ಗೊಂಚಲು - ನಾಕ್ನೂರ್ನಲ್ವತ್ತರಮೇಲೈದು.....

ವೈರುಧ್ಯಗಳಿಗೆ ಹಣೆಬರವೇ ಹೊಣೆಯಂತೆ(!).....

ನಾವೆಲ್ಲಾ,
ಕಳೆಗೆ ಬೇಲಿ ಕಟ್ಟಿ ಕಾಯುತ್ತಾ,
ಬೆಳೆಯ ಬಯಲಲಿ ಬಿಟ್ಟು ಹಳಹಳಿಸುತ್ತಿರುತ್ತೇವೆ ವತ್ಸಾ...
ನಮ್ಮ ಸಮಯವ ನಾವೇ ಹರಣ ಮಾಡಿದರೆ ಆಲಸ್ಯದ ಸುಖವಾದರೂ ಇರುತ್ತೆ ಕಣೋ - 
ನಾವೇ, ಅದೇ ನಮ್ಮ ಸಮಯವ ಹಡಬೆ ದನ ತುಡುಗು ಮೇಯುವಂತೆ ಇನ್ಯಾರೋ ಸುಖಾಸುಮ್ಮನೆ ತಿಂದು ತೇಗಲು ಬಿಟ್ಟು ಕನಲುತ್ತ ಕೂರುವಂತಾದರೆ ಅದಕೇನೆನ್ನುವುದು, ಯಾರ ಹಳಿಯುವುದು ಹೇಳು...?!
ನಮಗೆ ನಾವೇ ಕೊಟ್ಟುಕೊಳ್ಳುವ ಏನೇನೋ ಸುಳ್ಳು ಸಮಜಾಯಿಷಿಗಳು ಆ ಕ್ಷಣಕೆ ಸಮಾಧಾನಿಸಿದರೂ, ಒಳಗಿಂದೊಳಗೆ ಮನಸು ಅಶಾಂತವೇ ಅಲ್ವಾss...
___ ಸುತ್ತ ನೆರೆಯುವ ಸುಖವಿಲ್ಲದ, ಹಾಗಂತ ಅಸಮಾಧಾನವ ಮುಕ್ತ ಹೇಳಲೂ ಆಗದ ಹತ್ತಿರದ (?) ಸಂಬಂಧಗಳು... 
&&&

ಜಗವೆಲ್ಲಾ ತುಂಡಿಲ್ಲದ ಕೆಲಸದಲ್ಲಿ (?) ಗಡಿಬಿಡಿಯಲ್ಲಿರುವಾಗ ನಾನೊಬ್ಬ ಖಾಲೀ ಕುಂತು ಮಾಡುವುದೇನು...!?
ನಾನು ಕೋಣೆ ಸೇರಿ ಸುಖವಾಗಿ ಮಲಗಿ ಸಂಪರ್ಕಗಳಿಗೆಲ್ಲ ಬೀಗ ಹಾಕಿ ಜಗತ್ತಿನಿಂದ ಬೇರೆಯಾಗಿ ಅದೇನೋ ಅಗೋಚರ ತರಾತುರಿಯಲ್ಲಿದ್ದೇನೆಂದು ಸ್ವಯಂ ಸಾರಿಕೊಂಡೆ...
ಇದೀಗ -
ಅಲ್ಲಲ್ಲಿ ಕೃತಕ ಕುತೂಹಲ ಮತ್ತು ಅಚ್ಚರಿಯ ಭಯ ಸೃಷ್ಟಿಸಿದ ಸುಖವೂ ನನ್ನದಾಯಿತು...
____ ಬಲು ಬೆರಕಿ ಬುದ್ಧಿವಂತ... 😜
&&&

ಬೆತ್ತಲ ಅರಸುವ ಆ ಕಾಮಕ್ಕಿಂತ ಬೆಳಕ ಮೇಯುವ ಈ ಪ್ರೇಮವೇ ಹೆಚ್ಚು ಬೆತ್ತಲಾಗಿಸುತ್ತದೆ...
____ ಬೆಳಕಿನ ನಿಗಿ ನಿಗಿ ಉರಿ ಪ್ರೇಮ - ಇರುಳಿಗೂ ಬೆಳಕೀವ ಧಗಧಗ ಕಾಮ...
*** ಅರ್ಥ ಗಿರ್ಥ ಕೇಳಬೇಡಿ...
&&&

ತುಂಬಾ ಹತ್ತಿರ ಬರಬೇಡ - ಪರಮ ಪೋಲಿ (?) ಹಾಡಲ್ಲೂ ಒಂದು ಪದ ಪಾದ ನೋವಿನ ಬೀಜ ಕಂಡೀತು...
___ ಉಗೋಡಾಗದ ಕಾಡು(ವ) ಮಾತು...
&&&

ಜಗವೆಲ್ಲಾ ಪುರುಸೊತ್ತಿಲ್ಲದೇ ಓಡುವಾಗ ನಾನೊಬ್ಬ ನಿಂತು ನೋಡುತ್ತೇನೆ, ನೋಡುತ್ತಾ ನಿಂತೇ ಇರುತ್ತೇನೆ...
ನಿಂತು ನೋಡುತ್ತಲಿರುವಷ್ಟೆಲ್ಲಾ ಗಳಿಸಿದ್ದೇನಂತ ಅಲ್ಲ; ನಿಂತು ನೋಡುವ ಸಮಾಧಾನಕ್ಕೆ, ಬದುಕಿದು ಬಡಿದು ಕಲಿಸಿದ ಅಂಥ ಸಾವಧಾನದ ಸಮಪಾಕವ ಹಾಂಗೇ ಕಾಯ್ದುಕೊಳ್ಳುವುದಕ್ಕೆ...
ಓಡಲಾಗದ ಆಲಸ್ಯ ಅಂತೀರೇನೋ - ಅದನ್ನೂ ಅತೀವ ಆರಾಮದಲೇ ಸ್ವೀಕರಿಸುತ್ತೇನೆ...
ಗೆಲುವಿನಷ್ಟೇ ಗೆಲುವಿಗಾಗಿ ಚಪ್ಪಾಳೆ ತಟ್ಟುವುದೂ ಹಿರಿಮೆಯೇ ಅಂತನ್ನಿಸುತ್ತೆ ನಂಗೆ ಈಗೀಗ...
____ ನನ್ನ ಸಾಧನೆ...
&&&

ಈ ಬಂಧ, ಸಂಬಂಧಗಳ ನೆಚ್ಚಿಕೊಳ್ಳಲೇಬಾರದು ನೋಡು...
ಯಾಕೆ...? ಏನಾಯ್ತು...??
ನನ್ನವರೂ ಅನ್ನಿಸಿಕೊಂಡವರು ನನ್ನನು ನಿತ್ಯವೂ ಮಾತಾಡಿಸ್ತಿರಬೇಕು ಅನ್ಕೋತೀನಿ...
ಅದ್ಕೆ...?
ಮಾತು ಹೋಗ್ಲಿ, ಹಗಲಿಗೆ, ರಾತ್ರೀಗೆ ಒಂದು ಶುಭಾಶಯವೂ ತತ್ವಾರ ಈಗಿತ್ಲಾಗೆ...
ಅದೇ ನಿನ್ನವರೂ ಅಂತ ನೀ ಅಂದುಕೊಂಡವರನ್ನು ನೀನೇ ಮುಂದಾಗಿ ನಿತ್ಯವೂ ಮಾತಾಡಿಸ್ತೀಯಾ...?  
ಮಾತಾಡ್ತೀನಲ್ಲ, ಯಾವಾಗ ಅವರ ಮಾತಿಗೆ ಉತ್ತರ ಕೊಡದೇ ಇದೀನಿ ಹೇಳೂ...
ಅವರ ಸಂದೇಶಕ್ಕೆ, ಅವರ ನುಡಿಸಾಣಿಕೆಗೆ ಮರು ಉತ್ತರ/ಮಾರುತ್ತರಗಳನ್ನು ಕೊಡುವುದನಲ್ಲ ನಾ ಕೇಳ್ತಿರೋದು, ನೀನೇ ನೀನಾಗಿ ಅವರೊಡನೆ ಒಮ್ಮೆಯಾದರೂ ಪ್ರೀತಿಯಿಂದ ಸಂವಾದಕ್ಕಿಳೀತೀಯಾ ಅಂತ...
ಅವರು ಮಾತಾಡಿಸದೇ ನಾನ್ಯಾಕೆ ಮಾತಾಡಿಸ್ಲಿ, ಅವ್ರಿಗೆ ಬೇಡ ಅಂದ್ಮೇಲೆ ನಂಗೂ ಬೇಕಿಲ್ಲ...
ನಿನ್ನ ಮೌನವನೂ ಅವರು ಅರ್ಥೈಸಿಕೊಳ್ಳಬೇಕೆಂದು ಹಠ ಹೂಡ್ತೀಯಲ್ಲ, ಅವರ ಮೌನಕೆ ಕಿವಿಯಾಗುವ ಸಣ್ಣ ಪ್ರಯತ್ನವನಾದರೂ ಮಾಡ್ತೀಯಾ ಹೋಗ್ಲೀ...? 
ಹೇಳಿದ್ರೆ ಹೇಳಿದ್ನೆಲ್ಲಾ ಕೇಳಿಸ್ಕೊಳ್ಳಲ್ವಾ...? ಅವರಾಗಿ ಹೇಳದೇ ನಾನಾಗಿ ಕೆದಕಿ ಕೇಳುವುದೇನು...?? ನಂಗೆ ಬೇರೆಯವರ ವಿಷಯದಲ್ಲಿ ಮೂಗು ತೂರ್ಸೋದು ಆಗಲ್ಲ...
ಮತ್ತೆ ನಿನ್ನವರೂ ಅಂದದ್ದಲ್ವಾ ನೀನು ಅಥವಾ ಅವರು ಹಂಗಂದಿದ್ದನ್ನು ಒಪ್ಪಿಯೇ ಈಗ ಇಷ್ಟು ಅವರು, ಇವರು, ಬೇರೆಯವರು ಎಂಬ ಪರಿತಾಪದ ಆರೋಪಗಳು ತಾನೆ...
ನಿಂಗೆ ನನ್ನ ನೋವು ಅರ್ಥ ಆಗಲ್ಲ ಬಿಡು - ಎಷ್ಟೆಲ್ಲಾ ಮಾಡಿದೀನಿ ನಾ ಅವರಿಗೆ, ಈಗ ನಾನೇ ಬೇಡಾಗಿದೀನಿ, ನೀನೂ ಅವರ ಪರವೇ ಅಥವಾ ಅವರಂಥವನೇ, ನಿನ್ನತ್ರ ಹೇಳ್ಕೊಂಡಿದ್ದೇ ನನ್ನ ತಪ್ಪು - ಎಲ್ಲಾ ಇಷ್ಟೇ, ಒಳ್ಳೇತನಕೆ ಬೆಲೆ ಇಲ್ಲ...
"ಧ್ವನಿಯಾಗುವುದಕ್ಕೂ ಪ್ರತಿಧ್ವನಿಯನಷ್ಟೇ ನೀಡುವುದಕ್ಕೂ ವ್ಯತ್ಯಾಸವೇ ಗೊತ್ತಿಲ್ಲದ/ಗೊತ್ತಿಲ್ಲದಂತಾಡುವ ಪರಮ ಮುಗ್ಧ (?) ಹೃದಯಿಗಳ ವಿಲಾಪ" ಇದು ಅನ್ಸಲ್ವಾ...
ಹೋಗೋ, ನಿನ್ನತ್ರೆಂತಾ ಮಾತು - ನೀನು ಭಾಳ ತಿಳ್ಕೊಂಡೋನು ಬಿಡು, ನಾವೆಲ್ಲ ದಡ್ರು, ಸುಮ್ಮಿರು ಸಾಕು, ನಂಗೆಲ್ಲಾ ಗೊತ್ತು...
____ ಟಾಟಾ, ಬೈಬೈ, ಗಯಾ... 
&&&

ಸ್ವರ್ಗದಲ್ಲಿ ನನ್ನ ಬಿಡಾರ...
ಸ್ಮಶಾನದಲ್ಲಿ ಸಂಸಾರ...
ನನ್ನೀ ಸುಖವ ಆಡಿಕೊಂಡು ನರಿಯು ಊಳಿಡುವಾಗ - ಕುಂಡೆ ಕುಣಿಸಿ ನಗುವ ಈ ಬದುಕದೆಷ್ಟು ಸುಂದರ...
____ ವೈರುಧ್ಯಗಳಿಗೆ ಹಣೆಬರವೇ ಹೊಣೆಯಂತೆ(!)...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರ್ನಲ್ವತ್ತರಮೇಲ್ನಾಕು.....

ಕವಿತೆ(?).....

