ಗೊಂಚಲು - ಮುನ್ನೂರಿಪ್ಪತ್ತೇಳು.....

ನೀಲಿ ನೀಲಿ ಕನಸು..... 

ಬಿಸಿ ಉಸಿರಿನೊಡಗೂಡಿ ತಂಪು ಬೆಳದಿಂಗಳೂ ಬರಿಮೈ ಬೆಂಕಿಯಲಿ ಹಾಯುವ ನಟ್ಟಿರುಳ ಸೊಬಗು - ಬಿಸಿಲ ಮಚ್ಚಿನ ಏಕಾಂತದಲಿ ಕಾಂತಾಕಾಂತೆ ಉತ್ಕಂಠ ಪ್ರಣಯ ಸಂಹಿತೆ...
ಮೈಯ್ಯ ಯಾವ ತಿರುವಲ್ಲೂ ಚೂರೇ ಚೂರೂ ಹಸಿವು ಬಾಕಿ ಉಳಿಯದ ಹಾಗೆ ಅಡಿ ಮುಡಿ ಹಿಡಿ ಹಿಡಿ ಆವರಿಸಿ ಜೀವತಂತುಗಳ ಮೀಟಿ ಚೆಲುವನುಂಡು ಸುಖವನುಣಿಸಿ ನುಲಿಸಿ ನಲಿವ ಕಾಂಕ್ಷೆಯ ಕುದಿಯಲ್ಲಿ ಕರಗಿ ವಿವಶವಾಗುವ ಜೀವಭಾವೋತ್ಸವ ರಾಗ ಸಂಯೋಗ...
ಸುಖದ ಸವಿ ಸುಸ್ತಿನಲಿ ತೂಗುವ ಮತ್ತ ಮುಂಜಾವಿನ ಕಣ್ಣ ಸರಸಿಯಲಿ ತೇಲುವ ಪ್ರೇಮ ದೀಪ...
#ನೀಲಿ_ನೀಲಿ_ಕನಸಿನಂತಃಪುರದ_ಬೆಚ್ಚಾನೆ_ಬೆಳಕು...
⇍↹⇏

ಹೆಸರಿಡದ ಭಾವ ದಿವ್ಯವೇ - ಕುದಿ ಉಸಿರ ಕಾವ್ಯವೇ...
ಚಕೋರ ಕಣ್ಣಿನಾಳದ ಪಿಳಿಪಿಳಿ ಒಗಟು - ಆಸೆ ಪಾದದ ಬೆರಳ ಸಂಧಿಯ ಹಸಿಮಣ್ಣ ಜಿಗುಟು...
ಹೆಡ್ಡ ನಾನು - ಅರಿವಾಗದೆನಗೆ ಅಡ್ಡಡ್ಡ ಮಾತು...
ನೇರಾನೆ ಹೇಳು - ಒಳಗಿಳಿವಂಗೆ ಕಣ್ಣಲ್ಲಿ ಕೂತು...
ನನಗಲ್ಲ ಎಂಬಂತೆ ಹೇಳಿ - ಹೇಳಿಯೂ ಹೇಳದಂತ ಚಾಳಿ...
ಕದಡಿದ್ದು ಸಾಕು ಈ ಭಾವದೊಡಲ ಕೇಳಿ - ನಿನ್ನೀ ವರಸೆಯ ಧಾಳಿ...
#ಎದೆಗುದಿ...
⇍↹⇏

ಬೇಲಿಸಾಲಿನ ಹೂವಂತೆ ಅರಳೋ ಕಾಲ್ಹಾದಿ ಬದಿಯ ಅಜ್ಞಾತ ನಗುವೊಂದು ನನ್ನ ಇಡೀ ದಿನದ ನಲಿವು - ಕಣ್ಣ ಕಾಣ್ಕೆಯ ಅಯಾಚಿತ ನಗುವೊಂದರ ಪರಿಚಯವೇ ಜಗದ ಜಾಡಿನ ಗೆಲುವು...
ನಾಕಾಣಿ ನಗು ಬೆಸೆದು ಬಿಗಿದ ಹಸ್ತರೇಖೆಗಳಲೀಗ ನೇಹಾಮೃತ ಅಭಯದ ಬಲವು...
ಚಾಚಿದ್ಯಾರೋ... ಹಿಡಿದದ್ಯಾರೋ... ಬೆಸೆದದ್ದು ನೇಹದ ನಂಟು... ಅದಷ್ಟೇ ಸತ್ಯ...
ಅಲ್ಲಿಂದಾಚೆ ವಿನಾಕಾರಣದ ಅಕ್ಕರೆಯಲ್ಲಿ ತೇಲಿ ನಲಿವ ಬದುಕಿನ ಹಾಯಿ..‌.
ಈ ಫಕೀರನ ಊಟದೆಲೆ ತುಂಬಾ ಮಂದಹಾಸದ ಹಾಲುಬಾಯಿ...
ಎಷ್ಟು ಹಗೂರ ಈಗ ಹೆಗಲು ಹೆಗಲನಾತು ಹಾಯುವ ಈ ಬೆಳಕ ಹಾದಿ...
#ಬಡವನ_ಸಿರಿಬೆಡಗು...
⇍↹⇏

ಒದ್ದೆ ಕೂದಲು ಕೂಡಾ ಒದ್ದೆ ತುಟಿಯಷ್ಟೇ ಕೆಣಕಿ ಕಾಡುತ್ತೆ ಅಂತ ಹಸಿ ಮೈಯ್ಯಲ್ಲಿ ನಿನ್ನ ಕಾಣೋ ತಂಕಾ ಖಬರೇ ಇರಲಿಲ್ಲ...
ಕಿವಿಯ ಮರೆಯಿಂದ ಮೆಲ್ಲನಿಳಿವ ಹಬೆಯ ಹನಿ - ಕಣ್ಣಾದ ಉಸಿರು ಉರಿದು ಮಹಾಪ್ರಾಣ ದೀಪ...
ನೆಚ್ಚಿನಾ ಹರೆಯದ ಪ್ರಣಯ ಪೇಯದ ಖಾಸಾಖಾಸಾ ನಶೆಗೆ ಆಸೆ ಕರುಳು ಭಗ್ಗೆಂದು ಕಣ್ಣ ಮೊನೆಯೂ ತೇವ ತೇವ...
ಹಸಿಯೆಂದರೆ ಜೀವಂತಿಕೆ - ಚಿಗುರೆಲೆಯಂಥ ಒದ್ದೊದ್ದೆ ಭಾವ - ನಿಸರ್ಗದ ಸಂಸರ್ಗ ನಾದ ಪರವಶತೆಯಲಿ ಮೈನೆರೆದು ಹಿತವೇರಿ ಮಿಡುಕುವಾ ಜೀವ...
#ಹೊಂಬಾಳೆ...
⇍↹⇏

ಎಲುಬು ಸೀಳುವ ಛಳಿಯೂ ಬೆಚ್ಚಿ ಕಣ್ಮುಚ್ಚೋ ಹಾಂಗೆ ಉರಿವ ನಿನ್ನ ಹೊಕ್ಕುಳ ದೀಪದುರಿ.‌‌..
ನಖಶಿಖಾಂತ ರತಿ ಮನ್ಮಥ ನರ್ತನ - ಉಸಿರ ಉನ್ಮತ್ತ ಗುಂಜನ...
ರತಿ ರಂಗಿಗೆ ಅರೆಬೆತ್ತಲೆ ಬೆಳಕೇ ದಿವ್ಯಾಭರಣ...
#ಜೀವಂತ_ಮದನಿಕೆ...
⇍↹⇏

ಕ್ಷಣದಲ್ಲಿ ಒಂದು ಭಾಗ ನೀ ಕಣ್ಣಲ್ಲಿ ಕಣ್ಣ ಬೆರೆಸಿ ಏನೋ ಮಧುರವಾದುದನು ಕದ್ದು ಸಿಕ್ಕಿಬಿದ್ದವಳಂತೆ ತುಟಿಯಂಚ ಕಚ್ಚಿಕೊಳ್ಳುವಾಗ ನನ್ನ ತುಟಿಗಳಲಿ ತುಂಬಿಬರೋ ದುಂಬಿ ಹಸಿವಿನ ಜೀವ ತಂತು...
ಕಣ್ಮುಚ್ಚಿ ಸವಿದರೆ ಆಸೆ ಕನಸುಗಳ ಲಕ್ಷ ದೀಪೋತ್ಸವ - ನಾಭಿ ಕುಂಡದಲಿ ಕಮಲ ಅರಳೋ ಪುಳಕ...
#ಮಾಗಿಯ_ಅರೆಬಿರಿದ_ನಡುಹಗಲು...
⇍↹⇏

ಇವಳೇ -
ನೀ ಸನಿಹ ಸುಳಿವಾಗ ಸೋಕೋ ಅಂಗರಾಗದ ಬೆಚ್ಚಾನೆ ಬಿಸಿ ಗಾಳಿಯಲಿ ತೋಯೋ ನನ್ನೆದೆಯ ಬಿಸಿ ಬಿಸಿ ಕನಸುಗಳು ಮೀಸೆಯಡಿಯ ಕಳ್ಳ ನಗುವಲ್ಲಿ ನಿನ್ನ ಸೇರಿದರೆ ಬಿರಿದ ಕುಪ್ಪಸಗೂಡಿನ ಕತ್ತಲ ಕಮರಿಯಲಿ ಕದ್ದು ಕಾಪಿಟ್ಟುಕೋ...
ಮಂದಿ ನೋಡದ ಊರಲ್ಲಿ ಮುಂದಿನ ಮಾತಾಡುವ - ಹಿತ್ಲ ಬಾಗಿಲಲಿ ಕತ್ಲು ಕಂತುವ ಮುನ್ನ ಮುತ್ತಾಗಿ ಮತ್ತೇರುವ...
ಪ್ರಣಯ ನೆಬ್ಬಿದ ತೋಳ ಬಳ್ಳಿಯಲಿ ಕದ್ದ ರೋಮಾಂಚದ ನವಿರು ಘಮವೇಳಲಿ...
#ಮಧು_ಮಧುರ_ಕಳ್ಳತನ...
⇍↹⇏

ನಿನ ಕಣ್ಣ ಮೊನೆಯಲ್ಲಿನ ಗುಂಜನವ ಆಲಿಸಿದೆ - ಸಮಾಹ ಸಂಗೀತ ಒಳಗೂ ಹೊರಗೂ...
#ಕವಳ...
⇍↹⇏

ಕಣ್ಣು ತೂಗುವಾಗಲೊಮ್ಮೆ ನಿನ್ನ ನೋಡಿದೆ - ಎವೆ ಮುಚ್ಚದ ಎಚ್ಚರಕೀಗ ನೀ ತುಳಿದಾಡಿದ ಹಾದಿಯ ಧೂಳಾಗುವ ಖಯಾಲಿ ಮತ್ತು ಸಂಕಟ...
#ಇವಳೇ...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

ಗೊಂಚಲು - ಮುನ್ನೂರಿಪ್ಪತ್ತಾರು.....

ಮೂಕ ಮುಖವಾಡಗಳು.....  

