ಗೊಂಚಲು - ಮೂರು ಸೊನ್ನೆ ಸೊನ್ನೆ.....

ಕಾರುಣ್ಯ..... 
(ಗೊಂಚಲು ಮುನ್ನೂರಾಯಿತು, ಇನ್ನೂ ಬರೆಯುತ್ತಲೇ ಇದ್ದೇನೆ...!!! ನಿಮ್ಮ ಪ್ರೀತಿಗೆ ಶರಣು...)

ಅಮ್ಮನ ಮಡಿಲ ಗೂಡಿಗೆ ಗುಮ್ಮ ಬರುವುದಿಲ್ಲ - ನಂಬಿಕೆ...
ಅಮ್ಮನಾಣತಿ ಮೀರಿ ಅಂಗಳಕೂ ಕಾಲಿಡುವ ಶಕ್ತಿಯಿಲ್ಲ ಗುಮ್ಮನಿಗೆ - ಧೈರ್ಯ...
ಹಾದಿಯ ಭಯಗಳ ಅಲ್ಲಲ್ಲೆ ಕೊಲ್ಲುವ ಶಕ್ತಿಸ್ಥಾನ - ಅವಳ ಮಡಿಲು...
#ಆಯಿ... #ನಗೆಯ_ಕೈದೀವಿಗೆ...
===★★★★

"ಅಮ್ಮನೆಂಬ ಹೊಸ ಹುಟ್ಟು...
ಯಾವ ಮಾತು, ಅದಾವ ಗೀತೆ, ಎಲ್ಲೋ ಮರಳುವ ಮೌನ ಅವಳ ಓದಿ ಹೇಳೀತು...
ಅವಳ ಪ್ರೀತಿಗೆ ಅದರ ರೀತಿಗೆ ಅವಳು ತಾನೇ ದೇಶ ಕಾಲ ಭಾಷೆ..."

"ಹಾದಿ ಹರಿವಲಿ ಕರುಳ ಸೋಕುವ ತಾಲೀಮಿಲ್ಲದ ಎಂಥದೇ ಪ್ರೀತಿಗೂ ಅಮ್ಮನೆಂದೇ ಹೆಸರು..."

ಎದೆಯ ಗೂಡಿನ ಬಾಗಿಲಲ್ಲಿ ಕಾರುಣ್ಯದ ದೀಪ ಹಚ್ಚಿಟ್ಟುಕೊಂಡು ಈ ಬದುಕನು ಜೀವಂತವಿಟ್ಟ ಎಲ್ಲ ಅಮ್ಮನಂಥಾ ಜೀವಗಳಿಗೂ ಒಂದು ಪಲ್ಲ ನಗೆಯ ಶುಭಾಶಯ... 💞
^^^^^
ಈ ಜೀವದ ಜನುಮಾನುಬಂಧದ ಪ್ರೀತಿಯ ಹೆಸರು - ಸಾವಿತ್ರಿ... 💞
ಉಸಿರನಿತ್ತ ಕರುಳಿನ ಜೀವ ರಾಗ - ಲವ್ ಯು ಕಣೇ ಸುಂದ್ರೀ... 😘😘
===★★★★

ಹೇ ಬದುಕೆಂಬೋ ಬದುಕೇ -
ಬಳ್ಳ ತುಂಬಿ ಕೊಡುವವರಿಗೆ ಮುಟಿಗೆಯಷ್ಟಾದರೂ ಮರಳಿ ಕೊಡಲು ಎದೆಯ ಬಯಲಲಿಷ್ಟು ಪ್ರೀತಿ ಕಾಳು ಬೆಳೆದು ಕೊಡಬಾರದೇ...
#ಕನಸಲ್ಲಾದರೂ_ಅರಳು...
#ಪ್ರಾರ್ಥನೆ...
===★★★★

ಉಂಡ ನನ್ನ ಮನಸು ಕುರುಡಾದಾಗ ಬಡಿಸಿದ ನಿನ್ನ ಮಡಿಲು ಅಜ್ಞಾತವೇ...
#ಪ್ರೀತಿ...
===★★★★

ಪ್ರೀತಿಯ ಕೈಸಾರಣೆಯಿಲ್ಲದ ಗೌರವ - ಬೋಳು ಮರದ ಎತ್ತರ... ಅಷ್ಟೇ...
#ನಾನು...
===★★★★

ಅಲ್ಲೊಂದು ಬದುಕ ಬರವಸೆಯ ಖುಷಿಯ ಪಸೆ - ನೇಹ ನಕ್ಕಾಗ ಇಲ್ಲೊಂದು ಹಗೂರ ಕಣ್ಹನಿಯ ಮಿಡಿತ...
ಇಷ್ಟೇ - ಬದುಕಿನೆಡೆಗಿನ ಸಾವಿರ ತಕರಾರುಗಳಿಗೆ ಊಫಿ ಮಾಫಿ...
===★★★★

ಮಣ್ಣ ಕನ್ನಡಿಯಲ್ಲಿ ಮುಖವ ನೋಡಿಕೋ ಉಸಿರ ಸೊಕ್ಕು ಅಳಿದೀತು - ಜೀವ ಸುಮ ಅರಳೀತು...
#ನಾನು...
===★★★★

ನನ್ನ ವ್ಯಥೆಯೊಂದು ಯಾರ್ಯಾರದೋ ಎದೆ ಖಜಾನೆಯ ಕಥೆಯಾಗಬಹುದು - ಇಲ್ಲಿನ ನಗುವೊಂದು ಜಗದ ಜಗುಲಿಯ ಕಮ್ಮಗಿನ ನೆನಪಾಗಬಹುದು; ಅಥವಾ ಅದಲೀಬದಲಿ...
#ಗಾಳಿ_ಕಿವಿಯಲಿ_ಮೆಲ್ಲನುಸುರಿದ_ಮಾತು...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

ಗೊಂಚಲು - ಎರಡ್ನೂರ್ತೊಂಭತ್ತೊಂಭತ್ತು.....

ಕತ್ತಲು ಹೇಳಿದ ಕಟ್ಟುಕಥೆಗಳು.....  

"ಎಲ್ಲ ಚಂದವಿದೆ ಇಲ್ಲಿ - ನನಗಾದರೋ ಕಳ್ಳ ಕುರುಡು..."
"ಬದುಕು ಬಣ್ಣ ಬಣ್ಣದ ಬಲೂನಿನಾಟ - ಉಸಿರು, ಗಾಳಿ, ಸೂಜಿ ಎಂಬೆಲ್ಲ ಪಾತ್ರಗಳು..."
"ಗೊತ್ತಲ್ಲ, ಕತ್ತಲಿಗೊಗ್ಗಿದ ಕಣ್ಣಿಗೆ ಕಂದೀಲೂ ಬಲು ಹಿಂಸೆ - ಒರೆಸಿಕೊಳ್ಳದಿದ್ದರೆ ಕಣ್ಣೀರೂ ಕಲೆ ಉಳಿಸುತ್ತೆ..."
"ಕೃತಕ ಬೆಳಕಿನ ಊರಲ್ಲಿ ಕಾಡುಗತ್ತಲ ಹುಡುಕುತ್ತೇನೆ - ಆಹಾ ಸಂತೆಯ ಮೌನವೇ..."
"ಅತ್ತು ಅತ್ತು ಬೇಸರಾಗಿ ಎದೆಬಿರಿಯೆ ನಕ್ಕುಬಿಟ್ಟೆ - ಹೆಗಲು ಇನ್ನಷ್ಟು ಭಾರವಾಯಿತು..."
"ನನ್ನ ನಗುವೇ ನನ್ನ ಅಣಕಿಸುತ್ತದೆ ಸುಡುಸುಡುವ ಏಕಾಂತದಲ್ಲಿ - ಒಳಗುಟ್ಟು ಒಳಗಲೆದವರಿಗಷ್ಟೇ ಗೊತ್ತು..."
"ಇರುಳ ಸಾಕ್ಷಾತ್ಕಾರಗಳನೆಲ್ಲ ಸಂಕಲಿಸಿ ಪ್ರಕಟಿಸಿದರೆ ಹಗಲು ದಿಕ್ಕೆಡುತ್ತದೆ - ಮೌನ ಉರಿದಷ್ಟೂ ಮಾತು ಬಣ್ಣಗೆಡುತ್ತದೆ..."
#ಕತ್ತಲು_ಹೇಳಿದ_ಕಟ್ಟುಕಥೆಗಳು...
¶¶¶¶¶¶¶¶

ಅಶುಭದ ಬೆನ್ನ ಮೇಲೆ 'ಶುಭಂ' ಅಂತೇನೋ ಬರೆದು ಸುಳ್ಳೇ ಆದರೂ ಹಗುರಾದೆ...
#ಉಳಿದದ್ದು_ಸಣ್ಣ_ಮೌನ...
¶¶¶¶¶¶¶¶

ಸುಳ್ಳನ್ನು ಚಂದನೆ ಬಣ್ಣದಲ್ಲದ್ದಿ ಸತ್ಯವಾಗಿಸೋ ಸತ್ಯಸಂಧರ ಜಗದಲ್ಲಿ ನಿಸೂರಾಗಿ ಸತ್ಯವನ್ನೇ ಒದರಿಬಿಡೋರು ಅಪಥ್ಯವಾಗೋದೇ‌ ಹೆಚ್ಚು...
#ಕತ್ತಲಿಗೂ_ಬಣ್ಣದ್ದೇ_ಬಿಕ್ಕಳಿಕೆ_ಇಲ್ಲಿ...
¶¶¶¶¶¶¶¶

ಕನಸು ಕಟ್ಟದ ಕಣ್ಣು - ನಗೆಯ ಬಿತ್ತದ ಮಡಿಲು - ಒಳಗೆಲ್ಲ ಬಣ ಬಣ...
ಬೆಳಕಿನ ಬೆತ್ತಲೆಗೆ ಕತ್ತಲು ಬಸಿರಾಗಿ ಕಣ್ಣ ಹನಿಯ ಹಡೆಯುತ್ತದೆ...
ನಾನೆಂದರಿಲ್ಲಿ ಗುಂಪಲ್ಲಿ ಕಲಸಿಟ್ಟ ಗುಂಪಿಗೆ ಸೇರದ ಪದ...
#ಕನ್ನಡಿಯಲಿ_ಕಂಡ_ಹೆಣ...
¶¶¶¶¶¶¶¶

ಗೆದ್ದ ಮೌನಕೂ ದಿವ್ಯ ಸಂಭಾಷಣೆಯ ಕಿರೀಟ - ಕವಿತೆ...
ಸೋತ ಮಾತಿನ ನಗುವಿಗೂ ಸೋಲಿನದೇ ಪಟ್ಟ ಇಲ್ಲಿ - ವ್ಯಥೆಯ ಕಥೆ...
ಸಂತೆಯಲಿ ಕೂಗಿ ಕೂಗಿ ಮಾತು ಮಾರಿ ಸಂಜೆಗೆ ಉಳಿದ ನಿತ್ರಾಣ ಮೌನಕೆ ಸಾವೆಂದು ಹೆಸರಿಡಬಹುದೇ...
ಕನಸು ಕಾಡದ ನಿದ್ದೆಯೇ ಜರೂರು ಕಣ್ತಣಿಸು ಬಾ...
#ಒಂದು_ಮುಟಿಗೆ_ಮೌನ...
***ಯಥಾರ್ಥ ಕೇಳಬೇಡಿ...
¶¶¶¶¶¶¶¶

ಹಸಿವು:
ನಿನ್ನೆಯನ್ನು ಕೊಂದಿತ್ತು
ಇಂದೀಗ ಎಚ್ಚರ ತಂದಿಟ್ಟಿದೆ
ನಾಳೆಯ ಕಾಯಬಹುದು...
#ಗಡಿಯಾರದ_ಮುಳ್ಳು_ತುಸು_ಹೆಚ್ಚೇ_ಚುಚ್ಚುತ್ತದೆ...
¶¶¶¶¶¶¶¶

ನಿಶ್ಯಬ್ದವನ್ನೇ ಮೌನ ಅಂದುಕೊಂಡವರೇ ಹೆಚ್ಚು ಇಲ್ಲಿ...
ಶಬ್ದ ಶಬ್ದದ ನಡುವಿನ ವಿವೇಚನೆಯಲ್ಲವಾ ಮೌನ...
#ಸಾಕ್ಷೀಪ್ರಜ್ಞೆ...
¶¶¶¶¶¶¶¶

ರಣ ಬಿಸಿಲ ಮುಖ ತೊಳೆವ ಎರಡು ಹನಿ ಸಂಜೆಮಳೆ - ಥಾರು ರಸ್ತೆಯ ಮೇಲೆ ಮಿಂದು ಮಲಗಿದ ಧೂಳ ಕಣ - ಹೆಣ ಭಾರದ ಮನಸು - ಮಣ ಭಾರದ ಹೆಜ್ಜೆ - ಇರುಳ ಬಾಗಿಲ ಮುರಿದು ಮುಕ್ಕಿ ಕಣ್ಣ ಕೊಯ್ಯುವ  ಕೃತಕ ಬೆಳಕು - ಚಪ್ಪಲಿಯ ಬೆನ್ನಿಗಂಟಿದ ಗಾಢ ಕಂಪಿನ ಕಾಡು ಸಂಪಿಗೆ ಎಸಳು - ಕಾಲಿನ ಕ್ರೌರ್ಯಕ್ಕೆ ಕಾಲನ ನಿಯಮದ ಹೆಸರು - 'ಆ ಕಾಲ ಒಂದಿತ್ತು' ಎಂದು ನಿನ್ನೆಗಳ ಕಿವುಚುತ್ತಾ ಕಾಲನ ಕಾಲು ತೊಳೆದ ಉದಕವ ಕಣ್ಣಿಂದ ಇಳಿಸುತ್ತಾ ಇಲ್ಲಿಯವರೆಗೆ ನಡೆದಿದ್ದಾಯ್ತು - ಮುಗಿಯಲೊಲ್ಲದು ಈ ಪರಿಚಿತ(?) ಹಾದಿಯ ಅಪರಿಚಿತ ಪಯಣ - "ತುಂಬ ಮಾತಾಡುವ ನನ್ನ ದಾರಿ ಮೌನವನ್ನು ಹುಡುಕುತ್ತದೆ ಮತ್ತು ಬೋಧಿಸುತ್ತದೆ..."
#ಕಾಕಭೋಜನ...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

ಗೊಂಚಲು - ಎರಡ್ನೂರ್ತೊಂಭತ್ತೆಂಟು.....