ಇನಿದು ಇನಿದು ಮಳೆ ಬೀಳುವಾಗ ಈ ಎದೆಗೆ
ಘಲ್ ಘಲಿರೆನುವುದು ನಿನ್ನಾ ಕನಸ ಕಾಲಂದುಗೆ...
ಕಳ್ಳ ರುದಯವಿದು ಸುಮ್ಮನಿದ್ದುಬಿಡುವುದಾದರೂ ಹೆಂಗೆ
ಉಸಿರ ತುಂಬಿ ಹರಿವಾಗ ನಿನ್ನಾಸೆ ಪ್ರಣಯ ಗಂಗೆ...

ಸದ್ದೇ ಇರದೇ ಸ್ವಾಗತಿಸೋ 
ನಿನ್ನಾ ಕಣ್ಣಾ ರೆಪ್ಪೆಗಳಾ...
ಸ್ವಾತೀ ಹನಿಯಾ ಕುಡಿದಾ
ಪ್ರೀತಿ ಕಪ್ಪೆ ಚಿಪ್ಪುಗಳಾ...
ಅರ್ಥವಾಗದ ಭಾವಗಳ ಹಿಡಿದು
ಅರ್ಧವೇ ಬರೆದ ಕವಿತೆಗಳಾ...

ನೆನೆದು ನೆನೆದು ನೆನೆಯುತ್ತೇನೆ
ದಾಂಟಲು ಕಡು ವಿರಹದ ಈ ರಾತ್ರಿಗಳಾ...
ಇರು ನೀನು ಹಿಂಗೇ 
ಅಷ್ಟು ದೂರವಿದ್ದೂ ಇಷ್ಟೊಂದು ಹತ್ತಿರ...
ಅಲ್ಲಿದ್ದೇ ಕಾಡುವಂಗೆ
ಆ ಕಾಡಿನಾಚೆಯಾ ಆ ನೀಲ ಸಾಗರ...

ಪ್ರೀತಿಯ ಹುಡುಕುವ ಕವಿಯೂ
ಸಾವನು ಹಲುಬುವ ಕವಿತೆಯೂ
ಒಟ್ಟಿಗೇ ಮಲಗಿದ ರಮಣೀಯ(?) ಕಥೆಗೆ 
ಖಾಯಂ ನಾಯಕನೀ ನನ ಒಡಲು... 

ಭಾವ ಬೇಯುವ ಇರುಳು
ಕಟ್ಟಿ ಬರುವಾಗ ಕೊರಳು
ನೆತ್ತಿಯಾ ಮಿಡಿವ ನಿನ ಬೆರಳು
ಮಾತನಾಡುವ ಕಡಲು...
ನೀನು 
ನನ್ನ ಮೌನ ಮಡಿಯುವ ಮಡಿಲು...

***ಕೆಲಸವಿಲ್ಲದ ಕವಿ ಕವಿತೆ(?) ಕ(ಕು)ಟ್ಟುವ ಪರಿ - ಪದ ಪಾದ ಬೆರಕೆಗೆ ಸೂತ್ರ ಸಂಬಂಧ ಕೇಳಬೇಡಿ... 🫢

ಗೊಂಚಲು - ನಾಕ್ನೂರ್ನಲ್ವತ್ತರಮೇಲ್ಮೂರು.....

ಮಾತು ಮೌನಗಳ ಜುಗಲ್ಬಂಧಿ.....

ನಂದಿನ್ನೂ ಮಾತು ಮುಗಿದೇ ಇರಲಿಲ್ಲ - ಅವಳು ಮಹಾಮೌನಕೆ ಜಾರಿದಳು...
ನಾನಿನ್ನೂ ವಟವಟ ಹಲುಬುತ್ತಲೇ ಇದ್ದೇನೆ - ಅವಳ ಗಾಢ ಸುಷುಪ್ತಿಯಲೂ ನನ್ನ ದನಿಯವಳನು (ಕೂ)ಕಾಡಬಹುದೆಂಬ ಭ್ರಮೆಯಲೂ ಹಿತವಿಹುದು...
ಮಾತು ಜಾರಿಯಿರುತ್ತದೆ ಶತಾಯಗತಾಯ - ಅವಳೆದುರು ಹಚ್ಚಿಟ್ಟ ದೀಪದೆದುರು ಅವಳು ಹಚ್ಚಿದ ದೀಪ ಸೋಲಬಾರದೆಂಬ ಹಠವೂ ಇರಬಹುದು...
ನೂರು ನಶೆಗಳಲಿ ದೊಡ್ಡ ನಗೆ ನಕ್ಕು ಮರೆತೇನು ಅಂದುಕೊಂಡೆ - ಇದೆಲ್ಲ ನಗೆಯ ನೆರಳಲೂ ನನ್ನ ಹರಕೆಯಿದೆ ಮಾಣೀ ಅಂದಂತಾಗಿ ನೆನಪಾದಳು...
____ ಉಳಿದಷ್ಟೂ ಬದುಕಿನ್ನು ಅವಳೊಡನೆಯ ಮಾತು ಮೌನಗಳ ಜುಗಲ್ಬಂಧಿಯೇ...

ಎಲ್ಲರೂ ದೇವರ ಕಾಣಲು ದೀಪ ಬೆಳಗುತ್ತಿದ್ದಲ್ಲಿ ನಾನು ಮಳ್ಳನಂತೆ ಅವರನೇ ನೋಡುತ್ತಾ ನಿಂತಿದ್ದೆ... 🤐
___ ಕೈಮುಗಿಯೋ ಅಂತ ಬೈಯ್ಯಲು ಈಗ ನನ್ನ ದೇವಿಯೂ ಸ್ವರ್ಗಸ್ಥೆ...
&&&

ರುದಯದ ದಿನವಂತೆ...
ಚಂದಗೆ ಕಾಯ್ದುಕೊಳ್ಳುವಾ ನಮ್ಮ ನಮ್ಮ ಹೃದಯವ...
ಸಣ್ಣ ರಂಧ್ರಕೂ ದೊಡ್ಡ ನೋವಿದೆ ಅಲ್ಲಿ...
ಹೃದಯ ಅನಗತ್ಯ ದೊಡ್ಡದಾದರೆ ಸಣ್ಣ ಸಣ್ಣ ನೋವುಗಳ ಮೂಟೆಯೇ ಬರುತ್ತೆ ಜೊತೆಗೆ...
ಇರಲಿ,
ಆದಾಗ್ಯೂ ಆದಷ್ಟೂ ನಗೆಯನೇ ತುಂಬಿಕೊಳ್ಳೋಣ - ಪುಟ್‌ಪುಟಾಣಿ ಖುಷಿಗೂ ದೊಡ್ಡ ಸಂಭ್ರಮ ಕೂಡಾ ಇದೆ ಅಲ್ಲಿ...
ನೋವಾದರೆ ಹಂಚಿಕೊಂಡಷ್ಟೂ ಹಸನಾಗುವ, ಪ್ರೀತಿಯಾದರೆ ಮೊಗೆದು ಸುರಿದಷ್ಟೂ ತುಂಬಿ ತುಳುಕುವ ಮಾಯಾ ಜೋಳಿಗೆಯೂ ಹೌದು ಅದು...
ಹಾಗಾಗಿ,
ಪ್ರೀತಿಯಿಂದ ಪ್ರೀತಿಯೊಂದಿಗೆ ನಡೆಯೋಣ, ಪ್ರೀತಿಯಾಗೋಣ/ಪ್ರೀತಿಯೇ ಆಗೋಣ...
ಶುಭಾಶಯ - ಪ್ರಿಯ ಹೃದಯಗಳಿಗೆ... 💞
___ ೨೯.೦೯.೨೦೨೪
&&&

ಈ ಇವಳ ಮೈಯ್ಯ ಘಮದಿ 
ಆ ಅವಳ ಪ್ರೇಮವ ಹುಡುಕಿ 
ಉಳಿಯಬಹುದೇ ನಾನು ನನಗೆ 
ಅವಳು ಪರಿಚಯಿಸಿದ ಹಾಗೇ...
ಅಲ್ಲಿ ಸಿಗದ ಕಿಚ್ಚಿಗೆ 
ಇಲ್ಲಿ ಉರಿವ ಹುಚ್ಚಿಗೆ
ತಣಿಯಬಹುದೇ ಅವಳ ಬಿಸಿ
ಈ ಕರುಳ ಕಾಂಡದೊಳಗೆ...
___ ತಾಳ ತಪ್ಪಿದ ತ್ರಿಶಂಕು ಸುಖ...
&&&

ನನ್ನ ಪಾಲಿನ ಶುಭ್ರ ಶುಭವೇ -
ನೆತ್ತಿ ಮೇಲಿನ ಚಂದಮ ಬೆಳುದಿಂಗಳ ಕೈಯಿಟ್ಟು "ಶುಭದ ತೋಳಲ್ಲಿ ಸರಸ ಯೋಗ" ಅಂದು ಹರಸಿ ಕಳಿಸಿದ...
ಬೇಗ ಬರಬಾರದೇ (ಬಾsss) - ಈ ಉಸಿರಿಗಾಗಲೇ ಉಗ್ಗು ರೋ(ವೇ)ಗ...
ಮಧುಮಂಚದ ಮಂದ ದೀಪಕೆ ತುಂಟ ತೂಕಡಿಕೆ...
ಇರುಳಿಗಾಗಿ ಕಂಡ ಕನಸು ಇನಿತಿನಿತೂ ನಿಜವಾಗಲಿ - ನಿನ್ನ ಹೊದ್ದು ಮೆದ್ದ ಮುದ್ದು ಲೆಕ್ಕ ತಪ್ಪಿಹೋಗಲಿ...
___ ಶುಭರಾತ್ರಿ ಅಂದವರಿಗೆಲ್ಲಾ ಶುಭವೇ ಆಗಲಿ...
*** ನಾಳೆ ಅಮಾವಾಸ್ಯೆ, ನಿಂಗೆ ಈಗೆಲ್ಲಿ ಚಂದ್ರ ಕಾಣಿಸ್ದ ಅಂತೆಲ್ಲಾ ಅರಸಿಕ ಪ್ರಶ್ನೆ ಕೇಳಂಗಿಲ್ಲ... 😜
&&&

ಉದಿ ಆದಾಗಿಂದ ಕೊರಳು ಗುನುಗಿದ ರಸಿಕ ಹಾಡೊಂದು ಇರುಳ ಬಾಗಿಲಲಿ ನಿನ್ನುಸಿರ ಬಿಸುಪ ಬಯಸಿ, 
ನೀನೀಗ ಈ ಕಂಗಳು ಮುಡಿದ ಮಧುರ ಮೋಹದ ಪೋಲಿ ಪೋಲಿ ಕನಸು...
ನಿನಗೂ ಶುಭರಾತ್ರಿ... 🥰
&&&

ಈ ಬದುಕು ಒಂಥರಾ ಹಸ್ತಮೈಥುನದ ಸುಸ್ತಿನಂಗೆ...
ಸುಖವಾ ಅಂದ್ರೆ ಸುಖವೇ - ಆದ್ರೆ, ತೃಪ್ತಿಕರವಾ ಅಂತ್ಕೇಳಿದ್ರೆ ಮಾತ್ರ ಪರಮ ಗಲಿಬಿಲಿ...
____ ಅತೃಪ್ತ ಸುಖ ಸಾಗರ...
&&&

"ಪೋಲಿ ರುದಯದ ಪ್ರಾಯ ಕಳೆಯುವುದೇ ಇಲ್ಲ..."
___ ಹಿತ ಮತ್ತು ನೋವು...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರ್ನಲ್ವತ್ತರಮೇಲೆರಡು.....

ಒಂದು ಇನ್ನೊಂದು ಮುಂಜಾವು.....