ವಾಸ್ತವ ಎಷ್ಟು ನಿಚ್ಚಳ ಗೊತ್ತಾ...
ಆದ್ರೂ ಕನಸಿಗೆ ಬಣ್ಣದ್ ಬಟ್ಟೆ ತೊಡಿಸಿಯೇ ಕಣ್ಣಂಗಳಕ್ ಆಡಕ್ಕೆ ಬಿಡತ್ತಲ್ಲಾ ಬೋಳೆ ಮನ್ಸೂ...
ಬೆತ್ಲು ಅಂದ್ರೆ ಪ್ರಾಣ ಪ್ರೀತಿ ಜೀವಕ್ಕೆ - ಆದ್ರೆ ಭಯ ನೋಡು; ತೋಳು ತೋಳು ತಳುಕಿನಲ್ಲೇ ಕಾಲ ನಿಂತೋಗ್ಬಿಟ್ರೆ...
ಹೆಗಲ ಮೇಲಿನ ಸ್ವಯಂಕೃತ ಪ್ರಭಾವಳಿಗಳ ಹೆಣ ಕೊಳೀಬಾರ್ದು; ಹಂಗಾಗೇ ಕತ್ತಲಿಗೂ ಶಾಲು ಹೊದೆಸ್ತೀನಿ ಮಹಾ ಮಾನವಂತ (?) - ಸತ್ರೂ ಆರೋಪಿಸಿಕೊಂಡ ಸುಳ್ಳು ಸಭ್ಯತೆಗೆ ಧಕ್ಕೆ ಬರ್ಬಾರ್ದು ಅಲ್ವಾ...
#ಬಟ್ಟೆಯೆಂಬ_ಹೆಣಗಾಟ...
#ಮೂಕ_ಮುಖವಾಡಗಳು...
↜↺↻↜

"ಕಾವಿಲ್ಲದೇ ಕಾವ್ಯವಾ...."
↜↺↻↜

ಚಂದದ ಭಾಷೆಯ ಕಲಿಯಬೇಕಿದೆ - ಸತ್ಯವನ್ನೂ ಬಣ್ಣ ಬಣ್ಣವಾಗಿ ಹೇಳುವಂತ ಭಾಷೆ, ಕಿವಿ ಸುಡದ ಹಾಗೆ ನುಡಿಯುವಂತ ಭಾಷೆ...
ಗದ್ದಲವಾಗಬಾರದು - ತಣ್ಣಗೆ ಕೊರೆಯಬೇಕು...
ಹುಟ್ಟಿಯೇ ತೀರುವ ಹಡಾಹುಡಿಯ ಭಾವಗಳ ಬಚ್ಚಿಡಲೋಸುಗ ಎದೆಯಲ್ಲಿ ಕತ್ತಲ ಕೋಲಿಯೊಂದು ಇರಲೇಬೇಕು - ಜಗದ ಬಯಲಲ್ಲಿ ಅದಕೆ ಸಿಹಿಯಾಗುವುದಷ್ಟನ್ನೇ ಹರವಬೇಕು ಅಥವಾ ಸಿಹಿಯಾಗುವಂತೆ ಕಲೆಸಿ ಹರವಬೇಕು...
ಜಾಣನಾಗಬೇಕು - "ಮಾತು ಬಲ್ಲ" ಜಾಣನಾಗಬೇಕು...
ನಂಗೆ ಜಗದ ಜಂಗುಳಿಯಲಿ ಜಾಗ ಬೇಕೆಂದರೆ ಜಗದ ಅಭಿರುಚಿಯಂತೆ ನನ್ನೊಳಗೆ ನಾನಲ್ಲದ ನನ್ನ ಕಟ್ಟಿ ಬೆಳೆಸಬೇಕು...
ಮೀರಲಾದೀತು ಹೇಗೆ ಸುತ್ತಿ ಬರುವ ಎಲ್ಲ ವೃತ್ತಗಳ ಪೂರಾ ಪೂರಾ.‌..
ಹೆಂಗಾರಾ ಆಗ್ಲಿ ಚೆಂದದ ಭಾಷೆ ಕಲೀಲೇಬೇಕು...
#ನಾನು...
↜↺↻↜

ಯಾವ ರೋಗವೋ ಕಾಣೆ - ತೀವ್ರವಲ್ಲದ್ದ್ಯಾವುದೂ ರುಚಿಸುತ್ತಲೇ ಇಲ್ಲ ಈಗೀಗ ಈ ಎದೆಗೆ...
ಒಂದು ಸಣ್ಣ ಭೇಟಿ ಸಾಧ್ಯವಾ ಹೇಳು...?
ಸುಮ್ಮನೆ ಬೆರಳುಗಳ ನಡುವಿನ ಖಾಲಿಯಲಿ ನುಸುಳಿ ಕಚಗುಳಿಯಿಟ್ಟು ಜಾರಿ ಹೋಗುವ ಅಲೆಗಳ ಸನ್ನಿಧಿಯಲಿ - ಎದೆಯ ಮೌನವ ಮೌನದಲೆ ಒಡೆವ ಗಾಢ ಹಸಿರಿನಡಿಯ ಕತ್ತಲ ಸೀಮೆಯಲಿ...
#ಉಸಿರೇ...
↜↺↻↜

ಎಳೆಯ ನಗುವೊಂದು ಬಿಸಿಲ ಹಾದಿಯಲಿ ಕನಸ ನೆಡಬಹುದು...
ಕನಸು ಗೂಡು ಕಟ್ಟಿದ್ದು ಕಣ್ಣಲ್ಲಿ - ಬೇರು ಅದರದ್ದು ಎದೆಯಲ್ಲಿ...
ಕಾಣೋ ಕಣ್ಣಲ್ಲಿ ಸಾಸಿರ ಬಣ್ಣ - ಮಿಡಿವ ರುದಯದಲದರ ಜೀವಕಣ...
ಎದೆಯ ಸಗ್ಗದ ಹಾಡು ನೀನು - ಆ ಕನಸ ಬಣ್ಣ ಜೇನು...
ನಗೆಯ ಹರಸಿ ನಿನ್ನ ಹಾದಿಗೆ - ಬೆಳಕ ತುಂಬಿಕೊಂಡೆ ನನ್ನೆದೆ ಬೀದಿಗೆ...
ಚಿಗುರು ಪಾದ - ನೆರಳ ಬೆರಗು - ಬಾಳಂತಿ ಬೆಳಕು - ಕನಸು ಕಂದ...
#ಸುಗ್ಗಿ_ಬಾಗಿಲ_ಹೋಳಿ...
↜↺↻↜

ಬೊಗಸೆಯಷ್ಟು ಕೊಟ್ಟೆನಾ (?) - ಸಾಗರವಾಗಿ ತುಂಬಿ ತೊನೆದು ತೋಯಿಸಿತು...
#ಹೆಣ್ಮನದ_ಪ್ರೀತಿ...
↜↺↻↜

ಇಲ್ಲಿ ಯಾರೂ, ಯಾವುದೂ ಇಡಿ ಇಡಿಯಾಗಿ ದಕ್ಕುವುದಿಲ್ಲ...
ಆಪಸ್ನಾತೀಲಿ ಸಿಕ್ಕ ಹಿಡಿಹಿಡಿ ತುತ್ತುಗಳಲಿ ರಕ್ಕಸ ಹಸಿವು ನೀಗುವುದಿಲ್ಲ...
#ಜಗ_ಬಯಸೋ_ನಾನು_ನನ್ನೊಳಗೇ_ಇಲ್ಲ...
↜↺↻↜

ಬೆಳುದಿಂಗಳನೇ ಮೆದ್ದು, ಹಾಸಿ, ಹೊದ್ದು ಮಲಗಿದ ಮಲೆ ಸಾಲಿನ ಅನಿರ್ವಚನೀಯ ಪ್ರಶಾಂತಿ - ತೋಟದಂಚಿನ ಕೊಳದ ದಡದಲಿ ಏನೋ ವಟಗುಡುವ ಏಡಿ - ಹಿಂಡು ಮೋಹಿನಿಯರ ಕಾಲ್ಗೆಜ್ಜೆ ದನಿಯ ಅನುಕರಿಸೋ ಜೇಡ - ಶರಂಪರ ಜಗಳವೇನೋ ಎಂಬಂತೆ ಅರಚಾಡೋ ಮಿಲನಾಕಾಂಕ್ಷೀ ಜೋಡಿ ಬೆಕ್ಕುಗಳು - ಸುಳ್ಳೇ ಗುರ್ರ್ ಅಂದು, ಕತ್ತು ಕುಣಿಸಿ ಪಟಪಟ ಸದ್ದಿನಿಂದ ತನ್ನ ಎಚ್ರವನು ಘೋಷಿಸೋ ಕಾವಲು ಬಂಟ ಪಾಂಡು ಕುನ್ನಿ - ನಾಚಿಕೆಯ ಗೂಡಿಂದ ಕಣ್ತೆರೆದು ಅರಳುವ ಪಾರಿಜಾತದ ಯೌವನ - ಕಿವಿಯ ಚಾಮರ ಬೀಸಿಕೊಳ್ಳುತ್ತಾ ಹಗಲು ಉಂಡ ಹುಲ್ಲನ್ನು ಮಲಗಿ ಮೆಲುಕು ಮಾಡೋ ಕೊಟ್ಟಿಗೆಯ ಕೂಸುಗಳು - ಛಳಿ ಸುರಿದು ತಬ್ಬುವ ಹನಿ ಹನಿ ಇಬ್ಬನಿ - ಅಮ್ಮನ ರೆಕ್ಕೆ ಅಡಿಯಲ್ಲೇ ಕನಸ ಹೆಕ್ಕಿ ಮೈಮುರಿಯೋ ಅಜ್ಞಾತ ಹಕ್ಕಿ ಮರಿ - ರಾತ್ರಿ ರಾಣಿಗೂ, ಸೂಜಿ ಮಲ್ಲಿಗೆಗೂ ಗಾಳಿಗೆ ಗಂಧ ಸವರುವ ಜಿದ್ದಾಜಿದ್ದಿ - ಅಂಗಳದಂಚಲಿ ದಿವ್ಯ ಮೌನವೊಂದು ಅಪ್ಪಟ ನೈಸರ್ಗಿಕವಾಗಿ ಆವರಿಸಿ ಅಪಾದಮಸ್ತಕ ನಶೆ ತುಂಬುವ ತುರೀಯ ಕ್ಷಣ, ಆ ನಿಶಾಂತ ಘಳಿಗೆ ಕವಿ ಪ್ರೇಮಿಯಾಗುವ ಹಾದಿಯ ಶುರುವಾತು...
#ತುಂಡು_ಸ್ವರ್ಗ...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

ಗೊಂಚಲು - ಮುನ್ನೂರಿಪ್ಪತ್ತೈದು.....

 ಬದುಕು ಎಷ್ಟು ಚಂದದ ಭ್ರಮೆ.....

ಆಗಿದ್ದ ನಾನು ಈಗಿಲ್ಲಿ ಸಿಗುವುದಿಲ್ಲ - ಇಲ್ಲಿ ನಾನೂ ಪೂರ್ಣ ನನ್ನವನಲ್ಲ...
#ಬದುಕೇ_ಒಡೆದ_ಕನ್ನಡಿ...

ಇಲ್ಲಿ ಎಲ್ಲವೂ ನಶ್ವರ ಎಂಬ ವೇದಾಂತದ ಹೆಗಲು ಜೋತು ಕಾಲುಬಡಿಯುತ್ತಾ ನೋವುಗಳ ದಾಟಿ, ನಂಗೆ ಸಾವೇ ಇಲ್ಲ ಎಂಬಂತೆ ರಣ ಮೋಹದಲ್ಲಿ ಓಲಾಡುತ್ತಾ ಬದುಕಿಬಿಡುವುದು...
#ಬದುಕು_ಎಷ್ಟು_ಚಂದದ_ಭ್ರಮೆ...

"ಅಳುತ್ತಾ ಬಂದಿದ್ದೇನೆ - ನಗುತ್ತಾ ಹೊರಡಬೇಕು.‌‌.."
ಇದಿಷ್ಟೇ ನಿರೀಕ್ಷೆ ಇಲ್ಲಿಂದ...
#ಬಾಳ್ಮೆ..‌.
↜↟↡↝

ಮನೆಯ ಕಿಬ್ಳಿಗೆ ಹಕ್ಕಿ ಗೂಡು ಕಟ್ಟಲು ಅನುವು ಮಾಡಿಕೊಡುವುದಕ್ಕೂ, ಮಾಡಿಗೆ ಪಂಜರವ ನೇತಾಕಿ ಅದರಲ್ಲಿ ಹಕ್ಕಿಯ ಸಾಕುವುದಕ್ಕೂ ರೆಕ್ಕೆಯ ಸ್ವಾತಂತ್ರ್ಯದ ಸಾಮರ್ಥ್ಯ ಹಾಗೂ ಸೌಂದರ್ಯಗಳ ಹುಟ್ಟು ಸಾವಿನಷ್ಟು ಅಂತರವಿದೆ...
ಏನಿಲ್ಲ -
"ಹಕ್ಕಿಯನ್ನು ಹಕ್ಕಿಯಾಗಲು ಬಿಡುವಾ - ಹಾದಿಗೆ ನೆರಳಾಗಲಾಗದಿದ್ದರೂ ಅಡ್ಡಿಲ್ಲ, ಕನಿಷ್ಟ ಬೇಲಿಯಾದರೂ ಆಗದೇ ಇರುವಾ..."
ಒಂದು ಹೆಜ್ಜೆ ಪ್ರೀತಿಯೆಡೆಗೆ... ಅಷ್ಟೇ...
#ಭಾವ_ಬಂಧ_ಸಂಬಂಧ_ಇತ್ಯಾದಿ_ಇತ್ಯಾದಿ...
↜↟↡↝