ನಶೆ.....  
(ಎದೆಯ ಸವಿ ಸೊಲ್ಲು...)

ಬೆಳದಿಂಗಳ ತೋಪಿನಲಿ ಆ ಮೌನ ಈ ಹೆಗಲನಾತು ಮಾತಿಗೆ ಮುತ್ತಿಟ್ಟಾಗ ಕಣ್ಣಿಂದ ಜಾರಿದ ಹನಿ ಹನಿ - ಕನಸು ಕವಿತೆ...
#ಕಡಲು_ಕೊಳಲು...
⇂↺↻⇖⇗⇘⇙↺↻⇃

ವ್ಯಾಖ್ಯಾನಗಳ ಹಂಗಿಲ್ಲದ ರಸಕಾವ್ಯ ಅದು - ನಗುವೊಂದೆ ಭಾಷೆ, ಭಾಷ್ಯ ಇಲ್ಲಿ - ಖಾಲಿ ಜೋಳಿಗೆಯವನ ಸೋತ ಹೆಗಲಿಗೂ ನಗೆಯ ಸಿಹಿ ಮೂಟೆ ಹೊರಿಸಿ ತಬ್ಬುತ್ತದೆ "ನೇಹ..."
ಈ ಮರುಳನ ಮುಡಿಯೂ ತುಸು ಗೆಲುವಿನ ಹುಡಿ ಮಿಂದರೆ ಅದು ನೇಹಗಳ ಉಡಿಯಿಂದ ಬಸಿದುಕೊಂಡ ಬೆಳಕಿನ ಕಿಡಿಯಿಂದಲೇ...
#ಎದೆಯ_ಸವಿ_ಸೊಲ್ಲು...
⇂↺↻⇖⇗⇘⇙↺↻⇃

ಹುಡುಕಿದ್ದೇ ಹುಡುಕಿದ್ದು ಎಲ್ಲೆಂದರಲ್ಲಿ, ಯಾರ್ಯಾರ ಬೊಗಸೆಯಲ್ಲಿ - ಮುಗಿಯದ ಪರಿತಪನೆ; ಅವರೋ ನನ್ನ ಬೊಗಸೆಯ ನೋಡುತ್ತಾರೆ... ಹಸಿವೆಂದರೆ ಎಂಥ ಹಸಿವು - ಪಡೆವ ಚಿಂತೆಯಲಿ ಎಲ್ಲಾ ಕಂಗಳಲೂ ಅಮಾವಾಸ್ಯೆಯಂದೂ ಬೆಳದಿಂಗಳನೇ ಕುಡಿವಾಸೆ - ತಾರೆ ಮರಿ ಬಳಗ ರುಚಿಸುವುದಿಲ್ಲ...
ನನ್ನ ಬೊಗಸೆಯಷ್ಟು ನನ್ನ ಸಾಗರ ಅಂದರೆ ಅಲ್ಪತೃಪ್ತಿ, ನನ್ನೊಳಗೇ ಹುಡುಕಿಕೊಳ್ಳೋದು ಅಂದರೆ ಸಂನ್ಯಾಸ, ನಾನು ನನ್ನನೇ ಹಳಿದುಕೊಳ್ಳುವುದಾ, ಕೊಟ್ಟದ್ದಷ್ಟಕ್ಕೆ ಅಷ್ಟೂ ಅಲ್ಲದಿದ್ದರೂ ತುಸು ಕಮ್ಮಿಯೇ ಆದರೂ ಮರಳಿ ಬಯಸೋದೇನು ತಪ್ಪಲ್ಲವಲ್ಲಾ, ನಾ ಇವರಿಗೆ ಕೊಟ್ಟದ್ದನ್ನ ಇನ್ಯಾರೋ ನಂಗೆ ಕೊಟ್ಟದ್ದರಲ್ಲಿ ಚುಕ್ತಾ ಆಯ್ತು ಅಂದ್ಕೊಳ್ಳೋದು ಹೆಂಗೆ  - ನನ್ನದೇ ಬಹುರೂಪಿ ವ್ಯಾಖ್ಯಾನ ನನ್ನ ಹಸಿವಿಗೆ...
ಕೊಟ್ಟದ್ದೇ ಆದರೆ ಕೊಟ್ಟು ಖಾಲಿಯಾದಾಗಿನ ಹಗುರತೆಯೇ ಸಾಕಿತ್ತಲ್ಲವಾ, ಆ ಖಾಲಿಯಲ್ಲೇ ನಾನು ಅರಳಬಹುದಿತ್ತಲ್ಲವಾ, ಭಾವಕೂಟದಲಿ ಭಾವಗಳೂಟದಲಿ ಲೇವಾದೇವಿಯ ಗುಣವ ಮೀರಬೇಕಲ್ಲವಾ - ಪ್ರಜ್ಞೆಯ ಈ ಮಾತಿಗೆ ಸಿಡುಕುವ ಮನಸು...
ಒಟ್ನಲ್ಲಿ ಗಂವ್ವೆನ್ನುವ ಗೊಂದಲಗಳ ಋಣವಿಲ್ಲದೇ ರುಚಿಯಿಲ್ಲ ಬದುಕಿಂಗೆ...
#ಪ್ರೀತಿ_ವೃತ್ತಾಂತ...
⇂↺↻⇖⇗⇘⇙↺↻⇃

ಕಾರಣವಿಲ್ಲದೆ ಬಂದ 'ನಗು' ಕಾರಣ ಹೇಳದೇ ಹೊರಟುನಿಂತಾಗ ಬಿಕ್ಕುವ ಪ್ರಶ್ನೆ ಕ್ಲೀಷೆ ಅನ್ಸಲ್ಲವಾ...
ಕಾರಣವಿದ್ದು ಬಂದಂಥದ್ದು ಸದ್ದಿಲ್ಲದೆ ಸರಿದು ಹೋದರೆ ಅದರರ್ಥ ಕಾರ್ಯ ಕಾರಣ ಮುಗಿದಿದೆ ಅಂತಲೇ ಅಲ್ಲವಾ...
ಅಲ್ಲಿಗೇನು -
ಅಕಾರಣವೋ, ಸಕಾರಣವೋ ಬಂದದ್ದಕ್ಕೂ ಹೋದದ್ದಕ್ಕೂ ಸಾಕ್ಷಿ ಹಾಗೂ ಹೂರಣ 'ನಾನು' ಮಾತ್ರ...
#ಒಳಗುಡಿಯಲಾಡುವ_ಅಜೀಬು_ಕ್ಷಣಗಳಲಿ_ಆಖೈರು_ಜೀವಿಸಬೇಕಷ್ಟೇ_ಪ್ರೀತಿಯನ್ನ_ಪ್ರೀತಿಯಿಂದ...
⇂↺↻⇖⇗⇘⇙↺↻⇃

ಬೆಳುದಿಂಗಳಿಗೆ ಬೆಂಕಿ ಹಚ್ಚಿದವಳು...
ನಡು ಬಯಲ ಮಧ್ಯದಿಂದ ಹಾಯ್ದ ಜರಿ ನೆರಿಗೆಯಂಚಿನ ಕಿರು ನೆರಳ ಸುಳಿಯಲ್ಲಿ, ಸೆರಗ ಪಟ್ಟಿಯ ಒಳಗಿಂದ ಒದ್ದು ಇಣುಕಿ ಸೆಳೆದು ಸುಡುವ ಮೆತ್ತನ್ನ ಏರಿಯಲಿ ಕಣ್ಣ ದಿಟ್ಟಿ ಕಳೆದೇ ಹೋಗಿದೆ - ಹದಿ ಹೈದನೆದೆಯಲ್ಲಿ ಹಾದಿ ತಪ್ಪಿದ ಉಸಿರ ತೇರು...
ಎದುರು ಮನೆಯ ಬೆಣ್ಣೆ ಗಡಿಗೆ - ತಿನ್ನುವುದಾದರೆ ಕದ್ದೇ ತಿನ್ನಬೇಕು...
ನಿಂತು ನೋಡಬೇಕಾದ ಚೆಲುವು ಮಿಂಚಿನಂದದಿ ಸರಿದು ಆ ಹಾದಿ ಹರಿವಿನಲಿ - ಕಳ್ಳ ಹಸಿವಿನಂತೆ ಕಾಡುವುದು ರಸಿಕ ಮೀಸೆ ತಿರುವಿನಲಿ...
#ಕುಡಿನೋಟದಲಿ_ನೋಡಿ_ಸುಳ್ಳೇ_ನಾಚಿ_ಮೊಗ_ಮರೆಸಿಕೊಂಡ_ಸದಾ_ಮೊದಲೆನಿಸೋ_ಮರುಳ_ಮೋಹ...
⇂↺↻⇖⇗⇘⇙↺↻⇃

ರಾಜಿಯಾಗಲು ಬಿಡೆನೆನುವ ಸಣ್ಣ ಮುನಿಸಿನ್ನೂ ಬಾಕಿ ಇದೆ -  ದೂರ ನಿಲ್ಲಲೊಲ್ಲೆನೆನುವ ಸಿಹಿ ಮುದ್ದಿನ ಆಸೆಯ ಕರೆಯಿದೆ - ಗುಣು ಗುಣು ಗೊಣಗುತ್ತ, ಮೂತಿ ತಿರುವುತ್ತಲೇ ಕಣ್ಮುಚ್ಚಿ ಕೆನ್ನೆ ತಾಕೋ ಚಿಗುರು ತುಟಿಗಳ ಒದ್ದೆ - ಮುಗ್ಧ ಮುದ್ದು ಎಳೆತನವ ಬಾಚಿ ಎದೆಯಲಿಂಗಿಸಿಕೊಂಡ ಪ್ರೀತಿ ಘಮ್ಮೆಂದಿದೆ...
ಸಣ್ಣ ಗುಡುಗು - ಸುಳಿ ಸುಳಿ ಗಾಳಿ - ಮೊದಮೊದಲು ನೆಲದೆದೆಯ ತಂಪಾಗಿ ತಬ್ಬಿದ ನಾಕೇ ನಾಕು ಹನಿ ತುಂತುರು ಮಳೆ - ಉಸಿರ ತಿತ್ತಿಯಲೀಗ ನೆಲಕಂಟಿದ ಧೂಳ ಘಮ...
ಮೈ ಚೂರೂ ತೋಯದಿದ್ದರೂ ಮನ್ಸು ಮುದ್ದನುಂಡಂತಿದೆ...
#ನೆನೆದು_ಬಂದೆ... ⛈⛈
⇂↺↻⇖⇗⇘⇙↺↻⇃

ಬೆಳಕ ಸಾಲಿನಲಿ ನಾಚಿಕೆಯ ಸೋನೆಗೆ ನೆಲ ತೀಡೋ ಆ ಅವಳ ಅಂಗುಷ್ಟ ಇರುಳ ಉತ್ತರೀಯ ಆಸೆ ಬೆನ್ನಿಂದ ಜಾರುವಾಗ ಎನ್ನ ಮೀನಖಂಡದ ಹುರಿಯ ತುಂಬಾ ಓತಪ್ರೋತ ಹಸೆ ಬರೆಯುತ್ತದೆ...
ಕಿವಿಯ ತೀರದಲಿ ಉಸಿರು ಕಾಮನೋಲೆ ಓದಿ ಮಿಳನ ಮೇಳನದಿ ಇರುಳ ಪಕ್ಕೆಗಳಿಗಿಷ್ಟು ರಸಿಕ ಕಿಡಿ ಸೋಕಲಿ, ಕಾಲನ ಕೊರಳಿಗಿಷ್ಟೇ ಇಷ್ಟು ರೋಮಾಂಚದ ಹುಡಿ ಮೆತ್ತಲಿ ತಳುಕು ತೋಳ್ಗಳ ಬೆಮರಿನ ಘಮಲಲ್ಲಿ... ಹೂ ಕಾಯಿ ಹಣ್ಣಿನ ಕಿಡಿ, ಕುಡಿ ನೆಲಬಗೆದ ಬೀಜದುದರದಲ್ಲಿ...
#ಕಡುಬೇಸಿಗೆಗೆ_ಅರಳೋ_ವಸಂತ_ಅಡ್ಡಮಳೆಗೆ_ಝುಮ್ಮೆಂದಾಗ...
⇂↺↻⇖⇗⇘⇙↺↻⇃

ಬೆಳದಿಂಗಳ ಬೆತ್ತಲೆಗೆ ಕೊಳ ನಾಚಿ ತುಳುಕಿದ ಕಂಪನದ ಕಥೆ ಹೇಳಿ ಕೆಣಕುತಿದೆ - ನನ್ನವಳ ಕನ್ನಡಿ...😉
#ನಶೆ...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

ಗೊಂಚಲು - ಎರಡ್ನೂರ್ತೊಂಭತ್ತೇಳು.....