ನಿನ್ನ ಕಾಣುವ ಎನ್ನ ಕನಸಿನ ನೂರು ಹಾದಿಗೂ ಬೆಡಗೂ, ಬೆರಗೂ, ಒಲವ ಭಾವ ಸೊಬಗೂ ತುಂಬುವ ತುಂಬು ಬೆಳಕು - ಇದು ನನ್ನ ಬೆಳಗು...
ನಲುಮೆ ಪಂಚಾಂಗ...
ಶುಭೋದಯ... 🧚🥀

ರಂಗೋಲಿ ತುಳಿದು ಹುಳ್ಳಗೆ ನಗುವ ಹಸುಳೆಯ ತರದಿ ನಿದ್ದೆಯನಳಿಸಿ ಕಣ್ಣ ಕರಿ ಗೋಳದಲಿ ಬೆಳಕನು ತುಂಬಿ ಕೇಕೆಯ ಹಾಕುವ ಮಂಗಳ ಬೆಳಗು...
ಶುಭದಿನ... 🧚🦸

'ನಾನು' 'ನಂದೂ' ಎಂಬೆಲ್ಲಾ ನೂರು ನಖರೆಗಳ ನಡುವೆಯೇ ನೀನು ನನ್ನವನೆಂಬ ಹಾಗೆ ಅನಾಯಾಸದಿ ಚಿಮ್ಮುವ ಒಂದು ಚಿಟಿಕೆ ನಗುವಿನ ವಿನಿಮಯ - ಎದೆಯಿಂದ ಎದೆಗೆ...
ಸ್ನೇಹಮಯೀ ಬೆಳಗು... 🤝

ಮರುಬೆಳಗು ಎನ್ನದೆಂಬ ಕಳೆದಿರುಳ ಪ್ರೇಮ
ಮತ್ತೆ ಎನ್ನೆದೆಯಲಿ ನಿನ್ನ ಬಿತ್ತಿ ಬೆಳೆಯುವುದು...
ನಾನೆಂಬ ಬಡವನ ಭಂಡ ಭರವಸೆಯ ತುಂಟ ಹಗಲು...
ಶುಭದಿನ... 🫂🤸

ಮತ್ತೊಂದು ಹಗಲು - ಮತ್ತಿನ್ನೊಂದು ಅವಕಾಶ ಬೆಳಕ ಕಾಣಲು...
ಶುಭದಿನ... 🍬

ಇರುಳಿಡೀ ಸುರಿದೂ ತೃಪ್ತವಾಗದ ಬಾನು - ಮಬ್ಬು ಮಬ್ಬು ಬೆಳಗು... 🌧️

ಸುಡುವ ಸೂರ್ಯನ ಒಡಲು ಎಂಥಾ ತಂಪು ಪ್ರೇಮದ ತಾಣ - ಬೆಳಕೆಂದರೆ ಅನುಗಾಲವೂ ಜಗವ ಹರಸಿ ಕಾಯುವ ಪ್ರಾಣ...
ಶುಭ ಮುಂಜಾವು... 🌞🌦️🏝️

ಎದೆಯಿಂದ ಎದೆಗೆ ಪ್ರೀತಿ ಬೆಳಕನು ದಾಟಿಸಲಿ ಹಬ್ಬದ ಹುಗ್ಗಿ...
ಬೆಳಕಿಗಿಷ್ಟು ಎದೆಯ ಸಿರಿಯ ಬಳಿದರೆ ಸಂಭ್ರಮವೀ ಬೆಳಗು...
ಶುಭದಿನ... 🤝💞🫂

ಬೆಳಕಿನ ಕಣ್ಣೆದುರು ಹರವಿಟ್ಟ ಎದೆಯ ಕನಸುಗಳಿಗೆಲ್ಲ ಬಿಳಿ ಬಿಳಿಯ ಬಣ್ಣ...
ಶುಭದಿನ... 🧚🦸

ಬೆಳಕಿನ ಭರವಸೆಯ ಎಳೆ ಪಾದ ಎದೆಯ ಹೊಸಿಲ ತುಳಿದು ನಗೆಯ ರಂಗೋಲಿಯಿಟ್ಟು ಪ್ರೀತಿ ಹೇಳುವಲ್ಲಿ ನಂದ್ ನಂದೇ ಅನ್ನಿಸುವ ಚಂದ ಬೆಳಗು...
ಶುಭದಿನ... 🎉🍬

ಬೆಳಗೆಂಬ ನಿನ್ನ ಪ್ರೀತಿಯ ಬಣ್ಣ... 💞🍬

ಬೆಳಕೆಂದರೂ ಬೆಳಗೆಂದರೂ ನಗು ನಗು ಮತ್ತು ನಗು ಅಷ್ಟೇ - ಬೆಳಕೇ ಅಲ್ಲವಾ ನಿನ್ನ ನಗು... 
ಶುಭದಿನ... ☺️🤗

ಶುಭವನೇ ಅರಸುತ್ತಾ, ಹಾರೈಸುತ್ತಾ ಮತ್ತೂ ಒಂದು ಹಗಲು...
ಶುಭದಿನ... 🫂

ಬೆಳಕು ಶುಭ ನುಡಿದರೆ ಬದುಕು ಬೆಳಕಾದಂಗೆ, ಹಂಗೇ ಶುಭದ ಮಿಡಿತಗಳ ಉಡುಗೆ, ಉಡುಗೊರೆಗಳಿಷ್ಟು ಮುಫತ್ತು ಸಿಕ್ಕಂಗೇ ಲೆಕ್ಕ...
ಶುಭದ/ಶುಭವೇ ಬೆಳಗು... 🧚🦸

ಮಾತು ಮಾತಿನ ನಡುವೆ ಸುಳಿವ ತಿಳಿ ಉಸಿರಲ್ಲಿ ಬೆಳಕು ಮೈದಳೆಯಲಿ - ನುಡಿದ ನುಡಿಯೆಲ್ಲಾ ಲಯಬದ್ಧ ಶುಭದ ಮನೋಮಿಡಿತವಾಗಲಿ...
ಬೆಳಗೆಂಬ ಶುಭ ಶುಭದ ಸ್ವರ ಸಂಯೋಜನೆ... 🍬

ಮತ್ತದೇ ಹಗಲು - ಮುಗಿದು ಹೋಗುವ ಮುನ್ನ ಶುಭದ ಕಿಡಿಯೊಂದ ಎದೆಗೆ ಮುಡಿಸಿ ಹೋಗಲಿ...
ಮತ್ತದೋ ಬೆಳಗು...
ಶುಭದಿನ... 🧚

ಬೆಳಗೆಂಬ ಭರವಸೆಯ ಸಾರಥಿ... 🦋

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರ್ನಲ್ವತ್ತು ಮೇಲೊಂದು.....

ಬೆಳಗೆಂಬ ಶುಭವಾರ್ತೆ - ಬೆಳಗೆಂಬುದೇ ಶುಭವಾರ್ತೆ.....

ಸೋಬಾನೆಯ ಸೋಪಾನದಿ ಮಲಗಿದ್ದ ಶುಭದ ಕುಡಿಗಳೆಲ್ಲ ಗಡಬಡಿಸಿ ಎದ್ದು ಬೆಳಕಲ್ಲಿ ಮುಖ ತೊಳೆದು, ಬೆಳಕನೇ ಅಲಂಕರಿಸಿಕೊಂಡು ನಮ್ಮೆಲ್ಲ ಬೆಳಗ ಹಾದಿಯಲಿ ಮುಂದಾಗಿ ನಡೆವಾಗ - ಆಹಾ! ಈ ಬೆಳಗಿನ ಸೊಬಗೇನು...
ಶುಭದಿನ... 🧚🪻

ಹೂವಿನೆದೆಗೆ ಕಿವಿಯಿಟ್ಟ ಬೆಳಕು
ಪ್ರೀತಿ ಅರಳುವ ಸದ್ದಿಗೆ ರೋಮಾಂಚ ಬೆಳಗು...
ಗಾಳಿ ಹಾದಿಯ ತುಂಬಾ ಸೃಷ್ಟಿ ಗಂಧ
ಉಸಿರುಸಿರ ತಿತ್ತಿಗಳಲಿ ಒಲುಮೆ ಹರಿವು...
ಶುಭದಿನ... 🪻🦋

ಅಲ್ಲೆಲ್ಲೋ ಉರಿದುರಿದು ಬೆಳಕನುಣಿಸುತಾನೆ
ಇಲ್ಲಿವಳು ಮೈದುಂಬಿ ಅರಳರಳಿ ಹಸಿರ ಹಡೆಯುತಾಳೆ...
ನೋಡು 
ಜ್ಯೋತಿರ್ವರ್ಷಗಳ ದಾಟಿ ಪ್ರೀತಿ ಎದೆಯ ಸೋಕುವ ರೀತಿ... 
ಪ್ರೇಮವೇ ಬೆಳಗು...
ಶುಭದಿನ... 🌦️

ಬೆಳಕೇ ಹರಿಯಲಿ ಎದೆಯಿಂದ ಎದೆಗೆ - ಪ್ರೀತಿ ಸಂಯೋಜನೆ...
ಶುಭದಿನ... 🍬🪻

ಬೆಳಕು ಬರೆದ ಕವಿತೆಯ 
ಹಕ್ಕಿಗೊರಳು ದನಿಯೆತ್ತಿ ಹಾಡಿ 
ಹೂವೆದೆಯ ಚಲುವರಳಿ 
ಅಲ್ಲಿಂದಿಲ್ಲಿಗೆ ಇಲ್ಲಿಂದಲ್ಲಿಗೆ ಓಡಿಯಾಡುವ ಪ್ರೀತಿ... 
ಬೆಳಗೆಂದರೆ ಜಗವೆಲ್ಲ ಒಲವ ಸಂಭ್ರಮ... 🪻🦋
ಶುಭದಿನ... 🍬

ಮತ್ತೊಂದು ಕಿರು ಪಯಣ - ಬೆಳಕಿನೊಂದಿಗೆ, ಬೆಳಕಿನೆಡೆಗೆ...
ಬೆಳಗಾಯಿತು... 🍬🪻

ಬೆಳಕು ಎನ್ನೆದೆಯ ಹಲಗೆಯ ಮೇಲೆ ಪ್ರೀತಿ ಅಕ್ಷರ ಬರೆದು ಅರಿವಿನ ಹರಿವು ಇನ್ನಷ್ಟು ಹಿರಿದಾಗಲಿ...
ಬೆಳಗಾಯಿತು - ಬೆಳಕಾಗಲಿ...
ಶುಭದಿನ... 💞🪻

ಹಂಚಿ ತಿನ್ನುವ ಪ್ರೀತಿಯಲಿ ಹಬ್ಬವಾಗುವ ಬೆಳಗು...
ಶುಭಾಶಯ - ಶುಭದಿನ... 🍬💞

ಬಗೆ ಬಗೆಯ ರೂಪ ರಾಗಗಳಲಿ ನೈವೇದ್ಯವಾಗಲಿ ಎದೆಯಿಂದ ಎದೆಗೆ "ಪ್ರೀತಿ" ಕಜ್ಜಾಯ...
ಪ್ರೀತಿಯ ಶುಭಾಶಯ - ಶುಭದಿನ... 🍬🍫🍭

ಉತ್ಸವದ ಮರು ಹಗಲು
ಹಾಗೇ ಉಳಿದ ಖುಷಿಯ ಅಮಲು...
ಬದುಕು ಹಿತದಲ್ಲಿ ಮೈಮುರಿದಾಗಲೆಲ್ಲ ಪ್ರೀತಿ ಪ್ರೀತಿಯಿಂದ ತೇಗುತ್ತದೆ...
ಶುಭದ ಸುಖದ ಬೆಚ್ಚನೆ ಹರಿವು...
ಶುಭದಿನ... 💞

ಹಬ್ಬದ ರಜೆ ಮುಗಿದು ಶಾಲೆಗೆ ಹೊಂಟ ಕೂಸಿನ ಪಾಟೀಚೀಲದಲ್ಲಿ ಮುದುಡಿ ಕುಳಿತ ಖಾಲಿ ಕೇಪಿನ ಡಬ್ಬದಲಿ ಹಬ್ಬದ ಖುಷಿ, ಕೇಕೆ, ಕಥೆ, ಸುದ್ದಿಗಳು ಊರಿಗೆಲ್ಲ ಹಂಚಿಯೂ ಮಿಗುವಷ್ಟು ಬಾಕೀ ಇದೆ - ಮಗುವ ನಿದ್ದೆಗಣ್ಣಲ್ಲಿ ಹಬ್ಬವಿನ್ನೂ ಚಾಲ್ತಿ ಇದೆ...
ಎದೆಯೊಳಗಿನ ಮಗುವ ಮಾತಾಡಿಸಿ...
ಶುಭದಿನ... 🍫💞

ದುಂಬಿ ಕಣ್ಣ ತುಂಟ ಆಸೆ ನೋಟ
ಹೂವಿನೆದೆಯ ಶೃಂಗಾರದ ಢವಢವ
ಪ್ರೀತಿ ಅರಳುವ ಕಲರವ...
ಬೆಳಗಾಯಿತು... 🪻🦋

ಬೆಳಕು ಜಗದೆಲ್ಲರೆದೆಯ ಭರವಸೆಯ ಅಮೃತ ಗಿಂಡಿಯ ತಿಕ್ಕಿ ತೊಳೆದು ಒಪ್ಪ ಮಾಡಿ ನಗುವ ಚೆಲ್ಲಿ ನಿಂತಂತೆ ಬೆಳಗಾಯಿತು - ಬೆಳಕೇ ಬಯಲಾಯಿತು...
ಶುಭದಿನ... 🧚

ನಗೆಯ ಪನ್ನೀರಲ್ಲಿ ಬೆಳಕ ಪಾದವ ತೊಳೆದು ಕಣ್ಣಿಗೊತ್ತಿಕೊಂಡರೆ ದಿನವಿಡೀ ಊರೆಲ್ಲ ಪ್ರೀತಿ ಪಯಣ...
ಬೆಳಗಾಯಿತು... 🤝

ಬೇಡನ ಬಾಣಕ್ಕಿನ್ನೂ ಜೀವ ಬಂದಿಲ್ಲ, 
ಬೆಳಕಿನ ಋಣವಿಷ್ಟು ಇನ್ನೂನು ಬಾಕಿ ಇದೆ, 
ಹಕ್ಕಿಯ ರೆಕ್ಕೆಯ ಅನುನಯದಿ ಸವರುವ ಪ್ರೀತಿ ಬೆಳಗು...
ಶುಭದಿನ... 💞🪴

ಇರುಳ ದಾಂಟಿ ಬಂದವರ ಕೆನ್ನೆ ಸವರುವ ಬೆಳಕು - ನಗೆ ಮುಗುಳ ಅರಳಿಸೋ ಬೆಳಗು...
ಶುಭದಿನ... 🪻🍬

ಸಾಕು,
ನಿದ್ದೆಯ ಗುದ್ದಿ ಬೆಳಕಿಂಗೆ ಎದೆ ತೆರೆದು ಎಚ್ಚರಾಗೆನುವ ಬೆಳಗು...
ಶುಭದಿನ... 🤗

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರ್ನಲ್ವತ್ತು.....