ಮಳೆ ಸುರಿಸೋದು ಕಪ್ಪು ಮೋಡವೇ ಆದರೂ ಕಣ್ಣು ಸೋಲುವುದು ಕಾಮನಬಿಲ್ಲಿಗೇ...
ಕತ್ತಲ ಸೌಂದರ್ಯಕ್ಕೆ ಬೆಳಕಿನ ಸಾಕ್ಷಿ ಕೇಳುತ್ತಾರೆ...
ಸತ್ಯವನ್ನೂ ಬಣ್ಣದಲ್ಲದ್ದಿ ಹಂಚುವುದ ಕಲಿಯಬೇಕಿದೆ...
#ಬಣ್ಣ_ಬೆಡಗಿನ_ಸೋಗಲಾಡಿ_ಬದುಕು...
↜↟↡↝

ಬದುಕು ಭಾರ - ಸಾವು ದೂರ - ಎದೆ ಬತ್ತಿದರೆ ಕಣ್ಣ ದೂರಬಹುದೇ...
ಅವಳ ಕರುಳ ಧುನಿಯ ಕೂಗಿಗೆ ಉತ್ತರಿಸೋ ಶಕ್ತಿ ನಂಗೆಲ್ಲಿಂದ ಬರ್ಬೇಕು...
ನಾ ತೊರೆದ ಹಾದಿಯಾ ಊರಿಗೇನ ತೋರಲೆಂತು...
ದೂರುವುದಾದರೆ ಕಾಲನ ದೂರಬೇಕು - ಅದೂ ಗಟ್ಟಿ ಸಾಕ್ಷಿಗಳಿಲ್ಲದೆ...
ಉಳಿದ ಚೂರು ಉಸಿರನ್ನು ನಿದ್ದೆಯ ಉಡಿಗೆ ಹಾಕಿ - ಜಾರಿಕೊಳ್ಳಲಾಸೆ ತೀರಿತೆಂದು ಪಡೆದೆಲ್ಲ ಬಾಕಿ....
.......ನದಿ ಬತ್ತುವ ಕಾಲ...
#ಬೆಕ್ಕಿನ_ಮರಣದಂತಾ_ಸಾವು_ಬರಬೇಕು...
↜↟↡↝

ಪ್ರತಿ ಸರ್ತಿಯೂ ಹೊರಡೋ ಸಮಯಕ್ಕೆ ಸರಿಯಾಗಿ ನೀನು ಕರೆದಂಗಾಗುತ್ತೆ ಬಾಗಿಲ ಕಿಬ್ಳಿಯಿಂದ - ಮತ್ತೆ ಉಳಿದುಬಿಡುತ್ತೇನೆ ಇದೇ ನರಕದಲ್ಲಿ...
#ನೆಪ...
↜↟↡↝

ನಿನ್ನ ಅಬೋಧ ಕಂಗಳಲ್ಲಿ ನಿನ್ನೆದೆಯ ತಲ್ಲಣಗಳು, ಬೆಸೆದ ಬೆರಳುಗಳ ಬಿಸುಪಿನ ಬಿಗಿಯಲ್ಲಿನ ಹಂಬಲಗಳು, ಕಿಬ್ಬೊಟ್ಟೆಯಾಳದ ಕಂಪನಗಳೆಲ್ಲ ಬಿಳಿ ಗೋಳದ ಕಪ್ಪು ಚಿತ್ರಗಳಾಗಿ ತುಯ್ಯುವಾಗ ನನ್ನ ನಿಸ್ತೇಜ ನೋಟ ಬೇಕೆಂದೇ ಚುಕ್ಕಿಗಳ ಎಣಿಸುತ್ತವೆ...
ಹೃದಯ ಸೋತದ್ದನ್ನು ರೆಪ್ಪೆಗಳಲಿ ಮುಚ್ಚಿಟ್ಟು ಏನೂ ಅರಿಯದವನಂತಿರುವುದು ಅಲಿಖಿತ ಒಪ್ಪಂದದಂತ ನಿನ್ನ ಆಸೆ ಮತ್ತು ನಂಗಂಟಿದ ಶಾಪ...
ದೋಷ ತಟ್ಟದಂಗೆ ಮನಸಿನ ಆಣೆಗಳ ಮೀರುವ ದಾರಿಯಿದ್ದರೆ ಹೇಳಬಾರದೇ...
#ಬೇಲಿಗಳು...
↜↟↡↝

ಹುಟ್ಟು ಒಂಟಿ, ಸಾವು ಒಂಟಿ, "ಮಾತು ಕೊಂದುಕೊಂಡು" ತುಂಡು ಬದುಕನ್ನೂ ಹುಚ್ಚು ಬೇವರ್ಸಿಯಾಗಿಸಿಕೊಳ್ಳುವುದರಲ್ಲಿ ಯಾವ ಸಾರ್ಥಕತೆ ಇದೆ ಹೇಳು...
#ಪ್ರೀತಿ...
↜↟↡↝

ಎದುರಿನ ನಗುವನ್ನು ಬಗೆಯುವ ಸಾಹಸ ಮಾಡಲಾರೆ - ಆ ಒಡಲೊಳಗಣ ಬೆಂಕಿ ಎದೆಯ ಸುಟ್ಟೀತೆಂಬ ಭಯವಿದೆ...
#ಹೊಟ್ಟೆಯೊಳಗಣ_ಗುಟ್ಟು...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

ಗೊಂಚಲು - ಮುನ್ನೂರಿಪ್ಪತ್ನಾಕು.....

ಪ್ರೀತಿ ಪಲುಕು.....

ನಿನ್ನೆದೆಗೆ ಕಿವಿ ಹಚ್ಚಿ
ತನ್ಮಯದಿ ಕಣ್ಮುಚ್ಚಿ
ಉಸಿರ ಲಯದಲೆಯ ಸೋಂಕಿಗೆ ತುಟಿಕಚ್ಚಿ
ಮಳೆಗೆ ಮಣ್ಣ ಕಣಕಣವೂ ಅರಳೋ ಸೃಷ್ಟಿಶೀಲ ಚೆಲುವನರಿತೆ‌‌‌‌...
#ಪ್ರೀತಿ_ಸಮಾರಾಧನೆ...

ನಿನ್ನ ಹಿತವಾಗಿ ಕಾಡುತ್ತಾ
ನಿನಗಾಗಿ ಅನವರತ ಕಾಯುತ್ತಾ
ನಿನ್ನೊಡನಾಡಿ ನೆನಪುಗಳ ಆಡುತ್ತಾ
ನಿನ್ನಂತೆ ಮರಮರಳಿ ಅರಳುತ್ತೇನೆ...
ನಿನ್ನೆದೆ ಪ್ರೀತಿಯನೇ ಹಾಡುತ್ತೇನೆ...
#ಉಪಾಸನೆ...

ಎದೆ ಅಂಗಿಗೆ ನಿನ್ನ ವಾಸನೆ ಅಂಟಿದಾರಭ್ಯ
ಹಗಲ ಕಣ್ಣಿನ ನಗೆಯ ಹಸಿರು
ಇರುಳ ತೋಳಲ್ಲಿ ಉರಿವ ಉಸಿರು
ಗರ್ಭ ಗೂಡಲ್ಲಿ ಜೀವಾಂಶದ ಅಲರು
ಅದೆಲ್ಲ ದಾಹಕ್ಕೂ ನಿನ್ನದೇ ಹೆಸರು...
#ಪ್ರೀತಿ_ಸಂರಚನೆ...

ಗೊಂಚಲು - ಮುನ್ನೂರಿಪ್ಪತ್ತ್ಮೂರು

ಆಯಿ ಎಂಬೋ ಅಶ್ವತ್ಥ..... 

ಕನಸು ನೇಯೋದು ಮತ್ತು ಗೂಡು ಕಟ್ಟೋದು ಎರಡೂ ಬೇರೆ ಬೇರೆಯದೇ ಕ್ರಿಯೆಗಳಿರಬೇಕು ಅವಳಿಗೆ ಅಥವಾ ತೆರೆದರೆ ಎರಡನೂ ಒಂದಾಗಿಸೋ ಬಾಗಿಲ ಭದ್ರಪಡಿಸಿ ಬುಧ್ಯಾಪೂರ್ವಕ ಕೀಲಿಕೈ ಮರೆತಿದ್ದಿರಬೇಕು ಅವಳು...

ಹೊಲಿಗೆ ಬಿಟ್ಟೋದ ಕನಸ ದೋತರಗಳೆಲ್ಲ ಗೂಡ ಬೆಚ್ಚಗಿಡೋ ದುಪ್ಪಟಿಯಾಗುತ್ತವೆ, ಇಲ್ಲಾ ಕಿಟಕಿಯ ಬೆಳಕ ತಡೆಯುವ ಬಣ್ಣದ ಪರದೆಗಳಾಗ್ತವೆ ಅವಳಲ್ಲಿ... 

ಮೋಡಕ್ಕೆ ರೆಕ್ಕೆಯ ಹುಡಿ ಸೋಕಿಸುತೇನೆ ಅಂತ ಅಂಗಳದಿಂದ ಸಬಂದು ಆಗಸಕೇ ಚಿಮ್ಮುತ್ತಾಳೆ - ಬಾಗಿಲ ವಾಡೆಯಲಿ ಮಗು ಮಿಸುಗುತ್ತೆ - ರೆಕ್ಕೆ ಇದ್ದದ್ದು ಬಯಲ ಅಳೆಯೋದಕ್ಕಲ್ಲ ತೊಟ್ಟಿಲ ಹಸಿವ ಹರಿಯೋದಕ್ಕೆ ಅಂತ ದುಗುಣೀ ವೇಗದಲಿ ಗೂಡು ಸೇರಿ ಕಣ್ಹನಿ ಬೆರೆತ ಬೆವರಲ್ಲಿ ಅಕ್ಕಿ ತೊಳೆದು ಅನ್ನಕ್ಕಿಡ್ತಾಳೆ...

ಕನಸಾದರೋ ಎದೆಯಿಂದ ನೇಯ್ದದ್ದು, ಕಣ್ಣೀರಲ್ಲಿ ಬಳಿದುಬಿಡಬೋದು ಮತ್ತು ಬಳಿದೂಬಿಡ್ತಾಳೆ - ಗೂಡು ಹಾಗಲ್ಲ, ಕರುಳಿಂದ ಕಟೆದು ಎದೆಯ ಸುತ್ತ ಬಂದೋಬಸ್ತಾಗಿ ಕಟ್ಟಿದ ಕಲ್ಲು ಮಂಟಪ; ಹಾಗೆಂದೇ ಕಣ್ಣೀರ ಕಣ್ಣಲ್ಲೇ ಇಂಗಿಸಿಯಾದರೂ ಕಾಯುತ್ತಾಳೆ...

ಕೊಡುವುದೇ ಆದರೆ ಎಷ್ಟು ಕೊಟ್ಟೇನು, ತೂಗಿದರೆ ಎಷ್ಟು ಪ್ರೀತಿ ಸಮ - ಗೂಡು ಕಾಯಲು ತನ್ನದೇ ಕನಸುಗಳ ಹೆಣಗಳ ಬೇಲಿ ಕಟ್ಟುವವಳಿಗೆ...

"ಹೆಸರು ಬೇಕಿಲ್ಲ ಅವಳಿಗೆ; ಕರುಳಿಂದ ಬೆರಳ ಬೆಸೆದವಳಿಗೆ..."

#ಆಯೀ...

ಮೊಲೆ ಹಾಲ ಅಮೃತ ಕುಡಿಸಿ ಬೆಳೆಸಿದವಳು, ಆದರೂ ಅವಳಿಗೆ ಬೇರೆ ಪ್ರಶ್ನೆಗಳೇ ಗೊತ್ತಿಲ್ಲ... 
ಉಂಡ್ಯಾ...? ಅರಾಮಿದ್ಯಾ...?? ಅದೆರಡೇ... 

#ಆಯಿ_ಎಂಬೋ_ಅಶ್ವತ್ಥ... 

ಕಾಯುತ್ತಾ ಕೂತ ಕಣ್ಣುಗಳ ನೀರು ಬತ್ತದ ಹಾಗೆ ಕಾಯ್ದು ಕೊಡುವ ಗರ್ಭಸ್ಥ ಮೋಡ "ಅವಳು..."
ಹಬ್ಬವೆಂದರೆ "ಅವಳ" ನಗು... ☺️
#ಅಂತರಂಗದ_ನೀರಾಂಜನ... 