ಕನ್ಸೂ ನೀನೇ ಕನಸಿಗಂಟಿದ ಬೆಳಕಿನ ಹುಡಿಯೂ ನೀನೇ..... 

........ಹರಿದ ಭಾವಗಳ ತುದಿಗಳ ಹಿಡಿದು ಗಂಟು ಝಡಿದು ಬೀಗಬಹುದು, ಆದರೆ ಆ ಗಂಟೂ ಕಾಣದಂತೆ, ಅಲವರಿಕೆಯಾಗಿ ಕಾಡದಂತೆ ಮಾಡುವ ಯಾವ ಮಾಯಾ ವಿದ್ಯೆ ಇದ್ದೀತು ಹೇಳು - "ನಂಗೆ ನೋವೇ ಆಗಿಲ್ಲ" ಎಂಬುದು ನೋವಿನ ನಗೆ ರೂಪದ ಹೇಳಿಕೆಯಾಗಿರುವಾಗ...

ಮೈಲಿಗಲ್ಲುಗಳ ಕೀಳಬಹುದು, ಹಾಯ್ದು ಬಂದ ನನ್ನದೇ ಕಾಲ್ಗಳ ಆರ್ತನಾದವನೆಲ್ಲಿ ಹೂಳಲಿ...

ಮೌನವಾಗಬೇಕು ಇಲ್ಲಾ ಒಂದು ಆಪ್ತ ಜಗಳವಾಡ್ಬೇಕು...

.......ಯಾರಲ್ಲಿ....

#ಭಾವಾವೇಶ...

×××××

ಕಹಿಯನೂ, ಸಿಹಿಯನೂ ಅದೇ ಸಮಾನ ಪ್ರೀತಿಯಿಂದ ಬೆಳೆಯುತ್ತಾ ನಿತ್ಯವೂ ಹೊಸದನ್ನೇ ಧರಿಸುವ ಕಾಲನಿಗೂ, ಧರಿತ್ರಿಗೂ ಹೊಸತರ ಹೆಸರೇಳಿ ನಾನಿಷ್ಟು ಹೊಸತನವ ಬಯಸಿ ಶುಭಕೆ ಮಿಡಿಯಲೊಂದು ದಿನ - ಯುಗಾದಿ...

ಒಂಚೂರು ಬೇವು, ಭರಪೂರ ಬೆಲ್ಲ ಜೊತೆಗೂಡಿ ಕಲೆತು ಬಾಳ ಬಂಡಿಗೆ ತುಂಬಲಿ ಪ್ರೀತಿ ನಗೆಯ ಸೊಲ್ಲ - ಹಾಯಾಗಿ ಹಸಿರುಣ್ಣಲಿ ಜೀವಜಾಲವೆಲ್ಲ...

#ನಗೆ_ಹೋಳಿಗೆ_ಹಬ್ಬ #ಪ್ರೀತಿ_ಬೆಳಕ_ದಿಬ್ಬ...

                                     ___ 06.04.2019

×××××

ಮೈಯ್ಯ ಖಂಡಗಳೆಲ್ಲ ಅಲ್ಲಲ್ಲೇ ಸಣ್ಣಗೆ ಬಿಸಿಯೇರಿ - ತಲೆಬೊಂಡದ ನರನರವೂ ಸಿಡಿದು ಸಿಕ್ಕಾಗಿ - ಅಂಡು ಸುಟ್ಟು ಉಸಿರು ಬಿಕ್ಕಳಿಸುವಾಗ ಮತ್ತೆ ಆ ಬೇತಾಳ ಪ್ರಶ್ನೆ ಕಾಡುತ್ತದೆ...

ಸಾವಿನ ಮನೆಗೆ ಬಾಗಿಲುಗಳೆಷ್ಟು...?

ಇನ್ನೆಷ್ಟು ಬಾಗಿಲುಗಳ ದಾಟಿದರೆ ನನ್ನ ಕೋಣೆ...??

ಹಾದಿಯ ಕೊನೆಗಿಂತ ತುಸು ಮುಂಚೆ ನೀನೊಮ್ಮೆ ಸಿಗಬಹುದೇ...???

ನೀ ಸಿಗದೆಯೂ ಅಷ್ಟು ದೂರ ನಡೆದವನು ಅಲ್ಲೆಲ್ಲೋ ನೀ ಸಿಕ್ಕೇಬಿಟ್ಟರೆ ಒಂದು ನಗುವಿಗಾದರೂ ಅರೆಘಳಿಗೆ ನಿಲ್ಲಬಲ್ಲೆನೇ...????

#ಸುಡುಸುಡು_ಮುಸ್ಸಂಜೆ...

×××××

ಸಾವಿನಂಥ ಬೆಳಕೇ -

ಖಾಲಿ ಬಟ್ವೆಯ ಹಿಡ್ದು, ನಕ್ಷತ್ರಗಳ ಬಟವಾಡೆಯ ಕನಸು ಹೊಸೆಯುತ್ತ ಕಾಡು ಅಲೆಯುತಿದ್ದವನ ಅಶಾಂತ ಕಣ್ಣಲ್ಲಿ ಎಡ್ಹೊತ್ನಲ್ ಹುಟ್ದ್ ಅಡ್ಣಾಡಿ ಕನ್ಸು ನೀನು - ಉಲ್ಕೆ ಉದುರೋದ ಕಂಡ ಕಂಗಳ ಆ ಹೊತ್ತಿನ ಬಯಕೆ ನಿಜ್ಜ ಕೈಗೂಡುವುದಂತೆ - ಅಂಗಳದಂಚಿಗೆ ನಿದ್ದೆಗಣ್ಣಲ್ಲಿ ಕತ್ತಲ ಸೀಳಿ ಉಚ್ಚೆ ಹಾರಿಸುತ್ತ ನಿಂತ ಪೋರನ ತೋಳಲ್ಲಿ ಸುಳ್ಳೇ ರೋಮಾಂಚನ - ಆಮ್ಯಾಲೆ ಕಣ್‌ ಗುಡ್ಡೆ ತುಂಬಾ ನಿಂದೇ ತಕಧಿಮಿತಾ... ಹೆಸರೆಂತಾ ಇಡ್ಲಿ ಈ ಎದೆ ಮಾಳದ ತಲಬಾಗಿಲ ಅಲಂಕರಿಸಿದ ನೀನೆಂಬೋ ಆ ಭಾವ ಮೂರ್ತಿಗೆ...?

ಮತ್ತೀಗ -

ನೀ ಜೀವಿಸುತಿರುವ ಈ ಇದೇ ಕಾಲದಲ್ಲಿ, ನಿನ್ನ ನೆರಳು ಸರಿದಾಡಿದ ಇಲ್ಲಿನ ಈ ಇದೇ ನೆಲದಲ್ಲಿ ನಾನೂ ಬದ್ಕಿದ್ದೇನೇ ಎಂಬುವ ಅಸೀಮ ಖುಷಿಯೇ ನಾನಿನ್ನೂ ಬರೆಯದ ನನ್ನ ಅತ್ಯಾಪ್ತ ಕವಿತೆ... ಅದನ್ನೇ ಮತ್ತೆ ಮತ್ತೆ ಓದಿಕೊಳ್ತೇನೆ - ಹಂಗಂಗೇ ಸತ್ತೋಗುವಂಥಾ ಸಂಭ್ರಮ - ಹಗೂರ ಕಣ್ಹನಿಯ ಮಿಡಿತ... ಇಷ್ಟೇ - ಬದುಕಿನೆಡೆಗಿನ ಸಾವಿರ ತಕರಾರುಗಳಿಗೆ ಊಫಿ ಮಾಫಿ......

#ಕನ್ಸೂ_ನೀನೇ_ಕನಸಿಗಂಟಿದ_ಬೆಳಕಿನ_ಹುಡಿಯೂ_ನೀನೇ... 

×××××

ರೇಖೆ: ಸುಮತಿ ದೀಪಾ ಹೆಗಡೆ 

ಹನಿ ಬತ್ತಿದ ಕಣ್ಣಲ್ಲೂ ಮಳೆ ಮಳೆ ಕನಸು... 

ಹಾರಿ ಬಿಟ್ಟರೆ ಉಸಿರು ಬಯಲ ಗಾಳಿಗೆ ಸ್ವಂತ...

ಹಿಡಿದು ಕಾಯುವ ಪ್ರೀತಿ ಬಲೂನಿಗಂಟಿದ ಬಣ್ಣ...

ಕುಂಟು ನೆಪಗಳ ನಿರೀಕ್ಷೆ ಯಮುನೆ ಮಡುವಿಗೆ ಬಿದ್ದ ಹಾಲಬಿಂದಿಗೆ...

ನೀನೆಂದರಿಲ್ಲಿ ಬೆನ್ನ ಹಾಳೆಯಲಿ ಬೆಳದಿಂಗಳು ಗೀಚಿದ ಕೂಸುಮರಿ ಕುಸುರಿ...

#ಪ್ರತೀಕ್ಷಾ...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

ಗೊಂಚಲು - ಎರಡ್ನೂರ್ತೊಂಭತ್ತಾರು.....

ಬೆಳಕಿನಲ್ಲಿ ಕಳೆದೋದವನು.....

ಅವಳ ದಿನವಂತೆ - ಪ್ರಕೃತಿಯ ಅಂತಃಶ್ಯಕ್ತಿ, ಸಮಷ್ಟಿಯ ಸಾಕ್ಷೀಪ್ರಜ್ಞೆ..‌. ಬದುಕನ್ನು ಸಹನೀಯವಾಗಿಸುವಂತ ಎಲ್ಲಾ ಹೆಣ್ಣು ಜೀವಗಳಿಗೂ ಪ್ರೀತಿಯ ಶುಭಾಶಯ... ಖುಷಿಯಾಗಿರಿ ನೀವು ನಿಮ್ಮಂತೆ...
               __08-03-2019

↯↰↱↯↲↳↯

ಸುಗ್ಗಿಯೆಂದರೆ ಎದೆಗೂಡಿನ ಹಿಗ್ಗೇ ಅಲ್ಲವೇ...
ತೊಳೆಯಲಾಗದ, ತೊಡೆಯಲಾಗದ ಮುಗುಳ್ನಗೆಯ ರಂಗಲಿ ಎದೆಯ ಕೂಸನು ಮೀಯಿಸಿ...
ಬಾಂಧವ್ಯದ ನಗೆಯಲಿ ನಿತ್ಯ ಪ್ರೀತಿ ಬಣ್ಣದ ಹೋಳಿ...
#ಹಬ್ಬ...
                   ____ 21.03.2019

↯↰↱↯↲↳↯

ಯಾವ ಕವಿತೆಗೆ ಯಾವ ಕೊರಳೋ ಗಾಳಿ ಕೊಳಲಿನ ಕಂಪನ - ಇಲ್ಲಿನುಲಿಗೆ ಅಲ್ಲಿ ಮಿಡಿಯುವ ಎದೆ ಎದೆಯ ಏಕತಾರಿ ರಿಂಗಣ - ಕರುಳ ತುಂಬುವ ಪ್ರೀತಿ ಪಲುಕಿಗೆ ನೂರು ಭಾವಾಲಿಂಗನ - ಎನ್ನ ಹಾದಿಗೆ ನಗೆಯ ಬಣ್ಣವ ಎರಚಿದೆಲ್ಲರ ಕಕ್ಕುಲಾತಿಯ ವಿನಾಕಾರಣ ಸ್ಪಂದನ - ಆ ಎಲ್ಲ ಎದೆಗೂಡ ಮೂಲೆ ಮೂಲೆಯ ಬೆಳಗುತಿರಲಿ ಪ್ರೀತಿ ನಗೆಯದೇ ಸಾಲು ಸಾಲು ನೀಲಾಂಜನ...
#ಮತ್ತೆ_ಮತ್ತೆ_ಹೋಳಿ...
                                            ____ 22.03.2019