ನಗುವನ್ನು ಸುಮ್ಮನೆ ನಂಬಿಬಿಡುವುದೇ ಸುಖವು.....

ಯಮುನೆಯ ತಣ್ಣನೆ ಹರಿವು, ಬೃಂದಾವನದ ಉನ್ಮತ್ತ ಹಸಿರು, ಗೋವಳದ ಮಂಗಳಮಯ ಉಸಿರು; ಕೊಳಲ ದನಿಯಾಗಿ, ನವಿಲ ಗರಿಯಾಗಿ, ರಾಸರಾಗದ ಸವಿಯಾಗಿ ಅವನ ಸಹಯೋಗದಲಿ ಮಿಂದ ಪ್ರೇಮಾಲಾಪದ ಹೆಸರಲೂ ಎಷ್ಟೊಂದು ನವಿರು...
ಅವನು ಹುಟ್ಟುವ ಮೊದಲೂ ಪ್ರೇಮವಿತ್ತೇನೋ, 
ಅವನ ಕಾಲಾಹುತಿಯ ನಂತರವೂ ಪ್ರೇಮ ಇದೆ ಅಂತಾರೆ,
ಆದರೆ
ಅವನಂತೆ ಪ್ರೇಮಿಯ ನೀಗಿಕೊಂಡು, ಪ್ರೇಮವ ಜೀವಿಸಿ, ಪ್ರೇಮವೇ ಆಗಿ ಹೋಗಲು ಅವನೇ ಆಗಬೇಕೇನೋ...
ಊಹೂಂ 
ಸುಲಭವಿಲ್ಲ - ಅವನಾಗುವುದು, ಅವನಾಗುವುದ ಬಿಡಿ ಒಂದು ರಜ ಅವನಂತಾಗುವುದೂ...
___ "ಕೃಷ್ಣಾ" ಎಂಬ ಚಿರ ಯೌವನ...
&&&

'ನೀ ನನ್ನ ಇಷ್ಟ, ನೀ ನನಗೆ ನಂಗಿಂತಾ ಇಷ್ಟ' ಹಂಗಂತ ದಿನಕೆ ನೂರು ಬಾರಿ ಹೇಳಿಬಿಡಬಹುದು - ಪ್ರೀತಿಯಾಗಲೀ, ನೇಹವಾಗಲೀ ಅದಷ್ಟೇ ಆದರೆ...
ಆದರೆ,
ನಾನು ನಾನಾಗಿಯೇ ಉಳಿದು ನಿನ್ನೊಡನಾಡುವ ಜವಾಬ್ದಾರಿಯಾಗಿ, ಕಾಳಜಿಯಾಗಿ, ಅನುಸರಣೆಯಾಗಿ, ಬದುಕೆಂಬ ಬದುಕಿನ ನೆರಳು ಬೆಳಕಿನಾಟದಲೆಲ್ಲಾ ಆತ್ಮಸ್ಥ ಭರವಸೆಯ ಹೆಗಲಾಗಿ ಸಖ್ಯವ ನಿಭಾಯಿಸುವ ನಡತೆಯಲ್ಲಿ ನಾ ನನ್ನ ಪ್ರೀತಿ ಹೇಳ್ತೀನಿ ಅಂತ ಹೊರಟರೆ ಮಾತ್ರ ತುಂಬಾನೇ ಗಟ್ಟಿ ಇರಬೇಕು ಗುಂಡಿಗೆ...
____ ವ್ಯಕ್ತಪಡಿಸಬೇಕೆಂಬ ಗಡಿಬಿಡಿ ಮತ್ತು ವ್ಯಕ್ತಪಡಿಸುವ ಚಂದ...
&&&

ಎದೆಯ ಬಾಗಿಲಿಗೆ ಹಿಂಗೆ ಬಂದು ಹಂಗೆ ಹೋಗುವ ಸಂಚಾರೀ ಭಾವಗಳಿಗೇ ಸ್ಥಿರ ಭಾವದ ಪಟ್ಟ ಕಟ್ಟಿಕೊಂಡು 'ನೀನು' ಅಥವಾ 'ನೀನು ಮಾತ್ರ' ಅಂತೆಲ್ಲಾ ಆಪ್ತತೆಯ ಆಣೆ ಪ್ರಮಾಣದಂಗೆ ಮಾತಾಡಿಬಿಡ್ತೇನಲ್ಲ, ಮತ್ತದನ್ನು ನೀನು ಅಥವಾ ನಿನ್ನಂಥವರು ಸುಖಾಸುಮ್ಮನೆ ನಂಬಿ ಬಿಡ್ತೀರಲ್ಲ - ಎಂಥಾ ದುರಂತ ಅದು...
ಅಲ್ಲಿಗೆ,
ನಾಕು ದಿನ ಒಡನಾಡುವ ಹೊತ್ತಿಗೆ ಭಾವವೂ, ಬಂಧವೂ ಹೊತ್ತು ನಡೆಯಲಾರದಷ್ಟು ಭಾರ ಭಾರ; ಅಲ್ಲಿಂದ ಮುಂದೆ ಶುರು: 'ಇಷ್ಟೇನಾ ನನ್ನ ಅರ್ಥ ಮಾಡ್ಕೊಂಡಿದ್ದೂ, ವ್ಯಕ್ತಪಡಿಸಿದರೆ ಮಾತ್ರವೇ ಆಪ್ತ ಅಂತಲಾ, ನನ್ನ ಮೌನವೂ ಅರ್ಥವಾಗಬೇಕು ಆಪ್ತತೆ ಅಂದ್ರೆ' - ಸುರಕ್ಷಿತ ಅಂತರ ಕಾಯ್ದುಕೊಳ್ಳಲು ನೂರು ಸಬೂಬುಗಳ ಮಾತಿನ ವ್ಯಾಪಾರ...
ನನ್ನೊಳಗೇ ಇನ್ನೂ ಗಟ್ಟಿಯಾಗಿರದ ಭಾವವನ್ನು ಯಾವುದೋ ಹುಕಿಗೆ ಬಿದ್ದು ನಿನಗೆ ದಾಟಿಸಿರುವಾಗ, ಮೊದಲಾಗಿ ನುಡಿಯುವಾಗಲೇ ನನ್ನಲ್ಲಿ ಸ್ಪಷ್ಟತೆ ಮತ್ತು ಸ್ಥಿರತೆ ಇಲ್ಲದಾಗ, ಜಾಳು ಭಾವ ಜೊಳ್ಳು ಮಾತುಗಳನು ಜೊತೆಗಿಟ್ಟುಕೊಂಡು ಗಟ್ಟಿ ಬಂಧವ ಬಯಸುವಾಗ, ಬಾಂಧವ್ಯವೊಂದನು ನಿಭಾಯಿಸುವಲ್ಲಿ ನವಿರು ಚಂದವಾಗಲೀ, ಮುಕ್ತ ನಗುವಾಗಲೀ ಹೇಗೆ ಉಳಿದೀತು ಹೇಳು...
ಕೊನೆಗೆ,
ಪ್ರಾರ್ಥನೆಯ ಹೆಸರಲ್ಲಿ ಬೇಡಿಕೆಗಳ ಪಟ್ಟಿ ಹಿಡಿದು ದೇವರನ್ನೇ ಮಾತಿಗೆಳೆಯುವ ನಾವು ಮನುಷ್ಯಮಾತ್ರರ ಸಂಬಂಧಗಳಲಿ ಮೌನದ ಎತ್ತರವ ಸಾಬೀತುಪಡಿಸಲು ಹೊರಡುತ್ತೇವೆ...
___ ಬುದ್ಧಿವಂತಂಗೆ ಮೂರ್ಕಡೆ... 
&&&

ಎಷ್ಟೆಲ್ಲಾ, ಏನೇನೆಲ್ಲಾ ಸಂಪಾದಿಸುವ ಹುಚ್ಚಿನಲ್ಲಿ, ಹರಸಾಹಸ ಗೈದೂ ಗಳಿಕೆಯಾಗಿ ಸಿಗುವ ಶೂನ್ಯ ಅಥವಾ ಎಷ್ಟೆಷ್ಟೆಲ್ಲಾ, ಏನೇನೋ ಸಾಧಿಸಿ, ಸಂಪಾದಿಸಿ ಗುಡ್ಡೆ ಹಾಕಿಕೊಂಡು ಹಮ್ಮಿನಲಿ ಎದುರು ಕೂತಾಗಲೂ ಇವಕ್ಕೇನಾ ಇಷ್ಟೊಂದು ಹೆಣ್ಮಿರಿ ಬಡಿದಾಡಿದ್ದೂ ಅನ್ನಿಸಿ ಒಮ್ಮೆಲೇ ಕಾಡುವ ಶೂನ್ಯ...
ಉಫ್...
ಈ 'ಶೂನ್ಯ'ವೆಂಬೋ 'ಗುರುವು' ಮಾಡುವ ಪಾಠವು ಕಾಡುವ, ಕೂಡುವ, ಕಲಿಸುವ ಪರಿಗೆ ಬದುಕಿನದು ನಮೋನ್ನಮಃ...
___ ಶೂನ್ಯದಿಂದ ಶೂನ್ಯದೆಡೆಗೆ ಗಡಿಬಿಡಿಯ ನಡಿಗೆ - ನಾನು ಶೂನ್ಯನೂ...
&&&

'ಸಾವು' ಅಂದ್ರೆ ಚಿರ ನಿದ್ರೆ...
ಸತ್ಯವೇ ಅದು...
ಆದ್ರೂ,
ಬದುಕ ಬಾಗಿಲಲಿ ನಿಂತು ಅಂಗಳದಲಿ ಸರಿದಾಡುವ ಸಾವನು ನೋಡಿದೆನಾದರೆ 'ಸಾವು' ಎಚ್ಚರವೂ ಹೌದು...
ಕೆಲವೆಲ್ಲಾ ದಿನಗಳಲಿ ಸತ್ತಂತೆ ಬದುಕ್ತಿರ್ತೇನೆ - ಜಡ ಜಡವಾಗಿ...
ಆಗೆಲ್ಲೋ,
ಒಂದು ಸಿಡಿದ ಚಿತೆಯ ನೆನಪಾಗಿ, ಕಳ್ಳ ಬೀಳುವ ಈ ಎದೆಬಡಿತದಲ್ಲಿ ಹೊಂಚಿ ಕೂತಿರುವ ಅಭಯವಿಲ್ಲದ ನನ್ನ ದಿನಗಳ ಲೆಕ್ಕ ಶುರುವಾಗಿ, ಈಗಿಲ್ಲಿ ನಿಂತಿರುವ ನಾನು ಒಂದು ಕನಸೂ ಅನ್ನಿಸಿ, ಯಾವುದೋ ಅಚ್ಚರಿಯ ಇನಾಮು ಎಂಬುದರಿವಾಗಿ, ಸರಕ್ಕನೆ ಕಣ್ಣು ಬಿರಿಯುತ್ತದೆ... 
ಅಲ್ಲಿಂದಾಚೆ, 
ಕಣ್ಣೆದುರಿನ ಮೋಹಗಳಲಿ ಕರಡಿ ಮುದ್ದು ಉಕ್ಕುತ್ತದೆ...
ತೋಳ ಹರಹಿಗೆ ಸಿಕ್ಕ ಏನೆಂದರೆ ಏನನೂ ಬಿಡದೇ ಹಪಹಪಿಸಿ ಬಾಚಿ ತಬ್ಬಿ ಸರಸಕಿಳೀತೇನೆ...
ಪರಮ ಕಂಜೂಸು ಬದುಕನೂ ಪರಮೋಚ್ಛ ತೀವ್ರತೆಯಲಿ ಜೀವಿಸಲೆಳಸ್ತೇನೆ...
ಎಲ್ಲಾ ಹಗಲಲೂ ಬೆಳಕ ಬಯಲ ಸೌಂದರ್ಯದಲ್ಲಿ, ಪ್ರತಿ ಇರುಳಲೂ ಬೆತ್ತಲನು ಅಪ್ಪುವ ಮಾಧುರ್ಯದಲ್ಲಿ ಕರಗಿ ಕರಗಿ ನನ್ನ ನಾನು ನೀಗಿಕೊಳ್ಳಲು ಹವಣಿಸ್ತೇನೆ...
ಇಡೀ ಬದುಕಿಗೇ ಹಿಡಿ ಹಿಡಿಯಾಗಿ ಮಿಲನೋತ್ತುಂಗದ ಹಗುರತೆಯ ತುಂಬಿಕೊಳ್ಳಲು / ತುಂಬಿಕೊಡಲೂ ತುದಿಗಾಲಲ್ಲಿ ತಯಾರಾಗ್ತೇನೆ...
ಅದಕೇ - 
ಸಾವೆಂದರೆ ನನ್ನ ಅಂತಿಮ ಯಾತ್ರೆ ಹೆಂಗೋ ಹಂಗೇ ಸಾವೂ ಅಂದರೆ ನನ್ನೀ ಬದುಕಿನೆಚ್ಚರದ ಆರಂಭ ಸೈತಾ...
____ ಮಸಣವಾಸಿಯ ಕಳ್ಳು ಕಾವ್ಯ...
&&&

