Saturday, August 1, 2020

ಗೊಂಚಲು - ಮುನ್ನೂರಾ ನಲವತ್ತು ಮೇಲೆರಡು.....

ನನ್ನ ಹುಟ್ಟು.....
(ಹಾರುವ ಕನಸಿಗೆ ಗಾಳಿಯೇ ರೆಕ್ಕೆಯ ಸೆರಗು...)

ಕರುಳ ಬಳ್ಳಿಯ ಕತ್ತರಿಸಿದರು...
ಬಯಲಿಗೆ ಬಿದ್ದ ಭಯಕೆ ಕಣ್ಮುಚ್ಚಿಯೇ ಚೀರಿದೆ...
ಫಕ್ಕನೆ ಎತ್ತಿಕೊಂಡು ಎದೆ ಹಾಲು ಬಳ್ಳಿಯ ಬಾಯಿಗಿಟ್ಟು ಬೆಳಕಿಗೆದೆಗೊಡಲು ಶಕ್ತಿ ಹರಿಸಿದಳು...
ಅಷ್ಟೇ,
ಕಣ್ಕುಕ್ಕುವಂತೆ ಜಗವನೇನೂ ಗೆದ್ದಿಲ್ಲ; ಆದರೆ ನನ್ನೊಳು ನಾ ಎಂದೂ ಸೋತಿಲ್ಲ...
ಅವಳ ಎದೆ ಹಾಲು ಅಮೃತವಿರಲಿಕ್ಕಿಲ್ಲ - ಆದರೆ, ಆತ್ಮ ಸ್ಥೈರ್ಯಕಿಂತ ಅಮೃತ ಎಳ್ಳಷ್ಟೂ ಮೇಲಲ್ಲ...
ನೆತ್ತಿ ನೇವರಿಸಿ ಅಂಗಳಕೆ ಬಿಟ್ಟ ಅವಳ ಹಸ್ತದಲಿ ಬದುಕನು ಪ್ರೀತಿಯಿಂದ ಆವರಿಸೋ ಪ್ರೀತಿ ತುಂಬೋ ಜಾದೂ ಇದೆ...
ಅವಳ ಮಮತೆ ಮಡಿಲಲಿ ಕುಂತೇ ಗ್ರೀಷ್ಮಗಳ ದಾಟಿದ್ದು ವಸಂತಗಳ ಮಿಂದದ್ದು...
#ಆಯೀ_ಅಂದರೆ_ಆತ್ಮಕೆ_ಸಾಮು_ಹಿಡಿದವಳು...

ಎದೆಯ ಇರಿವ ನೋವ ಹನಿಯೂ ಶಾಪವಾಗದ ಸೂತ್ರವು...
ಕರುಳ ಕೊರೆವ ನಿಟ್ಟುಸಿರಲೂ ಪ್ರೀತಿಯೊಂದೇ ಪಾತ್ರವು...
ಎಂದೂ ಬರಿದಾಗದ ಅವಳ ಸೆರಗ ಗಂಟಿನ ಹರಕೆ, ಹಾರೈಕೆಗಳ ಹಮ್ಮಿಣಿಯದು ಎನ್ನ ಜಗವ ಆರೈಯ್ಯುವ ಸತ್ರವು...
ಅವಳೆಂಬ ಅವಳ ಅಖಂಡ ಕಾರುಣ್ಯವೇ ಎನ್ನ ಕಾಯ್ವ ದೈವವು...
#ಹೆಗ್ಗಣ_ಮುದ್ದು...

ದೇವನೆಂಬುವನಿದ್ದು ಅವ ಮುನಿದು ನಿಂತರೂ ಎದುರು ಸೆಟೆದು ನಿಂತೇನು ಚೂರೂ ಭಯವಿಲ್ಲದೆ...
ಆದರೆ,
ಅವಳ ಕಣ್ಣಂಚು ತುಂಬಿಕೊಂಡ ಎಲ್ಲ ಘಳಿಗೆಯಲೂ ದೊಡ್ಡ ನಗೆಯ ಮಗ್ಗುಲಲ್ಲೇ ಇಂಚಿಂಚು ಸತ್ತಿದ್ದೇನೆ ಒಳಗೊಳಗೇ...
#ನನ್ನ_ಕಣ್ಣಲ್ಲಿ_ನಾ_ಸಾಯೋ_ಸಂಜೆಗಳು...

ಆಜನ್ಮ ಅವಿವಾಹಿತರಾಗಿರೋ ಲಾಭ ಅಂದ್ರೆ, ಹುಟ್ದಬ್ಬದ್ ದಿನದ ಹೊರತು ಬೇರ್ಯಾವಾಗ್ಲೂ ವಯಸ್ಸಾಗೋತೂ ಹೇಳು ಚಿಂತೆ ಕಾಡದೇ ಇಪ್ಪುದು.‌‌..
#ಮಜವಾದ_ಸತ್ಯ...
#ಜ್ಞಾನೋದಯ...

ಎದೆಬಿರಿಯೆ ನಕ್ಕ ಮರುಘಳಿಗೆ ಅದೇ ಹಳೆಯ ನೋವು ಹೊಸದಾಗಿ ಪರಿಚಯಿಸಿಕೊಳ್ಳುತ್ತೆ ಎದೆಯ - ಗಂಟಿಗೊಂದು ಗೆಲ್ಲುಗಳಾಗಿ ಟಿಸಿಲೊಡೆದು...
ಕಾರಣ,
ನಗೆಯ ಬೆಳಕಲ್ಲಿ ವಿಷಾದದ ಎಲ್ಲಾ ಮಗ್ಗುಲುಗಳೂ ಇನ್ನಷ್ಟು ಸ್ಪಷ್ಟಗೋಚರವಾಗಿ ಎದ್ದು ನಿಲ್ಲುತ್ತವೆ - ರಕ್ತಬೀಜಾಸುರ ಬಲಪಡೆದು...
#ಜನುಮಕ್ಕಂಟಿದ_ರಾಗ...

ಯಾವ ಋತು ರಾಗವೂ ಜೀವತುಂಬದ, ಸಾವೂ ಮೂಸಿ ನೋಡದ ಹಪ್ಪು ಸ್ತಬ್ಧತೆಯ ಒಂಟೊಂಟಿ ಹಾದಿ...
ಎದೆಯ ಹಾಡಿಯ ತುಂಬಾ ಅಂಡಲೆಯುವ ಅತೃಪ್ತ ಆಸೆಗಳ ಕೊಳ್ಳಿ ದೆವ್ವಗಳು...
ಗೊಬ್ಬು ಮಣ್ಣು, ಅಬ್ಬೆ ಮಳೆಗೂ ಜೊಳ್ಳು ಕಾಳು ಚಿಗುರುವುದಿಲ್ಲ... 
ಕೆಲ ಬದುಕುಗಳೂ ಹಾಗೇನೇ...
ಮುಫತ್ತು ಹಳವಂಡಗಳ ಗಾಯಗಳು ಉಳಿಸಿ ಹೋದ ಗೀರು ಗೀರು ಗುರುತುಗಳಷ್ಟೇ ಸ್ವಂತ ಸ್ವಂತ ಅಲ್ಲಿ...
#ನಾ_ಯಾರಿಗಾದೆನೋ...

ಜೋರು ಉರಿವ ದೀಪದಲ್ಲಿ ಫಟ್ಟನೆ ನಂದುವ ದೊಡ್ಡ ಆಸೆ ಮತ್ತು ಸಣ್ಣ ಭೀತಿ...
#ನನ್ನ_ನಗು_ಮತ್ತು_ನಾನು...

ಬಂದದ್ದು ನನ್ನ ಆಯ್ಕೆಯಲ್ಲ - ಹೋಗೋ ದಾರಿ ಗೊತ್ತೇ ಇಲ್ಲ - ಇದ್ದಲ್ಲೇ ಇದ್ದಂತೇ ಇದ್ದು ಕೊಳೆಯೋ ಜಂತು ಜೀವ...
#ನಾನು...

ಆಯ್ಕೆಗಳ ಕೊಡಲೀ ಎಂಬ ಆಶೆಬುರುಕ ಹಂಬಲದಲ್ಲಿ ಕೈಚಾಚ್ತೇನೆ...
ಆಯ್ಕೊಂಡ್ ತಿನ್ನೋಲೇ ತಿರಬೋಕಿ ನನ್ಮಗನೇ ಅಂತಂದು ಗಹಗಹಿಸುತ್ತೆ ಬದುಕು...
#ಕಿಲುಬ್ಹಿಡಿದ_ಹಾದಿ...

ಇಲ್ಲಿ ಆನೆಂಬ ಸುಳ್ಳಿಗೆ ಮಿಗಿಲಿಲ್ಲ.‌..
ನಗುನಗುತ್ತಾ ಅಳುತ್ತಳುತ್ತಾ ಮಿಡಿಯುವ ಗುಡುಗುವ ಆನೆಂಬ ಸುಳ್ಳಿಗೆ ಮಿಗಿಲೇನಿಲ್ಲ.‌..
#ನಡಿಗೆ...

ಬದುಕು ತುಂಬಿಕೊಂಡಿರುವಾಗ ಉದ್ದೇಶ ರಹಿತ ನಡಿಗೆ ಒಂದು ಚಂದ ಕನಸು...
ಬದುಕಿಗೇ ಒಂದು ಉದ್ದೇಶವಿಲ್ಲದಾದಾಗ ನಗೆಯ ಮುಖಮುರಿಯೋ ಖಾಲಿತನದಲ್ಲಿ ಕುದಿಯುತ್ತಾ ನಡಿಗೆಯನೇ ನಿರಾಕರಿಸುವ ಸೂಕ್ಷ್ಮ ಮನಸು...
ಹಳೆಯ ನೋವುಗಳೆಲ್ಲಾ ಹಪ್ಪು ಹಿಡಿದಿವೆ...
ಜೊತೆ ನಡೆಯೋಕೆ ಹೊಸತೊಂದು ನೋವಾದರೂ ಬೇಡವಾ...
ಸಂಜೆಗಳು ಖಾಲಿಖಾಲಿಯಾದರೆ ಇರುಳಿಗೆ ಹೊಚ್ಚಿಕೊಳ್ಳಲು ಬರೀ ಕತ್ತಲಷ್ಟೇ ಉಳಿದುಬಿಡುತ್ತೆ...
ಹಾಗೆಂದೇ -
ಖಾಲಿಯನ್ನು ತುಂಬಿಕೊಳ್ಳುತ್ತೇನೆಂದೇ ಹೊರಡುತ್ತೇನೆ ಪ್ರತಿ ಬಾರಿಯೂ ಹೊಸತೇ ಅನ್ನಿಸೋ ಹುಚ್ಚಾಟದ ಹಾದಿಯಲ್ಲಿ...
ಪ್ರಾರಬ್ಧ ನೋಡಿ, ಮತ್ತದೇ ಖಾಲಿಯೆಡೆಗೇ ನಡೆದಿರುತ್ತೇನೆ ನೆನಪಿಂದ ಹಿಂತಿರುಗಲರಿಯದ ದಾರಿಯಲ್ಲಿ...
#ಬರೀ_ಸುಸ್ತೊಂದೇ_ಗಳಿಕೆ...

ತುಂಬಿಕೊಳ್ಳಲೇನೂ ಇಲ್ಲ ಇಲ್ಲಿ...
ಖಾಲಿಯಾಗುತ್ತಾ ಖಾಲಿಯೆಡೆಗೇ ನಡೆಯುವುದು...
ಖಾಲೀ ಕೈಯ್ಯ ಕೋಲೆ ಬಸವ ನಾನು...
ಒಂದೊಂದೇ ಒಂದೊಂದೇ ನಿನ್ನೆಗಳನು ಕಳಚಿಕೊಳ್ಳುತ್ತಾ, ಅಳಿಸಿ ಹಾಕುತ್ತಾ ಇಷ್ಟಿಷ್ಟಾಗಿ ನಾನೂ ಅಳಿದು ಹೋಗುವ, ಸಾಲದ ನಾಳೆಗಳಿಗಾಗಿ ಚಡಪಡಿಸೋ ಉದ್ರಿಕ್ತ ಪ್ರಕ್ರಿಯೆ - ಬದುಕೂ ಸುರತದಂತೆಯೇ ಅಥವಾ ನಿರಂತರ ಸುರತವೇ...
ಹುಣ್ಣಿಮೆಗೆ ಬೆಳುದಿಂಗಳಾಗಿ ಅರಳಿ ಅಮಾವಾಸ್ಯೆಯ ಹೊತ್ತಿಗೆ ಕತ್ತಲೇ ಆಗುವ ಚಂದಿರ - ಅಂತೆಯೇ ಅದೇ ಕತ್ತಲ ಕುಹರದಲೇ ಶಕ್ತಿಯ ತುಂಬಿಕೊಂಡು ಮತ್ತೆ ಆವರ್ತನ...
ಆದರೂ,
ಬದುಕು ಎಷ್ಟೊಳ್ಳೆ ತಾಯ್ಮನದ ಮೇಷ್ಟ್ರು...
ನಿರಂತರ ಸೊನ್ನೆ ಸುತ್ತೋ ನನ್ನಂಥ ಖಡ್ಡ ಮತ್ತು ದಡ್ಡ ಖುಮಾಂಡುವಿಗೂ ತನ್ನಂಗಳದಿ ಆಡಲು ಬಿಡುತ್ತೆ...!!!

ಅವಳು ಅಳು ನುಂಗಿ ಬದುಕ ಊಳುತ್ತಾಳೆ - ಆ ಹೋಳಿಯಲ್ಲಿ ನಾನು ನಗೆಯ ಬಿತ್ತಿಕೊಳ್ಳುತ್ತೇನೆ...
ನೆಲದ ಎದೆ ಬಿರಿಯದೇ ಹಸಿರಿಗೆ ಉಸಿರೆಲ್ಲಿಂದ...
ನಿತ್ಯ ಬಸಿರ ಧರಿಸಿ, ನೋವ ಭರಿಸುವ ಮಣ್ಣಾಳದ ಬೇರಿನ ಶಕ್ತಿಯಲ್ಲಲ್ಲವಾ ಎಲೆಯ ಅಸ್ತಿತ್ವ...
#ಅವಳ_ಗರ್ಭದ_ನಾಡಿ_ನನ್ನ_ಉಸಿರ_ನೆಲೆ...

ಏನೋ ಬೇಕಿದೆ - ಏನೆಂದು ಹುಡುಕಬೇಕಿದೆ...
ಹುದುಗಿರುವ ಒಳ ಹುಯಿಲಿನ ಹೊರೆ ಇಳಿಸಲು...
ನೋವಿನ ಹಾದಿಯ ಕಾಯುವ ಸಾವು - ಸಾವಿನ ಬೇಲಿಗೆ ಹಬ್ಬಿದ ಬಾಳ ಬೀಳು...
ನಿನ್ನಲ್ಲಿ ಅಲೆಯಬೇಕು - ನನ್ನನ್ನು ಕಡೆಯಬೇಕು...
ಇನ್ನೂ ಏನೋ ಪಡೆಯಬೇಕಿದೆ ಮತ್ತದು ಏನೆಂದು ಹುಡುಕಬೇಕಿದೆ...
#ಎಲ್ಲಿಂದ_ಹೇಗೆ_ಯಾವ_ಹಾದಿ...

ಉಮ್ಮಳಿಸುವ ಎದೆಯಿಂದ ನಗೆಯ ಹಿಕ್ಕೆಯ ಹೆಕ್ಕಿ ಹೆಕ್ಕಿ ತಂದು ಜಗಕೆ ಮಾರುವ ಅಜೀಬು ದರ್ದಿನ ದಿನ ಸಂಜೆಗಳು...
ಇರುಳ ಗೂಡಿನಲ್ಲಾದರೂ ಕಣ್ಣ ನೆಲಕೆ ತಾ ಹಸಿಯಾಗಿ ನಿಸೂರಾಗಲು ಬಿಡದ ಗಂಡು ಬಂಡೆತನ...!!
ಕಣ್ಣ ಬೆಳಕಿನಾಚೆಯ ದಾಟು ಬಳ್ಳಿಯ ದಾಟಿ ಬದುಕ ಹಾದಿಯನೇ ಮರೆತವನು...
ಹಂಗಂಗೇ ಫಾಲ್ತು ಫಾಲ್ತು ಮೂರೂ ಮುಕ್ಕಾಲು ದಶಕ...
ಸೋತ ಕಥೆಗಳನೇ ಗೆದ್ದ ಧಾಟಿಯಲಿ ಹಾಡುತ್ತ ನಿನ್ನೆಗಳ ತೆವಳಿದ್ದು...
ಕನಸೇ - ನೀನಿಲ್ಲದೇ, ನಿನ್ನ ಕನಸೂ ಇಲ್ಲದೇ ಇನ್ನೆಷ್ಟು ಹಾದಿಯೋ...
ಕರೆಯಬೇಕಾದವನು ಹೆಸರ ಮರೆತಂತಿದೆ......
#ಆಯಸ್ಸು...

ಉಪಸಂಹಾರ:

ಬೆಳಕಲ್ಲಿ ಎಡಗೈಯ್ಯಲಿ ಎಲ್ಲೋ ಎಡ್ಡಕ್ಕೆತ್ತಿಟ್ಟು ಮರೆತ ಬೆಂಕಿಪೊಟ್ಣವ ಕತ್ತಲಲಿ ಹುಡುಕುತ್ತಾ ಹುಡುಕುತ್ತಾ ಕಳೆದೇ ಹೋಗಿದ್ದೇನೆ - ನನ್ನ(ನ್ನೆ)ದೇ ಮನೆಯಲ್ಲಿ...
ಸರಬರನೆ ಒಳ ಹೊರಗಾಡುವ ಎದೆ ನೋವ ನಿಟ್ಟುಸಿರ ಭೋರು ಗಾಳಿಗೆ ಆರಿ ಹೋದ ನಗೆಯ ನಂದಾದೀಪವ ಮತ್ತೆ ಹಚ್ಚಬೇಕು - ನನಗೆ ನನ್ನ ಮತ್ತೆ ಪರಿಚಯಿಸಿಕೊಳ್ಳಬೇಕು...
#ಈ_ಹೊತ್ತಿನ_ಜರೂರತ್ತು...