ಬಸುರಿ ಮೋಡದ ಮೌನ...
ಕರುಳ ಗಂಟಿನ ನಂಟು...
ಹಾಡು ಹಾದಿಯ ಧ್ಯಾನ...
ಹೂವ ಹಿಗ್ಗಿನ ಬೇರು...
ಕನಸ ಬೀದಿಯ ದೀಪ್ತಿ...
ಕಾಯ ಕೆತ್ತುವ ಮಣ್ಣು...
ಉರಿವ ಉಸಿರಿನ ಆಜ್ಯ...
ನನ್ನ ಹಕ್ಕಿನ ಮಡಿಲು...
#ಅವಳ_ಪ್ರೀತಿ...
#ಆಯಿ...

ಒಳಗಡಿಯಿಡಲು ಯಮನಿಗೂ ಭಯವಾಗುವಂತೆ ಬದುಕ ಆವರಿಸಿಕೊಳ್ಳೋ ದೃಢ ಜೀವನ್ಮೋಹಕ್ಕೆ ನಿನ್ನದೇ ಹೆಸರು...
#ಆಯೀ...

ತನ್ನನೇ ಅನ್ನವಾಗುಣಿಸಿ ನನ್ನ ಕೆತ್ತಿದವಳು...  
ಎದೆಯ ಅಮೃತ ಹನಿಸಿ ಉಸಿರನೂಡಿದವಳು...
ತನ್ನೊಳಗೆ ತಾ ನಗಬೇಕೆನಿಸಿದಾಗಲೆಲ್ಲ ನನ್ನ ಸಿಂಗರಿಸಿ ನೆಟಿಗೆ ಮುರಿದವಳು...
ಆಯಿ ಎಂಬ ಮಮತೆ ಅಗುಳು...
"ಇಂದು ಅವಳು ಜಗಕೆ ಕಣ್ದೆರೆದ ದಿನ..."
ಅವಳು ಅವಳಮ್ಮನ ಮಡಿಲ ತುಂಬಿದ ಶುಭದಿನ...

ಏನಂತ ಬರೆಯಲಿ ಅವಳೆಂಬ ದಿವ್ಯವ - "ಆಯಿ" ಅಂದರೇ ಒಂದು ಮಹಾ ಕಾವ್ಯ... 

ಜಾತ್ರೆಯ ಕೆಂಡ ಹಾಯ್ದಷ್ಟು ಸುಲಭವಲ್ಲ ಬದುಕಿನ ಹಳವಂಡಗಳ ದಾಟುವುದು... 
ಸೋಲು, ನೋವು, ಅವಮಾನಗಳ ಹೆಡೆಮುರಿ ಕಟ್ಟುವ ಅದೆಂತಾ ಸೊಕ್ಕು ನಿನ್ನಲ್ಲಿ - ಯಾವ ನೀರು ಕುಡಿದರೆ ಆ ಧಾಡಶೀತನ ಮೈಗೂಡೀತು ಹೇಳು... 
ಕರಡಿಯಂತೆ ಬದುಕನಪ್ಪಿ ಎಪ್ಪತ್ತೆರಡು ಗ್ರೀಷ್ಮಗಳನು ತುಟಿಕಚ್ಚಿದ ನಗೆಯಲ್ಲೆ ಪ್ರಸಾದದಂತೆ ನುಂಗಿ ವಸಂತದಂತೆ ಮೆರೆದ ಮಗುಮನದ ಹುಚ್ಚು ಹುಡುಗೀ - ಪ್ರೀತಿ ಪಪ್ಪಿಯೊಂದಿಗೆ ಮುದ್ಮುದ್ದು ಶುಭಾಶಯ ಕಣೇ...
ಪ್ರೀತಿ ಪ್ರೀತಿ ಮತ್ತು ಪ್ರೀತಿಯಷ್ಟೇ... 
ಲವ್ ಯೂ ಸುಂದ್ರೀ... 😘😘

ಗೊಂಚಲು - ಮುನ್ನೂರಿಪ್ಪತ್ತೆರ್ಡು.....

ಆಯುಷ್ಯರೇಖೆ..... 
(ಒಂಭತ್ತು ದಾಟಿ ಹತ್ತರ ಬಾಗಿಲಿಗೆ...)  

ಈ ಬಕ್ಕಬಾರಲು ಬಿದ್ದ ಬರಡು ಎದೆ ನೆಲದ ಮೇಲೆ ನಿನ್ನ ಪ್ರೀತಿ ಪಾದಪಲ್ಲವವನೂರು - ಉತ್ತರಾಯಣ ಪುಣ್ಯ ಕಾಲವಂತೆ...
ನೆತ್ತಿಗೇರಿದ ಖೂಳ ಮದಗಳೆಲ್ಲ ಮಣ್ಣು ಸೇರಲಿ - ಅಕ್ಷಯವಾಗಲಿ ನಗೆಯ ಹುಗ್ಗಿ ಎದೆಯ ಭಾಂಡದಲಿ.‌‌..
"ಬಿತ್ತಿದ ಪ್ರೀತಿ ಕಾಳು - ತೆನೆ ತೆನೆ ತೊನೆವ ಪ್ರೀತಿ - ಬಳ್ಳ ಬಳ್ಳ ನಗೆಯ ಕೌಸ್ತುಭ..."
ಸುಗ್ಗಿಯ ಶುಭಾಶಯ... 
     ___15.01.2020
↜↯↹↯↝

ಬಡಿದು ಉಂಬಲೆ ಬಾಳೆ ತುಂಬಾ ನೋವು - ಬಾಳೆ ತುದಿಯಲಿ ನಾಲಿಗೆಗೆ ನೆಂಚಿಕೊಳ್ಳಲು ಚಿಟಿಕೆ ನಗು - ನಿತ್ಯ ಸಮೃದ್ಧ ಭೋಜನ...
ಬದುಕೇ -
ನೀ ಸೆರೆ ಬಿಡಿಸಿ ಕೊಡುವ ಅತಿ ಸಣ್ಣ ಖುಷಿಯನೂ ದೊಡ್ಡದಾಗಿ ಸಂಭ್ರಮಿಸುತ್ತಾ, ಅದೇ ನೀನು ಎತ್ತಿ ಕೊಡುವ ಸಣ್ಣ ನೋವಿಗೂ ಬಹುವಾಗಿ ನರಳುತ್ತಾ; ಹೀಗೆ ಸಾಗುವ ಹಾದಿಯಲ್ಲೀಗ ಉಸಿರನೇ ಸೀಳುವ ದೊಡ್ಡ, ಅಡ್ಡ ನೋವೂ ಅಷ್ಟೇ ಹರಹಿನ ನಗುವಾಗಿ ತುಟಿ ಬಿರಿಯುತ್ತದೆ...
#ಕಣ್ಣ_ಹನಿಯೂ_ಉಸಿರಿನಷ್ಟೇ_ಬಿಸಿ...
↜↯↹↯↝

ನನ್ನ ಹೆಣದ ಕಣ್ಣಲ್ಲಿ ಹಾಗೇ ಉಳಿದ ನಗು - ನಿನ್ನ ಕುಂಚದ ಕವಿತೆ...
#ಬದುಕ_ಮೇಜವಾನಿ...
↜↯↹↯↝

ಇಂತಿಪ್ಪಂತೆ ಮಾಯದ ನಿದ್ದೆ ಕವಿದರೆ ನಿನ್ನನ್ನೂ ಮರೆಯಬಹುದು...
#ನೀನೆಂದರೆ_ನಾನೂ...
↜↯↹↯↝

ನನ್ನೊಳಗೆ 'ನಾನು' ಸತ್ತು 'ನೀನು' ಹುಟ್ಟುವ ಹಾದಿ...
#ಧ್ಯಾನ...
↜↯↹↯↝

ದಡಕಪ್ಪಳಿಸೋ ನೀರಿನ ಹೋರು - ಬಕ ಧ್ಯಾನ - ಮೀನಿನ ಜಾತಕದಲ್ಲಿ ಮರಣ ಮುಹೂರ್ತ.‌‌..
#ನಾನೆಂಬ_ವಿಕ್ಷಿಪ್ತ...
↜↯↹↯↝

ಚಿತೆಯೊಂದಿಗೆ ಮಾತಿಗಿಳಿದೆ - ಬದುಕಿನ ಅಡುಗೆಗೀಗ ಹಳಸದ ಹದ...
#ನಿರ್ಮೋಹ...
↜↯↹↯↝

"ಬಡವ ನಾನು ಬದುಕು ಶ್ರೀಮಂತ ನಂದು - ನಿನ್ನಿಂದ..."
ಉಹೂಂ...
ನೀನೆಂದೂ ಸಿಗಲೇಬಾರದು...
ಸಿಕ್ಕು ಬಿಟ್ಟರೆ ಸಿಕ್ಕ ಆ ತಿರುವಿನಾಚೆ ನಿನ್ನ ಹುಡುಕುವ ತಲ್ಲಣಗಳೊಂದಿಗೆ ಬೆಸೆದುಕೊಂಡ ಜೀವೋನ್ಮಾದ ಸತ್ತು ಹೋದೀತೆಂಬ ಭಯವಿದೆ...
ಹರಿಯುತ್ತಲೇ ಇರಬೇಕು - ನಿಲ್ದಾಣದ ಕನಸು, ಖಬರು ಒಂದೂ ಇಲ್ಲದೆ...
ಹರಿವಿನ ಹಾದಿಯಲಿ ಒಂದೋ ಸಾಗರ ಸಂಗಮ, ಇಲ್ಲಾಂದ್ರೆ ಭುಜಗಳಲಿ ಹಸಿರ ಸಿರಿ ವಿಹಂಗಮ - ಎರಡೂ ನನ್ನ ಪ್ರೀತಿಯನುಂಡೇ ಅರಳಿದ ಆಲಾಪಗಳು...
#ವಿಹ್ವಲವಿಸ್ತಾರ...
↜↯↹↯↝

ನೀರಂತೆ ನಾನು...
ಬಿಟ್ಟು ಚೆಲ್ಲಿದರೆ ಹೊರಗೆ, ಬೊಗಸೆ ತುಂಬಿ ಹೀರಿದರೆ ಒಳಗೆ - ಒಟ್ನಲ್ಲಿ ಹರಿವೊಂದೇ ನನ್ನ ಅನವರತ ಅಸ್ತಿತ್ವ...
#ಗೆಳೆತನ...
↜↯↹↯↝

"ಮಸಣವೇ ಮನೆಯಾದರೂ ಮೌನದ ಭಯ ಜೀವಕೆ..."
ಯಾವ ಹಾಡ ಹಾಡಲಿ - ಉಸಿರು ಸತ್ತ ದನಿಯಲಿ...
#ನೀರವ_ಕುಲುಮೆ...
↜↯↹↯↝

ಉಸಿರೇ -
"ಬಂಧಿಸಿಟ್ಟರೂ ಬಯಲನಾಳುವ ಬೆಳಕು: ಪ್ರೀತಿ ಲಾಲಿ..."
ದಿನದ ಯಾಪಾರ ಮುಗಿಸಿ ಹಾಸಿಗೆಯ ಸುರುಳಿ ಬಿಚ್ಚೋ ಹೊತ್ತಿಗೆ ಎದೆ ಸಂದೂಕದಲಿ ನಾಕಾಣಿಯಷ್ಟಾದರೂ ಪ್ರೀತಿ ಪ್ರಾಪ್ತಿ ಉಳಿಯಲಿ...
ಇರುಳ ತಬ್ಬೋ ದಿಂಬಿಗೂ ನಗೆಯ ಬಿಂದಿ ಅಂಟಲಿ...
ನಾಳೆ ಅಂಬೋ ಕನಸಿಗೂ ಹುಡಿ ಅಣುಗು ಸೋಂಕು ದಾಂಟಲಿ...
#ಅನುರಾಗದಂಬುಧಿ...
↜↯↹↯↝

ಸೂರ್ಯ ತುಳಿದಾಳುವ ಹಾದಿಯ ಇಬ್ಬನಿಯ ಹನಿ ನಾನು - ಮಾತುಮೌನಗಳನೂಳಿ ದಿವ್ಯವ ಬೆಳೆದು ರಸಿಕರಾತ್ಮವ ಕಡೆವ ಕಬ್ಬಿಗರ ಸಭೆಯ ಧೂಳು...
#ನಾನೆಂದರಿಲ್ಲಿ_ಬರಿ_ಮೂಕಧಾತು...
↜↯↹↯↝

ತಾನೆಲ್ಲಿದೀನಿ ಅಂತ ತನಗೇ ತಿಳಿಯದಷ್ಟು ಬಣ್ಣ ಮಾಸಿದ, ಅಂಚುಗಳೆಲ್ಲ ಹರಿದ್ಹೋದ ಆ ಹಪ್ಪು ಹಳೇ ಫೋಟೋದ ಇಪ್ಪತ್ತೋ ಮೂವತ್ತೋ ಚಿಗುರು ಹರೆಯದ ಕಂಪನದ ಮುಖಗಳಲ್ಲಿ ತನ್ನ ಮೊದಮೊದಲ ಎಳಸು ಪ್ರೇಮವೋ, ಬಣ್ಣದ ಕಣ್ಹನಿಯ ನೆನಪೋ ಏನೋ ಒಂದು, ಎಂದೋ ತಾಕಿ ಹೋದ ಅಲೆಯ ಒಂದೊಂದೇ ಹನಿ ಹನಿ ತಿಳಿನಗುವನ್ನು ತಿಣುಕಾಡಿ ಹುಡುಕೋ ನಡು ಮುರಿದ ವಯಸಿನ ಚಶ್‌ಮಿಶ್ ಕಣ್ಣುಗಳು - ಮನಸಿನ ಬೆನ್ನ ಮೇಲೆ ಹಿನ್ನೋಟದ ಚಿನ್ನಾಟದ ಕೂಸುಮರಿ...