ನಿನ್ನಾ ಅನುಗಾಲದ ಅನುರೂಪ ನಗುವಿನ ಗುಟ್ಟೇನು...?
......ಹಹ್ಹಾ.....
...... ಎಲ್ಲೂ ತಾವಿಲ್ಲದಂಗೆ ಈ ಎದೆ ಗೂಡನೇ ತಬ್ಬಿ ಹಬ್ಬಿರುವ ನೋವ ಬಳ್ಳಿ, ಮತ್ತದರ ಬೆನ್ನಿಗಂಟಿ ಬರುವ ಸಂವಾದಿ ಬಳಗ...
ಹಂಗೇ 
ಬದುಕ ಬಾಗಿಲಿಂಗೆ (ಪಾಲಿಗೆ) ಬಂದ ಎಂಥದ್ದೇ ಅತಿಥಿಗಳನು ಆದರದಿ ಆದರಿಸುವ ಜನ್ಮ ಸಂಸ್ಕಾರ...
____ ನೋವು ನಗುವಿನ ಮೆಟ್ಟಿಲು...

ಹಾಗಲ್ಲ
ನಾ ಹೇಳಿದಷ್ಟು ಸುಲಭವಾ ನೀ ಸುಖಾಸುಮ್ಮನೆ ನಂಬುವುದು...
ನೋವೆಂದರೆ
ನಗುವವನ ಎದೆಯ ನೋವಿಗೆ ಸಾಕ್ಷಿ ಬೇಕೆಂದರೆ ಆ ನಗುವಲ್ಲೇ ಹುಡುಕಬೇಕಿರುವುದು...
___ ನಗುವನ್ನು ಸುಮ್ಮನೆ ನಂಬಿಬಿಡುವುದೇ ಸುಖವು...
&&&

ವತ್ಸಾ -
ಹೆಗಲೇರುವ ನೋವುಗಳಲ್ಲಿ ಇರುವ ಒಗ್ಗಟ್ಟಿನಲ್ಲಿ ಒಂದಂಶದಷ್ಟಾದರೂ ಗಲ್ಲ ತಿವಿಯುವ ನಲಿವುಗಳಲ್ಲಿದ್ದಿದ್ದಾದರೆ ಸಾಕಿತ್ತು, ನಗೆಯ ಆಯುಷ್ಯವ ಗೆಲ್ಲುವ / ಮೆಲ್ಲುವ ಹಾದಿ ಇಷ್ಟು ಸಿಕ್ಕುಸಿಕ್ಕಾಗಿರುತಿರಲಿಲ್ಲ ನೋಡು...
____ ಒಡೆದ ಕಾಲ್ಬೆರಳಿಗೇ ಎಡವಲೆಂದೇ ಕಾಯುತ್ತಾ ಕೂತಂತಿರುತಾವೆ ಕಲ್ಲುಗಳು...
&&&

ಇಷ್ಟಕ್ಕೂ ಎಲ್ಲಾ ಹೇಳ್ಕೊಂಡು ನಗಬಹುದಾದ ದೇವರಿಂದಲೂ ಒಂದಿಷ್ಟೇನನಾದರೂ ಮುಚ್ಚಿಟ್ಟುಕೊಳ್ಳಲು ಹವಣಿಸುವ ಮನುಷ್ಯರು ನಾವು...
ಬಯಲ ಬೇವರ್ಸಿಯಂತಾಡುವ ನನ್ನೊಳಗೂ ಗುಟ್ಟುಗಳಿಷ್ಟು ಉಳಿದಿರಬಹುದು - ಎನಗೆ ಆನೇ ಹೇಳಿಕೊಳ್ಳಬೇಕಿರುವುದೂ ಎಷ್ಟೋ ಬಾಕಿ ಇರಬಹುದು...
ಇಷ್ಟಾಗಿಯೂ - ನೀ ಮಾತಿಗೆ ಸಿಕ್ಕಾಗ, ಮೌನಕೆ ಹೆಗಲಾಗುವಾಗ ನನ್ನದೆನುವ ಎಲ್ಲಾ ಖುಲ್ಲಂಖುಲ್ಲಾ ಎಂಬಷ್ಟು ಆಪ್ತತೆ ನೋಡು ನೀನೆಂದರೆ ನೇಹವೇ...
___ ನಿಂಗೂ ನಾ ಹಂಗೇನಾ..? ಹಂಗೆಂದಾದರೂ ಆದೇನಾ...??

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರ್ಮೂವತ್ತೊಂಭತ್ತು.....

ಪ್ರಣಯ ಕಾವ್ಯದ ಕಾಲ್ಸಂಕ.....

ಪರಿಚಿತ ಹಾದಿಯಲಿ ಅಪರಿಚಿತ ಕವಿ ಬರೆದೆಸೆದ ಅಪೂರ್ಣ(ರ್ವ) ಭಾವಗೀತೆಯೊಂದು ನನಗೇ ಕಾದು ಎದೆಯ ಹೊಕ್ಕಂಗೆ - ನೀ ಸಿಗುವ ಎಲ್ಲಾ ಸಂಜೆಗಳು... 🥰
____ ಪ್ರಣಯ ಕಾವ್ಯದ ಕಾಲ್ಸಂಕ...
&&&

ವತ್ಸಾ -
"ನೀ ನನ್ನ ಇಷ್ಟ ಅನ್ನೋದರ ಅರ್ಥ ನೀ ನನ್ನ ದೌರ್ಬಲ್ಯ ಅಂತ ಅಲ್ಲ..."
ನಿನ್ನ ನೆನೆವವರ ನೆನೆಯುತ್ತಿರು, ನೆನೆನೆನೆದು ಒಡನಾಡುತ್ತಿರು ಭಾವವೇ - ಆಗ ನಿನ್ನನೇ ತೊರೆದವರ ನೆನೆದೂ, ನೆನಪುಗಳು ಸೆಳೆದೂ, ತುಳಿದೂ ನಗಬಹುದು ಜೀವವೇ...
____ ನನ್ನ ಧ್ಯಾನ - ನನ್ನ ಆಧ್ಯಾತ್ಮ...
&&&

ಇಲ್ಲಿ ಮೋಡ ಮುಸುಕಿದ ವಾತಾವರಣ, ಯಾವ ಕ್ಷಣದಲ್ಲೂ ಹುಚ್ಚು ಮಳೆಯಾಗಬಹುದು ಅಂತ ಸಂದೇಶ ಬಂತು - ಆಹಾ!! ಎಂಥ ಚಂದ ಪೋಲಿ ಕಾವ್ಯ ಎಂದು ನಲಿದೆ...
ಸದಾಶಿವಂಗೆ ಅದೇ ಧ್ಯಾನ ಅಂತಂದು ಮೂಗು ಮುರಿದವಳ ಹೊಳೆದ ಮೂಗುತಿಯಲ್ಲಿ ಕಳ್ಳ ಆಸೆಯ ಸೆಳಕು... 
ಬೆಳ್ಳಂಬೆಳಗಲಿ ಮೈ ಮನಕೆ ತುಟಿ ಕೊಂಕಲೇ ಕಡು ರೋಮಾಂಚವ ಸುರಿದು "ಹೋಗೋ, ಕೆಲ್ಸ ನೋಡು ಹೋಗು" ಅಂತ ಹಿತವಾಗಿ ತಿವಿದರೆ ಹೆಂಗೆ ತಡೆದೀತು ಪೋಲಿ ಜೀವ ಆ ಸವಿ ಸುಖವಾ...
____ ಕರಿ ಮೋಡ ಬಿತ್ತಿದ ಛಳಿಯ ಛವಿ ಮತ್ತು ಕಪ್ಪು ಹುಡುಗಿಯ ವಲವ ವಯ್ಯಾರದ ಬಿಸಿ...
&&&

ಉರಿದುರಿದು ಘಮಿಸಲು ಇರುಳಿಗಾಗಿ ತಪಿಸುವ ನಾ ನಿನ್ನ ಮೋಹದ ಧೂಪ...
ಮಳೆ ಛಳಿಯ ಮಡುಹಿನಲಿ ನಾಭಿ ಕೋಡಿಯಿದು ಮದನನ ಮಧುರ ಶಾಪ...
ಕೇಳೇ -
ಮೊದಲ ಮಳೆಯಲಿನ ಮೃದ್ಗಂಧದಂಗೇ ಕಾಡುತ್ತದೆ, ಮರಳಿ ಹೊರಳಿ ಕರೆಯುತ್ತದೆ, ಪ್ರತೀ ಮಿಲನೋತ್ಸವದ ಉತ್ತರಾರ್ಧದದಲೂ ಹೊಮ್ಮುವ ನಿನ್ನ ಮೈತಿರುವುಗಳ ಮತ್ತ ಘಮ...
____ ಮಳೆ‌ ನುಡಿಸುವ ಹೂ ಹಕ್ಕಿ ಹಾಡಿನ ಧರ್ಮ...
&&&

ಹೇ ದೇವಾ,
ಅವಳ ಭಕ್ತಿಗೆ ಒಲಿದೆಯಾದರೆ ನನ್ನನೇ ಕರುಣಿಸು...
ನಿಂಗೆ ಸೋತೇ ಅಂದಳು - ಮತ್ತೀಗ ನನ್ನ ಬದುಕನೇ ನಿರ್ದೇಶಿಸುತ್ತಾಳೆ...
"ಸೋತವರು/ರೇ ಆಳುವುದು ಒಲವಲ್ಲಿ ಮಾತ್ರವೇ ಇರಬೇಕು..."
___ ಮಧುರ ಪಾಪದ (ಹುಚ್ಚು) ಕಿಚ್ಚು... 
&&&

ಇದಿರು ಹಾಯುವ ಪ್ರತಿ ನಡೆ ನುಡಿಗಳಲೂ ಮಧುರ ಸ್ವರ ವಿನ್ಯಾಸವ(ನಷ್ಟೇ) ಹುಡುಕುವ ತುಂಬು ಎದೆ ಭಾವಕೆ ಅವಳದೇ ಹೆಸರಿಡುವೆ...
___ ಅವಳೆಂದರೆ - ಎನ್ನ ಹಾದಿಯ ಕರಿ ಕಾನು / ಕಾರ್ಮುಗಿಲು / ಪಾಳು ಗುಡಿಯ ಕಪ್ಪು ಕಲ್ಲು ದೇವರೆದುರಿನ ಕಿರು ಘಂಟೆ...
&&&

ಕಾಲನೇ, ಒಂದೇ ಒಂದು ಕೊನೆಯಾಸೆ / ಪ್ರಾರ್ಥನೆ:
ಬರೀ ಕಲ್ಲಲ್ಲ ನೀನೆಂದು ನಂಬಿದವಳ ರುದಯದ ಕನಸುಗಳೆದುರು ಕಲ್ಲಾಗಬೇಡ...
ಸುಳ್ಳೇ ಆದರೂ ಮುನಿದು ಅವಳ ನಗೆಯ ಹಾದಿಗೆ ಮುಳ್ಳು ಸುರಿಯಬೇಡ...
ಯುದ್ಧವೇನಿದ್ದರೂ ಸಮ ಬಲರ ನಡುವೆ ಇರಬೇಕು - ನಾನಿಲ್ಲದಲ್ಲಿ ಅವಳನು ಕಾಡದಲೇ ನೀನೇ ಕಾಯಬೇಕು...
___ ಭಾವುಕತೆ... 
&&&

ನಂಗೆ ಮಾತ್ರ ಕೊಡೂ ಅಂದ್ರೆ ನಾನು ಓಡೋಗ್ತೀನಿ - ನಂಗ್ನಂಗೂ ಮಾತ್ರ ಕೊಡೋ ಅಂದಲ್ಲಿ ಭರಪೂರ ಸುರೀತೀನಿ...
____ ಪ್ರೀತಿ ಪಲ್ಲಂಗ ಪುರಾಣ...
&&&

ಎಷ್ಟೊಂದು ಶಬ್ದಗಳ ಕೂಡಿಸಿ, ಕಳೆದು, ಭಾಗಿಸಿ ಶೇಷವಾಗಿಯೇ ಉಳಿಯಿತು ಭಾವ...
ನಿನ್ನದೊಂದು ಸುನೀತ ಸ್ಪರ್ಷದಿಂದ ಕವಿತೆಯಾಯಿತು ಜೀವ...
ನೋಡು
ಕವಿತೆ ಅಂದರೆ ಅದೇ ಅಂತೆ - ಶಬ್ದಾಲಂಕಾರಗಳ ಕೊಡವಿ ನೇರ ಎದೆಯನೇ ಮುಟ್ಟುವ ಸಂಪ್ರೀತ ಸನ್ನಿಧಿಯ ಶ್ವಾಸ...
___ ಪ್ರೀತಿಯೆಂದರೂ......