ಕಣ್ಣ ಪರಿಧಿಯಾಚೆ ಎಲ್ಲಾ ಹಾದಿಗೂ ಕತ್ತಲೇ ಅಂಟಿಕೊಂಡಿರತ್ತೆ...
ಎದೆಯಲಿಷ್ಟು ಬೆಳಕಿದ್ದು ಅದರ ಕಣ್ಣಿ ಕಳಚಿದ್ದರೆ ಕಣ್ಣ ಹರಹಿನಾಚೆಯೂ ಬೆಳಕ ಕಾಣಬಹುದು ಅಥವಾ ಕಲ್ಪಿಸಬಹುದು...
ಮಣ್ಣ ಹೀರಿ ಬೇರು ಬಲಿತಾಗಲೇ ಹಸಿರಿಗೆ ಬೆಳಕ ಸೀಳಿ ಆಗಸಕೆ ಬೆಳೆವ ಶಕ್ತಿ...
ಹುಟ್ಟು ಹಬ್ಬವಾಗಬೇಕೆಂಬ ಬದುಕಿನ ಮಧ್ಯ ಯುಗದ ಗುಟ್ಟಾದ ಆಸೆಯೊಂದಿದೆ - ನಿನ್ನೆ ನಾಳೆಗಳೆಲ್ಲ ಸಂಭ್ರಮಗಳಾಗಿ, ಬಾಳ ತೇರಿನ ಉತ್ಸವವಾಗಲಿ ಎಂಬ ಕಳ್ಳ ಒಳ ಬಯಕೆ...
ಅದಕೆಂದೇ -
ಎನ್ನಂತರಾತ್ಮನ ಬೇರು ಗಟ್ಟಿಯಾಗಲಿ ಎಂದು ಬಯಸುತ್ತೇನೆ...
ನೋವ ಸೊಲ್ಲನು ಮೀರಿ ಬದುಕ ಬೆಳಕ ಕೊನೇಯ ಹನಿಯನೂ ಮೀಯಬೇಕು - ಜವನೂರ ಬಾಜಾರಿನಲ್ಲಿ ನಗೆಯ ಮುತ್ತು ರತ್ನಗಳ ಮಾರಬೇಕು...
ಹೀಗೇ, ಹಿಂಗಿಂಗೇ ಏನೇನೋ ಆಗಿ ನಾನು ನಾನಾಗಬೇಕು...
ಈ ಹುಟ್ಟು ಬದುಕಿನ ಪಾತಳಿಯಲ್ಲಿ ಹರಡಿ ಹಬ್ಬವಾಗಬೇಕು...
ಬದುಕ ಹಾಡು ಮುಗಿಯಬಾರದು ಬದುಕೇ ಮುಗಿದರೂ...

ವರ್ಷಗಳುರುಳುತ್ತವೆ - ವರ್ಷಗಳಷ್ಟೇ ಉರುಳುತ್ತವೆ...
ಹುಟ್ಟಿನ ತೇದಿಯ ಎಣಿಸಿದರೆ ಎದೆಯಲೊಂದು ವಿಚಿತ್ರ ಆಂದೋಲನ...
ನಿದ್ದೆ ತಿಳಿದೆದ್ದ ಮರು ಘಳಿಗೆ ಚಿರನಿದ್ರೆಯೇ ಇರಬಹುದು ಅನ್ನಿಸಿದರೆ ಬದುಕು ಸೋತಂತೆ ಲೆಕ್ಕವಾ...?
ಗೊತ್ತಿಲ್ಲ...
ನಿದ್ದೆಯ ನಶೆಯ ತಬ್ಬಿಯೇ ಈ ಉಸಿರ ಬಳ್ಳಿಗೆ ಭರ್ತಿ ಮೂವತ್ತರ ಮೇಲೆಂಟು ವಸಂತ...!!!
ಆ ಸಂಜೆಗಳ ಏರಿಗುಂಟ ಹಾಯ್ದು ಬರುವ ನೆನಪ ನೇವರಿಕೆಗಳೆಲ್ಲ ನಾ ಸಾಕಿಕೊಂಡ ಭಂಡ ನಗೆಯ ಭಂಟರೇ...
ನಾಳೆಗಳಲೂ ಉಳಿಯಲಿ, ಉಲಿಯುತಿರಲಿ ಆ ನಗೆಯ ಭಡವರೇ...
ನನಗೆ ನನ್ನದೇ ಶುಭ ಆಶಯವು...
ಶುಭಾಶಯವು...

ಪ್ರತೀಕ್ಷಾ - ಕಪ್ಪು ನೆಲ ನನಗಿತ್ತ ಹಸಿರು ಕನಸು...
ಕಪ್ಪು ಹುಡುಗಿ - ನನ್ನ ಕನಸಿನ ಕಪ್ಪು ನೆಲ...
#ನನ್ನದೆನಿಸದ_ನಾಳೆಗಳಿಗೂ_ನನ್ನ_ಕರೆಯುವ_ಕಳ್ಳ_ಕೊಂಡಿಗಳು...

ಎದೆ ಗುಡಿಯ ನಗೆಯ ನಂದಾದೀಪವ ಮತ್ತೆ ಹಚ್ಚಬೇಕು - ಹಚ್ಚಿಟ್ಟು ಕಾಯ್ದುಕೊಳ್ಳಬೇಕು...
ಅಷ್ಟೇ.......

Tuesday, July 7, 2020

ಗೊಂಚಲು - ಮುನ್ನೂರಾ ನಲವತ್ತು ಮೇಲೊಂದು.....

ಇಂತಿ - ಭಾವ ಬಂಧ ಪುರಾಣ.....

ಆ ಹಾದಿಯಲ್ಲಿ ಹೆಟ್ಟಿದ ಮುಳ್ಳಿನ ನವೆಯ ಅನುಭವದಲ್ಲಿ ಈ ಹಾದಿಯ ಹಾಯುವಾಗ ಚಪ್ಪಲಿ ತೊಟ್ಟು ಹೊರಡುವುದು ಪ್ರಜ್ಞಾವಂತಿಕೆ ಸರಿ...
ಆದ್ರೆ, 
ಹಳೇ ನೋವಿನ ನೆನಪಲ್ಲೇ ಕನಲುತ್ತಿದ್ದು, ನಲಿವು ನಡೆದು ಬರಬಹುದಾದ ಹೊಸ ಹಾದಿಗಳಿಗೆಲ್ಲ ಬೇಲಿಯನೇ ಕಟ್ಟಿ ಕೂರುವ ನನ್ನ ಮನಸಿನ ಬಾಲಿಶತೆಗೆ ಏನನ್ನಲಿ...
ಆ ಹಾದಿಯಲಿನ ಅನುಭವದ ಬೇಸರ, ಕೋಪಗಳನೆಲ್ಲ ಅಲ್ಲಿಗಲ್ಲೇ ಚುಕ್ತಾ ಮಾಡಿಕೊಳ್ಳದೇ, ಅಲ್ಲಿಯ ಅಪಸವ್ಯಗಳನೆಲ್ಲ ಎಳೆತಂದು ಇಲ್ಲಿಯ ಕವಲುಗಳಿಗೂ ಆರೋಪಿಸಿಕೊಂಡು ಈ ದಾರಿಯ ಮೇಲೆ ಪ್ರತೀಕಾರಕ್ಕಿಳಿದಂಗೆ ವರ್ತಿಸುತ್ತಾ, ಮೇಲಿಂದ ನಗೆಯ ಕವಾಟಗಳೆಲ್ಲ ಬಾಗಿಲು ಹಾಕಿ ಕೂತಿವೆ ಎಂದು ಸ್ವಯಂಚಾಲಿತ ಸ್ವಯಂಮರುಕ ಬೇರೆ...
ನನ್ನೆಡೆಗಿನ ಹೊಸ ಹರಿವಿನ ಹಾದಿಗೆ ಅಡ್ಡಲಾಗಿ ನನ್ನೆದೆಯ ಹಳೆ ಕಸಗಳ ಒಡ್ಡು ಕಟ್ಟಿ ಮತ್ತೆ ನಾನೇ ಮೂಗು ಮುಚ್ಚಿ ಅಳುತ್ತೇನೆ - ಜನ್ಮಜಾತ ಮೂರ್ಖತನವಲ್ಲವಾ...
#ಭಾವ_ಬಂಧ_ಸಂಬಂಧ_ಕನಸು_ನಾಳೆ_ಇತ್ಯಾದಿ...
⇜⇞⇟⇝

ಅಲ್ಲೀಗ ಹಸಿವಿಲ್ಲ ಅಥವಾ ನಾನಲ್ಲಿ ಹಳತಾಗಿದ್ದೇನೆ - ಬಿಚ್ಚಿಡದ ಸತ್ಯ...
ಜಗತ್ತು ಸಮಯದ ಮೇಲೆ ಆರೋಪ ಪಟ್ಟಿ ಸಲ್ಲಿಸುತ್ತೆ - ನಂಬಲೇಬೇಕಾದ ಸಬೂಬು...
#ಒಡನಾಟ...
⇜⇞⇟⇝

ಧೈರ್ಯಮಾಡಿ ಒಳಗಡಿಯಿಡಲಷ್ಟೇ ದಾರಿ ಅಲ್ಲಿ... 
ಒಳಗೆಳೆದರೆ ಮುಗೀತು - ಹೊರ ಬರುವುದಾದರೆ ಸತ್ತು ಅಥವಾ ಕಡಿದು ಬಿದ್ದ ತುಂಡುಗಳಷ್ಟೇ..‌. 
ಅದಕೇ ಅದು ಒಳ ಸುಳಿಗಳ ಚಕ್ರವ್ಯೂಹ...
#ಬದುಕು_ಭಾವ_ಬಂಧ_ಸಂಬಂಧ...
⇜⇞⇟⇝

'ನೀವು' 'ತಾವು' ಅಂತ ಪರಿಚಯವಾಗಿ ಕೈಕುಲುಕಿ, 'ನಾನು' 'ನೀನು' ಎಂದು ನಗುವಾಗಿ ಅರಳಿ ಗಲಗಲಿಸಿ, ಮತ್ತೆ ಮರಳಿ ಅದೇ 'ನೀವು' 'ತಾವು' ಆಗಿ ಸುರಕ್ಷಿತ ಅಂತರ ಕಾಯ್ದುಕೊಂಡು ನೆಲೆಯಾಗುವಲ್ಲಿ ಒಂದು ಬಂಧದ ಒಂದು ಆವರ್ತನ ಸಮಾರೋಪ...
ಎದೆಯಲಿನ್ನೂ ಹಳೆಯ ಪ್ರೀತಿ ಗಂಧ ಚೂರು ಅಂಟಿಕೊಂಡಿದ್ದರೆ ಹಳೆಯದೆಲ್ಲ ಮತ್ತೆ ಹೊಸತಾಗಿ ಜೊತೆಯಾಗಬಹುದು - ಹಸಿವಿದ್ದು ಕಾಯುವ ಕಸುವಿದ್ದರೆ ಕಾಯಬಹುದು - ಕಾಯುವ ಕಸುವೇ ಪ್ರೀತಿಯ ಕಾಯುವುದು...
ಬದಲಾವಣೆ ಜಗದ ನಿಯಮವಂತೆ - ಆವರ್ತನ ಕಾಲದ ನೇಮವಂತೆ...
#ಪ್ರೀತಿ_ನೇಹ_ಭಾವ_ಭಕುತಿ_ಇತ್ಯಾದಿ...
⇜⇞⇟⇝

ಒಮ್ಮೆ ಸಿಗ್ಬೇಕು - ಒಂದಿಷ್ಟೇನೋ ಹೇಳೋಕಿದೆ, ಕೇಳಿಸ್ಕೊಳ್ಳೋಕಿದೆ...
ಮತ್ತೆ ಸಿಗೋಣ - ಈಗಿಲ್ಲಿಗೆ ನಿಲ್ಲಿಸಬೇಕಿದೆ, ಇಲ್ಲಾ ಈ ಸಧ್ಯಕ್ಕಿಲ್ಲಿ ನಿಲ್ಲಿಸೋ ತುರ್ತಿದೆ...
ಮತ್ತೆ ಮತ್ತೆ ಸಿಗ್ತಾ ಇರೋಣ  - ಸಹ ಪ್ರಯಾಣ ಹಿತವಾಗಿದೆ...
ಎಲ್ಲಿ, ಹೇಗೆ, ಯಾವಾಗ - ಅವರವರ ಪ್ರಾಪ್ತಿ...
#ಇಂತಿ_ಭಾವ_ಬಂಧ_ಪುರಾಣ...
⇜⇞⇟⇝

ಬಲ ಕೂಡಿಸಿಕೊಂಡು ಹೊರಟು ನಿಂತವರನ್ನ ಬಲವಂತವಾಗಿ ಹಿಡಿದು ನಿಲ್ಲಿಸಿ ಉಳಿಸಿಕೊಂಡೆ ಅಂತ ಬೀಗೋದು ಸಂಸ್ಕಾರ ನೀಡದೇ ಹೆಣ ಕಾಯ್ದಂಗೆ ಅಷ್ಟೇ...
ಕಾರಣ,
'ಭಾವ' ಹೊರಟು ಕಾಲವಾದ ಮೇಲೆಯೇ 'ಹೊರಡೋ ಮಾತು' ಹೊರಳುವುದು, 'ನೆಪ'ವೊಂದು ಕೊಡವಿಕೊಳ್ಳೋ ಕ್ರಿಯೆಯಾಗುವುದು...
ಅರಿವಾಗಬೇಕಾದ್ದು ಇಷ್ಟೇ:
ರೋಗ, ರುಜಿನ, ಆಯಸ್ಸುಗಳೆಲ್ಲ ಬರೀ ಜೀವಕ್ಕಷ್ಟೇ ಅಲ್ಲ ನಮ್ಮೊಳ ಭಾವಕ್ಕೂ ಅನ್ವಯ...
ಕೈಕುಲುಕುವಾಗಿನ ಕಣ್ಣ ಹೊಳಪು, ಕೈಬೀಸುವಾಗಿನ ಕಣ್ಣ ಹನಿ - ನಡುವೆ ಹೆಗಲನಾತು ಹಾಯ್ದ ಹಾದಿಯ ನೆನಪಷ್ಟೇ ನಮ್ಮ ನಿಮ್ಮ ಗಳಿಕೆ, ಉಳಿಕೆ...
ಹಾಗೆಂದೇ,
ಎದೆಯ ಅನುಗೊಳಿಸಿ ವಿದಾಯವ ಸಂಭಾಳಿಸುವುದೊಳಿತು ಹೊರಡಲನುವಾದವರಿಗೆ ಹೊರೆಯಾಗದಂಗೆ - ಸಾಸಿರ ಅಲೆಗಳ ದಂಡೆ ತಾ ಮೌನದಲೇ ನೀಗಿಕೊಂಡಂಗೆ...
#ಸುಡುಗಾಡು_ಬಂಧ_ಸಂಬಂಧ...
⇜⇞⇟⇝

ಕಣ್ಣಾಳಕಿಳಿದಷ್ಟೂ ನಾಲಿಗೆಯ ಜೊಳ್ಳು ಎದೆಯ ಇರಿಯುತ್ತೆ...
ಎದೆಯ ಕಸ ಕಣ್ಣ ಕನ್ನಡಿಯಲ್ಲಿ ಗೊಬ್ರ, ಎದೆಯೊಳಗಣ ಪ್ರೀತಿ ಕಣ್ಣ ಕುಡಿಕೆಯಿಂದ ತುಳುಕೋ ದೃಗ್ಬಾಷ್ಪ...
ನಾಲಿಗೆ ಪ್ರೀತಿಯ ಪಠಿಸುವಾಗ ಕಣ್ಣಲ್ಲಿ ಒಳಗಿನ ಉರಿ ಕಂಡ್ರೆ ಸೆಟೆದು ನಿಲ್ಲಬಹುದೂ - ಆದ್ರೆ ಮೌನ ನಿಷ್ಠುರ ನುಡಿವಾಗ ನೋಟ ಕರುಳ ಪ್ರೀತಿಯ ಸಾರಿಬಿಟ್ಟರೆ ಮಾತ್ರ ಬದುಕು ಚಡಪಡಿಸಿಬಿಡತ್ತೆ...
ಅದಕೆಂದೇ -
ಎನ್ನೊಳಗೊಳಗೆ ಭಾವ ಯುದ್ಧಕೆ ಸಿದ್ಧನಾಗದೇ ಯಾರದೇ ಕಣ್ಣಲ್ಲಿ ಕಣ್ಣಿಡಲಾರೆ...
#ಕಣ್ಬೆಳಕು...
⇜⇞⇟⇝

ಅವರು ಬೇಲಿ ಹಾಕಿ ಜೀವ ಹಿಂಡ್ತಾರೆ ಅಂತ ಅವರಿಂದ ಎದ್ದು ಬಂದದ್ದು...
ಇವರು ಬೇಲಿಯೊಳಗೆ ನಿಲ್ತಾ ಇಲ್ಲ ಅಂತ ಇವರನ್ನು ದೂರ ಮಾಡಿದ್ದು...
ಬಂಧ ತನ್ನದಾಗುವುದೆಂದರೆ ತನ್ನಾಣತಿಯಂತೆ ನಡೆಯುವುದಾ...!?
ಸಂಬಂಧಕೆ ಬೇಲಿ ಹೆಣೆಯುವ ಸಮನ್ವಯ ಯಾವುದು...??
ಬಯಲಿಗೆ ಬೆಳಕಿನ ಬೇಲಿ ಸಾಲದಾ...???
ಬಯಲು, ಬೆಳಕು, ಬೇಲಿ ಎಲ್ಲವೂ ಒಟ್ಟಾಗಿ ಪ್ರೀತಿಯಾದರೆ, ಪ್ರೀತಿಯೇ ಆದರೆ ಆಗದಾ...????
#ಭಾವ_ಬಂಧ_ಅನುಬಂಧ_ಸಂಬಂಧ...
⇜⇞⇟⇝

'ಅವಕಾಶ ಆದಾಗ' ಅನ್ನೋದು ನಂಗೆ ಬೇಕಾದಾಗಷ್ಟೇ ಅನ್ನೋದನ್ನ ಧ್ವನಿಸುವಲ್ಲಿ, ನಿನ್ನ ಬದುಕಿಗೆ ಜೊತೆಯಾಗಿ ಒಂದೆರಡಾದರೂ ಇರಲಿ 'ಅವಕಾಶ ಮಾಡ್ಕೊಂಡು ಮಾತಾಡ್ತೀನಿ' ಅನ್ನೋ ಅಂತ ಆಪ್ತ ಹೃದಯಗಳು...
"ಘಂಟೆಗಳ ಲೆಕ್ಕ ಬೇಡ - ಭಾವ ತೀವ್ರತೆಯ ಸಣ್ಣ ಗುರುತು ಸಾಕು..."
#ಬಂಧ_ಸಂಬಂಧ_ಇತ್ಯಾದಿ...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

ಗೊಂಚಲು - ಮುನ್ನೂರರ ಮೇಲೆ ನಲವತ್ತು.....

ಮದನೋತ್ಸವ ಮೋಹಶಕೆ.....