ಭಯಭಯದ ಬೆವೆತ ಮುಟ್ಟಿಯಿಂದ ಹಾದಿ ತುಂಬಾ ಬಿತ್ತುತ್ತಾ ಬಂದ ಬೆಲ್ಲದ ಭಾವದ ಕನಸ ಬೀಜಗಳಲ್ಲಿ ಮಣ್ಣ ತಿಂದು ಮರವಾದದ್ದೆಷ್ಟೋ, ಮಣ್ಣೇ ತಿಂದವುಗಳೆಷ್ಟೋ - ಬಿದ್ದ ಗಾಯದ ಗುರುತು ಗೆದ್ದ ಹೆಗಲಿಗೂ ಪದಕ...

ಹಲ್ಲು ಹುಟ್ಟದ ಹಾಲುಗಲ್ಲದಿಂದ ಹಲ್ಲೆಲ್ಲ ಉದುರಿದ ಬೊಚ್ಚುಗೆನ್ನೆಯವರೆಗೆ "ಹಾಯ್ದು ಬಂದ ನಿನ್ನೆಗೆ ಕಾಲವೇ ಬೇಲಿ..."
#ಕಾಲನುಕ್ಕಡದಿ_ಕಳೆದೇ_ಹೋದವರು... 

ನಾನೆಲ್ಲಿದೀನಿ...?

↜↯↹↯↝

"...... ಮತ್ತೆ ಎಲ್ಲಾ ಅಲ್ಲಿಂದಲೇ ಶುರುವಾಗುವಂತಿದ್ದಿದ್ದರೆ ಅಂತನ್ನಿಸೋ ಹೊತ್ತಿಗೇ; ಬೀಳು ಬೀಳಲು ಬಿಡದೇ ಬಿತ್ತುತಿರು ಎದೆ ಗದ್ದೆಯಲಿ ಮುಟಿಗೆ ಪ್ರೀತಿ ಬೀಜವ ಈ ಮುಂದೆಯೂ ಎಲ್ಲ ಚೆಂದವೇ ಇದೆ ಮರುಳೇ ಅಂತಂದು ಹೆಗಲ ತಬ್ಬುತ್ತದೆ ಬದುಕು..."

ಒಂದು ಸಣ್ಣ ಸಂತಸ:
ಬ್ಲಾಗ್ ಎಂಬೋ ನಂದ್‌ನಂದೇ ಅನ್ನುವ ನನ್ನ ಈ ಹುಚ್ಚುಚ್ಚು ಅಕ್ಷರ ಜಾಲ ತೇಕುತ್ತಾ, ತೆವಳುತ್ತಾ, ತಡವರಿಸುತ್ತಾ ಅದು ಹೇಗೋ ಒಂಭತ್ತು ವರುಷಗಳ ದಾಟಿ ಹತ್ತನೇ ವಸಂತಕ್ಕೆ ಹಾಯುತ್ತಿದೆ - ನಾನೇ ಬೆಚ್ಚುವ ಹಾಗೆ...
ಮುರಿದ ಸಂಸಾರದ ವಾರಸುದಾರನ ಬಾಯಲ್ಲಿ ಪ್ರೇಮಮಯೀ ಲೋಕದ ಭಾಷಣ ಓತಪ್ರೋತ...

ಗಹನ ಓದಾಗಲೀ, ಸಾಹಿತ್ಯದ ಗಂಧ ಸಾಂಗತ್ಯದ ಕಸುವಾಗಲೀ, ಗಟ್ಟಿ ನಡೆಯುವ ಯಾವ ತಯಾರಿಯಾಗಲೀ ಇಲ್ಲದ - ವ್ಯಾಕರಣದ ಗುಣ, ಮಾತ್ರೆ, ಪ್ರಾಸ, ತ್ರಾಸಗಳ ಒಡ್ಡೋಲಗದ ಕಿಂಚಿದ್ ಅರಿವೂ ಇಲ್ಲದೇ ಕೇವಲ ಭಾವಾನುಭಾವದ ಸ್ಪಂದನೆಯನಷ್ಟೇ ನಂಬಿ ಅಕ್ಷರಗಳ ಹೆಣೆಯುತ್ತ ಬಂದವನ ಬಡಬಡಿಕೆಗಳನೂ ಅರ್ಹತೆಗೆ ಮೀರಿದ ಪ್ರೀತಿ ತೋರಿ ಓದಿಕೊಂಡವರು ನೀವುಗಳು...

ಕರುಳು ಕಲಮಲಿಸಿ ಕಣ್ಣು ತೋಯ್ದಾಗಲೆಲ್ಲ ಕೈನೀಡಿದ್ದು ನೇಹಗಳು - ಎದೆಯ ಕಿಬ್ಬಿಯ ಬೇಗೆಯ ಹೆಣಭಾರವ ಇಳುಕಿ ಹಗುರಾಗಿಸುತಿರುವುದು ಅಕ್ಷರ... 
#ಸೋಲಗೊಡದ_ಬೆನ್ನಿನಾಸರೆ...   

ಈ ಪಯಣವ ನಚ್ಚಗಿಟ್ಟ ನಗುವೇನಿದ್ದರೂ ಅದು ನೀವುಗಳಿಟ್ಟ ಪ್ರೀತಿ ತುತ್ತು...
ದೈವ ಮುನಿದಾಗಲೂ ಕಾಯ್ದ ಪ್ರತಿ ಜೀವಾಭಾವಗಳ ಮುಚ್ಚಟೆಯ ಅಕ್ಕರೆಗೂ ಆಭಾರಿ...
ಪ್ರೀತಿ ಕಾಯುತ್ತದೆ, ಕಾಯಲಿ ಸದಾ...
ಧನ್ಯವಾದ... ಲವ್ಯೂ ಆಲ್... 💞💞

ಗೊಂಚಲು - ಮುನ್ನೂರಿಪ್ಪತ್ತೊಂದು.....

ನಿಧುವನ ಇಂದ್ರಜಾಲ.....

ಎದೆಯ ಮೇಲೆ ನಿನ್ನುಸಿರ ಘಮವಂಟಿ ಅರಳಿದ ರೋಮಕುಲ...
ಎಡ ಮಗ್ಗುಲಲಿ ತಣ್ಣಗೆ ಹರಳುಗಟ್ಟಿದ ವಿರಹ...
ಬೋರಲಾಗಿ ಸುಖಾಸುಮ್ಮನೆ ಕೆರಳಿ ಕನಲುವ ಪುರುಷ ಪೌರುಷ...
ನರಕವೆಂದರಿಲ್ಲಿ ಒಂಟೊಂಟಿ ಇರುಳು ಮತ್ತು ಮಾಗಿ ಬೇಗೆ...
#ಉಫ್...
⇴↜↯↝⇴

ಅಲ್ಲಲ್ಲಿ ತಿರುವುಗಳಲಿ ಕೆಣಕೋ ತಿಳಿಗತ್ತಲ, ಬೆತ್ತಲೆ ಬೆಳಕಲ್ಲಿ ಹೊಳೆಹೊಳೆವ ಏರಿಳಿವಿನ, ಕತ್ತಲು ಬೆಳಕಿನ ಹೊಕ್ಕುಬಳಕೆಯ ಊರ ನಡು ಕಿರು ಓಣಿಯ ಅವಳ ಮೈ ಚೆಲುವ ಸಿರಿ ಸೀಮೆಯಲಿ ಹಾದಿ ತಪ್ಪಿ ಅಂಡಲೆವ ಬಿಸಿ ಉಸಿರ ಹೋರು ನಾನು...
ಮಾಗಿಯೆಂದರೆ -
ಕಾಮನ ಉಸಿರಿಗಂಟಿದ ರತಿಗೊರಳ ಹೊರತಿರುವಿನ ಘಮಲು - ರತಿಯೆದೆಯೇರಿಯ ದೃಷ್ಟಿ ಮಚ್ಚೆ...
#ಸುರತ_ಸಂಗ್ರಾಮ...
⇴↜↯↝⇴

ಗಾಳಿಯ ಹುಯಿಲಿಗೆ ಅವಳ ಹೆಗಲಿಂದ ಸೆರಗು ಎಗರೆಗರಿ ನಲಿವಾಗ ಬಯಲಲ್ಲೂ ಉಸಿರಿಗೆ ಹೆಣಗುತ್ತೇನೆ...
ಅದೇ ಗಾಳಿ ಸೆಳೆದು ತರುವ ಅವಳ ಭುಜದ ತಿರುವಿನ ಘಮಕೆ ಕರುಳಾಳದಲ್ಲಿ ಜ್ವಲಿಸುವ ಪ್ರಣಯಾಗ್ನಿ ಅಲೆಗಳ ಸಂಭಾಳಿಸಲಾಗದೆ ಕನಲುತ್ತೇನೆ...
ನಾಚಿಕೆಯ ಕಣ್ಣಿ ಕಳಚಿ, ಮುಸ್ಸಂಜೆ ಛಳಿಯ ಮದವಿಳಿಸಿ, ಮತ್ತ ಮೈಮನಕೆ ಸಂಭ್ರಾಂತ ಬೆವರ ಹೊದೆಸೋ ಆಟಕೆ ಅವಳನು ಕೂಗುವುದಕೆ ಹವಣಿಸುತ್ತೇನೆ...
ಉಫ್!!!
ಸಖಿಯ ಅಂದದೆದುರು ಹೋರಿ ಹರೆಯಕ್ಕೆ ಮಾಗಿ ಕೈನೀಡಬಾರದು - ಪೋಲಿ ಜೀವದ ಬೆರಕಿ ಭಾವಗಳನು ಮಾದಕ ಚೆಲುವು ತಾ ಬೆದಕದೇ ಹೋಗದು...
#ನಾಭಿನಾಳದಹುಚ್ಚು...
⇴↜↯↝⇴

ಅಲ್ಲಿನಿತು ಸಂಪದ ಬೆಳಕ ಮೀವಂತೆ ನೀ ಸೆರಗು ಹೊದೆಯೋ ಮಾಟವು, ಅಲೆಯಂತೆ ಅಲ್ಲಲ್ಲೆ ಅಲೆವ ಆ ಕಣ್ಣ ಗೋಳದ ಜೂಟಾಟವು, ಸಣ್ಣ ನಡು ತಿರುವಿನ ಕಿರು ಸುಳಿ ಸೆಳವು, ಅಡಿಯಿಂದ ಮುಡಿತಂಕಾ ಆಸ್ಥೆಯಲಿ ಅಲಂಕರಿಸಿದ ಎಲ್ಲ ಅಂದ ಚಂದ ಮೇಳೈಸಿ ಎನ್ನೆದೆಗಿಳಿಸೋ ಪ್ರಣಯ ಪೇಯವು ಹುಟ್ಟು ಹಾಕೋ ನಶೆಗೆ ನೀ ನೀನಾಗಿ ಸಿಗದೇ ಬೇರೆ ಮದ್ದಿಲ್ಲವೇ ಓ ಮೋಹವೇ...
ಕಾಡುವ, ಕಾಡಿ ಕಾಡಿ ಕೂಡುವ, ಕೂಡಿ ಮತ್ತೆ ಕಾಡುವ ನಿನ್ನ ಕಳ್ಳ ಕಾದಾಟದ ಮಧುರ ಯಾತನೆಯ ಸೆರಗಿನ ಗಂಟಲಿ ಸ್ವಯಂ ಬಂಧಿ ಪರಮ ಸ್ವಾರ್ಥಿ ಪ್ರಣಯಿ ನಾನು...
#ಪ್ರಣಯಾಗ್ನಿರಾಗ...
⇴↜↯↝⇴

