅನುಸರಿಸಲು ಹೇಳಿದ ಚಿಂತನೆಯನು ಅವರೇ ಪಾಲಿಸಿಲ್ಲ ಅನ್ನಿಸಿದಾಗ ಒಡಮೂಡುವ ಅಸಹನೆಯ ಸಾತ್ವಿಕ ಕೋಪಕ್ಕೂ ತುಂಬಾನೇ ವ್ಯತ್ಯಾಸ ಇದೆ... ಕೃಷ್ಣ ತತ್ವವನೂ ಚಾಣಕ್ಯ ನೀತಿಯ ಗರಡಿಯಲಿ ಬಲಗೊಳಿಸಿ ಅನುಷ್ಠಾನಗೊಳಿಸಬೇಕಿದೆ ಈಗ; ಕಾರಣ, ಇದು ದ್ವಾಪರವಲ್ಲ, ಕಲಿಗಾಲ... ___ ನಂಬಿಕೆ ಮೂಡಿಸೋದೇನೂ ಕಷ್ಟವಲ್ಲ, ಕಟ್ಟಿಕೊಟ್ಟ ನಂಬಿಕೆಯ ಕಾಲವೂ ಉಳಿಸಿಕೊಳ್ಳೋ ಕ್ಷಾತ್ರವ ಕಾಯ್ದುಕೊಳ್ಳೋದು ಕಷ್ಟ... &&& ಸಾವಿನೆದುರು ಮಾತ್ರವೇ ಮೌನ ಸಂವಾದ ನನ್ನದು - ಅದಕೆಂದೇ ಮೌನವೆಂದರೆ ಶ್ರದ್ಧಾಂಜಲಿ ಅನ್ನುತ್ತೇನೆ... ಬದುಕಿನೊಡನೇನಿದ್ದರೂ ಮಾತೇ ಮಾತು ಎನ್ನದು - ಅದಕೇ ನೋವ ಬಡಿಯಲೂ ತರ್ಕಶಾಸ್ತ್ರದ ಬಡಿಗೆ ಹಿಡಿದು ನಿಲ್ಲುತ್ತೇನೆ... ನಿನ್ನದೊಂದು ಕಿವಿ ಸಾಕಿತ್ತು ಕಣೋ ನನ್ನ ನೂರು ದುಗುಡಗಳು ಹರಿದೋಗಿ ನಾ ಹಗುರಾಗಲು ಅನ್ನುತ್ತಿರುತ್ತಾರೆ, ನೀನು ಈ ಬದುಕಿನ ಪರಮಾಪ್ತ ಜೀವ ಅಂದವರೇ - ವಿಪರ್ಯಾಸ ಅಂದರೆ ಅವರು ಹಾಗನ್ನುವ ಧೈರ್ಯ ಮಾಡುವ ಹೊತ್ತಿಗೆ ನನ್ನ ಮಾತು, ತರ್ಕಗಳ ಇರಿತಕ್ಕವರು ರೋಸಿ ಹೋಗಿ ಬಂಧದೊಳಗಿನ ಭಾವತೀವ್ರತೆ ಇಷ್ಟಿಷ್ಟೇ ಸಾಯುತ್ತಾ ಸಾಗಿ ಬಂಧ ತೀವ್ರ ನಿಗಾ ಘಟಕದಲ್ಲಿ ಉಸಿರು ತೇಕುತ್ತಿರುತ್ತದೆ... ಗೆಳೆತನವೆಂದರೆ, ಹೆಗಲಾಗುವುದೆಂದರೆ ಅಳುವವನಿಗೆ ನಮ್ಮ ಹೆಗಲು ಕೊಟ್ಟು ಕೂರುವುದಲ್ಲ, ಅಳು ರೂಢಿಗತವಾಗದಂತೆ ಕಾಯುವುದು, ಕಹಿಯಾದರೂ ಸತ್ಯವನೇ ಕುಡಿಸುವುದು, ಪ್ರತ್ಯಕ್ಷವೋ ಪರೋಕ್ಷವೋ ನನ್ನ ನಿಲುಕಿನಷ್ಟಾದರೂ ನೋವಿನಿಂದಾಚೆ ಬಂದು ನಗುವ ಹುಡುಕಿಕೊಳ್ಳೋ ದಾರಿಯ ಮತ್ತೆ ಮತ್ತೆ ಹೇಳುವುದು, ಸಾಧ್ಯವಾದಷ್ಟು ಮಟ್ಟಿಗೆ ಅವರ ಆ ಹಾದಿಯಲ್ಲಿ ಜೊತೆಗಿದ್ದು ಸಲಹಿಕೊಳ್ಳುವುದು ಮತ್ತು ಬರೀ ಕಿವಿಯಾಗುವುದು ಅಥವಾ ವಿಷಯ ಸಂದರ್ಭ ಕಳೆದ ಮೇಲೆ ಇನ್ಯಾವಾಗಲೋ ಹೀಗಲ್ಲ ಹಾಗೆ ಮಾಡಬಹುದಿತ್ತು, ನಾನಾದರೆ ಹಿಂಗೆ ಮಾಡ್ತಿದ್ದೆ ಅನ್ನೋದೆಲ್ಲಾ ಆಯಾ ಕ್ಷಣದ ನನ್ನ ಜವಾಬ್ದಾರಿಯಿಂದ ನುಣುಚಿಕೊಂಡೂ ಸುಭಗನಾಗುಳಿವ ಮುಷಂಢಿತನವಲ್ಲವಾ? ಆ ಚಂದಕ್ಕೆ ಆಪ್ತ ಗೆಳೆತನವೇ ಬೇಕಾ? ಅಂತೆಲ್ಲಾ ಒಣ ವೇದಾಂತವ ನಂಬಿ, ನಂಬಿಸಲು ಹೆಣಗುವ ನನ್ನ ಬುದ್ಧಿಯ ಮಾತಿನಾರ್ಭಟಕ್ಕೆ; ಅತ್ತು ಹಗುರಾಗಿ ಎದ್ದ ಜೀವದಲ್ಲಿ ನನ್ನ ಯಾವ ತರ್ಕಗಳ ಹಂಗೂ ಇಲ್ಲದೇ ಹೊಸ ಕನಸು, ಚೈತನ್ಯ ಚಿಗುರಬಲ್ಲದು ಮತ್ತು ಹೆಚ್ಚಿನ ಸಲ ನನ್ನ ಬಿಟ್ಟಿ ಭಾಷಣಕ್ಕಿಂತ ಗಟ್ಟಿ ಭರವಸೆಯನು ಸುಮ್ಮನೇ ಹರಡಿಕೊಟ್ಟ ಮಡಿಲು ತುಂಬಿ ಕೊಡಬಹುದೂ ಅನ್ನೋ ಮನಸಿನ ಮೃದುತ್ವದಾಳದಾಳದಲ್ಲಿನ ಆತ್ಮಾಭಿಮಾನದ ಸೂಕ್ಷ್ಮ ಅರ್ಥವೇ ಆಗಿರದೇ ಪೆಕರನಂತೆ ನಗುತ್ತಿರುತ್ತೇನೆ... ಬಿಡಿ ಹುಟ್ಟಾ ಬರಡು ಮಡಿಲು, ಒರಟು ಹೆಗಲುಗಳ ಪ್ರಾಣಿಯಿಂದ ಏನು ಕಾಳಜಿ, ಏನಂಥ ಆರೈಕೆ ಕಂಡೀರಿ... ___ ಹೃದಯ ಸ್ಥಂಭನ ದೇಹಕ್ಕಾದರೆ ಫಕ್ಕನೆ ಸತ್ತು ಹೋಗುತ್ತೇವೆ - ಬಂಧದ್ದಾದರೆ ಹೃದಯಸ್ಪರ್ಶಿ ಭಾವಗಳು ದಿನೇ ದಿನೇ ಚೂರು ಚೂರೇ ಸಾಯುತ್ತಿರುತ್ತವೆ; ಉಳಿದುಕೊಂಡವರಲ್ಲಿ ಕೊನೆಗುಳಿವುದು ಖಾಲಿತನದ ನರಕಕ್ಕೆ ಗುರುತುಗಳಷ್ಟೇ... &&& ವತ್ಸಾ - ಕೇಳು... ಕೇಳಿದ್ದು ಅರ್ಥವಾದರೆ ಹೇಳು... ಮೌನ ಶ್ರೇಷ್ಠ ಅಂದವರ ಮಾತು ಇಷ್ಟೇ ಇಷ್ಟಾದರೂ ಅರ್ಥವಾದೀತು... ಮೌನ ಶ್ರದ್ಧಾಂಜಲಿ ಅಂದ ನಿನಗೂ ಇಷ್ಟೇ ಇಷ್ಟು ಮಾತು ಸಿದ್ದಿಸೀತು... ಹೃದಯದಿಂದ ಕೇಳು... ಕೇಳಿದ್ದು ಹೃದ್ಗತವಾದರಷ್ಟೇ ಹೇಳು... &&& ಮಳೆಯ ಮುಸ್ಸಂಜೆಗೆ ನೆನಪುಗಳು ತೋರಣ ಕಟ್ಟುತ್ತವೆ... ಮತ್ತೆ ನಗೆಯ ಮಡಿಲಾಗಿ ನೀನು ನಡೆದು ಬಂದೀಯಾ ಎಂದು ಗುಮಿಗೂಡಿದ ಮೋಡಗಳೊಡನೆ ಮಾತಿಗೆ ನಿಲ್ಲುತ್ತೇನೆ... 'ಆಡ್ಮಳೆ ಶುರು ಆತು, ಮಳೆಗಾಲಕ್ಕಿನ್ನೂ ಬಾಳ್ ದಿನ ಇಲ್ಲೆ, ಗೆಡಿದಿನದ ಕೆಲ್ಸ ಶುರು ಇಲ್ಲೆ ನಿಂದಿನ್ನೂವಾ, ಹಿಂಗ್ ಮೋಡ ನೋಡ್ತಾ ಒಬ್ನೇ ನೆಗಿ ಹೋಡೀತಿದ್ರೆ ಅವ್ತ್ಲೆ, ಬದ್ಕ್ ಪೂರಾ ಹಾಳವ್ತು ಕಡೀಗೆ ಒಂದೇ ಸತಿ ಮಳೆ ಹಿಡ್ದೋದ್ರೆ, ಹೊಳೆ ಮ್ಯಾಲ್ ಹೊಳೆ ಹೋದ್ರೂ ಏನೂ ಖಬರಿಲ್ಲೆ ಅಲ್ದಾ ನಿನ್ಗೊಬ್ಬಂಗೆ' ಹಂಗಂತ ಗೊಣ ಗೊಣ ಬೈತಾ ಒದ್ದೆ ಸೌದೀನ ಕೊಟ್ಗೆ ಕಿಬ್ಳಿಗೆ ಜೋಡಿಸ್ತಿದ್ದ ನಿನ್ನ ಮುಖ ನೆನಪಾಗಿ ಕಣ್ಮುಂದೆ ಬಂದೀಗ ಸಣ್ಣಗೆ ನಗುತ್ತೇನೆ - ಈಗಲೂ ಒಬ್ಬನೇ ನಗುತ್ತೇನೆ... ಮಳೆಯ ತಂಗಾಳಿಯೊಂದಿಗೆ ತೇಲಿ ಬಂದು ಕೂಡಲು ಕನಸುಗಳೇನಿಲ್ಲ ಇಲ್ಲೀಗ - ಮೋಡಗಳೂ ನೆನಪುಗಳನೇ ಬಿತ್ತಿ ಓಡುತ್ತವೆ ನನ್ನಂಗಳಕೀಗ... ಹುಚ್ಚುಗಳಿಲ್ಲದೆ ತೀವ್ರವಾಗಿ ಬದುಕಲಾಗದು ಅಂತಿದ್ದವನು ಹುಚ್ಚುಚ್ಚಾಗಿ ಬದುಕಿಯೇ ಇದ್ದೇನೆ ಇನ್ನೂ... ___ ಈಗಲೂ ಒಬ್ಬನೇ ನಗುತ್ತೇನೆ... &&&
ಕೇಳೋ ಇಲ್ಲೀ -
'ಬಿಡುವಾದಾಗ' ಮಾತಾಡಿಸೋಣ ಬಿಡು ಅಂದ್ಕೋಬೇಡ್ವೋ ನೀನು, ನಿನ್ನವರನ್ನೂ...
'ಬಿಡುವು ಮಾಡ್ಕೊಂಡು' ಬಂದು ಒಕ್ಕರಿಸುತ್ತೆ ಕಣೋ ಸಾವು, ಅವರನ್ನೂ ಇಲ್ಲಾ ನಿನ್ನನ್ನೂ...
ತುಂಡಿಲ್ಲದೇ ಲೆಕ್ಕ ಬರೆಯೋ ಚಿತ್ರಗುಪ್ತನೂ ನಿನ್ನ ಬಿಡುವಿನ ಕ್ಷಣಗಳ ಲೆಕ್ಕವನ್ನು ಲೆಕ್ಕಕ್ಕೆ ತೆಗೆದ್ಕೊಳ್ಳೋದಿಲ್ಲ ಆಯ್ತಾ...
ಒಡನಾಡಿ ಒಡಗೂಡಿ ಒಂದಿಷ್ಟು ನಿನ್ನನ್ನ ನೀನು ಜೀವಿಸುವುದಕ್ಕೇಂತ - ಇನ್ನಾದ್ರೂ ಒಂಚೂರೇಚೂರಾದ್ರೂ ಬಿಡುವು ಮಾಡ್ಕೊಳ್ಳೋದ್ನ ಕಲೀ ತೆಳತ್ತಾ...
ಸಾವು, ನೋವನ್ನು ಸಮಾ ಮಾತಾಡಿಸದೇ ನಿನ್ನಲ್ಲಿ ನಿನ್ನ ಬದುಕು ಮಾಗುವ ಮಾತದೆಂತೋ...!!
___ ಉಫ್!!! ಅವಳ ಚಿತ್ರದಲ್ಲಿನ ನಗು ಎಷ್ಟೆಲ್ಲಾ ಮಾತಾಡತ್ತೆ...