ಕಾಳಿಂದಿ -
ನಿನ್ನೆಡೆಗಿನ ಹಗಲುಗನಸೊಂದು ಚಂದಿರನೂರಿನ ತಂಬೆಲರ ಮೀಯುತ್ತಾ ನನ್ನ ಮೃತ ಸಂಜೆಗಳನು ಸಂಜೀವಿನಿಯಂತೆ ಸಲಹುತ್ತದೆ...
ಮತ್ತು
ಕಣ್ಮುಚ್ಚಿ ನಿನ್ನ ಇನ್ನಷ್ಟು ಕಾಣುತ್ತೇನೆ...
ನಿನ್ನ ಕಾಣುವಾಟದ ಉನ್ಮತ್ತ ಉತ್ತುಂಗದಲೂ ಕಣ್ಮುಚ್ಚಿ ಸುಖಮತ್ತ ಸಮಾಧಿಸ್ಥನಾಗುತ್ತೇನೆ...
#ನನ್ನ_ಧ್ಯಾನ...
⇴↯⇎↯⇴

ಏನ್ಗೊತ್ತಾ,
ಈ ಆಷಾಢದ ಮಗ್ಗುಲಿನ ದಟ್ಟ ತಂಪಿನ ರಾತ್ರಿಗಳಲಿ ಅಂಗಳದ ಮಣ್ಣ ಘಮ ಉಸಿರಲ್ಲಿ ಚಕ್ರ ಸುಳಿವಾಗ ಥಟ್ಟನೆ ನಿನ್ನ ಕಿವಿ ಹಿಂದಿನ ತಿರುವಿನ ಹೆಣ್ಣು ಕಂಪು ನೆನಪಾಗುತ್ತೆ ನೋಡು...
ಅಲ್ಲಿಂದಾಚೆ ಮೃಗವಾಂಛೆಯ ಒಂದೊಂದೇ ಪುಟಗಳು ಇರುಳ ಗಾಳಿಗದುರಿ ಪಟಪಟಿಸುತ್ತವೆ...
ನಿನ್ನ ಉಡುಗೆ ತೊಡುಗೆ ತೊಡೆದುಹಾಕಿ ಬೆತ್ತಲಾಚೆಯ ಬಹುವಿಧ ಅಲಂಕಾರಗಳ ಕೆಡಿಸಬೇಕು...
ಕಣ್ಣ ಚಮೆಯನು ಕುಂಚವಾಗಿಸಿ ನಿನ್ನ ಎದೆ ಗುಂಬದ ಮೊನಚು ತುದಿಯ ಸುತ್ತಾ ನನ್ನ ನಾನೇ ಬರೆಯಬೇಕು...
ಉಸಿರುಸಿರ ಮಾರುತ ಮೈಯ್ಯ ಆಳ ತೀರಗಳನೆಲ್ಲ ತೀಡಿಯಾಡಿ ಮೈಮರೆಸಬೇಕು...
ನಾ ನಿನ್ನೊಳಿಳಿದು ಜೀವಂತ ಚಿತ್ರವಾಗಬೇಕು - ನಿನ್ನ ಕೂಡೋ ಪರಮ ಪೋಲಿ ಪಾತ್ರವಾಗಬೇಕು...
ಕೇಳು,
"ನಾನು ಬ್ರಹ್ಮ ಬರೆದ ಅಲಂಕಾರಕ್ಕೆ ಬೇಶರತ್ ಸೋತವನು..."
ಹಾಗೆಂದೇ ನಿನ್ನ ಹಾಯೋ ನನ್ನ ಕನಸೆಲ್ಲ ಹಸಿಹಸಿ ಅಂಗಳಕೆ ಬಿದ್ದ ಉನ್ಮತ್ತ ಬಾನು...
#ಮದನೋತ್ಸವ_ಶಕೆ...
⇴↯⇎↯⇴

ಹಂಡೆ ಉರಿ ನೀರ ಮಿಂದು ಬಂದವಳ ಎದೆ ಗೊಂಚಲ ಮೆತ್ತೆಯ ತೀರಗಳಿಂದ ಹೊರಟ ಸೋಪಿನ ಅತ್ತರು ಮೆತ್ತಿದ ಬೆಚ್ಚಾನೆ ಎಳೆ ಬೆವರ ನವಿರು ಕಂಪು ಎನ್ನ ಉಸಿರ ಬಳ್ಳಿಯ ಹಿಡಿದು ನೇರ ನಾಭಿಮೂಲವ ಸೇರಿ ಅಡಿ ಮುಡಿಯ ಊರು ಕೇರಿಗಳಲೆಲ್ಲ ಅಬ್ಬರದ ಕಾಮನ ಹಬ್ಬ...
ಏರಬೇಕಾದ ಉನ್ಮತ್ತ ಉರ ಏರಿ, ಇಳಿಯಬೇಕಾದ ಇರುಕಲ ಮಡು ಆಳ, ಬೆಳಕು ಕತ್ತಲ ಮಡತೆಗಳಲಿ ದಿಕ್ಕು ದೆಸೆಯಿಲ್ಲದೇ ಅಲೆದಲೆದು ದಣಿವ ಕಣ್ಣು, ಮತ್ತೆ ಮತ್ತದೇ ಅಂದಕೆ ಮಣಿದು ಅಂಕೆ ತಪ್ಪುವ ಉಸಿರ ಹೋರು...
ಆಹಾ...
ಸೋಲು ಕೂಡಾ ಅದೆಷ್ಟು ಮಧುರವೋ ಇಲ್ಲಿ - ಹೆಣ್ಣ ಅಸೀಮ ಚೆಲುವಿನ ಸೊಬಗು ಸಿರಿವಂತಿಕೆ ಎದುರಲ್ಲಿ...
ಆ ಬೊಮ್ಮನ ಕುಂಚ ಕೌಶಲಕೆ ಮಾರ ನಮನ...
ಕತ್ತಲಲೂ ಬೆತ್ತಲನು ಅರೆಗಣ್ಣಲ್ಲಿ ಹೀರೋ ತೀವ್ರತಮ ಸಭ್ಯ ನಾನು, ನಡು ಹಗಲ ಸೌಂದರ್ಯ ಸಮರದಿ ಶರಂಪರ ಸೆಣಸಿ ಬೇಶರತ್ ಸೋಲುವಲ್ಲಿ ನಡುಬೀಡು ಪುಡಿ ಪುಡಿ...
#ಆಹ್_ರತಿಸದನ_ಮೋಹಾಘಾತವೇ...
⇴↯⇎↯⇴

ಧೋ ಮಳೆಯೊಂದಿಗೆ ಕಪಿಲೆ ಕರುವಿನ ಘಂಟೆ ದನಿ ಸೇರಿದಂತೆ ಒಳಮನೆಯಲಿ ಆಯಿ ಶಾಂತ ಲಹರಿಯಲಿ ಹರಿನಾಮವ ಗುನುಗುತಿರುವಾಗ ಮೆತ್ತಿ ಯೆಂಚಿನ ಮೂಲೆಯಲಿ ನಿನ್ನ ತುಟಿಯಿಂದ ಕದ್ದ ಏದುಸಿರ ಮುತ್ತಿನ ಪುರಾತನ ಪುಳಕದ ಮೆಲುಕಿನಲಿ ನಾನಿಲ್ಲಿ ತುಂತುರುವಿಗೆ ಎದೆ ತೆರೆದರೆ ನಿನ್ನನ್ನೂ ಮಳೆಯಲಿ ಮೀಯಿಸಿದಂತೆಯೇ ಲೆಕ್ಕ...
ಎಳೆ ಹೆಣ್ಣ ಹೊಳೆ ಭಾವ ಬಸುರಿನ ಅಸ್ಥಿರ ಬಯಕೆಗಳ ವಿಚಿತ್ರ ತಲ್ಲಣದ ಯಾವುದೋ ದ್ಯಾಸದಲಿ ನೀನೊಮ್ಮೆ ಸುಮ್ಮನೆ ಕೂತಲ್ಲೇ ಕಾಲು ಕುಣಿಸಿದರೂ ಆ ಗೆಜ್ಜೆ ಕಿಂಕಿಣಿ ನನ್ನೇ ಕೂಗಿದಂಗೆ ಭಾಸ...
ಮನ್ಸು ಬಯಸಿದ ಅಮೃತ ಘಳಿಗೆಗೆ ಬೆರಳಂಚಿಗೆ ನಾ ಸಿಗದೇ ಹೋದಾಗ ನೀ ನಿನ್ನ ಸುಳ್ಳು ಅಸಹನೆಯ ಗಂಟು ಮುಖದಲ್ಲಿ ನನ್ನ ಹುಡುಕಿಕೊಳ್ಳುವ ಚಡಪಡಿಕೆಯ ಮೋದವ ಸವಿಯಲು ಮತ್ತೆ ಮತ್ತೆ ಕಳೆದೋಗಬೇಕೆನಿಸುತ್ತಿತ್ತಲ್ಲ...
ಸಣ್ಣ ಛಳಿಯ ಮಧ್ಯಸ್ಥಿಕೆಯಲಿ ಆ ಮುನಿಸು ಮುರಿಯುವ ರಾಜೀ ಸೂತ್ರದ ರಮ್ಯ ರಸಿಕ ಕ್ಷಣಗಳ ಬ್ರಹ್ಮ ಲಿಪಿಯ ಶೃಂಗಾರ ಕವಿತೆಗಳನು ವಿರಹ ಕಾಲದಲಿ ಕನ್ನಡಿಯೆದುರಿನ ಬೆತ್ತಲಲಿ ಮತ್ತೆ ಮತ್ತೆ ಓದಿಕೊಳ್ಳುತ್ತೇನೆ...
#ಹ್ಯಾಂಗೆ_ಮಣಿಸೋದು_ಹೇಳು_ಆಜನ್ಮವಿರಹಿಯ_ಪೋಲಿ_ಸಂಜೆಗಳ_ಕಾವನು...
⇴↯⇎↯⇴

ಹನಿ ಗರ್ಭದ ಮೋಡವೇ -
ವಸಂತ ವನ ಪುಷ್ಪದ ಎಸಳಿನಂತೆ ನಗೆಯ ಚಿಗುರು ಬೆರಳಲ್ಲಿ ಇರುಳ ಪಕ್ಕೆಯ ತಿವಿದು ಬೆಳಕಿಗೆ ಕಚಗುಳಿ ಇಡುತೀಯೆ...
ನೀ ಬಿಡಿಸಿ ತಂದ ಪಾರಿಜಾತವ ಉಸಿರ ಬೊಗಸೆಗೆ ಸುರುವಿಕೊಂಡೆ...
ಈಗ ಎದೆಯ ಚೊಬ್ಬೆಯ ತುಂಬಾ ನಿನ್ನದೇ ಕನಸ ಪರಿಮಳ...

ಜೀವದ ಜೀವವೇ -
ಚಂದಿರನೂರಲ್ಲಿ ಹುಣ್ಣಿಮೆ ಹಬ್ಬವಂತೆ...
ಪೆಂಡೆ ಪೆಂಡೆ ನೆನಪು, ಕನಸುಗಳೆಲ್ಲ ಬಾನ್ಬಯಲಿಗೆ ತೋಳ್ದೆರೆದು ದಿವಿನಾಗಿ ಬಿರಿಯುವ ಇಂಥ ಇಳಿ ಸಂಜೆಯ ಹೆಗಲನಾತು ನೀನಿದ್ದರೂ, ಇರದೇ ಹೋದರೂ ಇರುಳ ಜೀವ ವದ್ದೆ ವದ್ದೆ...

ಕೂಸೇ -
ಜೊಂಪೆ ಜೊಂಪೆ ಹೆರಳ ಮಾಲೆಯಲಿ ಎದೆಗೊಂಚಲ ಏರಿಗೆ ತೆರೆ ಕಟ್ಟಿ, ಕಣ್ಣ ಕುಮುದ ಶರದಲೇ ಎನ್ನೆದೆ ಸೀಮೆಯ ನಿರಾಯಾಸದಿ ಗೆದ್ದು ಬಿಂಕದಿ ಬೀಗುವ ನೀನೆಂಬ ನೀ ಚೂರುಪಾರು ಸಿಗುವ ಮುಸ್ಸಂಜೆಗಳ ಅಂಗಳದಲಿ ಗುಮಿಗೂಡೋ ನೆರೆಹೊರೆಯ ಸಂತೆಯನು ಮನಸಾರೆ ಹಳಿಯುತ್ತೇನೆ...
ಕಾರಣ,
ತುಟಿಗಳು ತುಟಿಗಳ ಸೇರಿ ಜೇನೂಡಲು ಹವಣಿಸೋ ಬಿಸಿಯೂಟದಂತ ಹರೆಯ ಹಸಿವಿನ ತೀರಾ ಸಾಮಾನ್ಯ ಮಧುರ ಪಾಪಕೂ ಒಂದು ಸಣ್ಣ ಕಿರುಗತ್ತಲ ಮೂಲೆಯ ಏಕಾಂತವೂ ದಕ್ಕಗೊಡದಂತೆ ಸುತ್ತ ಉರಿವ ಕವಳ ಕುತೂಹಲದ ನೂರು ಕಂಗಳು - ಪ್ರಣಯ ಫಲಿಸದ ಪ್ರೇಮದೆದೆಯಲಿ ಉರಿವ ವಿರಹದ ಹಿಡಿಶಾಪವಿದೆ ಜಂಗುಳಿಗೆ...
#ಅಂಗಳದ_ಹಾಡು_ಹಸೆ...
⇴↯⇎↯⇴

"ಎದೆ ಮಿದುವನಾಳಿ ಗಂಡಸಾಗಬಹುದು, ಗಂಡನೂ ಆಗಬಹುದು; ಹೇಳು, ಎದೆಯ ಭಾವಕೆ ಮಿಡಿಯದವನ ಗೆಳೆಯಾ ಅನ್ನಬಹುದು ಹೇಗೆ..."
ಅವಳಂತಾಳೆ: ಗೆಳೆಯನಾಗಲು ಸೋತ ಗಂಡನೂ ಬರೀ ಗಂಡಸೇ...
ಪಾತ್ರ ಬದಲಾದರೆ ಅವನೂ ಅದನ್ನೇ ಹೇಳ್ತಾನೆ...
ಶಿವ ಶಿವಾ - ಕೃಷ್ಣ ಕೃಷ್ಣಾ...
#ಅಂತಃಪುರದ_ನಿಟ್ಟುಸಿರು...
⇴↯⇎↯⇴

ನಾನು ಕಾಮದೇವನ ತುಂಡು - ನೀನು ಪ್ರೇಮದ ಪೂಜಾರಿ; ಸೇರಿಸಿ ನೊಗವ ಕಟ್ಟಿದ ನಶೆ ಯಾವುದು...? ಬದುಕ ಹೂಳಿದ ನೇಗಿಲ್ಯಾತರದ್ದು...??
#ಬಗೆಹರಿಯದ_ಭಾವಸಖ್ಯದ_ಗಣಿತ...
⇴↯⇎↯⇴

ಕೊಟ್ಟ ಕೊನೇಯ ಕಾಗೆಯೂ ಗೂಡು ಸೇರಿ ನಿರಭ್ರ ಸಂಜೆಯೊಂದು ಇರುಳಿಗೆ ದಾಟುವ ಆತ್ಯಂತಿಕ ಘಳಿಗೆಯಲ್ಲಿ ಸುರಿದು ಕೆಂಪಾದ ಕಣ್ಣನೊರೆಸಿಕೊಳ್ತಾ ನಾನೂ ಬರಿದಾಗಿ ಹಗುರಾದೆ ಅಂದುಕೊಳ್ತೇನೆ...
ಉಹೂಂ...
ಹಾಗಾಗುವುದೇ ಇಲ್ಲ...
ನಿಶಿದ್ಧ ಮೌನವೊಂದು ಹೂಂಗುಟ್ಟಂತೆ ಎದೆ ಪಕ್ಕೆಯ ಗಟ್ಟಿ ಚಿವುಟಿ ಅಲ್ಲಿ ನೀನಿರುವುದನು ತೋರಿಬಿಡುತ್ತದೆ...
ಮತ್ತೆ ಎಲ್ಲ ಎಂದಿನಂತೆ...
ಮನಸಿದು ಎನ್ನದು ಅದದೇ ಭಾರಗಳ ಒಪ್ಪ ಮಾಡಿ ಹೊಸ ಬೆಲೆಯಿಟ್ಟು ಮಾರುವ ಸಂತೆ...
ನೋಡು,
ಈ ಖಾಲಿಯೆಂಬ ಖಾಲಿಯಲ್ಲೂ ಖಾಲಿಯಾಗದ ಎಷ್ಟೆಲ್ಲಾ ಇದೆ...
#ಪಾರಿಜಾತ_ಅರಳೋ_ಹೊತ್ತಾಯ್ತು...
⇴↯⇎↯⇴

ಕೇರಿಯಾಚೆಯ ಪಾಳು ಮನೆಯಲಿ ದೇವರೂ ಇರಬಹುದು - ನಿನ್ನ ಗೆಜ್ಜೆ ಮಂತ್ರ, ಕೊರಳ ಶಂಖದ ಮಾಯೆ ಅಲ್ಲಿಯ ನೆಳಲ ಹಾಸಲಿ ಆಯಾಸ ನೀಗಿಕೊಂಬ ಬಡ ಗೋಪನ ಕಣ್ಣ ಕೊಳಲಲಿ ಕನಸ ರಾಗ ಬಿತ್ತಬಹುದು...
ಇಂಥವೇ -
ನನ್ನದೇ ಹಪ್ಪು ಹಳೇ ಅನಾಥ ಶಬ್ದಗಳ ಅರಿಕೆಗೆ ಹೊಸ ಹುಡುಗಿ ನಿನ್ನ ಕಣ್ಣು ಕಲಮಲಿಸಿದರೆ ಹೊಸದಾಗಿ ಬರೆಯಬಹುದು ಪ್ರಣಯ ಕವಿತೆಯ - ನಿನಗೆಂದೇ, ನಿನ್ನೊಳಿಳಿದು...
ವಸಂತ ನಗುವುದೆಂದರೆ ಹಳೆ ಬೇರು ಹೊಸ ಹೂವ ಹಡೆವುದೂ ಅಲ್ಲವಾ...
ಹೇಳು, ಎದೆಯ ಎಡೆಯಿಟ್ಟು ಮಂಡಿಯೂರಿ ಕೈ ಚಾಚಲಾ...
ಕಂಗಾಲು ಬೈರಾಗಿಯ ಖಾಲಿ ಬೊಗಸೆಯಲ್ಲಿ ಅನುರಾಗದ ಮಳೆಯಾದೇಯಾ...
#ಆಲಾಪ...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

ಗೊಂಚಲು - ಮುನ್ನೂರ್ಮೂವತ್ತೊಂಭತ್ತು.....

ನದಿಯಾಗಬೇಕು.....