ಚಂದಿರ ಅರಳೋ ದಾರಿಯಲಿ ಅಲ್ಲೆಲ್ಲೋ ಉಕ್ಕುವ ಕಡಲು - ಭಗ್ಗೆನ್ನುವ ನದಿಯ ಒಡಲು...
ಕಣ್ಣಲ್ಲಿ ಕನಸಾಗಿ ಕದಲುವಾಗ ನೀನು - ಮುಲುಗುವ ಇರುಳ ಕಾವಲ್ಲಿ ಇಷ್ಟಿಷ್ಟೇ ಬೂದಿಯಾಗುವ ಚಿರ ವಿರಹಿ ನಾನು...
ಒಂಟಿ ಹರೆಯದ ಹದತಪ್ಪುವ ನಶೆಯ ಭಾರಕ್ಕೆ ಹೆಸರು ನೀನು, ನಾನು...
#ನಾಭಿನಡುಕ...
⇴↜↯↝⇴

ಕುಪ್ಪಸ ಕಳಚಿಟ್ಟು ಬೆಳಕ ಹುಡಿ ಹಚ್ಚಿ ತೊಳೆದ ಪೂರ್ಣ ಕುಂಭದ ಆವೇಶದ ಕರೆ, ಹೆಣ್ಣಾಗುವ ಆಸೆ ಮತ್ತು ಹಣ್ಣಾಗುವ ಭಯದಿ ಪಟಪಟಿಸೋ ಕಣ್ಣ ಕವಣೆಯ ಆವೇಗದ ಕೋರಿಕೆ ನನ್ನಲ್ಲಿ ಅಪರಂಪಾರ ಉನ್ಮಾದದಲೆಯೆಬ್ಬಿಸಿ ಸೆಳೆಯುತ್ತದೆ ಅವಳ ಶಯನ ಸಜ್ಜಿಕೆಗೆ...
ರಕ್ಕಸ ಹಸಿವಿನ ಮಾಯದ ತೋಳ್ಗಳ ತೆಕ್ಕೆಯಲಿ ರಕ್ತ ಕುದ್ದು ರೋಮ ರೋಮಗಳೂ ಬೆವರ ಚೆಲ್ಲುವಲ್ಲಿ ಸ್ವರ್ಗ ಹಾಸಿಗೆಯ ಕಾಲಾಳು...
ಕತ್ತಲ ಹಸಿವಿಗೆ ಸ್ವಪ್ನದ ಊಟ - ಬಿಸಿಯೇರಿದ ಅವಳ ಮೈಬೆಳಕು.‌‌...
#ಸುರತ_ಮಧುಪಾನ
⇴↜↯↝⇴

ಮುದ್ದಾಗಿ ಕಾಡಬೇಡ ಹೀಗೆ
ಒಳಮಾತು ಕವಿತೆ ಆಗೋ ಹಾಗೆ...
ಖುದ್ದಾಗಿ ಬಂದು ಹೋಗೆ ಹಿತ್ಲೀಗೆ
ಕನಸು ಕಣ್ಣಿಂದ ಇಳಿದು ಹೋಗದ್ಹಾಂಗೆ...
#ಕಪ್ಪು_ಹುಡುಗೀ...
⇴↜↯↝⇴

ಬೆನ್ನು ಬಿಲ್ಲಾಗಿಸಿ ನೀ ಬಿಟ್ಟ ಹೂ ಬಾಣ ನನ್ನೆಲ್ಲ ಅರಿವೆ ಪರಿವೆಗಳ ಸೀಳಿ ಜೀವರಾಗಗಳ ಚೆಂಡಾಡುವ ಪರಿಗೆ ಮಾಗಿಯ ರಕ್ಕಸ ಛಳಿ ನಿಂತಲ್ಲೆ ಸಳಸಳ ಬೆವರಿ ಇರುಳ ಬಾಗಿಲಲ್ಲೇ ಎದೆ ಬಿಗಿದುಕೊಂಡು ತುಟಿಕಚ್ಚಿ ನಗುತಿತ್ತು - ಪ್ರತಿ ಸಾರ್ತಿಯೂ ಹೊಸ ಹೊಸತೇ ಆಗಿ ಅಪ್ಪಳಿಸುವ ಶೃಂಗಾರದಲೆಯ ಹೋರು ಸುಳಿ ಗಾಳಿ ಗುಂಜನವ ಸೀಳುತಿತ್ತು...
#ಊರು_ಸಂಗಾತ...
⇴↜↯↝⇴

ಕಣ್ಣು ಸೋಲುವೊಲು ಹುಡುಕುತ್ತೇನೆ - ಬೆಳಕ ಕೋಲನೂರುತ ಹರಿದು ಬಂದೀಯೆಂದು...
ಕೊರಳ ಕೊಂಕಿಸಿ ಸೆಳೆಯಲೆಳಸುತ್ತೇನೆ - ಬಿಗಿದ ಸೆರಗ ಗೂಡಿನ ಸಂಪದದ ಹಚ್ಚೆಯಾದೀಯೆಂದು...
ಜೋಗೀ -
ಮಾಗಿಯಿದು ಹರೆಯ 'ಕಾಯುವ' ಕಾಲ - ಕಾಡಿಸದೇ ಕೂಡ ಬಾ, ಸಿದ್ಧಿಸಲಿ ಪ್ರಣಯ ಇಂದ್ರಜಾಲ...
#ನಿಧುವನ...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

ಗೊಂಚಲು - ಮೂರು ಎರ್ಡು ಸೊನ್ನೆ.....

ಮುರಿದ ಫಲಕಗಳು.....

ನಂಗೆ ನಾನು ಇಷ್ಟು ಚಂದ ಸಿಗುವಾಗ ಪ್ರೀತಿಸೋಕೆ ಇನ್ಯಾವುದೋ ಅಪರಿಚಿತತೆಯನ್ನ ಯಾಕೆ ಹುಡುಕ್ಬೇಕು...?
ಯಾಕೇಂತ ಅಷ್ಟು ಹಪಹಪಿಸಿ ಹುಡುಕ್ತೀನಿ...??
ಅಶ್ರುತವಾದಲ್ಲಿ ಆನೆಂಬ ಗುರುತುಳಿಸುವ ಹುಂಬ ಹಂಬಲವೇ ಪ್ರೀತಿಯ ಮೂಲವಾ...???
ಬಯಲ ಬೆಳಕಿಗೆ ಬೇಲಿ ಝಡಿಯುವ ಪರಮ ಬೋಳೆತನಕೆ ಪ್ರೀತಿ ಪಟ್ಟ ಕಟ್ಟಿ ಮೆರೆವ ಭಂಡತನವ್ಯಾತಕೋ...????
#ಅರ್ಥಾರ್ಥವರಿಯದ_ಮರುಳ_ನಾನು...
↺⇄⇆↻

ಉದ್ದುದ್ದ ಬಿದ್ದ ಬೆಳಕಿನ ಕೋಲು - ಮುರಿದ ಕತ್ತಲ ಚೂರು - ಅರ್ಥವಾಗದ ಮರಣರಿಂಗಣ ಹಾಡು...
ಹನಿದು ಹರಿವ ಮೋಡ - ಹರಿಗೋಲು ಮುಗುಳು - ಬೆಂಕಿಯನುಂಡು ತೇಗಬೇಕು ಉಸಿರ ದೀಪದ ಗೂಡು...
ಬದುಕೇ ಬೇಲಿ - ಬದುಕೇ ಬಯಲು - ಬದುಕೋ ಬಯಕೆಯೇ ಬದುಕಿನ ಜಾಡು...
#ನಾನೆಂದರಿಲ್ಲಿ_ಕಾಲ_ಕಡಿದ_ಮೂರ್ತ...
↺⇄⇆↻

ಹತ್ತಿರ ಸೆಳೆದು ಕೂರಿಸಿದ ಆಪ್ತತೆ ಹಾಗೂ ಸಲಿಗೆಯಂತೆಯೇ ದೂರ ತಳ್ಳಿ ನಿಲ್ಲಿಸಿದ ನಿರ್ಲಕ್ಷ್ಯ ಮತ್ತು ಉಡಾಫೆಯೂ ದಿನಕಳೆದಂತೆ ಅಭ್ಯಾಸವಾಗುತ್ತೆ...
ಸಾವೂ ನೆನಪಿನ ಪೆಟ್ಟಿಗೆ ಮೂಲೆಯ ಸವೆದ ನಾಣ್ಯದಂತಾಗುತ್ತೆ...
ರುದಯ ರಾಗವ ಕೊರಳಿಗಂಟಿಸಿಕೊಂಡು ಏಳು ಸಾಗರದಾಚೆಗೆ ಪಾರಿವಾಳ ಹಾರುತಿದ್ದ ಕಾಲವೊಂದಿತ್ತಂತೆ 'ತನ್ನವರ ಕೂಡಲು' - ಏಳು ಸೆಕೆಂಡುಗಳ ದೂರಕೊಂದು ಮುಗುಳ್ನಗೆಯ ದಾಟಿಸಲೂ ಪುರುಸೊತ್ತಿಲ್ಲದ ಜಾಲ ಈಗ 'ನಮ್ಮವರೇ ಎಲ್ಲರೂ...'
ನಾನು - ನೀನು - ಅಳಿದೇ ಹೋದ ನಾವು...
ಇನ್ನು ನಿಜ ಪ್ರೀತಿಗೆಲ್ಲಿಯ ತಾವು...
#ಹೊಕ್ಕುಬಳಕೆ...
↺⇄⇆↻

ಜಗದ ಸಂತೆಯಲಿ ಏನೆಲ್ಲ ಆಗಿಯೂ ನನ್ನಲ್ಲಿ ನೀ ನೀನಾಗಿಯೇ ಉಳಿದೆ...
ಕನಸ ಚಿತ್ರಗಳಿಗೆಲ್ಲ ಮೊಳೆ ಜಡಿದು ಹಾರವಿಟ್ಟ ಮೇಲೂ ಉಸಿರಲ್ಲಿ ನಿನ್ನದೇ ಗಂಧವಿದೆ...
ಮಧುಪಾತ್ರೆಯಲೂ ಕಣ್ಣ ಹನಿಯನೇ ತುಂಬಿ ತುಂಬಿ ಗುಟುಕರಿಸುತ್ತೇನೆ - ನೀ ಖಾಲಿಯಾಗಬಾರದು...
ಕಾಡುಮಲ್ಲಿಗೆಯ ಘಮಕೆ ಸೋತು ಕಾಡು ಪಾಲಾದ ಹುಡುಗನ ಕಥೆಗೆ ನನ್ನದೇ ಹೆಸರಿಟ್ಟುಕೊಂಡೆ - ಮತ್ತೆ ನೀ ಮರೆತು ಹೋಗಬಾರದಲ್ಲ...
ನಾಳೆ (?) ಸಮಾಧಿಯ ಮೇಲೂ ನಿನ್ನ ಹೆಸರೇ ಬಿದ್ದೀತು - ನಂಗೊಂದು ಹೆಸರೇ ಇಲ್ಲವಲ್ಲ...
ಈ ನಿರ್ವಾತ, ಆ ನಿರ್ವಾಣ - ಭಾರಾಭಾರ ನಗು...
#ಬದುಕೇ...
↺⇄⇆↻

ರಣ ಕಾಡಿನ ನಟ್ಟಿರುಳಲಿ ಹೆಣ ಕಾಯುವಾಗಲೂ ಹುಟ್ಟಿರದ ನಿತ್ರಾಣವೊಂದು ಕಳೇಬರವ ಕಾಯ್ದಿಟ್ಟುಕೊಂಡಂತ ಮೃತ ಶೀತಲ ಬದುಕಿನ ಪ್ರತಿ ಹೆಜ್ಜೆಯನೂ ಕಾಡುತ್ತದೆ...

ಖಾಲಿ ಖಾಲಿ ಮುಂಜಾನೆ - ಹಾಳುಸುರಿವ ಮುಸ್ಸಂಜೆ - ಉಸಿರಾಟವೂ ಏಕತಾನ ಆಗೀಗ...