ನನ್ನೆದೆಯಲೂ ಉಳಿದದ್ದು ಚಿತ್ರದ ನಗುವೇ...

ಇಂಥದ್ದೇ ಮಳೆ ಮಾಸದ ಒಂದು ಸಂಜೆ, ಧೋಮಳೆಯನೂ ಲೆಕ್ಕಿಸದೇ ಅವಳ‌ ಚಿತೆ ಧಗಧಗಿಸಿ ಉರಿದುಹೋಯ್ತು - ನನ್ನೊಳಗಿನ ಬೆಳಕು ಇಷ್ಟಿಷ್ಟೇ ಸತ್ತುಹೋಯ್ತು... ___ ನೆನಪೀಗ ಮಳೆಗೂ ಆರದ ಉರಿ... *** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರರ್ವತ್ನಾಕು.....

ಪಾರಿಜಾತಕೆ ನೀರುಣಿಸಲು ಬರಬಾರದೇ.....

ಏ ಮನ್ಷಾ -
ನಿಸರ್ಗದ ಪಾವಿತ್ರ್ಯವನ್ನು ಪ್ರಶ್ನೆ ಮಾಡ್ತೀಯಲ್ಲಾ -
ಪವಿತ್ರ (?) ಪ್ರೇಮಿಗಳ ಸ್ವಪ್ನ ಸ್ಖಲನದಲ್ಲಿ ಬದುಕಿನ (ಬೇಲಿಗಳ) ನಶ್ವರತೆಗೆ ಸ್ಪಷ್ಟ ನಿದರ್ಶನ ಮತ್ತು ಸಾಕ್ಷಿ ಸಿಕ್ಕೀತು ನೋಡು...
___ ಭಂಡತನ...
&&&

ಒಳಗಿನ ಕುಲುಮೆಯ ಮಡಿಲಲಿ ಪೊರೆಯುವ ಆತ್ಮ ಸಖಿ ಹಾಗೂ ಅವಳ ತೋಳಲಿ ಮುದ್ದಾಗಿ ಮೀಯುವ ನನ್ನ ಮೋಹದ ನೀಲಿ ನೀಲಿ ಕನಸು... 
___ ಕಾರುಮೋಡದ ತುಂಬು ತಾರುಣ್ಯ ಅವಳು - "ನನ್ನ ಕಪ್ಪು ಹುಡುಗಿ..."

ಭವದಲ್ಲಿರದ ಭಾವಜೀವಕೆ "ಕಪ್ಪು ಹುಡುಗಿ" ಎಂದು ಕರೆದು ನನ್ನ ಮೋಹದ ಭಾವಾತಿರೇಕಗಳ ಆಲಾಪ ಕಲಾಪಗಳನೆಲ್ಲ ತಾರಕದಲಿ ಊರ ಮುಂದೆಲ್ಲ ಹಾಡಿದೆ...
ಈಗ -
'ನಿನ್ನ ಕಪ್ಪು ಹುಡುಗಿ ಮೇಲೆ ಶಣ್ಣಕ್ ಹೊಟ್ಟೆಕಿಚ್ಚು ಮಾರಾಯ' ಅಂತನ್ನುವ ಮುಗುದೆಯರ ಯೆದೆಮೆದುವ ಮಧುರ ಕಂಪನದ ಕಳ್ಳ ಜೋಲಿಯಲಿ ನೂರು ಆಸೆ ಕನಸುಗಳ ಹೆಣೆಯುವ ಹುಟ್ಟಾ ಪೋಲಿ ನಾನು... 😉
___ ಎದೆ ಚೆಲುವ ಕಾ(ಕೂ)ಡಲೆಂದೇ ಕಟ್ಟುವ ನೂರು ಹಗಲುವೇಷಗಳು...
&&&

ಒಂದು ಸಾಲೂ ಹುಟ್ಟದ ಭಾವ ಬರಡು ಜಡ ಸಂಜೆಗಳಲೂ ನಿನ್ನ ನೆನಪು ಸಿಹಿ ಕನಸಿನೆಚ್ಚರದಂತೆ...
ನಿನ್ನ ಬೆರಳ ಭಾಷೆ ಎನ್ನ ಆತ್ಮವನಪ್ಪುವ ತಿಳಿಬೆಳಕ ಬೆತ್ತಲೆ ಇರುಳ ಚೆಲುವೆಂದರೆ ಬೆಳದಿಂಗಳ ಕುಡಿವಾಗ ಪಾರಿಜಾತ ಎದೆ ಮೇಲೆ ಬಿದ್ದಂತೆ...
ನೀ ನನಗಾಗಿ ಎನ್ನೆದೆ ಬಯಲಲ್ಲಿ ಬಲು ಆಸ್ಥೆಯಿಂದ ಬಿತ್ತಿಟ್ಟು ಹೋದ ಒಲುಮೆ ನೆನಪುಗಳಿಗಾಗಿ ಋಣಿ ನಾನು ನಿನಗೆ... 
ನಗುವಾಗಲೆಲ್ಲ ನೆನಪಾಗುವ, ನೆನಪಾದಾಗಲೆಲ್ಲ ಮುಗುಳ್ನಗುವ ಮೂಡಿಸುವ, ಎನ್ನ ಭಾವದೊಳಮನೆಯ ನಗುವೇ ಆಗಿ ಜೊತೆಯಾಡುವ ನಿನಗಿದೋ ಯೆದೆಯಾರ ಧನ್ಯವಾದವು...
___ ನೆನಪು ಅನುಭಾವದ ನಗೆಯ ಚಿತ್ರ ಶಾಲೆ... 🥰🥳
&&&