ಯೋಗ್ಯನಲ್ಲದವನ ತಪಸ್ಸು ಫಲಿಸಿದರೆ ಅಸ್ತು ಅಂದ ಒಡಲಿಗೇ ಶಾಪವಾಗಿ ಸುತ್ತೀತು... #ಬಂದಳಕ...
↺↹↻

ನಾ ಲಘುವಾಗಿ ಕಣ್ತೆರೆದೆ - ನೀ ಗುರುವಾಗಿ ಬೆಳಕೆರೆದೆ...
ಬದುಕೇ -
ನಾನೆಂಬ ಪ್ರಶ್ನೆಗೆ ನೀನೆಂಬೋ ಬೆರಗು ಉತ್ತರವಾಗಿ ಜವನ ಕೈಯ್ಯಲ್ಲಿ ನನ್ನ ನಗೆಯ ಅಂಕಪಟ್ಟಿ...
#ಗುರು_ನಕ್ಕರೆ_ಹುಣ್ಣಿಮೆ...
↺↹↻

ನಿರಾತಂಕದಲಿ ಜಗಳಾಡುವ ಸ್ವಾತಂತ್ರ್ಯವ ಕೊಟ್ಟು ನೋಡು - ನಿರಂತರ ಪ್ರೀತಿಸುವುದ ಕಲಿಸುತ್ತೇನೆ...
#ಮಾತು...
↺↹↻

ಒಳಗಿಲ್ಲದ ನಗುವನ್ನು ಹೊರತೋರುವ ಹೆಣಗಾಟದಲ್ಲಿ ಒಳಗು ಇನ್ನಷ್ಟು ಬರಡಾಗಿ ಬೀಳು ಬೀಳುತ್ತದೆ...
"ದಯವಿಟ್ಟು ತುಂಬಾ ನಗಿಸಬೇಡಿ - ಎದೆ ಸಡಿಲಾದರೆ ಅಳು ನುಂಗುವುದು ಬಲು ಕಷ್ಟ..."
#ತೆರೆದೇ_ಇರುವ_ಗೂಢ_ಕಂಗಳಲಿ_ಕಲೆಸಿಹೋದ_ಬಣ್ಣಗಳು...
↺↹↻

ಪ್ರಜ್ಞೆಯ ಪೂರ್ಣ ಪ್ರಮಾಣದ ಹುಚ್ಚು, ಇಲ್ಲಾ ಪ್ರಜ್ಞೆಯನು ಬಡಿದು ಮಲಗಿಸಬಲ್ಲ ಹುಚ್ಚುಚ್ಚೆನಿಸೋ ಮಧುರ ನಶೆ ಇವೆರಡೇ ತಾನೆ ಮೈಮನದ ನೋವಿನ ಜಡ್ಡನು ಅಲ್ಲಲ್ಲೇ ಮರೆಸೋಕಿರೋ ಮದ್ದು...
#ಎದೆಯ_ಗಾಯ_ಮಿದುಳ_ತಲುಪಬಾರದು...
↺↹↻

ಅಕ್ಷರಕಕ್ಷರ ಉಜ್ಜಿ ಪದ ಪಾದ ಭಾವದ ಕಿಡಿ ಹೊತ್ತಿ - ಅಂತರಂಗವ ಹೂಳಿ ಚೈತನ್ಯದ ಬೀಜವ ಬಿತ್ತಿ - ವ್ಯಾಸಪೀಠವನಾತು ಮೌನದೆ ಕುಳಿತಿತ್ತು ಹೊತ್ತಿಗೆ...
#ಪುಸ್ತಕ: ಬಯಲಿಗೆ ಬಿದ್ದ ಎದೆಯ ಬೆಳಕು...
↺↹↻

ನೋಡಿದ್ದು ಯಾರು ಎಂಬುದರ ಮೇಲೆ ನೋಟದ ಗುಣ, ಪರಿಣಾಮಗಳ ನಿರ್ಧಾರ...
#ಸ್ವಭಾವ... #ರುಚಿ...
↺↹↻

ನಿನ್ನ ಬಗ್ಗೆ ಹೇಳೋ ಅಂದಳು...
ಭಯವಾಯಿತು - ಪ್ರಶ್ನೆ ಪತ್ರಿಕೆ ಎದುರಿನ ದಡ್ಡ ಹುಡುಗನ ಖಾಲಿತನ, ಸಾವಿನೆದುರಿನ ಸುಸ್ತು...
ಏಸು ಜನುಮ ಓದಿದರೆ ನನಗೆ ನಾನು ತಿಳಿದೇನು - ಒಳಗು ಬೆಳಗಾದಲ್ಲಿಗೆಲ್ಲ ಮುಕ್ತ ಮುಕ್ತ ಅಲ್ಲವಾ...?

ಹೋಗ್ಲೀ ನನ್ ಬಗ್ಗೆ ಆದ್ರೂ ಹೇಳೂ ಅಂದ್ಲು...
ಭಯಂಕರ ತಳಮಳ ನನ್ನೊಳಗೆ - ಯಾವುದೋ ದ್ಯಾಸದಲಿ ಸಿಗರೇಟಿನ ಬೆಂಕಿಯನು ಬುಡಮಟ್ಟ ಜಗ್ಗಿ ಉಸಿರ ಜೊತೆ ತುಟಿ ಸುಟ್ಟಾಗಿನ ಕಕ್ಕಾಬಿಕ್ಕಿ, ಮೊದಲ ಹಸ್ತ ಮೈಥುನದ ಪಾಪ ಭೀತಿ...
ಅಪರಿಚಿತತೆಯೇ ಸೆಳೆತವ ಕಾಯುವುದಲ್ಲವಾ - ಎಲ್ಲ ತಿಳಿದರೆ ನೀನೆಂಬ ಬೆರಗೆಲ್ಲಿಯದು...?

ನಮ್ಮ ಬಗ್ಗೆ ಅನ್ನೋದೀಗವಳ ಕಣ್ಣ ಪ್ರಶ್ನೆ...
"ಬೆತ್ತಲು ಕೂಡಾ ಒಂದಿನಿತು ಕತ್ತಲನು ಉಳಿಸಿಕೊಂಡಿರುತ್ತದೆ..."
ಬದುಕಿನ್ನೆಷ್ಟೋ, ಸಾವು ಇನ್ಹೇಗೋ - ಬಯಲು ಕೂಡಾ ಕಣ್ಣ ವ್ಯಾಸದಷ್ಟೇ ಬಯಲಾಗುವುದು - ಇನ್ನು ನೀನು, ನಾನು...?
ಎಲ್ಲ ಅರ್ಧಂಬರ್ಧ ಮತ್ತು ಈ ಅರೆಬರೆಯೇ ಚಂದ ಅಲ್ಲವಾ...?
'ನಾನು' 'ನೀನು' ಕೂಡಿ ಪೂರ್ಣವಾದೆವು ಅನ್ನೋ ಜೊಳ್ಳು ಪ್ರಭಾವಳಿ 'ನಾವಲ್ಲ' - ಪ್ರಾಮಾಣಿಕ 'ನಾನು' 'ನೀನು' ಹಂಗಂಗೇ ಇದ್ದಂಗೇ 'ಜೊತೆ ನಡೆಯುವ' ಸಹಜ ಸೊಬಗಿನ ಪಯಣ 'ನಾವು...'

ನನ್ನ ತಿಳುವಳಿಕೆ ಇಷ್ಟೇ ಕಣೇ:
"ಹರಿದಲ್ಲೆಲ್ಲ ಹನಿ ಪ್ರೀತಿಯ ಪಸೆ ಉಳಿಸಬೇಕು - ನದಿಯಾಗಬೇಕು..."
ಅಲೆಯ ಹೋರು - ದಡದ ಮೌನ - ಬದುಕ ಶ್ರೀಮಂತಿಕೆ...
ಸಾವು ಕೂಡಾ ತಡೆಯಲಾಗದ ಹರಿವು ಪ್ರೀತಿಯೊಂದೇ ಇದ್ದೀತಲ್ಲವಾ - ಉಹುಂ, ಆ ಅರಿವು ಪ್ರೀತಿಯೊಂದೇ ಆಗಿರಬೇಕು ಅಲ್ಲವಾ...
ಅರ್ಥ ಅನರ್ಥಗಳ ಹಂಗನಳಿದು ಹರಿದರಾಗದೇ ಸುಮ್ಮನೇ - ಸಲಿಲದ ಹನಿ ಹನಿ ಹರಿದಂತೆ ಮೆಲ್ಲನೆ; ಸಾಗರಕಿಷ್ಟು, ಮೋಡಕ್ಕಿಷ್ಟು...

ನಸು ನಗೆಯ ಉತ್ತರ ಈಗ ಅವಳು - ಬೆಸೆದು ಜನುಮದ ಬೆರಳಿಗೆ ಬೆರಳು...
#ಈಹೊತ್ತಿಗೆ_ಇಂತಿಷ್ಟು...
↺↹↻

ಎಲ್ಲಾ ಮರೆವಾಗೋ ವರವಾಗಿ ಬಾ...
#ನಿದ್ದೆ...
↺↹↻

ಅಂದಿನಂತೇಯೇ, ಅಂದಿನಷ್ಟೇ ಇಂದೂ ಪ್ರೀತಿಸ್ತೇನೆ ಗೊತ್ತಾ...?!
ಅರೇ, ಅಲ್ಲೇ ನಿಂತುಹೋದೆಯಾ - ಅಲ್ಲಿಂದಿಲ್ಲಿಗಿಷ್ಟು ಬೆಳೆಯಬೇಕಿತ್ತಲ್ಲವಾ - ಬೇರನಿಷ್ಟು ಆಳಕಿಳಿಸಿ, ಗೆಲ್ಲುಗಳ ಅಗಲಗಲಿಸಿ...
ನಿಂತು ಮಲೆತದ್ದಾ, ಹರಿದು ಕಲೆತದ್ದಾ ಅಂದರೆ ಹರಿವನ್ನೇ ಬೆರಗಿನಿಂದ, ಬೆಡಗಿನಿಂದ ತಬ್ಬುತ್ತೇನೆ...
"ಹಕ್ಕಿಯ ಚೆಲುವನು ರೆಕ್ಕೆಯ ಸ್ವಾತಂತ್ರ್ಯದಲ್ಲಿ ಕಾಣು - ದಾರಿ ನೆಳಲಿನೆಡೆಗೆ ಹಾಯುವುದು..."
#ಪ್ರೀತಿ_ಬೇಡಿಯಲ್ಲ_ಬಯಲ_ಬೆಳಕು...

ನಿನ್ನೊಂದಿಗೆ ಗುದ್ದಾಡಿ ಗೆದ್ದಾಗಲೆಲ್ಲ ಮತ್ತೆ ಮತ್ತೆ ಸತ್ತಿದ್ದೇನೆ ಒಳಗೇ - ಸೋತ ಮುಹೂರ್ತವಿದೆಯಲ್ಲ ಅದು ಮಾತ್ರ ಚೂರು ಜೀವಿಸಿದ್ದಕ್ಕೆ ದೊಡ್ಡ ಸಾಕ್ಷಿ...
#ಹರಿಯುವುದೆಂದರೆ...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

Sunday, June 7, 2020

ಗೊಂಚಲು - ಮುನ್ನೂರ್ಮೂವತ್ತೆಂಟು.....

ನೀನೊಂದು ನಗೆಯ ನಶೆ.....

ಬೇಸಿಗೆಯಂಚಿನ ಮಳೆಯಂಥ ಚಂಚಲೇ -
ನಾಭಿಯಿಂದ ಉಕ್ಕಿ ಬಂದ ಬಿಸಿಯುಸಿರು ಒಂಟೊಂಟಿ ಹೊರಳುವ ಪ್ರತಿ ಆವರ್ತಕೂ ನನ್ನ ಒರಟು ಬೆನ್ನ ಮೇಲೆ ನಿನ್ನ ಉಗುರಿನ ಉನ್ಮಾದದ ಒಂದಾದರೂ ಸ್ಪಷ್ಟ ಗುರುತು ಉಳಿಯದೇ ಬದುಕೇ ಮುಗಿದು ಹೋದರೆ ಅಂತ ದಿಗಿಲು ತುಂಬ್ತದೆ...
ಸಿಡಿಸಿಡಿ ಮುನಿಸಿನಂತ ಆಡ್ಮಳೆಯ ಹಾದಿಯಲ್ಲಾದರೂ ಸಿಗಬಾರದೇ - ಮಣ್ಣ ಘಮ, ಸುಖದ ಕಂಪು ಕೂಡಿಯಾಡಲಿ...
ಮುಂಗಾರಿನ ಕನಸಿನ ಹಾದಿಯ ಸಂಜೆಗಳಲಿ ಹಿಡಿಯಷ್ಟು ಕಳ್ಳ ಪ್ರೇಮ ಮುಡಿ ಬಿಚ್ಚಿ ವಿರಹವ ಸುಡುವ ಮಧುರ ಪಾಪಕೆ ಪ್ರಕೃತಿ ನ್ಯಾಯದಲಿ ಮಾಫಿ ಸಿಗಲೆಂದು ಮದನ ಹರಸಿದ್ದಾಗಿದೆ...
ಚೂರೇಚೂರು ಸಹಕರಿಸು - ಮೈಯ್ಯ ಕತ್ತಲ ರೋಮಗಳೆಲ್ಲ ಅಮೃತ ಕುಡಿಯಲಿ...
ಹಿಂಗಾರಿನ ಕಳವಳದ ಮೌನದಂತೆ ನಿನ್ನ ಮೈಕಣಿವೆಗಳಲಿ ಕಳೆದೇ ಹೋಗುವುದೊಂದು ಸಣ್ಣ ಬಯಕೆ...
#ಈ_ಮಳೆ_ಸಾಲಿನ_ಚೂರು_ಪೋಲಿ_ಕನಸು..
↘↙←↔→↘↙

ಸುರತದಿ ಮಿಂದ ಎರಡು ಮತ್ತ ದೇಹಗಳು ಇನ್ನೂ ಮುಗಿಯದ ನಶೆಯಲ್ಲಿ ಹಂಗಂಗೇ ಮೈಯ್ಯೊಣಗಿಸಿಕೊಳ್ಳುವಾಗ ಬೆಳಕಿಗೆ ನಾಚಿಕೆ, ಗಾಳಿಗೆ ಸಿಹಿ ಕಂಪನ...
ಕಾಲನೂ ಮನಸೋತು ನಿಂತಂತೆನಿಸುತಿದ್ದ ಆ ಹೊತ್ತು - ಎರಡು ದಿವ್ಯ ಪ್ರಣಯೋತ್ಸವಗಳ ನಡುವಿನ ಹಗೂರತೆಯ "ಆ ಅಸ್ತವ್ಯಸ್ತ ವಿರಾಮ" ಬಿಡದೇ ನೆನಪಾಗುತಿದೆ...
ಮದವೆತ್ತ ಮೋಹ ಮೈದಣಿದು ಮೈಮರೆಯುವ ಪ್ರತಿ ಬಾರಿಯೂ ಹೊಸತೇ ಆಗಿ ಪರಿಚಯಿಸಿಕೊಳ್ಳೋ ಆ ಬೆತ್ತಲೆ ತಿರುವುಗಳ ಮತ್ತೊಂದು ಭೇಟಿಯ ಕನಸಾಗುತಿದೆ...
#ರತಿರಾಗ_ರಜನಿ...
↘↙←↔→↘↙

ಎಲ್ಲೋ ನೋಡುತ್ತಾ ಅಂಥದ್ದೇನೂ ಇಲ್ಲ ಅನ್ನುವಲ್ಲೇ ಏನನ್ನೋ ಕೆಣಕಿ, ಗೊತ್ತೇ ಆಗದಂಗೆ ಏನೋ ಒಂದಾಗಿ ಹುಟ್ಟಿ ಬಿಡುವ ವಿಚಿತ್ರ ಸಾಧ್ಯತೆ ನೀನು...
#ಮೋಹ...
↘↙←↔→↘↙

ಮಳೆ ಪರಿಚಯಿಸಿದ ಕವಿತೆ ನೀನು - ಹಾಯ್ದಲ್ಲೆಲ್ಲ ನಗೆಯ ಹಸಿರು ಕಾನು...
#ಪ್ರೀತಿ...
↘↙←↔→↘↙

"ಕಾಯುವ ಸುಖ" - ನಿನಗಾಗಿ ಮತ್ತು ನಿನ್ನಿಂದ...
#ಬೇರೆಬೇರೆ_ದಿವ್ಯ_ಮಜಲುಗಳು...
↘↙←↔→↘↙

ಬದುಕಿನ ಚಂದ ಇನಾಮಾಗಿ ಸಾವಿಗಾದರೂ ನಿನ್ನ ತೋಳ ಸುಖಸಖ್ಯ ಸಿಕ್ಕುವಂತಿದ್ದಿದ್ದರೆ......
#ಇರುಳ_ದಹಿಸುವ_ಕನಸು_ನೀನು...
↘↙←↔→↘↙

ನಾ ನಿತ್ಯ ಅಲೆಯುವ ಅಪರಿಚಿತ ದಾರಿ...
#ನಿನ್ನ_ಪ್ರೇಮ...

ನಿನ್ನ ಅಬೋಧ ಬಿಡುಗಣ್ಣು ನನ್ನ ಎದೆ ನೆಲವ ಹೂಡಿ ಬೊಗಸೆ ಬೊಗಸೆ ಕನಸ ಬೀಜವ ಬಿತ್ತುವ ಬೆಡಗನ್ನು ಬೆಳಕಿಗೆ ಯಾವ ಮಾತಲ್ಲಿ ಹೇಗೆ ಹೇಳಲಿ ಸಖೀ...
#ನೀನೊಂದು_ನಗೆಯ_ನಶೆ...

ಕಳೆದೋಗಬೇಕು ನಿನ್ನೊಂದಿಗೆ - ಕಳೆದೇ ಹೋಗಬೇಕು ನಿನ್ನಲ್ಲಿ - ಘಮ್ಮೆಂದು ಝುಮ್ಮೆನಿಸೋ ನಿನ್ನಂದದ ಬಳಸು ತಿರುವುಗಳ ತಿಳಿಗತ್ತಲ ಅಪರಿಚಿತ ದಾರಿಯಲಿ...
#ಪರವಶ...

ಸ್ವಪ್ನದಲ್ಲೂ ಸಭ್ಯನಾಗೋ ಪಾಪ ಏತಕೆ - ಹರೆಯವನ್ನೂ ಒಂಟಿ ಕೊಲ್ಲಲೇಕೇ ಗೋಪಿಕೆ...
#ಬೃಂಗದ_ಬೃಂದಾವನದ_ಹಸಿವು...

ಸಾವಿನಷ್ಟೆ ಸನಿಹ ನೀನು, ಅಷ್ಟೇ ದೂರವೂ...
#ಕನಸು...