↯↰↱↯↲↳↯

ಪ್ರೇಮದ ಭಾಷೆ ಯಾವುದು...?
ಖಂಡಿತಾ ನಗುವೇ...
ಮತ್ಯಾಕೆ ಪ್ರೇಮಿಗಳ ಹಾದಿಯ ಕಣ್ಣ ತುಂಬ ಭರಿಸಲಾಗದ ನೋವು...??
ಅದು ಪ್ರೇಮಿಗಳ ಭಾಷೆ, ಪ್ರೇಮದ್ದಲ್ಲ...
!!!!
ಕೃಷ್ಣನ ಬೆರಳು ಮಿಡಿದ ರಾಧೆಯ ಉಸಿರು - ಕೊಳಲು ಪ್ರೇಮ...
ಉಪಾಸಕನ ಆಚೆಗೂ ಉಪಾಸನೆ ಕಾಲಕೂ ಜೀವಂತ - ನಾದ ವೇದ ಪ್ರೇಮ...
#ಕಲೆ...
↯↰↱↯↲↳↯

ಶೂನ್ಯದಷ್ಟು ನಿಖರಪೂರ್ಣವಾದ ಪ್ರೇಮವನ್ನು ಅಷ್ಟೇ ಪ್ರಾಕೃತಿಕವಾದ ಕಾಮದ ಸೊಗಡಿನಿಂದಾಗಿ ಪವಿತ್ರ ಮತ್ತು ಅಪವಿತ್ರ ಎಂದು ಬೇರ್ಪಡಿಸಿ ಆಡಿಕೊಳ್ಳೋ ಹೆಚ್ಚಿನ ಪ್ರೇಮಿಗಳ ಭಾವಾವೇಶ ಎಷ್ಟೊಂದು ಬಾಲಿಶ ಅನ್ನಿಸುತ್ತೆ... ತನ್ನ ನಿಯಂತ್ರಣವಿಲ್ಲದ ಅಹಂಭಾವ, ವಿಸ್ತಾರವಾಗದ ಅಂತರ್ಲೋಕ ಮತ್ತು ಸ್ವಭಾವಜನ್ಯ ಸಣ್ಣತನಗಳಿಂದಾಗಿ ತಾನು ಜೀವಿಸಿಯೇ ಇಲ್ಲದ ಪ್ರೇಮವನ್ನು ಕಳಕೊಂಡೆ ಅಂದುಕೊಂಡ ಪ್ರೇಮಿಯೊಬ್ಬ ಮಾತ್ರ ಪ್ರೇಮದ ಸಾವಿಗೆ ಕಾಮದ ಪಾವಿತ್ರ್ಯವನ್ನು ಪ್ರಶ್ನಿಸಬಲ್ಲನೇನೋ...
#ಸ್ವಮನಸಿಗೆ_ಅಭ್ಯಂಜನವಿಲ್ಲದೇ_ದೇವನ_ತಿಕ್ಕಿತಿಕ್ಕಿ_ತೊಳೆವ_ಜಗ...
↯↰↱↯↲↳↯

ಅವಳು ಗೊತ್ತಾ ನಿಂಗೆ...?
ಉತ್ತರ ಕಷ್ಟ - ಆಗೆಲ್ಲ ಹೌದು, ಇಲ್ಲಗಳ ನಡುಮಧ್ಯದ ಅಯೋಮಯ ಸ್ಥಿತಿ ನನ್ನಲ್ಲಿ... ಆದ್ರೆ ಅವಳಿಗೆ ನಾನು ಪೂರಾ ಪೂರಾ ಗೊತ್ತೆಂಬುದು ನನ್ನ ಯಾವತ್ತಿನ ಖುಷಿ...
#ಆತ್ಮಋಣ...

ಸ್ನೇಹವೆಂದರೆ ಏನು...??
ತಡವರಿಸದೇ ನಿನ್ನ ಹೆಸರ ಉಸುರಿದೆ ನಾನು...
#ಕತ್ತಲು_ಕತ್ತಲಿನಂಥವಳು...
↯↰↱↯↲↳↯

ಬಾಗಿಲ ಸಂದಿಯಲಿ ಬದುಕುಳಿದ ಕತ್ತಲ ಎದೆಗೆ ಕಿವಿಯಾನಿಸಿದೆ - ನಿಟ್ಟುಸಿರ ಬಿಸಿಯ ಭಾಷೆ ಕಿವಿ ಸುಟ್ಟಿತು, ನಗೆಯ ಬೆನ್ನಿನ ಮೌನ ಬೆಳಕಲ್ಲಿ ಮಿಂದು ಭಯ ಹುಟ್ಟಿಸಿತು...
#ಮಾತುಸತ್ತವರಮಾತು...

ಇಲ್ಲಿಂದ ಹೊರಟಾಗಿದೆ - ಅಲ್ಲಿಗಿನ್ನೂ ತಲುಪಿಲ್ಲ...
#ಹಾದಿಗೆ_ಮರುಳಾಗಿ_ತಿರುವಿನಲಿ_ನಶೆಯ_ಹೊದ್ದವನು...

ಎದೆ ಬಗೆವ ಈ ಮೌನ ತುಂಬಾ ತಣ್ಣಗಿದೆ....
ಪಿಸುನುಡಿಗಳು ಸತ್ತು ಕಾಲವೇ ಆಯಿತು...
#ಬೆಳಕಿನಲ್ಲಿ_ಕಳೆದೋದವನು...
↯↰↱↯↲↳↯

ನೆನಪು - ಮರೆವು - ಮರೆತಂತೆ ಮೆರೆವ ನೆನಪು - ನೆನಪನ್ನೇ ಅಣಕಿಸುವ ಮರೆವು - ಮರೆತೆನೆಂಬ, ಮರೆತೇನೆಂಬೋ ಭ್ರಮೆಯಲ್ಲಿ ನೆನಪ ಸಾಕುವ ವ್ಯಾಪಾರಿ ನಗೆ; ನಿದ್ದೆಯ ಸುಟ್ಟು ಇರುಳ ರಕ್ತ ಹೀರುವ ತಿಗಣೆಗಳು...
ಖಾಲಿ ಬೆಂಚಿನೆದುರು ಮಾತಿನ ಯಕ್ಷಿಣಿ ಸೋತು ಕೂತಾಗ, ಮರಳ ಗೂಡಿನಲಿ ಸಾಗರನ ಬಂಧಿಸಿದ, ಕಣ್ಣ ಗೋಳದಲಿ ತಾರೆಗಳ ಗುಪ್ಪೆ ಹಾಕಿದ ನೆನಪುಗಳು - ಮಳೆಯ ತೋಳಿನಲಿ ಮುತ್ತನೆಣಿಸಿದ್ದ ಕಾಲವ ಕದ್ದು ಮೆಲ್ಲುವ ಅವಳೆಂಬ ಯಾತನೆ...
ಮರೆತದ್ದೂ ಮರೆತೋಗುವಂಥ, ಎಲ್ಲಾ ಮರೆತೋಗುವ ಮರೆವಿನ ರೋಗವಿದೆಯಂತೆ - ಎಂಥಾ ಮಧುರ ಶಾಪ...
ಥಥ್ - ಒಮ್ಮೆ ನೆನಪು, ಒಂದೊಮ್ಮೆ ಮರೆವು ಸೃಷ್ಟಿಸಿಡುವ ಹಾದಿ ಬದಿಯ ಕಸದ ಗುಡ್ಡೆಗೆ ಬೆಂಕಿ ಇಡಬೇಕು - ಮತ್ತೆ ಹೊಸತಾಗಿ ಹುಟ್ಟಬೇಕು...
#ಚಿತೆ...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

ಗೊಂಚಲು - ಎರಡ್ನೂರ್ತೊಂಭತ್ತೈದು.....

ಜೀವನ ಜೀಕಾಟ - ಪಾಠ..... 

ಊರ ಹಾದಿಯನೇ ಮರೆತೆ...
ಶಾಪವಿರಬೇಕು...
ನಿನ್ನ ಮರೆಯಲಾಗದೇ ಸೋತೆ...
#ಕಣ್ಣ_ಬನಿಯ_ಉಯಿಲು...
↚↨↩↪↨↛

ಒಬ್ಬನೇ ಅತ್ತರೆ ಅಯ್ಯೋ ಪಾಪ ಒಂಟಿ ಪಿಶಾಚಿ...
ಒಂಟೊಂಟಿ ನಕ್ಕರೆ ಅಯ್ಯೋ ಹುಚ್ಚಲ್ಲದೇ ಇನ್ನೇನು...
ಬಯಲಿಗೆ ಬೇಲಿ - ಮಸಣಕ್ಕೆ ಪ್ರೇಮ ಪಿತೂರಿ ಇಲ್ಲಿ...
ಕಟ್ಟಲಾದೀತಾ ಬೆಳಕನು - ಬಂಧಿಸಲಾದೀತೇ ಸಾವನು...
#ಲೊಳಲೊಟ್ಟೆ_ತಾಯಿತ...
↚↨↩↪↨↛

ದಾಟಿ ಹೋದ ನಿನ್ನ ಹೆಸರಿಟ್ಟು - ಇಲ್ಲದ ಪ್ರೇಮವ ಹುಡುಕಿ - ನಾನೇ ಹೆಕ್ಕಿ ತಬ್ಬಿಕೊಂಡ ಒಂಟಿತನದ ನೋವ ನಶೆಯಲ್ಲಿ ಇರುಳ ದೂಡುತ್ತೇನೆ, ಮತ್ತದೇ ಅಮಲಿಗೆ ನಗೆಯ ಪೇಟ ಸುತ್ತಿಕೊಂಡು ಹಗಲ ಹಾದಿ ಹಾಯುತ್ತೇನೆ - ಒಳಗೇ ಸತ್ತ ಬದುಕಿನಿಂದ ಇಷ್ಟಿಷ್ಟೇ ಕಳಚಿಕೊಳ್ಳುತ್ತೇನೆ......
#ನಿರ್ಲಿಪ್ತಿಯ_ಕವಲಲ್ಲಿ_ಒಡೆದ_ಪಾದದ_ಗುರುತು...
↚↨↩↪↨↛

ಹೇಗೆ ಕರೆವುದು ಮೌನವ ಮಾತಿನ ಮನೆಗೆ...
ನನ್ನಲಿಲ್ಲದ ನನ್ನ ಇನ್ನೆಲ್ಲೋ ಹುಡುಕಿದ್ದು ಸಾಕಿಂದಿಗೆ...
ಎದೆಯ ಚಿತಾಗಾರದಲ್ಲಿ ಸುಟ್ಟ ಕನಸುಗಳಿಂದಲೇ ನಗೆಯ ಕಿಡಿಯೊಂದು ಹುಟ್ಟಬೇಕು...
ಮಣ್ಣ ಮೈಗಾಯದಲಿ ಹಸಿರೊಂದು ಚಿಗುರುವಂತೆ...
ಮುರಿದ ಟೊಂಗೆಗೆ ಮತ್ತೆ ಮಣ್ಣೇ ಮಡಿಲಾಗುವಂತೆ...
#ನಾನೆಂದರೆ_ನಾನಲ್ಲದ_ನಾನು...
↚↨↩↪↨↛

ಇಲ್ಲೇನಿದೆ ಎಲ್ಲಾ ಮಣ್ಣು ಅಂಬರು - ಮಣ್ಣಲ್ಲೇ ಹುಟ್ಟಿ ಮಣ್ಣನೇ ಹೊದ್ದು ಮಲಗುವರು...
#ಬಾಳು_ಬಣ್ಣ...

ನಗುವಿನೊಳಮನೆಯ ಮೌನ - ಕವಿಯೆದೆಯ ಸೇರದ ಕವಿತೆ - ಕಳೆದದ್ದಷ್ಟೇ ಸತ್ಯ ಅನ್ಸುತ್ತೆ ಇಲ್ಲಿ...
#ನೀನು...

ಬೆಳಕು ಕಣ್ಣ ಚುಚ್ಚುತ್ತೆ - ಕತ್ತಲು ಕರುಳ ಕುಕ್ಕುತ್ತೆ...
#ತಬ್ಬಲಿ_ಯಾರ_ತಬ್ಬಲಿ...

ನಗುವಿಂದ ಕಣ್ಣುಕ್ಕುವಾಗ ಸಾವನ್ನು ಬರೆದೆ - ಸಾವಿನ ಮನೆಯಲ್ಲಿ ಮಗುವ ಹುಡುಕಿದೆ...
#ಬೆಳಕು...