ಕರಿಯಾ -
ಬೃಂದಾವನಕೆ ವಸಂತ ಕಾಲಿಡುವಾಗ, ಎಳೆ ಬಿಸಿಲು ಯಮುನೆಯ ನಡು ಬಳಸಿ ನಡೆವಾಗ, ಕೊಳಲ ದನಿಯ ಕರಗಳು ಬಳಸಿ ಗೋಪಿಯರೆದೆ ಬಿ(ಗಿ)ರಿಯುವಾಗ - 
ಅತ್ತ ಇತ್ತ ಎತ್ತೆತ್ತ ಕಣ್ಣೆತ್ತಿ ನೋಡಿದರೂ ಚಿತ್ತ ನಿನ್ನನೇ ಭ್ರಮಿಸುವುದು...
ಹೊತ್ತಿಸಿಟ್ಟ ಕಂದೀಲಿನ ಮಂದ ಬೆಳಕಿನ ಸೋಪಾನದ ಮೇಲೆ -
ಹೂ ಚಿಟ್ಟೆ ಕನಸುಗಳಿಗೆ ನೀನಿತ್ತ ಸಿಂಗಾರ ಸೊಬಗನ್ನು ಈ ಹೆಣ್ಣೆದೆ ನಗುವಾಗಿ ಸಂಭ್ರಮಿಸುವುದು...
___ ಪಾರಿಜಾತಕೆ ನೀರುಣಿಸಲು ಬರಬಾರದೇ...
&&&

ನಮ್ ಬದ್ಕು ಅತಿ ಹೆಚ್ಚು ಪಾಠ ಹಾಗೂ ಪಕ್ಕಾ ಬುದ್ಧಿ ಕಲ್ಯೋದು ನಮ್ದೇ ತಪ್ಪುಗಳಿಂದ್ಲೇ ಕಣೋ ಅಂದ್ಲು...!!
ಸರಿ, 
ನಡಿ ಹಂಗಾರೆ, 
ಇಬ್ರೂ ಸೇರಿ ಒಂದಷ್ಟು ಸಿಹಿ ಸಿಹಿ ತಪ್ಪುಗಳ ಮಾಡಿ ಪಾಪಗಳ ಹಂಚ್ಕೊಳ್ಳೋಣ ಅಂದೆ...
ಇಷ್ಟ್ ದೊಡ್ಡ ಕಣ್ಣು ಬಿಟ್ಟು ಗುರ್ರ್ರ್ರ್ ಅಂತಿದಾಳೆ...
ನಾನೇನು ತಪ್ಪು ಹೇಳಿದ್ನಾ... !!!
____ಮಧುರ ಪಾಪಕ್ಕೆ ಹಾತೊರೆವ ಮಳೆ ಸಂಜೆಗಳು...
&&&

ಬೇರೆ ನೂರು ಭಾವಗಳಿಗೆ 'ಪ್ರೇಮ' ಎಂದು ಹೆಸರಿಟ್ಟು ಅರ್ಧನಾರೀಶ್ವರ ಕಥೆಯ ಹಾಡಿ, ರಾಧೆ, ಕೃಷ್ಣರ ಕವನ ಗೀಚಿದಷ್ಟು ಸರಳವಲ್ಲ ನಿಜದ ಪ್ರೇಮವನೇ ಜೀವಿಸಿ ಅವರಂತಾಗುವುದು...
___ ಹೆಸರಿಡದೇ ಉಸಿರೂಡಿದಾಗ ಒಡಮೂಡುವ ಜೀವರಾಗ...
&&&

ಧೋಮಳೆಯ ಸಂಜೆಗಳಿಗೆ ಅವಳ ಮುನಿಸು ಬಲು ದುಬಾರಿ...
ಇರುಳ ಬಾಗಿಲಲಿ ಎಷ್ಟು ಮುತ್ತಿನ ಕಂದಾಯ ಕಟ್ಟಿದರೆ ಸಜ್ಜೆಮನೆಯಲಿ ಬೆತ್ತಲು ಕತ್ತಲನು ಸಿಂಗರಿಸೀತು - ಉಸಿರ ಬಿಸಿಯಲ್ಲಿ ಮೌನ ಬೆವರಾಗಿ, ಮಾತು ನಲುಮೆಯ ಮಂಟಪ ಕಟ್ಟೀತು...
___ ಮೋಹಾ(ಪ್ರ)ಲಾಪ...
&&&

ಸಂಜೆಯಾಗುವ ಸರಿ ಹೊತ್ತಿಗೆ ಮೋಡಗಟ್ಟುವ ಜೀವ ಭಾವ - ಇರುಳು ಇಳಿವ ಕಾಲಕ್ಕೆ ಕನಸಲ್ಲಿ ನಿನ್ನ ತಡಕಾಡುತ್ತದೆ - ನಿನ್ನೊಡನಾಡುವ ಏಕಾಂತ ಸಂಗಾತವಿಲ್ಲದೇ ಸುರಿವ ಮಳೆಗೆ ವಿರಹ(ಹರೆಯ)ದುರಿ ಆರುವುದಿಲ್ಲ... 
___ ನಿನ್ನ ಅನುಪಸ್ಥಿತಿ ಮತ್ತು ನವಿರು ಕಂಪನಗಳಿಗೂ ಕಂಬಳಿಯನ್ನೇ ಹೊದೆಯಬೇಕಾದ ನನ್ನೀ ಹರೆಯದ ನೀರಸ ನಿಶೆ... 🫢

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರರ್ವತ್ಮೂರು.....

ಗಳಿಕೆ, ಉಳಿಕೆಗಳ‌ ತೂಕ.....

ವತ್ಸಾ -
ಎಲ್ಲರನೂ ನಗಿಸುವ ನಿನ್ನ ಗುಣ ನಿನ್ನೊಳಗಿನ ನೋವನು ಚೂರೂ ಅಳಿಸಿಲ್ಲ ಅಥವಾ ಕ್ಷಣಕಾದರೂ ಮರೆಸಿಲ್ಲ ಅಂದ್ರೆ ನಗಿಸೋದು ನಿನ್ನ ವೃತ್ತಿ ಅಂತನ್ನಿಸುತ್ತೆ...
ನಗಿಸೋದು ಹಾಗೂ ನಗೋದು, ನಗುವವನ ಮತ್ತು ನಗಿಸೋನ ವೃತ್ತಿ ಆಗಬಾರದು ಪ್ರೀತಿ ಆಗ್ಬೇಕು ಅಲ್ವಾ...
___ ನಗುವಾಗ ಮಗುವಾಗು...
&&&

ಶ್ರೀ -
ಶಾಂತಿಯನ್ನು ಹುಡುಕಿ ಹೊರಡಬೇಡ - ಶಾಂತವಾಗಿ ಬದುಕುತ್ತ ಹೋಗು ಅಷ್ಟೇ...
ನಿನ್ನೆಗಳೂ, ನಾಳೆಗಳೂ ಇದ್ದುಕೊಳ್ಳಲಿ ಅವಿದ್ದಂತೆ - ಇಂದಿಗವುಗಳ ಚಿಂತೆ ಬೇಡ ಅಷ್ಟೇ...
ಇಂದು ನಿನ್ನೆಯಂತಿಲ್ಲ, ನಾಳೆಯೂ ಇಂದಿನಂತಿರುವುದಿಲ್ಲ - ಹಾಗೆಂದೇ, ನೆನಪು, ಕನಸುಗಳು ಇಂದಿನ ಪ್ರೀತಿಯಾಗಬೇಕು, ನರಳಿಕೆ, ಕನವರಿಕೆಗಳಲ್ಲ...
___ ಜೀವಿಸುವ ಧ್ಯಾನ...
&&&

ವತ್ಸಾ -
ಪ್ರೀತಿಸಲ್ಪಡುವ ಬಯಕೆ ತಂದೊಡ್ಡುವ ನೋವುಗಳಿಂದ ಬೇಷರತ್ತಾಗಿ ಪಾರಾಗಬೇಕಾ...?
ಒಂದೇ ಉಪಾಯ - ಬೇಷರತ್ತಾಗಿ ಪ್ರೀತಿಸುವುದನು ಕಲಿತುಬಿಡು...
___ ಪ್ರೀತಿಯ ಉಪದೇಶ...
&&&

ಇದ್ದು ಯಾರಿಗೂ ಲಾಭಿಲ್ಲೆ
ಹೋಗಿ ಏನೂ ನಷ್ಟ ಇಲ್ಲೆ
ಅಲ್ಲಿಗೆ 
ಎನ್ನ ಬದುಕಿನ ನಗು ಪೂರಾ ಪೂರಾ ಎಂದಷ್ಟೇ, ಎನಗಷ್ಟೇ...
___ ಗಳಿಕೆ, ಉಳಿಕೆಗಳ‌ ತೂಕ...
&&&

ಇಲ್ಲಿ -
ಸಾವಿಗಾಗಿ ಕಾದವರು ಕಾದೇ ಇದ್ದಾರೆ...
ಬದುಕಿಗಾಗಿ ಕನಸಿದವರು ನೆನಪಾಗಿ ಹೋದರು...
___ ಯಾವ ಹಾವು....... ಯಾವ ಏಣಿ....... ಆಟ ಯಾರದು.......
&&&

ವತ್ಸಾ -
ಹೆಣದ ನಿಶ್ಚಲ ಕಣ್ಣಲ್ಲೊಮ್ಮೆ ಕಳೆದು ಹೋಗು - ಮೌನದ ರುದ್ರ ತಾಂಡವ ಯೆದೆಯ ತುಳಿದು, ಮಾತಿನ ಘನತೆ, ಪ್ರೀತಿಯ ಎತ್ತರ ಬದುಕಿನ ಭಾಷೆಯ ಬೆಳಗಲಿ...
ಕೇಳು -
ಹೇಳಲೇನೂ ಉಳಿದಿಲ್ಲದ ಭಾವ ಕಾಡುವಲ್ಲಿ ಬದುಕು ತುಂಬಾನೇ ಹೇಳುತ್ತಲಿರುತ್ತದೆ...
___ ಮಸಣ ವೈರಾಗ್ಯ ಮನವ ತೊಳೆಯಲಿ...
&&&

ಒಂದು ವಾಕ್ಯದಲ್ಲಿ ಪ್ರಶ್ನೆಯನ್ನೂ ಕೇಳೋಕೆ ತಿಳಿಯದವನು ಒಂದೇ ಮಾತಲ್ಲಿ ಉತ್ತರ ಹೇಗೆ ಹೇಳಿಯಾನು...
___ ಬದುಕು ನೂರಾರು ಗ್ರೀಷ್ಮ, ವಸಂತಗಳ ಮೀರಿದ ಹಾಡು...