ಆ ಹಾದಿಯ ಪ್ರತಿ ಸೋಲೂ ಉತ್ಕಟ ಜೀವೋದ್ರೇಕದಲ್ಲಿನ ಭಾವಸಮಾಧಿಗೆ ಸಾಕ್ಷಿ ಹೇಳುತ್ತದೆ - ನಿನ್ನ ತೋಳಲ್ಲಿ ಕರಗಿ ಕಳೆದೋದಷ್ಟೂ ಸುಖದ ಕಣಜ ತುಂಬಿ ಬರುತ್ತದೆ...
#ಪ್ರೇಮ_ಕಾಮ...

ನಿನ್ನ ಚಂದವೆಂದರೆ ನನ್ನ ಕಣ್ಣು ತೋರುವ ನಿನ್ನ ಚಿತ್ರವಷ್ಟೇ ಅಲ್ಲ - ಅದು ಎನ್ನೆದೆಯು ತುಂಬಿಕೊಂಡು ನಿನ್ನ  ಮುಟ್ಟುವ ಭಾವಗೀತೆ...
#ಕರಿಮೋಡ...
↘↙←↔→↘↙

ತನ್ನದೆಂದು ತಾ ಆಯ್ದುಕೊಂಡ ಜೀವ ತನ್ನಂದಕೆ ಕಣ್ಣರಳಿಸಲಿ ಎಂಬ ಒಳ ಆಸೆಯಲಿ ತನ್ನ ತಾ ಅಲಂಕರಿಸಿಕೊಂಡು ಸುತ್ತ ಸುಳಿಯುವ ಹೆಣ್ತನಕೆ - ಕಣ್ಣರಳಿದರೆ ಸುಳ್ಳು ಬಿಂಕದಲಿ ಸೊಂಟ ತಿರುವಿ, ಮೂಗು ಮುರಿದು, ಎದೆ ಬಿರಿಯೆ ಗೆಲುವ ಸಂಭ್ರಮಿಸೋ ಮರಳುತನಕೆ - ತನಗಾಗಿ ಕಣ್ಣರಳುವ ಹಂಬಲು ಇವನಲಿನ್ನೂ ಜೀವಂತವಿದೆಯಾ ಎಂದು ಮತ್ತೆ ಮತ್ತೆ ಪರೀಕ್ಷೆಗೊಳಪಡಿಸುತ್ತಲೇ ಇರುವ ಮಗುತನಕೆ - ತನ್ನನು ತಾನು ಹಚ್ಚಿಕೊಂಡಷ್ಟೇ ಅವನೂ ತನ್ನ ನೆಚ್ಚಿಕೊಳಲೆಂದು ಬಯಸೋ ಅಖಂಡ ಭೋಳೆತನಕೆ ಅವಳೆಂದು ಹೆಸರು...
ಗಂಡು ಬೇಕೂಫ ನಾನು ಅವಳ ಇಂತೆಲ್ಲಾ ಸಣ್ಣ ಸಣ್ಣ ಹಿಗ್ಗಿನ ಖಯಾಲಿಗಳ ತುಂಟು ನೇಹದಲಿ ಪಾಸಾಗುತಿದ್ದಷ್ಟೂ ಕಾಲ ಬದುಕು ಚಂದ ಚಂದ ಅವಳಿಂದ...
#ಅವಳೆಂದರೇ_ಮಾಧುರ್ಯ...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

ಗೊಂಚಲು - ಮುನ್ನೂರ್ಮೂವತ್ತೇಳು.....

ಸನ್ನಿಧಾನ.....

ಅನ್ನ ಕಲೆಸಿ ತುತ್ತನಿಟ್ಟು - ಊಟ ಚೆಲ್ಲಿದಾಗ ಪೆಟ್ಟು ಕೊಟ್ಟು - ಹೆಳವನ ಕಣ್ಣಲ್ಲೂ ರಾಜಕುಮಾರನ ಕನಸ ನೆಟ್ಟು - ಕಡಗೋಲಲಿ ಬದುಕ ಕಡೆಯುತಾಳೆ...
ನಾ ಸೋತು ಮಂಡಿಯೂರಿದಾಗಲೆಲ್ಲ ಭರವಸೆಯ ಹೊಸ ಲಾಲಿ ಕಟ್ಟುವವಳು - ಕರುಳ ಬಳ್ಳಿಯ ಹಿಳ್ಳು ನಾ ಹಸಿವೂ ಅಂದ್ರೆ ತಾ ಸೋತಂತೆ ಕಣ್ತುಂಬಿ ಕನಲುವಳು; "ಉದರದಲ್ಲಿ ರುದಯ ಸಾಕಿಕೊಂಡವಳು..."
ಬೆವರು ಅನ್ನವಾಗುವ ಕಥೆಯಲ್ಲಿ ಬದುಕಿನ ಗೆಲುವಿನ ನಂಬಿಕೆ ಮಡಗಿದವಳು - ಸೆರಗಿನಲ್ಲಿ ಕಣ್ಹನಿಯ ಸಾಗರವ ಬಂಧಿಸಿಟ್ಟವಳು - ಈ ಬದುಕಿಗಿರುವ ಮೊದಲ ಹಾಗೂ ಕೊನೇಯ ಏಕಮಾತ್ರ ಉದ್ದೇಶ ಅವಳು...
#ಆಯಿ...

"ಕಂದನ ಹಸಿವನು ನೆನೆದು ಗೊಲ್ಲತಿ ಕೋಟೆಯ ಹಾರಿದ ಸಾಹಸಗಾಥೆ - ಹಡೆದಬ್ಬೆಯ ಕರುಳ ಕಥೆ..."
#ಎದೆಹಾಲಿನ_ಪದ...

ಬದುಕು ಕೈಸೋತು ಕಣ್ಣ ಮಳೆ ಮಣ್ಣ ಸೇರುವಂತಾದಾಗಲೆಲ್ಲ ಬೊಗಸೆ ಕಾರುಣ್ಯದ ಮಡಿಲ ಹರವಿ ರಟ್ಟೆಗೆ ಮತ್ತೆ ಮತ್ತೆ ನಗುವ ಬಲ ತುಂಬೋ ವಿನಾಕಾರಣದ ಮಮತೆಯ ಸಾಟಿ ಮನಸುಗಳೂ ಅಮ್ಮನದೇ ಪಡಿಯಚ್ಚು...
#ಪ್ರೀತಿ_ಜಗದಬ್ಬೆ...

"ಯಶೋಧೆ ಊಡಿದ ಅಮೃತ ಲೋಕದ ವಿಷವ ತೊಳೆದ ಕಥೆ - ಕೃಷ್ಣ..."
#ಬೆಣ್ಣೆ_ತೇಲಿದ_ಹದ...

ಜಗದೆಲ್ಲ ದೇವಕಿ, ಯಶೋಧೆಯರಿಗೆ ಕೆನ್ನೆಗೆ ಕೆನ್ನೆ ತಾಕಿಸಿ ಮನವ ತಟ್ಟಿ ತಟ್ಟಿ ಮಾಡಿ ಹೇಳಬೇಕಿದೆ ನಾನು - ಪ್ರತಿ ದಿನವೂ ನಿಮ್ಮದೇ, ನಿಮಗೆ ನನ್ನದೂ ಚೂರು ಪ್ರೀತಿ ಪ್ರೀತಿ ಮತ್ತು ಪ್ರೀತಿ ಅಷ್ಟೇ...
↺⇋⇈⇌↻

ನೀನಲ್ಲಿ ಅಳು ನುಂಗಿ ನಕ್ಕಾಗಲೆಲ್ಲ ನಾನಿಲ್ಲಿ ಇಷ್ಟಿಷ್ಟೇ ಕೊಳೆಯುತ್ತೇನೆ - ಆದರೂ, ತಲೆಗೇರಿದ ಬದುಕಿನ ನಶೆಯಲ್ಲಿ ನಿನ್ನಿಂದ ಇನ್ನಷ್ಟು ದೂರ ನಿಲ್ಲುತ್ತೇನೆ - ಮತ್ತು ಒಳಗಿನ ಸ್ವಾರ್ಥಕ್ಕೆ ಕಾಲನ ಹೆಸರಿಟ್ಟು ಕೈತೊಳೆದುಕೊಳ್ತೇನೆ - ಸಾವಿನ ಛತ್ರದಡಿಯಲಿ ಎಲ್ಲವೂ ಒಂದಿನ ಮುಗಿಯುತ್ತದೆ, ಮುಗಿಯಲೇಬೇಕು ಎಂಬ ರಣ ವೇದಾಂತ ಇಬ್ಬರನೂ ಕಾಯುತ್ತದೆ - ಹಾಗೇ ಇದೆಲ್ಲ ನಾಳೆಗೂ ಮುಂದುವರಿಯುತ್ತದೆ ಇಂದಿನಂತೆ...
ಒಣ ಒಣ ನಗೆಯೊಂದನು ಸಾಕಲು ಅಪರಂಪಾರ ಗುದ್ದಾಟ - ನೀನಲ್ಲಿ, ನಾನಿಲ್ಲಿ...
ಸಜೀವ ಶ್ರದ್ಧಾಂಜಲಿ...
ಗೊತ್ತು, ನಾಳೆಯೆಂಬೋದು ಕನಸು - ಆದರೂ ನಿನ್ನೆಯು ಇಂದನ್ನು ಕಂಡ ಧೈರ್ಯದಲಿ ನಿದ್ದೆಗೆ ಕರೆಯುತ್ತೆ ಮನಸು - ಅಪರಾತ್ರೀಲಿ ಆ ನಾಳಿನ ಸ್ವಪ್ನಕೆ ಬೆಚ್ಚಿ ಎಚ್ಚರಾದರೆ ಮತ್ತೆ ನಿನ್ನನೇ ನೆನೆಯುತ್ತೇನೆ - ಕಾರಣ, ನಿನ್ನ ಅಳು ನುಂಗಿದ ನಗುವಿದೆಯಲ್ಲ ಅದರಲ್ಲಿ ರಕ್ಕಸ ಬಲವಿದೆ ಉಳಿದ ಬದುಕಿನದು...
ಉಸಿರ ಭಾರದ ಭರವಸೆ...
#ವಿಪರೀತಗಳು...
↺⇋⇈⇌↻

ಮನವು ಹದಗೆಟ್ಟು ಹರತಾಳಕೆ ಕುಂತಾಗಲೂ, ಖುಷಿಯು ಕುಪ್ಪಳಿಸಿ ಕುಣಿದಾಡುವಾಗಲೂ ನನ್ನ ನಾ ಸಂಭಾಳಿಸಿಕೊಳ್ಳಲು ಏಕಾಂತವೆಂಬೋದು ದಿವ್ಯ ಸನ್ನಿಧಿ...
ಮತ್ತು
ನನ್ನ ಏಕಾಂತವೆಂದರೆ ನೀ ಕುಚ್ಚು ತಟ್ಟುವ ಲಾಲಿಯ ಗುಂಜಾರವದ ಅನುಭಾವ ಸಿದ್ಧಿ...
#ಸನ್ನಿಧಾನ...

ನಿನ್ನೆಗಳ ಹಳಿಯಬೇಡಿ - ಅದು ಅವಳಿದ್ದ ಹಾದಿ...
ಆ ನೆನಪ ಜೀವಂತ ಚಿತ್ರಗಳನೆಲ್ಲ ಎದೆ ಗೋಡೆಗೆ ಅಂಟಿಸಿಕೊಂಡು ಅಲ್ಲೇ ಎದುರು ಕೂತು ಕಳೆದೋಗಿದ್ದೇನೆ...
ದಯವಿಟ್ಟು ಹುಡುಕಬೇಡಿ ನಾ ಅವಳ ಮಡಿಲಲ್ಲಿದ್ದೇನೆ...
#ನೆನಪು_ಬೆಚ್ಚಾನೆ_ಬೆಳಕು...
#ಅವಳೆಂದರೆ_ಹಾಯ್ದುಬಂದ_ತಂಪುಹಾದಿ...
↺⇋⇈⇌↻

ದ್ಯಾವ್ ಭಟ್ರ ಪಂಚಾಂಗದಲ್ಲಿ ಮುಹೂರ್ತವೇ ಇಲ್ಲ...
ಇನ್ನು ಒಕ್ಕಣ್ಣ ಶುಕ್ರಾಚಾರಿ ಶುಭ ನುಡಿದರೆ ರಕ್ಕಸ ಗಣಗಳು ಮೆರೀತಾವೆ...
ಒಟ್ನಲ್ಲಿ ನಿನ್ನ ಸೇರುವ ಹಂಬಲಿನ ಹಾದಿಯಲಿ ಅಂಬಲಿಗೂ ತತ್ವಾರ ಎಂಬ ಸ್ಥಿತಿ...
ಸಾಗರನ ಕನಸುವ ಕಾನನದ ಒರತೆಯ ಹಿಳ್ಳುಗಳಿಗೆ ಗ್ರೀಷ್ಮದಲೂ ಉಕ್ಕುವ ಬಲ ಬೇಕು...
ಹೆಳವ ನಾನು, ಕೂತಲ್ಲೇ ನಿನ್ನ ಕನವರಿಸುತ್ತೇನೆ; ಮತ್ತದನು ಕನಸೂ ಅಂತ ಕರೀತೇನೆ...
ಅನಾಥ ಪ್ರೇತವೊಂದು ಇರುಳ ಉದ್ದ ಅಳೆಯುವಂತೆ ನಿನ್ನ ಕನವರಿಸೋ ನನ್ನ ಕನಸು...
#ಬರಗೆಟ್ಟ_ಬದುಕಿಗೆ_ಮೌನ_ಸದ್ಗತಿ...
↺⇋⇈⇌↻

ಸಂಜೆ ಮಳೆ ಸಣ್ಣಗೆ ನೆಲದ ಬಾಗಿಲು ಬಡೀತಿದೆ - ಮನಮನೆಯ ಕಿಡಕಿಗೆ ನೆನಪುಗಳ ಶಿಗ್ರಣಿ ಹೊಡೀತಿದೆ...
ಇಂದು ನಾಳೆಗಳಲ್ಲಿ ನೀನಿಲ್ಲದ ಭಾರಕ್ಕೆ ಭಾವದ ಹೆಗಲು ಕುಸಿಯುವಾಗ ಎದೆ ವಾಡೆಯ ಕಿಬ್ಬಿಯಲಿ ಕಣ್ಣ ಹನಿ ಕಾಲ್ಚಾಚಿ ಕೂರುತ್ತದೆ...
ಶರಧಿಯ ಬಯಲಲ್ಲಿ ಕಳೆದೋದ ಹಾಯಿಲ್ಲದ ದೋಣಿಯ ದಡದಾಸೆಗೆ ನಕ್ಷತ್ರವೇ ತುಸು ಭರವಸೆ...
ಇಲ್ಲಿಂದ ಎದ್ದು ಹೋದ ಎದೆಯ ಪ್ರೀತಿ ಕಿಡಿಗಳೆಲ್ಲ ನಕ್ಷತ್ರವೇ ಆಗುವುದಂತೆ - ಅಮ್ಮ ಹೇಳಿದ್ದು...
ಮಳೆ ನಿಂತ ಆಗಸವ ತಲೆ ಎತ್ತಿ ನೋಡಿದ್ರೆ ಎಷ್ಟೆಲ್ಲಾ ಜನ...!!!
ಕವಳಾ ಜಗಿಯವ್ವು, ಕಂಬ್ಳಿ ಕರೆ ಕಟ್ಟವ್ವು, ತುಂಬು ಮುಡಿ ಕಟ್ಟತಾ ರಾಮಾ ಶಿವಾ ಹೇಳವ್ವು...
ಗಗನದ ಅಸೀಮ ನೀಲಿಯ ಫಳಫಳ ಅಲಂಕಾರ ದೀಪಗಳು - ಇಲ್ಲಿನಂತೆಯೇ ಅಲ್ಲೂ ಹೊಳೆವ, ಕಣ್ಣು ಹಾಯದ ದೂರ ಸಾಗಿಯೂ ಎದೆಯ ಬೆಸಗೊಂಡು ಬಲ ತುಂಬೋ ಮಾಯಕಾರರು...
ಕನಸೇ -
ನೀನು ನಕ್ಷತ್ರವಾಗಿ ದಿನವೆಷ್ಟಾಯಿತೋ - ಲೆಕ್ಕ ತಪ್ಪಿದ್ದೇನೆ ಮತ್ತು ಬೇಕಂತಲೇ ಲೆಕ್ಕ ಮರೆಯುತ್ತೇನೆ...
ಸಾವೇ -
ನೀ ಆಡಿ ಕಳೆಗಟ್ಟಿಸಿ ಕಳಚಿಕೊಂಡು ಹೋದ ಪಾತ್ರಗಳೆಲ್ಲ ಈಗಿಲ್ಲಿ ಈ ಎದೆಯ ಹೊಳೆಯಲ್ಲಿ ಭಾವದ ಮೀನುಗಳಾಗಿ ಈಜಿ ಈಜಿ...
ಉಫ್,
"ನೆನಪು ಒಂದೇ ಪೆಟ್ಟಿಗೆ ಹಿತ ಹಾಗೂ ಸಂಕಟ..."
#ಪ್ರೀತಿ...
↺⇋⇈⇌↻

ಅಪರಂಪಾರ ಮಳೆಯಲ್ಲಿ ನೆಂದು ಬಂದಾಗಲೆಲ್ಲಾ ತಲೆ ಒರೆಸಲು ನೀನಿಲ್ಲ ಅಂಬುದು ಮಳೆಯ ಖುಷಿಯೆಲ್ಲ ಮಳೆಯಲೇ ತೇಲಿಹೋದಂತೆ ಎದೆಯಲೊಂದು ಪ್ರೇತಕಳೆ ತುಂಬುತ್ತೆ...
#ಮಳೆಯಲ್ಲಿ_ಕಣ್ಣು_ತೊಳೆದುಕೊಂಬುವವನ_ಅನಾಥ_ಕಥೆ...
↺⇋⇈⇌↻

ಸಣ್ಣವರನು ದೊಡ್ಡವರಾಗಿ ಪರಿಚಯಿಸಿ ಹರಡುವ ನಗೆ - ದೊಡ್ಡವರು ದೊಡ್ಡವರಾಗಿ ಬೆಳೆದು ನಿಲ್ಲುವ ಬಗೆಯೇ ಹಾಗೆ...
#ಪ್ರೀತಿಯಲ್ಲಿ_ಹಿರೀಕರು...

ಹಂಚಿಕೊಂಡದ್ದಷ್ಟೇ ನನ್ನ ಆಸ್ತಿ...
#ಪ್ರೀತಿ...

ನಗೆಯು ಆತ್ಮವ ತಾಕುವ ಬಲು ಚಂದಾನೆ ಬೆರಗು...
#ಬೆಸುಗೆ...