ಬೆಂಕಿಯನ್ನು ಪ್ರೀತಿಸಿದೆ - ಜೀವ ಬೇಯುತಿದೆ...
↚↨↩↪↨↛

ಈ ದಿನಗಳಲ್ಲಿ ನಾಟಕೀಯವಾಗಿ ಅತೀ ಚರ್ಚೆಗೆ ಒಳಪಡುತ್ತಿರೋ 'ಯುದ್ಧ ಮತ್ತು ಶಾಂತಿ' ಎರಡೂ ಸೂಕ್ಷ್ಮ ವಿಷಯಗಳು... ಯಾವ ಹಂತದಲ್ಲಿ ಅತಿ ಶಾಂತಿ ದೌರ್ಬಲ್ಯವಾಗಿ ಬದಲಾಗಿ ದೌರ್ಜನ್ಯವನ್ನ ಹುಟ್ಟು ಹಾಕತ್ತೆ ಮತ್ತು ಯಾವ ಮಿತಿಯಲ್ಲಿ, ಎಂಥಾ ಸಂದರ್ಭದಲ್ಲಿ ಯುದ್ಧ ಶಾಂತಿಯ ಬೆಂಗಾವಲು ಶಕ್ತಿ ಆಗತ್ತೆ ಅನ್ನೋದನ್ನ ತುಂಬ ವಿವೇಚನೆಯಿಂದ ಗ್ರಹಿಸಬೇಕಾಗತ್ತೆ... ಆ ಗ್ರಹಿಕೆ ಮತ್ತು ಮಿತಿಗಳ ವಿವೇಚನೆ ಇಲ್ಲದೇ ಹೋದಲ್ಲಿ ಗಾಂಧಿಯ ಸತ್ಯಾಗ್ರಹವೂ ಯುದ್ಧವನ್ನು ಪ್ರೆರೇಪಿಸಬಹುದು...  ವಿವೇಚನೆ ಇದ್ದಲ್ಲಿ ಒಂದೊಮ್ಮೆ ಸೈನ್ಯದ ಯುದ್ಧ ಕೂಡ ಶಾಂತಿಯ ಮೂಲ ಆಗಬಹುದು...
ಹೆಮ್ಮೆ ಇದೆ, ನನ್ನ ದೇಶ ತನ್ನ ಬಗಲಲ್ಲಿ ಪಾಕ್, ಚೀನಾದಂತ ದೇಶಗಳನ್ನ ಇಟ್ಟುಕೊಂಡೂ ಇದುವರೆಗೂ ಯಾವತ್ತೂ ಆತ್ಮ ರಕ್ಷಣೆಯ ಹೊರತಾಗಿ ಯುದ್ಧಕ್ಕೆ ನಿಂತದ್ದಿಲ್ಲ... ಆತ್ಮರಕ್ಷಣೆಗೂ (ದೇಶದ್ದು) ಬಂದೂಕು ಹಿಡೀಬೇಡ ಅನ್ನುವಷ್ಟು ಶಾಂತಿಪ್ರಿಯತೆ ಖಂಡಿತಾ ನನ್ನಲ್ಲಿಲ್ಲ...
ಯಾಕಂದ್ರೆ ಶಾಂತಿ ನಂಗೆ ಅಂತಃಶ್ಯಕ್ತಿಯ ರೂಪವೇ ಹೊರತು ದೌರ್ಬಲ್ಯವಲ್ಲ... ಯುದ್ಧವೂ ಅಂತೆಯೇ...
#ಜೀವನ_ಪಾಠ...
↚↨↩↪↨↛

ಖಾಲಿ ಕಿಸೆಯ ಬುರುಡೆ ದಾಸ ಕಳೆದುಕೊಂಡದ್ದೇನು, ಕಳೆದುಕೊಂಬುದಾದರೂ ಏನು...
ಸೋತು ಸೋತು ಸೋಲು ಮೈಗೂಡಿ ಹೋಗಿ ಸೋಲಿನೆಡೆಗಿನ ಭಯ ಮತ್ತು ಭಾವತೀವ್ರತೆ ಸತ್ತು ಹೋಗಿ...
ಇಲ್ಲಿಂದ...... ದೂರ ದೂರ ದೂರ ಬಲುದೂರ ಹೋಗಬೇಕು....  ನನ್ನ ನೆರಳೂ ನನ್ನ ಹಿಂಬಾಲಿಸದ..... ಆss..... ದೂರ....... ತೀರಕೆ.........
ದಾರಿ ಹೇಳಯ್ಯಾ ದಕ್ಷಿಣದ ದೊರೆಯೇ - ನಿನ್ನೂರ ಕೇರಿಗೆ...
ದಕ್ಷಿಣಾಧಿಪತಿಯ ಭೇಟಿಗೆ ಉತ್ತರಾಯಣ ಪರ್ವ ಕಾಲವಂತೆ...
#ಅಭಾವ_ವೈರಾಗ್ಯ...
↚↨↩↪↨↛

ದಾರಿ ಮುಗಿಯಲಿಹುದೇ - ನಿನ್ನ ಮಡಿಲ ಸೇರಲಿಹೆನೇ....
#ಬೇಲಿ_ಸಾಲು #ಹಗಲ_ನಕ್ಷತ್ರ...

ಓಡುವ ಕಾಲನ ಗಾಡಿ - ಕಣ್ಣ ಬಿಂಬವ ತುಂಬಿದ ಕಿಟಕಿಯಾಚೆಯ ಬೆಳಕಿನ ಬೆರಗು - ಇಬ್ಬನಿ ಹನಿಗಳ ಜೋಡಿಸಿ ಬರೆದ ಹೆಸರಿಗೆ ಸೂರ್ಯ ಶಾಖದ ಮುಕ್ತಿ...
ಬದುಕಿದ್ದೇನೆ ಅನ್ನುವ ಭ್ರಮೆಯಲ್ಲಿ ಎಷ್ಟೊಂದು ಸುಖವಿದೆ...

ಚಿಗುರು ಮುರಿದರೆ ನೋವು - ಬೇರನೇ ಹರಿದರೆ.........
#ಒಳ್ಳೆಯತನವೆಂಬೋ_ಹಿಮದ_ಕತ್ತಿ....

ಚಂದನೆ ಹೂಗಳ ಮರೆಯಲ್ಲಿ ತಣ್ಣಗೆ ಕೂತ ಮುಳ್ಳುಗಳು - ಬದುಕು, ಭಾವ ಬಲು ಜಾಣ್ಮೆಯ ವ್ಯಾಪಾರ...
#ಸಂಬಂಧ...

ಸಾಕಿನ್ನು ಏದುಸಿರ ಸೆಣಸಾಟ, ಹೊರಡಬೇಕು ಜರೂರಾಗಿ - ಮೊದಲು ನೀನಾ, ಇಲ್ಲ ನಾನು...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

ಗೊಂಚಲು - ಎರಡ್ನೂರ್ತೊಂಭತ್ನಾಕು.....

ಹೂ ಬೃಂಗ ಬಂಧ..... 

ಅಲ್ಲಿ:
ಹುಬ್ಬು ಗಂಟಲಿ ಸಂಜೆ ಮುನಿಸು  - ಕಣ್ಣ ಕೊಳದಲಿ ಕೃಷ್ಣ ಬಿಂಬ... ತುಂಟ ಮೋಹನ ಮೋಹದಾಟದಿ ಬಿದಿರ ಬನದಲಿ ರಾಧೆಯ ಗೆಜ್ಜೆ ಕಳೆದನಂತೆ - ಗೋಪಿಕೆ ಸೆರಗ ಗಳಿಗೆಯಲಿ ಘಳಿಗೆ ಕಾಲ ಮಡಚಿಟ್ಟ ಲಜ್ಜೆಯ ಚಂದ್ರ ಮೆದ್ದನಂತೆ - ಗಂಗೆ, ಕಪಿಲೆಯರ ಗೊರಸಿನಿಂದೆದ್ದ ಹೊನ್ನ ಧೂಳಿಯಲಿ ಮಿಂದ ಗೋಕುಲದ ಗೋಪುರಕೆ ಪ್ರೇಮೋತ್ಸವ... ಯಮುನೆ ಮಡುವಲಿ ಗೊಲ್ಲ ಕೊಳಲಿಗೆ ಉಸಿರ ಸವರಿದ - ಗೋಪಿಯರೆದೆಯಲಿ ಕಾಮನ ಹುಣ್ಣಿಮೆ...

ಇಲ್ಲಿ:
ಕಣ್ತುಂಬಿಕೊಳ್ಳೋ ಒಳ ಬಯಕೆ ಮತ್ತು ಕಣ್ತಪ್ಪಿಸೋ ಸಹಜ ನಾಚಿಕೆ... ಮಡಿ ಮಡಿ ಮುಟ್ಟಾಟದ ಮಧುರ ಪಾಪಗಳಲ್ಲೇ ನಿಜದ ಬದುಕಿರೋದು ಕಣೇ ಹುಡ್ಗೀ - ಪ್ರಕೃತಿ ಪುಳಕಗಳು ಸದಾ ಚಂದ‌... ಬೆಳದಿಂಗಳ ಹೊಳೆಯಲಿ ರತಿ ಮದನನ ಬಿಂಬ ಹುಡುಕುವ ಹೊತ್ತು ಕಣಿ ಕೇಳಬೇಡ ಅರಳಲು, ಕನಸಿನ ಚಾದರದೊಳಗೆ ದುಂಬಿ ಧಾಳಿಗೆ ಮೊಲ್ಲೆ ನರಳಿದರೆ... ಕರಿ ಮೋಡದ ಚಹರೆಗೆ ಇಳೆ ಬೆವರುವಾ ಸೊಗಸು ಮೈಸೋಕಲಿ ಬೇಲಿಸಾಲಿನಿಂದ - ಹರೆಯ ಚಂದ ಚಂದ  ಇಂಥವುಗಳಿಂದ...
#ಹೂ_ಬೃಂಗ_ಬಂಧ...
↯↸↜↝↸↯

ಕಳೆದೋಗಬೇಕು..... ಕಳೆದೇ ಹೋಗಬೇಕು..... ಹಸಿ ಇರುಳ ಕೊನೆಯ ಝಾವದಲಿ ಬಿಸಿ ಬಿಸಿ ಕುದಿವ ಹರೆಯದ ಹರಾಮಿ ಕನಸನೆಲ್ಲ ಸಾರಾಸಗಟಾಗಿ ಕದ್ದು ಸಲೀಸಾಗಿ ಎದೆ ಗೊಂಚಲ ಸೀಳಿದ ಕಿರು ಓಣಿಯ ಕಾವಿನಲಿಷ್ಟು, ಹಾಗೇ ಹಾಯ್ದು ಮರಿ ತಾರೆಯಂಥಾ ಹೊಕ್ಕುಳಗುಳಿಯ ಬಳಸಿದ ಪುಟ್ಟ ಬೇಣದಾಚೆಯ ನಡು ಕಮರಿಯ ಆಳದಲಿ ಉಳಿದಷ್ಟನ್ನ ಬಚ್ಚಿಟ್ಟುಕೊಂಡು ಕಾಡುವವಳ ತೋಳ ಹಸಿವಿನ ಉನ್ಮಾದದಲಿ...
ಸವಿ ಸುಖಿ ತವಕದಲೂಟೆಯೊಡೆದು ಮೈಯ್ಯೆಲ್ಲ ಪಾದ ಊರಿ, ಏರು ತಿರುವಿಂದ ಜಾರಿ ಬೆನ್ನ ಬಯಲಲ್ಲಿ ಕಳೆದೋಗುವ ಬೆವರ ಬಿಂದುವಿನಂತೆ.... ಹೌದು... ಹಾಗೇ ಕಳೆದೋಗಬೇಕು.‌‌..... ಪೂರಾ ಪೂರಾ ಕಳೆದೇ ಹೋಗಬೇಕು... ಮತ್ತೆ ಮತ್ತೆ...
ಥೋ ನೆತ್ತಿ ಸುಡುವ ಹೊತ್ತಲ್ಲಿ ನೆತ್ತಿ ಸಿಡಿವ ಕನಸ ಹೆತ್ತ ಮತ್ತ ಮುಂಜಾವಿನ ಮಾತು ಬೇಕಾ...
#ಕಾಡುಗಪ್ಪಿನ_ಹುಡುಗಿ...
↯↸↜↝↸↯

ಕನಸೂ: ಶಾಂತ ಸಲಿಲೆ ಮಂದಾಕಿನಿಯಂತೆ ಬದುಕಿ ಹರಿಯಬೇಕು - ಭೋರ್ಗರೆವ ಶರಧಿಯನು ಸತ್ತೋಗೋಷ್ಟು ಪ್ರೀತಿಸಬೇಕು...
#ವೈನು_ಮತ್ತು_ಅವಳು...
↯↸↜↝↸↯