ರೆಕ್ಕೆ ಬಲಿಯುವವರೆಗೆ ಮಾತ್ರ ಹಕ್ಕಿ ಗೂಡಿಗೆ ಸ್ವಂತ ಸ್ವಂತ...
ರೆಕ್ಕೆ ಬಲಿತ ಮೇಲೆ ಅದು ಬಾನಿಗೂ ಸ್ವಂತ...
___ ಸಂಸಾರ ಸಾರದ ಸಣ್ಣ ತಿಳುವಳಿಕೆ...
&&&

ನನ್ನ ನಶೆಗಳಲಿ ನನ್ನ ಪಾಡಿಗೆ ನಾನು ಆರಾಮಿದ್ದೇನೆ...
ನನ್ನನೆಚ್ಚರಿಸೋ ಹುಕಿಗೆ ಬಿದ್ದು ಎಚ್ಚರ ತಪ್ಪಬೇಡಿ...
&&&

ನನ್ನ ದೇಹದ ಸಾವಿನ ಸೂತಕ ನನಗಿಲ್ಲ...
ಆದ್ರೆ,
ನನ್ನ ಭಾವ ಸತ್ತ ಸೂತಕವ ಮಾತ್ರ ನಾನೇ ಸೈರಿಸಬೇಕು...
___ ಅವರು ಕೊಂದದ್ದಾದರೂ, ನಾನೇ ಕತ್ತು ಹಿಸುಕಿದ್ದಾದರೂ...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರರ್ವತ್ತೆರ್ಡು.....

ದಿನವೆಂಬ ಕಾವ್ಯ ಸಂಪುಟದ ಚಂದ ಮುನ್ನುಡಿ - ಬೆಳಗು.....

ನೇಹವೇ -

ಬೆಳಕಿಗೆ ನಿನ್ನ ಹೆಸರಿಟ್ಟೆ - ಪ್ರೀತಿ ಎದೆಯ ತುಂಬಿತು...

ಪ್ರೀತಿಗೆ ಇನಿತು ಉಸಿರ ಕೊಟ್ಟೆ - ಬದುಕೇ ನಗೆಯ ಬೆಳಕಾಯಿತು...

ಬೆಳಗೆಂದರೆನಗೀಗ ನನ್ನ ನಗುವ ಸಲಹುವ ನಿನ್ನ ಪ್ರೀತಿ ಮಡಿಲು...

ಕಲ್ಲೆದೆಯೂ ಹೂವ ಬೇರನು ಕಾಯುವ ದೀಪಕರಾಗ ಬೆಳಗು...

ಶುಭದಿನ... 🤝🫂

ಸುಮ್ಮನೆ ಧಾರೆ ಸುರಿವ ಬೆಳಕು 

ಒಲಿದು ಒಳಮನೆಗೂ ಬರಬೇಕು 

ಹಾಗಂತ ಬಯಸಿದರೆ

ಯೆದೆಯ ಬಾಗಿಲನು ನಾನೇ ತೆರೆದಿಟ್ಟು ಕಾಯಬೇಕು...

ಬೆಳಕೇ ಆಗಲು 

ಬೆಳಕಿನೆದುರು ಬಯಲಾಗಬೇಕು / ಬಯಲೇ ಆಗಬೇಕು...

ಪ್ರೀತಿಯಾ ರೀತಿಯೇ ಬೆಳಗು... 

ಶುಭದಿನ...🤝🫂

ಬೆಳಕಿನ ಕಿರು ಸ್ಪರ್ಷಕೆ

ಪ್ರೀತಿಯ ಹೂ ಅರಳಿ

ಗಾಳಿಯ ರಥವೇರಿ ಘಮವು

ಬಯಲಿಗೆ ಸ್ವಂತವಾಯಿತು / ಸ್ವತಂತ್ರವಾಯಿತು..‌.

ಬೆಳಗಾಯಿತು...

ಶುಭದಿನ... 🪻🦋

ಪ್ರತಿ ಹಗಲಿಗೂ ಹೂವಿಂದ ಹುಳದವರೆಗೂ ಒಂದು ಹೊಸ ಸಂಭ್ರಮ, ಉತ್ಸವದ ಉಲ್ಲಾಸದ ಗಡಿಬಿಡಿ...

ಪ್ರಕೃತಿಯ ಸುಧಾರಿತ ತಳಿ ನಾನು, ಒಂದು ಸಣ್ಣ ನಗುವ ದುಡಿದುಕೊಳ್ಳಲು ನನ್ನಲ್ಲಿ ಯಾಪರಿ ಮಿಜಿಮಿಜಿಯ ಹಡಾಹುಡಿ...

ಸಹಜತೆಯ ಬದುಕಲರಿಯದವನ ಶ್ರೇಷ್ಠತೆಯ ಪೊಕ್ಕು ಅಮಲು ಎಷ್ಟೊಂದು ದುಬಾರಿ...

ಅರಿವು - ಬೆಳಗು... 🤝🫂

ಹೂವಿನೆದೆಯಲೀ, ದುಂಬಿ ತುಟಿಯಲೀ ನಿಸರ್ಗ ಕಟ್ಟಿದ ಪ್ರೇಮದ ಗೂಡನು ಬೆಳಗು ಬೆಳಕನೂಡಿ ಕಾಯುತ್ತದೆ...

ಒಂದು ನಗು ನೂರಾಗಿ ಹರಡುವ ಕಾಡು ಕಾವ್ಯಕ್ಕೆ ಬೆಳಕು ಸಾರಥಿಯಾಗುತ್ತದೆ...

ಬೆಳಗೆಂಬೋ ಕನಸ ಹಸಿವಿನ ಹಾಡು...

ಶುಭದಿನ... 🤝🫂

ಪಾಪ!! 

ಅಲ್ಯಾರಿಗೂ ವಾರದ ರಜೆಯೂ ಇಲ್ಲ...

ಅಥವಾ

ರಜೆಯಿಲ್ಲದ ಬೇಸರವೂ ಗೊತ್ತಿದ್ದಂತಿಲ್ಲ - ಮಜವಾಗಿರಲು ಅಲ್ಲಿ ರಜೆ ಬೇಕಿದ್ದಂತಿಲ್ಲ...

ಬೆಳಗುವುದು, ಅರಳುವುದು, ಸುತ್ತಣ ಸಣ್ಣ ಮಿಸುಕಾಟವನೂ ಆತ್ಮದ ಹೊನಲುಕ್ಕಿ ಸಂಭ್ರಮಿಸುವುದು ನಿತ್ಯದ ಸರಳ, ಸಹಜ ನೇಮ/ಪ್ರೇಮ...

ಬಯಲಿಗೆ ಬಿದ್ದವರ ಅರೆ ಕ್ಷಣಕೂ, ರವಷ್ಟೂ ಜಡವಾಗದ ಜೀವ ಭಾವ ಚೈತನ್ಯದ ಮೂಲ ಪ್ರೀತಿ ಯಾವುದದು...!!

ಅಥವಾ 

ಮುಕ್ತ ಪ್ರೀತಿಯೇ ಮೂಲಧಾತುವಹುದಾ - ನಿಮಿತ್ತವಹುದಾ...!!

ಬೆರಗು ಅಲ್ಪನ ಬೆಳಕು...

ಬೆಳಗು... 🪻🦋🌦️

ಇಳಿಯದ ಇರುಳ ಉತ್ಸವದ ನಶೆಯ ಕಿರು ಕಂಪನಗಳಲಿ ಮತ್ತೆ ಮತ್ತೆ ಆಲಸ್ಯದ ಮೈಮುರಿದು, ಅಯಾಚಿತದಿ ಗುಟ್ಟಿನ ಗಾಯಗಳ ಮೆಲ್ಲ ಸವರಿ, ಮೈಮನದ ಬೆಚ್ಚಾನೆ ಸಂಭ್ರಮಕೆ ಚವರಿ ಬೀಸಿಕೊಳ್ಳುವ ರಸರಾಜಿ ಬೆಳಗು...

ಮಧುಮತ್ತ ಶುಭದಿನ... 🪻🦋

ಗೆಲುವಿನ ಕನಸು, ಗೆಲುವಿನದೇ ನಶೆ ತೂಗುವ ತುಂಬಿದ ಕಂಗಳ ಬಣ್ಣಾ ಬೆಡಗಿನ ಬೆಳಗು...

ಶುಭದಿನ... 🤝🫂

ಹೂವ ಮೈತುಂಬಾ ಹರಿದು, ತನ್ನುಸಿರ ಬಿಸಿಯ ಸುರಿದು, ಮೈಛಳಿ ಕಳೆದು ಅಪಾದಮಸ್ತಕ ಅರಳಿ ನಿಲ್ಲುವ ಹೂವಿನಂದ ಗಂಧವ ಜಗಕೆ ಪರಿಚಯಿಸಿ ನಲಿವ ಬೆಳಗು ಬೆಳಕು...

ದುಂಬಿ ಕಣ್ಣಲಿನ ಪ್ರಣಯದಾಸೆಗೆ ಬಿರಿದ ಹೂವಿನದೇ ಬಣ್ಣ - ದುಂಬಿ ಸ್ಪರ್ಷಕೆ ಮೈಮರೆತ ಹೂಗರ್ಭದಲಿ ಕಾಯಿ ಕದಲುವ ಕನಸು...