"ಕನ್ನಡವೆಂದರೆ ಎನಗೆ ಎನ್ನೆದೆಯ ನಗುವಿನ ಭಾಷೆ - ಆಯಿಯ ಸೆರಗಿನ ಘಮದ ನೆನಪು ಲಾಲಿಯಾಗುವ ಭಾಷೆ - ಅವಳೆಂಬ ಅವಳ ಕನಸೂ ಮಾತಾಗುವ ಭಾಷೆ..."

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

ಗೊಂಚಲು - ಮುನ್ನೂರ್ಮೂವತ್ತಾರು.....

ಮೋಡಗಟ್ಟುವ ಮದ.....

ಮಿಶ್ರೀ ಜೇನಿನ ಅಚ್ಚಿನಂಥವಳೇ -
"ಎದೆಗಂಟಿಸಿಕೊಂಡ ಅಮಲು ನೀನು..."
ನೀನೆಂಬ ಪುಟ್ಟ ಆಕಾರ - ಆ ಬೆಟ್ಟ ಕಣಿವೆಯ ವಯ್ಯಾರ...
ನೀ ಕಣ್ಣ ಮಂಚಕೆ ಕಟ್ಟಿ ಹಾಕಿದ ಕನಸ ಕೂಸಿನ ಸಿಂಗಾರ...
ಹರಿವ ತೊರೆಯಾಗಿ ತೋಳ ಬಳಸಿ ನಿನ್ನೊಳಿಂಗುವ ಹಂಬಲಕೆ - 
ನಿದಿರಮ್ಮನ ತೊಟ್ಟಿಲಲಿ ಜೋಡಿ ಮಲಗಿದ ಸ್ವಪ್ನ ತೂಗುತಿದೆ ಮತ್ತೆ ಮತ್ತೆ...
ಬಿಡು, ಈ ಇರುಳ ಬಿಸಿ ಕನಸಾದರೂ ನಿನ್ನಲ್ಲಿ ನನ್ನ ಸೇರಿಸಲಿ ಸುಖ ನಿಷೇಕಕೆ...
#ಬಲು_ಪೋಲಿ_ಮೋಹಿ_ನಾನು...
↺↯↭↯↻

ಕಳ್ಳ (ಪರೋಕ್ಷ) ಮುದ್ದಿನಲಿ ಮುಸ್ಸಂಜೆಯ ಬೇಲಿ ಮುರಿದು ನನ್ನೆಲ್ಲಾ ಇರುಳ ಕುಲವ ಕಾಡುತೀಯೆ...
"ತೀರದ ಹಸಿವು ನೀನು - ಆರದ ಎದೆ ಬೆಂಕಿ..."
ನೀ ನನ್ನ ಊರು ಪೀಠವನೇರಿ, ಪ್ರೇಮ ಬಂಧದಿ ಬಳಸಿ ಸ್ವರ್ಗ ಸೀಮೆಯ ದಾರಿ ತೋರುವ ಕನಸೀಗೆ ಇರುಳ ಚಾದರದೊಳಗೆ ಉಸಿರು ಬಿಸಿಯೇರಿ ಬುಸುಗುಡುತಿದೆ - ಮೈಯ್ಯ ಕಾಮನ ತಿರುವುಗಳಲ್ಲಿ ಬೆವರು ಹಬೆಯಾಡುತಿದೆ...
#ಮೋಡಗಟ್ಟುವ_ಮದ...

ತೊಡೆಯ ಇಳಿಜಾರಿಗೆ ಮೀಸೆ ಚುಚ್ಚಿದರೆ ಕುಚಾಗ್ರದಲಿ ಉನ್ಮಾದದ ರಣ ಬೆಂಕಿ ಹೊರಳು...
ಎದೆ ಭಾರದ ಮೇಲಣ ಹಸ್ತ ಮುದ್ರೆಗೆ ನಡು ಕಣಿವೆಯಲಿ ರಸರಾಗ ಅಬ್ಬರ...
ಪೌರುಷದ ಸೊಕ್ಕಿನ ಭಣಿತಕ್ಕೆ ಕಾದು ಕೈನೀಡಿ ಪುರ ಪ್ರವೇಶದ ಹಾದಿ ತೋರಿ ಕರೆದರೆ ಒಡಲ ತುಂಬಾ ಸುಖದ ಜೀವರಸ ಹೊಳೆ...
ಪಡೆದುಕೊಳ್ಳುವ ಅವಕಾಶ ಮತ್ತು ಕಳಕೊಳ್ಳುವ ಸುಖ..‌.
#ನೆಲ_ಮೀಯುವ_ಮೋದ...
↺↯↭↯↻

ಆಟ ಮುಗಿಸಿದ ಗಂಡು ಕುದುರೆಗೆ ಉಸಿರ ತಹತಹ ಇಳಿವ ಮುಂಚೆಯೇ ನಿದ್ದೆ ಮರುಳಂತೆ...
ಆದರೆ ನೀನೆಂಬೋ ನೀನು ಕರಡಿ ಪ್ರೀತಿಯ ಹುಡುಗ - ನಿನ್ನ ಸುಖದ ಸುಸ್ತಿನ ಗಡದ್ದು ನಿದ್ದೆಯನೂ ಚುಪ್ ಅಂದು ಎವೆ ಮುಚ್ಚಿದ ಕಣ್ಣಲ್ಲೇ ಗದರಿ ಮಂಚದ ಅಂಚಿಗೇ ನಿಲ್ಲಿಸಿ, ನಂಗೆ ತಟ್ಟಿ ತಟ್ಟಿ ಮಾಡಿ ಆತ್ಮಸ್ಪರ್ಶದ ಲಾಲಿ ಹಾಡಿ ನಿದಿರಮ್ಮನ ಜೋಲಿಯಲಿ ಕೂರಿಸಿ ವಿಲಾಸದಲಿ ಮತ್ತೆ ಸುಖದ ಕನಸಿನೂರ ಬಾಗಿಲಿಗೊಯ್ಯುತ್ತೀಯಾ...
ಈಗ -
ಮತ್ತೆ ಮತ್ತೆ ಹಣ್ಣಾಗುತ್ತೇನೆ; ನಿನ್ನ ಪೋಲಿಪೋಲಿ ಕೈಂಕರ್ಯಗಳ ತೋಳಲ್ಲಿ - ಮತ್ತೆ ಮತ್ತೆ ಹೆಣ್ಣಾಗುತ್ತೇನೆ; ನೀ ನನ್ನ ಕಾಳಜಿ ಮಾಡುವ ಸಹಜ ಸೌಂದರ್ಯದಲ್ಲಿ...
#ತೋಳತೊಟ್ಟಿಲ_ಪ್ರೇಮ...
↺↯↭↯↻

ಮಹಾನಗರಗಳ ಬೀದಿಗಳ ಅಪರಿಚಿತತೆ ಕೊಡುವ ಧೈರ್ಯದಲಿ ಪ್ರೇಮವು ಜೋಡಿ ಜೋಡಿ ತೋಳು ತುಟಿಗಳ ಬಿಗಿದು ಸವಿದು ಸ್ವಚ್ಛಂದವಾಗಿ ಅರಳುತ್ತದೆ - ಪ್ರತೀ ತಿರುವಿಗೂ ಅಂಟುವ ಹರೆಯದ ಸುಖ ಸ್ಪರ್ಶ...
#ಬಾಲ್ಕನಿ_ನೋಟ...

ಈ ಇರುಳು ಹುಚ್ಚೆದ್ದರೆ ನೀನೇ ಕಾರಣ...
ಅಂದೆಂದೋ ಆ ಸಂಜೆ ಮಬ್ಬನು ಹಬ್ಬಿ, ಕಾಡು ಹಿಂದಾಗಿ ಊರು ಮುಂದಾಗೋ ಮೂರೂವರೆ ಗಜ ಮುಂಚೆ ನಿರ್ಜನ ಕಾಲುಹಾದಿ ಕವಲಾಗುವಲ್ಲಿ ಪಾದಪೀಠವನೇರಿ ನಿಂದು, ಬೆರಳ ಕಲೆಸಿ ಮುಂದಲೆಯ ಎಳೆದು, ತೋಳ ಬಳ್ಳಿಯಲಿ ಕೊರಳ ಬಳಸಿ ಕಾಡು ಲವಂಗದ ಚಿಗುರೆಲೆಯಂಥ ನಿನ್ನ ತುಟಿಯಿಂದ ಚೂರೂ ನಾಜೂಕಿಲ್ಲದ ಈ ಒರಟು ತುಟಿಗೆ ದಾಟಿಸಿದ ಚುಂಬನ ಸಿಹಿಯ ಮತ್ತ ಕಡಲು ಈಗಿಲ್ಲಿ ಮೈಯ್ಯೆಲ್ಲ ಅಲೆಯಾಗಿ ಅಬ್ಬರಿಸಿ ಮೆರೆಯುತಿದೆ...
ಮನಸೀಗ ನಿನ್ನ ಬೆತ್ತಾಲೆ ಬೆಳಕ ಅನಾಯಾಸ ತುಂಬಿಕೊಂಡ ನಿನ್ನಂತಃಪುರದ ಕನ್ನಡಿಯನು ಅಸೂಯೆಯಲಿ ಕಳ್ಳ ಬೆಕ್ಕಾಗಿ ಪರಚುತ್ತಿದೆ...
ನಿನ್ನ ನೆನಪಿನೊಲೆಯ ಮೇಲೆ ಮಾತಿಗೊಗ್ಗದ ಹಿತವಾದ ಮುನಿಸೊಂದು ಬೇಯುತಿದೆ - ನರಕಸುಖ ಹಬೆಯಾಡುತಿದೆ...
#ಮೈಗಂಟಿದ_ಹೆಣ್ಗಮದ_ನಶೆ...
*** ಬಾಲ್ಕನಿಯಿಂದ ಕಂಡದ್ದು ಕೋಣೆ ಕತ್ತಲ ಕೆಣಕಿದಾಗ...
↺↯↭↯↻

ಏನ್ಗೊತ್ತಾ -
ಬೆರಳ ಪದವಿನ್ಯಾಸಕ್ಕೆ ವಸ್ತ್ರಗಳು ಶರಣಾಗಿ ಮೈಯ್ಯ ಕಕ್ಷೆಯಿಂದ ಸಲೀಸು ಕಳಚಿಕೊಳ್ಳಬೇಕು...
ನಾಲಿಗೆಯ ಮೊನೆಯಿಂದ ನಿನ್ನ ಬೆತ್ತಲನು ಉದ್ದಕ್ಕೆ ಎರಡಾಗಿ ಸೀಳಬೇಕು...
ಉಸಿರ ಸುಳಿಯಲ್ಲಿ ಮೈಯ್ಯ ಎಲ್ಲ ಎಲ್ಲಾ ತಿರುವುಗಳ ಬೆಚ್ಚಗೆ ಬಳಸಬೇಕು...
ಬೆವರ ಸಣ್ಣ ಹನಿಗಳ ಕೂಡಿಸಿ ಹೊಕ್ಕುಳ ದಂಡೆಯ ಸುತ್ತ ಜೋಡಿ ಹೆಸರು ಬರೆಯಬೇಕು...
ತೀಡಿಯಾಡುವ ಮತ್ತ ಪಾದಗಳಲಿ ಸ್ವರ್ಗವ ಅಳೆಯುವ ಆಟಕ್ಕೆ ಕೋಣೆಯ ಕುರುಡುದೀಪವೇ ನಾಚಬೇಕು...
ಆ ಮಧುರ ಪಾಪಕ್ಕೆ ನಮ್ಮೆಲ್ಲಾ ರಾತ್ರಿಗಳ ಬರೆದು ಕೊಡಬೇಕು...
ಹೊಳೆವ ಕಾಯದ ತಿಳಿಗತ್ತಲ ಸೆರಗುಗಳಲಿ ಒತ್ತಾಗಿ ಉಳಿದ ಕೆಂಪು, ಕಂದು ಕಲೆಗಳು ಹಗಲಾಗೆ ಮಜ್ಜನ ಮನೆಯ ಕನ್ನಡಿಗೆ ಕಳೆದಿರುಳ ಪ್ರಣಯೋನ್ಮಾದದ ಆಳ ಅಗಲಗಳ ಸಾಕ್ಷಿ ಹೇಳಬೇಕು...
ಕನ್ನಡಿಯ ಕಣ್ಮುಚ್ಚಿ ರೋಮಾಂಚ ಸವಿಯುವ ಮಿಡಿತದಲೇ ಹಸಿ ಬಿಸಿ ಮೈಮನಸು ಹೊಸ ಆಟಕೆ ವೇದಿಕೆ ಹಾಗೂ ವೇಷ ಕಟ್ಟಬೇಕು...
ಇಷ್ಟೇ ಇಷ್ಟಿಷ್ಟೇ ಮೋದಪ್ರಮೋದಕೆ ನಿನ್ನ ಚೂರೇಚೂರು ಸಹಕಾರ ಬೇಕು...
#ಸಣ್ಣ_ಹಸಿವು...
↺↯↭↯↻

ಹಿತ್ತಲ ಬಾಗಿಲ ನೀರವ ಸಂಜೆಗಳಿಗೆ ನಿನ್ನಂಥವನೊಬ್ಬನ ಅಕ್ಕರೆಯ ಭುಜ ಬೇಕಿತ್ತು - ನಿನ್ನ ಒರಟು ಬೆರಳುಗಳ ನೆಟಿಗೆ ಮುರಿಯಲು ಹೆಣಗುತ್ತಾ ವಟವಟ ಮಾತಾಗಿ ನನ್ನ ನಾ ಬರಿದು ಮಾಡಿಕೊಳ್ಳಬೇಕಿತ್ತು...
ಮೋಡ ಮಳೆಯಾಗಲು ತಂಗಾಳಿ ಸ್ಪರ್ಶ ಬೇಕಂತೆ, ಎದೆ ಕಸರೆಲ್ಲ ಶೇಷವುಳಿಯದಂಗೆ ಕರಗಿ ಹನಿಯಾಗಲು ನಂದೆನಿಸಿ ತಂಪೀಯೋ ಜೋಗಿ ಹೆಗಲು ಬೇಕು ಕಾಣಾ...
ಮಲ್ಲಿಗೆ ಬಳ್ಳಿಯ ಹೊಸ ಹಿಳ್ಳಿನ ವಸಂತನ ಕನಸಿಗೆ ಆಸರೆಯಾಗಿ ಅಪ್ಪ ಅಣಿ ಮಾಡಿ ಕೊಡುತಿದ್ದ ಚಪ್ಪರದ ನೆನಪಿಗೆ ಸಂಜೆಗಳ ಕಂಗಳು ತುಂಬುತ್ತವೆ - ಅವನ ಪೆರೆಗೊನ್ ಹವಾಯಿ ಚಪ್ಪಲಿಯ ಪಟಪಟ ಸದ್ದು ಕಿವಿಯಲ್ಲಿ ಅವನ ಕೂಸೇ ಎಂಬ ಕೂಗಿನಷ್ಟೇ ಆಪ್ತವಾಗಿ ದಾಖಲಾಗಿಬಿಟ್ಟಿದೆ...
ಕೆಂಡ ಸಂಪಿಗೆ ಪಕಳೆ ಹೆಕ್ಕುವಾಗ ಮೊದಮೊದಲಾಗಿ ನನ್ನ ಹೆಣ್ತನವ ಗುರುತಿಸಿ ಶಿಳ್ಳೆ ಹೊಡೆದ ಅಚ್ಚೆಮನೆ ಕರಿ ನಾಣಿ ಸುಖಾಸುಮ್ಮನೆ ನೆನಪಾಗಿ ಈಗಲೂ ಮನಸು ನಾಚಿದಂತೆ ಭಾಸ...
ಕಪ್ಪೆ ಉಚ್ಚೆ ಕಾಲನು ಸೋಕಿ ಬಾವಿ ಕಟ್ಟೆಯ ಏಕಾಂತ ಚದುರಿದಲ್ಲಿ ಕುಪ್ಪಸ ಬಿಗಿಯಾಗಿ ಮಳೆಯ ಹಗಲಿಗೆ ಸೀತಾದಂಡೆ ಮುಡಿಸಿದ ಮೊದಲ ಪ್ರೇಮದ ನೆನಹಿನ ಹಾಗೂ ಬಿಸಿಲ ಮುಸ್ಸಂಜೆಗೆ ಜೋಕಾಲಿ ಜೀಕಿದ ನಿನ್ನಯ ಆಸೆ ಕಣ್ಣ ಕನಸಿನ ಕೆನೆಯಿರುತ್ತದೆ...
ಆಳುವವನು ರಾತ್ರಿಯ ಆಳಿಯಾನು, ಆದರೆ ಅರಳಿಸಬಲ್ಲವನು ಅನುಕ್ಷಣದ ಕನಸಾಗಿ ಹೊರಳುತ್ತಾನೆ; ಹೆಣ್ಣು ಪೂರಾ ಪೂರಾ ಹೆಣ್ಣಾಗುವುದು ಹೆಣ್ಣಾಗಿ ಅರಳಿಸಬಲ್ಲ ನಿಜ ರಸಿಕ ಆಳಿನ ತೋಳಲ್ಲಿ ಅಂತೇನೋ ಅಂತಿದ್ಲು ಅನುಭಾವಿ ಸೂಲಗಿತ್ತಿ ಅಜ್ಜಿ - ಅಂದೇ ಅದು ಅರ್ಥವಾಗಿದ್ದರೆ ಚೆಂದಿತ್ತು ಅಥವಾ ಅರ್ಥವಾಗುವ ಈ ಹೊತ್ತು ಇಲ್ಲಿ ನೀನಿರಬೇಕಿತ್ತು...
ಮೈಮನದ ಸಣ್ಣ ಕಂಪನಕೂ ಸಾಗರದ ಸಾವಿರ ಅಲೆಗಳ ನೆಂಟಸ್ತಿಕೆಯಿತ್ತವನೇ ಜಗದ ಕಣ್ಣಿನ ಕಳ್ಳ ಪ್ರೇಮವಾಗಿಯಾದರೂ ನಿನ್ನ ಜೊತೆಯಿರಲಾಗಿತ್ತು...
#ಕಥೆಯಾಗದ_ಪಾತ್ರಗಳ_ಅರ್ಧಂಬರ್ಧ_ಓತಪ್ರೋತ_ಸ್ವಗತ...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

Monday, June 1, 2020

ಗೊಂಚಲು - ಮುನ್ನೂರ್ಮೂವತ್ತೈದು.....

ಸೀರೆಗಣ್ಣು - ಸೀರೆ ಮತ್ತು ಕಣ್ಣು.....  
(ಅವಳು ಹೇಳಿದ ಸೀರೆ ವೃತ್ತಾಂತ...)