ಇಲ್ಕೇಳೇ -
ಪಾಳು ಗುಡಿಯ ಬಸವನ ಕಿವಿಯಲಿ ಅದೇನೋ ಒಪ್ಪಂದದ ಮಾತಾಡಿ ನೀ ಕಂಪಿಸಿದ್ದನು ಅಂಗಳದಿಂದಲೇ ಕಂಡು ನವಿಲಾದವನ ಕಲ್ಪನೆಯಲಿ 'ನೀ ಅವನಲ್ಲಿ ಉಸುರಿದ್ದು ನನ್ನ ಹೆಸರು' - ಕರುಳಿನಾಳದಲೆಲ್ಲೋ ಮೆಲ್ಲಗೆ ಮೊಲ್ಲೆ ಮೊಗ್ಗೊಂದು ಬಿರಿದ ಪರಿಮಳ...
ಅಲ್ಲಿಂದಾಚೆ ಎನ್ನೆದೆಯ ತೀರದ ತಿಲ್ಲಾನದ ಹಾದಿಗಳೆಲ್ಲ ನಿನ್ನನೇ ನೆನೆಯುತ್ತ ಹಿಗ್ಗಾಗುವಾಗ ಹೀಗೆ ಇಲ್ಲೆಲ್ಲೋ ಅಳಿದುಳಿದ ಪಳೆಯುಳಿಕೆಗಳ ನೆರಳನಾತು ಕಣ್ಣರಳಿಸಿಕೊಂಡು ನಿನಗಾಗಿ ಕಾಯುವುದು ಹೊಸದೂ ಅಲ್ಲ, ಕಷ್ಟವೂ ಅನಿಸಿಲ್ಲ ಕಣೇ...
ಎತ್ತರದ ಬಯಲ ಬೆಳಕಿಗೆ ಬಾಂದಾರುಗಳಿಲ್ಲ...
ಈ ಮರುಳ ಮನಸಿಜನ ಸೋಜಿಗಗಳಲಿ ಸೋಗಿಲ್ಲ...
ಮುದ್ಮುದ್ದು ಮುಂಜಾವಿನ ತೋಳ ಕನವರಿಕೆಗಳಲಿ ನಿನ್ನ ಕನಸ ರಜಾಯಿಯಡಿ ಕದ್ದು ಸೇರಿಕೊಳ್ಳೋ ನನ್ನ ಮಧುರ ಪಾಪಗಳನೆಲ್ಲ ತುಂಟ ನಗೆಯಲೇ ಮಾಫಿ ಮಾಡಿಬಿಡು - ಹಾದಿ ಬಿಳಲಿನಲಿ ಹುಟ್ಟಿಕೊಳ್ಳೋ ಪುಟ್ಪುಟ್ಟ ನಗೆಯ ಕಥೆಗಳಿಗೆ, ಪದವಿರದ ಪುಳಕಗಳಿಗೆ ಉಸಿರು ತೋಯಲಿ...
ಹರೆಯದ ಹೆಗಲಿಗೆ ನೇತುಬಿದ್ದ ನೆನಪ ಬಟ್ವೆಯ ಖಾನೆಗಳಲೆಲ್ಲಾ ಸಿಹಿ ಸಿಹಿ ಪುಕಾರುಗಳ ತಾಂಬೂಲ ತುಂಬಿಕೊಳ್ಳಲಿ...
#ಒಂದು_ಕಣ್ಣ_ಹನಿಯ_ತೊಳೆಯಬೇಕಿತ್ತು_ಪ್ರೇಮ_ರಾಗವ_ನುಡಿದೆ...
↯↸↜↝↸↯

ಹೋಗ್ಲೇಬೇಕಾ?
ವಿಧಿ ಇಲ್ಲ - ಕರ್ತವ್ಯದ ನೊಗ ಹೆಗಲ ಕೇಳುತಿದೆ - ಬದುಕಿನ ರಾಜಕೀಯ...

ಪ್ರೀತಿ ಕರೆದಾಗ ಬಂದೀಯಾ?
ಕಾಲ ಹೇಳೀತು... ಜೊತೆಗಿರುತ್ತಾ ಇರುತ್ತಾ ಪ್ರೀತಿಯೂ ಒಂದು ನಿತ್ಯಕರ್ಮ - ಅಲೆಯ ಮೇಲೆ ತೇಲಿ ಬಿಟ್ಟ ದೊನ್ನೆದೀಪ; ಎದೆಯಾಳದ ಮೊರೆಯಾಗೆ ಎದೆಯಲ್ಲೇ ಉತ್ತರ - ಉಸಿರ ಅನುಕ್ಷಣದ ದಾಸೋಹ...

ಬೆನ್ನಾಗುವ ಕಾಲಕ್ಕೆ ಕಣ್ಣಾದ ಕಾಲ ತುಸುವಾದರೂ ನೆನಪಾಗಲಿ...
ವರವಾ, ಶಾಪವಾ?
ನಗುವಾಗಿ, ಅಳುವಾಗಿ ಅದನೂ ಕಾಲ ಹೇಳೀತು...
#ಭಾವಬಳ್ಳಿ...
↯↸↜↝↸↯

ಕಿಡಿಗೇಡಿ ಮುಂಗುರುಳು - ಗಲಗಲ ವಾಚಾಳಿ ಕಾಲ್ಗೆಜ್ಜೆ - ಒಂಟಿ ಬಳೆಯ ಗಡಿಬಿಡಿ - ಸೆರಗಿನ ಪೋಲಿತನ - ಕಾಲ್ಬೆರಳ ಕೋಳಿ ತವಕ - ಕಣ್ಣಂಚ ಕಳ್ಳ ಹುಡುಕಾಟ - ಉಸಿರ ವೇಗದ ಉಲ್ಲಾಸ - ಹುಬ್ಬು ಗಂಟಿನ ಹುಸಿ ಗಲಿಬಿಲಿ - ಕಿವಿ ಹಾಲೆಗೆ ಬೆಂಕಿ - ತುಟಿ ಕಚ್ಚಿದ ಹಲ್ಲಿನ ಸ್ವೇಚ್ಛೆ - ಕತ್ತನು ಕವುಚಿದ ಹೆರಳಲಿ ಬಕುಳದ ಘಮ - ಭುಜದ ತಿರುವಿನೇರಿಯ ಕೆಣಕು ಬಿಗಿತ - ಕಂಕುಳ ಕತ್ತಲಲಿ ಮೊದಲ ಬೆವರ ಪಸೆ - ಬೆನ್ನ ಬಯಲಿನ ಆಹ್ವಾನ - ಒಳ ಸರಿವ ಹೊಕ್ಕುಳ ಹೂ ನಾಚಿಕೆ - ರೋಮಾಂಚಕೆ ಪಟಪಟಿಸೋ ಕಿಬ್ಬೊಟ್ಟೆಯ ಅನುಮೋದನೆ - ಬೆನ್ನ ಬುಡದ ಮರಿ ಹಕ್ಕಿ ರೆಕ್ಕೆ ಉತ್ಸಾಹ - ಹಸಿವು ಮಿಕ್ಕುಳಿಯದಂತೆ  ಕರಕುಶಲ ಹಸೆ ಕಾವ್ಯ - ಊರು ಕೇರಿಯಲಿ ಭರಪೂರ ಮಿಂಚು ಮಳೆ...
ಮನದ ಮಲ್ಲಿಗೆ ಮೈಯ್ಯಲರಳಿ ಹದಿ ಹರಿವಿಗೆ, ಕುದಿ ಮಿಡುಕಿಗೆ ಕಾಯ್ದ ಒಡಲಲಿ ಬಯಕೆ ಹುಚ್ಚು ಹೊಳೆ...
ತೆರೆದ ತೋಳ ಕಸುವಲಿ ಕಟೆದ ಕಲ್ಲು ಮೈಯ್ಯ ಕಡೆವ ಕಡಲ ಮಂಥನ - ಬಿಗಿದ ಜೀವನಾಡಿಯೆಲ್ಲ ಸಿಡಿಲು ಸಿಡಿದು ಸಡಿಲವಾಗೋ ಮೇಳನ...
ಪ್ರೇಮವೆಂದರೂ ರತಿಯ ಪ್ರಿಯ ಅಡ್ಡ ಹೆಸರೇ ಅಂತಂದು ನಕ್ಕ ಮನ್ಮಥ...
#ಹೂ_ದುಂಬಿ_ಮಿಳನ_ಮೇಳ...
↯↸↜↝↸↯

"ಜೋಗಿಯ ಮುಷ್ಟಿಯಲಿ ಕಂಪಿಸೋ ಸಣ್ಣ ಕಿಂಕಿಣಿಯ ಒಂದೆಳೆಯ ಗೆಜ್ಜೆ - ದೇವಳದ ಕಲ್ಯಾಣಿಯಲಿ ನೆಂದ ನಿನ್ನಯ ದಣಿದ ಪಾದ - ಕಣ್ಣ ಪಾಪೆಯಲಿ ಕಲೆಸಿಹೋದ ಗೋಧೂಳಿ..."
ಕನಸೊಂದು ಕನಸಲ್ಲೇ ಧೂಳ್ಹಿಡಿದಿದೆ - ಅಭಿಮಾನದ ನುಡಿ ಒಪ್ಪಿ ಎದೆ ಬೀದಿಗೆ ನೀನಿನ್ನೂ ಪಾದ ಊರದೇ...
ಬಿಚ್ಚಬಾರದೆ ನೇಹಿಗನ ಅಂಗಳದಿ ನಗೆಸಂಹಿತೆ - ಚಂದಿರನ ತೇರಿಂದ ಬೆಳ್ದಿಂಗಳು ತೂರಿದಂತೆ - ಕಳೆದೋಗದೆ ಹಾದಿಯಲಿ ಹುಟ್ಟೀತೆ ಕವಿತೆ...
#ಮಂದಮಾರುತನೂರ_ಕಂದೀಲಿನ_ಪಾದ...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

ಗೊಂಚಲು - ಎರಡ್ನೂರ್ತೊಂಭತ್ತ್ಮೂರು.....

ಅವಳ ಗುರುತು.....
(ತಾರೀಖು, ಫರಾಕುಗಳ ಹಂಗಿಲ್ಲದವಳು...)

ಈ ಮಣ್ಣು ಸಗ್ಣಿಯ ವಾಸನೇಲೇ ಜೀವಕ್ಕೆ ಏನೋ ಸಮಾಧಾನ ಇದ್ದು...
ಹುಲ್ಲು ಕೊಯ್ದ ಸುಸ್ತು ದನ ಮೈ ನೆಕ್ವಾಗ ಮರ್ತೊವ್ತು...
ನೀರ್ ಹೊಯ್ದು ರಟ್ಟೆ ಸೋತದ್ದು ಹೂ ಕಾಯಿ ಕಾಂಬಾಗ ಯಾರಿಂಗ್ ನೆನ್ಪಾವ್ತು...
ಬೆಕ್ಕು ಕುನ್ನಿ ಎಲ್ಲಾ ಮೂಗ ಪ್ರಾಣಿಗೊ ಅಂದ್ರುವ ಅವ್ವು ಕೊಡು ಪ್ರೀತಿನ ಮನಷ್ರೂ ಕೊಡ್ತ್ವಿಲ್ಲೆ...
ಹುಟ್ಟಿದ್ದಿಲ್ಲಿ, ಆಡಿ ಬೆಳ್ದದ್ದಿಲ್ಲಿ, ಉಂಡದ್ದು ಉಟ್ಟದ್ದು ಎಲ್ಲಾ ಇಲ್ಲೀದೇ, ಕಷ್ಟಾನ ಸುಖಾನ ದೇವ್ರು ಕೊಟ್ಟದ್ದು ಒಳ್ಳೇದಕ್ಕೇಯಾ ಅಂದ್ಕಂಡು ಬದ್ಕಿ ಆಯ್ದು, ಇನ್ನು ಸತ್ರೂ ಇಲ್ಲೇಯಾ, ಅದೇ ನೆಮ್ದಿ...
#ಅವಳ_ಚಿತ್ತದ_ಚಿತ್ರಗಳು...

ಸಾವಿನ ಕನಸು ಬಿತ್ತು ಕಣೋ ನಿನ್ನೆ - ಆದ್ರೆ ಬೆಳಗಾದಾಗ ಬದ್ಕೇ ಇದ್ದೆ ಅಂತಂದು ಬೇಸರಿಸಿಕೊಂಡಳು - ಮೊದಲಾಗಿ ಹೊರಡೋ ಒಳ ಆಸೆ ಅವಳಿಗೆ...
ಸಾವಿನ ಕನಸೂ ಖುಷಿ ಕೊಡುವುದಾದರೆ ಬದುಕಿನ್ನೆಷ್ಟು ಹಣಿದಿರಬೇಡ...
ಸಾವಿನ ಕನಸಾ...  ಮತ್ತೆ ಹತ್ವರ್ಷ ಆಯಸ್ಸು ಜಾಸ್ತೀನೇ ಹಂಗಾರೆ - ಹಾಗಂದು ನಗುತ್ತೇನೆ...
ಹೌದಾ!! ಥೋ ಬೇಕಾಯ್ತ್ಲೆ ಸಾಕೈತ್ತು ಅಂತ್ಹೇಳಿ ನಗುವಿಗೆ ಜೊತೆಯಾಗ್ತಾಳೆ...
#ಸಾವು_ನಗೆ_ಚಟಾಕಿ_ಹತಾಶೆಯಲ್ಲಿ...