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರ್ಮೂವತ್ಯೆಂಟು.....

ನಿನ್ನೆಗಳೇ ನಾಳೆಗಳಲೂ ಇರಬಹುದು.....

ಎದೆ ಗಂಗೆ ಹೊನಲುಕ್ಕಿ ನೀ ಕುಣಿಕುಣಿದು ನಡೆದ ಆ ಹಾದಿಯನೊಮ್ಮೆ ಮಿಡಿದು ಬರಬೇಕು...
ನಿನ್ನ ಗೆಜ್ಜೆ ಗಿಲಕಿಗಳು ಚದುರಿ ಬಿದ್ದಂತೆ ಚೆಲ್ಲಿಕೊಂಡ ಪಾರಿಜಾತವ ಆಯ್ದುಕೊಂಡು ನಿನ್ನ ಘಮವನೆರೆದುಕೊಂಡೋಗಲು ಆ ಹಾದಿಯಲೊಮ್ಮೆ ಹಾದು ಬರಬೇಕು...
ನಿನ್ನಾ ಹೂನಗೆಯ ತುಟಿಯಿಂದ ಮುತ್ತೊಂದ ಕದ್ದೊಯ್ಯಲು ಆ ಅದೇ ಹಾದಿಯ ನೆರಳನೊಮ್ಮೆ ಸಂಧಿಸ(ಸಿ) ಬರಬೇಕು...
ಹಾಯೆನುವ ಕಣ್ಣ ನಗು, ಕಮ್ಮಗಿನ ಹೆರಳ ಗಂಧ, ಅರಳಿ ಮೊರೆವ ನಿನ್ನಂದ ಎಲ್ಲಾ ನಂದೆನುವ ಕಳ್ಳ(ಳ್ಳು) ಭಾವವೊಂದ ಸಾಕಿ ಸಲುಹಿಕೊಳ್ಳಲಾಗಿ ನಿನ್ನಾ ಹಾದೀಲೊಮ್ಮೆ ಸುಳಿದು ಬರಬೇಕು...
ನಿನ್ನುಡಿಯ ನಲುಮೆ ಪಡಿ ಪಡೆದು, ನನ್ನನೇ ನಿನಗಿತ್ತು, ನನ್ನ ನಾ ಮರೆಯಲೋಸುಗ ನಿನ್ನ ಹಾದಿಯಲೇ ಒಮ್ಮೆ ನಡೆದು ಬರಬೇಕು...
____ ಕನಸೇ...

"ಕಾವ್ಯ ಚಿಗುರುವ ಹಾದಿ"
ಪಟ ಸೌಜನ್ಯ: ನೇಹಿ ಶ್ಯಾಮಲಾ ರವಿರಾಜ್...

ನಿನ್ನ ಕಣ್ಬೆಳಕಲ್ಲಿ ಗರಿಬಿಚ್ಚುವ
ನನ್ನೆದೆಯ ನೂರು ವೈಯ್ಯಾರ;
ಈಗಷ್ಟೇ ಮೈತುಂಬಾ ಬಿಳಲು ಬಿಟ್ಟ 
ಚಿನಕುರುಳಿ ಪ್ರಾಯ...
ತಾರಸಿಯ ತಿಳಿ ಕತ್ತಲಲಿ
ತಬ್ಬಿಕೊಳಲಿ ಪ್ರೇಮ ಮನಸಾರ;
ಎದೆಯ ಭಾವದುಬ್ಬರಕೆಲ್ಲ ಕಳ್ಳ(ಳ್ಳು) ಸೂತ್ರ 
ನಾಭಿ ಮೂಲದ ಗಾಯ...
___ ತಂಪಿರುಳ ತಾಳ ತಪ್ಪಿಸುವ ಬೆಂಕಿ ಬೆಂಕಿ ಕಾಯ...
&&&

ಸಣ್ಣ ಸದ್ದಿನ ಮಳೆ - ಬೀದಿ ಬೆಳಕಲಿನ್ನೂ ಊರ ಗದ್ದಲ - ಸುರುಳಿ ಛಳಿ ಗಾಳಿಯಲಿ ಪಾರಿಜಾತದ ಘಮಲು - ನಿನ್ನ ನೆನಪಲ್ಲಿನ ನನ್ನ ಮಧುರ ಏಕಾಂತ - ನಾನಿಲ್ಲಿ ನನ್ನಲಿಲ್ಲ, ಬಹುಶಃ ನೀನಲ್ಲಿ ನಿನ್ನಲಿಲ್ಲ; ಕನಸಲ್ಲಿ ಪ್ರೇಮಲೋಕದ ಅಮಲು...
___ ಇಳೆ ಮಿಂದ ಇರುಳು...
&&&

ಪರಿಪೂರ್ಣ ಪೋಲಿತನದ ಒದ್ದೊದ್ದೆ ದಿವ್ಯ ಗಂಧವ ಎದೆ ತುಂಬಾ ಸುರಿಯೋ ಮಳೆಯ ಸಂಜೆ - ನೀನಿಲ್ಲದೆ ಅರಳಲಾರದೆ ಮಗುಚಿ ಬಿದ್ದ ನನ್ನದೆನಿಸದ ನನ್ನ ಶಾಪಗ್ರಸ್ತ ಇರುಳು...
___ ಮೋಹಿಯೆದೆಯ ಗರಗಸ...

ಸುಖ ಒಂದು ನಶೆಯಾದರೆ, ಸುಖದ ಗಾಯದ ಔಷಧಿಯೂ ನಶೆಯೇ - ನೀನು...
___ ಬಯಕೆ ಮಂಗನ ಮೈಯ್ಯ ಹುಣ್ಣು...

ಸುರಿವ ಮುನ್ನಿನ ಹುರಿ ಹುರಿ ಕವಣೆ ಉಸಿರಿನಂತೆ ಕೆನೆಗಟ್ಟಿದ ಕರಿ ಮೋಡ - ತೆನೆ ತೆನೆ ಜೀವ ಸಂಚಾರ...
ಒಂದು ಸಂಜೆಯ ಕಡು ಪ್ರೇಮ ಸಲ್ಲಾಪ...
ನೋಡೆಂಥ ಚಂದ ಇವರ ಮಿಲನ ಮುನ್ನುಡಿ...
____ ನೀನಿರಬೇಕಿತ್ತು - ತೇವ ತೇವ ತುಟಿಯಲೊಂದು ಕವಿತೆ ನುಡಿಸಬಹುದಿತ್ತು...
&&&

ದಾರಿ ಖರ್ಚಿಂಗೆ ಎನಗೇ ಅಂತ ಆನೇ ಬರೆದುಕೊಂಡ ಎರಡು ಸಾಲನು ನೀನೂ ಗುನುಗಿ ಖುಷಿಗೊಂಡರೆ - ಕಡಲಾಗುವುದು ಎನ್ನೆದೆ...
___ ನನ್ನ ಹಾಡು ನೀನಾಗುವ ಜಾಡು...
&&&

ಚೂರೂ ಗಾಂಭೀರ್ಯವೇ ಇಲ್ಲ, ಯಾವಾಗ ನೋಡಿದ್ರೂ ನಗ್ತಿರ್ತೀಯ ಒಳ್ಳೆ ಹಲ್ಲಿಟ್ಟಿ ರಾಮನ್ ಥರ, ಹು(ಚ್ಚು)ಟ್ಟು ತರ್ಲೆ...
ಅಯ್ಯೋ ಮರುಳೇ -
ಬದ್ಕಿಂದು ಯಾವತ್ತಿದ್ರೂ ಘನ ಗಂಭೀರ ಗುರು ಸ್ಥಾನವೇ; ನಾವು ಚಿಕ್ಕವ್ರು, ಶಿಕ್ಷಾರ್ಥಿಗಳು, ಪಾಠಕ್ಕೂ, ಪಥ್ಯಕ್ಕೂ ನಮ್ಮದೇ ನಮೂನೆಗಳಲಿ ನಗು ತುಂಬಿಕೊಳ್ಬೇಕು, ಮಗುವಾಗಿ ಆಟ ಕಟ್ಟಿಕೊಳ್ಬೇಕು - ಬಾಲ್ಯದ ಬೆಚ್ಚು ಬೆರಗು, ತಾರುಣ್ಯದ ಹಸಿ ಬಿಸಿ ರೋಮಾಂಚಗಳಿಲ್ದೇ ಬದ್ಕಿನ ಘನತೆಗೆ ಅಲಂಕಾರದ ಆಸ್ವಾದ ಏನಿರತ್ತೆ ಹೇಳು...
ಮೌನ ಭಾರ ಆಗ್ಬಾರ್ದು, ಮಾತು ಹಗುರ ಆಡ್ಬಾರ್ದು ಅಂದ್ರೆ ಅನುಭವದ ಊಟದ ರುಚಿ ವಿನೋದದ ವೀಳ್ಯದ ರಂಗಿನಲಿ ನಗೆಯಾಗಿ ತೇಗಬೇಕು...
____ ಪರಮ ಪೋಕರಿಯ ಒಣ ವೇದಾಂತ...
&&&

ಕೇಳು -
ನಿನ್ನ ಕಣ್ಣು ನನ್ನ ಕೂಡಿದ ದಾರಿಯಲಿನ್ನೂ ಬೆಳಕು ಹಾಗೇ ಉರಿ(ಳಿ)ದಿದೆ...

ಸಮಾಧಾನಕ್ಕೆ ನೂರು ದಾರಿಗಳಿದ್ದರೆ, ನೆನಪಿಗೆ ಸಾವಿರ ಮುಖಗಳು ನೋಡು...

ವತ್ಸಾ -
ಅಕ್ಕರೆಯ ಋಣ ಧನ್ಯತೆಯ ತುಂಬಬೇಕು, ಹೊರತೂ ಒಂದು ಧನ್ಯವಾದದಲಿ ಮುಗಿದು ಹೋಗಬಾರದು...
ಕಣ್ಣ ಹೊಳಪಲ್ಲಿ ಮೌನ ಪ್ರೀತಿ ಹೇಳಬೇಕು...

ಕೊಡುವಾಗ ಪ್ರೀತಿಯ ಕಾರಣಕ್ಕೂ, ಪಡೆಯುವಾಗ ನಡತೆಯ ಕಾರಣಕ್ಕೂ ಕ್ಷಮೆ ಸಿಂಧುವಾಗಬೇಕು...
ಮಾತು ಎದೆಯ ಧ್ವನಿಸಬೇಕು...

ಅಲ್ವಾ -
ಮೋಟು ಬೀಡಿಯ ತೆಳು ಘಾಟು ಹೊಗೆಯಂಥಾದರೂ ಪ್ರೀತಿ ಎದೆಯ ಸುಡುತಿರಬೇಕು...
ಬಿಡಿ ಸಾಲುಗಳ ನಡುವಿನ ಹಿಡಿ ನಶೆಯಲ್ಲಿ ಒಂಟಿ ಕವಿಯ ಜೀವಂತ ಭಾವಕಿಷ್ಟು ನಗೆಯು ಕೂಡುತಿರಬೇಕು...