ಒಳಗೇ ಕುದಿವ ಸುಳ್ಳು ಮತ್ತು ಸತ್ಯದ ನಡು ಮಧ್ಯೆ ತಡಬಡಿಸುತ್ತಾ ಕೂತ ಸುಕ್ಕುಗಟ್ಟಿದ ಸುಡುಗಾಡು ಮೌನ...

ಯಮ ಕಿಂಕರರು ತುಳಿದ ಹಾದಿಯಲ್ಲೂ ಹೊಸ ಗರಿಕೆ ಚಿಗುರುತ್ತೆ ಅಂತ ಸಾಂತ್ವನಿಸೋ ನನ್ನದೇ ಪ್ರಜ್ಞೆಯ ಮಾತನೂ ಎಡಗಾಲಲ್ಲೊದ್ದು, ತನ್ನ ತಾ ಸಂಭಾಳಿಸಿಕೊಳ್ಳಲೂ ಅರಿಯದೇ ಸುಖಾಸುಮ್ಮನೆ ಮಗುಚಿ ಬೀಳೋ ನನ್ನದೀ ಅಡಸಂಬಡಸಾ ಮನಸು...

....‌‌‌‌....ಕಾಯುವುದು.... ಕಾಯುವುದು...... ಮತ್ತು ಕಾಯುವುದಷ್ಟೇ..... ನಿಂತಲ್ಲೇ ನಿಂತು.... ಯಾವುದಕ್ಕೋ, ಎಷ್ಟು ಕಾಲವೋ..... ನಿರಂತರ ನಿಷ್ಫಲ ನಿರೀಕ್ಷೆ..........

...‌‌‌‌....ದೂರ .‌.......ದೂರ .........ಬಹುದೂರ ಹೋಗಬೇಕು...... ಏನಕ್ಕೂ, ಯಾರಿಗೂ ಕಾಯುವ ಬೇಯುವ ಗೋಜಿಲ್ಲದ, ಎಲ್ಲ ಮರೆಯುವ, ಇಲ್ಲಿನೆಲ್ಲವ ತೊರೆಯುವ ಆ ನಿಶ್ಚಲ ತೀರವ ಸೇರಬೇಕು......

ಸುಳ್ಳು ನಗೆಯ ಬದುಕಿ ಸುಸ್ತಾದ ಕಾಲಕ್ಕೆ ಮಹಾಮೌನ ತಾ ಕರುಣೆದೋರಿ ಉಸಿರ ತಬ್ಬಿ ನಿಸೂರಾಗಿಸಬೇಕು...
#ನಿರ್ವಾಣ...
↺⇄⇆↻

ಅಕರಾಳ ವಿಕರಾಳವಾಗಿ ಹರಡಿಕೊಂಡ ಈ ಬದುಕಿನ ವಿಚಿತ್ರ ಕತ್ತಲು ನೀನು - ಉಂಡಷ್ಟೂ ಉಳಿಯುವ ರಣ ಹಸಿವು...

ಸ್ವರ್ಗ ಸೀಮೆಯಲಿ ಓಲಾಡಿದ ಹೆಜ್ಜೆ ಗುರುತುಗಳು ಮೈಯ್ಯ ತಿರುವುಗಳಲೆಲ್ಲ - ನೀ ಬಂದು ಹೋದ ಮೇಲೆ...

ತುಟಿಗೆ ತುಟಿ ಸೋಕಿಸಿ ಆತ್ಮಕ್ಕೆ ಮುತ್ತಿಟ್ಟು ಕಾರಿರುಳಲ್ಲೂ ನಂಗೆ ನನ್ನ ಬಿಚ್ಚಿ ತೋರುವ ಸಾಕ್ಷೀಪ್ರಜ್ಞೆ ನೀನು - ತುಂಬಿ ಮೇಳನ ಸಾವಿಗೂ ಬದುಕಿನದೇ ಹೆಸರು...

ನನ್ನ ನಾ ಹುಡುಕುವಾಗ ಸಿಕ್ಕಿದ್ದು ನೀನು... ಅದಕೇ ನೀನು ಅರ್ಥವೇ ಆಗುವುದಿಲ್ಲ ಮತ್ತು ಅರ್ಥವಾಗಲೇ ಬೇಕಿಲ್ಲ ಕೂಡ - ಈ ಅನರ್ಥದೊಳಗೂ ಒಂದು ರುಚಿ ರುಚಿ ಪದಾರ್ಥವಿದ್ದಂತಿದೆ...

ಜೀವ ಹಿಂಡುವಾ ಈ ಛಳಿಯೇ ಜೀವವ ಒಯ್ಯಬಾರದೇ ನೀನಿರುವಲ್ಲಿಗೆ - ನಾನೂ ನಕ್ಷತ್ರವಾಗಬೇಕು - 'ಸ್ವರ್ಗ' ಸೀಮೆ...
↺⇄⇆↻

***ನಿಬಂಧನೆಗಳಿಗೊಳಪಟ್ಟಿದೆ...

***ಅತಿಕ್ರಮ ಪ್ರವೇಶ ನಿಶೇಧಿಸಲಾಗಿದೆ...

***ಷರತ್ತುಗಳು ಅನ್ವಯಿಸುತ್ತವೆ...

***ಕನಸುಗಳು ಮಾರಾಟಕ್ಕಿಲ್ಲ...

***ಹಕ್ಕುಗಳನ್ನು ಕಾಯ್ದಿರಿಸಲಾಗಿದೆ...

***ಕಣ್ಣೀರು ಬತ್ತಿದೆ ಎಚ್ಚರಿಕೆ...

#ಪ್ರೀತಿ_ತುಳಿದು_ಒಡೆದ_ಎದೆ_ಗೋಡೆಗೆ_ಅಂಟಿಸಿದ_ಮುರಿದ_ಫಲಕಗಳು...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

ಗೊಂಚಲು - ಮೂರು ನೂರಾ ಹತ್ತೊಂಭತ್ತು.....

ಮಾಗಿ ಮತ್ತೇರಿದಾಗ.....

ಎದೆಯ ಪಲ್ಲಂಗಕೆ ಮೆಲ್ಲನೊಲಿದು ಬರಬಾರದೇ...
ಸೆಜ್ಜೆವನೆಯಲಿ ಗೆಜ್ಜೆ ಮೆಲ್ಲನುಲಿಯಬಾರದೇ...
ತಳುಕು ತೋಳ ಅಂಬಾರಿಯಲಿ ನಗ್ನಾಂಗ ಮೆರವಣಿಗೆಗೆ ಒಂಚೂರು ಸಹಕರಿಸಬಾರದೇ...
ಮಾಗಿಯಿದು ಮೈಯ್ಯಾರೆ ಮದವಳಿದು ಮೈಮರೆಯಬಾರದೇ...
#ಮತ್ತೆ_ಮತ್ತ_ಸಮಾಗಮ...
⇴⇱⇲⇴

ಮೊಲೆಹೂ ಅರಳಿ ಮೈಮುರಿವ ಕನಸಿಗೆ ಹೊದ್ದ ದುಪ್ಪಟಿಯ ನೂಲು ನಲುಗುತಲಿ ನನ್ನಾಸೆ ಅಂಗನೆ ಮೈಛಳಿಯ ಕಳೆವ ಹೊತ್ತು...
ಇರುಳೆಂದರೆ ಶೃಂಗಾರದಲೆಯ ಅಬ್ಬರದ ಸ್ವತ್ತು...
#ಮಾಗಿ_ಮತ್ತೇರಿದಾಗ...
⇴⇱⇲⇴

ನೀ ಎದ್ದು ಹೋದ ದಶಕಗಳ ನಂತರವೂ ನಿನ್ನ ತೋಳಿಂದ ಕಳಚಿಕೊಳ್ಳಲಾಗದ ನನ್ನೀ ಪರವಶತೆಗೆ ಏನೆಂದು ಹೆಸರಿಡಲಿ...?!
ಅದ್ಯಾವ ಬೇಹದ್ ಸೆಳೆತ ಈ ಮೈಮನವ ನಿನ್ನ ಸುಪರ್ದಿಗೆ ಬೇಶರತ್ ಅಡವಿಟ್ಟದ್ದು...??!!
ನಾ ಹಾಯುವ ಕಾಲನ ಬೆನ್ನಿಗಂಟಿದ ರತಿ ಹೋಮದ ಬೆಮರು ನೀನು...
#ಮೋಹ...
⇴⇱⇲⇴

ನಾನೆಂಬೋ ನನ್ನ ಜೀವಾಭಾವಗಳೆಲ್ಲ ಮತ್ತೆ ಮತ್ತೆ ಸೋತುಹೋಗಿ, ಎದೆಯಾಗ್ನಿ ಕಿಡಿ ಹೊತ್ತಿ ಕೊಲ್ಲುವಂಥ ಅದೋ ಆ ಮಾಟಗಣ್ಣು...
ಇವಳೇ -
ಬ್ರಹ್ಮ ರಂದ್ರದಲಿ ಹುತ್ತಗಟ್ಟಿದ ಮೋಹ ನೀನು...
#ರಜನಿಗಂಧ...
⇴⇱⇲⇴

ಗದ್ದಕಂಟಿದ ಬಿಂದಿಯ ತೆಗೆದು ಹಣೆಗಿಟ್ಟುಕೊಂಡಂತೆ ಭುಜದ ಅಂಚಲಿ ಕೆತ್ತಿದ ಕಿವಿಯೋಲೆಯ ಅಚ್ಚನು ಅಳಿಸಲಾದೀತೇನೇ - ಇರುಳ ಉತ್ಸವದ ಚಂದ ಚಂದ ಕುರುಹುಗಳು ಹಗಲ ಕಾಡುವ ಚಂದದ ಪರಿಯ ಕನ್ನಡಿಯ ಕಣ್ಣಿಂದ ಕೀಳಲಾದೀತೇನೇ...
#ಮೂಗನ_ಎದೆ_ರೋಮದ_ಬುಡದಲ್ಲಿ_ಹಾಗೇ_ಉಳಿದ_ನಿನ್ನಯ_ಉಸಿರ_ಬೆಂಕಿ...
⇴⇱⇲⇴

ಮಡಿಯ ಬೇಲಿಯ ಮುರಿದು - ದುರದುಂಡಗಿನ ತಿಳಿ ಬೆಳಕನು ಹೊದೆದು - ಛಳಿಯ ತುಪ್ಪಳ ಸುಲಿದು - ರತಿಯ ಊರು ಕೇರಿಯ ನಡುವೆ ಮದನ ಮೆರೆಯಬೇಕು...
ಋತು ಮಾಗಿ ಮಧು ಈಯ್ದು ಈ ಗಂಧರ್ವರೀರ್ವರ ಬೆದೆಗೆ ಮೈಯ್ಯ ಮರೆಯಬೇಕು...
#ನಾನು_ನೀನು...
⇴⇱⇲⇴

ನೀನಿರದ ರಾತ್ರಿಗಳಲಿ ಕಣ್ಣಪಾಪೆಯ ಕಾಡೋ ಕನಸು ನಿನ್ನ ಬೆನ್ನ ಹುರಿಯ ಬುಡದಿ ನನ್ನುಗುರ ಬಳಪ ಬರೆದ ನಿನ್ನದೇ ಹೆಸರ ಗುರುತನು ಹುಡುಕುತ್ತದೆ - ಹೆಗಲ ಮೇಲೆ ನೀನುಳಿಸಿ ಹೋದ ಉನ್ಮಾದದ ಗುರುತು ಸುಳ್ಳೇ ತುರಿಸುತ್ತದೆ - ಬಿಸಿ ರಕ್ತದ ಧಾಳಿಗೆ ತೊಡೆಯ ತಿರುವಿನ ತಾಳ ತಪ್ಪುತ್ತದೆ - ಮೋಹದ ರುಚಿ ವಿರಹದಲ್ಲಿ ಹೀಗೆ ಹಾಯುತ್ತದೆ...
#ಪೋಲಿಯಂತೆ_ನಾನು...
⇴⇱⇲⇴

ತೋಳ ಬಳ್ಳಿ ಕೊರಳ ಬಳಸಿ, ಹೆರಳ ಹೂವು ಹರಡಿ ಘಮಿಸಿ, ಬಿಸಿ ಬಿಸಿ ಉಸಿರ ಸುಳಿಗೆ, ಮೈಯ್ಗೆ ಮೈ ಹೊಸೆವ ಉರವಣಿಗೆಗೆ, ಬೆರಳ ಸಲಿಗೆ, ಮುತ್ತು ಸುಲಿಗೆ, ರತಿ ರಂಗಿಗೆ ರೋಮ ರೋಮ ಅರಳೋ ಪರಿಗೆ - ನೀನಿದ್ದರೆ ಛಳಿಯೊಂದಿಗೆ ನಿದ್ದೆಯೂ ಸನಿಹ ಸುಳಿಯುವುದಿಲ್ಲ...
ಕಾಯ್ದು ಕಾಯಿಸಿ ಕಡೆದು ಕರಗಿ ಕರಗಿಸಿ ಕಣ್ಣಿಗೆ ಝೋಮು ಹತ್ತಿಸಿ ಕಾಯುತಿದ್ದ ನಿನ್ನ ಕಾಯ ಜೊತೆಗಿರದ ರಾತ್ರಿಗಳಲಿ ಈ ಕಂಗಳು ನಿದ್ದೆ ಕೂಡದೇ ನಿನ್ನ ಒದ್ದೆ ತುಟಿಯ ಕರಡಿ ಮುದ್ದಿಗೆ ಸುಖಾಸುಮ್ಮನೆ ಕಾದು ಕಾದು ತಳಮಳಿಸುತ್ತವೆ...
#ನೀನಿರದೇ_ನಿದ್ದೆಯಿಲ್ಲ_ನೀನಿದ್ದರೆ_ನಿದ್ದೆ_ಬೇಕಿಲ್ಲ...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

ಗೊಂಚಲು - ಮೂರು ನೂರಾ ಹದ್ನೆಂಟು.....