ಒಂದು ಪುರುಡು, ಇನ್ನೊಂದು ಸೂತಕ - ಬದುಕಿನೆರಡು ಅಮೂರ್ತ ತೀರಗಳು...
ನಡುವಿನ ಹರಿವೆಂದರೆ ಹೀಗೆ ಬಂದು ಹಾಗೆ ಹೋಗಿ ಅಲ್ಲಿಷ್ಟು ಇಲ್ಲಿಷ್ಟು ಪುಡಿ ಗುರುತು...
ಅವಳ ಹುಟ್ಟಿನಿಂದ ನನ್ನವರೆಗಿನ ಕರುಳ ಚಿಗುರು ವಿಸ್ತಾರ‌...
#ಸಾವಿಗೆ_ಮೊಲೆಯುಣಿಸುವುದು...

ಹುಟ್ಟಿನ ಸಂಭ್ರಮ ಬದುಕೆಂಬೋ ಬದುಕಿನ 'ಮುಕ್ತ ನಗು'ವಿನಲಲ್ಲವಾ...
ಜನುಮ ದಿನವಂತೆ ಅವಳಿಗಿಂದು - ಸಾವು ನೋವಿನ ಮಾತು ಮತ್ತು ಅವೆಲ್ಲವ ಮರೆವ ಹವಣಿಕೆಯ ಹಾಹಾಕಾರದ ನಗು ಬಲು ಜೋರು ಜೋರು...
ನಗುವುದ ಬಿಟ್ಟು ಬೇರೆ ಏನಿದೆ ದಾರಿ - ಕಣ್ಣುಕ್ಕಿಯೂ ಕರುಳಾಳದಲಿ ಉಳಿದೇ ಹೋಗುವ ಬಿಕ್ಕಳಿಕೆಗೆ...
ಕನಸ ಕಣ್ಣಿಗೆ ಹೂಬಿದ್ದ ರೌದ್ರ ಹಾದಿಗಳೇ ಹಾಗೆ - ಹಳವಂಡಗಳ ಹಳಿಯ ಮೇಲಿನ ನಡಿಗೆ...
#ನೋವುಂಡು_ನಗೆಯ_ಹಡೆವುದೇ_ಅಲ್ಲವೇ_ಅಮ್ಮನ_ಪಟ್ಟ...

ಅದಾಗಿಯೂ ಉಂಡ ನೋವುಗಳೆಲ್ಲ ಅವಳ ಹಣಿದದ್ದೇ ಸುಳ್ಳು ಅನ್ಸಿಬಿಡತ್ತೆ - ಈ ಎಲ್ಲ ಮಾತುಗಳಾಚೆ ಅಲ್ಲವಳು ಕಣ್ಣ ಹನಿಗಳನೆಲ್ಲ ಗಂಟಲಲ್ಲೇ ಗಂಟ್ಹಾಕಿ ಜಗದ ನದರಿಂದ ಮುಚ್ಚಿಟ್ಟುಕೊಂಡು ಬದುಕ ನಿಭಾಯಿಸುವ ಪರಿ ಕಾಂಬಾಗ...
ಅತ್ತು ಹಗುರಾದ ರಾತ್ರಿಗಳ ಸಾಕ್ಷಿ ಉಳಿಯಬಾರದು - ನಕ್ಕ ಘಳಿಗೆಯ ಚಿತ್ರ ಮರೆಯಬಾರದು...
#ಅವಳ_ಅಂತರಂಗ...
*****
ಆಯೀ ಎಂಬ ಮುದ್ದು ಹುಡ್ಗೀ -
ನಿನ್ನ ಹುಟ್ಟು ಹಬ್ಬವಾಗಿತ್ತೋ ಇಲ್ವೋ ಗೊತ್ತಿಲ್ಲ - ನೀರನ್ನೇ ಖೀರು ಎಂದು ಕುಡಿದು ಹಬ್ಬ ಮಾಡಿಕೊಂಡು ನಕ್ಕು ಅಣಕಿಸಿದೆ ನೀ ನಿನ್ನ ಬದುಕ...
ತುಂಬ ನಗಬೇಡ್ವೇ, ನಿನ್ನ ದೇವರೂ ಉಸಿರುಗಟ್ಟಿಕೊಂಡಾನು...  
ಎಷ್ಟು ಬರೆದರೆ ನಿನ್ನ ಇಷ್ಟೇ ಇಷ್ಟು ಹೇಳಬಹುದಿಲ್ಲಿ ನಾನು...
ಎಷ್ಟು ಬದುಕಿದರೆ ಅಷ್ಟೆಲ್ಲ ಬಗ್ಗಡಗಳ ಹಾಯುವಾಗಲೂ ನಿನ್ನಲ್ಲಿರುವ ಜೀವನ ಪ್ರೀತಿಯ ಬಸಿದುಕೊಂಡೇನು ನಾನು...
ಇಷ್ಟೇ ಹೇಳಬಲ್ಲೆ:
ಎಪ್ಪತ್ತರಾಚೆಯ ಮಗುತನಕೆ ಮುದ್ಮುದ್ದು ಶುಭಾಶಯ ಕಣೇ...
ಲವ್ ಯೂ ಸುಂದ್ರೀ... 😘😘

ಅವಳೊಳಗಿನ ಮಗು ನಕ್ಕಾಗ... 

ಗೊಂಚಲು - ಎರಡ್ನೂರ್ತೊಂಭತ್ತೆರ‍್ಡು.....

ಈ ಕೂಸಿಗೆ ಎಂಟು ತುಂಬಿತು.....!!! 

ಅಲೆತೊಳೆವ ಹಾದಿಯಲಿ ಹೆಸರ ಬರೆದು ಗುರುತು ಹುಡುಕುತ್ತೇನೆ - ಮರಳ ಕಣ ನಗುವಾಗ ಅಲೆಯ ಹೊಟ್ಟೆಹುಳುಕನು ಶಪಿಸುತ್ತೇನೆ...
ತಲೆಮಟ್ಟ ಸಿಡಿವ ತೆರೆ - ಮೈಯ್ಯೆಲ್ಲ ಉಪ್ಪುಪ್ಪು - ಆ ಹಾದಿ, ಆ ನೆನಪು, ಮತ್ತೆ ಹುಟ್ಟುವ ಕನಸು - ದಡದಾಚೆ ಕಾಡಿನಲಿ ಯಾರೋ ಕಾಯುತಿರುವಂತೆ, ನನ್ಹೆಸರ ಕೂಗುತಿರುವಂತೆ - ಕಣ್ಣ ಹನಿಯಲ್ಲಿ ಸಾಗರನಿಗೂ ಮುಪ್ಪು...

ಭಿನ್ನೆತ್ತೆಯಲ್ಲಿ ಅದದೇ ಅ ಆ ಇ ಈ ಗಳನ್ನು ಮತ್ತೆ ಮತ್ತೆ ತಿದ್ದಿ ತಿದ್ದಿ ಪಾಟಿಯ ಮೈ ಹಕ್ಕಳೆದ್ದರೂ ಶಾಲೆ ಓದು ತಲೆಗೆ ಹತ್ತಲೇ ಇಲ್ಲ - ಕಾಗುಣಿತದಾಚೆ ಬುದ್ಧಿ ಬೆಳೆಯಲೇ ಇಲ್ಲ...
ಬದುಕಿನ ಪಾಠಶಾಲೆಯಲ್ಲಿಯೂ ಈಗಲೂ ಅದೇ ಭಿನ್ನೆತ್ತೆಯ ದಡ್ಡ ಕುಮಾಂಡು ಹುಡುಗ ನಾನು - ಅದದೇ ಭಾವ, ಮತ್ತದೇ ಮಾತುಗಳನ್ನು ಸತತ "ಎಂಟು" ವರ್ಷಗಳಿಂದ ಬ್ಲಾಗ್ ಎಂಬೋ ಸಾರ್ವಜನಿಕ ದಿನಚರಿ ಪಟ್ಟಿಯಲ್ಲಿ ಗೀಚುತಲಿದ್ದೇನೆ - ಮನವೂ ಪಕ್ವವಾಗಲೇ ಇಲ್ಲ...

ಸಣ್ಣ ನಗೆಯ ಚಿಗುರಿಗೆ ಮಗ್ಗುಲ ನೋವಿನ ನೆರಳು ಜೋಗುಳ ಹಾಡುವ ರೀತಿಗೆ ವಿವಶನಾದವನಂತೆ ನಗುವಿಗಿಂತ ಹೆಚ್ಚು ನೋವನ್ನೇ ಗೀಚಿದೆ - ತುಟಿಯಂಚ ನಗು ಬಾಡಿಲ್ಲ...
ಸಾವಿರುವ ಕಾರಣಕ್ಕೆ ಬದುಕು ಚಂದ ಅನ್ನಿಸಿದ್ದಕ್ಕೋ ಅಥವಾ ಬದುಕು ಕಾಡುವ ಪರಿಗೆ ಸಾವೇ ಹಿತ ಅನ್ನಿಸುವ ಭಾವಕ್ಕೋ ಗೊತ್ತಿಲ್ಲ ಹುಟ್ಟಿನ ಸಂಭ್ರಮಕ್ಕಿಂತ ಸಾವಿನ ಸೂತಕವನ್ನೇ ಮತ್ತೆ ಮತ್ತೆ ಬರೆದೆ - ನನ್ನಲಿನ್ನೂ ಉಸಿರಿದೆ...
ಚೂರೂ ಪರಿಚಯವೇ ಇಲ್ಲದ ಪ್ರೇಮವ ಕೆತ್ತಿದೆ - ಹುಟ್ಟಾ ಪೋಲಿಯ ಕೆಟ್ಟ ಕನಸಿನಂತೆ; ಅವರಿವರೊಪ್ಪದ ಬೇಶರತ್ ಕಾಮವ ಒಪ್ಪಿ, ಅಪ್ಪಿ ಪದೇ ಪದೇ ಹಾಡಿದೆ - ಪ್ರೇಮವ ತೂಗಿದ ತೋಳ ತೊಟ್ಟಿಲಿನಂತೆ... 

ಸದಾ ಜಾಗೃತ ಅತೃಪ್ತಿಯೇ ನಡೆವ ಹಾದಿಯ ಹುಚ್ಚು ಸೌಂದರ್ಯವೇನೋ - ನಾ ನಡೆದದ್ದು ಪೂರಾ ಪೂರಾ ನನ್ನ ಹಾದಿ... ಅಂತೆಯೇ ನಾ ಬರೆದದ್ದೂ ನನ್ನ ವಿಕ್ಷಿಪ್ತ ಮನದ ಹುಚ್ಚನ್ನೇ...
ಆ ಆ ಕ್ಷಣಗಳಲ್ಲಿ ನನ್ನೊಳಗೆ ಕೆರಳುವ, ನನ್ನ ಕೆಣಕುವ ಪ್ರೇಮ, ಕಾಮ, ಕನಸು, ಕಲ್ಪನೆ, ಸೋಲು, ಅಸಹಾಯಕತೆ, ಗೆಲುವಿನ ಭ್ರಮೆ, ಅಹಂಕಾರ, ಆಕಾರ, ವಿಕಾರಗಳ ಸಾಂಗತ್ಯದಲ್ಲಿ  ಪಡಕೊಂಡ, ಕಳಕೊಂಡ ಕನವರಿಕೆಗಳಿಗೆಲ್ಲ ತೋಚಿದ ಅಕ್ಷರಗಳ ಹೆಕ್ಕಿ ಹೆಕ್ಕಿ ಶಬ್ದಗಳ ಬಣ್ಣ ತುಂಬುತ್ತಾ ನನ್ನೊಳಗನ್ನು ಬರಿದಾಗಿಸಿಕೊಂಡೆ, ಹಗುರಾಗಿಸಿಕೊಂಡೆ...

ಮನೆಯ ಬೆಳಕೆಲ್ಲ ಆರಿಸಿ ಕತ್ತಲ ಬಳಿದುಕೊಂಡು ಅಟ್ಟ ಹತ್ತಿ ಮಲಗಿ ಬೆಳದಿಂಗಳ ನೋಡ್ತಾ ಮನಸಿನ ಮಾತಿಗೆ ಕಿವಿ ತೆರೆದರೆ ಅಂಗಳದ ಮೂಲೆಯ ಪಾರಿಜಾತ ಅರಳ್ತಾ ಇತ್ತು ಎದೆಗೂಡಿನೊಳಗೂ - ಡೈರಿಯ ಚಿತ್ತುಕಾಟು ಕೈಬರಹವಾಗಿ ಅಲ್ಲಿಂದ ಶುರುವಾದ ಅಕ್ಷರ ಸಾಂಗತ್ಯ ಬ್ಲಾಗ್‌ನ ಗೊಂಚಲುಗಳಾಗಿ ಇಲ್ಲಿಯವರೆಗೂ ನಡೆದು ಬಂದದ್ದು ಖುಷಿಯ ಸೋಜಿಗ...

ನನ್ನ ಅದದೇ ಪ್ರಲಾಪಗಳನೂ ಅಕ್ಕರೆಯಿಂದ ಓದಿ ಮೆಚ್ಚಿದ ನಿಮ್ಮಗಳ ಅಕಾರಣ ಅಭಿಮಾನಕ್ಕೂ ಮಿಗಿಲು ಇನ್ನೇನಿದೆ - ವಿನಾಕಾರಣ ಪ್ರೀತಿಯ ಹರಿವಿನ ಅಭಯದೆದುರು ತುಂಬಾ ಚಿಕ್ಕವನು...