ಹೂವೇ ನೀ ಹಂಬಲಿಸೋ ಗೆಳೆತನದಲಿ ನಲ್ಲನ ಪಟ್ಟ ಯಾರಿಗೆ...?! 

ಪ್ರಶ್ನೆಗಳ ಲೆಕ್ಕಿಸದೇ ಬೆರಗನಷ್ಟೇ ಉಳಿಸಿ ನಗುವ ಸಹಜ, ಸರಳ, ಪ್ರಚ್ಛನ್ನ ಬೆಳಗು...

ಶುಭದಿನ... 🪻🦋

ಬೆಳಕಲೇ ಬದುಕುವ 

ಬೆಳಕನೇ ಹುಡುಕುವ 

ಬೆಳಕಿನ ಕುಡಿಗಳ

ಬೆಳಗಿನ ಕಲರವ - 'ಬೆಳಗಾಯಿತು, ಎದ್ದು ಹೊರಡಿ ಬೆಳಕಿನ ಕೊಯ್ಲಿಗೆ...'

ಬೆಳಕಿಗೂ ಬೆಳಕಿನದೇ ಹಸಿವಿದ್ದಂತಿದೆ...!!

ಶುಭದಿನ...🤝🫂

ಜಗದ ಮಾಯೆ ಮತ್ತು ನಶ್ವರತೆಯನು ಕನ್ನಡಿ ಹಿಡಿದು ತೋರಿ ನಾನೆಂಬ ನನ್ನಹಂಕಾರಕೆ ಮದ್ದರೆಯಲು ಹೆಣಗುವ ರುದ್ರ ರಮಣೀಯ ಬೆಳಗು...

ಬೆಳಗಾಯಿತು - ಹೊಸ ಅಂಕಕೆ ಬೆಳಕಿನ ಸಂಕಲನ...

ಗಿರಿ, ಗವಿಗಳ ಕತ್ತಲ ಏಕಾಂತದಲಿ ಎಲ್ಲರೂ ಹುಡುಕುವ ಬೆಳಕು 

ಸಂತೆ, ಜನ ಜಾತ್ರೆಯಲಿ ಮಿಂಚಂತೆ ಹೊಳೆವ ಪ್ರೀತಿಯಲಿ ಅಡಗಿ ನಗುತಿತ್ತು...

ದರ್ಶನ ಬೆಳಗು...

ಶುಭದಿನ...

ಸೂರಿಲ್ಲದ ಮಸಣದ ಮೇಲೂ ಬೆಳಕು ನೂರು ಲಾಸ್ಯವನಾಡುತ್ತದೆ...

ಸೂತಕದ ಮನೆಯಲೂ ನಿದ್ದೆ ಮರುಳಲ್ಲಿ ಮಗು ದೇವನಗೆಯ ನಗುತ್ತದೆ...

ಕನಸಿನೆಚ್ಚರ, ಕನಸು-ಎಚ್ಚರ, ನಶ್ವರತೆಯಲೇ ಈಶ್ವರತೆಯ ಸತ್ಯ...

ನಿಟ್ಟುಸಿರು - ಕಟ್ಟುಸಿರಲಿ ಮತ್ತೆ ಮತ್ತೊಂದು ಬೆಳಗು...

ಶುಭದ ಪ್ರಾರ್ಥನೆ...🫂🤝

ಬೆಳಕನು ಪ್ರೀತಿಸು ಸುಮ್ಮನೆ

ಬೆಳಕಾಗಲಿ ಪ್ರೀತಿಯ ಒಳಮನೆ...

ಬೆಳಗು - ಪ್ರೀತಿಯ ಸಂರಚನೆ...

ಶುಭದಿನ... 🫂🤝

'ಬೆಳಕು ಪ್ರೀತಿಯ ತಬ್ಬಿ, ಪ್ರೀತಿ ಬೆಳಕನು ಹಬ್ಬಿ, ನಗೆಯ ಭುವನ ಸಂಚರಣ...'

ಬೆಳಗಾಯಿತು - ಹೂವರಳುವ ಸದ್ದಿಗೆ ದುಂಬಿ ತುಟಿಕಚ್ಚಿತು...

ಶುಭದಿನ... 🪻🦋🫂

ಯೆದೆಯ ಕಣ್ಣ ಹನಿಯ ಕಲೆಯ ಜಗವು ಕಾಣದ ಹಾಗೆ ಮೊಗವ ತಿಕ್ಕಿ ತಿಕ್ಕಿ ತೊಳೆದು, ಕನ್ನಡಿಗೂ ತಿಳಿಯದಂಗೆ ಗಡಿಬಿಡಿಯಲಿ ನಗೆಯ ಅಲಂಕಾರ ಮಾಡಿಕೊಂಡು, ಸುಳ್ಳೇ ಆದರೂ ಗುಣಾತ್ಮಕ ಭಾವದಲಿ ಬೆಳಕನು ಎದುರುಗೊಂಡರೆ ಅಲ್ಲಿಗೊಂದು ಮಹಾಸಭ್ಯ ಬೆಳಗು ಸಂಪನ್ನ...

'ನಾನು' ಉಳಿದು ನಾನುಳಿವ ಶುಭದಿನದ ಶುಭಾರಂಭ...🤝🫂

ಎಳೇ ಬೆಳಕಿಗಿಷ್ಟು ಎಳೆ ಎಳೆ ನಗೆಯ ಬಣ್ಣವ ಬಳಿದು ಬಯಲಿಗೆ ಬಿಟ್ಟೆ...

ಊರ ಹಾದಿ ಬೀದಿಯ ತುಂಬಾ ಎನ್ನ ಕಣ್ಣ ತಣಿಸುವ, ಎದೆಗೆ ಬಿಸಿ ತುಂಬುವ ಬಣ್ಣಾ ಬಣ್ಣಗಳ ಕಾಮನಹಬ್ಬ...

ಬೆಳಗು - ವಸಂತ ಪರ್ವ...

ಶುಭದಿನ... 🤝🫂

ತನ್ನ ಸೋಕಿದ ಬೆಳಕಿನ ಸಣ್ಣ ಕಿಡಿಗೂ 'ನೀ ಸೋಕಿದಷ್ಟೂ ನಿನ್ನ ಮಡಿಲಿಗೇ' ಎಂಬಂತೆ ಅಷ್ಟು ಭಾಗ ಭಾವ ಬೆರೆತು ಕರಗುವ ಕತ್ತಲ ಸಮರ್ಪಣೆ...

ತಾನು ತಾಕಿದ ಹಿಡಿ ಕತ್ತಲಿಗೂ ತನ್ನದೆಲ್ಲ ಅಂಶ ಬಸಿದು 'ನಿನ್ನ ಸೋಕಿದೆ, ಇನ್ನೀಗ ನೀನೂ ನಾನೇ ಆದೆ' ಎಂದು ಕರಿಗತ್ತಲ ಕುರುಡಿಗೆ ಕಣ್ಣಾಗುವ ಬೆಳಕಿನೆದೆಯ ಪ್ರೀತಿ...

ಹಗಲು (ಬೆಳಕು), ಇರುಳೂ (ಕತ್ತಲು) - ನಿರಾಕಾರ ಪ್ರೀತಿ ಸಂರಚನೆ...

ಶುಭದಿನ... 🫂🤝

ಬೆಳಕು ಎನ್ನ ನೆತ್ತಿ ಸವರಿ ಮರುಳಾ ಎಂದು ನಕ್ಕರೂ,

ಆನು ಮತ್ತೆ ಬೆಳಗಾಯಿತೆಂದು ನಲಿವುಕ್ಕಿ ನಕ್ಕರೂ,

ಪ್ರೀತಿ ಯಾನಕೆ ಶುಭದ ಬಾಗಿಲು ತೆಗೆದಾಂಗೆಯೇ ಲೆಕ್ಕ...

ಬೆಳಕು ಮೈದೋರುವುದೆಂದರೆ ಶುಭವರಳುವುದು - ಯೆದೆಯ ನಗುವೆಂದರೆ ಪ್ರೀತಿಯ ಬೆಳಕೇ ಬೆಳಕು...

ನಿಮಗೆ ತಮಗೆಲ್ಲಾ ಹೆಗಲು ತಬ್ಬಿದ ಪ್ರೀತಿ ಪ್ರೀತಿ - ಶುಭದಿನ... 🤝🫂

ಅವಳ ನೆನಪಿನ ಜಾಡನು, ಅವಳ ನೆನಪಿಸೋ ಹಾಡನು ಎನ್ನೆದೆಯು ಮಗುವು ಕಾಗುಣಿತವ ಉರುಹೊಡೆವಂತೆ ಬಿಡದೆ ತಾರಕದಿ ಗುನುಗುವುದನು ನೋಡಿ ಬೆಳಗು ಊರಗಲ ನಗುತಿದೆ...

ಎನ್ನ ಕಪ್ಪು ಹುಡುಗಿಯ ಕಾಡಿಗೆ ಕಣ್ಣ ಕಾವ್ಯದಲಿ ಬೆಳಕು ಮರುಜನುಮ ಪಡೆದಂತಿದೆ...

ಇನ್ನಿದು ಶುಭದ ಹಾದಿಯೇ ಸರಿ...

ಶುಭದಿನ... 😍🫂

ನೀ ಸುಳಿವ ಕನಸಿನಲ್ಲೂ ಬೆಳಕ ಬೀಜಗಳಿವೆ...

ಭರಪೂರ ನಗೆ ಫಲದ ಉಲ್ಲಾಸೀ ಬೆಳಗು...

ಶುಭದಿನವೇ ಸೈ... 🤝🫂

ಮತ್ತು ನಾ ಹೇಳೋ ಪಾಠ ನಾನನುಸರಿಸಲೆಂದಲ್ಲ, ನನ್ನ ಅನುಭವ ನನ್ನ ಬೆಳಸಲಲ್ಲ ನಿನ್ನ ನಿರ್ದೇಶಿಸಲೆಂದಷ್ಟೇ ಅಂದುಕೊಳ್ಳೋ 'ನಾನು...'