ಸುಮ್ನೇ ಕೇಳ್ತೀನಿ - ಸೀರೆ ಅಂದ್ರೆ ಯಾಕೆ ಅಷ್ಟೊಂದಿಷ್ಟ...?
ಮಂಗ್ಯಾss - ಸೀರೆ ಅಂದ್ರೆ ಬರೀ ಬಟ್ಟೆ ಅನ್ಸಲ್ಲ; ಅದು ಹುಡುಗಿಯನು ಹೆಣ್ಣಾಗಿಸಿದ ಭಾವಗುಚ್ಛ...
ಕುಚ್ಚು ಕಟ್ಟಿದ್ದು ಸೀರೆಗಾ ಇಲ್ಲಾ ಕನಸಿಗಾ ಅನಿಸುವ ಬೆಚ್ಚಾನೆ ಮೋದ ಅಂತಂದ್ಲು ಒಂದೇ ಉಸಿರಿಗೆ...
ಕೊಂಡು ತಂದಲ್ಲಿಂದ ಹಳತಾಯ್ತೆಂದು ಬದಿಗಿಟ್ಟ ಕಾಲದ ನಂತರವೂ ಸೀರೆಯದ್ದು ಹೆಣ್ಣೆದೆಯಲಿ ಶ್ರೀಮಂತ ಹಾದಿ ಗೊತ್ತಾ ಅಂದು ಸೆರಗನು ನಡುವಿಗೆ ಸಿಕ್ಕಿಸಿಕೊಂಡು ಕೂತಳು...
ಮಡಿಲು ಅಂದಾಗಲೆಲ್ಲ ಬಿಸುಪಾಗಿ ಸೀರೆಯೇ ಕಣ್ಣ ಮುಂದೆ ಅಂದಿದ್ದನ್ನು ಬೇಶರತ್ ಒಪ್ಪಿಕೊಂಡೆ...
ಸೆರಗು ಅಂದ್ರೆ ಆ ತುಂಟ ನೆನ್ಪಾಗ್ತಾನೆ ಅನ್ನುತ್ತಾ ತೆಳ್ಳಗೆ ಬೆವರಿದ ನೊಸಲ ತೀಡಿಕೊಂಡಳು; 'ಗೋಪಿಯ ಸೆರಗಿನಂಚಲಿ ಕೊಳಲ ಕಣ್ಣೊರೆಸಿ ಉಸಿರೂಡಿದವನ ಮೋಹರಾಗದಲಿ ಕಣ್ಣು ತೂಗುತ್ತಾ ಗೋಕುಲವು ಅಮೃತವ ಕಡೆದು ಬೆಣ್ಣೆ ತೇಲಿಸಿದ ಕಥೆ ಎಷ್ಟು ಚಂದ' ಎನ್ನುವಾಗಿನ ಮಳ್ಳ ನಾಚಿಕೆಯಲಿ ಹೊಳೆವ ಕಂಗಳಲಿ ಅಡಗಿರುವ ಹಳೇ ಬೀದಿಯ ಕಳ್ಳ ಕರಿಯನ ಕುರುಹಿಗೆ ಹೆಸರು ಹುಡುಕಿ ಸೋತೆ...

ಯಾವುದೋ ಹಾದಿಯಲಿ ಎನ್ನ ಕಣ್ಣು ಕಟ್ಟಿದ ಸೆರಗಿನಂಚಿನ ಜಾಡು ಹಿಡಿದು ಎದೆಯ ಅಂತಃಪುರದ ಬಾಗಿಲು ಕಾಯ್ದ ಹಳೆಯ ಕಥೆ ನೆನಪಾಗಿ ತಡವರಿಸುವ ಕಣ್ಮಿಟುಕಿಸಿ ಅಂದೆ: ಸೀರೆ, ಹೂಂ - ಪಟ್ಟಿ ಮಾಡಿ ಎಲ್ಲಾ ಮುಚ್ಚಿಟ್ಟೂ ನೋಡುಗನೆದೆಯಲಿ ಬಹುವಾಗಿ ಬೆವರಿಳಿಸುವುದಂತೂ ದಿಟ...
ಗಲಗಲಿಸಿ ನಕ್ಕಳು, ಸೀರೆಯ ಎದೆ ಬೀಗಿದಂತೆನಿಸಿತು; ಸೀರೆಗಂಟಿ ಅರಳಿದ ಕಂಗಳದ್ದೇ ಮಜವಾದ ಕಥೆ ಅಂತಂದು ಮಾತಾದಳು - ತೆರೆದ ಕಿವಿಯಾದೆ...

ಓತಪ್ರೋತ ಜೋಡಿಸಿಟ್ಟ ಅವಳ ಸೀರೆ, ಹಂಗೇ ಸೀರೆಗಾತುಕೊಂಡ ಕಂಗಳ ಮಾತು:
ಗೊಂಬೆಗೆ ಸೀರೆಯುಡಿಸಿದ ಬೆರಳ ಕೌಶಲ್ಯಕೆ ಮೆಚ್ಚುಗೆ ಪತ್ರ - ಸೀರೆಯಂಗಡಿಯ ಕಣ್ಣಿಲ್ಲದ ಬೊಂಬೆಯುಟ್ಟ ಸೀರೆ ಮಡತೆಗಳ ಮೇಲೆ ಇವಳ ಕಣ್ಣು...
ಮನಕೊಪ್ಪಿದ ಸೀರೆಯ ಸೊಬಗಿನ ಬಗ್ಗೆ ಮನಮೆಚ್ಚುವಂತೆ ತಿರುವಿ, ಹರವಿ ಮಾತಾಡೋ ಮಾರುವಾತನ ಲಾಭದಾಸೆಯ ಕಣ್ಣು...
ಬಣ್ಣಕೆ, ಅದಕೊಪ್ಪುವ ಬಣ್ಣದ ರವಿಕೆ ಖಣಕೆ, ಅಂಚಿನ ಹಾಗೂ ಸೆರಗಿನ ಚಿತ್ತಾರಕೆ, ಬೆರಳಿಗಂಟಿದ ಹಿತ ಸ್ಪರ್ಶಕೆ ಮಾರುಹೋಗುವ ಹೆಂಗಣ್ಣು...
ಸೀರೆ ಕುಪ್ಪಸಗಳ ನಡುವಿನ ನುಂಪು ಇಳಿಜಾರು ಹೊಳೆಯ ಈಸುವಾಸೆಯ ಬೆನ್ನಿಗಂಟಿದ ಗಂಡು ಕಣ್ಣು...
ಹೊಕ್ಕುಳ ಸುಳಿ ದಾಟಿ ಉದ್ದುದ್ದ ಬಿಳಲು ಬಿದ್ದ ಅಲೆಅಲೆ ನೆರಿಗೆಗಳ ಸೀಳುವ ಬಾವಲಿ ಕಣ್ಣು...
ತುಂಬು ಎದೆ ಗುಂಭಗಳ ಬಳಸಿ ಛಾವಣಿಯಾದ ಸೆರಗ ತುದಿಗೆ ಜೀಕೋ ಅವನ ಮತ್ಸರದ ಬಿಸಿಯ ಉರಿಗಣ್ಣು...
ಯಾವ ಎಳೆಯ ಸೆಳೆದರೆ ಯಾವ ಸುಳಿ ಬಯಲ ಸಂಗಕೆ ಬಿದ್ದೀತೆಂದು ಒಳಗೇ ಮಂಡಿಗೆ ಬೇಯಿಸೋ ಮನದನ್ನನ ಆಶೆಬುರುಕ ಮತ್ತ ಕಣ್ಣು...
ಸೀರೆಯ ನವಿಲು, ಚಿಟ್ಟೆ, ಚುಕ್ಕಿಗಳೆಲ್ಲ ಗೆಜ್ಜೆ ಕಟ್ಟಿ ಕುಣಿದಂಗೆ ಅವನ ಉನ್ಮತ್ತ ಬೆರಗುಗಣ್ಣು...
ಅಂದವ ಮೆಚ್ಚಲು ಅಸೂಯೆ ಕಾಡುವಾಗ ಸೀರೆಯನು 'ಸುಮಾssರು' ಅನ್ನುವ ಸಾಟಿಯವಳ ಹೊಟ್ಟೆಕಿಚ್ಚಿನ ಸಣ್ಣ ಕಣ್ಣು...
ಹಳೆ ಸೀರೆ ಜೋಲಿಯಲಿ ಕೇಕೆಯಾಗುವ, ಅಲ್ಲೇ ದೇವನಿದ್ದೆಯಾಳುವ ಬಾಲ ಗೋಪಗೋಪಿಯರ ಮುಗ್ಧ ಕಣ್ಣು...
ಅವಳುಡುವ ಸೊಬಗನು ಆದಿಯಿಂದ ತುಂಬಿಕೊಂಡು ಅವಳ ಅವಳಿಗೇ ತೋರಿ ಬಿಂಕದ ನಾಚಿಕೆಯ ನೆಟಿಗೆ ಮುರಿಯೋ ಅವಳಂತಃಪುರದ ಕನ್ನಡಿಯ ಬಿಂಬಗಣ್ಣು...
ಮುಚ್ಚಿಡುವ ನೆಪದಲಿ ಸೆರಗ ಸರಿಮಾಡಿಕೊಂಬವಳ ಪರಚುಗಣ್ಣು - ಎಡೆಯಿಂದ ಇಣುಕೋ ಯೌವನ ಫಲ ಸಮೃದ್ಧಿಗೆ ರುದಯ ಬಡಿತ ಏರಿ ಚಡಪಡಿಸೋ ಅವನ ಹದ್ದುಗಣ್ಣು...
ತುಂಟ ಗಾಳಿ, ಮರುಳು ಸೆರಗು, ಹೊಕ್ಕುಳ ತೀರ, ಭುಜದ ತಿರುವಿನ ಭವ್ಯ ಮಾಟ, ಸೆರಗ ಪಟ್ಟಿ ಆಳ ಸುಳಿಯಲಿ ಉಸಿರು ಸಿಕ್ಕಿಕೊಂಡ ಹಪಾಪೋಲಿ ಕಣ್ಣು...
ಸೀರೆ ಸೀಮೆಯ ಈ ಅಂದ, ಬೆಡಗು, ಬಿನ್ನಾಣ ಎಲ್ಲ ಎಲ್ಲಾ ತಂದೆಂದು ಬೀಗಿ ಗತ್ತಿನಲಿ ನಡೆವ ಅವಳವನ ಸೊಕ್ಕಿನ ಬೆಕ್ಕುಗಣ್ಣು...
ಹೆಣ್ಗಮವ ತಬ್ಬಿ, ಸಂತೆಯಲೂ ಅವಳ ಹಬ್ಬಿದ ತನ್ನ ಸಮನಾರೆಂದು ಅವಳ ಹೆಜ್ಜೆಯೊಂದಿಗೆ ಚಿಮ್ಮಿ ನಲಿಯುವ ಸೀರೆ ನೆರಿಗೆಗಳ ಮೈತುಂಬಾ ನವಿಲ ಬಣ್ಣದ ಕಣ್ಣು...
ಅವಳಂದವ ಗುಣಿಸಿ, ಅವನ ಮತ್ಸರವ ದಣಿಸಿ, ಅವರ ಏಕಾಂತ ಪ್ರೇಮ ಪಾರಾಯಣದಲಿ ತಾನೇ ನುರಿ ನುರಿ ದಣಿದು ಚದುರಿ ಸಜ್ಜೆಮನೆಯ ಅನಾಮಿಕ ಅಂಚಲ್ಲಿ ಮುದುರಿ ಕೂತು ಅರೆಬರೆ ಎವೆ ಮುಚ್ಚಿದ ಜರಿಯಂಚ ಸೀರೆಯ ಕಳ್ಳ ಕಣ್ಣು...
ಸೀರೆಯ ಅವಸ್ಥೆಗೆ ಗುಂಬನದ ನಗೆ ಬೀರಿ, ಮುಂದಿನ ಕಥೆಯ ಅವರೀರ್ವರ ಉನ್ಮಾದಕೆ ಸಿಕ್ಕಿ ಗಾಯಗೊಂಡ ಕುಪ್ಪಸವ ಕೇಳಿ ಅಂತಂದು ಮೆಲ್ಲನೆ ಆರಿದ ಕೋಣೆ ದೀಪದ ಬತ್ತಿದ ಕಣ್ಣು...
ಅವಳ ಬೆತ್ತಾಲೆ ಚೆಲುವಿನ ಬೆಳಕೇ ಕಣ್ಕುಕ್ಕುವಾಗ ಹೊರಗಣ ಬೆಳಕಿನ್ಯಾಕೆ ಅನ್ನುತ್ತಾ ಸೀರೆ ಮುಚ್ಚಿಟ್ಟ ಅವಳಂಗಾಂದಕೆ ತೋಳ್ದೆರೆದವನ ಅಮಲುಗಣ್ಣು...
ರವಿಕೆ ಗಾಯವ, ಮೈಯ್ಯ ಹೂಳಿದ ಸುಖದ ಗಾಯಗಳೊಡನೆ ತುಲನೆ ಮಾಡಿ ಅವನ ಒರಟು ಬೆರಳುಗಳ ಹಿತಾಘಾತವ ನೆನೆಯುತ್ತಾ ಬೆಚ್ಚಗೆ ನಕ್ಕು ಸುಕ್ಕಾದ ಸೀರೆಯ ಮೃದುವಾಗಿ ಸವರಿ ಮಡಚಿಟ್ಟವಳ ಹಿಂಗದ ಹಸಿವು, ಉಂಡಷ್ಟೂ ರುಚಿಯೆನುವ ಮರು ಹಗಲಿನ ಉಲ್ಲಾಸದ ನಾಭಿ ಕಣ್ಣು...
ಅವನು ಉಸಿರೂಡಿ ಹೋದ ಅವಳೀಗ ಕೊಳಲು - ಅವಳ ಬೆವರು ಸವರಿದ ಅವನೀಗ ನವಿಲ್ಗರಿಯ ಚವರಿ; ಅಂತೆಲ್ಲಾ ಮೋಹಾ ಮಾಯದ ಆಟಕೆ ನೆರವಾದ ಸೀರೆ ಈಗ ತನಗಂಟಿದ ಅವಳ ಬೆವರ ಘಮವ ಆಘ್ರಾಣಿಸುತ್ತಾ ಅವಳ ಸಂದೂಕದಲಿ ಒಪ್ಪವಾಗಿ ಕುಂತು ಸುಖದ ಬೇಗೆಯ ಕಥೆ ಹೇಳುತಿದೆ...

ಅವಳೋ ಪೆಟಾರಿ ತೆರೆದಾಗಲೆಲ್ಲ ಒಂದೊಂದನೇ ಮುಟ್ಟಿ ನೋಡಿ ನೆನಹುಗಳ ನೆಳಲ ಕೆನ್ನೆ ಸವರುತ್ತಾಳೆ:
ಮೊದಲಾಗಿ ಅಮ್ಮ ಉಡಿಸಿದ ಕಂಬಿ ಸೀರೆ - ಆಯಿ ಉಡುತಿದ್ದ ಅಮ್ಮನ ಘಮದ ಸೀರೆ ಬೇರೆಯೇ ಇದೆ...
ಮನೆ ಅಂಗಳದಲ್ಲೇ ಅಪ್ಪ ಕೊಡಿಸಿದ ಪತ್ತಲ ಸೀರೆ...
ಗೆಳತಿಯೊಂದಿಗೆ ತಾನೇ ಕೊಂಡ ಕಪ್ಪಂಚಿನ ಬಿಳಿ ಸೀರೆ...
ಮೊದಲ ದಿನ ಅವನು ನೆರಿಗೆ ಕೆಡಿಸಿದ ಧಾರೆ ಮಂಗಲ ಸೀರೆ...
ಬಸಿರ ಬಯಕೆಯಲ್ಲಿ ಪ್ರೇಮದ ಫಲವಂತಿಕೆಗೆ ಉಡಿ ತುಂಬಿ ಹಾರೈಸಿದ ಗಿಣಿ ಹಸಿರು ಸೀರೆ...
ಹಸುಗೂಸಿಗೆ ಹಾಸಿಗೆಯಾಗಿಸಲು ಅಜ್ಜಿ ಹರಿದು ಪೆಂಡೆಯಾಗಿಸಿಟ್ಟ ಬಾಣಂತಿ ಸೀರೆ...
ಗಳಿಗೆ ಮುರಿಯದ ಹೊಸ ಸೀರೆಯ ಹೊಸ ಘಮ - ಹಳತಾಗುವ ಹೊತ್ತಿಗೆ ಅದಕಂಟಿ ಅವನ ಮೀಂಟುವ ತನ್ನದೇ ಕಂಪು...
ಕನಸಿನಂತ ನೆನಪುಗಳು ಹನಿ ತುಳುಕಿಸುವ ಅವಳ ಕಡುಗಪ್ಪು ಕಣ್ಣೀಗ ಬದುಕ ಚೆಲುವನು ಹರವಿಕೊಂಡ ಅವ್ಯಕ್ತ ಖುಷಿಯು ಮೈನೆರೆದ ಚಿತ್ರಶಾಲೆ...
#ಸೀರೆಯೆಂಬ_ಅವಳ_ಶಾಯರಿ...

Friday, May 1, 2020

ಗೊಂಚಲು - ಮುನ್ನೂರ್ಮೂವತ್ನಾಕು.....

ಪ್ರಣಯಾಗ್ನಿರಾಗ.....