ಹುಣ್ಣಿಮೆಯ ಬೆಳಕಲ್ಲಿ ಶರಧಿ ಅಳುವುದು,
ಕಲ್ಲಿನೆದೆಯಲ್ಲೂ ಒಂದ್ಯಾವುದೋ ಕನಸು ನರಳುವುದು,
ನಿನ್ನ ಹಾಡನು ನೀ ಹಾಡುವಾಗ ವಿರಾಮದ ನಗು ಚೆಲ್ಲಿ ಹೆಸರೊಂದನು ಉಸುರದೇ ಮರೆಸಲು ಹೆಣಗುತ್ತಾ ಗಟ್ಟಿ ಎಳೆದು ಬಿಟ್ಟ ಉಸಿರಲ್ಲಿ ನಾನಿರುವುದು,
ಪರಮ ಪೋಲಿಯ ಎದೆಯಲೂ ಒಂದು ಪ್ರೇಮದ ಕರ್ಮ ಸಂಸ್ಕಾರದ ಎಡೆಬಾಳೆ ಇರುವುದು,
ಎಲ್ಲಾ ಸುಳ್ಳೇ ಇರಬಹುದು (?) - ಆದರೆ.......

ಯಾರೂ ಬರೆಯದೇ ಹೋದದ್ದನ್ನ ನಾನೇನೂ ಬರೆದಿಲ್ಲ...
ಯಾರೋ ಬರೆಯದೇ ಇದ್ದದ್ದನ್ನ ಇಲ್ಯಾರೂ ಬರೆದಿಲ್ಲ...
ನಿನ್ನೆಗಳೇ ನಾಳೆಗಳಲೂ ಇರಬಹುದು...
&&&

ಎಲ್ಲಿದೀಯಾ...?
ಮನೇಲಿ...
ಯಾರೆಲ್ಲಾ ಇರ್ತೀರಿ...??
ನಾನು ಮತ್ತು ನನ್ನ ಪರಮ ಪೋಲಿ ಕನಸುಗಳು...
ಓಹೋ...! ಮಳೆ ಜೋರಾ...???
ಇನ್ನೂ ಬರೀ ಮೋಡ ಮುಸುಕಿದ ವಾತಾವರಣ...
ಹಂಗಾ...!!
ನೀ ಬಂದ್ರೆ ಮಳೆಯಾಗಬಹುದು... 😉
ಥೂ ಕರ್ಮ... 🤦
____ ನನ್ನೊಳಗೀಗ ನೀನು ಬಲು ಇಂಪಾದ ಪೋಲಿ ಹಾಡು... 

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರ್ಮೂವತ್ಯೋಳು.....

ನಾನೋ ದಂಡೆ ಮತ್ತು ಅಲೆ ಎರಡೂ ನಿನ್ನೆದುರು.....

ನೆಲದ ಹುಳ ನಾನು - ಹಾಡಹಗಲು ಗಗನಕ್ಕೆ ಗಾಳ‌ ಹಾಕಿ ಮೋಡಗಳ ತೆರೆಯಡಿಯ ತಾರೆಗಳ ಹಿಡಿಯುವ ಕನಸಾಯಿತು...
ಅಲ್ಲಿಯೂ ಪ್ರೀತಿಗೆ‌ ನಿನ್ನದೇ ಹೆಸರಿರಬಹುದು - ಮಳೆಗರೆವ ಮೋಡಗಳ ತವರೂರಂತೆ ಅದು...
ಪಕ್ಕೆಗಳಲಿ ರೆಕ್ಕೆಗಳಿಲ್ಲ ಖರೆ - ಗೊತ್ತಲ್ಲ, ಹಾರು ಹಕ್ಕಿಯಂಥಾ ಮನಸಿಗೆ ಮೇರೆಯೂ ಇಲ್ಲ...
ಗಿರಿಯ ನೆತ್ತಿಯ ಗಾಳಿಯಲಿ ಆಗಸನ ಬಗಲ ಬೆವರ ಕಂಪು ಪ್ರೇಮದ ಕೊರಳ ತೀಡಿ, ಕರುಳ ಕೆಣಕುವುದು...
ವಾಸ್ತವದ ಕನ್ನಡಿಯಲಿ ಕಂಡ ಸೋತ ಮುಖಕೂ ನಗೆಯ ತುಂಬಿಕೊಳುವುದೇ ನಿಜ ಭಾವುಕತೆ...
___ ಬಿಡಿ ಸಾಲುಗಳ ಮಾಲೆಯಲಿ ನಿನ್ನನರಸುವ ತುರುಸು...

ಶೀರ್ಷಿಕೆ ಇಲ್ಲದ ಭಾವ ನಾಡಿ... 

ನಮ್ಮ ಸ್ನೇಹಕ್ಕೆ ಕಾರಣ ಏನೋ...?
ನಿನ್ನೂರಲ್ಲಿ ಸಾಗರ ಇದೆ...
ಇದ್ರೆ...?
ನನ್ನೂರ ಕಾಡ ನಡುವಿನ ಕಿರು ತೊರೆಯ ಎದೆಯಲ್ಲಿ ನಿನ್ನೂರ ಶರಧಿಯ ಕನಸಿದೆ...
ಎಂದಿನಂತೆ "ನೀನೋ ನಿನ್ನ ಮಾತುಗಳೋ" ಅಂತನ್ನೋಕೆ ಹೊರಟು ಕಣ್ಣಾಳಕಿಳಿದು ಸುಮ್ಮನಾದಳು - ಯಾವುದೋ ತಂಪು ನೆರಳು ಸಿಕ್ಕಂಗೆ...
ಜಗಕೆಲ್ಲ ಜೀವಪ್ರೀತಿಯನಿತ್ತ ಮೇಲೂ, ಕಾರ್ಯ ಕಾರಣ ಪರ್ಯಾಯಗಳ ಮೀರಿ ನದಿಯ ತಪನೆ ಸಾಗರವೇ ಅಂತೆ...
ನಿಜ ಅಂದ್ರೆ 'ಸ್ನೇಹಕ್ಕೇ' ಕಾರಣಗಳಿರಬಾರದು - 'ಇರುವ ನೇಹಕ್ಕೆ' ಕಾರಣಗಳು ಇನ್ನಷ್ಟು ಹೊಳಪು ತುಂಬಬೇಕು...
ನೆಮ್ಮದಿಯಿಂದಿದ್ದುಬಿಡಬೇಕು - ಕಾರಣವೇ ಇಲ್ಲದೆ ನಗುವೊಂದು ಕೈಹಿಡಿಯುವುದಾದರೆ, ಕಾರಣ ಕೇಳದೇ ಸಮಾಧಾನವೊಂದು ಜೊತೆ ನಡೆವುದಾದರೆ; ಹೊಳೆಯೊಂದಿಗೆ ಹರಿವ ಮಣ್ಣ ರುಚಿಯಂತೆ...
___ ಜೀವ ಭಾವ ಸಾನಿಧ್ಯ...
&&&

ಅಲ್ಯಾರೋ ನನ್ನ ಪರಿಚಯ ಕೇಳಿದರು...
ವಿವರಗಳಿಗಾಗಿ ನಿನ್ನ ವಿಳಾಸ ಕೊಟ್ಟಿದ್ದೇನೆ...
ಕತ್ತಲಿನಂಥಾ ಕಾರುಣ್ಯವೇ -
ನಿನ್ನ ಮೌನವೇ ಅಲ್ಲವಾ ನನಗೂ ನನ್ನ ಪರಿಚಯಿಸಿದ್ದು...!!
___ ಮಡಿಲು...

ಮನವು ಅಲೆವಾಗ ಅಲ್ಲಿ ಇಲ್ಲಿ ನಿನ್ನ ಹುಡುಕುತ್ತಾ...
ಮುಂದುವರಿದು -
ಇಲ್ಲೇ ನಿಂತಿದೆ ಈ ನಗೆಯು ನಿನಗೆ ಕಾಯುತ್ತಾ...
ನಿ(ನ)ಲ್ದಾಣವ ಮರೆತಿದ್ದೇನೆ - ಇಳಿಸಿಕೊಳ್ಳಲು / ಉಳಿಸಿಕೊಳ್ಳಲು ನೀನೇ ಹುಡುಕಿ ಬರಬೇಕು...
ಕಾರುಕುರುಳ ಕಾವ್ಯವೇ -
ನಾನೋ ದಂಡೆ ಮತ್ತು ಅಲೆ ಎರಡೂ ನಿನ್ನೆದುರು...
___ ಪ್ರೀತಿ...
&&&

ಹಂಗೇ
ಅಂಥ ಅಪಾಯವೂ ಏನಿಲ್ಲ, ಮನಸಿಗೊಂದಿಷ್ಟು ಹೇವರಿಕೆ ಅಷ್ಟೇ - ಅವರಿರುವ ಬಗ್ಗೆ...
ಹಾಗಂತ
ಕೆಟ್ಟವರೇನಲ್ಲ, ಒಂದಷ್ಟು ಕೆಟ್ಟ ಕುತೂಹಲಗಳಿವೆ ಅಷ್ಟೇ ಇವರಿಗೆ - ಅವರಿವರ ಬಗ್ಗೆ...
ಹಾಗೆಂದೇ
ಸಂತೆ ಗಾಳಿಯಲಿ ಸುದ್ದಿಗಳ ತೂರಿಬಿಡಲು ನಾಲಿಗೆಯೊಂದು, ಬೀದಿ ಗಾಳಿಯಲಿ ತೇಲಿಬಹ ಮಾತುಗಳ ಹೀರಲು ಕಿವಿಗಳೆರಡು, ಎದೆ ಬಿರಿದು ನಿಂತುದಾದರೆ ಭಾವದೋಲೆಯ ಓದಲೋ/ಆಲಿಸಲೋ ಮನವು ಕುರುಡು - ಕಂಡವರ ಬಗ್ಗೆ...
___ ಗೊತ್ತಲ್ಲ ಇವರ ಬಗ್ಗೆ...
&&&

ಎಷ್ಟು ಘನವಾಗಿ ಮಾತಾಡಿದೆ ಎಂಬುದಲ್ಲ ವಿಶೇಷ...
ಯೆಷ್ಟು ಚೆಂದವಾಗಿ ಎದೆಗಿಳಿಯಿತು ಮಾತು ಅಂಬೋದು ವಿಷ್ಯಾ...
ಮಾತಾಗಿ ಮುತ್ತಾಗಿ ಗಲಗಲಿಸುವುದಷ್ಟೇ ಅಲ್ಲ ಪ್ರೀತಿ...
ಕಾರುಣ್ಯವಾಗಿ, ಕಾಳಜಿಯಾಗಿ ಮೈದಳೆದು ಒಡನಾಡಿದ್ದೆಷ್ಟೋ ಅಷ್ಟಷ್ಟೇ ನಿಜ ಪ್ರೀತಿ...
___ ಭಾವುಕತೆ...
&&&

ಎನ್ನೆದೆಯ ಕಾವ್ಯ ಕೌಮುದೀ -
ನಾ ಇರುವಂಗೇ ನನ್ನ ಪ್ರೀತಿಸಿಕೊಂಡು,
ನನ್ನಿಷ್ಟದಂಗೆ ನನ್ನಿಂದ ಪ್ರೀತಿಸಲ್ಪಡುವ
ನಿನ್ನ ಹಿರಿಯೆದೆಯ ಸಮಾಹಿತವ ಎಷ್ಟಾರೆ ಹಾಡಲೇ...
ಈ ಹೆಗಲಿಗಂಟಿದ ನಿನ್ನಾ ನಗೆಯ ಪರಮಾಪ್ತ(ತ್ಮ) ಘಮವ,
ಭಾವದೆಲ್ಲಾ ಬಿಳಲುಗಳ ಒಪ್ಪವಾಗಪ್ಪುವ ಆ ಅನೂಹ್ಯ ಮೋಹಾಲಾಪವ
ನಾನೆಂಬ ನನ್ನಿಂದ ನನಗಾಗಿ ಹೆಂಗಾರೆ ಕಾಪಿಡಲೇ...
ಇಲ್ಕೇಳೇ -
ಈ ನೇಹದ ಹರಿವನು ಹಸಿಯಾಗೇ ಕಾಯುವುದು ಹೇಗೆಂದು ನೀನೇ ಕಲಿಸಿ ಕಾಯಬೇಕು - ಬರಿದು ನೆಲವ ಒಲವು ಹಸಿರಾಗಿ ಧರಿಸಬೇಕು...
&&&