ನನ್ನನೂ ಸೇರಿಸಿಯೇ ಬಡಿಯುವ ಬದುಕು ಹಾಗೂ ಇಂಥ ಎನ್ನ ಹುಂಬ ಮರುಳು ದೊಂಬ್ರಾಟ ನೋಡಿ ಒಳಗೊಳಗೇ ನಗುವ ಬೆಳಗು...

ಒಳಗಿನ ಬೆಳಕು ತೋರುವ ನಗುವ ಕಲಿಬೇಕು ನಾನು...

ಬೆಳಗು ಶುಭವಾಗಬಹುದು... 🤝🫂

ಪ್ರೀತಿಯ ಭಾಷೆ ಯಾವುದು...? ಗೊಂದಲದಲ್ಲಿದ್ದೆ...

ಬೆಳಕಿನ ಸ್ಪರ್ಷಕೆ ಅರಳಿದ ಹೂವು ಗಾಳಿಗೆ ಗಂಧ, ದುಂಬಿಗಳ ತುಟಿಗೆ ಮಧು ಬೆರೆಸಿ, ಹೂವ ಹಡೆದ ಬೇರು ಮತ್ತೆ ತೊಟ್ಟಿಲ ಕನಸು ಕಾಣುವಾಗ, ಬಯಲ ತಬ್ಬಿದ ಬೆಳಗು ಸಣ್ಣಗೆ ತೇಗಿದಂತನಿಸಿತು...

ಅಲ್ಲೇ ಉಳಿದ ಮತ್ತದೇ ನೂರು ಗೊಂದಲಗಳ ಮರೆತು ಬೆರಗನು ಬಾಳುವಲ್ಲಿಗೆ ಬದುಕಿನ ಭಾವಬಳ್ಳಿಯ ಸರಳ ಸೊಬಗಿನ ಪ್ರೀತಿಗೆ ಬಿದ್ದೆ...

ಶುಭದಿನ... 🤝🫂

ಬೆಳಕಿಗೂ ಹೂವ ಘಮವಂಟಿರಬಹುದು...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರರ್ವತ್ತೊಂದು.....