ಈ ಎದೆಯ ಬಡಿತ ಆ ಎದೆಯ ಮಿಡಿತ ಬೆರೆತ ಸುರತದಲಿ ಸಳಸಳನೆ ಸುರಿದ ಸುಖದ ಬೆವರು...
ಸ್ವರ್ಗದೂರಿನ ಹಾದಿಯ ಮಳೆಯಂಥ ಆ ಸ್ವೇದಸೆಲೆಯೇ ಇರುಳ ಸೌಂದರ್ಯದ ಭಾಷೆ, ಭಾಷ್ಯ ಎರಡೂ...
#ಪ್ರಣಯ_ಪ್ರಮೋದ...
↺↜⇞↝↻

ಬಿನ್ನಾಣಗಿತ್ತೀ -
ಕನಸಲ್ಲಿ ನೀ ಬಿಂಕದಿ ಸೊಂಟ ತಿರುವಿ, ನಾಚಿಕೆಯ ವಸನವಳಿದು ಇಷ್ಟಿಷ್ಟೇ ಅರಳೋ ಚಂದವ ಬೆಳದಿಂಗಳ ಕಿವಿಯಲ್ಲುಸುರಿದೆ - ಚಂದಿರನೋ ಹೊಟ್ಟೆಕಿಚ್ಚಿನಲಿ ಮೋಡವ ಹೊದ್ದುಕೊಂಡ...
ಕಣ್ಣ ಗೋಳದ ಅಂಚಿನಲಿ ಮುಚ್ಚಳವಿಲ್ಲದ ಬಣ್ಣದ ಕುಡಿಕೆಗಳು ಉರುಳಿ ಬಿದ್ದಿವೆ...
#ಅಂತಃಪುರದ_ಬೆತ್ತಲೆ_ಬೆಳಕು...
↺↜⇞↝↻

ಗರಿ ಬಿಚ್ಚಿದ ನವಿಲು - ಗುಮಿಗುಡುವ ಮೋಡ ಬಾನು - ಹಸಿರು ಹೊದ್ದ ಗಿರಿ ಕಣಿವೆ - ಘಮ್ಮೆನ್ನೋ ಮಣ್ಣ ಬಯಲು; ಯಾವುದು ಸಮವಿಲ್ಲಿ ಹೆರಳಿನಾಚೆ ಕೈಚಾಚಿ ಕಿರುನಗುವ ಅರಳು ಹರೆಯದ ಹೆಣ್ಣ ಒನಪಿಗೆ, ಎಲ್ಲ ಆಪೋಶನ ಅವಳೆದೆಯ ಬಿಚ್ಚು ಬೆಳಕಿಗೆ...
#ಪ್ರಣಯಗಂಧಿ...
↺↜⇞↝↻

ಬಿಸಿ ಉಸಿರಿನೊಡಗೂಡಿ ತಂಪು ಬೆಳದಿಂಗಳೂ ಬರಿಮೈ ಬೆಂಕಿಯಲಿ ಹಾಯುವ ನಟ್ಟಿರುಳ ಸೊಬಗು - ಬಿಸಿಲ ಮಚ್ಚಿನ ಏಕಾಂತದಲಿ ಕಾಂತಾಕಾಂತೆ ಉತ್ಕಂಠ ಪ್ರಣಯ ಸಂಹಿತೆ...
ಮೈಯ್ಯ ಯಾವ ತಿರುವಲ್ಲೂ ಚೂರೇ ಚೂರೂ ಹಸಿವು ಬಾಕಿ ಉಳಿಯದ ಹಾಗೆ ಅಡಿ ಮುಡಿ ಹಿಡಿ ಹಿಡಿ ಆವರಿಸಿ ಜೀವತಂತುಗಳ ಮೀಟಿ ಚೆಲುವನುಂಡು ಸುಖವನುಣಿಸಿ ನುಲಿಸಿ ನಲಿವ ಕಾಂಕ್ಷೆಯ ಕುದಿಯಲ್ಲಿ ಕರಗಿ ವಿವಶವಾಗುವ ಜೀವಭಾವೋತ್ಸವ ರಾಗ ಸಂಯೋಗ...
ಸುಖದ ಸವಿ ಸುಸ್ತಿನಲಿ ತೂಗುವ ಮತ್ತ ಮುಂಜಾವಿನ ಕಣ್ಣ ಸರಸಿಯಲಿ ತೇಲುವ ಪ್ರೇಮ ದೀಪ...
#ನೀಲಿ_ನೀಲಿ_ಕನಸಿನಂತಃಪುರದ_ಬೆಚ್ಚಾನೆ_ಬೆಳಕು...
↺↜⇞↝↻

ಅವಳ ಎದೆ ಕಣಿವೆಯ ಕಿರು ದಾರಿಯ ಶುರುವಾತಿನ ತಿಳಿಗತ್ತಲ ಮಗ್ಗುಲಲ್ಲಿ ಹೊಸ ಮಚ್ಚೆಯೊಂದು ಅರಳಿದೆ - ಗಿರಿ ಚೆಲುವಿಗೆ ಕಣ್ಣೆಸರು ತಾಕದಂಗೆ ಕಾಯೋ ಕಿಲ್ಲೆದಾರನಂತೆ ಮಿರುಗಿದೆ...
ಅದೀಗ ನನ್ನ ಸುಡು ತುಟಿಗಳ ಮೊದಲ ಮುದ್ದಿನ ಹಕ್ಕುದಾರ...
#ಪ್ರಣಯಾಗ್ನಿರಾಗ...
↺↜⇞↝↻

ಬೆಳುದಿಂಗಳ ಬಯಲ ಸೆರಗಿನ ನಿನ್ನಂದದ ಒಳ ಮಡತೆಗಳ ಮಿಡಿತಗಳ ಸುಳಿ ಸುಳಿ ಕಾವ್ಯಾನಂದ...
ಬೆಳಕಿನುಸಿರ ಕಲಕುವ ಅರೆಗತ್ತಲ ಪತ್ತಲ ಹೊದ್ದ ಗಿರಿ ಕಂದರ ಕಿಲ್ಲೆಗಳ ಆರೋಹಣ ಅವರೋಹಣಗಳ ಮಹಾಮೋಹದ ಸಾಹಸೀ ದಿವ್ಯಾನಂದ...
ಹಿತವಾಗಿ ಸುಡುವ ನಿನ್ನ ನವಿರು ಬೆತ್ತಲೆ ಬೆಳಕು...
ಸದಾ ಎಚ್ಚರ ನಿನ್ನೆಡೆಗೆ ಈ ಮಧುರ ಪಾಪದ ಹಸಿವು...
#ನೀನೆಂಬೋ_ಭಾವದೊಕ್ಕಲು...
↺↜⇞↝↻

ನಾಭಿ ಬಳ್ಳಿಯ ಮಿಂಚಿನ ಸೆಳಕಾದ ಕನಸೇ - 
ನಿನ್ನ ನಶೆಯಲ್ಲಿ ಮರೆತೆಲ್ಲ ಕೆಲಸಗಳ ಪಟ್ಟಿ ಮಾಡಬೇಕು...
ಆ ಮೃದುಲ ತಪ್ಪುಗಳಿಗೆಲ್ಲ ರಸಜ್ಞ ಬೊಮ್ಮನನೇ ಹೊಣೆ ಮಾಡಬೇಕು...
#ಸಮಯಾಸಮಯವುಂಟೇ_ಚೆಲುವು_ಕಾಡಲು...
↺↜⇞↝↻

ಮುಸ್ಸಂಜೆಯ ಕಣ್ಣಿಗೆ ಬೆತ್ತಲೆ ಬೆಳಕನುಡಿಸಿ ಎದೆ ಹಸಿವ ಮೀಟುವವಳೇ -
ಕಣ್ಣಿಂದ ಕರುಳಿಗಿಳಿದ ನಿನ್ನ ಚೆಲುವೆಂಬೋ ಶರಾಬಿನ ಖದರಿಗೆ ನಾಭಿಚಕ್ರ ಸುಡುತಲಿದೆ...
ಇರುಳ ರಂಗಮಂಚದಲಿ ಕನಸು ನಾಗ ನೃತ್ಯೋತ್ಸವ...
ಕತ್ತಲೆಯ ಗೂಡಿನ ಬೆಚ್ಚಾನೆ ಬೆಳಕೇ -
ಭಾವದಲ್ಲೊಂದು ತೀವ್ರ ನಶೆಯಿಲ್ಲದೇ ನಿನ್ನೊಳಿಳಿದು ನಿನ್ನ ತಾಕುವುದಾದರೂ ಹೆಂಗೆ...
#ಸಂಭ್ರಾಂತಿ...
↺↜⇞↝↻

ನನ್ನ ತೋಳಲ್ಲರಳುವ ಸುಖದ ಹೂವಲ್ಲಿ ನಿನ್ನ ಪ್ರೇಮದ ಚಂದ ಬಂಧ...
ಇರುಳ ಸುಗ್ಗಿ ಕುಣಿದೆದ್ದ ನನ್ನ ಬೆವರಲ್ಲಿ ನಿನ್ನ ಗಂಧ...
#ಈ_ಇರುಳೆಷ್ಟು_ಚಂದ...
#ಸುರತ_ಲೋಬಾನೆ...

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)

ಗೊಂಚಲು - ಮುನ್ನೂರ್ಮೂವತ್ಮೂರು.....

ಕೌದಿಯೊಳಗಣ ಸಜೀವ ಕೆಂಡ.....

ಸೋನೆ ಮಳೆಯ ಮೈಗೆ ಮಣ್ಣ ಘಮ ಅಂಟಿದೆ...
ಅಧರ ಮಧುವ ಕುಡಿಯುವಾಗ ಪುಪ್ಪುಸ ಸೇರಿದ ನವಿರು ಕಂಪು ಅಲ್ಲೇ ಮನೆ ಮಾಡಿದೆ...
ವಿರಹದಿರುಳ ಮರುಳಿನಲ್ಲಿ ನಿನ್ನಂದದ ಸ್ವಪ್ನವನು ಹಾಸುವುದಾ ಇಲ್ಲಾ ಹೊದೆಯುವುದಾ...
ಅದಲೀ ಬದಲಿ ಕೂಟದಲ್ಲಿ ತಳಕಂಬಳಕ ತೆಕ್ಕೆ ಬಿದ್ದ ಬಿಗಿಯ ನಡುವೆ ಗಾಳಿಗೆಲ್ಲಿ ಜಾಗ ಬಿಡಲಿ...
#ಕಾಮನಮಲು...
↞↟↡↠

ಸಜೀವ ವಿಗ್ರಹವೇ -
ತಂಬೂರಿಯ ಮೀಟಿ ಬಂದ ಕೈಯ್ಯ ರಸಿಕ ಗುಂಗಲ್ಲಿ ಅಂಗನೆಯೆ ನಿನ್ನಂಗದ ಮೃದು ಗುಂಬಜುಗಳ ಬರೆದಂತಿದೆ ಆ ಬೊಮ್ಮ...
ಅಂದೆಂದೋ ಸಮೃದ್ಧ ಕೊಂಡಾಟದ ಇಡೀ ಇರುಳು ನಿನ್ನ ಎದೆ ಗೊಂಚಲ ಕೊರಕಲಿನಲಿ ಉಸಿರು ಸುಸ್ತಾಗಿ ಪವಡಿಸಿದ ಸುಖೀ ಘಳಿಗೆಯ ನೆನಪೊಂದು ಮತ್ತೆ ಮತ್ತೆ ನಾಭಿಮೂಲದಿಂದ ನಡುನೆತ್ತಿಯವರೆಗೆ ಸುಳಿಸುಳಿದು ಜೀವವ ಝಲ್ಲೆನಿಸುವಲ್ಲಿ ಈ ಮೂರಡಿ ಆರಡಿ ಜೀವನದ ದುರ್ಭಿಕ್ಷ ರಾತ್ರಿಗಳೂ ಸಹನೀಯ ನೋಡು...
#ಸ್ವಪ್ನ_ಸಂಗಾತ...
↞↟↡↠

ಎದೆ ಮಿದುವಿನೇರಿ - ಚಂದ್ರನ ಕಲೆಯಂದದ ಒಂಟಿ ಮಚ್ಚೆ - ಕುಪ್ಪಸದಲಿ ಅವನನೇ ಬಚ್ಚಿಟ್ಟುಕೊಂಡಂತ ಅಬ್ಬರ...
ಕಾರಣ -
ಮಚ್ಚೆಯ ಕಚ್ಚಿಹಿಡಿವ ಅವನ ಕಣ್ಣ ಮೋಹದ ಮುದ್ರೆಯುಂಗುರ...
#ದೃಷ್ಟಿ...
↞↟↡↠

ಅಯ್ಯೋ ನನ್ನ ದಾಹವೇ - ಬಗೆದು ಮುಗಿಯದ ಮೋಹವೇ...
ತುಟಿಯು ತುಟಿಯ ಕಚ್ಚಿ - ನಡುವಿಗಾದ ಗಾಯ...
ಹಲ್ಲ ಬೇಲಿಯ ದಾಟಿ ನಾಲಗೆಯು ಜಿಹ್ವೆಯಾಳವನೆಲ್ಲ ತೀಡಿ - ರತಿಯ ರಣರಾಗದ ಓಂಕಾರಕೆ ಕಣ ಕಣ ಶ್ರುತಿಗೊಂಡು ಮಿಡಿದ ನರನಾಡಿ...
ಕರತಲ ಇಂದ್ರಜಾಲ ಮಂತ್ರ ತಂತ್ರಕೆ - ಎವೆ ಮುಚ್ಚಿದ ಸಮ್ಮೋಹಕ ಆಹಾಕಾರಕೆ...
ಆಹ್...
ಎಲ್ಲಾ ಇಲ್ಲೆಲ್ಲಾ ಮಾಯವು - ಅದೂ ಇದೂ ಉಳಿದೆಲ್ಲವೂ ಮಿಥ್ಯವು - 'ಕಾಮಾ' ನೀನೊಂದೇ ಸತ್ಯವು...
ಇಂತಾಗಿ -
ಹಿಂಗದಿರು ನನ್ನೊಳ ದಾಹವೇ - ಮತ್ತೆ ಮತ್ತೆ ಹೊಸತೇ ಆಗಿ ಹುಟ್ಟುತಿರು ಮೋಹವೇ...
#ನಶೆ...
↞↟↡↠

ಹಸಿದ ಕೂಸಿನ ಹಾಲ್ಬಾಯಿ ಕನಸು ಹಾಳು ಸುರಿವ ರಾತ್ರಿಗಳ ಬೆವರಿಳಿಸೋ ನಿನ್ನ ಬೇಹದ್ ಮಾದಕತೆ...
ನಿನ್ನ ತಾಜಾ ಚೆಲುವಿನ ತೆಕ್ಕೆಯಲ್ಲಿ ನನ್ನ ಹುಟ್ಟಾ ಪೋಲಿತನವೆಲ್ಲ ಮದವಳಿದು ಸುಟ್ಟು ಕಮ್ಮನೆ ಹಬೆಯಾಗಿ ಹರಡಿದ ಅನಿರ್ವಚನೀಯ ಸುಸ್ತಲ್ಲಿ ಇರುಳ ಮೈಯ್ಗೀಗ ಜನ್ಮಾಂತರ ತಾಜಾತನ...
ಸ್ವಪ್ನ ಸುರಿದ ಸುಖಕ್ಕೆ ಸಾಕ್ಷಿ ಚಂಚಲ ಮಿಂಚಿನ ಕಣ್ಣುಗಳೇ...
#ಕೌದಿಯೊಳಗಣ_ಸಜೀವ_ಕೆಂಡ...
↞↟↡↠

ನಡು ಮಧ್ಯಾಹ್ನದ ನಡು ಮಡುವ ಮತ್ತೇರಿಸೋ ಮೃದ್ವಂಗೀ -
ನಿನ್ನ ಚೆಲುವ ಪರಿಪಾಕ ಸಹವಾಸದಲಿ ಕಣ್ಣು ತೂಗಿ, ನಾಭಿ ಚಕ್ರದಾಳದಿಂದ ಭಗ್ಗೆನುವ ಬೆಂಕಿ ಸುಳಿಯೆದುರು ಸುಡು ಸೂರ್ಯನೂ ಮಂಕು ಮಂಕು...
ನನ್ನೆಲ್ಲಾ ಪೋಲಿ ಪ್ರಲಾಪ ಪ್ರತಾಪಗಳೂ ನಿನ್ನ ತೋಳಲ್ಲೇ ಗತಿ ಕಾಣಲಿ...
#ಸುಖ_ಸಂಕ್ರಮಣ...
↞↟↡↠

"ಹೆಣ್ಣನು ಹಾಡದೇ ಚೆಲುವನು ಹೇಳಲಿ ಹೇಗೆ..."
ಹೆಣ್ಣೇ ನಿನಗೆ ನಿನ್ನ ಅಂದ ಚಂದವೆಲ್ಲ ನಿನ್ನ ಕನ್ನಡಿಯಲಿನ ಮೆರಗಷ್ಟೇ ಇದ್ದೀತು - ನನ್ನೆದೆಯ ಕಣ್ಣಿಗಲ್ಲವಾ ಅದು ಲಾವಣ್ಯದ ಸುಗ್ಗಿ ಸೊಬಗು...
ಪ್ರಕೃತಿಗೆ ವಸಂತವೂ, ಗ್ರೀಷ್ಮವೂ ಸಹಜಾತಿಸಹಜ ಚರ್ಯೆ... 
ಅದನ್ನ ನೋಡೋ ಕಣ್ಣಿಗೆ, ಅದರೊಡನಾಡೋ ರಸಿಕ ಜೀವಿಗಲ್ಲವೇ ಅದರ ನಲಿವು, ನೋವು, ಬೆಡಗು, ಬಿನ್ನಾಣಗಳ ಭಾಷ್ಯದ ಹಂಗು ಗುಂಗು...
#ಪರಾಕು...
↞↟↡↠

ಹೊಕ್ಕುಳ ಸುಳಿ ಚುಂಬನ - ನಿತಂಬ ದಿಬ್ಬ ಆಲಿಂಗನ - ಪಥ್ಯ ಅರಿಯದ ಬೆರಳುಗಳ ಮೈ ದಂಡೆಯ ಓತಪ್ರೋತ ಸಂಚರಣ - ದಿಕ್ಕು ತಪ್ಪಿದ ಉಸಿರು - ಊರು ಕಣಿವೆಯ ಭೇರಿ - ನರ ನರ ನುರಿ ನುರಿ ಹುರಿಗಟ್ಟಿ ಸಿಡಿದು ಸೊಕ್ಕಿ ಹರಿಯುವ ನೆತ್ತರು - ಮರಮರಳಿ ಉರುಳುರುಳಿ ಅಪಾದಮಸ್ತಕ ತುಯ್ಯುವ ಚರಮಸೀಮೆಯ ಆಭೋಗ - ಆ ಸುಖಾಂತ ಸೀಮೆಯಲಿ ಮಳೆ ಮಣ್ಣು ಮಿಳಿತ ಮೆದು ಗಂಧ ಬಯಲ ಸೇರಿದಂಗೆ ಹೆಣ್ಣು ಘಮ, ಗಂಡು ಘಾಟು ಕರುಳ ತಬ್ಬಿ ಮೈನೆರೆದರೆ ಆ ನಶೆಯ ಮೈಮರೆವಿಗೆ ನನ್ನ ನಿನ್ನ ಹೆಸರು...
#ಮಿಳನ_ಅಂಗರಾಗ...
↞↟↡↠

ಬೆನ್ನ ಹುರಿಗುಂಟ ಬೆರಳು ಬರೆದು ಹೊಕ್ಕುಳಾಳದಲಿ ಪ್ರಕಟಗೊಂಡ ಮಿಥುನ ಕಾವ್ಯ - ಅಂಟಿಕೊಂಡ ಜೋಡಿ ಹೆಸರು...
#ಶ್ರೀ______

*** ಇಲ್ಲಿನ ತುಂಡು ಭಾವಗಳು ಮುಂದಿನ ಯಾವುದೇ ಬರಹದಲ್ಲೂ ಮತ್ತೆ ಕಾಣಿಸೀತು...:)