ಕಲ್ಲು ಹೃದಯ ಅಂತಂದು ಕಲ್ಲನ್ನು ಬೈದವನಾರು...?!
ನಾಕು ಕುಡ್ತೆ ಪ್ರೀತಿ ಮಳೆಯ ಸುರಿಸಿ ನೋಡು - ರಣಗಲ್ಲಿನೆದೆಯಲೂ ಹಸಿರ ನಗು ಹೇಗೆ ಚಿಗುರುವುದೆಂದು ಕಾಣು...
___ ಶಿಲೆ ಶಿಲ್ಪವಾಗುವುದು ಪ್ರಕೃತಿಯದ್ದೇ ಪ್ರೀತಿ ಕಲೆ...
&&&

ನೀ ನನ್ನ ಇಷ್ಟ ಅಷ್ಟೇ, ದೌರ್ಬಲ್ಯವಲ್ಲ...
___ ಅದಕೂ ಇದಕೂ ಎದಕೂ...
&&&

ವತ್ಸಾ - 
ಹೋದೆವಾದರೆ ಕರೆದು ಸತ್ಕರಿಸೋ ಚಂದ ಮನಸಿರುವವರ ಮನೆಗೆ ಹೋಗ್ಬೇಕು...
ಹೊರತೂ,
ನಿಂಗೆ ಬೇಕಿದ್ರೆ ಬಾ ಅನ್ನೋ ಅಥವಾ ನಿಂಗೆ ಬೇಕಿದ್ದಿದ್ದಕ್ಕೆ ಬಂದಿದೀಯಾ ಅನ್ನೋಥರ ನಡೆಸಿಕೊಳ್ಳುವ, ಹಂಗಾಗಿ ಸಹಿಸ್ಕೋ ಅನ್ನುವಂಗೆ ನಡೆದುಕೊಳ್ಳುವ ಅಹಂಭಾವಿಗಳ ಮನೆಗೆ ಹೋಗುವುದಲ್ಲ ಅಂತಂದ್ಲು - ಕೆನ್ನೆ ಮುಟ್ಟಿ ನೋಡಿಕೊಂಡೆ...
ಬರ್ಬೋದಿತ್ತೂ ಅಂದೆ - ಬರುವ ಮನಸಾಗುವಂಗೆ ಕರೆದೆ(ದೀ)ಯಾ ಅಂದ್ಲು...!!
ಅವಳು ನನ್ನ ನಂಗೆ ಪರಿಚಯಿಸಿದ್ದು ಹಿಂಗೆ...
___ ಎಲ್ಲಿಯೂ ನಿಲ್ಲದವನು ಅವಳ ಇಲ್ಲಿಯೇ ನಿಲ್ಲೆನುವುದು ಎಷ್ಟು ಸಾಧು ಅಥವಾ ಹಾಗನ್ನಲು ಸಾಧ್ಯವಾ...?!

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)

ಗೊಂಚಲು - ನಾಕ್ನೂರ್ಮೂವತ್ತಾರು.....

ಶುಭದ ಕಣ್ಬೆಳಕೇ ನಿನಗೆ ಶುಭದಿನ.....

ಬೆಳಗು ಕಿವಿ ತೆರೆದು ಮಾತಾಡುವಾಗ ನೀ ನಿನ್ನೆದೆ ದನಿಯ ತೋರು... 🎍

ಶುಭದಿನ... 🪹

ಊರ ಕಿಬ್ಬಿಯ ಕರಿ ಕಾನಿನ ಹೆಬ್ಬಾಗಿಲಲಿ ಸ್ಮಶಾನ ಶಂಕರನಂತೆ ದಿವ್ಯ ಗಾಂಭೀರ್ಯದ ಹೆಜ್ಜೆ ಇಡುವ ಹಗಲು ನನ್ನೊಳಗಿನ ಅಸಂಗತಗಳ ಚುಚ್ಚುವ ಕಂಕರದಂತೆ...
ಬೆಳಗಾಯಿತು... 🧘

ಜೀವ ಭಾವದ ಒಳಿತು ಕೆಡುಕುಗಳ ಪದ ಕಟ್ಟಿ ಹಾಡಿ ಬೆಳಕ ಬಿತ್ತುವ ವಚನ ವಲ್ಲರಿ ಬೆಳಗು... 🗣️
ಶುಭದಿನ... 🫂

ಕಳೆದಿರುಳ ಮೊದಲ ಜಾವದಲಿ ಮಳೆ ತೊಳೆದಿಟ್ಟ ಅಂಗಳದ ತುಂಬಾ ಈ ಬೆಳಗು ಬೆಳಕಿನ ಹಸೆ ಬರೆಯುತ್ತಿದೆ... ⛈️
ಶುಭದಿನ... 🌤️

ಬೆಳಗಿಳಿಯಿತು ಬೆಳಕಾಗಿ - ಹೂವೆದೆ ಅರಳಿ ನಗೆ ತುಳುಕುವ ಹೊತ್ತು...
ಶುಭದಿನ... 🪻

ಈ ಬೆಳಗು, ಈ ಬೆಳಕು ಬೇಗುದಿಗಳ ತೊಡೆದ್ಹಾಕಲಿ...
ಬಯಸಿದೆಲ್ಲ ಶುಭವೀಯಲಿ... 
ಶುಭದಿನ... 🪻🍬

ಮಣ್ಣು (ಅವಳು) ಅರಳಿ ಮೋಡ (ಅವನು) ಸುರಿದು ಎಳೆ ಬೆಳಕಿಗೆ ಮಿಳನ ಘಮ...
ಮಳೆ ಬೆಳಗು... 🌦️

ಕರಿ ಮೋಡದ ಮರೆಯಿಂದ ಕಿರು ನಗೆಯು ಹೊಳೆದಂಗೆ ಬೆಳಕಿಳಿಯಿತು...
ಬೆಳಗಾಯಿತು... 🌥️

ಬೆಳಕೇ ಬಂದು ಬಾಗಿಲಲಿ ನಿಂದು ತನ್ನ ತೋರಿಕೊಂಡು ಬೆಳಗಾಯಿತೆಂದು ನಗೆ ಬೀರುವುದಿದು ಹರಸುವ ಕೈಗಳ ಸರಳತೆಯ ಪ್ರೀತಿ ಸೊಬಗು...
ಶುಭದಿನ... 🌻🦋

ಇಳಿದು ಬಾ ಬೆಳಕೇ ಜೀವ ಜೀವಾತ್ಮ ಪ್ರೇಮ ಸುರಸಿಂಧುವಾಗಿ...
ನೆಲೆಸು ಬಾ ಬೆಳಕೇ ಎದೆ ಎದೆಗಳ ಭಾವ ಕಾರುಣ್ಯವಾಗಿ...
ಶುಭದಿನ... 🐚

ಮಮತೆಯೇ ಬೆಳಕಾಗಿ ನಗೆಯನೂಡುವ ಬೆಳಗು...
ಶುಭದಿನ... 🪻🍬

ಕತ್ತಲೆಯ ಸರಿಸಿ ನನ್ನ ಹುಡುಕುವ ಬೆಳಕಲ್ಲಿ ನನ್ನ ನಾ ತೂರಿಕೊಂಡರೆ ನಾನಳಿದು ಬೆಳಕೇ ಆದ ನಾ ಸಿಗಬಹುದು ನನಗೆ ಈ ಬೆಳಗಿಗೆ...
ಶುಭದಿನ... 🧘

ಕನ್ನಡಿ ಹೇಳಿದ ಪ್ರೀತಿ ಗುಟ್ಟಿಗೆ ನನ್ನ ನೋಡಿ ನಾನೇ ನಸು ನಕ್ಕು ಎತ್ತಿಕೊಂಡ ಭಾವ ಭರವಸೆ ಬೆಳಗು...
ಶುಭದಿನ... 🧘🍬

ಗುಬ್ಬಿ ಎಂಜಲು ಮಾಡಿ ನೀ ಹೆಕ್ಕಿಕೊಂಡ ನಗೆಯಲಿಷ್ಟು ಪಾಲು ಎನಗೂ ಕೊಡುವ ಶುಭವೇ ನಿನಗೆ ಶುಭೋದಯ... 💞

ಕತ್ತಲ ಬೆದಕಿ ಬೆದಕಿ ಏನನೋ ಹುಡುಕುವ ಬೆಳಕು ನನಗೆಂದೇ ನನ್ನ ಎತ್ತಿ ಕೊಡಬಹುದು - ನಿ(ನ)ನ್ನ ಪರಿಚಯಿಸಬಹುದು - ಬೆಳಗು ಶುಭವೇ ಆಗಬಹುದು...🫂

ಹೂವು ಹಕ್ಕಿ ಪ್ರೀತಿ ಹಂಚಿಕೊಂಬಾಗ ಶೃಂಗಾರದ ಪದ ಕಟ್ಟುವ ತುಂಟ ಕನಸು - ರಸಿಕನೆದೆಯ ಸುಪ್ರಭಾತ... 🌻🦋

ನಿದ್ದೆಯಲಿದ್ದೆ, ಬೆಳಕು ತಟ್ಟಿ ಎಬ್ಬಿಸಿತು - ಕಲಸಿಹೋದ ಕನಸನು ನಗೆಯು ಕೈಕುಲುಕಿತು...
ಬಾಗಿಲಿಗೆ ಬಂದ ಯಾವುದೋ ಶುಭದ ಆಮಂತ್ರಣ - ಬೆಳಗು...
ಶುಭದಿನ... 🧚

ನಿನ್ನೆಡೆಗಿನ ಹೊಸ ನಡಿಗೆಯ ಪುಟ್ಟ ಹೆಜ್ಜೆ - ಬೆಳಗು...
ದಿಟ್ಟವಾಗಲಿ ದಿಟ್ಟಿ...
ಶುಭದಿನ... 🌻🦋

ಬೆಳಕ ಬೆನ್ನೇರಿ ಬರುವ ಶುಭದ ಕಡೆಗೆ ಕಣ್ತೆರೆದು ಕಾಯ್ವ ಹೂ ಬೆಳಗು... 🌻

ನೆಲದ ನೆತ್ತಿಯ ಸವರಿ ತಾ ನೆನೆವ ಬೆಳಕಿನ ಕೋಲು - ಬೆಳಗೆಂದರೆ ಹೂ ಎದೆಗಳಲಿ ಅರಳರಳೋ ಕನಸುಗಳಲಿ ಕರಗಿ ಕಸುವಾಗೋ ಪ್ರೀತಿಯ ಕಾಯಾಲು...
ಶುಭದಿನ... 🌻🦋

ಇರುಳಿಗರಳಿ ಹಗಲಿಗಾಗಲೇ ಕಳಚಿ ಬಿದ್ದ ಪಾರಿಜಾತದ ಕಣ್ಣಲೂ ಸೋತದ್ದು ಬೆಳಕಿನೆದುರು ಎಂಬ ಸಪ್ರೇಮ ಸಾರ್ಥಕತೆಯ ಬೆಳಕ ಸೆಳಕಿದ್ದಂತಿದೆ...
ಶುಭದಿನ... 💮🌼

ಇರುಳ‌ ಸರಿಸಿ, ನಿದ್ದೆಯಿಂದೆಚ್ಚರಿಸಿ, ಮರಣವೂ ಬೆಳಕಿನ ಹಾದಿಯೇ ಅಂದಂತೆ ಭಾಸ ಈ ಬೆಳಗು...
ಶುಭದಿನ... 🥀

ಶುದ್ಧ ಆಳಸಿ ನಾನೂ, ಪರಮ ಚುರುಕು ಬೆಳಕೂ, ಸದಾ ನಡುವೆ ನಿಂತು ಸಂಧಾನ ಮಾಡಿಸುವ ಹಸಿವು...
ಕಾಲ ನೇಮಕ್ಕೆಂದೂ ರಜೆಯಿಲ್ಲ ಅಂದು ಮೈಮುರಿದು ನಕ್ಕ ಶಾಂತ ಬೆಳಗು... 😁

ಒಂದು ಚೆಂದ ಮುಗುಳ್ನಗೆಯಾಗಿ ಕೈಕುಲುಕಿ, ಖುಷಿಗಳ ಗುಣಿಸಿ, ಬೇಗುದಿಗಳ ಭಾಗಿಸಿ, ಬದುಕ ಬೊಗಸೆಗೆ ಭರವಸೆಗಳ ತುಂಬಿಕೊಡುವುದು 'ಎನ್ನ ಸ್ನೇಹವೇ' ಎಂದು ಹೆಗಲು ತಬ್ಬುವ ಪ್ರೀತಿ, ವಿಶ್ವಾಸದ ಕಣ್ಬೆಳಕ ಅಕ್ಷಯ ಪಾತ್ರೆ/ಪಾತ್ರ...
ನಗೆಯ ಮೊಗೆದು ಕೊಟ್ಟ ಎದೆಗೂ ನಗೆಯೇ ಮರಳಿ ಸಿಗಲಿ...
ಶುಭದಿನ ನೇಹವೇ... 🫂😘

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು... :)