ಬೆಳಗೆಂಬ ಕಾವ್ಯ ಕುಸುರಿ... 🪻🦋 'ಬೆಳಕು' ಅಮ್ಮನಂತೆ... 'ಅಮ್ಮ' ಬೆಳಕಿನಂತೆ... ಅವಳ ಸಣ್ಣ ನೆನಪೂ ಶುಭ ನುಡಿವ ಬೆಳಕಿನ ನೂರು ಕಿಡಿಗಳಂತೆ... 'ಬೆಳಗು' ಅಮ್ಮನಂತೆ... ಶುಭದಿನ... 🤱💞 ನವಿಲ್ಗರಿಯ ತೀಡಿದ ಬೆರಳೇ ಸುದರ್ಶನವ ಆಡಿಸಿತು - ಪ್ರೀತಿ ಮತ್ತು ಶಾಂತಿಯ ನಗುವ ಕಾಯಲು... ಕೊಳಲು ಮತ್ತು ಪಾಂಚಜನ್ಯ ಪರಮಾಪ್ತ ಗೆಳೆಯರು - ಪ್ರೀತಿಯ ಯಜಮಾನ್ಯದಲಿ... ಶುಭವೇ ನಿರೀಕ್ಷೆ - ಶುಭವೊಂದೇ ಹಾರೈಕೆ... ಶುಭದಿನ... 🤝🫂 ಎಂಥಾ ಅಕಾಲ ಮಳೆಯ ಹೊಡೆತಕ್ಕೆ ಕೂಡಾ ನೆನಪುಗಳು ತೊಳೆದೋದ ದಾಖಲೆ ಇಲ್ಲ ನೋಡು... ಪ್ರತಿ ಬೆಳಗಿನ ನಿದ್ದೆಗಣ್ಣನುಜ್ಜುವ ನಿನ್ನ ನೆನಪಿನ ಹೊಳಪಷ್ಟೇ ನನ್ನ ಅನುಗಾಲದ ಆಸ್ತಿ... ನೆನಹುಗಳಲಿ ಕಳೆದು ಹೋಗುತ್ತೇನೆ ಮತ್ತು ನೆನಹುಗಳಿಂದಲೇ ನನಗೆ ನಾನಿಷ್ಟು ಉಳಿದುಕೊಂಡಿದ್ದೇನೆ... ನೆನಪಿನೌತಣ ಬೆಳಗು... ಶುಭದಿನ... 🤝🫂 ಪ್ರೀತಿ ಪರಿಭ್ರಮಣದಲಿ ಯೆದೆಯಿಂದ ಹರಿವ ಕಾರುಣ್ಯದ ಬೆವರು - ಬೆಳಕು... ಬೆಳಗಾಯಿತು - ಪ್ರೀತಿ ಹೊಳೆಯಾಗಲಿ... ಶುಭದಿನ... 🤝🫂 ಈ ರುದಯ ಕಮಂಡಲದಿಂದ ಆ ಯೆದೆಯ ಬೊಗಸೆಗೆ ಬಿದ್ದ ಹನಿ ಹನಿ ಪ್ರೀತಿಯೂ ಅಕ್ಷಯವಾಗಿ ಎರಡೆರಡು ಬದುಕ ಬಳ್ಳದ ತುಂಬಾ ನಗೆಯ ನಗ ನಾಣ್ಯ... ಬೆಳಗೆಂದರೂ, ಬೆಳಕೆಂದರೂ ಧಾರೆ ಧಾರೆ ಅಲೆ ಅಲೆ ಪ್ರೀತಿ ಅಕ್ಷಯಾಂಬುಧಿ... ಶುಭದಿನ... 🤝🫂🍬 ಯಾವುದೋ ಧ್ಯಾನದ ನಡುವೆ ಅಲೆವಾಗ ಛಕ್ಕನೆ ತನ್ನೆಡೆ ಸೆಳೆದು ಬಿಡುವ ಒದು ನೆನಪು, ಅದು ತನ್ನೊಡನೆ ಹೊತ್ತು ತರುವ ಮಂದಹಾಸ; ಶುಭವೆಂದರೆ ನಿನ್ನ ನೆನಪಿನೊಂದಿಗೆ ತೇಲಿ ಬರುವ ಹಾಯೀಭಾವ... ನೀನಲ್ಲಿ ಮೈಮುರಿದು ನಕ್ಕಂತಿದೆ - ನನ್ನ ಬೆಳಗಿನ ಶುಭಾರಂಭ... ಶುಭದಿನ... 🤝🫂 ಆಲಸ್ಯದ ಸೊಂಟ ತಿವಿದು, ವಿಲಾಸದ ಆರಾಮವು ಮೂಗುಮುರಿವಂತೆ ಮಾಡಿ, ಮನೆ ತುಂಬಾ ಹಬ್ಬಿ ಹರಡಿ ಹಗಣವೆಬ್ಬಿಸೋ ಕೋಳಿ ನಿದ್ದೆಯ ತುಂಟ ಮಗುವಿನಂತ ರಜಾ ದಿನದ ಹಗಲು... ಶುಭದಿನ ಮೈಮುರಿಯುವುದೂ ಹಾಗೇ... 🤝🫂 ಮೈಮುರಿದು ಕಣ್ತೆರೆದೆ - ನಿನ್ನೆಯ ನೆನಪೋ, ನಾಳಿನ ಕನಸೋ, ಹಣೆಯ ಮುದ್ದಿಸಿ ಇಂದಿನೀ ಎಚ್ಚರದಲಿ ಯೆದೆಬಾಗಿಲ ರಂಗೋಲಿಯಲಿ ನಿನ್ನ ಹೆಸರು... ನಗೆಯರಳಿ ಬೆಳಗಾಯಿತು... ಶುಭದಿನ... 🤝🫂 ಬೆಳಕಿಗಾಗಿ ಕಾಯುವುದೆಂದರೂ, ಬೆಳಕಿಗೆ ಎದೆ ತೆರೆಯುವುದೆಂದರೂ, ಬೆಳಕನು ಹಾಯುವುದೆಂದರೂ, ಒಟ್ನಲ್ಲಿ ಬೆಳಕಿನ ಆಜೂಬಾಜು ಸುಳಿವ ಭಾವಾನುಭಾವಗಳೆಲ್ಲ ಶುಭದ ಕನವರಿಕೆಗಳೇ... ಬೆಳಗು - ಶುಭದ ಅನುವಾದವಾಗಲಿ... ಶುಭದಿನ... 🤝🫂 ನಿನ್ನ ನಗುವನ್ನು, ಮೈಮುರಿದೇಳುವ ನಗೆ ಬಿಂಬದಾ ಚೆಲುವನ್ನು ಕಣ್ತುಂಬಾ ಕುಡಿದು, ಮಧುರ ಪಾಪದ ನಶೆಯಲ್ಲಿ ತೇಲುವ ಎನ್ನೆದೆಯ ಕನಸಿಗೆ ಬೆಳಕು ನಿತ್ಯವೂ ಪ್ರೀತಿ ಸುರಿಯುವುದು - ಮತ್ತೆ ಬೆಳಗಾಗುವುದು... ನಗೆಯ ತಬ್ಬಿ, ನಗೆಯೇ ಆಗಿ ಬೆಳಕ ಎದೆಗೆಳೆದುಕೊಂಡು ಶುಭವ ಸಂಭ್ರಮಿಸುವ ಅಮೃತ ಘಳಿಗೆ - ಬೆಳಗೆಂದರೆ... ಶುಭದಿನ... 💞🤝🫂 ಪ್ರಶ್ನೆಯೂ ಬೆಳಕೇ ಬೆಳಕೇ ಉತ್ತರ... ಬೆಳಕ ಪ್ರೀತಿಯನುಂಡು ಪ್ರೀತಿ ಬೆಳಕಿನೆಡೆಗೆ ಮುನ್ನುಡಿಯ ಬರೆವ ಬೆಳಗು... ಶುಭದಿನ... 🤝🫂 ಕತ್ತಲೆಂಬ ಸತ್ಯಕಿಷ್ಟು ಪ್ರೀತಿ ಸ್ಪರ್ಷವಾಯಿತು ಬೆಳಕು ತನ್ನ ಸತ್ಯವ ತೋರಿತು ಬೆಳಗಾಯಿತು - ಎಲ್ಲಾ ಬೆಳಕಾಯಿತು... ಶುಭದಿನ... 🤝🫂 ಹೂವು ಮೈನೆರೆದು ಗಂಧವ ಸೂಸಿ, ದುಂಬಿ ಮೈಮುರಿದು ಗುಂಜಾರವ ಮಾಡಿ, ಬೆಳಕು ಇಟ್ಟ ಮುಹೂರ್ತದಲಿ ಬನದ ಬೇಲಿಯಲೂ ಪ್ರೀತಿ ಸಂಕಲನ... ಬೆಳಗರಳಿತು... ಶುಭದಿನ... 🪻🦋🤝🫂 ಎಷ್ಟೊಂದು ಗೆಲುವಿನ ಭರವಸೆಯ ಹೊತ್ತು ಮೈದೋರುತ್ತದೆ ಒಂದು ಬೆಳಕಿನ ಕಿರಣ... ಬೆಳಗಾಗುವುದೆಂದರೆ ಬೆಳಕಾಗುವುದು - ಬೆಳಕಾಗುವುದೆಂದರೆ ಹೊಸತಾಗಿ ಗೆಲುವಿಗಾಗಿ, ಗೆದ್ದ, ಗೆಲ್ಲುವ ನಗುವ ಸಂಭ್ರಮಕಾಗಿ ವಿಶ್ವಾಸದ ವಿಧೇಯತೆಯಲಿ ಸಜ್ಜಾಗುವುದು... ಶುಭದಿನ... 🤝🫂 ಹುಡುಕಿ ಬರುವ ಬೆಳಕ ಕಿಡಿ (ನೀನು) ಕಾದು ಕುಳಿತ ನಗೆಯ ಹುಡಿ (ನಾನು) ಒಂದನೊಂದು ಹೆಗಲು ತಬ್ಬಿ ಪ್ರೀತಿಯನು ಸಂಭ್ರಮಿಸುವಾಗ ಬದುಕು ಮುಗಿಲಿಗೆ ಮೋರೆ ಮಾಡಿ ಅಭಿವಾದನ ಹೇಳುತ್ತದೆ... ಬೆಳಗೆಂದರೆ ಸ್ನೇಹಮಯೀ ಧನ್ಯತೆ... ಶುಭದಿನ... 🤝🫂 ಒಂದು ಪ್ರಚ್ಛನ್ನ ನಗುವಿನ ಮನಸ್ವೀ ಪ್ರಾರ್ಥನೆಯ ಬೆಳಗು... ಶುಭದಿನ... 🍫🪻 ಬೆಳಕೇ, ಎದೆಗಿಳಿದು ಬೆಳಕ ತೋರು... ಪ್ರೀತಿ ಪ್ರಾರ್ಥನೆ ಬೆಳಗು... ಶುಭದಿನ... 🤝🫂 ಪ್ರೀತಿಸುವುದಾದರೆ ಬೆಳಕನ್ನೇ ಪ್ರೀತಿಸೂ ಅಂದೆ... ಬೆಳಕೆಂದರೇ ಪ್ರೀತಿ, ಪ್ರೀತಿ ಅಂದರದೂ ಬೆಳಕೇ ಅಂತಂದು ನಕ್ಕಿತು ಬೆಳಗು... ಶುಭದಿನ... 🫂🤝 ಒಂದು ಕನಸಿನ ಕಿಡಿಯು ಒಂದು ನೆನಪಿನ ಛಡಿಯ ಹಿಡಿದು ಅಲೆಮಾರಿ ನಗೆಯ ಹುಡುಕುತ್ತ ದಿನದ ಬೀದಿಯ ಜಾಲಾಡಲು ಹೊರಟಂತಿದೆ... ದಾರಿಯಲಿಷ್ಟು ಪ್ರೀತಿ ಪಲುಕು ಸಿಕ್ಕರೆ ಯೆದೆಗಣ್ಣು ಬೆಳಕ ಮೀಯಬಹುದು... ಶುಭದಿನ... 🤝🫂 ನನಗೆ ನನ್ನ ತೋರುವ ನಿನ್ನ ಅರಳು ಕಂಗಳ ಬೆಳಕಿಗೆ ನಿನ್ನ ನಗೆ ಸೊಬಗನೆನ್ನ ಕಣ್ಣಲಿ ತುಳುಕಿಸುವ ಕನ್ನಡಿ ಬೆಳಗಿಗೆ ಪ್ರೀತಿ ಕರಗಳ ವಂದನೆ... ಬೆಳಕಿಗೆ ವಂದನೆ - ಬೆಳಗಿಗೆ ವಂದನೆ... ಶುಭದಿನ... 🤝🫂 ಯಾರೋ ಬರೆದ ಕವಿತೆ ಸಾಲೊಂದು ಎದೆಗಿಳಿದು ನನ್ನದೇ ಆಗಿ ನೂರು ಭಾವಗಳ ಹಡೆದಂತೆ ಬೆಳಗು ಬೆಳಕನ್ನು ಮಡಿಲಿಗೆ ಸುರಿದು ಕಣ್ಣು ಬಣ್ಣಾ ಬಣ್ಣಗಳ ಬೆರಗನ್ನು ಮೀಯುತ್ತದೆ... ಶುಭದಿನ... 😍 ಬೆಳಕೇ - ಯೆದೆಯ ಕತ್ತಲಲ್ಲಿ ಕಳೆದು ಹೋದ ಪ್ರೀತಿ ಸೂಜಿಯ ಎತ್ತಿಕೊಡು, ಬದುಕಿಂಗೊಂದು ಬೆಚ್ಚನೆ ನಗೆ ಕೌದಿಯ ಹೊಲಿದುಕೊಳ್ಳುತ್ತೇನೆ... ಬೆಳಗೇ - ನನಗೆ ನನ್ನ ಹುಡುಕಿಕೊಡು, ಬೆಳಕೇ ಆಗಿ ಕರಗುತ್ತೇನೆ... ಶುಭದಿನ... 🤝🫂 ಬೆಳಕಿನ ಮೃದು ಸ್ಪರ್ಷಕೆ ಹೂವು ಮೈನೆರೆದು ನಗುವಾಗ ಗಾಳಿ ಪ್ರೇಮ ಗಂಧವ ಹೆಗಲಮೇಲೆ ಹೊತ್ತು ಊರೆಲ್ಲ ಉಣಿಸುತ್ತದೆ - ನಾನು ಹೂದೋಟದ ಬೇಲಿಯಲಿನ ಚಿಟ್ಟೆಯ ಮೈದಡವಿ ಪ್ರಣಯದ ಹುಡಿ ಮೆತ್ತಿಕೊಳ್ಳುತ್ತೇನೆ... ಮುಂಬೆಳಗಿನ ನಿನ್ನ ಕನಸಿಗೆ ನಾನರಳಿದ ಉಸಿರ ಹಾಡನು ಊರು ಕೇಳದ ಹಾಗೆ ನನ್ನ ನಲಿವಿಗೆ ನೂರು ಕಥೆ ಕಟ್ಟುತ್ತೇನೆ... ನೀನೂ ಹಿಂಗೇನಾ...!? ಶುಭದಿನ... 🪻🦋🫂

ಬೆಳಕಿನ ನುಡಿಸಾಣಿಕೆ...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರರ್ವತ್ತು.....

ನನ್ನ ಬೊಗಸೆಯಷ್ಟೇ ನನ್ನ ಸಮುದ್ರ.....

ಮರೆತ ಹಾಗೆ ನಟಿಸಬೇಡ, ಮರೆತೆನೆಂದು ಬೀಗಬೇಡ, ನೆನಪು ಬಿಡದು ಸುಮ್ಮನೆ... 
ಉಸಿರಿಗಂಟಿದಳುವ ಮುಂದೆ ಮರೆವ ಮಾತು ಬರೀ ಸುಮ್ಮನೆ...
___ ನೆನಪ ಕತ್ತಿಗೆ ಸಾಣೆ ಹಿಡಿಯಲು ದಿನಾ ಸಂಜೆ ನಾಕು ಹನಿ ಮಳೆಯಾಗುತ್ತದೆ...

ಕಳೆದೋಗಬೇಕು ಹಂಗೇ ಸುಮ್ನೆ - ನದಿ ಮೆರೆವ ಅಪರಿಚಿತ ಹಾದಿಯಲ್ಲಿ...