ಕೈಯೆತ್ತಿ ಕೊಟ್ಟ ಅರಿವಿಲ್ಲ, ಕೈಚಾಚಿ ಪಡೆದದ್ದೇ ಎಲ್ಲ - ಪ್ರೀತಿಯ ಹಿರಿತನಕೆ ಬೇಶರತ್ ಶರಣಾಗತಿ...

ಎಂಟು ವರುಷ - ಅಂದ್ರೆ ತೊಂಭತ್ತಾರು ಮಾಸ - ಮಾಸಕ್ಕೆ ಮೂರು ಮತ್ತೊಂಚೂರು ಗೊಂಚಲು...
ಹ ಹಾ... ನನ್ನ ಮಟ್ಟಿಗೆ ಬಹುದೊಡ್ಡ ಸಾಧನೆಯೇ...
ಸ್ವಗತದಂತೆ, ಸ್ವಪಚತನದಂತೆ, ಸಿನಿಕತೆಯನ್ನೂ ಸಿಹಿಪಾಕದಂತೆ, ನೋವಿಗಷ್ಟು ನಗುವಿಗಿಷ್ಟು ಗಾಢ ಬಣ್ಣವ ಮೆತ್ತಿ ಶಬ್ದಗಳ ಅಲಂಕಾರದಲಿ ಹೆಣೆದು ನನ್ನೇ ನಾ ತೂರಿಕೊಂಡೆ - ಬರೆದ ನೋವು, ನಗುವು, ನೇಹಗಳ ಅಷ್ಟಿಷ್ಟು ಬದುಕಿದೆ - ಮಧುರ ಪಾಪಗಳಿಗೆ ಮನಸಾರೆ ತೋಳ ತೆರೆದಿಟ್ಟು ಬೆಸೆದುಕೊಂಡ ರಸಿಕ ರವಳಿಯ ಗುಂಗನು ಬೆಚ್ಚಗೆ ಕಾಯ್ದುಕೊಂಡೆ; ಪರಿಣಾಮ  - ಅಲ್ಲಿಷ್ಟು ಇಲ್ಲಿಷ್ಟು ಸೇರಿ ಸ್ವಂತಕ್ಕೆ ಈಗ ಈ ಹೆಗಲ ಚೀಲದ ತುಂಬಾ ನೀವುಗಳು ಎತ್ತಿ ಕೊಟ್ಟ ಅಭಿಮಾನ ಅಕ್ಕರೆಗಳ ಸಕ್ಕರೆ ದಂಟು...!!! 
ಅದೇ ಹಳೆಯ ಸರಕನ್ನು ಹೊಸ ಪದಗಳಲ್ಲಿ ಇನ್ನೂ ಅದೆಷ್ಟು ಕಾಲ ಬರೆದೇನೋ ಗೊತ್ತಿಲ್ಲ - ಬರೆದಾಗ ಓದುವ ಪ್ರೀತಿ ಇಂತೆಯೇ ಉಳಿದಿರಲಿ ನಿಮ್ಮಲ್ಲಿ ಅನ್ನೋ ಚಂದದ ಸ್ವಾರ್ಥವಂತೂ ಇದ್ದೇ ಇದೆ...
ನಿಮ್ಮೊಡನಿದ್ದೂ ನಿಮ್ಮಂತಾಗದ ನಿಮ್ಮವನು... 

                               






--- ವಿಶ್ವಾಸ ವೃದ್ಧಿಸಲಿ
                                              ಶ್ರೀವತ್ಸ ಕಂಚೀಮನೆ   

ಗೊಂಚಲು - ಎರಡ್ನೂರ್ತೊಂಭತ್ತೊಂದು.....

ಕನಸೂ.....

ಈ ಹುಚ್ಚು ಛಳಿಯ ಮೈಗೆ ನಿನ್ನ ಹಬೆಯಾಡೋ ಬೆತ್ತಲೆ ಭಾರವ ಹೊತ್ತು ಇರುಳ ದಾಟುವ ಕನಸು...
ಛಳಿಗೂ ಬೆತ್ತಲಿಗೂ ಹೊಯ್‌‌ಗೈ ಆದರೆ ಇರುಳ ಕೋಟೆಯಲಿ ಸುಖದ ವಿಜಯೋತ್ಸವ...
ಮಾಗಿ ಬಾಗಿಲ ಪಲ್ಲಂಗದ ರತಿ ರಂಗ ರಾಗದಲಿ ನಿನ್ನ ನರನಾಡಿ ತಂತಿಗಳ ಕೆಣಕಿ ಕೆರಳಿಸಿ ತಾರಕ ಮಿಡಿತಕ್ಕೊಯ್ದು ನೀ ಉತ್ಥಾನದಲಿ ವಿಜ್ರಂಭಿಸುವಾಗ ನನ್ನ ನಾ ಸಾರಾಸಗಟಾಗಿ ನಿನಗೊಪ್ಪಿಸಿ ಆ ಸುರತ ಸುಖಕ್ಕೆ ಶರಣಾಗುವ ಸುಖವುಂಟಲ್ಲ - ಉಫ್!! ಮದನನ ಹೂ ಬಾಣಕೂ ಭಾಷ್ಯ ಸಿದ್ಧಿಸಿರಲಿಕ್ಕಿಲ್ಲ ಆ ಎಲ್ಲ ಸೀಮೆಗಳ ಉಲ್ಲಂಘಿಸಿದ ಭಾಷೆಯಿಲ್ಲದ ಜೀವಾಭಾವಪ್ರಾಪ್ತಿಗೆ...
ಗೆದ್ದ ಇರುಳ ಕೋಟೆಯಲ್ಲಿ, ಸುಖದ ಸುಸ್ತು ಕಾಡುವಾಗ ನಿನ್ನ ತಳುಕು ತೋಳ ತೊಟ್ಟಿಲಲ್ಲಿ ನಿದ್ದೆಗೂ ಒಡಲುರಿಯ ತೊಳೆವ ಅಮೂರ್ತ ಹಿತ ಬೆಳಕಿದೆ...
ಹೆರಳ ಸವರುವ ನನ್ನ ಬೆಚ್ಚನುಸಿರು, ಏಕತಾನದಿ ಮಿಡಿವ ನನ್ನೀ ಹೃದಯ, ತಟ್ಟಿ ತಟ್ಟಿ ನಿನಗೆಂದು ನಿದ್ದೆಯ ಕರೆವ ಈ ಒರಟು ಕರಗಳು -  ನಗ್ನ ಮೈಮನದಿ ಎನ್ನೆದೆಯ ಕವುಚಿ ಮಲಗೋ ನಿನಗೆ ಅವೇ ನನ್ನ ಪ್ರೀತಿ ಲಾಲಿ...
ನಿದ್ದೆಗಣ್ಣಲ್ಲಿ ಕಾಲ್ಗಳ ಗೀರಿ ಕಚಗುಳಿ ಇಡುವ ನಿನ್ನ ಗೆಜ್ಜೆ, ಮತ್ತೆ ಮತ್ತೆ ಮುದ್ದು ಬಂದು ಬಿಗಿಯಾಗೋ ತೋಳು - ಇರುಳ ತುಂಬು ತೆಕ್ಕೆಯಲ್ಲಿ ಬೆಳಗಿಗೆ ಹೊಸ ಕನಸಿದೆ...
#ಛಳಿ_ಇರುಳ_ತಿಲ್ಲಾನ...
⇚⇖⇗⟴⇘⇙⇛

ಪ್ರೀತಿ ಪಡೆವ ಸುಖವಲ್ಲ - ಕೊಡುವ ಸೌಂದರ್ಯ...
#ಹೇಳಿಕೆ...
⇚⇖⇗⟴⇘⇙⇛

ತುಂಬ ಹೇಳಬೇಕು ಮೆಲ್ಲ - ಹೇಳಲಾಗದ ಗೊಲ್ಲ ಕೊಳಲ ಕೊಳಕೆಸೆದ...

ಯಮುನೆ ಗಂಟಲೊಣಗಿ ಉಗುಳು ನುಂಗುತ್ತಾಳೆ - ಬಿದಿರ ಬನದ ಗಾಳಿಯಲ್ಲೀಗ ಅವಳ ಮೌನದ ತಣ್ಣನೆ ಬೆಳಕೇ ಗಾನ...
ಮನಸು ಪರಿಚಯಿಸಿಕೊಂಡಂತೆಯೇ ಜಗಕೂ ತೋರಿಕೊಂಡರು - ಹಾಗೆಂದೇ ಗೊಲ್ಲ 'ಕೃಷ್ಣ'ನಾದ, ರಾಧೆ 'ಪ್ರೇಮವೇ' ಆದಳು...
ಒಪ್ಪಲಾರದ ಜಗ ಗುಡಿಯ ಕಟ್ಟಿತು...
⇚⇖⇗⟴⇘⇙⇛

ನೀನೆಂಬ ಮಂದ್ರ, ನೀನೇ ತಾರಕ , ನೀನಿಲ್ಲಿ ಎದೆ ಮಿಡಿತದ ಹಸಿ ಖುಷಿಯ ಗುಂಜಾರವದ ಆಲಾಪ... 

ನೀನೆಂದರೆ ಸಂಜೆಯ ಒರಟು ಅಂಗೈಯಲ್ಲಿ ಚೂರು ಚೂರೇ ಬಾಡುವ ನೆನಪ ಘಮದ ಸುಮ...

ಎದೆ ಸುಡುವ ಉರಿ ಛಳಿಯ ಥಳಿಸುವ ಹಂಡೆ ಒಲೆಯ ಕೆಂಡದಂತವಳೇ - ಜಗದ ಜಾತ್ರೆಯಲಿ ನಾನೆಂಬ ವಿಚಿತ್ರ ಹುಚ್ಚುಗಳ ವಿಕ್ಷಿಪ್ತ ಹುಳು ಇತಿಹಾಸವಾಗುವ ಒಂಚೂರು ಮುನ್ನವಾದರೂ ನನ್ನೊಳಗಿನ ನಿನ್ನನ್ನು ಪರಿಚಯಿಸಿಕೊಂಡು ಕಣ್ಮಿಟುಕಿಸಬಾರದಾ...
#ಕನಸೂ...
⇚⇖⇗⟴⇘⇙⇛

ಛಳಿಯಿನ್ನೂ ತನ್ನ ಬಿಡಾರ ಬಿಚ್ಚಿಕೊಂಡು ಊರು ಬಿಟ್ಟಿಲ್ಲ ಕಣೇ - ನಿನ್ನ ಎದೆ ಗೊಂಚಲ ಕಂದರದಲ್ಲಿ ಉಸಿರಿನ ಛಳಿ ಕಾಯಿಸಿಕೊಳ್ಳುವ ನಿತ್ಯ ಹಂಬಲದ ಮತ್ತ ಮುಂಜಾವುಗಳಿನ್ನೂ ಬಾಕಿ ಇದ್ದಂತೆಯೇ ಮಕರ ತಿಂಗಳ ಬಾರಿ ಅಂತ ನೀ ಆಯಿ ಮನೆ ಸೇರಿದರೆ ಆಸೆ ಬಲಿತ ಜೀವ ತಡೆದೀತು ಹೇಗೆ - ಮೈಯ್ಯ ಬಿಸಿಗೆ ಒಗ್ಗಿದ ಇರುಳು ಕಂಬಳಿಯ ಒಪ್ಪೀತೇ...

ನಿನ್ನ ಗೆಜ್ಜೆ ಗೀರಿಗೆ ಈ ಗಂಡು ಕಾಲ್ಗಳು ನಲುಗಿ ದಿನ ನಾಕಾಯಿತು - ಬಾಗಿಲಲಿ ಬೆಳುದಿಂಗಳ ನೆರಳಾಡಿದರೆ ಎದೆ ಸುಟ್ಟ ಹಾಗೆ ಚಡಪಡಿಕೆ...
ನೀ ಬರುವ ದಾರಿಗೆ ಆಸೆ ಬಣ್ಣವ ಚೆಲ್ಲಿ, ಮಾಗಿಯ ಕೊನೆ ಕೊನೆಯ ರತಿಯ ತೇರೆಳೆಯಲು ಮನೆ ತುಂಬಾ ಏಕಾಂತವ ತುಂಬಿಕೊಂಡು ಕಾಯುತಲಿದ್ದೇನೆ - ಅಲ್ಲಿ ನಿನ್ನ ಇರುಳಿಗೆ ಹಾಲ್ದಿಂಗಳು ಚುಚ್ಚಿ ಮೈಮಿಸುಕಿ ನಿದ್ದೆ ಕದಡಿದರೆ ಇಲ್ಲಿಯ ನನ್ನ ಬೈಯ್ಯದಿರು...
#ಛಳಿಗೆ_ಕಾದ_ಮೈಗೆ_ಸಣ್ಣ_ವಿರಹವೂ_ಶಾಪದಂಗೇ_ಭಾಸ...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)