ಹನಿಯಾಗು ಸಾಕು - ಕಡಲು ಹನಿಹನಿಯ ಕೂಸು..... 

ಕಾರಣ ಹೇಳಿ ಕಳಚಿಕೊಳ್ಳಬೇಕೆನ್ನುವುದು ಎದೆಯ ಅಲಿಖಿತ ಒಪ್ಪಂದ...

ನಿರ್ಲಕ್ಷ್ಯ ಅನ್ನೋ ಹಿಮ ಖಡ್ಗ...

#ನೇಹ_ಪ್ರೀತಿ_ಇತ್ಯಾದಿ...

**ಬೇರೆ ಬೇರೆ ಅನ್ನಿಸೋ ಒಂದೇ ಮಾತು...
↜⇂⇃↝

"ಕಣ್ಬಿಟ್ಟರೆ ಸುಡು ಬೆಳಕ ಗಜಿಬಿಜಿಯಲ್ಲಿ ನೀ ಕಳೆದೇ ಹೋಗ್ತೀಯ...
ನಿದ್ದೆ ಮರುಳಿನ ಈ ಕಣ್ರೆಪ್ಪೆಯಡಿಯ ತಾಯಿ ಕತ್ತಲೆ ಮತ್ತು ಅಲ್ಲರಳುವ ನಿನ್ನ ಪಾರಿಜಾತದಷ್ಟು ಮೃದು ನಗು ಮಾತ್ರ ನಂದ್‌‌ನಂದೇ ಯಾವಾಗ್ಲೂ..."
ಚೂರೂ ನಸನಸೆಯಿಲ್ಲದ ನಿನ್ನ ಸ್ವಪ್ನದ ಅಫೀಮು ತುಂಬಿ ಕೊಡುವ ನಿಷಾದ ನಶೆಯೊಂದೇ ನನ್ನ ಜೀವಂತ ಕಾಯುವ ಕಾವು ಇಲ್ಲಿ...
ನಗೆಯ ನೂರಾರು ಬಣ್ಣಗಳಷ್ಟೇ ನಿರಂತರ ಹೋಳಿಯಾಡುವ ಬಯಲದು ನಿನ್ನ ಸಂಧಿಸುವ ಮಹಾ ಮೋಹದ ಸವಿನಿದ್ದೆ - ಅಲ್ಲಿ ನಿನ್ನೆ ನಾಳೆಗಳೆಲ್ಲ ನರಳುವುದಿಲ್ಲ...
ಸೋಂಬೇರಿ, ಹುಚ್ಚ ಅಂತೆಲ್ಲ ಈ ಜಗತ್ತು ಸೋತವರಿಗೆ (?) ಕಟ್ಟುವ ಪಟ್ಟಗಳೆಲ್ಲ ನಿನ್ನ ಕಾಲ್ಬೆರಳ ತುಂಟಾಟದ ಗೀರುಗಳಲಿ ಬಣ್ಣ ಕಳಕೊಂಡು ಕಳಚಿ ಬೀಳುತ್ತವೆ ನನ್ನೊಳಗೆ...
ಅನುಗಾಲದ ತೂಕಡಿಕೆಯಲಿ ಲೋಕದ ಜಾಣರ ಕಣ್ಣ ಬೇಲಿಯ ಮುರಿದು ನಿನ್ನ ತಬ್ಬಿಕೊಂಡ ಕುರುಡ ನಾನು...
#ನೀನೆಂಬ_ಹೊಳೆಯ_ಬೆನ್ನಿಗಾತು_ಬೆಳೆದ_ಒಡ್ಡೊಡ್ಡು_ಕಾಡು_ನಾನು...
↜⇂⇃↝

ಆಕಾಶಮಲ್ಲಿಗೆ ಹೂ ಚಪ್ಪರದಡಿಗೆ ಛಳಿಯ ಮೀಯುತ್ತ ಬದುಕಿಂದ ಬೆನ್ನು ತೋರಿದ ನಿನ್ನ ಧೇನಿಸೋ ನಾನೆಂಬೋ ಹುಟ್ಟು ಮೂಗ ಬೋಳೆ ಹೈದ 'ದಾರಿಗಾಗಿ ಧ್ವನಿ ಮಾಡಿ' ಎಂಬ ಗೂಡ್ಸಿನ ಬೆನ್ನು ಬರಹವ ಮನದಲ್ಲೇ ಓದಿಕೊಂಡು ಹಳಹಳಿಸುತ್ತೇನೆ...
ಹೇಳಿ, ಕೇಳಿ, ಕೊಡುಕೊಳ್ಳದೇ, ಒಳನಾಡಿಗಳಲಿ ಒಡನಾಡಿ ಒಡಮೂಡದೇ ಎಲ್ಲಾ ಅರಿಯುವ ಮೃತ ಮೌನವೇ ಆಪ್ತತೆಯ ನಿಜ ಭಾಷೆ ಎಂಬುದೇ ಸತ್ಯವಾಗಿದ್ದರೆ ಈ ಇರುಳು, ಈ ದಾರಿ ಇಷ್ಟುದ್ದಕೆ ಕರುಳ ಹಿಂಡಿಕೊಂಡು ಒಂಟೊಂಟಿ ಅಂಡಲೆದು ಪರಿತಪಿಸಬೇಕಿತ್ತಾ...?
ನಿನ್ನ ಕಾಡುವ, ನಿನ್ನ ಕೂಡುವ, ನಿನ್ನದೆಂಬ ಆಡು ಭಾಷೆ ಯಾವುದು...??
ನನ್ನ ಹುಡುಕುತ್ತಾ ನಿನ್ನ ಸೇರುವ ಹುಕಿಯಲ್ಲಿ ನಿನ್ನನೇ ಕನವರಿಸುತ್ತಾ ನಾ ಹಾಯೋ ಹಾದೀಲೆಲ್ಲ ಅಳಿದುಳಿದ ಕಣ್ಣ ಹೆಜ್ಜೆ ಅಚ್ಚು ನಿನ್ನ ಹಿಮ್ಮಡದಡಿಯನಾದರೂ ಸೋಕೀತಾ...???
ಇರದ ನಿನ್ನ ಹುಡುಕಾಟಕ್ಕೆ ಇನ್ನೇಸು ವರುಷ ಆಯುಷ್ಯ...????
#ಜೀವಿತದ_ಸ್ವಾಪನ...
↜⇂⇃↝

ಸತ್ಯ ಹೇಳಿ ನೋಯಿಸಲಾರದೇ - ಸುಳ್ಳಾಡಿ ವಂಚಿಸಲೊಪ್ಪದೇ - ಸುಳ್ಳಲ್ಲ  ಖರೆಯಲ್ಲ ಎಂಬಂತೆ ಮಾತು ಬೆಸೆಯಬೇಕಾದ ಮೌನವರಿಯದ ವೇದನೆ...
ಮನವು ಬೆಚ್ಚುತ್ತದೆ ನೀನು ಕನಸಾಗುವಲ್ಲಿ ಕನಸೇ...
#ಅನುದಿನದ_ಸಾವು_ನಾನು...
↜⇂⇃↝

ಆತ್ಮೀಕ 'ಪರಿಮಳ'ದ ಭಾಷೆ ಮಣ್ಣು, ಸೌಂದರ್ಯ ಹೆಣ್ಣು, ಭಾಷ್ಯ ಬೆವರು...
#ನನ್ನ_ವ್ಯಾಖ್ಯಾನ...
↜⇂⇃↝

ಅವನ ಅಳಲು:
ಸ್ವರ್ಗವೇ ಬೇಕೆಂದರೆ ಸಾಯಲೇಬೇಕು - ನರಕ ಬಿಡಿ ಬೇವರ್ಸಿಯ ಬೆನ್ನಿಗೇ ಅಂಟಿಕೊಂಡಿದೆ...

ಅವಳಂದದ್ದು:
ಸಜೀವ ಸ್ವರ್ಗ ಬೇಕೆಂದರೆ ಹೆಣ್ಣು ನಿನಗಾಗಿ ತಾನಾಗಿ ತೋಳಲ್ಲಿ ಅರಳಬೇಕು; ಅಂಗಳದ ಸಂಜೆ ಮಲ್ಲಿಗೆಯಂತೆ ಘಮ್ಮೆಂದು - ನಾಚಿಕೆಯ ಛಳಿ ಕಳಚಿ, ಉನ್ಮಾದದ ಹೊಳೆ ಹರಿಸಬೇಕು; ಸುಗ್ಗಿ ಹುಣ್ಣಿಮೆಯ ಬೆಳುದಿಂಗಳ ಹೊನಲಂತೆ...
ಒಲಿಸಿಕೋ, ಒಪ್ಪಿಸಿಕೋ ಅಷ್ಟೇ...

ಬೆಳಕು:
ಇಲ್ಲಿ ಕಾಣದ್ದು ಅಲ್ಲೇನಿದ್ದೀತು...
ಹುರಿದು ಮುಕ್ಕಿದ್ದೇ ಕರಗಿ ರಕ್ತವಾಗಿ ಶಕ್ತಿಯಾಗೋದು...
#ನಾಕ_ನರಕ...
↜⇂⇃↝

ಅಲ್ಯಾರೋ ಆ ದೂರ ತೀರದಲಿ ಕಾಯುತ್ತಾ ಕೂತು ಕರೆಯುತ್ತಿರುವ ಭಾವ - ಇಲ್ಲಿನ ಹರಿವಿಗೆ ಕರಡಿ ಪ್ರೀತಿಯ ರುದ್ರಾವೇಗ...
ಹಾದಿಯಲೆಲ್ಲೋ ಈ ಬನಿಯ ಕನಸು ಆವಿಯಾದರೂ ಅಲ್ಯಾವುದೋ ತಿರುವಲ್ಲಿ ಮತ್ತೆ ಮಳೆಯಾಗೋ ನಚ್ಚಿಕೆಯ ಸೊಗಸು...
ನನ್ನಿಂದ ಕಳಚಿಕೊಂಡ ನನ್ನೊಳಗಿನ ನಾನು ನಿನ್ನೊಳಿಹ ನನ್ನನ್ನ ಕಂಡು ಕೂಡುವಾತುರದಿ ಧುಮ್ಮಿಕ್ಕುವ ಧಾವಂತಕೆ ಹೃದಯ ತುಷಾರದ ಕನ್ನಡಿಯಲಿ ಅನುರಾಗದ ಇಂದ್ರಚಾಪ...
ಹಸಿರ ಉಸಿರಲ್ಲೂ ಹನಿ ಹನಿಯೊಳಗಣ ಸಾಗರ - ಶರಧಿಯೊಳಗೋ ಹನಿಹನಿಗಳದೇ ಮರ್ಮರ...
"ಹನಿಯಾಗು ಸಾಕು" - ಹನಿ ಕರಗಿ ಹಾಲಾಗಿ ನದಿ ಬಯಲಿಗೆ ಹಸಿರು, ಕಡಲಾಳದಿ ಮುತ್ತು...
#ಚಿತ್ರಾಂತರಂಗ...

ನನ್ನ ಜಂಗಮವಾಣಿ - ನನ್ನದೇ ಕೈಚಳಕ...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)