ವತ್ಸಾ -
ನಮ್ಮಷ್ಟಕ್ಕೆ ನಾವೇ ಜಗತ್ತಿಗೆಲ್ಲ ಉತ್ತರದಾಯಿತ್ವವನ್ನು ಆರೋಪಿಸಿಕೊಂಡು
ಅವರಿವರು ಕೇಳಿಯಾರೆಂಬ ಪ್ರಶ್ನೆಗಳನು ನಮ್ಮೊಳಗೇ ಕೇಳಿಕೊಂಡು 
ಪ್ರಶ್ನೋತ್ತರಗಳ ಕಿರಿಕಿರಿಯೇ ಬೇಡವೆಂದು ಎಷ್ಟೆಲ್ಲ ಸಣ್ಣ ಸಣ್ಣ ಆಸೆಗಳಿಗೂ ಮುಸುಕೆಳೆದುಕೊಳ್ಳುತ್ತೇವಲ್ಲ...
ಬೇಕಾ 
ನಮ್ಮ ಖುಷಿಗಳಿಗೆ ನಾವೇ ಎರವಾಗುವ ಈ ದೊಂಬರಾಟ...
ಕೇಳಲಿ ಬಿಡೂ ಅವರವರ ಬುದ್ಧಿ ಭಾವ ಮಟ್ಟಕ್ಕೆ ತಕ್ಕಷ್ಟು, 
ಅವರಿಗೂ ಇಷ್ಟು ಮನೋರಂಜನೆಗೆ ಅವಕಾಶ ಕೊಟ್ಟಂಗಾಗುತ್ತಷ್ಟೇ - ಕಿಂಚಿತ್ ಸಮಾಜ ಸೇವೆ...
ಆದ್ರೆ,
ಅನಗತ್ಯ ಕುಹಕ, ಕುತೂಹಲಗಳಿಗೆಲ್ಲ ಉತ್ತರ ಹೇಳದೇ ಇರಬಹುದಾದ ಸ್ವಾತಂತ್ರ್ಯವ ನಮ್ಮಲ್ಲೇ ಉಳಸ್ಕೊಂಡ್ರಾಯ್ತು - ಆತ್ಮ ವಂಚನೆಯಿಲ್ಲದಲ್ಲಿ ನಕ್ಕು ಮುನ್ಸಾಗುವ ದಾರ್ಷ್ಟವ ಬೆಳಸ್ಕೊಂಡ್ರಾಯ್ತು ಅಷ್ಟೇ...
ತುಂಬಾ ಒಳ್ಳೇತನದ ಮಳ್ಳು ಬೇಕಿಲ್ಲ ಅಲ್ವಾ - ಯಾರದ್ದೇ ಆತ್ಮ ಸಮ್ಮಾನವ ಹೀಗಳೆಯದಿರುವಷ್ಟು ಸಭ್ಯತೆಯ ಸಲಹಿಕೊಂಡರೆ ಸಾಕೇ ಸಾಕು...
ಇಷ್ಟಕ್ಕೂ ನಾವು ಅರಳಬೇಕಾದದ್ದು ನಮಗೋಸ್ಕರ ಅಲ್ದಾ...
___ ಕಾಡೇ ಊರಾದಾಗ ಆನೆ ನಡೆದದ್ದೇ ದಾರಿ ಮತ್ತು ಅದೇ ಸರಿ...
&&&

ಅಲ್ವಾ -
ವ್ಯಥೆಗಳನೆಲ್ಲ ಕಥೆಯಾಗಿಸಿ ಪಾತ್ರಗಳಲ್ಲಿ ಕಳೆದೋಗಿ ಓದಿ ಓದಿಸಿ ನಕ್ಕು ನಗಿಸಿ ಅಂಟಿಸಿದ ತಲೆ ಬರಹವನೇ ಬರೆದವನೇ ಮರೆತು ಮುನ್ಸಾಗಲು ಹಲವಿಧ ವಾಚ್ಯಾರ್ಥ ಭಾವಾರ್ಥಗಳ ಅತ್ತರು ಮೆತ್ತಿಕೊಂಡ ಪರಿ ಪರಿ ಪದಗಳ ಸಾಂಗತ್ಯವೊಂದಿಲ್ಲದಿದ್ದಿದ್ದರೆ ಈ ಭಂಡ ಬಾಳು ಇನ್ನಷ್ಟು ಬಡವಾಗಿರುತ್ತಿತ್ತು ನೋಡು...
____ ನನ್ನೇ ನಾನು ನಿನಗೊಡ್ಡಿಕೊಳ್ಳುವ ನೂರು ನಖರೆಗಳು...
&&&

ವತ್ಸಾ -
ಈ ಬದುಕು ಸ್ವಭಾವತಃ ಸುಂದರ ಸಲ್ಲಾಪ...
ಯೆದೆಯಾರೆ ಗುರುತಿಸಿ ಪ್ರೀತಿಸಬೇಕಷ್ಟೇ - ಇದ್ದದ್ದು ಇದ್ದಂತೆ...
ಅನುಕ್ಷಣವ ಮನಸಾರೆ ಹೀರಬೇಕಷ್ಟೇ - ಸಿಕ್ಕಿದ್ದು ಸಿಕ್ಕಂತೆ...
___ ಬದುಕಿನ ಸೌಂದರ್ಯ ಮೀಮಾಂಸೆ...
&&&

ಅಂತಶ್ಚಕ್ಷುವೇ -
ಯಾರು ತಬ್ಬಿದರೆ ಎನ್ನೆದೆಯ ತಬ್ಬಲಿತನವೆಲ್ಲ ಎಬ್ಬಿ ಹೋಗುವುದೋ,
ಯಾರೆಡೆಯಲ್ಲಿ ನಾನು ನಾನಾಗಿ ನಕ್ಕು ನಗಿಸಿ ಅತ್ತು ಆಡಿ ಒಡನಾಡಬಲ್ಲೆನೋ,
ಅಂಥವರಿಂದ ಎನ್ನನು ದೂರ ನಿಲ್ಲಿಸುವ 'ನಾನು' ನನ್ನಲ್ಲಿ ಬೆಳೆಯದಂತೆ ಕಾಲಕೂ ಕಾಯ್ದು ಕೊಡು ಸಾಕು...
____ ಪ್ರಾರ್ಥನೆ...
&&&

ನಂಗೆ ಯಾರದೇ ಜವಾಬ್ದಾರಿ ಇಲ್ಲ ಎಂಬ ಸುಳ್ಳು ನಿರಾಳತೆ;
ನಾನು ಯಾರದ್ದೇ ಜವಾಬ್ದಾರಿ ಅಲ್ಲ ಎಂಬ ಸಂಕಟ ಸತ್ಯದ ಕರಾಳತೆ...
ಖಾಲಿ ಖಾಲಿ ಹೆಗಲಿನ ಹಗುರತೆ;
ಖಾಲಿತನದ ಎದೆ ಭಾರ...
ಸಂತೆಯಲ್ಲೂ ಸಾವಿನದ್ದು ಒಂಟಿ ಸಂಚಾರವೆಂಬ ನಿಜದ ಅರಿವಿದ್ದರೂ,
ಒಂಟಿ ಕೋಣೆಯಲಿನ ಬದುಕು ಸಾವಿನ ಸಂವಾದದ ಬಗ್ಗೆ ಹೇಳಲಾರದ ಭಯ...
ಭಾವಗಳು ತುಳಿತುಳಿದು ಯೆದೆಯ ತೀರ ತೀರಾss ರಾಡಿಯೆದ್ದರೂ,
ತಿಳಿಯಾಗಿ ನಗಬೇಕು ಕಣೋ ಶ್ರೀ ಕಣ್ಣ ಕೊಳ...
___ ಹೊಸತರ ಹಬ್ಬವಂತೆ...

ಬದುಕುವುದಕ್ಕೆ ಒಂದಾದರೂ ಉದ್ದೇಶ ಬೇಡವಾ ವತ್ಸಾ ಎಂಬ ಪ್ರಶ್ನೆ ಬಂದಾಗಲೆಲ್ಲ ಒಮ್ಮೆ ಗಟ್ಟಿಯಾಗಿ ಉಸಿರಾಡುತ್ತೇನೆ - ಉಸಿರಿದೆ, ಉದ್ದೇಶವೂ ಅದೇ...
ಉಸಿರ ಗತಿಯನ್ನು ತದೇಕ ಗಮನಿಸುವುದು ಧ್ಯಾನದ ಹಾದಿಯಂತೆ - ಬದುಕೂ ನಂಗೀಗ ಧ್ಯಾನದಂತೆ...
___ ಬೇಸಿಗೆಯ ಮಗ್ಗುಲಲ್ಲೇ ವಸಂತೋತ್ಸವ...
&&&

ವತ್ಸಾ -
ಒಂದಾನ್ವೇಳೆ ಬದುಕನ್ನೂ ನಿರ್ಲಕ್ಷ ಮಾಡ್ ಬಿಡ್ಲಕ್ಕು;
ಹಂಗೇಳಿ, ಹೆಣದ್ ವಿಲೇವಾರಿ ಮಾತ್ರ ತಡಾ ಅಪ್ಪಂಗಿಲ್ಲೆ ನೋಡು...
ಹುಳ್ಕ್ ಹಲ್ಲಾದರೂ ಅಷ್ಟೇಯಾ, ಹುಳ್ಕುಟ್ಟೆ ಪ್ರೀತಿ ಆದ್ರೂ ಹಂಗೇಯಾ...
___ ಹಾಳಾದದ್ ಒಂದು ಜ್ಞಾನ ದಂತದ ಉಪದೇಶ...
&&&

ಏನ್ಗೊತ್ತಾ -
ಉಳಿದೇ ಇರುತ್ತೆ ಒಂಚೂರು ಕಸರು, ಎಷ್ಟು ಗಾಢವಾಗಿ ಓದಿದರೂ - ಯಾವ 'ಕವಿತೆ'ಯೂ ಪೂರಾ ಪೂರಾ ಅರ್ಥವಾಗುವುದಿಲ್ಲ ನಂಗೆ...
ಈ ಬದುಕೂ ಹಂಗೇ...
ಕೊನೇಯ ನಿಟ್ಟುಸಿರು ಮತ್ತು ಶ್ರದ್ಧಾಂಜಲಿಯ ಕಣ್ಣ ಹನಿ ಎಷ್ಟು ಕಾಲಕೂ ಬದುಕು ಅಪೂರ್ಣ ಅಂತಲೇ ಗೊಣಗುತ್ತವೆ - ಅಂತೇ, 'ಕವಿತೆ' ಮುಗಿದಂತೆನಿಸುವುದಿಲ್ಲ...
___ ನನ್ನ ಬೊಗಸೆಯಷ್ಟೇ ನನ್ನ ಸಮುದ್ರ - ಬದುಕೂ, ಕವಿತೆ...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)